मंगलवार 4 फ़रवरी 2025 की दैनिक मुरली

04-02-2025 praatahmurli om shanti "baapdaada"' madhuban

“meethe bachche - baap tumhein avinaashi gyaan ratnon ka daan dete hain, tum phir auron ko daan dete raho, isi daan se sadgati ho jaayegi''

prashn:- kaun-sa naya raasta tum bachchon ke sivaae koi bhi nahin jaanta hai?

uttar:- ghar ka raasta va svarga jaane ka raasta abhi baap dvaara tumhein mila hai। tum jaante ho shantidham ham aatmaon ka ghar hai, svarga alag hai, shantidham alag hai। yeh naya raasta tumhaare sivaae koi bhi nahin jaanta। tum kehte ho ab kumbhakran ki neend chhodo, aankh kholo, paavan bano। paavan bankar hi ghar ja sakenge।

geet:- jaag sajniyaan jaag…

om shanti। bhagvaanuvaach। yeh to baap ne samjhaaya hai ki manushya ko va devtaaon ko bhagwan nahin kaha jaata kyonki inka saakaari roop hai। baaki parampita paramatma ka na aakaari, na saakaari roop hai isliye unko shiv parmaatmaae namah kaha jaata hai। gyaan ka saagar woh ek hi hai। koi manushya mein gyaan ho nahin sakta। kiska gyaan? rachta aur rachna ke aadi-madhya-ant ka gyaan athva aatma aur paramatma ka yeh gyaan koi mein nahin hai। to baap aakar jagaate hain - he sajniyaan, he bhaktiyaan jaago। sabhi mel athva female bhaktiyaan hain। bhagwan ko yaad karte hain। sabhi brides yaad karti hain ek bridegroom ko। sabhi aashik aatmaayen parampita paramatma maashook ko yaad karti hain। sabhi seetaayen hain, raam ek parampita paramatma hai। raam akshar kyon kehte hain? raavanraajya hai na। to uski bhent mein raamraajya kaha jaata hai। raam hai baap, jisko eeshvar bhi kehte hain, bhagwan bhi kehte hain। asli naam unka hai shiv। to ab kehte hain jaago, ab navayug aata hai। puraana khatma ho raha hai। is mahaabhaarat ladaai ke baad satayug sthaapan hota hai aur in lakshmi-naaraayan ka raajya hoga। puraana kaliyug khatma ho raha hai isliye baap kehte hain - bachche, kumbhakran ki neend chhodo। ab aankh kholo। nai duniya aati hai। nai duniya ko svarga, satayug kaha jaata hai। yeh hai naya raasta। yeh ghar va svarga mein jaane ka raasta koi bhi jaante nahin hain। svarga alag hai, shantidham jahaan aatmaayen rehti hain, woh alag hai। ab baap kehte hain jaago, tum raavanraajya mein patit ho gaye ho। is samay ek bhi pavitra aatma nahin ho sakti। punya aatma nahin kahenge। bhal manushya daan-punya karte hain, parantu pavitra aatma to ek bhi nahin hai। yahaan kaliyug mein hain patit aatmaayen, satayug mein hain paavan aatmaayen, isliye kehte hain - he shivbaaba, aakar hamko paavan aatma banaao। yeh pavitrata ki baat hai। is samay baap aakar tum bachchon ko avinaashi gyaan ratnon ka daan dete hain। kehte hain tum bhi auron ko daan dete raho to 5 vikaaron ka grahan chhoot jaae। 5 vikaaron ka daan do to duhkh ka grahan chhoot jaae। pavitra ban sukhdhaam mein chale jaayenge। 5 vikaaron mein number one hai kaam, usko chhod pavitra bano। khud bhi kehte hain - he patit-paavan, hamko paavan banaao। patit vikaari ko kaha jaata hai। yeh sukh aur duhkh ka khel bhaarat ke liye hi hai। baap bhaarat mein hi aakar saadhaaran tan mein pravesh karte hain phir inki bhi biography baith sunaate hain। yeh hain sab brahman-braahmaniyaan, prajaapita brahma ki aulaad। tum sabko pavitra banne ki yukti bataate ho। brahmaakumaar aur kumaariyaan tum vikaar mein ja nahin sakte ho। tum braahmanon ka yeh ek hi janma hai। devta varna mein tum 20 janma lete ho, vaishya, shoodra varna mein 63 janma। brahman varna ka yeh ek antim janma hai, jismen hi pavitra banna hai। baap kehte hain pavitra bano। baap ki yaad athva yogbal se vikarma bhasma honge। yeh ek janma pavitra banna hai। satayug mein to koi patit hota nahin। abhi yeh antim janma paavan banenge to 21 janma paavan rahenge। paavan the, ab patit bane ho। patit hain tab to bulaate hain। patit kisne banaaya hai? raavan ki aasuri mat ne। sivaae mere tum bachchon ko raavan raajya se, duhkh se koi bhi liberate kar nahin sakte। sabhi kaam chita par baith bhasma ho pade hain। mujhe aakar gyaan chita par bithaana padta hai। gyaan jal daalna padta hai। sabki sadgati karni pade। jo achhi reeti padhaai padhte hain unki hi sadgati hoti hai। baaki sab chale jaate hain shantidham mein। satayug mein sirf devi-devtaayen hain, unko hi sadgati mili hui hai। baaki sabko gati athva mukti milti hai। 5 hazaar varsha pahle in devi-devtaaon ka raajya tha। laakhon varsha ki baat hai nahin। ab baap kehte hain meethe-meethe bachchon, mujh baap ko yaad karo। manmanaabhav akshar to prasiddha hai। bhagvaanuvaach - koi bhi dehdhaari ko bhagwan nahin kaha jaata। aatmaayen to ek shareer chhod doosra leti hain। kabhi stri, kabhi puroosh banti hain। bhagwan kabhi bhi janma-maran ke khel mein nahin aata। yeh drama anusaar noondh hai। ek janma na mile doosre se। phir tumhaara yeh janma repeat hoga to yahi act, yahi features phir lenge। yeh drama anaadi bana-banaaya hai। yeh badal nahin sakta। shreekrishna ko jo shareer satayug mein tha woh phir vahaan milega। woh aatma to abhi yahaan hai। tum abhi jaante ho ham so banenge। yeh lakshmi-naaraayan ke features accurate nahin hain। banenge phir bhi vahi। yeh baaten naya koi samajh na sake। achhi reeti jab kisko samjhaao tab 84 ka chakra jaanenge aur samjhenge barobar harek janma mein naam, roop, features aadi alag-alag hote hain। abhi inke antim 84 ven janma ke features yeh hain isliye naaraayan ke features kareeb-kareeb aise dikhaaye hain। nahin to manushya samajh na saken।

tum bachche jaante ho - mama-baba hi yeh lakshmi-naaraayan bante hain। yahaan to 5 tatva pavitra hain nahin। yeh shareer sab patit hain। satayug mein shareer bhi pavitra hote hain। shreekrishna ko most beautiful kehte hain। natural beauty hoti hai। yahaan vilaayat mein bhal gore manushya hain parantu unko devta thode hi kahenge। daiveegun to nahin hain na। to baap kitna achhi reeti baith samjhaate hain। yeh hai oonch te oonch padhaai, jisse tumhaari kitni oonch kamaai hoti hai। anginat heere javaahar, dhan hota hai। vahaan to heere javaahron ke mahal the। abhi woh sab gum ho gaya hai। to tum kitne dhanvaan bante ho। aparmaapaar kamaai hai 21 janmon ke liye, ismen bahut mehnat chaahiye। dehi-abhimaani banna hai, ham aatma hain, yeh puraana shareer chhod ab vaapas apne ghar jaana hai। baap abhi lene liye aaye hain। ham aatma ne 84 janma ab poore kiye, ab phir paavan banna hai, baap ko yaad karna hai। nahin to kayaamat ka samay hai। sajaayen khaakar vaapis chale jaayenge। hisaab-kitaab to sabko chuktu karna hi hai। bhakti maarga mein kaashi kalvat khaate the to bhi koi mukti ko nahin paate। woh hai bhakti maarga, yeh hai gyaan maarga। ismen jeevghaat karne ki darkaar nahin rehti। woh hai jeev-ghaat। phir bhi bhaavna rehti hai ki mukti ko paaven isliye paapon ka hisaab-kitaab chuktu ho phir chaalu hota hai। abhi to kaashi kalvat ka koi mushkil saahas rakhte hain। baaki mukti va jeevanmukti nahin mil sakti। baap bigar jeevanmukti koi de hi nahin sakte। aatmaayen aati rehti hain phir vaapas kaise jaayenge? baap hi aakar sarva ki sadgati kar vaapis le jaayenge। satayug mein bahut thode manushya rehte hain। aatma to kabhi vinaash nahin hoti hai। aatma avinaashi hai, shareer vinaashi hai। satayug mein aayu badi hoti hai। duhkh ki baat nahin। ek shareer chhod doosra le lete hain। jaise sarpa ka misaal hai, usko marna nahin kaha jaata hai। duhkh ki baat nahin। samajhte hain ab time poora hua hai, is shareer ko chhod doosra lenge। tum bachchon ko is shareer se detach hone ka abhyaas yahaan hi daalna hai। ham aatma hain, ab hamko ghar jaana hai phir nai duniya mein aayenge, nai khaal lenge, yeh abhyaas daalo। tum jaante ho aatma 84 shareer leti hai। manushyon ne phir 84 laakh kah diya hai। baap ke liye to phir anginat thikkar bhittar mein kah dete hain। usko kaha jaata hai dharma ki glaani। manushya svachchha buddhi se bilkul tuchchha ban jaate hain। ab baap tumko svachchha buddhi banaate hain। svachchha bante ho yaad se। baap kehte hain ab navayug aata hai, uski nishaani yeh mahaabhaarat ladaai hai। yeh vahi mooslon vaali ladaai hai, jismen anek dharma vinaash, ek dharma ki sthaapna hui thi, to zaroor bhagwan hoga na। shreekrishna yahaan kaise aa sake? gyaan ka saagar niraakaar ya shreekrishna? shreekrishna ko yeh gyaan hi nahin hoga। yeh gyaan hi gum ho jaata hai। tumhaare bhi phir bhakti maarga mein chitra banenge। tum poojya hi pujaari bante ho, kala kam ho jaati hai। aayu bhi kam hoti jaati hai kyonki bhogi ban jaate ho। vahaan hain yogi। aise nahin ki kiski yaad mein yog lagaate ho। vahaan hai hi pavitra। shreekrishna ko bhi yogeshvar kehte hain। is samay shreekrishna ki aatma baap ke saath yog laga rahi hai। shreekrishna ki aatma is samay yogeshvar hai, satayug mein yogeshvar nahin kahenge। vahaan to prince banti hai। to tumhaari pichhaadi mein aisi avastha rahni chaahiye jo sivaae baap ke aur koi shareer ki yaad na rahe। shareer se aur puraani duniya se mamatva mit jaae। sannyaasi rehte to puraani duniya mein hain parantu gharbaar se mamatva mita dete hain। brahm ko eeshvar samajh unse yog lagaate hain। apne ko brahm gyaani, tatva gyaani kehte hain। samajhte hain ham brahm mein leen ho jaayenge। baap kehte hain yeh sab wrong hai। right to main hoon, mujhe hi truth kaha jaata hai।

to baap samjhaate hain yaad ki yaatra badi pakki chaahiye। gyaan to bada sahaj hai। dehi-abhimaani banne mein hi mehnat hai। baap kehte hain kiski bhi deh yaad na aaye, yeh hai bhooton ki yaad, bhoot pooja। main to ashareeri hoon, tumko yaad karna hai mujhe। in aankhon se dekhte hue buddhi se baap ko yaad karo। baap ke direction par chalo to dharmaraaj ki sajaaon se chhoot jaayenge। paavan banenge to sajaayen khatma ho jaayengi, badi bhaari manzil hai। praja banna to bahut sahaj hai, usmein bhi saahookaar praja, gareeb praja kaun-kaun ban sakte hain, sab samjhaate hain। pichhaadi mein tumhaare buddhi ka yog rehna chaahiye baap aur ghar se। jaise actors ka naatak mein part poora hota hai to buddhi ghar mein chali jaati hai। yeh hai behad ki baat। woh hoti hai had ki aamadni, yeh hai behad ki aamadni। achhe actors ki aamadni bhi bahut hoti hai na। to baap kehte hain grihastha vyavhaar mein rehte buddhiyog vahaan lagaana hai। woh aashik-maashook hote hain ek-do ke। yahaan to sab aashik hain ek maashook ke। unko hi sab yaad karte hain। wonderful musaaphir hai na। is samay aaye hain sab duhkhon se chhudaakar sadgati mein le jaane liye। unko kaha jaata hai sachcha-sachcha maashook। woh ek-do ke shareer par aashik hote hain, vikaar ki baat nahin। usko kahenge deh-abhimaan ka yog। woh bhooton ki yaad ho gai। manushya ko yaad karna maana 5 bhooton ko, prakriti ko yaad karna। baap kehte hain prakriti ko bhool mujhe yaad karo। mehnat hai na aur phir daiveegun bhi chaahiye। koi se badla lena, yeh bhi aasuri gun hai। satayug mein hota hi hai ek dharma, badle ki baat nahin। woh hai hi advet devta dharma jo shivbaaba bigar koi sthaapan kar na sake। sookshmavtanvaasi devtaaon ko kahenge farishte। is samay tum ho brahman phir farishta banenge। phir vaapis jaayenge ghar phir nai duniya mein aakar daivi gun vaale manushya arthaat devta banenge। abhi shoodra se brahman bante ho। prajaapita brahma ka bachcha na banen to varsa kaise lenge। yeh prajaapita brahma aur mama, woh phir lakshmi-naaraayan bante hain। ab dekho tumko jaini log kehte hain hamaara jain dharma sabse puraana hai। ab vaastav mein mahaaveer to aadi dev brahma ko hi kehte hain। hai brahma hi, parantu koi jain muni aaya to usne mahaaveer naam rakh diya। abhi tum sab mahaaveer ho na। maaya par jeet pa rahe ho। tum sab bahaadur bante ho। sachche-sachche mahaaveer-mahaaveerniyaan tum ho। tumhaara naam hai shiv shakti, sher par savaari hai aur mahaarthiyon ki haathi par। phir bhi baap kehte hain badi bhaari manzil hai। ek baap ko yaad karna hai to vikarma vinaash hon, aur koi raasta nahin hain। yogbal se tum vishwa par raajya karte ho। aatma kehti hai, ab mujhe ghar jaana hai, yeh puraani duniya hai, yeh hai behad ka sannyaas। grihastha vyavhaar mein rehte pavitra banna hai aur chakra ko samajhne se chakravarti raaja ban jaayenge। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) dharmaraaj ki sajaaon se bachne ke liye kisi ki bhi deh ko yaad nahin karna hai, in aankhon se sab kuchh dekhte hue ek baap ko yaad karna hai, ashareeri banne ka abhyaas karna hai। paavan banna hai।

2) mukti aur jeevanmukti ka raasta sabko bataana hai। ab naatak poora hua, ghar jaana hai - is smriti se behad ki aamadni jama karni hai।

vardaan:- ek second ki baaji se saare kalpa ki takdeer banaane vaale shreshtha takdeervaan bhav

is sangam ke samay ko vardaan mila hai jo chaahe, jaisa chaahe, jitna chaahe utna bhaagya bana sakte hainkyonki bhaagya vidhaata baap ne takdeer banaane ki chaabi bachchon ke haath mein di hai। last vaala bhi fast jaakar first aa sakta hai। sirf sevaaon ke vistaar mein svayan ki sthiti second mein saar swaroop banaane ka abhyaas karo। abhi-abhi direction mile ek second mein master beej ho jaao to time na lage। is ek second ki baaji se saare kalpa ki takdeer bana sakte hain।

slogan:- double seva dvaara powerful vaayumandal banaao to prakriti daasi ban jaayegi।

avyakt-ishaare - ekaantapriy bano ekta aur ekaagrata ko apnaao

anek vrikshon ki daaliyaan ab ek hi chandan ka vriksha ho gaya। log kehte hain - do chaar maataayen bhi ek saath ikatthi nahin rah sakti aur abhi maataayen saare vishwa mein ekta sthaapan karne ke nimitta hain। maataaon ne hi bhinnata mein ekta laai hai। desh bhinna hai, bhaasha bhinna-bhinna hai, culture bhinna-bhinna hai lekin aap logon ne bhinnata ko ekta mein laaya hai।