शनिवार 17 जून 2023 की दैनिक मुरली

17-06-2023 praatahmurli om shanti "baapdaada"' madhuban

“meethe bachche - tumhein baapdaada ki shreemat ke direction par chal dehi-abhimaani banna hai, chitra ko dekhte hue bhi vichitra baap ko yaad karna hai''

prashn:- kis ek balihaari ke kaaran tum bachche lucky stars gaaye hue ho?

uttar:- pavitrata ki balihaari ke kaaran। tum is antim janma mein pavitra ban bhaarat ko pavitra banaane ki seva karte ho, isliye tum lucky stars, devtaaon se bhi oonch ho। tumhaara yeh janma heere jaisa hai। tum bahut oonch sevaadhaari ho। brahma ki aatma is samay shreekrishna se bhi oonch hai, kyonki woh baap ki bani hai। shreekrishna to praalabdha bhogte hain।

geet:- aane vaale kal ki tum tasveer ho …

om shanti। baap kahe bachchon prati। baap bhi niraakaar bachche bhi niraakaar hain। parantu yeh jo saakaari chola liya hai, inse part bajaana hai। aise part bajaane vaale bachchon se baap kahe ab dehi-abhimaani bano। apne ko aatma nishchay karo। aise na kaho - aham aatma so paramatma। yahi to tum baap ko 84 janmon ke chakra mein dhakel dete ho। apne ko baap samajh 84 janmon ke chakra mein daal diya hai। yeh kahne se tum rasaatal mein chale gaye ho। beda doobna shuru hua। ab tumko shreemat milti hai। bachche jaante hain do mat gaai hui hain। ek hai shreemat। yahi bhagwan ki shreemat arthaat behad baap ki mat hai। unhonne shreekrishna ka naam daal diya hai। woh to wrong hai। shreekrishna ko baap nahin kah sakte। baap hote hain teen। ek oonch te oonch parampita paramatma, aatmaon ka baap, doosra hai prajaapita brahma। inko parampita nahin kahenge। yeh to praja ka pita ho gaya। inka naam bhi baala hai। shreekrishna ko prajaapita nahin kahenge। teesra hai laukik baap। behad ka baap kehte hain - bachche, dehi-abhimaani bhav। ab shreemat ke tumko direction milte hain। donon ki mat ikatthi chalti hai। tum mahsoos karte ho - yeh mahaavaakya shivbaaba samjha rahe hain। trimoorti shiv ke badle bhool se trimoorti brahma kah diya hai। parantu iska arth kuchh nahin nikalta। trimoorti brahma kahne se brahma ki mat gaai hui hai। shiv ko uda diya hai। kehte hain brahma bhi utar aaye। ab brahma to sookshm vatan se aakar mat deve। ab tumne yeh samjha hai, prajaapita brahma ko vyakta brahma kaha jaata hai। tum abhi vyakta brahman ho, phir avyakt sampoorn brahman bante ho। phir tum sookshmavtanvaasi brahman ban jaayenge। sampoorn brahma, sampoorn sarasvati - donon sookshm vatan mein vahaan rehte hain। vishnu to hain hi yugal। do bhuja lakshmi ki, do bhuja naaraayan ki। ab yeh mat to naameegraami hai। bhagvaanuvaach, brahma ko mat dene vaala hai shiv। inka naam rakha hai brahma। brahma hai yahaan patit duniya mein। inko oonch nahin kehna chaahiye। vishnu ke do roop lakshmi-naaraayan phir yahaan svarga mein aate hain। dev-dev mahaadev kaha jaata hai na। to mahaadev ho gaya shankar। bachche to samajhte hain shiv hai oonch te oonch baap। phir sookshm vatan ki rachna rachte hain। mool baat hai shreemat par chalna। brahma bhi shreemat par chal itna naameegraami bana। murabbi bachcha ek hi brahma hai। shivbaaba bhi ek, brahma bhi ek hi hai। prajaapita brahma kaha jaata hai na। prajaapita vishnu va prajaapita shankar nahin kahenge। abhi tum prajaapita brahma ke saamne baithe ho। baap kehte hain grihastha vyavhaar mein rehte apne ko aatma nishchay karo। nirantar mujhe yaad karne ka purushaartha karo, phir hai tyaag ki baat। gyaan, bhakti, vairaagya kehte hain na। vairaagya se tyaag hota hai। sannyaasi pahle vairaagya dilaate hain ki yeh kaag vishta samaan sukh hai isliye ham gharbaar chhodte hain। kehte bhi hain ki bhaarat satayug mein svarga tha। narka mein rahne vaale kehte hain ki ham svarga vaasi the। abhi tum bachchon ki buddhi mein hai ki svarga mein devi-devta hi rehte the। praacheen bhaarat mein purity, pees, prosperity sab thi। narkavaasi manushya svarga sthaapan karne vaale baap ki mahima gaate hain - aap sukh ke saagar ho, shanti ke saagar ho। is baap se hi second mein jeevanmukti ka varsa milta hai। baba ghadi-ghadi kehte hain kiske saath chal rahe ho? shivbaaba se hi varsa milna hai। buddhi mein shivbaaba hi yaad rahe। unse svarga mein athaah sukh milenge। tum kahenge ham shivbaaba ke saath chal rahe hain। koi naya hoga to woh kahega ki shivbaaba to niraakaar hai। yeh brahma hai, tum shivbaaba ke saath kaise chal rahe ho? vichitra hai na। tum bachche jaante ho ham shivbaaba ke sammukh baithe hain। shivbaaba ka koi aakaar saakaar roop hai nahin। woh niraakaar inke hi shareer mein aate hain। inmen aakar batlaate hain। yeh apne janmon ko nahin jaante hain। abhi tum jaante ho barobar hamne 84 janma poore kiye। chauraasi janma hi gaaye jaate hain। satayug mein lakshmi-naaraayan the, to zaroor yahi 84 ka chakra lagaate hain। aur dharma vaale to baad mein aate hain, woh itne janma nahin lete। pahle aatma satopradhaan hoti hai, phir pichhaadi mein tamopradhaan banti hai। to yeh hai shreemat bhagwan ki। brahma ko bhi woh mat dete hain। parantu murabbi bachcha hone kaaran achhi reeti dhaaran kar samjhaate hain। kabhi woh bhi aakar samjhaate hain। kehte hain - bachche, dehi-abhimaani bhav। shivbaaba bhi kehte hain, brahma bhi kehte hain dehi-abhimaani bhav। ab tum practical mein sammukh baithe ho। woh hai vichitra। tum ho chitra vaale। sabko kehte ho - he bhaai, he aatmaayen, baap ko yaad karo। aatmaon se baat karte hain। ek do ko saavdhaan kar unnati ko paao। yeh brahma ke tan dvaara baap kehte hain - mujh baap ko yaad karne se svarga ka varsa milega। in bhooton ke vash nahin hona। pahla number hai ashuddha ahankaar। body consciousness chhod do। soul conscious bano। bhaai-bhaai ho to zaroor baap bhi hoga। brothers-sisters ka baap ho gaya brahma। brothers-brothers ka baap hai niraakaar। yeh hai saakaar। ham sab asul hain niraakaari। phir part bajaane aate hain। yeh shri shri shiv bhagvaanuvaach। shreekrishna ki aatma to satayug mein thi। woh is 84 ven janma mein baap ki aakar bani hai। to shreekrishna ki aatma se bhi yeh achhi hui na kyonki is samay seva karte hain। shreekrishna ki aatma to sirf praalabdha bhogegi। to donon mein kaun bada, kaun oonch hua? 84 janma mein jo pahla janma vaala shreekrishna hai woh oonch ya is samay vaala brahma oonch? vaastav mein heere jaisa janma to yeh hai kyonki yahaan tumko praapti hoti hai। vahaan aise nahin kahenge ki praapti hoti hai। is samay hi tumko saari property milni hai।

tum bahut oonch sevaadhaari ho। tum bhaarat ko svarga, patit ko paavan banaakar phir is par raajya karne vaale ho। tum ho lucky stars tab to sab maatha tekte hain na। yeh saari pavitrata ki balihaari hai isliye baap kehte hain kaam mahaashatru hai, jisne tumko apvitra banaaya, unko jeeto। mujh sarvashaktimaan ke saath jitna yog lagaayenge, utna pavitra hote jaayenge। tumne 63 janma vishay saagar mein gote khaaye। abhi yeh tumhaara antim janma hai। ajaamil jaise paapi gaaye hue hain। satayug mein hai hi ek pativrata, paavan dharma। sadaiv sukh hi sukh rehta hai। yahaan to hain patit। sannyaasi pahle satopradhaan the to bahut teekhe the। kahaan bhi jangalon mein unko bhojan milta tha। pavitrata ki taakat thi। aise nahin ki parampita paramatma shiv ki taakat thi। tumko unki taakat milti hai। maaya ka raajya shuru hota hai dvaapar se। paanch vikaaron roopi raavan ka raajya aadhaakalpa chalta hai। manushya samajhte nahin ki patit-paavan kaun? ganga ko hi patit-paavni samajh liya hai। paramatma ko jaante hi nahin। kah dete hain ki paramatma aur unki rachna beanta hai। satayug ki aayu laakhon varsha hai। agar aisa hota to devta dharma vaalon ki sankhya jyaada honi chaahiye। abhi to Christian log jo baad mein aaye unhon ki sankhya jyaada ho gai hai। yeh baap samjhaate hain। buddhi ke liye yeh bhojan dete hain। tumhaari buddhi ab kitna kaam karti hai! manushyon ki buddhi ab kaam nahin karti। rachta aur rachna ke aadi-madhya-ant ko jaanne ka taala banda hai। unka hai had ka sannyaas, hathayog। tumhaara hai behad ka sannyaas, raajayog। tum raajaaon ka raaja svarga ke maalik bante ho। is samay jo patit hain, woh thode hi yeh raaz bataayenge। geeta sunaate hain, 18 adhyaay ka kitna lamba arth baith nikaalte hain! kitni geetaayen banaai hain! sabki apni-apni mat hai। geeta ko samajh nahin sakte। shreekrishna bhagwan hi nahin, phir geeta ko samjhen kaise। kuchh bhi samajhte nahin। abhi tum jaante ho - woh sab hain hi bhaktimaarga ke। paanch bhooton ne ajaamil jaisa paapi bana diya hai। nambarvaar to hote hi hain। ek jaise to hote nahin। samjhaaya jaata hai - bhagwan ek hai, woh aakar raajayog sikhlaate hain। lakshmi-naaraayan aur unki dynasty tamopradhaan se satopradhaan ban rahi hai। world ki history-geography phir se repeat honi hai। pahle to nishchay chaahiye। baba, bas ab ham to aapki hi shreemat par chalenge। tum bachchon ki takdeer jag rahi hai। tum vishwa ke maalik bante ho। aur sabki takdeer soi hui hai। bahut duhkhi hain। aadi sanaatan bhaarat svarga tha। ab nahin hai। tamopradhaan patit ban gaye hain। patit-paavan paramatma ko kaha jaata hai। svarga mein to sabki jyoti jagi rehti hai। deepmaala kehte hain na। abhi to ujhaai hui maala hai। baap kehte hain - yeh meri aatmaon ki maala hai। pahle aatmaon ki maala banaata hoon, phir vishnu ki maala banaata hoon। shivbaaba banaate hain brahma dvaara। yeh bhi samjhaaya hai - braahmanon ki maala nahin ban sakti kyonki kabhi aasmaan par chadhte rehte, kabhi neeche girte rehte। nishchay buddhi se badal sanshay buddhi ban padte hain। aaj pakke brahman hain, auron ko aap samaan banaate hain, kal shoodra ban jaate hain isliye shivbaaba kehte hain braahmanon ki maala ban nahin sakti hai। tum purushaartha karte ho, rudra maala banenge isliye yog lagaana hai। yog poora hoga to buddhi roopi bartan pavitra hoga to dhaarna bhi hogi। baap ko yaad karne se tum varsa lete ho। tumhaari okh varse mein chali jaati hai। laukik baap ke bachchon ki bhi varse mein nazar rehti hai na। koi-koi bachche kehte hain yeh boodha kab marega to hamko milkiyat milegi। koi-koi baap aise manhoos hote hain jo bachchon ko kuchh dete hi nahin। stri ko ghar kharcha bhi nahin dete।

baap kehte hain ki mool baat hai nishchaybuddhi bano। tumne vichitra ka haath pakad liya hai। is chitra dvaara kehte hain - mujhe yaad karo। tumhaari jinna jaisi buddhi honi chaahiye। shivbaaba paramdham mein rehte hain। abhi shivbaaba madhuban mein murli chalaate honge। ghadi-ghadi shivbaaba ko yaad karna pade। abhi tum yahaan baithe ho, vahi kehte hain maamekam yaad karo to tum meri maala ka daana ban jaayenge। yeh hai rudra gyaan yagya। ismen brahman bhi zaroor chaahiye। shaastron mein koi yeh likha hua nahin hai ki jagat amba braahmani thi। yeh baap hi samjhaate hain। parantu maaya bhi badi teekhi hai। nishchay hote-hote maaya phir jhat sanshay mein la deti hai। phir shreemat lene liye buddhi chalti nahin hai। unka pad bhi bhrashta ho jaata hai। chadhe to chaakhe baikuntha ras, gire to chaknaachoor.. praja mein bhi kam pad। tum ho lucky gyaan sitaare। tumhaare oopar bahut responsibility hai। baba kehte hain - khabardaar rehna, vikaar mein nahin jaana। tumhaara dhandha hai patit ko paavan banaane ka। koi ko bhi duhkh mat do। sada sukhi banaana hai। baap bachche-bachche kahkar samjhaate hain phir bhi bujurga hai। inki aatma ko bhi bachcha kahenge। yeh aatma bhi unko baap kehti hai। kadam-kadam shreemat par chalna hai। centres sab shivbaaba ke hain, kisi manushya ke nahin। shivbaaba hi in dvaara sthaapna kar rahe hain। achha!

meethe-meethe sikeeldhe bachchon prati maat-pita baapdaada ka yaad, pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) buddhi ko roj gyaan ka bhojan de, shaktishaali banaana hai। yog se buddhi roopi bartan pavitra banaana hai।

2) “hamne vichitra baap ka haath pakda hai'' - is nishchay se ghadi-ghadi baap ko yaad karna hai। koi ko bhi duhkh nahin dena hai।

vardaan:- realisation dvaara nirbal se shaktishaali banne vaale master sarvashaktimaan bhav

maanav jeevan ki maanavta ka aadhaar aatma par hai, main kaun si aatma hoon, kya hoon - yadi yeh realise kar len to shanti svadharma ho jaaye। main shreshtha aatma hoon, sarvashaktimaan ki santaan hoon - yeh realisation nirbal se shaktishaali bana deti hai। aisi shaktishaali aatma va master sarvashaktimaan aatma jo chaahe, jaise chaahe woh practical kar sakti hai।

slogan:- jo mansa mahaadaani hain woh kabhi bhi sankalpon ke vash nahin ho sakte।