मंगलवार 14 मई 2024 की दैनिक मुरली

14-05-2024 praatahmurli om shanti "baapdaada"' madhuban

“meethe bachche - aatma-abhimaani bano, main aatma hoon shareer nahin, yeh hai pahla paath, yahi paath sabko achhi tarah padhaao''

prashn:- gyaan sunaane ka tareeka kya hai? kis vidhi se gyaan sunaana hai?

uttar:- gyaan ki baaten badi khushi-khushi se sunaao, laachaari se nahin। tum aapas mein baithkar gyaan ki charcha karo, gyaan ka manan-chintan karo phir kisi ko sunaao। apne ko aatma samajhkar phir aatma ko sunaayenge to sunne vaale ko bhi khushi hogi।

om shanti। baap kehte hain aatma-abhimaani va dehi-abhimaani ho baitho kyonki aatma mein hi achhe va bure sanskaar bhare jaate hain। sabka asar aatma par hota hai। aatma ko hi patit kaha jaata hai। patit aatma kaha jaata hai to zaroor jeev aatma hi hogi। aatma shareer ke saath hi hogi। pahli-pahli baat kehte hain aatma hokar baitho। apne ko shareer nahin, aatma samajh baitho। aatma hi in organs ko chalaati hai। ghadi-ghadi apne ko aatma samajhne se paramatma yaad aayega। agar deh yaad aai to deh ka baap yaad aayega isliye baap kehte hain - aatma-abhimaani bano। baap padha rahe hain, yeh hai pahla paath। tum aatma avinaashi ho, shareer vinaashi hai। ‘ham aatma hain' yeh pahla shabd yaad nahin karenge to kachche pad jaayenge। main aatma hoon, shareer nahin hoon - yeh shabd is samay baap padhaate hain। aage koi bhi padhaate nahin the। baap aaye hi hain aatma-abhimaani banaakar gyaan dene liye। pahla gyaan dete hain - he aatma tum patit ho, kyonki yeh hai hi puraani duniya। pradarshani mein bhi tum bachche bahuton ko samjhaate ho। prashn-uttar karte hain to jab din ke samay rest milti hai, us samay aapas mein milna chaahiye, samaachaar poochhna chaahiye, kisne kya-kya prashn poochhe, hamne kya samjhaaya। phir unko samjhaana hai। phir us par aise nahin, aise samjhaana chaahiye। samjhaane ki yukti sabki ek nahin hoti। mool baat hai apne ko aatma samajhte ho ya deh? do baap bhi sabke hain zaroor। jo bhi dehdhaari hain, unka laukik baap bhi hai, paarlaukik bhi hai। had ka baap to common hai। yahaan tumko mila hai behad ka baap, woh ham aatmaon ko baith samjhaate hain। woh ek hi baap bhi hai, teacher bhi hai, guru bhi hai। yeh pakka kar dena chaahiye। jab tum kisko samjhaate ho, jo-jo tumse prashn poochhte hain us par aapas mein baithna chaahiye, jo hoshiyaar hain unko bhi baithna chaahiye। tumko time milta hai din ke samay। aisa nahin ki bhojan khaate hain isliye neend ka nasha aaye। jo bahut khaana khaate hain unko neend ka aalasya aata hai। din mein class karna chaahiye - phalaane ne yeh yeh poochha, hamne yeh response kiya। prashn to bhinna-bhinna poochhenge। unka response bhi chaahiye real। dekhna chaahiye unko kashish mein laaya, satisfy hua? nahin to phir correction nikaalni chaahiye। jo hoshiyaar hain, unko bhi baithna chaahiye। aise nahin, khaana khaaya jaldi neend aaye। devtaayen khaana bahut thoda khaate hain kyonki khushi hai na isliye kaha jaata hai khushi jaisi khuraak nahin। tum bachchon ko athaah khushi honi chaahiye। brahman banne mein badi khushi hai। brahman bante hi tab hain jab unko khushi milti hai। devtaaon ko khushi hai na kyonki unhon ke paas dhan mahal aadi sab kuchh hai। to unhon ke liye khushi hi kaaphi hai। khushi mein khaana bhi bahut thoda, sookshm khaayenge। yeh bhi ek kaayda hai। jaasti khaane vaale ko jaasti neend aayegi। jisko neend ka nasha hoga woh kisko samjha bhi nahin sakenge, jaise laachaar। yeh gyaan ki baaten to badi khushi se sunni-sunaani chaahiye। samjhaane mein bhi sahaj hoga।

mool baat hai baap ka parichay dena। brahma ko to koi jaante nahin। prajaapita brahma hai, dher ki dher praja hai। yeh prajaapita brahma kaise hoga - is par bahut achhi reeti samjhaana hai। baap ne samjhaaya hai inke bahut janmon ke ant ke bhi ant mein vaanaprastha avastha mein main pravesh karta hoon। nahin to rath kahaan se aaye। rath gaaya hua hi shivbaaba ke liye hai। rath mein kaise aate hain, usmein moonjhate hain। rath to zaroor chaahiye। shreekrishna to ho na sake, to zaroor brahma dvaara samjhaayenge। oopar se to nahin bolenge। brahma kahaan se aaya? baap ne sunaaya hai main inmen pravesh karta hoon, jisne poore 84 janma liye hain। yeh khud nahin jaante, main sunaata hoon। shreekrishna ko to rath ki darkaar hi nahin। shreekrishna kahne se phir to bhaageerath gum ho jaayega। shreekrishna ko bhaageerath nahin kaha jaata। unka to pahla janma hai prince ka। to bachchon ko andar mein vichaar saagar manthan karna chaahiye। yeh to bachche jaante hain, woh baaten to nahin hain jo shaastron mein likh di hain। baaki yeh to theek hai vichaar saagar manthan kiya hua kalash lakshmi ko diya hai। usne phir auron ko amrit pilaaya tab svarga ke get khule। parantu parampita paramatma ko to vichaar saagar manthan karne ki darkaar hi nahin। woh to beejroop hai। unmein knowledge hai, vahi jaante hain, tum bhi jaante the। abhi yeh achhi reeti samjhaana zaroor hai। samajhne bigar devta pad kaise paayenge! baap samjhaate hain aatmaon ko refresh karne liye। baaki to kuchh bhi jaante nahin। baap aakar samjhaate hain abhi tumhaara langar bhakti maarga se utha, ab gyaan maarga mein chala hai। baap kehte hain main tumko jo gyaan deta hoon woh praayahlop ho jaata hai।

ek hai niraakaar, doosra hai saakaari baap। samjhaaya to bahut achha jaata hai parantu maaya aisi hai jo kashish kar ganda mein le jaati hai। patit ban padte hain। baap kehte hain - bachche, tum kaam chita par chadh ekdam kabristaan mein aa gaye ho। phir yahaan hi paristaan hoga zaroor। aadhaakalpa paristaan chalta hai, phir aadhaakalpa kabristaan chalta hai। abhi sab kabradaakhil hone hain। seedhi par bhi achhi reeti samjha sakte ho। yeh hai hi patit raajya, iska vinaash zaroor hona hai। is dharni par abhi kabristaan hai। phir yahi dharni change ho jaayegi arthaat iron aged se golden aged duniya hogi, phir 2 kala kam hongi। tatvon ki bhi kala kam hoti jaati hai to phir upadrav machaate hain। tum sabhi ko achhi reeti samjhaate ho। agar nahin samajhte to goya kaudi misal hain, koi value nahin hai। yeh value to baap baith batlaate hain। gaaya bhi jaata hai - heere jaisa janma… tum bhi pahle baap ko nahin jaante the, tum kaudi jaise the। abhi baap aakar heere jaisa banaate hain। baap se hi heere jaisa janma milta hai phir kaudi jaise kyon ban padte ho? tum eeshvareey santaan ho na। gaayan bhi hai aatmaayen paramatma alag rahe bahukaal... jab vahaan shantidham mein hain to us milan mein koi faayda nahin hota। woh to sirf pavitrata va shanti ka sthaan hai। yahaan to tum jeev aatmaayen ho aur paramatma baap unko apna shareer nahin hai, woh shareer dhaaran kar tum bachchon ko padhaate hain। tum baap ko jaante ho aur kehte ho - baba, baap kahenge - O bete। laukik baap bhi kahega na - he baal bachche aao to tumko toli khilaaoon। jhat sab bhaagenge। yeh baap bhi kehte hain - bachche aao to tumko baikuntha ka maalik banaaoon, to zaroor sab bhaagenge। pukaarte bhi hain ham patiton ko paavan banaakar, paavan duniya vishwa ka maalik banaane aao। ab nishchay hai to maanna chaahiye। bulaaya bhi bachchon ne hai। ham aate bhi bachchon ke liye hain। bachchon ko hi kehte hain tumne bulaaya hai, ab main aaya hoon। patit-paavan bhi baap ko hi kehte hain na। ganga aadi ke paani se tum paavan ban nahin sakte। aadhaakalpa tum bhool mein chale ho। bhagwan ko dhoondhate ho parantu kisko bhi samajh mein nahin aata hai। baap kehte hain - he bachchon। to bachchon ka bhi us hullaas se nikalna chaahiye - he baba। parantu itna hullaas se nikalta nahin hai। isko deh-abhimaan kaha jaata hai, na ki dehi-abhimaani। tum abhi baap ke sammukh baithe ho। behad ke baap ko yaad karne se behad ki baadshaahi bhi zaroor yaad aayegi। aise baap ko kitna pyaar se response karna chaahiye। baap tumhaare bulaane se aaya hai। drama anusaar ek minute bhi aage-peechhe nahin ho sakta। sabhi kehte hain - O father raham karo, liberate karo, ham sab raavan ki janjeeron mein hain, aap hamaare guide bano। to baap guide bhi bante hain, sab unko bulaate hain - O liberator, O guide aakar hamaara guide bano। hamko bhi saath le chalo। abhi tum sangam par khade ho। baap satayug ki sthaapna kar rahe hain। abhi hai kaliyug, karodon manushya hain। satayug mein to sirf thode devi-devta hi the to zaroor vinaash hua hoga। woh bhi saamne khada hai, jiske liye gaayan hai - science ghamandi, kitna buddhi se akla nikaalte rehte hain। woh hain yaadav sampradaay। phir history repeat honi hai। abhi to satayug ki history repeat hogi।

tum samajhte ho ham nai duniya mein oonch pad paane ka purooshaartha kar rahe hain। pavitra zaroor banna hai। tum samjhaate ho is patit duniya ka vinaash zaroor hona hai। bachche aadi to tumhaare jeete nahin rahenge। na koi vaaris banenge, na shaadi aadi karenge। bahut gai baaki thodi rahi। thoda samay hai, uska bhi hisaab hai। aage aise nahin kehte the। abhi time thoda hai। pahle vaale jo shareer chhodkar gaye hue hain, nambarvaar purooshaartha anusaar janma liya hai। koi yahaan aaye bhi honge। dikhaai padta hai jaise ki yahaan ka bichhuda hua hai। unko gyaan ke bigar maza nahin aayega। maa-baap ko bhi kehte hain ham to yahaan jaayenge। yeh to sahaj samajhne ki baate hain। vinaash zaroor hona hi hai। ladaai ki taiyaari bhi dekh rahe ho। aadha kharcha to inhon ka is ladaai ke saamaan mein hi lag jaata hai। aeroplane aadi kaise banaate hain, kehte hain ghar baithe bhi saare khalaas ho jaayenge। aisi-aisi cheejen banaate rehte hain kyonki hospital aadi to rahenge nahin। drama mein yeh bhi jaise baap ke ishaare milte hain। woh bhi drama mein noondh hai। samajhte hain aisa na ho jo beemaar pad jaaen। marna to sabko zaroor hai। raam gayo raavan gayo.... jo yog mein rah aayu badhaate honge unki zaroor badhegi। apni khushi se shareer chhod denge। jaise misaal bataate hain brahm gyaani hain, woh bhi brahm mein jaane ke liye aise khushi se shareer chhodte hain। parantu brahm mein koi jaate nahin, na paap katte hain। punarjanma phir bhi yahaan lete hain। paap katne ki yukti baap batlaate hain ki maamekam yaad karo aur koi ko yaad nahin karna hai। lakshmi-naaraayan ko bhi yaad nahin karna hai। tum jaante ho is purooshaartha se ham yeh pad pa rahe hain। svarga ki sthaapna ho rahi hai। ham padh rahe hain yeh pad paane ke liye, nambarvaar purooshaartha anusaar। unhon ki jo dynasty chalti hai woh baap ne sangam par abhi sthaapan ki hai। tum bhaashan bhi aisa karo, jo accurate kisi ki bhi buddhi mein baith jaae। is samay ham eeshvareey sampradaay aur prajaapita brahma ki mukh vanshaavli bhaai-behen hain। ham aatmaayen sab bhaai-bhaai hain। brahmaakumaar-kumaariyon ki shaadi hoti nahin। yeh bhi baap samjhaate hain kaise gir padte hain, kaam agni jalaati hai। parantu dar rehta hai ek baar ham gira to ki kamaai chat ho jaayegi। kaam se haara to pad bhrashta ho jaayega। kamaai kitni badi hai! manushya padma karod kamaate hain। unko yeh thode hi pata hai ki thode samay mein yeh sab khatma hona hai। bombs banaane vaale jaante hain yeh duniya khatma honi hai, hamko koi prerak hai, ham banaate rehte hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) gyaan ko andar ghotna hai arthaat vichaar saagar manthan karna hai। gyaan ki aapas mein roohrihaan kar phir doosron ko samjhaana hai। susti va aalasya ko chhod dena hai।

2) dehi-abhimaani ban bade hullaas se baap ko yaad karna hai। sada isi nashe mein rehna hai ki ham baap ke paas aaye hain kaudi se heera banne। ham hain eeshvareey santaan।

vardaan:- gyaan soorya, gyaan chandrama ke saath saathi ban raat ko din banaane vaale roohaani gyaan sitaare bhav

jaise woh sitaare raat mein pragat hote hain aise aap roohaani gyaan sitaare, chamakte hue sitaare bhi brahma ki raat mein pragat hote ho। woh sitaare raat ko din nahin banaate lekin aap gyaan soorya, gyaan chandrama ke saath saathi ban raat ko din banaate ho। woh aakaash ke sitaare hain aap dharti ke sitaare ho, woh prakriti ki satta hai aap parmaatma sitaare ho। jaise prakriti ke taaraamandal mein anek prakaar ke sitaare chamakte hue dikhaai dete hain aise aap parmaatma taaraamandal mein chamakte hue roohaani sitaare ho।

slogan:- seva ka chance milna arthaat duaaon se jholi bharna।