शनिवार 8 जुलाई 2023 की दैनिक मुरली

08-07-2023 praatahmurli om shanti "baapdaada"' madhuban

“meethe bachche - pratigya karo - jab tak satayugi svaraajya sthaapan nahin hua hai tab tak ham sukh ki neend nahin soyenge, pavitra bankar sabko pavitra banaayenge''

prashn:- drama mein kaun-si maut hona bhi jaise sangamayug ki rasma hai?

uttar:- vijay maala mein aane ka purushaartha karne vaale achhe-achhe bachche bhi aashcharyavat sunanti, kathanti phir bhaaganti ho jaate arthaat mar jaate hain। aisi maut bhi sangamayug ki jaise rasma ban gai hai। shreemat par na chalne se maaya hara deti hai। baap ka bankar haath chhoda to goya mar gaya। takdeer par lakeer lag jaati hai।

geet:- dar par aaye hain kasam le ke…

om shanti। meethe-meethe jeete ji marne vaale bachchon ne yeh geet suna jo jeete ji kurbaan gaye hain। sab to kurbaan nahin gaye hain। nambarvaar purushaartha anusaar jeete ji marte hain। jab koi god mein lete hain ya adopt karte hain to ek parivaar ko chhodkar doosre parivaar ka bante hain। bachche jaante hain ham aasuri parivaar se markar abhi eeshvareey parivaar ke bane hain। eeshvar ne aakar god mein liya hai। agyaan kaal mein koi eeshvar ki god nahin lete hain। dharma ke guru ki god le lete hain। jaise vallabhaachaari shreekrishna ke mandir mein bachche ko shreekrishna ki god mein dete hain। parantu woh to hai jad chitra isliye phir brahman pujaari god mein le lete hain - vaishnav banaane ke liye। aise god mein to bahut lete hain। bachche jaante hain - barobar unki god lete hain jo hokar gaye hain। koi Christ ki god lete, koi ibraaham ki god lete। kab hokar gaye hain, woh phir kab aayenge - yeh sirf tum bachche jaante ho। abhi tum jeete ji mare ho। tumko ek baap ki yaad mein rehna hai। laukik baap ke bachche god mein aate hain, baap mar jaata hai, baaki bachche rah jaate hain। yahaan tum aise baap ki god mein aaye ho jo baap tumko is mrityulok se amarlok mein athva durgati se sadgati mein le jaane vaala hai। manushya maatra ka sadgati daata ek hi hai। aise nahin ki sadgati sirf tumko milti hai। sadgati to sabko zaroor milti hai parantu drama anusaar kisko satopradhaan, kisko sato, kisko rajo, tamo sadgati milti hai। bhal tamo mein aate hain to bhi pahle aane se duhkh nahin bhogte। pahle sukh zaroor bhogna hai। ant mein to sabhi duhkh bhogte hain।

baap kehte hain ki sadgati daata patit-paavan main ek hi hoon। pahle-pahle jo aatmaayen aati hain woh sukh bhogti hain phir duhkh mein aati hain। tum bhi nambarvaar purushaartha anusaar pahle satopradhaan phir sato, rajo, tamo mein aate ho। tum bhi nambarvaar sadgati ko paate ho। mukhya 8 daane gine jaate hain na। ab tum sab dropdiyaan ho। baap ke bane ho to baap ko kabhi chhodna nahin hai। parantu shreemat par yaad nahin karte hain to phir maaya haath chhuda deti hai। god to li, shuru mein chalte aaye। achhe-achhe bade meethe bachche jinko vijay maala mein teen-chaar number mein rakhte the woh bhi aashcharyavat bhaaganti ho gaye। yeh bhi is sangamayug ki rasma-rivaaj hai। aashcharyavat sunanti, kathanti, maranti - yeh hota rahega। kahenge drama mein inka yeh maut tha। baap ka bankar phir haath chhoda to goya mar gaya। hai to bhal is duniya mein parantu jeete ji yahaan se nikalkar aasuri duniya mein chala gaya। koi kaaran to banta hai na। bhal kahenge drama! parantu shreemat par na chalne se maaya se haar kha lete hain। takdeer par lakeer lag jaati hai। eeshvar ka banne se phir hoti hai maaya se ladaai। baaki devtaaon aur asuron ki ladaai nahin hoti hai। maaya asur hai jo jeet pa leti hai।

achha, ab bachche likhte hain ki raakhi bandhan ke tyohaar par kya karen? har tyohaar par taiyaariyaan to karte hain na। rakshaabandhan parva ke uplakshya mein in advance jaakar raakhi baandhate hain। iska poora rahasya bhi buddhi mein hona chaahiye। aage to brahman-braahmaniyaan raakhi baandhate the। ab yeh rivaaz nikla hai ki behen bhaai ko raakhi baandhati hai। asal mein brahman raakhi baandhate the kyonki brahman jaati oonch, svachchha gaai hui hai। brahman asul sannyaasiyon se bhi oonch hai। parantu drama anusaar is samay sannyaasi oonch ban gaye hain। aage brahman raakhi baandhate the। phir janmaashtami par woh raakhi kholte the। jaise dropdi ke liye kehte hain ki jataayen khol di thi। rishi logon ki jataayen bhi hamesha khuli rehti hain। pativrata stri hoti hai to choti baandhati hai। dropdi ne khol diya tha ki jab tak ham apna raajya nahin lenge tab tak choti nahin karenge। ab tum bachchon ko sirf arth samjhaaya jaata hai। jab tak ham svaraajya nahin lenge tab tak sukh se soyenge nahin। gaate hain na - aaraam haraam hai। andar mein yeh josh rehta hai ki jab tak svaraajya nahin liya hai tab tak sukh kahaan? sukh to bhavishya mein paana hai, iske liye purushaartha ab karna hai। ab tum jaante ho raksha bandhan arthaat pavitra rahne ke liye ham pratigya karte hain। raakhi arthaat pratigya ki baat hai। ab yeh tyohaar kab se shuru hue? kyon shuru hue? kaun nikla jisne raakhi bandhan ki raay nikaali? koi ek raay nikaalte hain phir uska naam baala ho jaata hai। to yeh pavitrata ki nishaani hai। behen to hui kumaari। kumaariyaan baandhati hain। tum grihasthi ko bhi jaakar baandhati ho। kumaar to hain hi kumaar। behen bhaai ko baandhati hain, kumaar ho va shaadi kiya hua ho। shaadi kiya hua phir pavitra rahe yeh to bada mushkil hai। bhagwan kehte hain ki yeh antim janma pavitra bano to bhi nahin bante hain। to behen dvaara kumaar bhaai ko raakhi baandhani chaahiye ki pratigya karo - ham kabhi vish nahin piyenge। jo hain hi vikaari woh to kabhi vikaar ko chhodenge nahin। bhagwan ka farmaan bhi nahin maante hain। to yeh kumaar-kumaariyon ki rasma chali aati hai। ab tum samajhte ho ki yeh tyohaar bhi sangamayug ka hai। satayug mein to hain hi sab pavitra। vahaan raakhi baandhane ki darkaar hi nahin। aise nahin ki yeh satayug se lekar rivaaj chala aaya hai। utsav bahut karke sangamayug ke hain। lakshmi-naaraayan ka utsav bhi abhi manaate hain parantu unka mahatva nahin। shreekrishna jayanti manaate hain parantu pahle to shreekrishna ko aisa kisne banaaya - woh bataao? bichaaron ko maaloom nahin। yeh bhi clear kar likhna hai। utsav sab hain is samay ke। satayug mein aisi baat hoti nahin। yeh to dvaapar mein kuchh samay baad phir shuru hote hain। deepmaala ka utsav bhi satayug mein nahin manaaya jaata, jaise yahaan manaate hain। yahaan manaane ka arth doosra hai। utsav ka mahatva kab ka hai - yeh samajhne ki baat hai। bachchon ko samjhaaya jaata hai - yeh utsav is samay ke hain jabki shiv jayanti hoti hai। shiv jayanti ke baad phir hoti hai raakhi। pavitra banne ki pratigya karte hain ki yeh antim janma ham pavitra banenge - bhaarat ko athva vishwa ko pavitra banaane ke liye।

tum bachchon ke liye is rakshaabandhan ka bada mahatva hai। pratigya ki jaati hai - ham kabhi patit nahin banenge। ab tum paavan bante ho to sirf tum paavan kumaariyon ko hi hak hai raakhi baandhane ka। bhaaiyon ko sadaiv pavitra rahne ke liye raakhi baandhani hai aur in grihasthiyon se pratigya karaani hai pavitra rahne ki। kehte hain na - patit-paavan aao। to jo gaayan hai vo hi pratigya karaate hain - patit se paavan bano। baap aakar pratigya karaate hain। shiv jayanti ke baad hai rakshaabandhan। holi bhi gyaan ki hai। dhuriya aur holi - donon is samay ke hain। holi arthaat pavitra bano, dhuriya maana gyaan dhaaran karo। woh phir patthar thikkar, gobar aadi-aadi banaakar kya-kya karte hain! to patit-paavan baap hi aakar bachchon ko samjhaate hain।

jo jeete ji marte hain unmein bhi maatele aur sautele hote hain। maatele ka hisaab-kitaab zaroor baap ke paas hoga। baap zaroor bachche ki sab kaarobaar, milkiyat aadi ko jaante honge। maatele woh hain jinka baap se poora love rehta hai। maatele bhi nambarvaar hote hain। sautele bhi nambarvaar hain। koi kapoot, koi sapoot to hote hi hain। shiv jayanti bhi sangamayug par hoti hai। sangam ko bhi time dena chaahiye। jaise leap maas kehte hain phir leap century 100 varsha ki। yeh bahut oonchi hai leap sadi। 20veen sadi kehte hain na। inmen bhi yeh sadi, jismen baap aate hain, isko sangam century kahenge। uthal-puthal hone mein time lagta hai। deepmaala bhi yahaan ki hai। tum bachche jaante ho shiv jayanti ke baad phir hai pavitrata ki baat। shuru se lekar pavitrata par jhagda chala aaya hai। pavitrata ke saath gyaan aur yog ki holi-dhuriya saath-saath hai। baap ki yaad bhi achhi reeti chaahiye। gyaan ka dhuriya bhi chalta rehta hai। gyaan barsaat tum par hoti hi rahegi। pavitrata par hi jhagda chalta hai। sab kehte hain ki yeh kaun aaya hai jo kehte hain ghar-grihastha mein rehte pavitra rahkar dikhaao। sannyaasi to khud gharbaar chhod jaate hain। gopeechanda raaja ki bhi kahaani hai। unse poochha gaya - tumne raajya-bhaagya kyon chhoda? bola - prabhu-milan ke liye chhoda hai। is par geet bhi achhe-achhe gaate hain। yahaan to grihastha vyavhaar mein rahkar pavitra rehna hai। pavitrata par hi saari khitpit hoti hai।

ab rakshaabandhan hai pavitra banne-banaane ka yaadgaar parva। yahaan dekho, chhote-chhote bachchon ko bhi saakshaatkaar hote hain। ab chhote bachche ne kya bhakti ki? baba ne jhat sabko saakshaatkaar kara diya, to samajhte the jaadu hai। isko kaha jaata hai - shivbaaba ke charitra। baithe-baithe gum ho jaate the - yeh bhi drama hi kahenge। ek-do ko dekha aur dhyaan mein chale gaye। yeh sab charitra parampita paramatma ke hain, shreekrishna ke nahin। shreekrishna ka naam le saari badnaami ki hai। bhaagvat mein kya-kya likh diya hai! shreekrishna satayug ka prince usne cheer hare....... yeh kiya....... aise charitra to gaaye nahin jaate। duniya vaale samajhte hain barobar shreekrishna ne yeh sab kiya hoga। phir kehte hain ki shreekrishna ke shareer mein aatma aai hogi, jisne gyaan sunaaya hoga। parantu aise to nahin ho sakta। woh to prince naameegraami tha phir rath dikhaate hain। rath mein shreekrishna dikhaate hain। ghode gaadi par baith paathshaala chalaai jaati hai kya? yeh hai raajayog ki paathshaala। kahaan unhonne yuddha ka maidaan dikhaaya hai aur kahaan tumhaari yeh yuddha! yeh hai maaya par jeet paane ki yuddha। to tum bachchon ko rakshaabandhan par samjhaana hai। rakshaabandhan arthaat patiton ko paavan banaane ke liye svayan parampita paramatma aaye hain। tum brahmaakumaariyaan ho jo gaai hui ho। kumaari woh jo 21 kul ka uddhaar kare। sangam ki hi baat hai। phir yeh utsav satayug aadi mein nahin chalta। raakhi bandhan ke baad phir hai shreekrishna jayanti kyonki satayug mein pahla number janma hai shreekrishna ka। unki bhi raajdhaani hai। woh is samay pratigya karte hain - shreekrishna ke kul mein jaane ke liye। yeh raajayog hai। tum nar se naaraayan bante ho। lakshmi-naaraayan ki jeevan kahaani hai nahin। baap ne samjhaaya hai raadhe-krishna so lakshmi-naaraayan ki jeevan kahaani। shreekrishna ka janma din manaate hain। achha, naaraayan jayanti kahaan? kaaran hoga na। na samajhne kaaran saara khel hi munjha diya hai। mahatva saara yahaan ka hai। aise bhi mat samjho ki deepmaala koi satayug se shuru hoti hai। satayug mein to hai hi pavitra duniya। sabhi ki aatmaayen jagi hui hai। utsav sab is samay ke hain। abhi tum sabki biography ko jaante ho। shivbaaba svayan aakar ke bachchon ko kehte hain ki ab pavitra bano। tum aatmaayen maili ho gai ho। sannyaasi to kehte hain aatma nirlep hai isliye bahut log kah dete hain anda machhli aadi khaane mein koi harja nahin hai। sabki apni-apni rasma-rivaaj hai na। aage kaali par manushyon ki bali chadhaate the। shiv ko to kaala nahin kahenge, na shankar ko kahenge। haan, brahma aur vishnu ke do roop gore se kaale bante hain। yeh sab baap baith samjhaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) baap se poora-poora lav rakh maatela banna hai। apna poora samaachaar baap ko dena hai। kabhi bhi kapoot nahin banna hai।

2) raksha bandhan ka yathaartha rahasya buddhi mein rakh pavitra zaroor banna hai। maaya se kabhi haar nahin khaani hai। pavitrata ke bal se svaraajya lene ki pratigya karni hai।

vardaan:- sada milan ke jhoole mein jhoolne vaale tat tvam ke vardaani baap samaan bhav

jaise baapdaada aap maalikon ki aagya ko maankar milan manaane ke liye aate hain, ji haazir ka paath padhkar haajir ho jaate hain aise hi tat tvam। amritvele se lekar din ke samaapti tak dharma aur karma mein baap samaan bano to sada milan ke jhoole mein jhoolte rahenge। is milan ke jhoole mein rahne se prakriti aur maaya donon hi aapke jhoole ko jhulaane vaale daasi ban jaayenge। sarva khajaane aapke is shreshtha jhoole ka shrringaar ban jaayenge।

slogan:- sada brahma baap ki bhujaaon mein samaaye raho to safety ka anubhav karenge।