Avyakt murli for Sunday 28 April 1974

>

28-04-74 om shanti avyakt baapdaadaamdhuban

sthool ke saath-saath sookshm saadhnon se eeshvareey-seva mein saphalta

last so fast service ke saadhan batlaate hue murli manohar shiv baba serviceable paandavon se bole:-

aaj ke is sangathan ko kaun-sa sangathan kahenge? is sangathan ki zimmevaari ki visheshta kya hai? kya aapne in sab baaton ko apne sangathan mein spashta kiya hai? kya zimmevaari mili hai ya li hai? kya apni sthiti ko uchcha aur paripakva banaane ki zimmevaari mili hai ya li nahin hai? kya aisa maante ho ki memorendam banaane ki zimmevaari li hai aur apni sthiti banaane ki zimmevaari mili hai।

aajkal ke samay ke anusaar mukhya zimmevaari kaun-si hai? eeshvareey seva ke to bhinna-bhinna saadhan aur swaroop hote ja rahe hain aur aage chalkar aur bhi honge। lekin‘last is fast’ ka saadhan aur swaroop kaun-sa hai? vichaar to bahut achhe nikaale hain-board bhi lagaavenge, film bhi banaavenge,memorendam bhi banaavenge,shmashaan aur gaanvon mein bhi jaavenge-yeh sab to karenge hi,lekin apne mastak par kaun-sa board lagaavenge? apne is mukh dvaara va swaroop dvaara vishwa ki har aatma ko kaun-sa aur kaise memorendam denge? apne divya alaukik charitra aur shubh chintan dvaara aur harshit mukh ke chitra dvaara kaun-si alaukik film dikhaavenge?kya aap ek hi film taiyaar karenge ya ye itne sab (sangathan mein aaye hue brahmaakumaar) madhuban vardaan bhoomi se chetan evan alaukik film ban niklenge?agar itni sab film har sthaan par logon ko dikha sako to kya yahi last so fast service nahin?gaanv-gaanv mein athva har sthaan mein sadaakaal ki shanti va aananda ka anubhav ek second mein apni anubhvi-moortta dvaara dikhaao va karaao to kya yeh ‘kam kharcha baala nasheen’ (oonchi parantu kam kharcha vaali) service nahin? (eeshvareey seva mein lage hue kuchhek bhaaiyon ki ek vichaar goshthi madhuban mein hui thi। yeh murli us avsar se sambandhit hai। us avsar par kuchh bhaaiyon ne is vishay par gyaapan athva memorendam taiyaar karne ki zimmevaari li thi ki shaastron mein devi-devtaaon ki jo glaani likhi hai, woh niraadhaar aur haanikaarak hai।) sapoot bachchon ka, sahayogi bachchon ka aur serviceable bachchon ka har sankalp, har bol aur har karma mein yahi pharja aur yahi ek sabse badi zimmevaari hai। aap paandavon ka sangathan athva nimitta bani hui aatmaon ka sangathan sirf sthool service ke saadhan ikatthe karne ya unhein practical mein laane tak hi nahin hai। sthool saadhnon ke saath-saath sookshm saadhan aur plan ke saath-saath plen sthiti aur smriti rahe-in baaton ko apni zimmevaari samajh kar chalna arthaat karma karna hai। jo bhi yahaan baithe hain-woh sab in baaton ki zimmevaari apne ko nimitta samajh uthaavenge to kya vihang maarga ki service ka roop nahin dikhaai dega?

jaise eeshvareey seva-kendron par teachers (shikshikaaen) aur mukhya aatmaayen har kaarya ki zimmevaari ke liye nimitta hain, vaise hi kya aap apne ko itna zimmevaar ya nimitta samajhte ho? jaise har eeshvareey maryaada ko paalan karna aur karaana teachers ki ek zimmevaari hai kya aap apne ko har eeshvareey maryaada ke andar chalne ke nimitta samajhte ho ya aisa maante ho ki yeh teachers aur deedi-daadi hi ka kaam hai? teachers se bhi pahle yeh zimmevaari aap nimitta bane hue paandavon ki hai kyonki vishwa ke aage challenge ki hui hai ki ghar-grihastha mein rehte kamal-pushpa ke samaan nyaare aur pyaare rahne ki। keechad mein rehte kamal athva kaliyugi samparka mein rehte brahman is challenge ko practical roop mein laane ke nimitta hain; na ki teachers। yeh part paandavon ka hai athva pravriti mein rahne vaalon ka hai। teachers ke paas pahunchne se pahle sample ke roop mein aap ho। sample ko dekhkar hi vyaapaar karne ki himmat va ullaas aata hai। aise hi har baat mein nimitta ban chalne ka kya apna part samajh kar chalte ho? kai teachers ke paas aate hain, sunne ke baad poochhte hain ki aisa koi pratyaksha roop dikhaao, yeh sambhav hai athva nahin, iski misaal maangate hain। to teachers se jyaada responsibal kaun hue? teachers ki maryaadaayen apni hain, lekin aap logon ki maryaadaayen teachers se koi kam nahin hain। amrit vele se lekar jo sarva- maryaadaayen smriti, vritti,drishti aur kriti sabke prati bani hui hain to kya ve sabki buddhi mein sada spashta rehti hain? kya har sankalp ko maryaada pramaan practical mein laate ho?yeh hai practical swaroop mein last aur fast service ka saadhan।

pahla-pahla challenge jo aaj tak na koi kar sakte hain aur na karenge, woh first challenge kaun-sa hai? first challenge hai pyooriti ka। samparka aur sambandh mein rehte sankalp mein bhi isi first challenge ki kamjori na ho। first vaayda kaun-sa hai? woh yahi hai na ki ‘‘aur sang tod ek sang jodenge athva tumheen se khaaoon, tumheen se… athva mera to ek, doosra na koi।’’ baat to ek hi hai। jo first vaayda aur first challenge hai ve donon ek-doosre se sambandh rakhte hain। in donon ke oopar kitna attention rehta hai? is pahli baat ka hi tension rehta hai। isi yuddha mein to mahaarthi nahin ho na? mahaarthi ka arth tension mein rehna nahin hai,balki sada attention rahe। sabse pahla prabhaav is vishesh baat par hai, kyonki yahi asambhav ko sambhav karne vaali ek baat hai। kya pahla prabhaav karne ki pvointas majboot hai? ya ab tak bhi sanskaaron se majboor hain? jo svayan ke bhi sanskaaron se majboor hain ve anya ko unki majbooriyon se svatantra kar saken, yeh sadaakaal ke liye nahin ho sakta। tempreri prabhaav to pad sakta hai। lekin chalte-chalte phir un aatmaon mein bhi majbooriyon ki lahar utpanna hogi। isliye is sangathan ki zimmevaari sabse pahli yeh hai sarva majbooriyon ko hataana hai-pahle svayan ki aur phir sansaar ki,first challenge mein incharge bano। yeh hai zimmevaari। baap-daada bhi aur sansaar ki sarva aatmaayen bhi yeh naveenta va visheshta dekhna chaahti hain।

aage chal kar jitne service ke saadhnon dvaara service ko badhaavenge va maidaan mein prasiddha hote jaavenge, vaise har prakaar ke log aapki har baat ko mantron dvaara va apni siddhiyon dvaara chaik karne ki challenge karenge। sankalpon ko va karmon ko bhi karne ke liye aapke peechhe si.aai.D. (guptachar) honge। aise hi sahaj thode hi maanenge? bina proof aur pramaan ke buddhimaan log maanne ke liye taiyaar nahin hote। challenge karne ke saath-saath va service ke sthool saadhnon ke saath-saath kya aisi taiyaari kar rahe ho? mind-control (mastishka niyantran) ka egjaimineshan (pareeksha) lenge। aise nahin yog mein baithte samay chaik karenge, vishesh paristhiti ke samay mind-control va sthiti ki chaiking karenge। maaya ke si.aai.D. officer kam nahin hote। to aisi taiyaari karne ki zimmevaari va swaroop ban sample roop mein aage aane ki zimmevaari is group ki hai। tab to paandavon ki yaadgaar oonchi dikhaai hai। oonchi sthiti ka pramaan-yaadgaar hai। doosri baar jab aao to is baat mein paas with honour (Pass With Honour) bankar aao, tab kahenge-paandav sena। abhi to ek hi topic aur ek hi subject de rahe hain। isko hi ek-ras stage tak laao to ophreen denge। sahaj hai na?

kitne samay se mehnat kar rahe ho?-janma se? jo janma se hi prayatna mein laane vaali baat hai kya woh mushkil lagti hai? auron ko kehte ho apna janma-siddha adhikaar praapta karna kya mushkil hai? aise hi braahmanon ka pahla dharma aur karma jo hai woh karna kya braahmanon ke liye mushkil hai?marjeeva ban gae ho na, ya ki mar kar jinda ho jaate ho? marna shoodrapan se hai,jeena braahmanpan mein hai। yeh braahmanon ka alaukik jeevan hai। braahmanon ko kuchh mushkil hota hai kya? brahman jeevan ke ji-daan ka aadhaar kaun-sa hai?-murli। padhaai ka bhi aadhaar hai murli। to ji-daan ka aadhaar achhi tarah se sneh se prayatna mein laate ho। niyam pramaan nahin,lekin ji-daan ka aadhaar samajh sneh roop mein sveekaar karte ho। jitna sneh ji-daan se hoga utna hi sneh, jeevandaata se hoga। aisa snehi,anya aatmaon ko bhi sada snehi va nirvighna bana sakenge। ab aise aadhaar roop samajh sabke aage udaahran roop bano। yeh bhi zimmevaari hai। paandavon ke mukh se chalte-phirte murli ki rooh-roohaan va charcha kam sunaai padti hai। gopiyon ke mukh se murli ki charcha adhik sunne mein aati hai। kyon? aapas mein gyaan ki charcha karna,yeh to braahmanon ka karttavya hai। jis baat mein jiski jo lagan hoti hai,uske liye samay ki kami kabhi nahin ho sakti।

to in do baaton par dhyaan rakho ek to hai-purity, doosra ji-daan ka mahatva। sookshm saadhan ke liye alag samay ki aavashyakta nahin hai। jaise duniya ke logon ne grihastha aur aashram ko alag kar diya hai aur aap log donon ko mila kar ek karte ho, vaise sthool aur sookshm saadhnon ko alag karte ho, isliye pratyaksha phal nahin milta। donon hi saath-saath hone se pratyaksha phal dekhenge। vaani ke saath-saath mansa chaahiye aur karma ke saath-saath bhi mansa chaahiye kyonki abhi last time hai na? last time mein jo bhi shreshtha astra-shastra hote hain, ve sab use kiye jaate hain। agar yeh sab peechhe karenge to time beet jaayega। jab ashta shaktiyon ko saath-saath service mein laaoge tab hi ashta-devta prasiddha ho jaavenge arthaat sthaapna ka swaroop spashta dikhaai dega। aise nahin ki pahle sthool karke phir peechhe sookshm karenge। nahin,saath-saath ke sivaay saphalta nahin। achha।’’

is murli ka saar

sthool saadhnon ke saath-saath sookshm saadhan apnaane se aur plan ke saath-saath plenasthiti aur smriti rahne se last is fast ja sakenge। eeshvareey maryaadaaon ka paalan karne aur karaane ki zimmevaari teachers ke saath-saath braahmanon arthaat paandavon ki bhi hai।