शनिवार 16 अप्रैल 2022 की दैनिक मुरली

16-04-2022 praatahmurli om shanti "baapdaada"' madhuban

“meethe bachche - 21 janmon ki raajaai leni hai to gyaan dhan ka daan karo, dhaarna kar phir doosron ko bhi karaao''

prashn:- chalte-chalte grahchaari baithne ka mukhya kaaran kya hai?

uttar:- shreemat par poora nahin chalte isliye grahchaari baith jaati hai। agar nishchaybuddhi ho ek ki mat par sada chalte rahe to grahchaari baith nahin sakti, sada kalyaan hota rahe। deri se aane vaale bhi bahut aage ja sakte hain। second ki baazi hai। baba ka bane to hakdaar banen, sukh ghanere ka varsa mil jaayega, parantu shreemat par sada chalte rahen।

geet:- tu pyaar ka saagar hai…

om shanti। om shanti ka arth to bachchon ko baar-baar samjhaaya gaya hai। om maana aham aatma mam shareer। baap kahenge om (aham-aatma) so paramatma। unka shareer nahin hai kyonki woh to sabka baap hai। tum aise nahin kahenge ham aatma so paramatma। ye to theek hai - aham aatma paramatma ki santaan hain। baaki aham aatma so paramatma kehna ekdam wrong ho jaata hai। tum bachche baap ko jaante ho। yeh samajhte ho ki yeh puraani duniya hai। nai duniya satayug ko kaha jaata hai। parantu satayug kab hota hai, yeh woh bichaare nahin jaante। samajhte hain kaliyug to abhi baaki 40 hajaar varsha hai। tum bachche jaante ho ham shreemat par abhi nai duniya sthaapan kar rahe hain। baap kehte hain main tumhaare dvaara nai duniya sthaapan kara raha hoon। tumhaare dvaara vinaash nahin karvaata। vahi tum shiv shaktiyaan prajaapita brahma ki mukh vanshaavli, ahinsak shakti sena ho। tum hi ho jo baap se varsa paane ke adhikaari ho। tum braahmanon ko hi shreemat milti hai। tum kaam vikaar ko jeette ho, tabhi yahaan jo aate hain unse poochha jaata hai ki agar kaam vikaar par jeet paai ho to baap se milna। maatele aur sautele hote hain। maatele kab vikaar mein nahin ja sakte। abhi hamko baap mila hai, jo gyaan ka saagar hai। krishna ko gyaan ka saagar nahin kahenge। shivbaaba ki mahima aur devtaaon ki mahima ekdam alag hai। devtaaon ki mahima hai sampoorn nirvikaari। shivbaaba ko kaha jaata hai manushya srishti ka beejroop, sat chit aananda swaroop, gyaan ka saagar। yeh shareer pahle jad hota hai phir unmein jab aatma pravesh karti hai tab chaitanya banta hai। yeh manushya srishti roopi jhaad ki utpatti kaise hoti hai, yeh sirf baap beejroop hi jaante hain। woh tumko gyaan de rahe hain। baba kehte hain tumko thoda bhi gyaan deta hoon to tum puraani duniya se nai duniya mein chale jaate ho। unko hi shivaalay kaha jaata hai। shivbaaba dvaara sthaapan kiya hua svarga, jismen chaitanya devtaayen nivaas karte hain। bhakti maarga mein unhon ko mandir mein bitha diya hai। tum ho sachche-sachche roohaani brahman। tumko shivbaaba ne brahma dvaara apna banaaya hai। woh jismaani brahman bhal kehte hain ki ham mukh vanshaavli hain। parantu phir bhi kah dete hain brahman devi devta namah kyonki samajhte hain ki ham pujaari brahman hain, aap poojya ho। vikaari brahman namah karte hain pavitra ko। tum abhi brahman ho woh samay aayega phir tum hi kahenge brahman devtaayen namah kyonki abhi tum poojya hi jaakar pujaari bante ho। yeh badi guhya ramneek baaten hain। jo shreemat par chalne vaale hain, woh is reeti dhaaran kar aur kara sakte hain। jaise barrister, surgeon jitna padhte hain utni davaaeeyaan va points buddhi mein rehti hain। naam to vakeel hoga parantu koi lakhapti aur koi ki kuchh bhi aamadni nahin hogi। yahaan bhi nambarvaar daan karte hain to unko evja milta hai, tab kaha jaata hai dhan diye dhan na khute... vahaan daan karte to alpakaal ke liye doosre janma mein milta hai। saahookaar ke ghar mein jaate hain, yahaan to 21 janma ke liye raajaai ke adhikaari ban jaate hain। tumko sab points bhi note karni hain। tumko kaagaj par dekh bhaashan nahin karna hai, parantu buddhi mein rakh bhaashan karna hai। jaise shivbaaba gyaan ka saagar, patit-paavan hai, aise tum bachchon ko bhi banna hai।

ek bachchi ne likha ki hamaara baap teacher tha, aap bhi hamaare baap, teacher ho। woh hai had ka, yeh hai behad ka। behad ka baap behad ki baaten sunaata hai। had ka baap had ki baaten sunaate hain। woh hai had ka sukh dene vaala। had ki seva karne vaale sarvodaya naam rakhte hain, yeh bhi jhooth। sarva maana saari duniya par to daya nahin karte। baap hi hai jo sarva par daya kar paavan banaate hain। tatvon ko bhi paavan banaate hain। ek hi duniya hoti hai। vahi phir nai so puraani banti hai। bhaarat hi svarga tha, bhaarat hi narka hai। aise nahin bauddhi khanda, Christian khanda koi svarga tha। ek baap hi sabko duhkh se chhudaane vaala heavenly god father hai। liberator bhi hai, guide bhi hai, unko sab yaad karte hain। baap kehte hain bachche time bahut thoda hai, abhi deh sahit sabse buddhiyog hataao। ab ham apne baap ke paas hi jaate hain phir aakar raajya karenge। mukhya hero and heroine ka part tumhaara hai। yatha maa baap tatha bachche sab purushaarthi hain। purushaartha karaane vaala ek hi parampita paramatma ati pyaara hai। bhakti maarga mein bhi unko yaad karte hain parantu unko jaante nahin। rishi muni aadi bhi kehte the - rachta aur rachna beanta, beanta hai। to aajkal ke guru kaise kehte ham hi paramatma hain! delvaada mandir mein aadi dev ka chitra hai, neeche kaala dikhaate hain phir achalghar mein sone ka rakha hai, neeche tapasya kar rahe hain oopar svarga hai। yeh hai hamaara yaadgaar। patiton ko paavan banaate to sangam hua na। bhakti maarga vaale bhi honge। baba is shareer dvaara apna jad mandir yaadgaar bhi dekhte hain। samjhaate hain main dekhta hoon - yeh hamaare yaadgaar bane hue hain। tum bhi apna yaadgaar dekho। pahle tum nahin jaante the ki yeh hamaara yaadgaar hai। abhi jaante ho tum jo poojya devta the so ab pujaari bane ho। ham so devta, ham so kshatriy... ham so ka arth bhi tum hi jaante ho। nai duniya so puraani kaise banti hai। nai banen tab puraani ka vinaash ho। brahma dvaara sthaapna to zaroor yahaan honi chaahiye। praja yahaan rachte hain। sookshm vatan mein to brahma akela baitha hai। rachna rachkar poori ki to pharishta ban gaye।

tum ho prajaapita brahma mukh vanshaavli brahman kul bhooshan। sarvodaya leader vaastav mein tum hi ho। shreemat se tum apne par bhi daya karte ho to sarva par bhi daya karte ho। shri shri shivbaaba baith tumko shri banaate hain। shri shri vaastav mein ek ko hi kah sakte hain। patit-paavan sarva ka sadgati daata ek hi hai। baaki yeh hai asatya, jhoothi duniya। ismen jo kuchh bataate hain woh jhooth hi jhooth hai। rachta aur rachna ke baare mein hi jhooth bataate hain, baba sach bataate hain। isko satya naaraayan ki katha kaha jaata hai। tum gyaan se dekho kya se kya ban rahe ho। shreemat par jitna chalenge utna oonch pad paayenge। behad ke baap se behad ka varsa liya jaata hai, isliye shreemat bhagvat geeta kaha jaata hai। baaki shaastra hain unki rachna। geeta maai baap hai। geeta khandan karne se varsa kisko bhi nahin milta। yeh baaten tum bachche hi jaante ho। aise bhi nahin ki jo puraane hain vahi hoshiyaar honge। kai naye puraanon se bhi teekhe jaate hain। deri se aane vaale bhi oonch pad pa lenge। second ki to baaji hai। baba ka bana aur hakdaar bana। agar koi thahar nahin sakte to baba kya kare। nishchaybuddhi ho shreemat par chale to bas। jaise us kamaai mein dasha baithti hai, vaise yahaan bhi dashaayen baithti hain। grahchaari bhi baith jaati hai kyonki shreemat par nahin chalte, baaki hai bilkul sahaj baat। baba mama ka bachcha bana to sukh ghanere ka varsa milta hai। ek ki mat par chalne se hi kalyaan hai। jisko tumne aadhaakalpa yaad kiya, abhi woh tumko mila hai to unko pakad lena chaahiye, ismen moonjhate kyon ho। baba kehte hain phir se drama anusaar raajya-bhaagya dene aaya hoon। meri mat par chalna hoga। buddhi se mujhe yaad karo aur koi tumko takleeph nahin deta hoon। svarga ka varsa bhi tum paate ho। kal svarga tha, aaj narka hai। abhi phir svarga banna hai। kal yahaan maalik the, aaj beggar bane ho। prince aur beggar banne ka yeh khel hai। kitni sahaj baat hai। dehi-abhimaani nahin bante, ismen hi mehnat hai। sannyaasi log kehte hain tumhein krodh aata hai to tum mukh mein muhalra (taabeez) daal do। yeh drishtaanta sab is samay ke hain। bhramri ka misaal bhi yahaan ke liye hai। vishta ke keede ko aap samaan banaati hai, kamaal hai। barobar is samay sab vishta ke keede hain। unko tum braahmaniyaan bhoon-bhoon karti ho। koi to braahmani ya brahman udne laayak ban jaate hain। koi shoodra ka shoodra rah jaate hain। sarpa ka misaal bhi yahaan ka hi hai। tum apne ko aatma samjho। yeh puraani khaal utaar satayug mein nai khaal leni hai। baap hai gyaan ka saagar, geeta kitni chhoti banaai hai। shlokon ko kantha kar lete hain। sab log un par phida ho jaate hain। geeta padhte-padhte kaliyug ka ant aa gaya hai। sadgati kisko bhi nahin milti। tumko thoda hi gyaan deta hoon - tum svarga mein chale jaate ho। kitna meetha banna hai। dhaarna karni hai। vichaar saagar manthan karna hai। din mein dhandha karo, bahut kamaai hogi। savere-savere aatma refresh hoti hai। baar-baar abhyaas karne se aadat pad jaayegi। abhi jo karega woh oonch pad paayega, nishchaybuddhi vijayanti, sanshaybuddhi vinshanti। behad ka baap mila hai, ismen sanshay kyon laaoon। shivbaaba vishwa ka maalik banaate hain, usko kyon bhoolna chaahiye। in gyaan ratnon se bada pyaar hona chaahiye। mahaadaani baap tumko vishwa ka maalik banaate hain। yeh gyaan ka ek-ek ratna laakhon roopayon ka hai। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) shreemat par chalkar apne oopar aapehi daya karni hai। sarvodaya ban patit duniya ko paavan banaana hai।

2) amritvele roohaani dhandha kar kamaai jama karni hai। vichaar saagar manthan karna hai। dehi-abhimaani banne ki mehnat zaroor karni hai।

vardaan:- sarva shaktiyon ko order pramaan chalaane vaale shakti swaroop master rachayita bhav

jo bachche master sarvashaktimaan ki authority se shaktiyon ko order pramaan chalaate hain, to har shakti rachna ke roop mein master rachayita ke saamne aati hai। order kiya aur haajir ho jaati hai। to jo hajoor arthaat baap ke har kadam ki shreemat par har samay “ji-haajir'' va har aagya mein “ji-haajir'' karte hain। to ji-haajir karne vaalon ke aage har shakti bhi ji-haazir va ji master hazoor karti hai। aise order pramaan shaktiyon ko kaarya mein lagaane vaalon ko hi master rachayita kahenge।

slogan:- simple ban anek aatmaon ke liye sample banna - yeh bhi bahut badi seva hai।

maateshvari ji ke anmol mahaavaakya - “direct eeshvareey gyaan se saphalta''

humein yeh jo avinaashi gyaan mil raha hai, yeh direct gyaan saagar paramatma dvaara mil raha hai। is gyaan ko ham eeshvareey gyaan kehte hain kyonki is gyaan se manushya janma-janmaantar duhkh ke bandhan se chhoot jaate hain। karmabandhan mein nahin aate iseelie hi is gyaan ko avinaashi gyaan kaha jaata hai। ab yeh gyaan sirf ek hi avinaashi parampita paramatma dvaara humein praapta hota hai kyonki vo khud avinaashi hai। baaki to sab manushya aatmaayen janma maran ke chakra mein aane vaali hain isliye unse mila hua gyaan humein karmabandhan se chhutkaara dene vaala nahin hai। is kaaran unhon ke gyaan ko mithya gyaan athva vinaashi gyaan kahenge। lekin yeh dev-taayen sada amar hain kyonki inhonne avinaashi paramatma dvaara yeh avinaashi gyaan praapta kiya hai, to isse siddha hai ki paramatma bhi ek hai to uska gyaan bhi ek hai, is gyaan mein do mukhya baaten buddhi mein rakhni hain, ek to ismen vikaari kaliyugi sangadosh se door hona hai aur doosri baat ki malechchha khaan-paan aadi ki parhez rakhni hai। is parhej rakhne se hi jeevan saphal hoti hai। achha - om shanti।