Avyakt murli for Wednesday 17 March 1982

>

17-03-82 om shanti avyakt baapdaada madhuban

“sangam yug ka veshesh vardaan - ‘amar bhav'”

amarnaath shiv baba bole:-

‘‘aaj baapdaada apne kalpa-kalpa ki adhikaari aatmaon ko dekh rahe hain। kaun-kaun shreshtha bhaagya ke adhikaari bane hain, woh dekh harshit ho rahe hain। baapdaada adhikaari aatmaon ko dekh aaj aapas mein rooh-roohaan karte muskara rahe the। brahma baap bole ki aise bachchon par baap ki nazar gai hai ki jinke liye duniya vaalon ka yeh sochna bhi asambhav hai ki aisi aatmaayen bhi shreshtha ban sakti hain। jo duniya ki najron mein ati saadhaaran aatmaayen hain unhon ko baapdaada ne apne nainon ke noor bana liya hai। bilkul hi naaummeed aatmaon ko vishwa ke aage sarvashreshtha aatmaayen bana diya hai। to baapdaada apni sena ke mahaaveeron ko,astradhaari aatmaon ko dekh rahe the ki kaun-kaun almighty athaarti paandav sena mein maidaan par upasthit hain। kya dekha hoga?kitni wonderful sena hai! duniya ke hisaab se anpadh dikhaai dete hain lekin paandav sena mein title mila hai - ‘knowledgeful'। sabhi knowledgeful ho na? shareer se chalna, uthna bhi mushkil hai lekin paandav sena ke hisaab se second mein paramdham tak pahunch kar aa sakte hain। ve to ek himaalay ke oopar jhanda lahraate hain lekin shiv shakti paandav sena ne teenon lokon mein apna jhanda lahra diya hai। bhole bhaale lekin aise chatur sujaan hain jo vichitra baap ko bhi apna bana diya hai। to aisi sena ko dekh baapdaada muskara rahe the। chaahe desh mein chaahe videsh mein sachche brahman phir bhi saadhaaran aatmaayen hi bante hain। jo vartamaan samay ke vi. aai. Ps. gaaye jaate, sabki najron mein hain lekin baap ki najron mein kaun hain?ve naameegraami,kaliyugi aatmaon dvaara svaartha ke kaaran gaaye jaate va maane jaate hain। unhon ki alpakaal ki kaliyugi jamaane ki mahima hai। abhi-abhi mahima hai, abhi-abhi nahin hai। lekin aap sangamayugi paandav sena ke paandav aur shaktiyon ki mahima saara kalpa hi kaayam rehti hai kyonki avinaashi baap ke mukh dvaara jo mahima gaai jaati woh avinaashi ban jaati hai। to kitna nasha rehna chaahiye! jaise aajkal ki duniya mein koi naameegraami shreshtha aatma guru ke roop mein maante hain jaise jinko laukik guru bhi agar koi baat kisko kah dete hain to samajhte hain guru ne kaha hai to woh satya hi hoga। aur usi phalak mein rehte hain। nishchay ke aadhaar par nasha rehta hai। aise hi socho aapki mahima kaun karta hai? kaun kehta hai- shreshtha aatmaayen! to aap logon ko kitna nasha hona chaahiye!

vardaata kaho, vidhaata kaho,bhaagyadaata kaho, aise baap dvaara aap shreshtha aatmaon ko kitne title mile hue hain! duniya mein kitne bhi bade-bade title hon lekin aap shreshtha aatmaon ke ek title ke aage woh anek titles bhi kuchh nahin hain। aisi khushi rehti hai?

sangamayug ka vishesh vardaan kaun-sa hai? amar baap dvaara ‘amar bhav'। sangamayug par hi ‘amar bhav'ka vardaan milta hai। is vardaan ko sada yaad rakhte ho?nasha rehta hai,khushi rehti hai, yaad rehti hai lekin amar bhav ke vardaani bane ho? jis yug ki jo visheshta hai,us visheshta ko kaarya mein lagaate ho? agar abhi yeh vardaan nahin liya to phir kabhi bhi yeh vardaan mil nahin sakta। isliye samay ki visheshta ko jaankar sada yeh check karo ki ‘amar bhav' ke vardaani bane hain? amar kaho, nirantar kaho is vishesh shabd ko baar-baar underline karo। amarnaath baap ke bachche agar‘amar bhav'ke varse ke adhikaari nahin bane to kya kaha jaayega? kahne ki jaroorat hai kya!

isliye madhuban vardaan bhoomi mein aakar sada vardaani bhav! achha - aise sada baapdaada ke naynon mein samaayen hue noore ratna, sada vardaata dvaara vardaan praapta kar vardaani moorta,shreshtha bhaagyavaan moorta, sada vishwa ke aage chamakte hue sitaare ban vishwa ko roshan karne vaale, aise sangamayugi paandav shiv shakti sena ko baapdaada ka yaadapyaar aur namaste।''

(deedi ji ke saath)- ‘‘chakradhaari to ho। chakradhaari ke saath-saath chakravarta bhi ho gai। double chakra lagaati ho। sthool bhi aur buddhi dvaara bhi। chakradhaari sada sarva ko vardaanon ki nazar se, vaani se, karma se, vardaanon se jholi bharte rehte hain। to vartamaan samay vidhaata ke bachche vidhaata ho va vardaata baap ke bachche vardaani moorta ho?jyaada kya part chalta hai? daata ka ya vardaata ka? mahaadaani ka ya vardaani ka? donon hi part chalta hai va donon mein se vishesh ek part chalta hai? last part kaun-sa hai? vidhaata ka ya vardaani ka? vardaan lena to sahaj hai lekin dene vaale ko itna praapti swaroop ki stage par sthit rehna pade। lene vaalon ke liye vardaan ek golden lottery hai kyonki last mein ve hi aatmaayen aayengi jo bilkul kamjor hongi। samay kam aur kamjor jyaada । isliye lene ki bhi himmat nahin hogi। jaise kiska heart bahut kamjor ho aur aap kitni bhi badhiya cheej do lekin woh le nahin sakta। samajhte bhi hain ki baadhinya cheej hai lekin le nahin sakte। aise last aatmaayen sab baaton mein kamjor hongi isliye vardaani ka part jyaada chalega। jo svayan ke prati sampanna ho chuke, aisi sampanna aatmaayen hi vardaani ban sakti hain। sampanna banna yeh hai vardaani stage। agar svayan prati kuchh raha hua hoga to doosron ko dekhte bhi svayan taraph attention jaayega aur svayan mein bharne mein samay lagega। isliye svayan sarva praaptiyon se sampanna honge tab vardaani ban sakenge। achha-''

party ke saath mulaakaat

1- sachche braahmanon ke takdeer ki lambi lakeer - 21 janmon ke liye:- kitne bhaagyavaan ho jo bhagwan ke saath picnic kar rahe ho! aisa kab socha tha - ki aisa din bhi aayega jo saakaar roop mein bhagwan ke saath khaayenge, khelenge,hansenge… yeh svapna mein bhi nahin aa sakta lekin itna shreshtha bhaagya hai jo saakaar mein anubhav kar rahe ho। kitni shreshtha takdeer ki lakeer hai - jo sarva praapti sampanna ho। vaise jab kisi ko takdeer dikhaate hain to kahenge iske paas putra hai, dhan hai,aayu hai lekin thodi chhoti aayu hai… kuchh hoga kuchh nahin। lekin aapke takdeer ki lakeer kitni lambi hai। 21 janma tak sarva praaptiyon ke takdeer ki lakeer hai। 21 janma guarantee hai aur baad mein bhi itna dukh nahin hoga। saare kalpa ka pauna hissa to sukh hi praapta hota hai। is last janma mein bhi ati dukhi ki list mein nahin ho। to kitne shreshtha takdeervaan hue! isi shreshtha takdeer ko dekh sada harshit raho।

2- pyaar ke saagar se pyaar paane ki vidhi - nyaara bano:- kai bachchon ki complain hai ki yaad mein to rehte hain lekin baap ka pyaar nahin milta hai। agar pyaar nahin milta hai to zaroor pyaar paane ki vidhi mein kami hai। pyaar ka saagar baap, usse yog lagaane vaale pyaar se vanchit rah jaaen,yeh ho nahin sakta। lekin pyaar paane ka saadhan hai - ‘nyaara bano'। jab tak deh se va deh ke sambandhiyon se nyaare nahin bane ho tab tak pyaar nahin milta। isliye kahaan bhi lagaav na ho। lagaav ho to ek sarva sambandhi baap se। ek baap doosra na koi… yeh sirf kehna nahin lekin anubhav karna hai। khaao, piyo,soo… baap-pyaare arthaat nyaare bankar। dehdhaariyon se lagaav rakhne se dukh ashaanti ki hi praapti hui। jab sab sun, chakhkar dekh liya to phir us jahar ko dubaara kaise kha sakte? isliye sada nyaare aur baap ke pyaare bano।

mehnat se chhutne ki vidhi- mera-pan samaapta karo:- baapdaada sabhi bachchon ko mehnat se chhudaane aaye hain। aadhaakalpa bahut mehnat ki ab mehnat samaapta। uski sahaj vidhi sunaai hai, sirf ek shabd yaad karo - ‘mera baba'। mera baba kahne mein koi bhi mehnat nahin। mera baba kaho to,dukh dene vaala ‘meraamera'sab samaapta ho jaayega। jab anek mera hai to mushkil hai,ek mera ho gaya to sab sahaj ho gaya। baba-baba kehte chalo to bhi satayug mein aa jaayenge। mera potra, mera dhotra, mera ghar, meri bahu… ab yeh jo mere-mere ki lambi list hai ise samaapta karo। anekon ko bhulaakar ek baap ko yaad karo to mehnat se chhoot aaraam se khushi ke jhoole mein jhoolte rahenge। sada baap ki yaad ke aaraam mein raho।

achha- omshaanti।