मंगलवार 30 जून 2026 की दैनिक मुरली

30-06-2026 praatahmurli om shanti "baapdaada"' madhuban

“meethe bachche - is samay tum baap ke oopar balihaar jaao to 21 janmon ke liye tum sada sukhi ban jaayenge''

prashn:- gyaani bachchon ko apni avastha theek rakhne ke liye kaun si aadat pakki daalni chaahiye?

uttar:- savere-savere uthne ki। savere-savere uthkar baba ki yaad mein baithna - yeh bahut achhi dhaarna hai। jo bachche jaldi sote aur jaldi uth jaate unki avastha saara din theek rehti hai। agyaaniyon ki neend se gyaani bachchon ki neend aadhi honi chaahiye। 10 baje so jaao 2 baje uthkar baitho।

geet:- mujhko sahaara dene vaale…

om shanti। bachche sab sammukh baithe hain to jaante hain ham jeev aatmaayen hain। yahaan to jeev aatmaayen hongi na। jab aatma ko shareer nahin hai to nangi hai, usko ashareeri kaha jaata hai। tum to shareer ke saath baithe ho। aatma va paramatma jab tak shareer mein na aaye to bol na sake। tum jeev aatmaayen jaanti ho, ab baap ke sammukh baithe hain। hoobhu jaise 5 hajaar varsha pahle sammukh aaye the। bachche zaroor baap se varsa hi lenge। jaante hain ham apne parampita paramatma behad ke baap ke sammukh baithe hain। kyon baithe hain? baap se behad ka varsa lene। jaise school mein samajhte hain ham teacher dvaara injeeniyri, bairistari seekhte hain। yeh em object rehti hai। tum bachche samajhte ho parampita paramatma hamko brahma ke tan se baith raajayog sikhlaate hain। bhagvaanuvaach - yeh to bachchon ko samjhaaya hai ki bhagwan niraakaar ko kaha jaata hai। jeev aatmaayen punarjanma zaroor leti hain। koi bhi sannyaasi se tum poochho - manushya punarjanma lete hain? to aise nahin kahenge ki nahin lete hain। nahin to 84 laakh janma kaise kehte? poochho - tum punarjanma ko maante ho? yeh to barobar hai, aatma sanskaar anusaar ek shareer chhod phir doosra leti hai। aise koi-koi manushya 84 janma lete hain। 84 laakh janma ki to baat hi nahin। pahla janma zaroor bahut achha satopradhaan hoga। last chhi-chhi tamopradhaan hoga। 16 kala se phir 14 kala, 12 kala hoti jaayengi, punarjanma zaroor lete hain। poochhna chaahiye achha parampita paramatma punarjanma lete hain va punarjanma rahit hain? dekho yeh point bahut sookshm hai। agar kahenge janma-maran rahit hai to phir shiv jayanti siddha nahin hoti। kahenge shiv jayanti to manaai jaati hai। samjhaaya jaata hai haan shiv jayanti hai parantu janma ke saath phir marna jise kaha jaata hai woh nahin hai। agar mare to phir punarjanma le। baap kabhi punarjanma nahin lete। woh is tan mein ek hi baar aate hain, bas phir punarjanma mein nahin aate। parampita paramatma punarjanma rahit hai, woh kabhi satopradhaan se tamopradhaan nahin bante hain। aatmaayen to sab janma-maran mein aate-aate patit ban jaati hain phir baap aate hain paavan banaane। isse siddha hota hai aatma hi patit hoti hai, aatma ghar se paavan aati hai phir maaya patit bana deti hai। baap to kabhi patit nahin banaayenge। baap kabhi bhi bachchon ko gandi mat nahin de sakte। is samay ke manushya patit mat hi dete hain। ab paavan baap kehte hain ki patit nahin bano arthaat vikaar mein nahin jaao। raavan ki mat se duhkhadhaam ban gaya। pahle sukhdhaam tha। aise nahin baap hi sukh duhkh dete hain। nahin, baap kabhi bachchon ko duhkh ki mat de nahin sakte। maaya hi duhkh deti hai। us maaya par jeet paane se tum jagatjeet bante ho। manushya maaya ka arth nahin samajhte। woh dhan ko maaya kah dete hain। kehte hain na inko maaya ka nasha bahut hai। parantu maaya ka nasha hota nahin। vahaan raavan ka but banaakar jalaate nahin। but to dushman ka banaaya jaata hai। raavanraajya shuru hota hai aadhaakalpa se। deh ahankaar aane se phir aur vikaar aa jaate hain। shaastron mein likha hua hai devtaayen vaam maarga mein arthaat vikaaron mein jaate hain। maaya ke vash hone se parvash ban jaate hain। parmat par chalte rehte hain। abhi tum chalte ho shreemat par। par-mat maana maaya ki mat। shri arthaat shreshtha mat hai baap ki। woh hai raavan ki mat, parmat isliye baap ne kaha hai aasuri sampradaay sab raavan ki janjeer mein bandhe hue duhkhi hain।

manushyon ne satayug ki aayu laakhon varsha samajh li hai। tum to hisaab bataate ho - 5 hajaar varsha kaise hain। Christ ko 2 hajaar varsha hua, buddha ko 2250 varsha hua phir islaami ko 2500 varsha hua। sabko milaakar aadhaakalpa hua। unke pahle to devtaaon ka raajya tha phir devtaaon ko laakhon varsha kaise kah sakte hain। itne manushya hote phir to manushya bahut ho jaate। itne to hain nahin। 5 hajaar varsha mein hi karodon manushya ho jaate hain। kehte bhi hain Christ ke 3 hajaar varsha pahle bhaarat mein aadi sanaatan devi-devta dharma tha। 5 hajaar varsha poore ho jaate hain। naatak poora to hota hai na। in baaton ko koi jaante nahin। main jo hoon, jaisa hoon, yeh chakra phirta hai, koi jaan na saken। baap hi samjhaate hain - yeh hai geeta episode। baap ne aakar sahaj raajayog sikhaaya tha। baba budhiyon ko bhi samjhaate hain ki yeh bahut sahaj baat hai। sirf baap aur varse ko yaad karna hai। bachcha paida hua, goya vaaris paida hua। tum samajhte ho ham baba ke vaaris hain। 5 hajaar varsha baad phir se milne aaye hain। yeh badi gupta baaten hain। baba poochhte hain aage kabhi mile ho? kehte hain haan baba। aatma is mukh dvaara kehti hai - ham 5 hajaar varsha pahle aapse mile the। aap is tan dvaara shiksha dene aaye the। jo pakke-pakke bachche hain samajhte hain ham baba se behad ka varsa lene baithe hain। ham behad ke baap ke bane hain, brahma dvaara। baap kehte hain - mujhe pahchaante ho, main tumhaara baap hoon। tum kahenge haan baba, ham aatmaon ke aap parampita paramatma baap ho। baap bhi kehte hain - tumko hamne svarga mein bheja tha, varsa diya tha phir maaya ne chheen liya phir ab main deta hoon। maaya varsa chheenti hai, baap dilaate hain। yeh anek baar khel ho chuka hai, hota rahega। ant nahin hai। baap ke bante hain phir koi sage, koi lage। koi sautele, koi maatele bante hain। kachche-pakke to hain na। pakkon ko bhi kabhi maaya ekdam jeet leti hai। bachche kehte hain baba ham jab tak jiyenge, aapse varsa lete rahenge। vikarmon ka bojha sir par bahut hai। to jitna tum yaad mein rahenge us yog agni se tum paap-aatma se punya-aatma bante jaayenge। aag cheez ko pavitra karti hai। tumhaari hai yog agni। yeh behad ka yagya hai। behad ke seth ne behad ka yagya racha hai। itne varsha koi bhi yagya chalta nahin hai। 7-8 roz va ek maas ke liye yagya rachte hain। tumhaara yeh yagya to kitne varshon se chal raha hai। baap to sunaate rehte hain। kehte hain bhool mat jaana, sirf mujhe yaad karo to tumhaare janma-janmaantar ke vikarmon ka bojha katta jaayega। bhagvaanuvaach - mujh apne baap ko yaad karo। zaroor aaya hua hai tab to kehte hain na।

baap kehte hain - ab tumko vaapis jaana hai। tumhaari aatma is samay bahut patit hai। ab tum jaante ho yog se ham paavan bante jaayenge। tumhaari to pratigya hai ki aap jab aayenge to aur sang tod tum sang jodenge। tum par vaari jaayenge। stri, purush par aur purush, stri par balihaar hote hain। yahaan hai baap par balihaar jaana। shaadi mein ek doosre par balihaar jaate hain na। ab baap kehte hain - tumko koi manushya par balihaar nahin jaana hai। tumhaari pratigya hai - aap par balihaar jaaoongi। aap hamaare par balihaar jaao to 21 janma tumko sada sukhi banaaoonga। kitna bhaari varsa hai। shreemat se tum shreshtha banenge, yeh bhoolo mat। lakshmi-naaraayan ka chitra bhi ghar mein rakh do। ham baap se yeh varsa le rahe hain। baap paramdham se aaye hue hain। parantu maaya cheel bhi kam nahin hai। sabki baat nahin hai parantu nambarvaar hain। koi to ekdam bhool jaate hain ki ham baap se varsa lete hain। yahaan baithe hain to nasha chadhta hai। yahaan se baahar nikla aur bhoola phir subah ko refresh hote hain phir saara din bhool jaate hain। 4-5 varsha rah-kar achhi service karne vaale bhi aaj dekho nahin hain। kuchh avagya ki hai to maaya ne jor se thappad maara aur chale gaye। baba kah dete hain - chadhe to chaakhe prem ras, gire to chaknaachoor। dekhte ho kaise chaknaachoor ho jaate hain। vaikuntha mein to zaroor chalenge। parantu pad to nambarvaar hai na। bhal vahaan sab sukhi rehte hain phir bhi martabe to hain na। school mein martabe paane ke liye hi to purushaartha karte hain। aise nahin praja hi sahi, jo takdeer mein hoga। nahin, isko tamopradhaan purushaartha kaha jaata hai। satopradhaan unko kahenge jo baap se poora varsa lene ki pratigya karte hain। yeh ghuddaud hai। sabhi number one to nahin jaayenge। yeh human race hai। tum chaahte ho ham jaldi shivbaaba ke gale mein piro jaaen to unko yaad karna pade। saara madaar yaad par hai। maaya vighna aisa daalti hai jo ekdam race se nikaal deti hai। tumhaari human race hai। aatma kehti hai ham bahut duhkhi hue hain। shareer lete-lete bahut tang hue hain। kehte hain ab jaayen baba ke paas। baba ne yukti to batlaai hai। kehte hain baba ham aapki yaad mein hi rahenge। jitna time nikaal sako utna achha hai। government ki service mein bhi 8 ghanta dete ho, aise yaad mein bhi 8 ghante to raho। srishti ko svarga banaana yeh kitni bhaari service hai। sirf baap ko yaad karo aur sukhdhaam ko yaad karo। bas, yeh 8 ghanta service karenge to tum poora varsa paayenge। aise-aise yaad karte-karte tumhaare vikarma vinaash honge। 8 ghanta is service mein do baaki 16 ghanta tum free ho। jitna ho sake tum ghadi-ghadi yaad karo। yaad to kahaan bhi baith kar sakte ho। sabse achha time tumko savere milega। sindhi mein kahaavat bhi hai savere sona, savere uthna... vahi manushya bada gunvaan hai। yeh gaayan bhi abhi ka hai। baap kehte hain raat ko jaldi so jaao aur phir savere-savere utho। agyaani log 8 ghanta neend karte hain, tumhaari neend aadhi honi chaahiye। 4-5 ghanta neend bas। tum karmayogi ho na। raat ko 10 baje so jaao 2 baje utho। shivbaaba ko yaad karne se tumhaari kamaai bahut hai। tumko health wealth donon hi milegi। achha 2 baje nahin to 3 baje utho, 4 baje utho। first class samay woh hai। shanti rehti hai, sab ashareeri ban jaate hain। us samay sannaata bahut hota hai। amritvele ki yaad achha asar karti hai। baba bahut karke raat ko jaagte rehte hain। sookshm service mein thakaavat nahin hoti। kamaai se to khushi hogi। tum bachche savere uth apni avinaashi kamaai karte raho। achha!

meethe-meethe sikeeldhe bachchon prati maat-pita baapdaada ka yaad-pyaar aur good morning। roohaani baap ki roohaani bachchon ko namaste।

dhaarna ke liye mukhya saar:-

1) 21 janma sada sukhi banne ke liye ek baap par poora-poora balihaar jaana hai। shreemat se shreshtha banna hai। manmat va parmat ko tyaag dena hai। koi avagya nahin karni hai।

2) savere-savere uthkar yaad mein baith kamaai karni hai। srishti ko svarga banaane ki service kam se kam 8 ghanta zaroor karni hai।

vardaan:- samay aur sankalp sahit apne sarva khajaanon ko will karne vaale mohjeet bhav

jaise bachche ko sab kuchh will kiya jaata hai, aise aap log bhi baap ko apna vaaris banaakar sab kuchh will kar do to will power aa jaayegi। is will power se moh svatah nashta ho jaayega। jaise saakaar baap ne poora hi apne ko will kiya vaise aap logon ki jo smriti hai, samay aur sankalpon ka khajaana hai use will karo arthaat shreemat pramaan sevaaon mein lagaao to mohjeet, bandhanmukta ban jaayenge।

slogan:- ek do ka snehi banne ke liye saralta aur sahansheelta ka gun dhaaran karo।

ye avyakt ishaare - sada harshit rahne ke liye apni nature ko saral banaao, sahansheel bano।

baapdaada ka vardaan hai sada khush raho, khushi ka khajaana baanto, khushi ki lahar sarva mein phailaao। aapke chehre par sada khushi ki muskaraahat chamakti rahe। aise harshit mukh raho। iske liye bol mein madhurta, santushtata, saralta ki naveenta avashya ho। brahman aatmaon ke bol saadhaaran bol na hon। har karma mein aisi naveenta ho jo har ek usse praapti ka anubhav kare।