Avyakt murli for Tuesday 7 April 1981

>

07-04-81om shanti avyakt baapdaada madhuban

"manan shakti dvaara sarvashaktiyon ke swaroop ki anubhooti"

aaj baapdaada apne sarva kalpa pahle vaale sikeeldhe bachchon ko dekh harshit ho rahe hain। jaise baap ati sneh se bachchon ko sada yaad karte hain vaise hi bachche bhi sada baap ko yaad karne va baap ki shreshtha mat par chalne mein din-raat lage hue hain। baapdaada bachchon ki lagan, bachchon ki dil va jaan,sik va prem se sada seva mein lagan dekh sada aise bachchon ko aaphreen dete hain। bachchon ka bhaagya ke peechhe tyaag dekh baapdaada sada tyaag par mubaarak dete hain। sarva bachchon ka ek hi sankalp - baap ko pratyaksha karne va svayan ko sampanna banaane ka - yeh bhi dekh baapdaada khush hote hain। kya the aur kya ban gaye - is antar ko sada smriti mein rakhte hue sabhi isi eeshvareey nashe mein rehte hain। isko dekh baapdaada bhi phakhur se kehte hain - ‘‘vaah sangamayugi bachche, vaah!''itne takdeervaan jo ab last janma tak bhi aapke takdeer ki tasveer mastak mein mahima dvaara, mukh mein geeton dvaara aur haathon se chitra dvaara,naynon mein sneh dvaara takdeer ki tasveer kheenchate rehte hain। ab tak bhi aap shreshtha aatmaon ke shubh ghadi ko yaad kar rahe hain ki phir se kab aayenge aahvaan ki dhoom machaaye hue hain। aise tum takdeervaan ho jo svayan baap bhi aapke takdeer ke gun gaate hain। antim bhakta to aapke charnon ko bhi poojte rehte hain। sirf aapse kya maangaten hai ki apne charnon mein le lo। itni mahaan aatmaayen ho,isliye baapdaada bhi dekh harshit hote hain। sada apna aisa shreshtha swaroop, shreshtha takdeer ki tasveer smriti mein rakho। isse kya hoga samartha smriti dvaara,sampanna chitra dvaara charitra bhi sada shreshtha hi honge। kaha jaata hai - ‘jaisa chitra vaisa charitra'। jaisi smriti vaisi sthiti। to sada samartha smriti rakho to sthiti svatah hi samartha ho jaayegi। sada apna sampoorn chitra saamne rakho jismen sarvagun, sarva shaktiyaan sab samaai hui hain। aisa chitra rakhne se svatah hi charitra shreshtha hoga। mehnat karne ki jaroorat hi nahin hogi। mehnat tak karni padti hai jab manan shakti ki kami hoti hai। saara din yahi manan karte raho,apna shreshtha chitra sada saamne rakho to manan shakti se mehnat samaapta ho jaayegi। suna bhi bahut hai, varnan bhi bahut karte ho phir bhi chalte-chalte kabhi-kabhi apne ko nirbal kyon anubhav karte ho, mehnat anubhav kyon karte ho? mushkil hai - yeh sankalp kyon aata hai?iska kaaran?sunne baad manan nahin karte। jaise shareer ki shakti aavashyak hai, vaise aatma ko shaktishaali banaane ke liye ‘manan shakti'itni hi aavashyak hai। manan shakti se baap dvaara suna hua gyaan sva ka anubhav ban jaata hai। jaise paachan shakti dvaara bhojan shareer ki shakti, khoon ke roop mein sama jaata hai। bhojan ki shakti apne shareer ki shakti ban jaati hai। alag nahin rehti। aise gyaan ki har point manan shakti dvaara sva ki shakti ban jaati hai। jaise aatma ki pahli point sunne ke baad manan shakti dvaara smriti swaroop ban jaane kaaran,smriti samartha bana deti hai - ‘‘main hoon hi maalik''। yeh anubhav samartha swaroop bana deta hai। lekin kese bana? manan shakti ke aadhaar par। to aatma ki pahli point anubhav swaroop ho gai na। isi prakaar drama ki point - sirf drama hai, yeh kahne va sunne maatra nahin lekin chalte-phirte apne ko hero actor anubhav karte ho to manan shakti dvaara anubhav swaroop ho jaana yahi vishesh aatmik shakti hai। sabse bade te badi shakti anubhav-swaroop hai।

anubhvi sada anubhav ki athaarti se chalte, anubhvi kabhi dhokha nahin kha sakte। anubhvi kisi ke dagmag karne se,suni sunaai se vichlit nahin ho sakte। anubhvi ka bol hajaar shabdon se bhi jyaada moolyavaan hota hai। anubhvi sada apne anubhvon ke khazaanon se sampanna rehte hain। aise manan shakti dvaara har point ke anubhvi sada shaktishaali,maayaaprooph,vighna proof, sada angad ke samaan hilaane vaala,na ki hilne vaala hota। to samjha abhi kya karna hai?

jaise shareer ki sarva beemaariyon ka kaaran koi na koi vitaamin ki kami hoti hai to aatma ki kamjori ka kaaran bhi manan shakti dvaara har point ke anubhav ki vitaamin ki kami hai। jaise usmein bhi variety A.bi.si. vitaamin hain na। to yahaan bhi kisi na kisi anubhav ke vitaamin ki kami hai, kuchh bhi samajh lo। A aatma ki vitaamin, vitaamin bi baap ki। vitaamin si drama ki, creation va saarkil kaho। aise kuchh bhi bana lo। ismen to hoshiyaar ho। to check karo kaun se vitaamin ki kami hai। aatma ki anubhooti ki kami hai, parmaatma sambandh ki kami hai, drama ke guhyata ke anubhooti ki kami hai। samparka mein aane ke visheshtaaon ki anubhooti ki kami hai। sarva shaktiyon ke swaroop ke anubhooti ki kami hai। aur vahi kami manan shakti dvaara bharo। shrota swaroop va bhaashan karta swaroop -sirf yahaan tak aatma shaktishaali nahin ban sakegi। gyaan swaroop arthaat anubhav swaroop। anubhvon ko badhaao aur uska aadhaar hai manan shakti। manan vaala svatah hi magan rehta hai। magan avastha mein yog lagaana nahin padta lekin nirantar laga hua hi anubhav karta। mehnat nahin karni padegi। magan arthaat muhabbat ke saagar mein samaaya hua। aise samaaya hua jo koi alag kar hi nahin sakta। to mehnat se bhi chhooto। baaharmukhta ko chhodo to mehnat se chhooto। aur anubhvon ke antarmukhta swaroop mein sada sama jaao। anubhvon ka bhi saagar hai। ek do anubhav nahin athaah hain। ek do anubhav kar liya to anubhav ke taalaab mein nahin nahaao। saagar ke bachche anubhvon ke saagar mein sama jaao। taalaab ke bachche to nahin ho na! yeh dharmapitaayen,mahaan aatmaayen kahlaane vaale,yeh hain taalaab। taalaab se to nikal aaye na। anek taalaabon ka paani pi liya। ab to ek saagar mein sama gaye na।

aise sada samartha aatmaon ko, sada sarva anubhvon ke saagar mein samaai hui aatmaon ko,sada apna sampoorn chitra aur shreshtha charitravaan aatmaon ko, sada shreshtha bhaagyavaan aatmaon ko ,sada antarmukhi ,sarva ko sukhi banaane vaali aatmaon ko, aise double hero aatmaon ko baapdaada ka yaad pyaar aur namaste।

party se - sada svayan baap ke sameep ratna samajhte ho? sameep ratna ki nishaani kya hogi? sameep arthaat samaan। sameep arthaat sang mein rahne vaale। sang mein rahne se kya hota hai? woh rang lag jaata hai na। jo sada baap ke sameep arthaat sang mein rahne vaale hain unko baap ka rang lagega to baap samaan ban jaayenge। sameep arthaat samaan aise anubhav karte ho? har gun ko saamne rakhte hue check karo ki kya-kya baap samaan hai। har shakti ko saamne rakh check karo ki kis shakti mein samaan bane hain। aapka title hi hai - master sarvagun sampanna, master sarva shaktivaan। to sada yeh title yaad rehta hai?sarvashaktiyaan aa gai arthaat vijayi ho gaye,phir kabhi bhi haar ho nahin sakti। jo baap ke gale ka haar ban gaye unki kabhi bhi haar nahin ho sakti। to sada yeh smriti mein rakho ki main baap ke gale ka haar hoon, isse maaya se haar khaana samaapta ho jaayega। haar khilaane vaale honge,khaane vaale nahin। aisa nasha rehta hai? hanumaan ko mahaaveer kehte hain na! mahaaveer ne kya kiya? lanka ko jala diya। khud nahin jala, poonchh dvaara lanka jalaai। to lanka ko jalaane vaale mahaaveer ho na! maaya adhikaar samajhkar aaye lekin aap uske adhikaar ko khatma kar adheen bana do। hanumaan ki visheshta dikhaate hain ki woh sada sevaadhaari tha। apne ko sevak samajhta tha। to yahaan jo sada sevaadhaari hain vahi maaya ke adhikaar ko khatma kar sakte hain। jo sevaadhaari nahin woh maaya ke raajya ko jala nahin sakte। hanumaan ke dil mein sada raam basta tha na। ek raam doosra na koi। to baap ke sivaae aur koi bhi dil mein na ho। apne deh ki smriti bhi dil mein nahin। sunaaya na ki deh bhi par hai, jab deh hi par ho gai to doosra dil mein kaise aa sakta?

pravritti mein rehte bhi apne ko trustee samjho, grahasthi nahin। grihasthi samajhne se agla pichhla bojh sir par aa jaata। trustee arthaat double light। jab aatmik swaroop hai to trustee, deh ki smriti hai to grahasthi। grihasthi maana mojmaaya ke jaal mein phansa hua, trustee maana sada halka ban khushi mein udne vaala। trustee arthaat maaya ka jaal khatma।