सोमवार 26 दिसंबर 2022 की दैनिक मुरली

26-12-2022 praatahmurli om shanti "baapdaada"' madhuban

“meethe bachche - aapas mein roothkar kabhi padhaai ko mat chhodna, padhaai chhodna maana baap ko chhod dena''

prashn:- service ki vriddhi na hone ka kaaran kya hai?

uttar:- jab aapas mein matbhed hota hai tab service vriddhi ko nahin paati। koi-koi bachche matbhed mein aakar padhaai chhod dete hain। baba saavdhaan karte hain bachche matbhed mein nahin aao, kabhi jharmui jhagmui ki baaten nahin suno, ek baap ki suno, baap ko samaachaar do to baba tumhein 16 kala sampoorn banne ki mat denge।

prashn:- padhaai chhodne ka pahla mukhya kaaran kaun sa banta hai?

uttar:- naam-roop ki beemaari। jab kisi dehdhaari ke naam roop mein phansate hain to padhaai mein dil nahin lagti। maaya isi baat se hara deti hai - yahi bahut bada vighna hai।

om shanti। bachche baithe hain dil mein nishchay hai ki behad ka baap aaya hua hai, behad ka varsa dete hain। tum sammukh baithe ho। jaante ho woh sab aatmaon ka baap hai। is shareer dvaara samjha rahe hain। kalpa-kalpa aise hi samjhaate hain aur varsa dete hain, aur koi yeh gyaan de nahin sakte। baba samjhaate hain kabhi bhi kisi dehdhaari ko yaad nahin karna, 5 tatvon ke shareer ko but kaha jaata hai। to tumhein 5 tatvon ke shareer ko yaad nahin karna hai। bhal maaya bahut vighna daalti hai parantu haarna nahin hai। buddhi mein rahe mera to ek baba doosra na koi। is baba ke shareer ke saath bhi tumhaara lav nahin hona chaahiye। koi bhi shareer ke saath lav rakha to atak jaayenge। baba jaante hain bahut males ki bhi aapas mein aisi dosti ho jaati hai, jo ek do ke naam roop mein phans marte hain। itni preet lag jaati hai jo shivbaaba ko bhool jaate hain। do kanyaaon (females) ka bhi aapas mein itna lav ho jaata hai jaise aashik hote hain। unko kitni bhi gyaan ki samjhaani do parantu maaya chhodti nahin hai kyonki eeshvareey mat ke viruddha chalte hain। bhal gyaan bhi utha leve parantu avastha dagmag rehti hai। yog se jo vikarma vinaash hon, woh hote nahin। aise-aise bahut hain, baba naam nahin lete।

doosri baat - baba samjhaate hain kabhi bhi padhaai nahin chhodna। bhal braahmani se nahin banti hain, dil hat jaati hai parantu padhaai zaroor padhni hai। baba ko samaachaar dete rehna hai। aakhir baba matbhed mita denge। matbhed ke kaaran bahut bachche apna khaana kharaab kar dete hain, (register par daag laga dete hain), padhaai chhod dete hain। padhaai koi bhi haalat mein chhodni nahin chaahiye। aise bahut gir padte hain। baba saavdhaan karte hain bachche tumko koi se bhi jharmui-jhagmui ki baaten nahin sunni hain। ek baap ki hi sunni hai। bahut bachche hain jo deh-abhimaan ki beemaari mein rogi ho marte hain। bachchon ko pharmaan hai - hamesha baap ko yaad karte, unki hi mahima karte raho। shivbaaba hi kaliyugi patit duniya ko paavan shreshthaachaari banaate hain। baba ko bachchon ka khyaal rehta hai ki maaya kahaan bachchon ko maar na daale va beemaar na kar de। bachche agar samaachaar nahin dete to samajh jaata hoon ki maaya ka jor se thappad laga hai, isliye murli mein samjhaaya jaata hai। takdeer mein nahin hai to apne hi dhandhe mein lag jaate hain। koi to ek do ke naam roop mein aise phansate hain jaise aashik maashuk bane hain। phir mama baba ko bhi yaad nahin karte। ek do ko yaad karte rehte hain। yeh sab vighna maaya daalti hai। koi ki takdeer mein nahin hai to kitna bhi baba samjhaaye, vaahyaat baaten na karo phir bhi karte rehte hain। koi agyaan mein jeevan kahaani likhte hain। hamko thode hi jeevan kahaani aadi banaani hai। hamko baba ke sivaae kisko yaad nahin karna hain। nehru mara to unko kitna yaad karte hain। tum bhi aise yaad karo to baaki tumhaare aur unmein farka kya raha। gyaan maarga mein badi samajh chaahiye। jab tak shivbaaba se yog nahin to buddhi ka taala nahin khulta। service nahin kar sakte, pad bhrashta kar lete hain isliye baba saavdhaan karte hain ki koi bhi matbhed ho to baba ko likho। sabhi 16 kala sampoorn to nahin bane hain। koi kachche bhi hain, bhoolen karte honge। sensible bachche jo hain, phat se samaachaar likhenge। koi dekhte hain ki phalaane mein abhi tak krodh hai to unse dil hat jaati hai phir ghar baith jaate hain। koi braahmani bhi kah deti hai ki tum is centre par mat aao।

baba ko service samaachaar dena chaahiye। baba khush hoga ki bachcha service samaachaar deta hai। baba aaj phalaane ko samjhaaya ki parampita paramatma se tumhaara kya sambandh hai? baba svarga ka varsa dete hain। 5 hajaar varsha pahle bhi diya tha। yeh lakshmi-naaraayan ke chitra khade hain। baba samjhaate rehte hain kabhi koi dekhe ki is kaaran disservice hoti hai to phauran samaachaar dena hai। sab sampoorn to nahin bane hain। bachchon ko sab kuchh samjhaana hota hai।

baap kehte hain main bachchon ke aage pratyaksha hota hoon। bahut bachche jo mujhe jaante hi nahin, unke sammukh kaise hoonga। bachchon ko kehta hoon - meethe bachche shreemat par chal apna purushaartha kar jeevan oonch banaao। tum saare vishwa ke maalik banne vaale ho। jitna jaasti mujhe yaad karenge utna oonch pad paayenge, ismen kharche ki koi baat nahin, sirf education hai। jiski takdeer mein hai woh pakke ho jaate hain। maaya aisi hai jo 6-8 varsha vaale bhi dekho aaj hain nahin। baap se nahin roothte hain parantu braahmaniyon se roothte hain। baba to yahaan baitha hai। shivbaaba se rootha to khatma ho jaayenge। baba ke sivaae murli kaise sun sakenge।

doosri baat jo kabhi dhyaan ka part chalta hai phalaani mein mama aai, baba aaya - yeh bhi maaya hai। bahut khabardaari se chalna hai। baat kaise karte hain, usse samajh jaana hai। koi-koi mein maaya ka bhoot aa jaata hai phir kehte hain shivbaaba aaya, murli chalaate hain - yeh sab maaya vighna daalti hai। bahut traitor nikal jaate hain। bahut dhokha dete hain। in sab baaton se bahut sambhaal karni hai। padhaai par poora dhyaan dena hai। nahin to maaya bahut hairaan karegi। toofaan bahut aayenge। jaise vaidya log kehte hain ki beemaari baahar niklegi, darna nahin। baba samjhaate hain maaya chalte-chalte aisi angoori lagaayegi jo baba ko bhula degi। haraane ki bahut koshish karegi। yuddha hai hi 5 vikaaron roopi raavan se। jitna baba ko yaad karenge to tumhaare vikarma vinaash honge। maaya jeete jagat jeet bhi banenge। baaki sthool ladaai ki koi baat nahin। yogbal se hi vishwa ki raajaai mil sakti hai। is samay yogbal bhi hai, baahubal bhi hai। yeh Christian donon mil jaayen to vishwa ke maalik ban sakte hain। itni taakat inhon mein hai, parantu law nahin hai। ek kahaani bhi hai do billon ki। krishna ko bhi dekho kaise haath mein gola dikhaaya hai। to tumhaari yaad kaayam rahni chaahiye। koi bhi kaaran se padhaai nahin chhodni chaahiye। vighna to zaroor padenge। maaya aisi hai jo maatha mood leti hai, heartfail kar deti hai isliye baap kehte hain aur sab baaton ko chhod maamekam yaad karo। beej ko yaad karne se jhaad bhi yaad aa jaayega। grihastha vyavhaar mein rehte yeh course uthaao। bhagat log savere uthkar bhakti karte hain। kaashi mein kothiyaan bani hui hain। har ek kothi mein baith vishvanaath ganga kehte hain, jaante kuchh nahin। eeshvar sarvavyaapi kah dete hain। apne ko tatva yogi, brahm yogi kahlaate hain। yeh baba sab baaton ka anubhvi hai। inke rath mein baith kehte hain in sabko chhodo, baaki to sab khilaune bana diye hain। vishnu ka, shankar ka, krishna ka khilauna banaae baith pooja karte hain। jaante kisko nahin, pooja mein bahut kharcha karte hain। patthar ki moorti banaae usko shrringaarte hain। saahookaar to jevar bhi pahnaate hain। yeh to tum jaante ho bhakti mein jo kuchh bhaavna se karte hain, uska phal kuchh na kuchh ham de dete hain। doosre janma mein achha bhagat ban jaate hain। koi dhan daan karte hain to dhanvaan ke ghar mein, bahut daan karte hain to raajaai ghar mein janma milta hai। phir bhi is duniya mein sada ke liye sukh to hai nahin isliye sannyaasi is sukh ko maante nahin। kaag vishtha ke samaan samajhte hain। to woh raajayog kaise sikhlaayenge। saare vishwa ka maalik to behad ke baap sivaae koi bana na sake। ab baap tum bachchon ko sammukh samjha rahe hain, main phir se aaya hoon tumko raajayog sikhlaane। shreekrishna ke 84 janmon ke ant mein mainne pravesh kiya hai, inka naam brahma rakha hai। mujhe brahma zaroor chaahiye to prajaapita brahma bhi chaahiye। jismen pravesh karke aaoon, nahin to kaise aaoon? yeh mera rath mukrar hai। kalpa-kalpa ismen hi aata hoon। likha bhi hua hai brahma dvaara sthaapna। kiski? vishnupuri ki। abhi tum bhaarat ko vishnupuri bana rahe ho। doosre koi is baat ko samajhte nahin ki parampita paramatma ka part hai, krishna jayanti manaate hain, narka ko svarga banaane vaala baap hai na। jo brahman ban poora purushaartha karenge vo brahman se devta banenge, gaayan hai ki parampita paramatma 3 dharma, brahman, sooryavanshi, chandravanshi dharma sthaapan karte hain। vahaan do yugon mein ek hi dharma hai aur koi dharma hai nahin। baaki do yugon mein dekho kitne dharma hain।

bachchon ko padhaai par poora dhyaan dena chaahiye। nahin to bahut rona padega। sabke liye tribunal baithegi। bataayenge ki tumne yeh-yeh paap kiya isliye ham tumko bahut samjhaata hoon ki paap nahin karna, punya aatma banna। paap karenge to sauguna saza ke nimitta banenge। mere bankar vikaar mein gaye, baap ke shreemat ki avagya ki to tumhaare par bahut saja aayegi। woh sajaayen bhi bahut kadi hoti hain। baap kehte hain main paramdham ka rahne vaala hoon। yahaan puraani duniya mein aakar tumko varsa deta hoon। phir bhi tum naam badnaam karte ho, tab to kaha hua hai satguru ka nidank sooryavanshi gharaane mein thaur na paaye। gir padte hain, bahut kasam uthaate hain। ham aapke sapoot bachche hokar rahenge। blood se bhi likhte hain। parampita paramatma se pratigya bhi karte hain ki bachcha ban aapse poora varsa loonga, parantu maaya aisi hai - woh aaj hain nahin। pratigya kar phir apvitra bana to bahut dhokha khaayega। eeshvar ki avagya hui na। baba ishaare mein sab samjhaate rehte hain। maaya bahut hairaan karegi। nahin to yuddha kaahe ki। vishwa ka maalik banna, kam baat nahin hai। gaphlat nahin karni hai। padhaai bilkul nahin chhodni hai। baba se raay lo phir javaabdaar baba ho jaayega। padhaai mein manushya kitni mehnat karte hain। imtahaan ke time bahut mehnat karte hain। tum bhi aage chal jab samay najdeek dekhenge to raat din padhaai mein lag jaayenge। ab woh samay jaldi aane vaala hai। achha!

meethe-meethe sikeeldhe bachchon prati maat-pita baapdaada ka yaad pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) aapas mein vaahyaat (vyartha) baaten nahin karni hai। kabhi bhi matbhed mein nahin aana hai, padhaai kisi bhi haalat mein nahin chhodni hai।

2) baba ki avagya kabhi nahin karni hai। pratigya kar us par kaayam rehna hai। service ka sada shauk rakhna hai।

vardaan:- samay par yog ki shaktiyon ka prayog karne vaale sva ke sanskaar so sansaar parivartak bhav

jaise yog karne aur karaane mein yogya ho aise yog ka prayog karne mein bhi yogya bano। sabse pahle apne sanskaaron par yog ki shakti ka prayog karo kyonki aapke shreshtha sanskaar hi shreshtha sansaar ke rachna ki neenv hain। to check karo ki koi bhi sanskaar samay par dhokha to nahin dete hain? kaisi bhi baat ho, vyakti ya vaayumandal ho lekin shreshtha sanskaaron ko parivartan kar saadhaaran va vyartha na bana den। jo sva ke sanskaaron ko parivartan kar lete hain vahi sansaar ko parivartan karne ke nimitta ban jaate hain।

slogan:- number aage lena hai to svabhaav easy aur purooshaartha attention vaala ho।