Avyakt murli for Thursday 28 April 1977

>

28-04-77om shanti avyakt baapdaadaamdhuban

sada suhaagin ki nishaaniyaan

sada suhaag ke tilakdhaari, shreshtha bhaagyavaan, sarva praapti swaroop aatmaon prati baba bole:-

baapdaada bachchon ke suhaag aur bhaagya ko dekh rahe hain। suhaag ka tilak aur bhaagya ka light ka crown (Crown Of Light;prakaash ka taaj) taaj aur tilakdhaari arthaat suhaag aur bhaagya vaale। sada suhaag ki nishaani hai avinaashi smriti ka tilak। sada bhaagya ki nishaani hai pavitrata aur baap dvaara sarva praaptiyaan arthaat light ka crown। smriti kam, to tilak bhi spashta chamakta hua nahin dikhaai dega। chamakta hua tilak sada baap ke saath rahne ke suhaag ki nishaani hai। aisi suhaagin tilakdhaari va sada suhaagin hone ke kaaran sada vishwa ke aage shreshtha arthaat oonch aatma dikhaai deti hai। jaise laukik roop mein bhi suhaagin ko shreshtha nazar se dekhte hain aur har shreshtha kaarya mein suhaagin ko hi aage rakhte hain। agar ‘suhaag gaya to sansaar gaya’ - aise laukik mein bhi maana jaata hai। isi prakaar alaukik jeevan mein bhi har aatma ek saajan ki sajni hai,arthaat suhaagin hai। sada apne suhaag ke tilak ko dekhte ho?sada ek ki hi lagan mein magan rahne ki nishaani, smriti ka tilak arthaat suhaag ka tilak hai। agar tilak mit jaata hai to goya apne suhaag ko mita dete hain।

apne aap se poochho ki main sada suhaagin hoon? sada suhaagin ek shvaas va ek pal bhi saath nahin chhodti hai। sada suhaagin ke man ke bol hain - ‘saath rahenge,saath jeeyenge, saath marenge।’ sada suhaagin ke naynon mein, mukh mein saajan ki soorat aur seerat samaai hui hoti, kaanon mein unke bol hi sada sunne mein aate hain। jaise bhakti mein anhad shabd sunne ke abhyaasi hote hain। bahut prayatna ke baad ek baar bhi agar shabd sunaai dete to apni bhakti ko saphal samajhte hain। yeh sab bhakti ki reeti-rasma is samay ke practical life (Practical Life;vyavhaarik jeevan) se kaapi ki hai। sada suhaagin arthaat jinke kaanon mein anaadi mahaamantra ‘manmanaabhav’ka svar goonjata rahega। sada yeh anubhav karenge ki baap yeh mahaamantra baar-baar sunaate hue smriti dila rahe hain। chalte-phirte yahi anhad arthaat avinaashi bol baap ke sammukh sunne ka anubhav karenge aur koi bhi aatmaon ke bol sunte hue bhi nahin sunenge। bas ‘tumheen se boloon, tumheen se sunoon va tumhaara sunaaya hi boloon’ - aisi stage sada suhaagin ki hi hoti hai। aise sada suhaagin sankalp mein bhi anya aatma prati ek second bhi smriti mein nahin laayegi arthaat sankalp mein bhi kisi dehdhaari ke jhukaav mein nahin aayegi। lagaav to badi baat hain, jhukaav bhi nahin। jaise laukik jeevan mein bhi par puroosh prati sankalp karna va svapna mein bhi aana suhaagin ke liye mahaapaap gina jaata hai,aise hi alaukik jeevan mein bhi agar sankalp maatra bhi, svapna maatra bhi koi dehdhaari aatma taraph jhukaav hua to sada suhaagin ke liye mahaapaap gina jaata hai। to ‘sada suhaagin arthaat ek baap doosra na koi।’ aise suhaag ka tilak laga hua hai?maaya tilak mita to nahin deti?sada suhaag ke saath sada bhaagya। sirf suhaag nahin lekin bhaagya bhi arthaat - bhaagyavaan ho। sada bhaagyavaan ki nishaani hai light ka crown। jaise laukik duniya mein bhaagya ki nishaani raajya arthaat raajaai hoti hai,aur raajaai ki nishaani taaj hota hai, aise eeshvareey bhaagya ki nishaani light ka crown hai। us taaj ki praapti ka aadhaar hai pyooriti (Purity;pavitrata) aur sarva praapti। sampoorn pyooriti arthaat mansa mein bhi kisi ek vikaar ka ansh bhi na ho। aur sarva praapti arthaat gyaan, sarva gun aur sarva shaktiyon ki praapti। agar koi bhi praapti ki kami hai to light ka crown spashta dikhaai nahin dega; apvitrata aur apraapti ke baadlon mein chhipa hua dikhaai dega। svayan ko sada light-aatmik roop anubhav nahin karega। karma mein bhi apne ko light (Light;halka) mahsoos nahin karega। baar-baar mehnat ke baad va attention (Attention;dhyaan) rakhne ke abhyaas ke baad alpa samay ke liye svayan ko double light anubhav karega। jaise hi sochega ki main aatma light hoon, to aatma ke bajaae shareer arthaat deh apne ko anubhav karega। bhaagya ka aadhaar sarva praaptiyaan hain। sarva praaptiyon ki nishaani hai ‘avinaashi khushi।’ sada bhaagyavaan sada khush hoga। bhaagya kam to khushi bhi kam, khushi kam arthaat sada bhaagyavaan nahin। to samjha?sada suhaagin aur sada bhaagin arthaat bhaagyavaan ki nishaaniyaan kya hain? ab to sab baaten saamne rakhte hue svayan ko chaik karo ki main kaun hoon?achha।

sada suhaag ke tilak dhaari shreshtha bhaagyavaan, sarva praapti swaroop sada baap ke saathi aisi shreshtha aatmaon ko baap-daada ka yaad-pyaar aur namaste।

deedi ji ke saath:-

aise sada suhaagin aur sada bhaagayvaan aur sampoorn bhaagyavaan kitne honge? nirantar double light aur nirantar sarva praapti sampanna sampoorn pavitra hon,aise kitne manke honge?jo anguliyon par ginti jitne! aise ratnon ki hi vishesh pooja hoti hai। vishosh nau ratnon ki pooja hoti hai na। to jo achhi quality (Quality;prakaar) ka ratna hota hai,us ek ratna mein ek rang ka hote hue bhi sab rang dikhaai denge। jaise saphed heera hota hai, jo badhiya heera hoga, chamakta hua phlaales (Flawless;daag rahit) dikhaai dega। dhyaan se dekhenge to saphed hote hue bhi usmein sab rang dikhaai denge। iska kaaran kya hai? sarva shaktiyon ke sampanna ki nishaani yeh hai। sarva shaktiyaan bhinna-bhinna rang ke roop mein dikhaai deti hain। woh science (vigyaan) ka hisaab aur yahaan hai silence (Silence) dvaara sarva praaptiyaan। jaise varsha ke baad indra dhanush dikhaai deta hai, to usmein bhi sab rang dikhaai dete hain yeh bhi gyaan varsha ke baad। varsha ka phal sarva praapti swaroop। to aisa shreshtha heera va ratna sarva praapti swaroop hone kaaran jo shakti paane chaahe woh us ratna dvaara praapta kar sakte hain। to aise ratna kitne honge?nau ratnon ka poojan, nirvighna hone ke liye vishesh hota hai। koi ke oopar vishesh vighna aata hai, to nau ratnon ka poojan karte hain। to itne nirvighna bane ho? har ratna sampanna hota hai, lekin phir bhi har ratna ki mukhya visheshta apni hoti hai। isliye nau ratnon ki ikatthi pooja bhi hoti hai, aur alag-alag bhi vishesh koi vighna arth koi ratna gaaya hua hota hai। maano dhan ki samasya va vighna hai to dhan ki praapti ke liye va apraapti ka vighna mitaane ke liye vishesh ratna bhi hota hai। beemaari jyaada mark li hongi to uska yaadgaar phir ab tak bhi apne haath mein ring (angoothi) banaakar pahante hain ya gale mein locket bana kar daalte hain। to yeh sab hisaab vartamaan samay ke praapti ke hain। to aise kitne honge?ginti karne mein aate hain?naam bataane ke nahin dikhaane ke hain। agar announce (Announce) bhi kare aur bhavishya mein woh prasiddha bhi honge lekin abhi sampoorn stage par na dekh karke question (Question;prashn)karenge yeh kyon, yeh kaise। isliye baap bhi bata nahin sakta। dikha sakte hain - yeh is ginti mein hain। yeh ho sakta hai। bataane ki baat nahin hai। ab ek ka bhi naam bataaven to dekhna kitne question uthte। ismen kya hai, hamaare mein kya nahin hai। ismen to yeh hai। kai question mein samay vyartha ganvaae,yeh bhi baap nahin chaahte। baaki kalpa-kalpa ke prasiddha hue ratna, kalpa pahle muvaaphik prasiddha zaroor honge। aajkal naam nahin, kaam chaahte hain। abhi to harek ke andar yeh lakshya hai ki main hi apne ko kyon nahin itna aage badha kar yogya banaaoon। achha।

vishesh jo mele ki seva par upasthit hain - unheen ko yaad dena। kyonki yeh seva dvaara baap se milna hi hai। yogayukta ho suna hai, isliye baap-daada sevaadhaariyon ko sada sammukh hi dekhte hain। aise sevaadhaari kabhi bhi apne ko door nahin samjhenge। sammukh hi samjhenge। achha।

anya daadiyon ke saath:-

door-door se apne janmabhoomi par aae hain - braahmanon ki janmabhoomi ‘madhuban’hai na। aise samajhte ho ki apni janmabhoomi par aae hain। janmabhoomi ka bahut mahatva rakhte hain। aur yeh phir alaukik janmabhoomi hai। is alaukik janmabhoomi par aane se hi laukikpan svatah hi bhool jaata hai। kyonki‘jaise dharni vaise karni’ yeh gaayan hai। ‘jaisa sang vaisa rang,jaisa anna vesa man’ gaaya hua hai। vaise hi, jaise dharni vaisi karni। agar koi tamoguni dharni hai to karni bhi aisi ho jaati hai। dharni ka prabhaav karma aur sanskaar par pad jaata hai। jaise mandir mein jaate hain to bhoomi ka hi prabhaav hota hai na। agar mandir ki bhoomi par kisi bura sankalp aave to woh apne ko bahut paapi samjhega। vaise agar bura sankalp aata to bura samajhte। to yeh hai alaukik bhoomi laukikta smriti mein bhi nahin aayegi। nirantar karmayogi ho jaayenge। isliye baap-daada sadaiv kehte hain ki kahaan bhi rehte ho lekin apne ko sada paramdham nivaasi va madhuban nivsi samjho। niraakaar sthiti ke hisaab se paramdham nivaasi, saakaar sthiti ke hisaab se madhuban nivaasi। madhuban kahne se hi vairaagya vritti aur madhurta donon hi aa jaati hai। sthiti mein behad ki vairaag vritti aur samparka mein madhurta donon hi chaahiye। sthaan se sthiti ka connection (Connection;sambandh) hai।

sabhi behad ke vairaagi bane ho ki abhi kahaan lagaav hai? behad ke vairaagi ka kahaan bhi lagaav va jhukaav nahin hoga। uska sadaiv is puraani duniya se kinaara hoga। behad ke vairaagi tab ban sakenge jab baap ko hi apna sansaar samjhenge। baap hi sansaar hai to jab baap mein sansaar dekhenge anubhav karenge to baaki raha hi kya? automatic (svatah) vairaag aa jaaega na। baap hi mera sansaar hai to sansaar mein hi rahenge;doosre mein jaaenge hi nahin to kinaara ho jaaega। sansaar mein vyakti va vaibhav sab aa jaata hai to baap ko hi apna sansaar banaaya hai ki aage koi sansaar hai? koi sambandh va koi sampatti hai kya? baap ki sampatti so apni sampatti। to isi smriti mein rahne se automatic behad ke vairaagi ho jaayenge। koi ko dekhte hue bhi nahin dekhenge। dikhaai hi nahin dekhenge। dikhaai hi nahin dega। achha।

‘smriti mein rahne se samarthi aati hai।’ agar samarthi hogi to koi bhi paristhiti svasthiti ko dagmag nahin karegi। pareekshaaon ko ek khel samajhkar chalenge। agar khel mein ya naatak mein kisi prakaar ki paristhiti dekhte to dagmag hote hain kya?koi mare va kuchh bhi ho lekin sthiti dagmag nahin hogi। kyonki samajhte hain yeh khel hai। aise hi paristhitiyon ko ek part samjho। paristhiti ke part ko saakshi ho dekhne se dagmag nahin honge,murjhaayenge nahin, maja aaega। murjhaate tab hain jab drama ki point ko bhool jaate hain।