शुक्रवार 8 सितंबर 2023 की दैनिक मुरली

08-09-2023 praatahmurli om shanti "baapdaada"' madhuban

“meethe bachche - koi bhi bhool ho to baap se chhipaao mat, agar chhipaayenge to chhipaate-chhipaate svayan bhi chhip jaayenge''

prashn:- bigdi ko banaane vaala baap tum bachchon ki bigdi kis aadhaar par banaate hain?

uttar:- pavitrata ke aadhaar par। tum bachche jaante ho jab baap bigdi ko sudhaarne aate hain to is pavitrata par hi anek jhagde hote hain। ablaaon ko sitam sahan karne padte। pavitra banne bigar devta ban nahin sakte। bhaarat ko kaudi se heera, duhkhadhaam se sukhdhaam, puraane ko naya banaane ke liye pavitra zaroor banna pade। tum bachche isi baat ki madad baap ko karte ho isliye baap ke saath-saath tumhaari bhi pooja hoti hai।

geet:- bholenaath se niraala…

om shanti। bachchon ne geet suna? kaun se bachchon ne? prajaapita brahmaakumaar aur kumaariyon ne। baap kehte hain main bi.ke. ke aage hi gyaan sunaata hoon। bachche jaante hain yahaan koi bhi shoodra kumaar va raavan kumaar baith nahin sakte। naam hi pada hai brahmaakumaar aur kumaariyaan arthaat prajaapita brahma ki santaan। tum jaante ho ki hamaare brahma baba ka baba to shiv hai। ham aatmaon ka bhi baap shiv hai। woh baap hi hai bigdi ko banaane vaala। bhaarat ki hi bigdi hai, usko hi banaate hain। baap kehte hain bhaarat heere jaisa tha, sukhdhaam tha। nai duniya mein naya bhaarat, naya devi-devtaaon ka raajya tha। abhi bhaarat ki bigdi hui hai, asuron ka raajya hai। bigdi ko banaane vaala athva sudhaarne vaala kaun hai? yeh tum braahmanon ke sivaae aur koi jaan na sake। barobar bhaarat bahut oonch tha, ab neech hai। doosre koi dharma ke liye nahin kahenge ki woh bahut oonch the, ab neech hain। jinhonne raajaai ganvaai hai vahi phir se raajaai karte hain। tab kehte hain phir se bigdi ko banaane vaala। satayug ke baad phir zaroor treta, dvaapar, kaliyug aana hi hai। sabki bigadni hi hai। sato, rajo, tamo mein aana hai zaroor। ab sabhi ki bigdi hui hai। sab dharmon ka aapas mein hangaama bahut hai। cheeniyon ka aapas mein, bauddhiyon ka aapas mein, sabhi aapas mein kitna ladte-jhagadte rehte hain। itne jo anek dharma hain sabki bigdi hui hai। sab tamopradhaan jad-jadeebhoot avastha mein hain। sabko satopradhaan se tamopradhaan banna hi hai। raavan tamopradhaan bana dete hain phir raam aakar raavan ki bigdi ko banaate hain।

tum jaante ho raam kisko kaha jaata hai। raam-raam kah maala pherte hain to paramatma ko hi yaad karte hain। naam hi hai roodra maala। roodra shiv ke gale ki maala। sab dharma vaale yaad zaroor karte hain। sabhi dharma vaalon ka sadgati daata shiv hai। saath mein zaroor madadgaar honge। rudra ki maala bahut service karti hai। tum bachchon ko bahut service karni hai। service karte ho tab to tumhaara poojan hota hai। rudra yagya bhi rachte hain, na sirf bhaarat mein parantu saari duniya mein kyonki tum saari duniya ko paavan banaate ho। sarvashaktimaan baap se shakti lekar tum svarga banaate ho to zaroor saari srishti ko tumhaari pooja karni chaahiye। rudra hai baap। unka bada shivling mitti ka banaate hain aur chhote-chhote saaligraam bhi banaate hain। naam hai rudra yagya। tumhaari pooja hoti hai kyonki tum seva karke gaye ho। rudra yagya rachte hain, bahut pooja karte hain। laakhon saaligraam banaate hain। pahle hai aath ki maala phir hai 108 ki aur 16108 ki। unhonne madad ki hai, jo madad bahut karenge vahi nazdeek vaale honge।

abhi tum purushaartha karte ho rudra maala mein najdeek piro jaayen। sirf baap ko yaad karna hai। bahut sahaj hai। bachche ke liye baap ko yaad karna bahut sahaj hai, janmate hi baba-mama kehna seekh jaate hain। to tum bhi baba-mama ke bachche bane ho। kehte bhi ho tum maat-pita......। abhi tum jaante ho ham maat-pita ke sammukh baithe hain। woh maat-pita hamko raajaai praapta karne ke liye shiksha dete hain। yoon to shiksha raaja ko deni chaahiye, raaja banaane ki। jaise barrister banaane ki shiksha barrister dete hain parantu yahaan to wonderful baat hai। parampita paramatma hi gyaan ka saagar hai। world almighty authority hai। sabhi vedon, shaastron, granthon aadi ko woh jaante hain। woh hai niraakaar, knowledgeful, blissful, merciful। sabke oopar raham karte hain। saari srishti par daya karte hain kyonki saari srishti tamopradhaan bani hui hai। 5 tatva bhi tamopradhaan hain। un par bhi daya karte hain, woh bhi satopradhaan ban jaayenge isliye unko behad ka sarvodaya kaha jaata hai। yeh bhi drama mein noondh hai। aatma pavitra banne se har cheez pavitra ban jaati hai। abhi yeh tatva aadi bhi kitne nuksaan karte hain। vahaan tatva bhi satopradhaan hote hain। kabhi koi boodhe nahin hote। to bigdi ko banaane vaala baap hai। unko hi world almighty authority kaha jaata hai। vahi world almighty authority raajya sthaapan karte hain। khud to niraakaar hai, unko mahaaraaja ya vishwa ka maalik, vishwa par raajya karne vaala nahin kahenge। woh to karnakraavanhaar hai। devi-devtaaon ki raajdhaani sthaapan karaate hain। khud raajaai karte nahin hain।

tum bachche kehte ho ham world almighty authority vishwa ke maalik bante hain। phir tumhaare par koi ki authority nahin chalti। koi hukm nahin kar sakte। satayug-treta mein aur koi hote hi nahin। to tum bachchon ko siddha kar bataana hai sarva shaastra shiromni geeta hai। bhagwan ne hi raajayog sikhlaaya hai। tum bachche jaante ho ham manushya se devta bante hain। manushyon ki bigdi hai tab to baap aakar devta banaate hain। saara madaar hai pavitrata par। bachchiyaan likhti hain - baba, pavitra banne liye bahut sitam karte hain। bachchon ko samjhaaya gaya hai bada yukti se chalna chaahiye। ismen badi hoshiyaari chaahiye। ek khel hai jismen dikhaaya hai apne ko bachaane liye stri kitne charitra karti hai। baap kehte hain - bachche, ismen nashtomoha banna pade। bahuton ki pati mein, bachchon mein moh ki rag jaati hai। kanya ka to sirf maa-baap aur bhaai-behen mein moh hoga phir jab shaadi karti hai to plus aur bhi badh jaate hain। pati, saasu phir bachche paida hue to unmein kitna moh jut jaata hai। double vriddhi ho jaati hai isliye pahle to nashtomoha chaahiye, phir pareekshaayen bhi aati hain। jaise raajaayen log gharbaar chhodte hain to pahle guru ke paas jaate hain, woh phir unse kaathi (lakdi) kataate, aashram ki saphaai aadi karaate hain taaki deh-abhimaan toot jaae। yahaan bhi aise kaayde hain। gareeb to yeh sab kaam karte rehte hain। bade ghar vaalon mein bada deh-abhimaan rehta hai to unhon ki pareeksha li jaati hai। shurooaat mein baba ne bhi pareeksha li na। deh-abhimaan todne liye tum sab kuchh karte the। motor saaph karna, dhobi ka kaam karna। koi bhi aaye to bolo - pahle to yeh kaam karna padega। bade ghar vaalon ke liye to aana hi bada mushkil hai। gareebon par phir maar khaane ki museebat hai। pavitra rahne nahin dete hain। unke saath phir yukti se chalna padta hai lekin poora nashtomoha zaroor chaahiye। adhoore nashtomoha honge to ek taang us taraph, ek taang is taraph, latak padenge। phir aise bahut latak duhkhi ho padte hain। baap ko bhoolne se chhi-chhi ho jaate hain।

baap bachchon ko nirantar yaad karne ke liye kitni yuktiyaan batlaate hain। yaad se hi vikarmaajeet banenge। kalpa-kalpa shreemat dete aaye hain। raajdhaani to zaroor sthaapan hoti hai। jo kalpa pahle muaaphik purushaartha karte hain woh chhipe nahin rah sakte। jhat maaloom pad jaata hai। daas-daasiyaan bhi banne hain na। yahaan rehte hain to raajdhaani mein to aa jaate hain kyonki bachche to phir bhi bane na। daas-daasi ban phir kuchh na kuchh pad pa lete hain। nahin to daas-daasiyaan kahaan se aaye। praja ko to andar aane ka allow ho na sake। daas-daasiyaan to andar rehte hain। bahut kehte hain ham shreekrishna ke daas-daasi banen to bhi achha hai। maa se bhi jaasti unki god mein aayega। aajkal bachchon ko nurse hi sambhaalti hain। vahaan to shreekrishna ko sambhaalne mein badi khushi hoti hai। shreekrishna janmaashtami par sab maataayen shreekrishna ko jhulaati hain। vahaan bhi daasiyaan sambhaalti hain।

baapdaada ko bachche bade achhe chaahiye। baap to kehte hain, kitni mehnat karni padti hai - raajdhaani sthaapan karne mein। jhaad-jhaad ki kaathi hai, sambhaalne vaale hi tang ho jaate hain। koi-koi par chalte-chalte grahchaari baith jaati hai। baat mat poochho। yeh to gud jaane gud ki gothri jaane, yaani baapdaada jaane। gud to hai hi baap, meetha hai na। unki gothri, jinmen woh aate hain to woh jaane aur yeh jaanen। maaya raavan aisa thappad laga deti jo pata bhi nahin padta hai। avagya ho jaati hai to maaphi to le lo, nahin to karma bhogna bahut ho jaati hai। samjhaane se bhi samajhte nahin। aisa maaya ka grahan lag jaata hai। baba khud batlaate hain। kabhi to yog bada achha lagta hai, kabhi to maaya itna toophaan mein le aati hai, baat mat poochho। baba kehte hain pahle tum anubhav karenge, tab to auron ko bataayenge na। to toophaan pahle sab baba ke aage aate hain। baba batlaate hain apne ko miya mitthu nahin samajhna hai। saaph dil hai to oonchi muraad haansil hoti hai। andar baahar dil ke saaph hon tab hi sachchi dil par saaheb raazi ho sakta hai। tum bachche jaante ho hamaari bigdi ko baba bana rahe hain। ham ekdam bandar misal the। baba mandir laayak banaate hain। vishwa ke ham maalik bante hain phir mandir mein baithne ki ek kothri milti hai। satayug ko kaha jaata hai shivaalay। saare vishwa ke maalik ban raajya karte hain phir baad mein hamaare liye mandir bante hain jinmen ham pooje jaate hain। pooja karne vaale bhi pahle ham hi the, ham hi poojya the phir ham hi pujaari bane hain phir poojya bante hain। samjhaaya to bahut achha jaata hai। maaya achhe-achhe bachchon ka bhi maatha kharaab kar deti hai। deh-abhimaan bada nuksaan kar deta hai phir kuchh na kuchh paap ho jaata hai। shivbaaba ki shal koi avagya na kare, unse koi na chhipaaye। dharmaraaj bhi hai, bada danda dete hain। unka dar rehna chaahiye। avagya hoti hai to kshama le leni chaahiye - baba, aaj hamse yeh bhool hui। shivbaaba through brahma। dar rehta hai brahma to pahle padhenge। are, woh to baba hai, shiksha dete hain। mama bhi shiksha deti hai। tumko bhi koi batlaate hain to tum phir shivbaaba ko samaachaar dete ho। mama-baba ko bhi maaloom pad jaata hai। samjhaaya to bahut jaata hai। maknaahaathi nahin banna hai, use bahut abhimaan hota hai। yeh deh-abhimaan bahut nuksaankaarak hai, aadhaakalpa chala hai na। vahaan to samajhte hain ham aatma hain, yeh puraana shareer chhod naya lete hain। vahaan aatma-abhimaani kahenge। yahaan to sab deh-abhimaani hain। to bachchon ko shreemat lete rehna hai। bhool kabhi chhipaana nahin chaahiye। chhipaate-chhipaate chhip hi jaate hain। yog toot padta hai। bigdi ko banaane vaala ek hi bhagwan authority hai। abhi tum unke bachche bane ho। achha!

ati meethe-meethe sikeeldhe gyaan sitaaron prati maat-pita baapdaada ka nambarvaar purushaartha anusaar yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) andar-baahar dil ki saphaai se saaheb baap ko raazi rakhna hai। maaya ke grahan se bachne ke liye baap ko sachchaai se sab sunaana hai।

2) nashtomoha poora banna hai। jara bhi kisi dehdhaari mein rag nahin rakhni hai। deh-abhimaan ko todne ka poora-poora purushaartha karna hai।

vardaan:- sneh ke jaadu dvaara nirbandhan ko bhi bandhan mein baandhane vaale shreshtha jaadoogar bhav

baap se bhi bade jaadoogar aap bachche ho। aisa sneh ka jaadu aapke paas hai jo nirbandhan ko bhi bandhan mein baandh dete ho। baap ko bhi bachchon ke sivaae kuchh soojhta nahin। nirantar bachchon ko hi yaad karte hain। kitne baar to baap ko bhojan par bulaate ho, khaate ho, chalte ho, sote ho to bhi baap saath hai। koi karma karte ho to kehte ho ki kaam aapka hai, karaao aap nimitta haath ham chalaate hain। phir karma ka bojh bhi baap ko de dete ho to shreshtha jaadoogar hue na।

slogan:- apni svasthiti ki shakti se paristhiti ko badalne vaale kabhi pareshaan nahin ho sakte।