बुधवार 23 अक्टूबर 2024 की दैनिक मुरली

23-10-2024 praatahmurli om shanti "baapdaada"' madhuban

“meethe bachche - tumhaari yaatra buddhi ki hai, ise hi roohaani yaatra kaha jaata hai, tum apne ko aatma samajhte ho, shareer nahin, shareer samajhna arthaat ulta latakna''

prashn:- maaya ke pomp mein manushyon ko kaun-si ijjat milti hai?

uttar:- aasuri ijjat। manushya kisi ko bhi aaj thodi ijjat dete, kal uski beijjati karte hain, gaaliyaan dete hain। maaya ne sabki beijjati ki hai, patit bana diya hai। baap aaye hain tumhein daivi ijjat vaala banaane।

om shanti। roohaani baap roohon se poochhte hain - kahaan baithe ho? tum kahenge vishwa ki roohaani university mein। roohaani akshar to vo log jaante nahin। vishwa vidyaalay to duniya mein anek hain। yeh hai saare vishwa mein ek hi roohaani vidyaalay। ek hi padhaane vaala hai। kya padhaate hain? roohaani knowledge। to yeh hai spiritual vidyaalay arthaat roohaani paathshaala। spiritual arthaat roohaani knowledge padhaane vaala kaun hai? yeh bhi tum bachche hi abhi jaante ho। roohaani baap hi roohaani knowledge padhaate hain, isliye unko teacher bhi kehte hain, spiritual father padhaate hain। achha, phir kya hoga? tum bachche jaante ho is roohaani knowledge se ham apna aadi sanaatan devi-devta dharma sthaapan karte hain। ek dharma ki sthaapna baaki jo itne sab dharma hain, unka vinaash ho jaayega। is spiritual knowledge ka sab dharmon se kya tailuk hai - yeh bhi tum ab jaante ho। ek dharma ki sthaapna is roohaani knowledge se hoti hai। yeh lakshmi-naaraayan vishwa ke maalik the na! unko kahenge roohaani duniya (spiritual world) is spiritual knowledge se tum raajayog seekhte ho। raajaai sthaapan hoti hai। achha, phir aur dharmon se kya tailuk hai? aur sabhi dharma vinaash ko paayenge kyonki tum paavan bante ho to tumko nai duniya chaahiye। itne sab anek dharma khatma ho jaate hain, ek dharma rahega। usko kaha jaata hai vishwa mein shanti ka raajya। abhi hai patit ashaanti ka raajya phir hoga paavan shanti ka raajya। abhi to anek dharma hain। kitni ashaanti hai। sab patit hi patit hain। raavan ka raajya hai na। ab bachche jaante hain 5 vikaaron ko zaroor chhodna hai। yeh saath mein nahin le jaane hain। aatma achhe va bure sanskaar le jaati hai na। ab baap tum bachchon ko pavitra banne ki baat bataate hain। us paavan duniya mein koi bhi duhkh hota nahin। yeh spiritual knowledge padhaane vaala kaun hai? spiritual father। sabhi aatmaon ka baap। spiritual father kya padhaayenge? spiritual knowledge, ismen koi bhi kitaab aadi ki darkaar nahin। sirf apne ko aatma samajh baap ko yaad karna hai। paavan banna hai। baap ko yaad karte-karte ant mati so gati ho jaayegi। yeh hai yaad ki yaatra। yaatra akshar achha hai। woh hain jismaani yaatraayen, yeh hai roohaani। usmein to paidal jaana padta hai, haath-paanv chalaate hain, ismen kuchh nahin। sirf yaad karna hai। bhal kahaan bhi ghoomo phiro, utho baitho, apne ko aatma samajh baap ko yaad karo। difficult baat nahin hai, sirf yaad karna hai। yeh to reality hai na। aage tum ulte chal rahe the। apne ko aatma ke badle shareer samajhna, isko kaha jaata hai ulta latakna। apne ko aatma samajhna - yeh hai sulta। allaah jab aate hain tab aakar paavan banaate hain। allaah ki paavan duniya hai, raavan ki patit duniya hai। deh-abhimaan mein sabhi ulte ho gaye hain। ab ek hi baar dehi-abhimaani banna hai। to tum allaah ke bachche ho। allaah hoon, nahin kahenge। anguli se hamesha oopar ki taraph eeshaara karte hain, to siddha hota hai allaah woh hai। to yahaan zaroor doosri cheez hai। ham us allaah baap ka bachcha hoon। ham bhaai-bhaai hain। allaah hoon, kahne se phir ulta ho jaayega ki ham sab baap hain। parantu nahin, baap ek hai। unko yaad karna hai। allaah ever pure hai। allaah khud baith padhaate hain। thodi-si baat mein manushya kitna moonjhate hain। shiv jayanti bhi manaate hain na।

shreekrishna hai svarga ka pahla raajkumaar, yeh behad ka baap inko raajya-bhaagya dete hain। baap jo nai duniya svarga sthaapan karte hain usmein shreekrishna number one prince hai। baap bachchon ko paavan banne ki yukti baith bataate hain। bachche jaante hain svarga jisko vaikuntha, vishnupuri kehte hain, woh past ho gaya hai phir future hoga। chakra phirta rehta hai na। yeh gyaan abhi tum bachchon ko milta hai। yeh dhaaran kar aur phir karaana hai। harek ko teacher banna hai। aise bhi nahin ki teacher banne se lakshmi-naaraayan banenge। nahin। teacher banne se tum praja banaayenge, jitna bahuton ka kalyaan karenge utna oonch pad paayenge। smriti rahegi। baap kehte hain train mein aate ho to bhi badge par samjhaao। baap patit-paavan, liberator hai। paavan banaane vaala hai। bahuton ko yaad karna padta hai। jaanvar, haathi, ghode aadi, kachchha, machchha ko bhi avtaar kah dete hain। unko bhi poojte rehte hain। samajhte hain bhagwan sarvavyaapi arthaat sabmen hain। sabko khilaao। achha, kan-kan mein bhagwan kehte hain phir unko kaise khilaayenge। bilkul hi samajh se jaise baahar hain। lakshmi-naaraayan aadi devi-devtaayen thode hi yeh kaam karenge। cheetinyon ko anna denge, phalaane ko denge। to baap samjhaate hain tum ho religio political। tum jaante ho ham dharma sthaapan kar rahe hain। raajya sthaapan karne ke liye military rehti hai। parantu tum ho gupta। tumhaari hai spiritual university। saari duniya ke jo bhi manushya maatra hain sab in dharmon se nikal, apne ghar jaayenge। aatmaayen chali jaayengi। woh hai aatmaon ke rahne ka ghar। abhi tum sangamayug par padh rahe ho phir satayug mein aakar raajya karenge aur koi dharma nahin hoga। geet mein bhi hai na - baba aap jo dete ho woh aur koi de na sake। saara aasmaan, saari hi dharni tumhaari rehti hai। saare vishwa ke maalik tum ban jaate ho। yeh bhi abhi tum samajhte ho, nai duniya mein yeh sabhi baaten bhool jaayengi। isko kaha jaata hai roohaani spiritual knowledge। tum bachchon ki buddhi mein hai ki ham har 5 hajaar varsha baad raajya lete hain phir ganvaate hain। yeh 84 ka chakra phirta hi rehta hai। to padhaai padhni pade tab hi ja sakenge na! padhenge nahin to nai duniya mein ja nahin sakenge। vahaan ka to limited number hai। nambarvaar purushaartha anusaar vahaan jaakar pad paayenge। itne sab to padhenge nahin। agar sabhi padhen to phir doosre janma mein raajya bhi paaven। padhne vaalon ki limit hai। satayug-treta mein aane vaale hi padhenge। tumhaari praja bahut banti rehti hai। deri se aane vaale paap to bhasma kar na saken। paap aatmaayen hongi to phir sajaayen khaakar bahut thoda pad pa lengi। beijjati hogi। jo abhi maaya ki bahut ijjat vaale hain, woh beijjat ban jaayenge। yeh hai eeshvareey ijjat। woh hai aasuri ijjat। eeshvareey athva daivi ijjat aur aasuri ijjat mein raat-din ka farka hai। ham aasuri ijjat vaale the ab phir daivi ijjat vaale bante hain। aasuri ijjat se bilkul beggar ban jaate ho। yeh hai kaanton ki duniya to beijjati hui na। phir kitni ijjat vaale bante ho। yatha raaja raani tatha praja। behad ka baap tumhaari ijjat bahut oonch banaate hain to itna purooshaartha bhi karna hai। sab kehte hain ham apni ijjat aisi banaaven arthaat nar se naaraayan, naari se lakshmi ban jaaven। inse oonch ijjat koi ki hai nahin। katha bhi nar se naaraayan banne ki hi sunte hain। amraktha, teejri ki katha yeh ek hi hai। yeh katha abhi hi tum sunte ho।

tum bachche vishwa ke maalik the phir 84 janma lete neeche utarte aaye ho। phir pahla number ka janma hoga। pahle number janma mein tum bahut oonch pad paate ho। raam ijjat vaala banaate hain, raavan beijjatvaan bana dete hain। is knowledge se hi tum mukti-jeevanmukti ko paate ho। aadhaakalpa raavan ka naam nahin rehta hai। yeh baaten abhi tum bachchon ki buddhi mein aati hain so bhi nambarvaar। kalpa-kalpa aise hi tum nambarvaar purooshaartha anusaar samajhdaar bante ho। maaya gaphlat karaati hai। behad ke baap ko yaad karna hi bhool jaate hain। bhagwan padhaate hain, woh hamaara teacher bana hai। phir bhi absent rehte hain, padhte nahin hain। dar-dar dhakke khaane ki aadat padi hui hai। padhaai par jinka dhyaan nahin rehta hai to unko phir naukri mein laga dena hota hai। dhobi aadi ka kaam karte hain। usmein padhaai ki kya darkaar hai। vyaapaar mein manushya multimillionaire ban jaate hain। naukri mein itna nahin banenge। usmein to fix pagaar milegi। ab tumhaari padhaai hai vishwa ki baadshaahi ke liye। yahaan kehte hain na ham bhaaratvaasi hain। peechhe phir tumko kahenge vishwa ke maalik। vahaan devi-devta dharma ke sivaae doosra koi dharma hota nahin। baap tumko vishwa ka maalik banaate hain to unki mat par chalna chaahiye। koi bhi vikaar ka bhoot nahin hona chaahiye। ye bhoot bahut kharaab hain। kaami ki health bigadti rehti hai। taakat kam ho jaati hai। is kaam vikaar ne tumhaari taakat bilkul khatma kar di hai। nateeja yeh hua hai aayu kam hoti gai hai। bhogi ban pade ho। kaami, bhogi, rogi sab ban jaate hain। vahaan vikaar hota nahin। to yogi hote hain sadaiv tanduroosta aur aayu bhi 150 varsha hoti hai। vahaan kaal khaata nahin। is par ek katha bhi bataate hain - koi se poochha gaya pahle sukh chaahiye ya pahle duhkh chaahiye? to unko koi ne ishaara diya bolo pahle sukh chaahiye kyonki sukh mein chale jaayenge to vahaan koi kaal aayega nahin। andar ghus na sake। ek katha bana di hai। baap samjhaate hain tum sukhdhaam mein rehte ho to vahaan koi kaal hota nahin। raavanraajya hi nahin। phir jab vikaari bante hain to kaal aata hai। kathaayen kitni bana di hai, kaal le gaya phir yeh hua। na kaal dekhne mein aata hai, na aatma dikhaai padti hai, inko kaha jaata hai danta kathaayen। kanras ki bahut kahaaniyaan hain। ab baap samjhaate hain vahaan akaale mrityu kabhi hota nahin। aayu badi hoti hai aur pavitra rehte hain। 16 kala phir kala kam hote-hote ekdam no kala ho jaate hain। main nirgun haare mein koi gun naahi। ek nirgun sanstha bhi bachchon ki hai। kehte hain hamaare mein koi gun naaheen। hamko gunvaan banaao। sarvagun sampanna banaao। ab baap kehte hain pavitra banna hai। marna bhi hai sabko। itne dher manushya satayug mein nahin hote। abhi to kitne dher hain। vahaan bachcha bhi yogbal se hota hai। yahaan to dekho kitne bachche paida karte rehte hain। baap phir bhi kehte hain baap ko yaad karo। woh baap hi padhaate hain, teacher padhaane vaala yaad padta hai। tum jaante ho shivbaaba hamko padha rahe hain। kya padhaate hain, woh bhi tumko maaloom hai। to baap athva teacher se yog lagaana hai। knowledge bahut oonchi hai। abhi tum sabki student life hai। aisi university kabhi dekhi, jahaan bachche boodhe, javaan sab ikatthe padhte ho। ek hi school, ek hi padhaane vaala teacher ho aur jismen brahma svayan bhi padhta ho। wonder hai na। shivbaaba tumko padhaate hain। yeh brahma bhi sunte hain। bachcha chaahe budha, koi bhi padh sakte hain। tum bhi padhte ho na yeh knowledge। ab padhaana shuru kar diya hai। din-pratidin time kam hota chala jaata hai। abhi tum behad mein chale gaye ho। jaante ho yeh 5 hazaar varsha ka chakra kaise paas hua। pahle ek dharma tha। abhi kitne dher dharma hain। abhi sovereignty nahin kahenge। inko kaha jaata hai praja ka praja par raajya। pahle-pahle bahut powerful dharma tha। saare vishwa ke maalik the। abhi adharmi ban pade hain। koi dharma nahin hai। sabmen 5 vikaar hain। behad ka baap kehte hain - bachchon ab dheerya dharo, baaki thoda samay tum is raavanraajya mein ho। achhi reeti padhenge to phir sukhdhaam mein chale jaayenge। yeh hai duhkhadhaam। tum apne shantidham aur sukhdhaam ko yaad karo, is duhkhadhaam ko bhoolte jaao। aatmaon ka baap direction dete hain - he roohaani bachchon! roohaani bachchon ne in organs dvaara suna। tum aatmaayen jab satayug mein satopradhaan thi to tumhaara shareer bhi first class satopradhaan tha। tum bade dhanvaan the phir punarjanma lete-lete kya ban gaye ho! raat-din ka pharka hai। din mein ham svarga mein the, raat mein ham narka mein hain। inko kaha jaata hai brahma ka so braahmanon ka din aur raat। 63 janma dhakke khaate rehte hain, andhiyaari raat hai na। bhatakte rehte hain। bhagwan koi ko milta hi nahin। isko kaha jaata hai bhoolbhulaiya ka khel। to baap tum bachchon ko saari srishti ke aadi-madhya-ant ka samaachaar sunaate hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dar-dar dhakke khaane ki aadat chhod bhagwan ki padhaai dhyaan se padhni hai। kabhi absent nahin hona hai। baap samaan teacher bhi zaroor banna hai। padhkar phir padhaana hai।

2) satya naaraayan ki sachchi katha sun nar se naaraayan banna hai, aisa ijjatvaan svayan ko svayan hi banaana hai। kabhi bhooton ke vasheebhoot ho ijjat gavaani nahin hai।

vardaan:- sambandh aur praaptiyon ki smriti dvaara sada khushi mein rahne vaale sahajyogi bhav

sahjayog ka aadhaar hai - sambandh aur praapti। sambandh ke aadhaar par pyaar paida hota hai aur jahaan praaptiyaan hoti hain vahaan man-buddhi sahaj hi jaata hai। to sambandh mein merepan ke adhikaar se yaad karo, dil se kaho mera baba aur baap dvaara jo shaktiyon ka, gyaan ka, gunon ka, sukh-shanti, aannad, prem ka khajaana mila hai use smriti mein emerge karo, isse apaar khushi rahegi aur sahajyogi bhi ban jaayenge।

slogan:- deh-bhaan se mukta bano to doosre sab bandhan svatah khatma ho jaayenge।