शुक्रवार 29 नवंबर 2024 की दैनिक मुरली

29-11-2024 praatahmurli om shanti "baapdaada"' madhuban

“meethe bachche - yadi shivbaaba ka kadar hai to unki shreemat par chalte raho, shreemat par chalna maana baap ka kadar karna''

prashn:- bachche baap se bhi bade jaadoogar hain - kaise?

uttar:- oonche se oonche baap ko apna bachcha bana dena, tan-man-dhan se baap ko vaaris banaakar vaari jaana - yeh bachchon ki jaadoogri hai। jo abhi bhagwan ko vaaris banaate hain woh 21 janmon ke liye varse ke adhikaari ban jaate hain।

prashn:- tribunal kin bachchon ke liye baithti hai?

uttar:- jo daan ki hui cheez ko vaapas lene ka sankalp karte, maaya ke vash ho disservice karte hain unhon ke liye tribunal baithti hai।

om shanti। roohaani vichitra baap baith vichitra bachchon ko samjhaate hain arthaat doordesh ka rahne vaala jisko parampita paramatma kaha jaata hai। bahut-bahut doordesh se aakar is shareer dvaara tumko padhaate hain। ab jo padhte hain woh padhaane vaale ke saath yog to automatically rakhte hain। kehna nahin padta hai ki he bachchon, teacher se yog rakho va unko yaad karo। nahin, yahaan baap kehte hain - he roohaani bachchon, yeh tumhaara baap bhi hai, teacher bhi hai, guru bhi hai, inke saath yog rakho arthaat baap ko yaad karo। yeh hai vichitra baba। tum ghadi-ghadi inko bhool jaate ho isliye kehna padta hai। padhaane vaale ko yaad karne se tumhaare paap bhasma ho jaayenge। yeh law nahin kehta jo teacher kahe mere ko dekho, ismen to bada phaayda hai। baap kehte hain sirf mujhe yaad karo। is yaad ke bal se hi tumhaare paap katne hain, isko kaha jaata hai yaad ki yaatra। ab roohaani vichitra baap bachchon ko dekhte hain। bachche bhi apne ko aatma samajh vichitra baap ko hi yaad karte hain। tum to ghadi-ghadi shareer mein aate ho। main to saara kalpa shareer mein aata nahin hoon sirf is sangamayug par hi bahut doordesh se aata hoon - tum bachchon ko padhaane। yeh achhi reeti yaad karna hai। baba hamaara baap, teacher aur satguru hai। vichitra hai। unko apna shareer nahin hai, phir aate kaise hain? kehte hain mujhe prakriti ka, mukh ka aadhaar lena padta hai। main to vichitra hoon। tum sabhi chitra vaale ho। mujhe rath to zaroor chaahiye na। ghode gaadi mein to nahin aayenge na। baap kehte hain main is tan mein pravesh karta hoon, jo number one hai vahi phir number last bante hain। jo satopradhaan the vahi tamopradhaan bante hain। to unhon ko hi phir satopradhaan banaane ke liye baap padhaate hain। samjhaate hain is raavanraajya mein 5 vikaaron par jeet paakar jagatjeet tum bachchon ko banna hai। bachchon yeh yaad rakhna hai ki hamko vichitra baap padhaate hain। baap ko yaad nahin karenge to paap bhasma kaise honge। yeh baaten bhi sirf abhi sangamayug par hi sunte ho। ek baar jo kuchh hota hai phir kalpa baad vahi repeat hoga। kitni achhi samjhaani hai, ismen bahut vishaal buddhi chaahiye। yeh koi saadhu-santa aadi ka satsang nahin hai। unko baap bhi kehte ho to bachcha bhi kehte ho। tum jaante ho yeh hamaara baap bhi hai, bachcha bhi hai। ham sab kuchh is bachche ko varsa dekar aur baap se 21 janmon ke liye varsa lete hain। kichadpatti sab dekar baap se ham vishwa ki baadshaahi lete hain। kehte hain baba hamne bhaktimaarga mein kaha tha ki jab aap aayenge to ham aap par tan-man-dhan sahit vaari jaayenge। laukik baap bhi bachchon par vaari jaate hain na। to yahaan tumko yeh kaisa vichitra baap mila hai, unko yaad karo to tumhaare paap bhasma hon aur apne ghar chale jaayenge। kitni lambi musaaphiri hai। baap aate dekho kahaan hain! puraane raavan raajya mein। kehte hain meri takdeer mein paavan shareer milna hai nahin। patiton ko paavan banaane kaise aaoon। hamko patit duniya mein hi aakar sabko paavan banaana padta hai। to aise teacher ka kadar bhi rakhna chaahiye na। bahut hain jo kadar jaante hi nahin। yeh bhi drama mein hona hi hai। raajdhaani mein to sab chaahiye na - nambarvaar। to sab prakaar ke yahaan hi bante hain। kam darja paane vaale ka yeh haal hoga। na padhenge, na baap ki yaad mein rahenge। yeh bahut hi vichitra baap hai na, inki chalan bhi alaukik hai। inka part aur koi ko mil na sake। yeh baap aakar tumko kitni oonch padhaai padhaate hain, to uska kadar bhi rakhna chaahiye। unki shreemat par chalna chaahiye। parantu maaya ghadi-ghadi bhula deti hai। maaya itni jabardasta hai jo achhe-achhe bachchon ko gira deti hai। baap kitna dhanvaan banaate hain parantu maaya ekdam maatha mood leti hai। maaya se bachna hai to baap ko zaroor yaad karna pade। bahut achhe bachche hain jo baap ka bankar phir maaya ke ban jaate hain, baat mat poochho, pakke traitor ban jaate hain। maaya ekdam naak se pakad leti hai। akshar bhi hai na - gaj ko graah ne khaaya। parantu uska arth koi nahin samajhte hain। baap har baat achhi reeti samjhaate hain। kai bachche samajhte bhi hain parantu nambarvaar purooshaartha anusaar। koi ko to zara bhi dhaarna nahin hoti। bahut oonchi padhaai hai na। to unki dhaarna kar nahin sakte। baap kahenge inki takdeer mein raajya-bhaagya nahin hai। koi ak ke phool hain, koi khooshboodaar phool hai। variety bageecha hai na। aise bhi to chaahiye na। raajdhaani mein tumko naukar-chaakar bhi milenge। nahin to naukar-chaakar kaise milenge। raajaai yahaan hi banti hai। naukar, chaakar, chandaal aadi sab milenge। yeh raajdhaani sthaapan ho rahi hai। wonder hai। baap tumko itna oonch banaate hain to aise baap ko yaad karte prem ke aansu bahne chaahiye।

tum maala ke daane bante ho na। kehte hain baba aap kitne vichitra ho। kaise aakar ham patiton ko aap paavan banaane ke liye padhaate ho। bhakti maarga mein bhal shiv ki pooja karte hain parantu samajhte thode hi hain ki yeh patit-paavan hai phir bhi pukaarte rehte hain - he patit-paavan aao, aakar hamko gul-gul devi-devta banaao। bachchon ke farmaan ko baap maante hain aur jab aate hain to kehte hain - bachche, pavitra bano। is par hi hangaamen hote hain। baap wonderful hai na। bachchon ko kehte hain mujhe yaad karo to paap katen। baap jaante hain ham aatmaon se baat karte hain। sab kuchh aatma hi karti hai, vikarma aatma hi karti hai। aatma hi shareer dvaara bhogti hai। tumhaare liye to tribunal baithegi। khaas un bachchon ke liye jo service laayak bankar phir traitor ban jaate hain। yeh to baap hi jaante hain, kaise maaya hap kar leti hai। baba hamne haar kha li, kaala munh kar liya… ab kshama karo। ab gira aur maaya ka bana phir kshama kaahe ki। unko to phir bahut-bahut mehnat karni pade। bahut hain jo maaya se haar jaate hain। baap kehte hain - yahaan baap paas daan dekar jaao phir vaapas nahin lena। nahin to khalaas ho jaayega। harishchandra ka misaal hai na। daan dekar phir bahut khabardaar rehna hai। phir le liya to sauguna danda pad jaata hai। phir bahut halka pad pa lenge। bachche jaante hain yeh raajdhaani sthaapan ho rahi hai। aur jo dharma sthaapan karte hain, unhon ki pahle raajaai nahin chalti। raajaai to tab ho jab 50-60 karod hon, tab lashkar banen। shuru mein to aate hi hain ek-do, phir vriddhi ko paate hain। tum jaante ho Christ bhi koi vesh mein aayenge। beggar roop mein pahla number vaala phir zaroor last number mein hoga। Christian log jhat kahenge barobar Christ is samay beggar roop mein hai। samajhte hain punarjanma to lena hi hai। tamopradhaan to zaroor harek ko banna hai। is samay saari duniya tamopradhaan jad-jadeebhoot hai। is puraani duniya ka vinaash zaroor hona hai। Christian log bhi kahenge Christ se 3 hajaar varsha pahle heaven tha phir zaroor ab hoga। parantu yeh baaten samjhaave kaun। baap kehte hain abhi woh avastha bachchon ki kahaan hai। ghadi-ghadi likhte hain ham yog mein nahin rah sakte। bachchon ki activity se samajh jaate hain। baba ko samaachaar dene se bhi darte hain। baap to bachchon ko kitna pyaar karte hain। pyaar se namaste karte hain। bachchon mein to ahankaar rehta hai। achhe-achhe bachchon ko maaya bhula deti hai। baba samajh sakte hain, kehte hain mai knowledgeful hoon। jaani-jaananhaar ka matlab yeh nahin ki main sabke andar ko jaanta hoon। mai aaya hi hoon padhaanekh na ki read karne। main kisko read nahin karta hoon, to yeh saakaar bhi read nahin karta hai। inko sab kuchh bhoolna hai। read phir kya karenge। tum yahaan aate hi ho padhne। bhakti maarga hi alag hai। yeh bhi girne ka upaay chaahiye na। in baaton se hi tum girte ho। yeh drama ka khel bana hua hai। bhakti maarga ke shaastra padhte-padhte tum neeche utarte tamopradhaan bante ho। abhi tumko is chhi-chhi duniya mein bilkul rehna nahin hai। kaliyug se phir satayug aana hai। abhi hai yeh sangamayug। yeh sab baaten dhaaran karni hai। baap hi samjhaate hain baaki to saari duniya ki buddhi par godrej ka taala laga hua hai। tum samajhte ho yeh daiveegun vaale the vahi phir aasuri gun vaale bane hain। baap samjhaate hain ab bhakti maarga ki baaten sab bhool jaao। ab main jo sunaata hoon, woh suno, hear no evil...... ab mujh ek se suno। abhi main tumko taarne aaya hoon।

tum ho eeshvareey sampradaay। prajaapita brahma ke mukh kamal se tum paida hue ho na, itne sab adopted bachche hain। unko aadi dev kaha jaata hai। mahaaveer bhi kehte hain। tum bachche mahaaveer ho na - jo yogbal se maaya par jeet paate ho। baap ko kaha jaata hai gyaan ka saagar। gyaan saagar baap tumko avinaashi gyaan ratnon ki thaaliyaan bharkar dete hain। tumko maalaamaal banaate hain। jo gyaan dhaaran karte hain woh oonch pad paate hain, jo dhaarna nahin karte to zaroor kam pad paayenge। baap se tum kaaroon ka khajaana paate ho। allaah avaldeen ki bhi katha hai na। tum jaante ho vahaan hamko koi apraapta vastu nahin rehti। 21 janmon ke liye varsa baap de dete hain। behad ka baap behad ka varsa dete hain। had ka varsa milte hue bhi behad ke baap ko yaad zaroor karte hain - he paramatma raham karo, kripa karo। yeh kisko pata thode hi hai woh kya dene vaala hai। abhi tum samajhte ho baba to hamko vishwa ka maalik banaate hain। chitron mein bhi hai brahma dvaara sthaapna, brahma saamne baithe hain saadhaaran। sthaapna karenge to zaroor unko hi banaayenge na। baap kitna achhi reeti samjhaate hain। tum poora samjha nahin sakte ho। bhakti maarga mein shankar ke aage jaakar kehte hain - bhar do jholi। aatma bolti hai ham kangaal hain। hamaari jholi bharo, hamko aisa banaao। abhi tum jholi bharne aaye ho। kehte hain ham to nar se naaraayan banna chaahte hain। yeh padhaai hi nar se naaraayan banne ki hai। puraani duniya mein aane ki dil kiski hogi! parantu nai duniya mein to sab nahin aayenge। koi 25 percent puraani mein aayenge। kuchh kami to padegi na। thoda bhi kisko message dete rahenge to tum svarga ke maalik zaroor banenge। abhi narka ke maalik bhi sab hain na। raaja, raani, praja sab narka ke maalik hain। vahaan the double sirtaaj। abhi woh nahin hain। aajkal to dharma aadi ko koi maante nahin। devi-devta dharma hi khatma ho gaya hai। gaaya jaata hai religion is might, dharma ko na maanne kaaran taakat nahin rahi hai। baap samjhaate hain - meethe-meethe bachchon, tum hi poojya se pujaari bante ho। 84 janma lete ho na। ham so brahman, so devta phir ham so kshatriy...... buddhi mein yeh saara chakra aata hai na। yeh 84 ka chakra ham lagaate hi rehte hain ab phir vaapas ghar jaana hai। patit koi ja na sake। aatma hi patit athva paavan banti hai। sone mein khaad padti hai na। jevar mein nahin padti, yeh hai gyaan agni jisse saari khaad nikal tum pakka sona ban jaayenge phir jevar bhi tumko achha milega। abhi aatma patit hai to paavan ke aage naman karte hain। karti to sab kuchh aatma hai na। ab baap samjhaate hain - bachche, sirf maamekam yaad karo to beda paar ho jaae। pavitra ban pavitra duniya mein chale jaayenge। ab jo jitna purooshaartha karenge। sabko yahi parichay dete raho। woh hai had ka baap, yeh hai behad ka baap। sangam par hi baap aate hain svarga ka varsa dene। to aise baap ko yaad karna pade na। teacher ko kab student bhoolte hain kya! parantu yahaan maaya bhulaati rahegi। bada khabardaar rehna hai। yuddha ka maidaan hai na। baap kehte hain ab vikaar mein mat jaao, gande nahin bano। ab to svarga mein chalna hai। pavitra bankar hi pavitra nai duniya ke maalik banenge। tumko vishwa ki baadshaahi deta hoon। kam baat hai kya। sirf yeh ek janma pavitra bano। ab pavitra nahin banenge to neeche gir jaayenge। temptation bahut hai। kaam par jeet paane se tum jagat ke maalik banenge। tum saaph kah sakte ho parampita paramatma hi jagatguru hai jo saare jagat ko sadgati dete hain। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) avinaashi gyaan ratnon se buddhi roopi jholi bharkar maalaamaal banna hai। kisi bhi prakaar ka ahankaar nahin dikhaana hai।

2) service laayak bankar phir kabhi traitor ban disservice nahin karni hai। daan dene ke baad bahut-bahut khabardaar rehna hai, daan di hui cheez vaapas lene ka sankalp bhi na aaye।

vardaan:- direct parmaatma light ke connection dvaara andhakaar ko bhagaane vaale light house bhav

aap bachchon ke paas direct parmaatma light ka connection hai। sirf svamaan ki smriti ka switch direct line se on karo to light aa jaayegi aur kitna bhi gahra soorya ki roshni ko bhi chhipaane vaala kaala baadal ho, woh bhi bhaag jaayega। isse svayan to light mein rahenge hi lekin auron ke liye bhi light house ban jaayenge।

slogan:- sva purushaartha mein teevra bano to aapke vibration se doosron ki maaya sahaj bhaag jaayegi।