रविवार 6 नवंबर 2022 की दैनिक मुरली

06-11-22 praatahmurli om shanti ''avyakt-baapdaada'' revise 30-11-92 madhuban

sarva khajaanon se sampanna bano - duaaen do, duaaen lo

aaj sarva khajaanon ke maalik apne sampanna bachchon ko dekh rahe hain। har ek bachche ko anek prakaar ke avinaashi akhut khajaane mile hain aur aise khajaane hain, jo sarva khajaane ab bhi hain aur aage bhi anek janma khajaanon ke saath rahenge। jaante ho ki khajaane kaun-se aur kitne mile hain? khajaanon se sada praapti hoti hai। khajaanon se sampanna aatma sada bharpoorta ke nashe mein rehti hai। sampannata ki jhalak unke chehre mein chamakti hai aur har karma mein sampannata ki jhalak svatah hi najar aati hai। is samay ke manushyaatmaaon ko vinaashi khajaanon ki praapti hai, isliye thoda samay nasha rehta hai, sada nahin rehta, isliye duniya vaale kehte hain khaali hokar jaana hai aur aap kehte ho ki bharpoor hokar jaana hai। aap sabko baapdaada ne anek khajaane diye hain। sabse shreshtha pahla khajaana hai - gyaan-ratnon ka khajaana। sabko yeh khajaana mila hai na। koi vanchit to nahin rah gaya hai na। is gyaan-ratnon ke khajaane se vishesh kya praapti kar rahe ho? gyaan-khajaane dvaara is samay bhi mukti-jeevanmukti ki anubhooti kar rahe ho। muktidhaam mein jaayenge va jeevan-mukta dev pad praapta karenge - yeh to bhavishya ki baat hui। lekin abhi bhi mukta jeevan ka anubhav kar rahe ho। kitni baaton se mukta ho, maaloom hai? jo bhi duhkh aur ashaanti ke kaaran hain, unse mukta hue ho ki abhi mukta hona hai? abhi koi vikaar nahi aata? mukta ho gaye। agar aata bhi hai to vijayi ban jaate ho na। to kitni baaton se mukta ho gaye ho! laukik jeevan aur alaukik jeevan - donon ko saath rakho to kitna antar dikhaai deta hai! to abhi mukti bhi praapta ki hai aur jeevanmukti bhi anubhav kar rahe ho। anek vyartha aur vikalpa, vikarmon se mukta banna yahi jeevanmukta avastha hai। kitne bandhanon se mukta hue ho? chitra mein dikhaate ho na kitne bandhanon ki rassiyaan manushyaatmaaon ko bandhi hui hain! yeh kiska chitra hai? aap to woh nahin ho na। aap to mukta ho na। to jeevan mein rehte jeevanmukta ho gaye। to gyaan ke khajaane se vishesh mukti-jeevanmukti ki praapti ka anubhav kar rahe ho। doosra - yaad arthaat yog dvaara sarva shaktiyon ka khajaana anubhav kar rahe ho। kitni shaktiyaan hain? bahut hain na! aath shaktiyaan to ek sample roop mein dikhaate ho, lekin sarva shaktiyon ke khajaanon ke maalik ban gaye ho। teesra - dhaarna ki subject dvaara kaun-sa khajaana mila hai? sarva divya gunon ka khajaana। gun kitne hain? bahut hain na। to sarva gunon ka khajaana। har gun ki, har shakti ki visheshta kitni badi hai! har gyaan-ratna ki mahima kitni badi hai! chauthi baat - seva dvaara sada khushi ke khajaane ki anubhooti karte ho। jo seva karte ho usse vishesh kya anubhav hota hai? khushi hoti hai na। to sabse bada khajaana hai avinaashi khushi। to khushi ka khajaana sahaj, svatah praapta hota hai। paanchava - sambandh-samparka dvaara brahman parivaar ke bhi samparka mein aate ho, seva ke bhi sambandh mein aate ho। to sambandh-samparka dvaara kaun-sa khajaana milta hai? sarva ki duaaon ka khajaana milta hai। yeh duaaon ka khajaana bahut bada khajaana hai। jo sarva ki duaaon ke khajaanon se bharpoor hai, sampanna hai usko kabhi bhi purushaartha mein mehnat nahin karni padti। pahle hai maat-pita ki duaaen aur saath mein sarva ke sambandh mein aane se sarva dvaara duaaen। sabse bade te bade teevra gati se aage udne ka tej yantra hai ‘duaaen'। jaise science ka sabse bade te bada teevra gati ka rocket hai। lekin duaaon ka rocket usse bhi shreshtha hai। vighna jara bhi sparsha nahin karega, vighna-proof ban jaate। yuddha nahin karni padti। sahaj yogayukta, yuktiyukta har karma, bol, sankalp svatah hi ban jaate hain। aisa yeh duaaon ka khajaana hai। sabse bada khajaana is sangamayug ke samay ka khajaana hai।

vaise khajaane to bahut hain। lekin jo khajaane sunaaye, sirf in khajaanon ko bhi apne andar samaane ki shakti dhaaran karo to sada hi sampanna hone kaaran jara bhi halchal nahin hogi। halchal tab hoti hai jab khaali hai। bharpoor aatma kabhi hilegi nahin। to in khajaanon ko check karo ki sarva khajaane svayan mein samaaye hain? in sabhi khajaanon se bhar-poor ho? va koi mein bharpoor ho, koi mein thoda abhi bharpoor hona hai? khajaane mile to sabhi ko hain na। ek dvaara, ek jaise khajaane sabhi ko mile hain। alag-alag to nahin baanta hai na। ek ko laakh, doosre ko karod diya ho - aise to nahin hai na? lekin ek hain sirf lene vaale jo milta hai lete bhi hain lekin mila aur khaaya-piya, mauj kiya aur khatma kiya। doosre hain - jo mile hue khajaanon ko jama karte - khaaya-piya, mauj bhi kiya aur jama bhi kiya। teesre hain - jama bhi kiya, khaaya-piya bhi lekin mile hue khajaane ko aur badhaate jaate hain। baap ke khajaane ko apna khajaana banaae badhaate jaate। to dekhna hai ki main kaun hoon - pahle number vaala, doosre va teesre number vaala?

jitna khajaane ko sva ke kaarya mein ya anya ki seva ke kaarya mein use karte ho utna khajaana badhta hai। khajaana badhaane ki chaabi hai, use karna। pahle apne prati। jaise gyaan ke ek-ek ratna ko samay par agar sva prati use karte ho, to khajaana use karne se anubhvi bante jaate ho। jo khajaane ki praapti hai woh jeevan mein anubhav ki ‘authority' ban jaati hai। to authority ka khajaana add (jama) ho jaata hai। to badh gaya na। sirf sunna aur baat hai। sunna maana lena nahin hai। samaana aur samay par kaarya mein lagaana - yeh hai lena। sunne vaale kya karte aur samaane vaale kya karte - donon mein mahaan antar hai।

sunne vaalon ka baapdaada drishya dekhte hain to muskaraate hain। sunne vaale samay par paristhiti pramaan va vighna pramaan, samasya pramaan point ko yaad karte hain ki baapdaada ne is vighna ko paar karne ke liye ye-ye points di hain। aisa karna hai, aisa nahin karna hai - repeat karte, yaad karte rehte hain। ek taraph point repeat karte rehte, doosre taraph vasheebhoot bhi ho jaate hain। bolte hain - aisa nahin karna hai, yeh gyaan nahin hai, yeh divya gun nahin hai, samaane ki shakti dhaaran karni hai, kisko duhkh nahin dena hai। repeat bhi karte rehte hain lekin fail bhi hote rehte hain। agar us samay bhi unse poochho ki ye right hai? to javaab denge - right hai nahin lekin ho jaata hai। bol bhi rahe hain, bhool bhi rahe hain। to unko kya kahenge? sunne vaale। sunna bahut achha lagta hai। point badi achhi shaktishaali hai। lekin use karne ke samay agar shaktishaali point ne vijayi nahin banaaya va aadha vijayi banaaya to usko kya kahenge? sunne vaale kahenge na।

samaane vaale jaise koi paristhiti ya samasya saamne aati hai to trikaaldarshi sthiti mein sthit ho sva-sthiti dvaara par-sthiti ko aise paar kar lete jaise ki kuchh tha hi nahin। isko kaha jaata hai samaana arthaat samay par kaarya mein lagaana, samay pramaan har shakti ko, har point ko, har gun ko order se chalaana। jaise koi sthool khajaana hai, to khajaane ko svayan khajaana use nahin karta lekin khajaane ko use karne vaali manushyaatmaaen hain। vo jab chaahen, jitna chaahen, jaise chaahen, vaise use kar sakti hain। aise yeh jo bhi sarva khajaane sunaae, unke maalik kaun? aap ho va doosre hain? maalik hain na। maalik ka kaam kya hota hai? khajaana usko chalaaye ya vo khajaane ko chalaaye? to aise har khajaane ke maalik ban samay par gyaani arthaat samajhdaar, knowledgeful, trikaaldarshi hokar khajaane ko kaarya mein lagaao। aise nahin ki samay aane par order karo sahan shakti ko aur kaarya poora ho jaaye phir sahan shakti aaye। samaane ki shakti jis samay, jis vidhi se chaahiye us samay apna kaarya kare। aise nahin samaaya to sahi lekin thoda-thoda phir bhi mukh se nikal gaya, aadha ghanta samaaya aur ek second samaane ke bajaae bol diya। to isko kya kahenge? khajaane ke maalik va gulaam?

sarva shaktiyaan baap ke adhikaar ka khajaana hai, varsa hai, janma siddha adhikaar hai। to janma siddha adhikaar ka kitna nasha hota hai! chhota-sa raajkumaar hoga, kya khajaana hai, uska pata bhi nahin hoga lekin thoda hi smriti mein aane se kitna nasha rehta - main raaja ka bachcha hoon! to yeh maalikpan ka nasha hai na। to khajaanon ko kaarya mein lagaao। kaarya mein kam lagaate ho। khush rehte ho - bharpoor hai, sab mila hai। lekin kaarya mein lagaana, usse svayan ko bhi praapti karaana aur doosron ko bhi praapti karaana usmein nambarvaar ban jaate hain। nahin to number kyon bane? jab dene vaala bhi ek hai, deta bhi sabko ekras hai, phir number kyon? to baapdaada ne dekha khajaane to bahut mile hain, bharpoor bhi sabhi hain, lekin bharpoorta ka laabh nahin lete। jaise laukik mein bhi kaiyon ko dhan se aananda ya laabh praapta karne ka tareeka aata hai aur koi ke paas hoga bhi bahut dhan lekin use karne ka tareeka nahin aata, isliye hote hue bhi jaise ki nahin hai। to underline kya karna hai? sirf sunne vaale nahin bano, use karne ki vidhi se ab bhi siddhi ko praapta karo aur anek janmon ki sadgati praapta karo।

divya gun bhi baap ka varsa hai। to praapta hue varse ko kaarya mein lagaana kya mushkil hai। order karo। order karna nahin aata? maalik ko hi order karna aata। kamjor ko order karna nahin aata, woh sochega - kahoon va nahin kahoon, pata nahin madad milegi va nahin milegi…। apna khajaana hai na। baap ka khajaana apna khajaana hai। ya baap ka hai aur hamaara nahin hai? baap ne kislie diya? apna banaane ke liye diya ya sirf dekhkar khush hone ke liye diya? karma mein lagaane ke liye mila hai। result mein dekha jaata hai ki sabhi khajaanon ko jama karne ki vidhi kam aati hai। gyaan ka arth bhi yeh nahin ki point repeat karna ya buddhi mein rakhna। gyaan arthaat samajh, trikaaldarshi banne ki samajh, satya-asatya ki samajh, samay pramaan karma karne ki samajh। isko gyaan kaha jaata hai।

agar koi itna samajhdaar bhi ho aur samay aane par besamjhi ka kaarya kare to usko gyaani kahenge? aur samajhdaar agar besmajh ban jaaye to usko kya kaha jaayega? besmajh ko kuchh kaha nahin jaata। lekin samajhdaar ko sabhi ishaara denge ki yeh samajhdaari hai? to gyaan ka khajaana dhaaran karna, jama karna arthaat har samay, har kaarya, har karma mein samajh se chalna। samjha? to aap mahaan samajhdaar ho na। ‘gyaani tu aatma' ho ya ‘gyaan sunne vaali tu aatma' ho? check karo ki aise gyaani tu aatma kahaan tak bane hain practical karma mein, bolne mein...। aise to sabse haath uthvaao to sab kahenge ham lakshmi-naaraayan banenge। koi nahin kahega ki ham raam-seeta banenge। lekin koi to banenge na। sabhi kahenge ham vishwa-mahaaraaja banenge। achha hai, lakshya aisa hi ooncha rehna chaahiye। lekin sirf lakshya tak nahin, lakshya aur lakshan samaan hon। lakshya ho vishwa-mahaaraajan aur karma mein ek gun ya ek shakti bhi order nahin maane, to woh vishwa ka mahaaraaja kaise banenge? apna hi khajaana apne hi kaam mein nahin aaye to vishwa ka khajaana kya sambhaalenge? isliye sarva khajaanon se sampanna bano aur vishesh vartamaan samay yahi sahaj purushaartha karo ki sarva se, baapdaada se har samay duaaen lete rahen।

duaaen kisko milti hain? jo santushta rah sabko santushta kare। jahaan santushtata hogi vahaan duaaen hongi। aur kuchh bhi nahin aata ho koi baat nahin। bhaashan nahin karna aata hai koi baat nahin। sarva gun dhaaran karne mein mehnat lagti ho, sarva shaktiyon ko control karne mein mehnat lagti ho usko bhi chhod do। lekin ek baat yeh dhaaran karo ki duaaen sabko deni hain aur duaaen leni hain। ismen koi mehnat nahin karni padegi। karke dekho। ek din amritvele se lekar raat tak yahi kaarya karo duaaen deni hain, duaaen leni hain। aur phir raat ko chart check karo sahaj purushaartha raha ya mehnat rahi? aur kuchh bhi nahin karo lekin duaaen do aur duaaen lo। ismen sab aa jaayega। divya gun, shaktiyaan aape hi aa jaayengi। koi aapko duhkh de to bhi aapko duaaen deni hain। to sahan shakti, samaane ki shakti hogi na, sahansheelta ka gun hoga na। understood hai।

duaaen lena aur duaaen dena - yeh beej hai, ismen jhaad svatah hi samaaya hua hai। iski vidhi hai do shabd yaad rakho। ek hai ‘shiksha' aur doosri hai ‘kshama', raham। to shiksha dene ki koshish bahut karte ho, kshama karna nahin aata। to kshama karni hai, kshama karna hi shiksha dena ho jaayega। shiksha dete ho to kshama bhool jaate ho। lekin kshama karenge to shiksha svatah aa jaayegi। shikshak banna bahut sahaj hai। saptaah-course ke baad hi shikshak ban jaate hain। to kshama karni hai, merciful banna hai। sirf shikshak nahin banna hai। kshama karenge abhi se yeh sanskaar dhaaran karenge tab hi duaaen de sakenge। aur abhi se duaaen dene ka sanskaar pakka karenge tabhi aapke jad chitron se bhi duaaen lete rahenge। chitron ke saamne jaakar kya kehte hain? dua karo, mercy (raham) do...। aapke jad chitron se jab duaaen milti hain to chaitanya mein aatmaon se kitni duaaen milengi! duaaon ka akhut khajaana baapdaada se har qadam mein mil raha hai, lene vaala leve। aap dekho, agar shreemat pramaan koi bhi kadam uthaate ho to kya anubhav hota hai? baap ki duaaen milti hain na। aur agar har kadam shreemat par chalo to har kadam mein kitni duaaen milengi, duaaon ka khajaana kitna bharpoor ho jaayega!

koi bhal kya bhi deve lekin aap usko duaaen do। chaahe koi krodh bhi karta hai, usmein bhi duaaen hain। krodh mein duaaen hain ki ladaai hai? chaahe koi kitna bhi krodh karta hai lekin aapko yaad dilaata hai ki main to parvash hoon, lekin aap master sarvashaktivaan ho। to duaaen mili na। yaad dilaaya ki aap master sarvashaktivaan ho, aap sheetal jal daalne vaale ho। to krodhi ne duaaen di na। woh kya bhi kare lekin aap us se duaaen lo। sunaaya na gulaab ke pushpa mein bhi dekho kitni visheshta hai, kitni gandi khaad se, badbu se khud kya leta hai? khushbu leta hai na। gulaab ka pushpa badbu se khushbu le sakta aur aap krodhi se duaaen nahin le sakte? vishwa-mahaaraajan gulaab ka pushpa banna chaahiye ya aapko banna chaahiye? yeh kabhi bhi nahin socho ki yeh theek ho to main theek hooon, yeh system theek ho to main theek hooon। kabhi saagar ke aage jaakar kahenge - “he lahar! aap badi nahin, chhoti aao, tedhi nahin aao, seedhi aao''? yeh sansaar bhi saagar hai। sabhi lahren na chhoti hongi, na tedhi hongi, na seedhi hongi, na badi hongi, na chhoti hongi। to yeh aadhaar nahin rakho - yeh theek ho jaaye to main ho jaaoon। to paristhiti badi ya aap bade? baap-daada ke paas to sab baaten pahunchti hain na। yeh theek kar do to main bhi theek ho jaaoon। is krodh karne vaale ko sheetal kar do to main sheetal ho jaaoon। is khit-khit karne vaale ko kinaare kar do to centre theek ho jaayega। aise roohrihaan nahin karna। aapka slogan hi hai “badla na lo, badal kar dikhaao।'' yeh aisa kyon karta hai, aisa nahin karna chaahiye, isko to badalna hi padega...। parantu pahle sva ko badlo। sva-parivartan se vishwa-parivartan va anya ka parivartan। ya anya ke parivartan se sva parivartan hai? slogan wrong to nahin bana diya hai? kya karenge? sva ko badlenge ya doosre ko badalne mein samay ganvaayenge? “chaahe ek varsha bhi lagaakar dekho - sva ko nahin badlo aur doosron ko badalne ki koshish karo। samay badal jaayega lekin na aap badlenge, na vo badlega।'' samjha! sarva khajaanon ke maalik banna arthaat samay par khajaanon ko kaarya mein lagaana। achha!

sarva khajaanon se sampanna aatmaon ko, sarva khajaanon ko kaarya mein lagaane vaale, badhaane vaale ‘gyaani tu aatmaaen' bachchon ko, sarva khajaanon ke maalik ban samay par vidhipoorvak kaarya mein lagaane vaali shreshtha aatmaon ko, har shakti, har gun ki authority ban svayan mein aur sarva mein bharne vaali vishesh aatmaon ko, sada duaaon ke khajaane se sahaj purushaartha ka anubhav karne vaali sahajyogi aatmaon ko baapdaada ka yaad, pyaar aur namaste।

vardaan:- saadhnon ke vasheebhoot hone ke bajaae unhein use karne vaale master creator bhav

science ke saadhan jo aap logon ke kaam aa rahe hain, drama anusaar unhein bhi touch tabhi hua hai jab baap ko aavashyakta hai। lekin yeh saadhan use karte hue unke vash nahin ho jaao। kabhi koi saadhan apni or kheench na le। master creator bankar creation se laabh uthaao। agar unke vasheebhoot ho gaye to ve duhkh denge isliye saadhan use karte bhi saadhna nirantar chalti rahe।

slogan:- nirantar yogi banna hai to had ke main aur merepan ko behad mein parivartan kar do।