शनिवार 28 अक्टूबर 2023 की दैनिक मुरली

28-10-2023 praatahmurli om shanti "baapdaada"' madhuban

“meethe bachche - behad service ke liye tumhaari buddhi chalni chaahiye। aisi badi ghadi banaao jiske kaanton mein radium ho jo door se hi chamakta rahe।

prashn:- service ki vriddhi ke liye kaun-si yukti rachni chaahiye?

uttar:- jo-jo mahaarthi hoshiyaar bachche hain unko apne paas bulaana chaahiye। mahaarthi bachche chakkar lagaate rahen to service vriddhi ko paati rahegi, ismen aise nahin samajhna chaahiye ki hamaara maan kam ho jaayega। bachchon ko kabhi bhi deh-abhimaan mein nahin aana chaahiye। mahaarthiyon ka bahut-bahut regard rakhna chaahiye।

geet:- yeh vakta ja raha hai…

om shanti। ghadi ka naam suna to behad ki ghadi yaad padi। yeh hai behad ki ghadi, ismen saari buddhi se samajhne ki baat hai। unka bhi bada kaanta aur chhota kaanta hai। second ka bada kaanta chalta rehta hai। ab raat ke 12 baje hain yaani raat poori ho phir din shuru hona hai। yeh behad ki ghadi kitni badi honi chaahiye। ismen kaante jo banaaye jaaen usmein radium bhi dena chaahiye, jo door se chamakta rahe। ghadi to apne aap samjhaati hai। koi bhi naya aaye to ghadi aakar dekhe। buddhi bhi kehti hai barobar kaanta ant mein aakar pahuncha hai। koi bhi samajh sakta hai ki vinaash zaroor hona chaahiye। phir hai satayug ki aadi। satayug mein bahut thodi aatmaayen hoti hain। to itni sab aatmaayen zaroor vaapis jaati hongi। chitron par samjhaana hai bahut sahaj। aisi ghadi koi banaaye to bahut khareed karke bhi ghar mein rakhen। in par samjhaana hai। yeh kaliyugi bhrashtaachaari duniya hai। anek dharma bhi hain। vinaash bhi saamne khada hai। natural calamities bhi honi hai। ab in lakshmi-naaraayan aadi ko bhi satayug ki baadshaahi kaise mili? zaroor baap dvaara mili hogi। patit-paavan aate hi hain patit duniya mein, sangam par। paavan duniya mein to baap ko aana nahin hai। yeh gole par samjhaane ke liye badi first class baat hai aur is par samjhaana kisko bhi bada sahaj hai। jinke paas paise bahut hain woh to artist ko jhat order de aur jhat cheez taiyaar ho jaae। government ka kaam to itne mein ho jaata, yahaan to mushkil koi kaam karte hain। koi achha artist chitra banaata hai to woh shobhta bhi hai। aajkal art ka maan bahut hai। dance ka art kitna dikhaate hain, samajhte hain pahle aise dance hote the। parantu aise koi hai nahin। to yeh behad ki ghadi phat se banaani chaahiye। jo achhi reeti manushya samajh jaaen। colour bhi aisa achha ho jo chamakta rahe। patit-paavan koi manushya to ho nahin sakta। manushya patit hain na tab to gaate hain। paavan duniya bhi svarga hai। manushya to nahin samajhte ki shreekrishna hi shyaam hai phir sundar banta hai isliye naam pada hai shyaam-sundar। ham bhi pahle nahin samajhte the, abhi buddhi mein hai barobar kaam chita par baithne se kaala ho jaata hai arthaat aatma patit ho jaati hai। yeh bhi spashta karke likhna hai। varsa dete hain parampita paramatma aur shraap dete hain raavan। manushyon ki buddhi phir chali jaati hai raghupti raaghav raaja raam taraph, parantu raam to hai parampita paramatma। yeh sab buddhi chalaakar chitra banaana chaahiye kyonki aajkal apne ko bhagwan to sab kehte rehte। tum jaante ho baap to ek hi hai। baaki ham sab aatmaayen paramdham mein paramatma ke saath jaakar rahengi। us samay baap bhi brahmaanda ka maalik, ham bhi brahmaanda ke maalik hain। phir baap kehte hain tum bachchon ko main vishwa ka maalik banaata hoon। aur bhal koi kitna bhi bada raaja ho aise nahin kahenge ki ham vishwa ke maalik hain। baap to vishwa ka maalik bana rahe hain। to aise maat-pita par kitna kurbaan jaana chaahiye। unki shreemat mashhoor hai। us par chalte-chalte pichhaadi mein aakar shreemat ka poora paalan karte hain। abhi agar shreemat par poora chalen to shreshtha ban jaaen, kitna maatha maarna padta hai। jab tak yagya hai tab tak purushaartha chalta rahega।

yeh hai rudra gyaan yagya। woh bhi rudra yagya karte hain shanti ke liye। usse to shanti ho na sake। baap ka to ek hi yagya hai, jismen saari saamagri svaaha ho jaati hai aur second mein jeevanmukti milti rehti hai। woh kitne yagya rachte hain, phaayda koi nahin। tum bachche ho nonviolence। pavitrata bigar koi svarga mein ja na sake। yeh hai pichhaadi ka samay। patit duniya, bhrashtaachaari raavan ki duniya, 100 pratishat apvitrata, ashaanti, duhkhi, rogi… yeh sab likhna pade aur phir svarga mein hain shreshthaachaari, 100 pratishat pavitrata-sukh-shanti nirogi। woh hai raavan ka shraap, yeh hai shivbaaba ka varsa - poori likhat honi chaahiye। bhaarat phalaane samay se phalaane samay tak shreshthaachaari tha phir phalaane samay se bhrashtaachaari bana hai। likhat aisi ho jo dekhne se samajh jaaen। samjhaane se bhi buddhi mein nasha chadhega। is dhandhe mein hi rahne se phir practice ho jaayegi। woh service 8 ghanta karte hain to yeh bhi 8 ghanta karni chaahiye। centre par bachchiyaan jo hain unmein bhi nambarvaar hain। koi ko to service ka bahut shauk hai। jahaan-tahaan bhaagte rehte hain। koi to ek hi jagah par aaraam se baith jaate hain, unko all-rounder nahin kahenge। mahaarthiyon ko to kuchh samajhte nahin hain to service bhi dheeli pad jaati hai। bahuton ko apna anhakaar bahut rehta hai। hamaara maan ho, doosra koi aayega to hamaara maan kam ho jaayega। yeh nahin samajhte ki mahaarthi to madad karenge। apna ahankaar rehta hai, aise bhi buddhu hain। baap kehte hain sachchi dil par hi saaheb raazi hota hai। baba ke paas samaachaar to aate rehte hain na। baba har ek ki rag ko samajhte hain। yeh baba bhi anubhvi hai।

to yeh gole ki samjhaani bahut achhi hai। yeh samjhaani tumhaari niklegi to tumhaari service bahut achhi vihang maarga ki ho jaayegi। abhi to cheenti maarga ki service hai। apne hi deh-abhimaan mein rehte hain, isliye buddhi chalti nahin। abhi yeh hai vihang maarga ki service। serviceable bachchon ka maatha chalta rahega - kya-kya banaana chaahiye। chitron par samjhaana bahut sahaj hai। abhi kaliyug hai, satayug sthaapan hota hai। baap hi sabko vaapis le jaayenge। vahaan hai sukh, yahaan hai duhkh। sab patit hain। patit manushya koi ko bhi mukti-jeevanmukti de nahin sakte hain। yeh sab hain bhakti maarga ki kaarobaar sikhlaane vaale। guru sab hain bhakti maarga ke। gyaan maarga ka guru koi hai nahin। yahaan to kitni mehnat karni padti। bhaarat ko svarga banaane mein jaadoogri ka khel hain na isliye unko jaadoogar bhi kehte hain। shreekrishna ko kabhi jaadoogar nahin kahenge। shreekrishna ko bhi shyaam se sundar banaane vaala woh baap hai। samjhaane ka bada nasha chaahiye। baahar mein jaana chaahiye। gareeb hi achha uthaate hain। saahookaaron mein ummeed kam rehti hai। 100 gareeb to ek-do saahookaar, 5-7 saadhaaran niklenge। aise hi kaam chalta hai। dhan ki itni darkaar nahin rehti, government ne dekho kitna baarood banaaya hai। donon samajhte hain vinaash ho jaayega, ham vinaash ko paayenge, tab malook (shikaari) kaun banenge? kahaani hai na do bille lade makkhan beech mein bandar ko mil gaya। shreekrishna ke mukh mein makkhan dikhaate hain। hai yeh svarga roopi makkhan। yeh baaten mushkil koi samajh sakte hain। yahaan 20-25 varsha rahne vaale bhi kuchh nahin samajhte। pahle-pahle bhatthi bani, usmein kitne aaye, kitne chale gaye। koi jam gaye hain। drama mein kalpa pahle bhi aise hi hua tha। ab bhi aise ho raha hai। chitra jitne bade honge utna koi ko bhi samjhaana sahaj hoga। lakshmi-naaraayan ka chitra bhi zaroori hai। jhaad se pata padta hai bhakti cult kab se shuru hota hai। brahma ki raat do yug phir brahma ka din do yug। manushya to samajhte nahin phir kahenge brahma to sookshm vatan mein hai। parantu prajaapita to zaroor yahaan hi hoga। kitne guhya raaz hain jo shaastron mein to ho nahin sakte। manushyon ne sab ulte chitra dekhe hain, ulta gyaan suna hai। brahma ko bhi bahut bhujaayen di hain। yeh jo bhi shaastra aadi hain woh sab hain bhakti maarga ki saamagri। yeh kab se shuru hoti hai, duniya nahin jaanti। manushya bhakti kitni karte hain, samajhte hain bhakti bigar bhagwan mil nahin sakta। lekin jab poori durgati ho tab to bhagwan milega sadgati ke liye। yeh hisaab-kitaab tum jaante ho। aadhaakalpa se bhakti shuru hoti hai। baap kehte hain - yeh ved, upnishad, yagya-tap aadi sab hain bhakti maarga ke। yeh sab khatma hone hain। sabko kaala banna hi hai phir gora banaane baap ko aana pade। baap kehte hain main kalpa ke sangam yuge-yuge aata hoon, na ki yuge-yuge। dikhaate hain kachchha avtaar, machchha avtaar, parshuraam avtaar........। yeh bhagwan ke avtaar hain, phir patthar-bhittar mein bhagwan kaise ho sakta hai। manushya kitne besmajh ho gaye hain। baap ne aakar kitna samajhdaar banaaya hai। mahima bhi karni pade - parampita paramatma gyaan ka saagar, pavitrata ka saagar hai। shreekrishna ki yeh mahima ho nahin sakti। shreekrishna ke bhakta phir shreekrishna ke liye kah dete hain ki sarvavyaapi hai। kitna chatak padte hain। unse nikaalkar phir baap ka parichay dete hain sab aatmaayen bhaai-bhaai hain, sab father thode hi ho sakte hain, phir yaad kisko kiya jaata hai? god father ko bachche yaad karte hain, samjhaane vaala bhi behad buddhi vaala chaahiye। bachchon ki buddhi had mein phans padti hai। ek jagah hi baith jaate hain। businessman jo hote hain woh badi-badi branches kholte hain। jitna jo centres khole woh manager achha। phir centre par bhi madaar hai। yeh hai avinaashi gyaan ratnon ki dukaan। kiski? gyaan saagar ki। point to bahut hain, jo dhaaran kar samjhaani hain। sabha mein chitra rakhe hon jo sab dekhen। ghadi ka chitra (srishti chakra ka) bahut achha hai। is chakra ko jaanne se chakravarti banenge। svadarshan chakradhaari banna hai। ghadi par samjhaana bahut sahaj hai। kitne puraane bachche laayak hi nahin bante। apne ko miya mitthu samajh baithte, phaaltu khush hote। service nahin karenge to kaun samjhenge ki yeh daani hain। daan bhi asharphiyon ka karna chaahiye ya paai paise ka? yeh chitra andhon ke aage aaina hai। aaine mein apna mukh dekhenge। pahle bandar ki shakla thi, abhi mandir ki shakla ban rahi hai। mandir mein rahne laayak banne ka purushaartha karna hai। yeh hai patit duniya, woh hai paavan duniya, jo shivbaaba sthaapan kar rahe hain। jo shreemat par nahin chalte unki buddhi mein kabhi dhaarna ho nahin sakti। baap kehte hain pratidin tumko guhya bataata hoon to zaroor gyaan ki vriddhi hoti jaayegi।

koi-koi prashn uthaate hain - 8 baadshaahi kaise chalegi? is hisaab se itni baadshaahi honi chaahiye। baap kehte hain tum log in baaton mein kyon padte ho? pahle baap aur unke varse ko to yaad karo। vahaan ki jo rasma rivaaj hogi woh chalegi। bachche jis reeti se paida hote honge, us reeti se honge। tum kyon ismen jaate ho? vikaar ki baat mukh par kyon laate ho? yeh chitra kisko saugaat mein dena bahut achha hai। yeh god fatherly gift hai। aisi god fatherly gift kaun nahin le jaayenge। Christian log aur kiska literature aadi nahin lete, unko apne dharma ka nasha rehta hai। baap to kehte hain devta dharma sabse oonch hai। woh samajhte hain ki hamko in Christian se bahut paise milte hain। parantu yeh to gyaan ki baaten hain। jo gyaan uthaate hain vahi baap se varsa paate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) vishwa ka maalik banaane vaale maat-pita par dil se kurbaan jaana hai। unki shreemat par achhi reeti chal shreshtha banna hai।

2) apni dil sada sachchi rakhni hai। ahankaar mein nahin aana hai। asharphiyon ka daan karna hai। gyaan daan karne mein mahaarthi banna hai। 8 ghanta eeshvareey service zaroor karni hai।

vardaan:- sarva praaptiyon ki anubhooti dvaara maaya ko vidaai de badhaai paane vaale khushanseeb aatma bhav

jinka saathi sarvashaktimaan baap hai, unko sada hi sarva praaptiyaan hain। unke saamne kabhi kisi prakaar ki maaya aa nahin sakti। jo praaptiyon ki anubhooti mein rah maaya ko vidaai dete hain unhein baapdaada dvaara har kadam mein badhaai milti hai। to sada isi smriti mein raho ki svayan bhagwan ham aatmaon ko badhaai dete hain, jo socha nahin woh pa liya, baap ko paaya sab kuchh paaya aisi khushanseeb aatma ho।

slogan:- svachintan aur prabhuchintan karo to vyartha chintan svatah samaapta ho jaayega।