Avyakt murli for Sunday 9 November 1969

>

09-11-69om shanti avyakt baapdaada madhuban

“bhavishya ko jaanne ki yuktiyaan”

“deepaavli ke shubh divas par – praanapriy avyakt baapdaada ke madhur mahaavaakya”

baapdaada ek-ek deepak ko ek kaal (samay) ki drishti se dekh rahe hai ya teenon ki? baap to trikaaldarshi hai va daada bhi trikaaldarshi hai? aap bhi trikaaldarshi ho ya ban rahe ho?agar trikaaldarshi ho to apne bhavishya ko dekhte va jaante ho? jaante ho main kya banoonga? paandav sena mein apna bhavishya jaante ho ya spashta hai ki kya banoge। aur kaunsi raajdhaani mein?lakshmi-naaraayan bhi kis number mein? (harek ne apna vichaar bataaya) jaise aap aage badhte jaayenge vaise apna bhavishya naam-roop-desh-kaal yeh chaaron hi spashta hote jaayenge ki kis desh mein raajya karna hai kis naam se,kis roop se aur kis samay,pahle raajdhaani mein bhi kya banenge। doosri raajdhaani mein kya banenge! yeh poori janmapatri ek-ek ko apne andar spashta hogi। baapdaada jab bhi kisi ko dekhte hai to teenon ko dekhte hai। pahle kya tha ab kya hai phir bhavishya mein kya banne vaale hai। to ek-ek deep mein yeh teenon kaal dekhte hai। aap do kaal to spashta jaante ho। pahle kya the aur ab kya hai lekin bhavishya mein kya hona hai, usko jitna-jitna yog- yukta honge utna bhavishya bhi spashta jaan jaayenge। jaise vartamaan spashta hai। vartamaan mein kabhi bhi sankalp nahin uthta hai ki hai ya nahin hai। na maaloom kya hai yeh kabhi sankalp nahin uthega। isi reeti se bhavishya bhi spashta hoga। aisa spashta nasha har ek ki buddhi mein nambarvaar aata jaayega। jaise saakaar roop mein maa-baap donon ko apna bhavishya spashta tha। naam bhi, roop bhi spashta, desh bhi spashta aur kaal bhi spashta tha। itna spashta hai ki kis sambandh mein aayenge? va sambandh bhi spashta kis roop mein saamne aayega। abhi dil mein thoda bahut kis-kis ko aa sakta hai। lekin kuchh samay baad aise hi nishchay buddhi hokar kahenge ki yeh hona hi hai। abhi agar aap kahenge bhi to doosre nishchay kare ya na kare। lekin thode samay mein aapki chalan, aapki tadbeer jo hai woh aapke bhavishya tasveer ko prasiddha karegi। ab tadbeer aur bhavishya mein kuchh pharka hai। lekin jaise- jaise samay aur aapka purushaartha samaan hota jaayega to phir koi ko sankalp nahin uthega।

aap sabhi ne deepmaala manaai। deepmaala par kya karte hai? ek deep se anek deep jagaate hai to anekon ka ek ke saath lagan lagta hai, yahi deepmaala hai। agar ek-ek deepak ki ek deepak ke saath lagan hai to yahi deepmaala hai। deepak mein kya hai? agni। to lagan hogi to asti bhi hogi। lagan nahin to agni bhi nahin। yahi dekhna hai ki ham deepak lagan lagaakar agni bane hai? deepak kitne prakaar ke hote hai?jo duniya mein bhi prasiddha hai? (harek ne apna- apna vichaar sunaaya) ek hai andhiyaare ko mitaakar roshni karne vaala mitti ka sthool deepak aur doosra hai aatma ka deepak,teesra hai kul ka deepak aur chautha kaun-sa hai? aashaaon ka deepak kehte hain na। baap ko bachchon mein aasha rehti hai। to chautha hai aashaaon ka deepak। yeh chaar prakaar ke deepak gaaye jaate hin। ab in chaar deepkon se harek ne kitne deepak jagaaye hain? baapdaada ki aashaayen jo bachchon mein rehti hain - woh deepak jagaaya hai?mitti ke deepak to kai janma jagaaye hin। aatma ka deepak jaga hai?yeh chaaron prakaar ke deepak jab jag jaate hain tab samjho deepmaala manaai। aisa koi karma na ho jo kul ka deepak bujh jaaye। aisi koi chalan na ho jo baapdaada bachchon mein aashaaon ka deepak jagaate woh bujh jaaye। ekras aur atal-adol yeh sabhi deepak jag rahe hani? jiska deepak khud jaga hua hoga woh auron ka deepak jagaane bigar rah nahin sakta। baapdaada ki bachchon mein mukhya aashaayen kaun si rehti hain? baapdaada ki har ek bachche mein yahi aasha rehti hain ki ek-ek bachcha pahle number mein jaaye arthaat harek vijayi ratna bane। vijayi ratna ki nishaaniyaan kya hogi? jo aap sabhi ne sunaaya woh to jo suna hai vahi bola। isliye theek hi hai। jo vijayi hoga unke lakshan to aap sabhi ne sunaaye lekin saath-saath vijayi unko kaha jaata hai - jo khud to vijay praapta kiya hua ho lekin auron ko bhi apne se aage vijayi banaaye। jaise baapdaada bachchon ko apne se bhi aage rakhte the na! vaise hi jo vijayi ratna honge unki vijay ki nishaani yeh hai ki woh apne sang ka rang sabhi ko lagaayenge। jo bhi saamne aaye woh vijayi bankar hi nikle। aise vijayi ratna vijay maala ke kis number mein aate hain? khud to vijayi bane ho lekin aur bhi aapke sang ke rang se vijayi ban jaaye। yahi service rahi hui hai। aise nahin ki koton mein koi hi vijayi banenge। lekin jo jaisa hota hai vaisa hi banaata hai। aise vijayi ratna jo anekon ko vijayi bana sake vahi maala ke mukhya manke hain। to vijayi ki nishaani hai aap samaan vijayi banaana। abhi yeh service rahi hui hai। anekon ko vijayi banaana hai sirf khud ko nahin banaana hai। deepmaala mein poori deepmaala jagi hui hoti hai। jab deepmaala kaha jaata hai to anek jage hue deepkon ki maala harek ne gale mein daali hai? aise jage hue deepkon ki maala harek ratna aur gale mein jab daalenge tab vijay ka nagaada bajega। jaise divya gunon ki maala apne mein daali hai vaise anek jage hue deepkon ki maala apne gale mein daalna hai। jitni yahaan deepkon ki maala apne gale mein daaloge utni vahaan praja banegi। koi-koi maala bahut lambi-chaudi hoti hai। koi sirf gale mein pahanne tak hoti hai। to maala kaun si pahanni hai? bahut badi। aisi maala se apne aapko shrringaar karna hai। kitne deepkon ki maala ab tak daali hai? ginti kar sakte ho va anginat hai? deepak bhi achhe woh lagte hain jo tej jage hue hote hain। tim-tim karne vaale achhe nahin lagte। achha।

madhuban ke phoolon mein visheshtaayen kya honi chaahiye? naam hi hai madhuban। to pahli visheshta hai madhurta। madhurta aisi cheez hai jo koi ko bhi harshit kar sakte hain। madhurta ko dhaaran karne vaala yahaan bhi mahaan banta hai,aur vahaan bhi martaba paata hai। madhurta vaalon ko sabhi mahaan roop se dekhte hain। to yeh madhurta ka vishesh gun hona chaahiye। madhurta se hi madhusoodan ka naam baala karenge। yeh madhuban naam hai। madhu arthaat madhurta aur ban mein kya visheshta hoti hai? ban mein vairaagya vritti vaale jaate hai। to behad ki vairaagya buddhi bhi chaahiye। phir isse saari baaten aa jaayegi। aur aap sabhi ko copy karne ke liye yahaan aayenge। sabhi saachenge yeh kaise aise bane hain। sabhi ke mukh se niklega ki madhuban to madhuban hi hai। to yeh do visheshtaayen dhaaran karni hain - madhurta aur behad ki vairaagya vritti। doosre shabdon mein kehte hain sneh aur shakti। aap sabhi ka sabhi se jaasti sneh hai na! baapdaada se। aur baapdaada ka madhuban vaalo se vishesh sneh rehta hai। kyonki bhal kaise bhi hain lekin sarvasva tyaagi hain। isliye aakarshit karte hain। lekin sarvasva tyaagi ke saath ab sneh aur shakti bhi bharni hai। samjha – kis visheshta ko bharna hai।

kumaariyon ko kamaal kar dikhaani hai। kumaariyon ka har kartavya kamaal yogya hona chaahiye। sankalp aur vaani tatha karma kamaal ka hona chaahiye। kumaariyaan pavitra hone ke kaaran apni dhaarna ko tej bana sakti hai। aise kamaal ka kartavya kar dikhaana hai, jo har ek ke mukh se yahi nikle ki inhon ka kartavya kamaal ka hai। jaise baapdaada ke har bol sunte hain to mukh se nikalta hai na ki aaj ki murli to kamaal ki hai। to kumaariyon ke har karma aise kamaal ke hone chaahiye। baapdaada ko follow karna hai। aise nahin kehna ki koshish karenge। jab tak koshish karenge tab tak kashish nahin hogi। agar kashish dhaaran karni hai to koshish shabd ko khatma kar do। abhi kashish roop banna hai। follow father karna hai। baapdaada kabhi kehte the ki koshish karenge। phir aap kyon kehti ho ki koshish karengi। kumaariyaan kamaal karengi to saathi saath bhi dega। nahin to saathi saakshi ho jaayega। isliye saathi ko saath rakhna hai। nahin to saakshi ban jaayenge। saakshi achha lagta hai ya saathi? jo mehnat karte hai uska phal bhi yahaan hi milta hai। yeh sneh aur bhavishya pad milta hai। sabhi ka snehi banne ke liye mehnat karni hai। jo jitni mehnat karte hai woh utne hi snehi bante hai। samay par snehi ki hi yaad aati hai। koi baat mein mehnat ki yaad aati hai। baba bhi kyon yaad aate hai? mehnat ki hai tab sneh hai। mehnat se snehi banna hai। jitna jaasti mehnat utna sarva ke snehi banenge। mehnat ka phal hi sneh hai। jo mehnat karte hai unko harek snehi ki najar se dekhenge। jo mehnat nahin karenge unko sneh ki najar se nahin dekhenge। student ko teacher ke gun zaroor dhaaran karne hai। sneh hi sampoorn banaata hai। sneh ke saath phir shakti bhi chaahiye। donon ka jab milan ho jaata hai to sneh aur shakti vaali avastha ati nyaari aur ati pyaari hoti hai। jiske liye sneh hai uske samaan banna hai। yahi sneh ka saboot hai। ismen apne ko check karna hai-kahaan tak ham samaanta mein sameep aaye hai?jitna-jitna samaanta mein sameep honge utna hi samjho karmaateet avastha ke sameep pahuchenge। yahi samaanta ka meter hai। apni karmaateet avastha parakhna hai। sirf sneh rakhne se bhi sampoorn nahin banenge। sneh ke saath-saath shakti bhi hogi to khud sampoorn ban auron ko bhi sampoorn banaayenge। kyonki shakti se woh sanskaar bhar jaate hai। to ab sneh ke saath shakti bhi bharni hai।

sabhi ke dilon par vijay kin gunon se praapta kar sakte ho? sabhi ko santushta karna। baap mein yeh vishesh gun tha। vahi follow karna hai। sabhi madhuban ki list mein ho ya all-rounder ki list mein ho? ek hai had ki list,doosri hai behad ki list। all-rounder aur ever ready। isi list mein maaloom hai kya karna hota hai?ek second mein taiyaar। sakalpon ko bhi ek second mein banda karna hai। militri vaalon ka har samay bistara taiyaar rehta hai। yeh sakalpon ka bistara bhi banda karna hai। bistara bhi ever ready rehna chaahiye। ever ready banne vaalon ka sakalpon ka bistara taiyaar rehna chaahiye। koi bhi paristhiti ho uska saamna karne ke liye peti bistara taiyaar ho। achha।

roohaani bachchon! tum aatmaon ko vaani se pare apne ghar jaane ke liye purushaartha karna hai। isliye is puraani duniya mein rehte deh aur deh ke sambandhon se upraamchit hona hai। patit duniya mein rehte hue baap pavitra banne ki shakti dete hai। purushaartha karke tumko sada pavitra banna hai।

bachche! sadaiv gunagraahak banna hai। stuti-ninda, laabh-haani,jay-paraajay sabhi mein santushta hokar chalna hai aur merciful banna hai।

achha!!!