Avyakt murli for Wednesday 14 November 1979

>

14-11-79om shanti avyakt baapdaadaamdhuban

brahman jeevan ki nishaani hai - sada khushi ki jhalak

ek ka anginat return dene vaale sada daata bholaanaath shiv baba bole :-

‘‘aaj baap-daada sarva bachchon ki antim stage arthaat vikarmaajeet stage, vikalpa ya vyartha sankalp-mukta stage dekh rahe hain। is antim stage tak pahunchne ke liye purooshaartha to sab kar rahe hain lekin purushaartheeyon mein do prakaar ke bachche dekhe। ek ve jo purooshaartha karte hue purooshaartha ki praarabdha arthaat praapti saath-saath anubhav karte chal rahe hain। aur doosre,jo sirf purooshaartha mein hi lage hue hain। mehnat jyaada, praapti ka anubhav kam hota hai, isliye chalte-chalte thak bhi jaate hain। yathaartha purushaarthi kabhi bhi thakaavat mahsoos nahin karte। kaaran? donon ke purooshaartha mein sirf ek baat samajhne ka antar hain; jisse ve mehnat mein rehte aur doosre mohabbat mein masta rehte hain। kaun se sankalp ka antar hai, woh jaante ho? chhota sa hi antar hai। ek samajhte hain ki ham svayan chal rahe hain, chalna padta hai, saamna karna padta hai aur doosre hain jo sadaiv sankalp se bhi surrender hain, isliye woh sadaiv yeh anubhav karte ki humein baap-daada chala rahe hain। mehnat ke paanv se nahin lekin sneh ki godi mein chalte rehte hain। isliye ve sneh ke paanv se chalte, jismen thakaavat nahin hoti। sneh ki godi va jholi mein sarva praaptiyon ki anubhooti hone ke kaaran woh chalte nahin, lekin udte rehte hain। sada khushi mein, aantarik sukh mein, sarva shaktiyon se udte rehte hain।’’

abhi apne se poochho ki main kaun? sangamayugi brahman bachche jiyenge, chalenge har kadam mein sneh ki godi mein। brahman jeevan ki nishaani hai - sada khushi ki jhalak pratyaksha roop mein dikhaai degi। khushi nahin to brahman jeevan bhi nahin।

sangamayug ka mahatva

kai bachche samajhte hain ki sangamayug purushaarthi jeevan ka hai aur bhavishya janma praarabdha ka janma hai। ve samajhte hain ki jo baap-daada ka vaayda hai - ek do aur laakh lo, yeh vaayda bhavishya ke liye hai। lekin nahin। yeh vaayda sangamayug ka hi hai। jaise sarva shreshtha samay,sarva shreshtha janma,sarvashreshtha title is samay ke hain, vaise sarva praaptiyon ka anubhav, sab vaaydon ki praapti is samay hoti hai। bhavishya to hai hi lekin bhavishya se bhi vartamaan shreshtha hai। is samay hi ek kadam arthaat ek sankalp bachche karte hain ki baba ham aapke hain aur return mein baap har sankalp,bol aur karma mein anubhav karaate hain main aapka hoon। arthaat baap aapka hai। ek sankalp ka return saare sangamayug ki jeevan mein baap aapka hi ho jaata hai। ek ka sirf laakh guna nahin milta! jab chaaho, jaise chaaho, jo chaaho, baap servant roop mein baandhe hue hain। to ek ka laakh guna to kya lekin anginat baar ka return milta hai। vartamaan samay ka mahatva chalte-chalte bhool jaate ho। is sangamayug ko vardaan hai - kaun sa? svayan vardaata hi aapka hai। jab vardaata hi aapka hai, to baaki kya raha?beej aapke haath mein hain,jis beej dvaara second mein jo chaaho woh le sakte ho। sirf sankalp karne ki baat hai। shakti chaahiye, sukh chaahiye, aananda chaahiye, sab aapke liye ji hazoor hain kyonki hajoor hi aapka hai। jaise sthool sevaadhaari bulaane se haazar ho jaate hain vaise yeh sarva praaptiyaan sankalp se haazar ho jaavengi। lekin hazoor aapka hai to yeh sab haazar hain। beej aapka hai to yeh sab phal aapke hain।

khushi gum hone ka kaaran

chalte-chalte karte kya ho! do laddu haath mein uthaane ki koshish karte ho। lene ke liye to taiyaar ho jaate ho lekin chhodne vaali cheez bhi phir le lete ho। isliye vistaar mein jaane se saar ko chhod dete ho। beech mein se beej khisak jaata hai, yeh maaloom nahin padta isliye phir khaali ho jaate ho aur mehnat karte ho apne ko bharpoor karne ki, lekin beej chhoot jaane ke kaaran pratyakshaphal ki praapti ho nahin paati hai isliye thak jaate ho। bhavishya ke dilaase se apne ko chalaate rehte ho। pratyakshaphal ki bajaay bhavishya phal ke ummeedvaar bankar chalte ho,isliye khushi ki jhalak sada nazar nahin aati। mehnat ki rekhaayen jyaada nazar aati hain, praapti ki rekhaayen kam nazar aati hain। tyaag ki mahsoosta jyaada hoti hai bhaagya ki mahsoosta kam hoti hai।

ab kya karna hai?

vartamaan samay mein jo aapke samparka mein aate hain, ve log bhi samay prati samay ab bhi yeh bol bolte hain ki aap logon ka tyaag bahut bada hai lekin ab yeh bol kahen ki aap logon ka bhaagya bahut bada hai। tyaag unko dikhaai deta hai lekin bhaagya abhi tak dikhaai nahin deta hai। bhaagya abhi gupta hai। tyaag ki mahima bahut karte hain, itni hi bhaagya ki mahima karen to second mein svayan ka bhi bhaagya khul jaayega। tyaag dekh karke soch mein pad jaate hain। bhaagya dekhkar svayan bhi bhaagyashaali ban jaavenge। ab samjha,kya change karna hai?

mehnat se nikal sneh ki, mohabbat ki godi mein aa jaao। chal rahe hain - nahin, lekin chala rahe hain। (light banda ho gai) bachche andhakaar mein rehte hain to baap ko bhi anubhav hona chaahiye ki aisi duniya mein bachche rehte hain, yeh practical anubhav hota hai।

achha; ab samjha kya karna hai? bhavishya phal ke pahle pratyaksha phal khaao। sada hazoor ko buddhi mein haazar rakho to sarva praaptiyaan bhi sada ji hazoor karengi। agar hazoor haazar hai to sarva praaptiyaan chumbak ke samaan aape hi aakarshit hoti aavengi। samjha?baap-daada bachchon ki mehnat dekh sahan nahin kar sakte। aisi shreshtha aatmaayen, direct beej se nikle hue tana swaroop bachche ho। aise shreshtha bachchon ko sarva sahaj praaptiyon ka anubhvi banna hai। achha?

aise sarva sahaj praaptivaan, sada saagar ke samaan sarva mein sampanna, sada beej ko saath rakhne vaale, beejroop stage mein sthit rahne vaale, vikarmaajeet,vikalpa jeet aise lakshya ko paane vaale, sada nishchay buddhi aur nishchinta rahne vaale bachchon ko baap-daada ka yaad, pyaar aur namaste।

(party se avyakt baap-daada ki madhur mulaakaat)

nepaal - sabhi bahut door-door se sneh ke aadhaar par khinche hue aa gaye। jaise bachche sneh ki dor mein bandhe hue apne ghar pahunch gaye hain, aise baap bhi itna hi bachchon ko sneh ka response de rahe hain। sneh ka response kya hai? sneh ka response hain sada athak,sada saphaltaamoorta bhav। kabhi bhi maaya aaye to yeh sthaan, yeh din, yeh ghadi, yeh baap ka vardaan yaad rakhna to vardaan se maaya moorchhit ho jaayegi। aap logon ke desh mein bhi aise jantra-mantra bahut karte hain na। to aap bhi is jantra-mantra se maaya ko moorchhit kar dena। baap ne bachchon ko janmate hi kaun-sa vardaan diya hai?amarnaath baap ka pahla vardaan hai - bachche amarbhav! amarnaath ki katha sunne vaale aap sab ho na? yeh khushi hoti hai ki ham sabka yaadgaar ab tak bhi chal raha hai?kalpa pahle ka yaadgaar abhi bhi dekh rahe ho। amarnaath mein aapka hi yaadgaar hai। ek-ek bachche ki kitni mahima karen। jitni aap sabne dvaapar se baap ki mahima gaai hai utni baap abhi aap bachchon ki gaate hain। roz naya title dete hain to mahima hui na। bahut-bahut lucky ho। jin maataaon ko duniya vaalon ne thukraaya unhein baap ne thaakur bana diya। to maataaon ko to bahut khushi honi chaahiye। khushi-khushi mein chalne se thakaavat feel nahin hogi।

har brahman bachchon ke ghar mein baap ka yaadgaar (geeta paathshaala) zaroor honi chaahiye। jaise ghar-ghar mein raaja-raani ka photo lagaate hain na। to braahmanon ke ghar mein yeh vishesh yaadgaar ho। jo bhi aaye usko baap ka parichay dete raho। achha।

aasaam -aasaam vaale to bahut badi aasaami honge! bade aadmi ko badi aasaami kehte hain। to aap bade se bade log badi aasaami ho। woh log akhbaar mein nikaalte hain ki kaun-kaun bade hain। hu is hu? aap log to janma-janmaantar ke liye poojya bante ho। woh to aaj hu is hu ki list mein hain kal saadhaaran praja ki list mein hain। aap sada se isi list mein ho। sada ke poojya ho। aadha kalpa chetna mein poojya ke roop mein ho, aadha kalpa jad chitron ke roop mein pooje jaate ho। to saara hi kalpa hu is hu hue। aisa nasha rehta hai ki ham bahut bade log hain?kisi bhi prakaar ki samasya kamzor to nahin banaati। mahaabeer ho? baap-daada bhi bachchon ko dekh khush hote hain ki kaise kalpa pahle vaala apna bhaagya le rahe hain। kalpa-kalpa ke takdeervaan ho। aisi takdeer kabhi kisi ki ban bhi nahin sakti। to yeh nasha aur khushi nirantar rahe।

bihaar - sada bahaar mein rahne vaala bihaar hai। sadaiv apne ko aise anubhav karte ho jaise oopar se avatrit hokar saakaar srishti mein seva ke liye aaye hue hain। jo avtaar hote hain unko kya yaad rehta hai? jis kartavya ke liye avatrit hote hain vahi kartavya yaad rehta hai। avtaar aate hi hain koi mahaan kartavya karne ke liye। to aap bhi kislie avatrit hue ho?vishwa-parivartan ke kartavya ke liye। to sada yeh yaad rehta hai?kahin bhi rehte aapka mool kartavya vishwa-parivartan ka hai। chaahe koi bhi dhandha karo, ghar ka kaarya karo lekin yaad kya rehna chaahiye -parivaar ya parivartan?parivaar mein rehte ho to kis lakshya se rehte ho? yahi lakshya rehta hai na ki inko bhi parivartan karna hai। grihasthi hokar nahin, sevaadhaari hokar rehte ho! sevaadhaari ko sev hi yaad rehti, baaki sab kaam nimitta maatra hain। asli kaarya hai vishwa-parivartan ka। vishwa parivartan vahi kar sakte hain jo pahle svayan ka parirvatan karte hain। pahle khud ko udaahran banna padta hai phir aapko dekhkar sab karne lag padenge। to sva parivartan kar liya hai na?baaki jo thoda samay raha hai woh kislie?seva ke liye। anya ki seva karte sva ki seva ho hi jaayegi। avtaar hoon yeh yaad rahe to jaisi smriti hogi vaisa hi karma hoga। to bihaar vaale bahaari mausam laane vaale ho। aajkal to desh ki haalat kya hai? kahaan sookha hai kahaan bahut paani hai, lekin abhi kya karenge? sada bahaar laayenge। aapka aisa kartavya dekh sab aapko aasheervaad denge, sab namaskaar karne aayenge। abhi to koi- koi gaali bhi dete hain kyonki gupta ho na। jab pratyaksha honge to aape hi sab namaskaar karne ke liye aayenge। jitni gaaliyaan dete hain utne pushpa chadhaayenge। ek gaali ke bajaae kitni baar phoolon ki maalaayen chadhaani padegi। jaise baap ne bahut gaaliyaan khaai to poojan bhi itna hi hota hai na। aise jitni gaali khaayenge utne bade poojya banenge। isliye ghabraana nahin। maalaayen taiyaar ho rahi hain।

bangaal -(kalkatta) kalkatta nivaasi kya plan bana rahe hain? mele to bahut kiye abhi kya socha hai?abhi har varsha mein koi naya plan banaana chaahiye।

kalkatta bhaktimaarga mein bhi mashhoor hai vahaan ki visheshta hai bali chadhne ki। jaise bhaktimaarga ki bali mashhoor hai vaise gyaan mein mahaabli chadhne vaale jyaada honge na। ek taraph bhakti ka force doosri taraph gyaan ka force। mele ke saath abhi aur koi vidhi apnaao। jitna bada kalkatta hai utni badi aavaaz ho। puraani gaddi ka sthaan hai to aur koi oonchi aavaaz nikaalo। achha - harek roz apni checking kar teevragti ko praapta ho rahe ho। sangamayug par hi chadhti kala ka chance hai। roz apni checking karo। sirf chal rahe hain, yeh nahin lekin kis gati se chal rahe hain। agar teevra gati nahin hogi to first janma mein nahin pahunch sakenge। har kadam mein padmon ki kamaai jama karte padmaapdam bhaagyashaali bano। saadhaaran checking nahin lekin abhi maheen checking chaahiye।

yeh marjeeva janma hai hi pratyakshaphal khaane ke liye, kiya aur praapti hui। ab mehnat ki jaroorat nahin,phal khaane ka samay hai। ateeindriy sukh ki jeevan mein rahne ka samay hai। to ateeindriy sukh ke jhoole mein sada jhulne vaale ho na?jo abhi sada is jhoole mein jhoolte vahi shreekrishna ke saath-saath jhoolenge। aisa purooshaartha hai na? isko kaha jaata hai teevra purooshaartha।

taamilnaadu -sangamayug par baap dvaara jo khazaane mile hain un sabhi khazaanon ko achhi tarah se jama kiya hai! maaya khazaane ko loot to nahin leti। pahle bhi sunaaya tha ki double laak laga do ek baap ki yaad ki aur doosri seva, yeh double lock lagaane se kabhi bhi maaya khazaana loot nahin sakti। sada bharpoor rahenge। amritvele svayan ko master sarvashaktivaan ka tilak do। saara din tilakdhaari rahne se kabhi bhi maaya saamna nahin karengi। tilak aapke vijay ki nishaani hai। amritvele vardaanon ka samay hai, jitna amritvele ka mahatva rakhenge utna mahaan banenge।