Murli du jour du mardi 3 novembre 2026

03-11-2026 praatahmurli om shanti "baapdaada"' madhuban

“meethe bachche - baap dvaara jo knowledge mili hai woh buddhi mein kaayam rakhni hai, savere-savere uth svadarshan chakradhaari ban vichaar saagar manthan karna hai''

prashn:- is eeshvareey padhaai ka law (kaayda) kaun sa hai? uske liye kaun sa direction mila hua hai?

uttar:- is eeshvareey padhaai ka law hai - niymit padhna। kabhi padhna, kabhi na padhna yeh law nahin hai। baba ne padhaai ke liye bahut prabandha diye hain। padhaai (murli) yahaan se post mein jaati hai। 7 din ka course lekar kahaan bhi padh sakte ho। padhaai kabhi miss nahin karni hai।

geet:- om namo shivaae…

om shanti। bachche jo yahaan baithe hain woh rachayita aur rachna ke aadi-madhya-ant athva svadarshan chakra ko yaad karte hain। baap ne bachchon ko knowledge di hai ki svadarshan chakradhaari bano। tum brahman bachchon ka uddeshya hai svadarshan chakradhaari banna। mool vatan, sookshm vatan, sthoolavtan, yeh 84 janmon ke chakra ko buddhi mein rakhna hai। doosra sab buddhi se nikaal dena hai। abhi tum bachchon ki buddhi mein hai barobar baba ne hamko sooryavanshi, chandravanshi banaaya tha, phir 84 janma liye hain। chalte-phirte, uthte-baithte yeh sva aatma ko baap ka aur rachna ke aadi madhya ant ka gyaan hai। abhi tumko shivbaaba ne shoodra se brahman banaaya hai। baba ne samjhaaya hai tum 84 janmon ke chakra ki baajoli kaise khelte ho। pahle-pahle ham brahman hain, ham braahmanon ko rachne vaala brahma dvaara shivbaaba hai। rachta aur rachna ke gyaan se hi tum svadarshan chakradhaari bante ho। yeh knowledge buddhi mein kaayam rakhni hai। subah ko uthkar svadarshan chakradhaari ban baith jaana chaahiye। hamne apne 84 janmon ke chakra ko jaan liya hai। ham sab aatmaon ka rachayita baap ek hai। kehte bhi hain ham sab bhaai-bhaai hain। hamaara baap woh niraakaar parampita paramatma hai, paramdham mein rahne vaala hai। ham bhi vahaan rehte the, woh hamaara baba hai। baba akshar bahut lovely hai। shivbaaba ke mandir mein jaakar kitni pooja karte hain, bahut yaad karte hain। baap kehte hain - main tumko manushya se devta, tuchchha buddhi se svachchha buddhi banaata hoon। tuchchha buddhi arthaat shoodra buddhi se svachchha buddhi banaaya tha arthaat oonch buddhi, purushottam buddhi banaaya tha। sabhi purush-stri in lakshmi-naaraayan ko naman karte hain। parantu yeh nahin jaante - yeh kaun hain? kab aaye, kya kiya? baap ne samjhaaya hai yeh bhaarat avinaashi khanda hai kyonki avinaashi baap parampita paramatma ki bhi janma bhoomi hai। patit-paavan, sarva ke sadgati daata ka janma sthaan hai to yeh hua bade se bada teertha sthaan। itna nasha thode hi kisko hai ki yeh parampita paramatma ki, sarva ke sadgati daata baap ki janma bhoomi hai। patit-paavan ki jayanti bhaarat mein hui hai। shiv jayanti manaate hain to zaroor shiv ka janma yahaan hi hota hai। yeh bhaarat bada teertha sthaan hai। parantu drama anusaar kisko pata nahin ki yeh hamaare god father athva maat-pita, patit-paavan sarva ke sadgati daata ka janma sthaan hai isliye bhaarat bhoomi ko vande maatram kehte hain arthaat is bhoomi par yeh bachchiyaan jo shreemat se bhaarat ko svarga banaati hain, unko yeh nasha rehna chaahiye ki shreemat par ham kalpa-kalpa bhaarat ko paradise banaate hain। jo jitna shreemat par chalenge utna oonch pad paayenge। bhaaratvaasiyon ne kalpa ki aayu laakhon varsha likh di hai। tum jaante ho baba jiska yeh bhaarat janma sthaan hai, usne jo dharma sthaapan kiya, uski hai geeta। geeta kisne gaai, yeh bhaaratvaasi bhool gaye hain। kitna farka ho gaya hai। kahaan niraakaar shiv, kahaan shreekrishna। tum jaante ho shreekrishna ki aatma jo gori thi woh ab bahut janmon ke ant ke janma mein tamopradhaan ban gai hai। phir inmen pravesh kar inko so shreekrishna gora bana raha hoon isliye shreekrishna ko saanvara aur gora, shyaam aur sundar kehte hain। yeh satayug ka pahla number sundar prince tha। inki mahima hai - maryaada purushottam, ahinsa parmodharma। bhaaratvaasi yeh nahin jaante ki raadhe krishna aur lakshmi-naaraayan ka aapas mein kya sambandh hai! baap kehte hain - ab tak tum jo kuchh padhte aaye ho, unmein koi saar nahin hai। ab tum sammukh baithe ho। jaante ho baba 5 hajaar varsha ke baad hamko phir se raajayog ki shiksha de rahe hain। tum jaante ho shreekrishna ki aatma ne bhi aage janma mein yeh gyaan praapta kiya hai, jo ab kar rahe hain, jiska naam mainne brahma rakha hai। shreekrishna ke bahut janmon ke ant ke janma mein main pravesh karta hoon। tum marjeeva bane ho na। tumhaare avyakt naam bhi rakhe the। ab nahin rakhte kyonki bahuton ne phaarakti de di। baap ka bankar naam rakhaakar bhaag jaae, yeh to shobhta nahin hai isliye naam dena band kar diya। ab tum brahman bane ho। prajaapita brahma ke bachche, shivbaaba ke potre ho। baap kehte hain - varsa tumko mujh se lena hai to mujhe yaad karo। inka yeh bahut janmon ke ant ka janma hai। sookshm vatan mein jo brahma dikhaate hain woh to paavan hai। sookshm vatan mein prajaapita to ho nahin sakta। baap samjhaate hain yeh vyakta hai, jhaad ke pichhaadi mein khada hai। yahaan bachchon ke saath yog mein baithe hain - pavitra pharishta banne ke liye। to sookshm vatan mein dikhaana pade। yahaan bhi prajaapita zaroor chaahiye। woh avyakt, yeh vyakta। tum bhi pharishte banne aaye ho। ismen hi manushya moonjhate hain kyonki yeh hai bilkul naya gyaan। koi bhi shaastra aadi mein yeh gyaan hai nahin। bhagwan ek hai oonch te oonch niraakaar parampita paramatma, sab aatmaon ka baap। unke rahne ka sthaan hai paramdham। unko sab yaad karte hain ki aao, hamaare oopar maaya ka parchhaaya pad gaya hai। patit ban gaye hain। yeh baaten naye ki buddhi mein baithengi nahin। ab tum rachna ke aadi-madhya-ant ko jaante ho। satayug mein ham bahut thode raajya karte the। vahaan adharma ki baat ho nahin sakti। shaastron mein kitni baaten likh di hain, parantu unmein koi saar nahin hai। seedhi utarte-utarte ab ant mein aakar patit bane hain। ab tum jump karte ho utarne mein 84 janma lage, jump second mein karte ho।

tum bachche ab raajayog seekh rahe ho, phir shantidham mein jaakar sukhdhaam mein aa jaayenge। yeh hai duhkhadhaam। pahle tum aaye ho to baap bhi pahle-pahle tumse milte hain। yahaan baap aur bachchon, aatma aur paramatma ka mela lagta hai। hisaab hai na - hamko 5 hajaar varsha hue baap se vidaai liye। pahle-pahle svarga mein part bajaaya, vahaan se part bajaate-bajaate tum neeche utarte aaye ho। abhi tum baap ke paas aa gaye ho, baaki thode bahut jo honge woh bhi aa jaayenge। phir tumhaari padhaai khatma ho jaayegi, sabko yahaan aana hai। vahaan jab khaali ho jaayega phir baba sabko le jaayega। yeh samajhne ki baaten hain। padhna hai। school mein kabhi jaana, kabhi na jaana yeh law nahin hai। baba ne padhaai ke liye bahut prabandha bhi diye hain। nahin to kabhi bhi kiske paas padhaai post mein nahin jaati hai। yeh behad baap ki padhaai post mein jaati hai। kitne kaagaj chhapte hain। kahaan-kahaan jaate hain। 7 din ka course lekar phir kahaan bhi padhte raho। is samay sabhi aadhaakalpa ke rogi hain, isliye 7 roz bhatthi mein rakhna padta hai। yeh 5 vikaaron ki beemaari saari duniya mein phaili hui hai। satayug mein tumhaari kaaya nirogi thi, ever healthy-ever wealthy the। ab to kya haal ho gaya hai। yeh saara khel bhaarat par hai। tumko 84 janmon ki ab smriti aai hai। kalpa-kalpa tum hi svadarshan chakradhaari bante ho aur chakravarti raaja bhi bante ho। yeh raajaai sthaapan ho rahi hai, ismen nambarvaar pad honge। praja bhi anek prakaar ki chaahiye। dil se poochhna chaahiye ki ham kitnon ko aap samaan svadarshan chakradhaari banaate hain। jitna jo banaayega vahi oonch pad paayega। tumko baap maaya se yuddha karna sikhlaate hain, isliye inka naam yudhishthir rakh diya hai। maaya par jeet paane ki yuddha sikhlaate hain। yudhishthir aur dhritraashtra bhi dikhaate hain। gaaya bhi jaata hai maaya jeete jagat jeet, kitna samay tumhaari jeet kaayam rahi phir haar kitna samay khaate ho। yeh bhi tum jaante ho। yeh jismaani yuddha nahin hai। na devtaaon aur asuron ki yuddha hai। na kaurvon aur paandavon ki yuddha hai। jhoothi kaaya, jhoothi maaya... yeh bhaarat jhooth khanda hai। sach khanda tha, jab se raavan raajya shuru hua tab se jhooth khanda ban gaya। eeshvar ke liye kitna jhooth bolte hain। kitna kalank lagaate hain। kalangi avtaar bhi gaaya hua hai। sabse jaasti kalank baap par lagte hain। unke liye kehte kachchha-machchha avtaar, patthar-bhittar mein eeshvar। kitni gaali dete hain। kya yeh sabhyata hai? abhi tumko roshni mili hai। tum jaante ho baap hamko rachta aur rachna ke aadi madhya ant ka raaz samjha rahe hain, jo aur koi nahin jaante। baap hi sadgati daata hai। baba ke gyaan se sabki sadgati hoti hai। baaki jo khud hi durgati mein hain woh kaise auron ki sadgati karenge। tumko aakar raajaaon ka raaja banaata hoon। tum hi pavitra poojya the, ab aakar pujaari bane ho। pavitra raajaaon ki apvitra raajaayen pooja karte hain। satayug mein double sirtaaj the। vikaari raaja hote hain to single taaj rehta hai। woh bhi mahaaraaja mahaaraani। parantu pavitra ko apvitra jaakar maatha tekte hain। woh bhaaratvaasi pavitra pravritti maarga vaale, vahi bhaaratvaasi patit pravritti maarga vaale bante hain। ab baap kehte hain tumhaara is mrityulok mein antim janma hai। abhi main aaya hoon tumko phir se satayug mein le jaane। yeh mooslon ki ladaai 5 hajaar varsha pahle bhi lagi thi। yeh puraani duniya khalaas honi hai। baap samjhaate hain grihastha vyavhaar mein rehte kamal phool samaan banna hai। kamal phool samaan tum brahman bane ho। parantu yeh nishaani vishnu ko de di hai kyonki tum sadaiv ekras nahin rehte ho। aaj kamal phool samaan bante, do varsha ke baad patit ban padte hain।

tumhaara yeh sarvottam kul hai। tum brahman choti ho। phir purnajanma lete-lete devta, kshatriy, vaishya, shoodra bante ho। shoodra se phat se devta thode hi banenge। brahman choti to chaahiye। ab braahmanon ko baba padha rahe hain। to aise baba ko phaarakti thode hi deni chaahiye। baba kehte hain aashcharyavat mera bananti, sunanti phir bhi bhaaganti ho maaya ke bananti। traitor bananti, meri ninda karaavanti... usko kaha jaata hai satguru ka nindak svarga ka thaur na paavanti। baaki woh bhakti maarga ke guru hain, ve koi sadgati daata nahin hain। sabhi aatmaon ka baap, teacher, guru ek hi niraakaar baap hai। vahi sabka uddhaar karne aaya hai। aage chalkar samjhenge phir tu let ho jaayenge। woh phir apne hi dharma mein chale jaayenge। shreshtha se shreshtha hai devta dharma। unse bhi oonch tum brahman ho jo baap ke saath baithe ho। tumko padhaane vaala vichitra aur videhi hai। baap kehte hain mujhe deh nahin hai। mujhe kehte hain shiv, mera naam badal nahin sakta। aur sabke shareeron ke naam badli hote hain। main hoon param aatma, meri janma-patri koi nikaal nahin sakta। jab behad ki raat hoti hai tab main aata hoon din banaane। ab hai sangam, in baaton ko achhi tarah samajh kar phir dhaaran karna chaahiye। smriti mein laana chaahiye। yahaan tum bachche aate ho, phursat milti hai। vichaar saagar manthan yahaan achha kar sakte ho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) sarvottam kul ki smriti se grihastha vyavhaar mein rehte kamal phool samaan pavitra banna hai। kabhi bhi sadguru ki ninda nahin karaani hai।

2) shreemat par bhaarat ko svarga banaane ki seva karni hai। svadarshan chakradhaari banna aur banaana hai। jab bhi phursat mile to vichaar saagar manthan zaroor karna hai।

vardaan:- sada kalyaankaari bhaavna dvaara gunagraahi banne vaale achal adol bhav

apni sthiti achal adol banaane ke liye sada gunagraahi bano। agar har baat mein gunagraahi honge to halchal mein nahin aayenge। gunagraahi arthaat kalyaan ki bhaavna। avgun mein gun dekhna isko kehte hain gunagraahi isliye avgun vaale se bhi gun uthaao। jaise woh avgun mein dridh hai aise aap gun mein dridh raho। gun ka graahak bano, avgun ka nahin।

slogan:- apna sab kuchh baap ko arpan kar sada halke rahne vaale hi pharishte hain।

ye avyakt ishaare - brahma baap samaan sampanna aur sampoorn sthiti ka anubhav karo

baap samaan banne ke liye brahma baap ko follow karte chalo। socho, brahma baap sampoorn kaise bane? unki kya visheshta rahi? sampoornata ka vishesh aadhaar kya raha? brahma baap ne apna har samay saphal kiya। shvaans-shvaans, second-second saphal kiya। to baap samaan banne ke liye lakshya rakho ki saphal karna hai aur saphaltaamoorta banna hai।