मंगलवार 18 अप्रैल 2023 की दैनिक मुरली

18-04-2023 praatahmurli om shanti "baapdaada"' madhuban

“meethe bachche - aadhaakalpa maaya ne tumhein bahut hairaan kiya hai, ab tum baap ki sharan mein aaye ho, tumhein baap se sachchi preet rakh maaya-jeet, jagat-jeet banna hai।''

prashn:- sangamayug par bhagwan ko bhi kaun si mehnat karni padti hai?

uttar:- aatma roopi maile kapdon ko saaph karne ki। tum bachche baap ke paas aaye ho apne paapon ka khaata saaph karne। jitna dehi-abhimaani ban baap ko yaad karenge utna vikarmaajeet bante jaayenge। agar buddhi ka yog baap ke sivaae aur kisi ke sang joda to bhasmaasur ban jaayenge isliye shreemat par chalte chalo।

geet:- om namo shivaae…

om shanti। tum bachchon ne sahaara liya hai baap ka athva baap ki sharan mein aaye ho। yeh koi laukik baap nahin, yeh hai paarlaukik baap। tumko maaya ne aadhaakalpa tang kiya hai। tum bachche hi jaante ho - yeh hai duhkhadhaam, aasuri duniya। kalpa-kalpa tum bachche baap ke paas aakar sharan lete ho। tum sharnaagti ho। maaya ne mahaan duhkhi banaaya hai। tumhaari jo bhi ijjat thi woh maaya ne barbaad kar di hai। yeh tum bachche hi jaante ho। jab manushya duhkhi hote hain to jaakar doosre ke paas sharan lete hain। yahaan tum bhi aadhaakalpa se maaya ki sharan mein the। jiski sharan mein ab tum aaye ho woh baith aatmaon ko samjhaate hain। duniya vaale nahin jaante ki ham kab se duhkhi bane hain। ham svarga ke phool the phir maaya kaise aakar kaanta banaati hai, yeh abhi tum bachche samajh sakte ho। phir bhi manushya ho, jaanvar to nahin ho। bachche kehte hain tum maat-pita ham baalak tere... ham aapki sharan mein aaye hain। hamaari raksha karo is maaya raavan se। barobar ab tum bachchon ko maaya se mukta kar svarga ka maalik bana rahe hain। maaya ne tumko bahut tang kiya hai। bhagwan ko bhakta yaad hi tab karte hain jabki tang hain। hai to drama anusaar। jo svarga ke the, unhon ki hi maaya dushman bani hai। yeh koi bhi nahin jaante ki aadhaakalpa ki hi maaya dushman hai। yeh badi guhya baaten samajhne ki hain। aadhaakalpa se tum bahut yaad karte aaye ho ki ham is aaphat se kaise chhooten। baap aakar hamko apna banaae svarga ka varsa dete hain। tum sab is samay refugee ho। aajkal refugee bahut hote hain na। jaakar asylum athva sharan lete hain।

tum jaante ho maaya ne bhaarat ko bahut duhkhi bana diya hai। bhaarat mein jab svarga tha to devi-devtaayen bahut sukhi the। yeh european log bhi jaante hain ki bhaarat bahut praacheen desh hai। jab ham log nahin the to sirf bhaarat hi tha। praacheen bhaarat bahut maalaamaal sukhi tha jisko hi svarga, heaven kehte hain। paanch hazaar varsha ki baat hai। abhi to vahi bhaarat kangaal, kaudi tulya ban gaya hai। kisne banaaya? maaya raavan ne। aadhaakalpa se bhaarat girte-girte ab kaudi tulya ho gaya hai। baap kehte hain aadhaakalpa se tumko maaya ne hairaan kiya hai। ab tum prabhu ka asylum maangate ho। bhagwan aao, ham aap par balihaar jaayen। bhaarat ko phir se heere jaisa parampita paramatma hi banaate hain isliye bhakta bhagwan ko yaad karte hain - he eeshvar sharan lo। kehte bhi hain - laaj rakho। aap merciful ho phir kah dete sarvavyaapi, isko dharma glaani kaha jaata hai। tum jaante ho maaya ne aadhaakalpa se bilkul hi gira diya hai। baap kehte hain kalpa-kalpa aise jab bhaarat dharma bhrashta, karma bhrashta ban jaata hai tab main aata hoon। apne dharma ko bhi nahin jaante। yeh hai bhaavi। jab dharma lop ho jaae tab to baap aakar phir se sthaapan kare। ab woh dharma praayahlop hai। yeh drama anusaar hota hai, tab hi baap aakar phir brahma dvaara svarga ki sthaapna, shankar dvaara narka ka vinaash karaate hain। abhi vinaash ka samay hai na। vinaash kaale vipreet buddhi ban pade hain। tumhaari preet buddhi hai। sarva shaktimaan parampita paramatma ki tumne sharan li hai maaya par jeet paane। tumko sahaj raajayog aur gyaan milta hai। baap kehte hain tum mujh baap ko bhool gaye ho। maaya ne tumko mujh baap se bemukh kar diya hai। baap baith brahma mukh dvaara shiksha dete hain। maaya ki praveshta hone ke kaaran aisi glaani ki baaten likh di hain। tum jaante ho raajayog baap ke sivaae koi sikha na sake। baap to hai svarga ka rachayita। yeh aatma hi baat karti hai। tumko dehi-abhimaani banaate hain। aatma hi sanskaar le jaati hai। aatma hi lep-chhep mein aati hai। woh samajhte hain aatma nirlep hai, baaki shareer par kuchh na kuchh dosh lagta hai। uske liye ganga snaan karte hain। parantu ganga jal se to paap kat na saken isliye baap kehte hain deh sahit sabko bhoolo। apne ko aatma nishchay kar mujh parampita paramatma shiv ko yaad karo। shiv hai niraakaar। shiv jayanti manaate hain, parantu koi bhi jaante nahin। somnaath ka mandir itna bada hai parantu woh kab aaye, kaise aaye, kya aakar kiya - kuchh nahin jaante hain। zaroor koi shareer mein aaye honge। sarvavyaapi ke gyaan ne sab baaten bhula di hain। ab baap kehte hain shreemat par chalo।

shivbaaba is shareer mein pravesh kar tumko knowledge de rahe hain। yeh shareer loan liya hai। is rath mein rathi ban tumko gyaan de rahe hain। baaki koi ghode-gaadi aadi ki baat nahin hai। unko bhaageerath athva nandeegan bhi kehte hain। kehte hain bhaageerath ne ganga laai। koi maathe se thode hi nikalti hai isliye baap kehte hain in ved shaastra aadi ke padhne se meri praapti nahin ho sakti। mere ko to aana hai। tumko aakar sharan lete hain। tumko manushya thode hi jaante hain ki raavan kya cheez hai। ab to raavan raajya hai। raavan ki aasuri mat par chalne vaale hain। abhi tum shreemat se 21 janma ke liye shreshtha te shreshtha ban rahe ho। aasuri mat dvaapar se shuru hoti hai, jisko vicious world kaha jaata hai। vicious world sthaapan karne vaala hai raavan। viceless world sthaapan karne vaala hai raam, shivbaaba। geet bhi suna shivaae namah। brahma, vishnu, shankar devtaae namah kahenge। aise nahin, brahma parmaatmaae namah kahenge। nahin, paramatma to ek hai। sabka baap ek hai। ab tumko baap se varsa mil raha hai। yeh paathshaala hai - manushya se devta banne ki। god fatherly college hai। bhagvaanuvaach hai na। naam hi likha hua hai eeshvareey vishwa-vidyaalay। em object bhi likhi padi hai। nar se shri naaraayan, naari se shri lakshmi banna hai। tum phir se nar se naaraayan ban rahe ho। shreemat par chalne se tum shreshtha banenge isliye baba kehte hain - raat ko bhi jaagkar baap ko yaad karo। baba ham aapko hi yaad karenge। aapke paas hi aana hai phir aap hamko svarga mein bhej denge। baap tum maataaon dvaara svarga ki sthaapna karte hain। tum yog mein rahkar bhaarat ko pavitra banaayenge। tumhaare yog ki shanti se phir 21 janma bhaarat mein shanti hoti hai। vahaan maaya hoti nahin hai। sada sukhi rehte hain। deh-abhimaan ke kaaran hi manushya duhkhi bante hain। ab baap tumko dehi-abhimaani banaate hain। satayug mein jo daivi gun vaale the, woh abhi aasuri gunon vaale ban pade hain। ab tum phir se shivaalay, svarga ka maalik banne ke liye baap se varsa le rahe ho। yeh college hai। jab tak vinaash ho baap padhaate rahenge kyonki aadhaakalpa ka sir par bojha chadha hua hai, woh mita nahin hai। mehnat lagti hai। is samay sab paap aatmaayen hain। pavitra aatma ek bhi nahin hai। kehte hain - he patit-paavan aao, parantu yeh nahin samajhte ki yeh patit duniya hai।

ab tum brahman bane ho। brahma ki aulaad tum kitne thode ho! phir brahman se devta, kshatriy banenge। yeh hai svadarshan chakra। pun-rjanma lete-lete ham 84 janma poore karte hain। yeh baaten shaastron mein nahin hain। brahma ke haath mein shaastra diye hain। sookshm vatan vaasi brahma ho na sake। naam hai prajaapita brahma, jisko Adam, Adam kehte hain, vahi is saare genealogical tree ka head hai। so tum jaante ho। ham roodra maala ke daane hain। ham aatmaayen vahaan se aati hain। hamaara nivaas sthaan woh paramdham hai। har ek aatma ko 84 janmon ka avinaashi part mila hua hai। yeh sab baaten to patit manushya samjha na saken। patit se paavan to baap hi banaayenge। vahi sarva par daya karne vaala hai। aur koi saari duniya par daya karne ka leader ban na sake। yeh to baap hi bante hain। baap ko to taras padta hai। jab bahut duhkhi ban padte hain tab main aata hoon। tum bachche tan-man-dhan se bhaarat ki seva kar bhaarat ko svarga banaate ho। jaise gaandhi ne foreigners se raajya haath mein liya, parantu woh to hai mrigtrishna ke samaan। abhi maaya bhi foreigner hai, aadhaakalpa se raajya kiya hai। baap aakar inse chhudaate hain। maaya ne tumhein bahut duhkhi kiya hai, isliye baap kehte hain - main aata hoon liberate karne। ab shreemat par chalo। nahin to maaya ekdam kachcha kha jaayegi। shreemat par chal shreshtha bano। tum ho shiv shakti paandav sena। tumhaara yaadgaar delvaada mandir khada hai। practical mein delvaada mandir hai accurate। raajayog se to svarga ke maalik bante hain। bhaarat svarga tha na। ab tum parampita paramatma ki sharan mein aaye ho baap se behad ka varsa lene। 21 peedhi devi-devtaaon ka raajya chalta hai। tum aate ho svarga ka maalik banne। maaya ne bhasmaasur bana diya hai। baap aakar gyaan amrit ki varsha karte hain। baap ki sharan bhi lete hain, phir maaya traitor bana deti hai। phir ablaaon par kitne atyaachaar hote hain। abhi koi sovereignty to hai nahin। baap aakar deity sovereignty sthaapan karte hain। satayug aadi mein mahaaraaja-mahaaraani the। abhi to no sovereignty। praja ka praja par raajya hai, isko kaha jaata hai adharma। maaya adharma ka raajya sthaapan karti hai। baap phir aakar dharma ka raajya sthaapan karte hain। abhi to no religion। kehte hain ham dharma ko nahin maante hain, isliye might bhi nahin hai। yeh bhi alpakaal ka svaraajya hai। aapas mein hi lad-jhagad khatma ho jaayenge। tumko baba aakar amarpuri ka maalik banaate hain। baap aatmaon se baat karte hain। bachche, tumko dehi-abhimaani banna hai।

jitna baap ke saath yog lagaayenge to vikarmon ka bojha utrega aur tum vikarmaajeet banenge। jo baap svarga ka maalik banaate hain unko phaarakti di, buddhi ka yog aur koi sang joda to bhasmaasur ban padenge। ab tum baithe ho apne karmon ka khaata saaph karne। paapon ka bojha bahut hai। baap kehte hain - main aakar ajaamil jaise paapiyon ka uddhaar karta hoon। baap gyaan-amrit se kitna shuddh banaate hain! phir bhi shreemat par chalte-chalte aashcharyavat bhaaganti ho jaate hain। bhagwan aakar mehnat karte hain to jo maila kapda hai woh phat padta hai, isliye ajaamil naam rakha hai। baap ka bankar phir phaarakti de to woh hue number one ajaamil। un jaisa paap aatma koi hota nahin, isliye tum bachchon ko bahut achhi reeti shreemat par chalna hai। agar shreemat ko chhoda to maaya kha jaayegi, phir kalpa-kalpaantar ke liye varsa ganva denge। achha!

meethe-meethe sikeeldhe bachchon prati maat-pita baapdaada ka yaadapyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) tan-man-dhan se bhaarat ki seva kar ise svarga banaana hai। maaya dushman se liberate karna hai।

2) dehi-abhimaani banne ke liye deh sahit sab kuchh bhoolna hai। jo bhi puraane karmon ka khaata hai use yogbal se saaph karna hai। vikarmaajeet banna hai।

vardaan:- ek baba shabd ki smriti dvaara kamjori shabd ko samaapta karne vaale sada samartha aatma bhav

jis samay koi kamjori varnan karte ho, chaahe sankalp ki, bol ki, chaahe sanskaar-svabhaav ki to yahi kehte ho ki mera vichaar aise kehta hai, mera sanskaar hi aisa hai। lekin jo baap ka sanskaar, sankalp so mera। samartha ki nishaani hi hai baap samaan। to sankalp, bol, har baat mein baba shabd natural ho aur karma karte karaavanhaar ki smriti ho to baba ke aage maaya arthaat kamjori aa nahin sakti।

slogan:- jiske paas gambheerta ki visheshta hai, unhein har kaarya mein svatah siddhi praapta hoti hai।