Avyakt murli for Tuesday 24 May 1977

>

24-05-77om shanti avyakt baapdaadaamdhuban

baap ke direct bachche hi double pooja ke adhikaari bante hain

padmaapadma bhaagyashaali, direct baap ki pahli rachna, double pooja ke adhikaari,baap ke sir ke taajdhaari shreshtha aatmaon prati baba bole:-

baapdaada harek bachche ke bhaagya ko dekh harshit ho rahe hain। saare vishwa ke andar koton mein koi gaai hui aatmaaen kitni thodi si hain, jinhonne baap ko paaya hai। na sirf jaana,lekin jaanne ke saath-saath, jisko paana tha, vo pa liya। aise baap ke ati snehi,sahayogi bachchon ke bhaagya ko dekh rahe the। vaise sarva aatmaaen bachche hain, lekin aap aatmaaen direct bachche ho। shiv vanshi brahmaakumaar aur kumaariyaan ho। saare vishwa mein jo bhi anya aatmaaen dharma ke kshetra mein va raajya ke kshetra mein mahaan va naami-graami bane hain, dharma-pitaaen bane hain, jagat guru kahlaane vaale bane hain;lekin maat-pita ke sambandh se,alaukik janma aur paalna kisi ko bhi praapta nahin hota hai। alaukik maata-pita ka anubhav svapna mein bhi nahin karte। aur aap shreshtha aatmaaen va padmaapadmapti aatmaaen har roj maat-pita ki va sarva sambandhon ki yaad pyaar lene ke paatra ho। har roj yaadapyaar milti hai na। na sirf yaadapyaar, lekin svayan sarvashaktivaan baap, aap bachchon ka sevak ban har kadam mein saath nibhaata hai। ati sneh se sir ka taaj banaakar naynon ka sitaara banaakar,saath le jaate hain। aisa bhaagya jagat guru va dharmapita ka nahin hain,kyonki aap shreshtha aatmaaen sammukh baap ki‘shreemat’lene vaali ho। prerna dvaara va touching(Touching;prerna) dvaara nahin, ‘mukh vanshaavli’ ho। direct mukh dvaara sunte ho। aisa bhaagya kin aatmaon ka hai? majority (Majority;adhiktar) bhaaratvaasi gareeb,bholi si aatmaon ka hai। jo na ummeedvaar the ki humein kab baap mil sakta hai। itna shreshtha bhaagya, phir aise naaummeedvaar ko hi mila hai। jab koi naaummeedvaar se ummeedvaar banta hai va asambhav se sambhav baat hoti hai, to kitna nasha aur khushi hoti hai! aisa bhaagya apna sadaiv smriti mein rehta hai?

saare drama ke andar aur dharma ki aatmaon ko dekho aur apne ko dekho to mahaan antar hai। pahli baat sunaai ki direct bachche ho। maata-pita va sarva sambandhon ka sukh ka anubhav karne vaale, direct bachche hone ke kaaran, vishwa ke raajya ka varsa sahaj praapta ho jaata hai। srishti ke aadikaal satayug arthaat svarga ki sato pradhaan, sampoorn praapti aap aatmaon ko hi praapta hoti hai। aur sarva aatmaaen aati hi madhyakaal mein hain। aap shreshtha aatmaon ka bhoga hua sukh va raajya rajo pradhaan roop mein praapta karte hain। jaise aap aatmaon ko dharma aur raajya donon praapti hain,lekin anya aatmaon ko dharma hai to raajya nahin,raajya hai to dharma nahin। kyonki dvaapar yug se dharma aur raajya ka donon pur alag-alag ho jaate hain। jiski nishaani saare drama ke andar double taajdhaari sirf aap ho। aur koi dekha hai? aur bhi visheshtaaen hain। sampoorn praapti arthaat tan,man, dhan,sambandh aur prakriti ke sarva sukh, jismen apraapta koi vastu nahin, duhkh ka naam-nishaan nahin - aisi shreshtha praapti anya koi aatma ko praapta nahin hoti hai। direct bachche hone ke kaaran, oonch te oonch baap ki santaan hone ke kaaran, param poojya pita ki santaan hone kaaran aap aatmaaen bhi double roop mein pooji jaati ho। ek saaligraam ke roop mein, doosra devi va devta ke roop mein। aise vidhi poorvak poojya, dharmapita va koi bhi naami-graami aatma nahin banti। kaaran? kyonki tum direct vanshaavli ho। samjha kitne bhaagyashaali ho,jo svayan bhagwan aapka bhaagya baala karte hain! to sada apne aise bhaagya ko smriti mein rakho। kamzori ke geet nahin gaao। bhakta kamzori ke geet gaate hain aur bachche bhaagya ke geet gaate hain। to apne aap se poochho ki bhakta hoon va bachcha hoon? samjha apne shreshtha bhaagya ko? achha।

aise padmaapadma bhaagyashaali, direct baap ki pahli rachna, sarva sambandhon ke sukh ke adhikaari,sarva praapti ke adhikaari, raajyabhaag ke adhikaari,double pooja ke adhikaari, baap ke bhi sir ke taajdhaari, aisi shreshtha aatmaon ko baap-daada ka yaad-pyaar aur namaste।