Avyakt murli for Wednesday 24 March 1982

>

24-03-82 om shanti avyakt baapdaada madhuban

“brahman jeevan ki visheshta hai - ‘‘pavitrata''”

parmapvitra baapdaada bole-

‘‘aaj baapdaada apne paavan bachchon ko dekh rahe hain। harek brahman aatma kahaan tak paavan bani hai - yeh sabka potaamel dekh rahe hain। braahmanon ki visheshta hai hi ‘pavitrata'। brahman arthaat paavan aatma। pavitrata ko kahaan tak apnaaya hai, usko parakhne ka yantra kya hai? ‘‘pavitra bano'', yeh mantra sabhi ko yaad dilaate ho lekin shreemat pramaan is mantra ko kahaan tak jeevan me laaya hai? jeevan arthaat sadaakaal। jeevan mein sada rehte ho na! to jeevan mein laana arthaat sada pavitrata ko apnaana। isko parakhne ka yantra jaante ho? sabhi jaante ho aur kehte bhi ho ki ‘pavitrata sukh-shanti ki janni hai'। arthaat jahaan pavitrata hogi vahaan sukh-shanti ki anubhooti avashya hogi। isi aadhaar par svayan ko chaik karo - mansa sankalp mein pavitrata hai, uski nishaani - mansa mein sada sukh swaroop,shant swaroop ki anubhooti hogi। agar kabhi bhi mansa mein vyartha sankalp aata hai to shanti ke bajaay halchal hoti hai। kyon aur kya in anek question ke kaaran sukh swaroop ki stage anubhav nahin hogi। aur sadaiv samajhne ki aasha badhti rahegi - yeh hona chaahiye,yeh nahin hona chaahiye,yeh kaise, yeh aise। in baaton ko suljhaane mein hi lage rahenge। isliye jahaan shanti nahin vahaan sukh nahin। to har samay yeh check karo ki kisi bhi prakaar ki uljhan sukh aur shanti ki praapti mein vighna roop to nahin banti hai! agar kyon,kya ka question bhi hai to sankalp shakti mein ekaagrata nahin hogi। jahaan ekaagrata nahin, vahaan sukh- shanti ki anubhooti ho nahin sakti। vartamaan samay ke pramaan pharishte-pan ki sampanna stage ke va baap samaan stage ke sameep aa rahe ho, usi pramaan pavitrata ki paribhaasha bhi ati sookshm samjho। sirf brahmachaari banna bhavishya pavitrata nahin lekin brahmachaari ke saath ‘brahma aachaarya' bhi chaahiye। shiv aachaarya bhi chaahiye। arthaat brahma baap ke aachran par chalne vaala। shiv baap ke uchchaaran kiye hue bol par chalnevaala। foot staip arthaat brahma baap ke har karma roopi kadam par kadam rakhne vaale। isko kaha jaata hai - ‘brahma aachaarya'। to aisi sookshm roop se chainkig karo ki sada pavitrata ki praapti,sukh-shanti ki anubhooti ho rahi hai? sada sukh ki shaiyya par aaraam se arthaat shanti swaroop mein viraajmaan rehte ho? yeh brahma aachaarya ka chitra hai।

sada sukh ki shaiyya par soi hui aatma ke liye yeh vikaar bhi chhatrachhaaya ban jaata hain - dushman badal sevaadhaari ban jaate hain। apna chitra dekha hai na! to‘shesh shayya' nahin lekin ‘sukh-shayya'। sada sukhi aur shant ki nishaani hai - sada harshit rehna। suljhi hui aatma ka swaroop sada harshit rahega। uljhi hui aatma kabhi harshit nahin dekhenge। uska sada khoya hua chehra dikhaai dega aur woh sab kuchh paaya hua chehra dikhaai dega। jab koi cheej kho jaati hai to uljhan ki nishaani kyon,kya, kaise hi hota hai। to roohaani sthiti mein bhi jo bhi pavitrata ko khota hai, uske andar kyon,kya aur kaise ki uljhan hoti hai। to samjha kaise check karna hai? sukh-shanti ke praapti swaroop ke aadhaar par mansa pavitrata ko check karo।

doosri baat - agar aapki mansa dvaara anya aatmaon ko sukh aur shanti ki anubhooti nahin hoti arthaat pavitra sankalp ka prabhaav anya aatma tak nahin pahunchta to uska bhi kaaran check karo। kisi bhi aatma ki jara bhi kamzori arthaat ashuddhi apne sankalp mein dhaaran hui to woh ashuddhi anya aatma ko sukh-shanti ki anubhooti kara nahin sakegi। ya to us aatma ke prati vyartha va ashuddha bhaav hai va apni mansa pavitrata ki shakti mein percentage ki kami hai। jis kaaran auron tak woh pavitrata ki praapti ka prabhaav nahin pad sakta। svayan tak hai, lekin doosron tak nahin ho sakta। light hai, lekin searchlight nahin hai। to pavitrata ke sampoornata ki paribhaasha hai - sada svayan mein bhi sukh-shanti swaroop aur doosron ko bhi sukh-shanti ki praapti ka anubhav karaane vaale। aisi pavitra aatma apni praapti ke aadhaar par auron ko bhi sada sukh aur shanti, sheetalta ki kirnen phailaane vaali hogi। to samjha sampoorn pavitrata kya hai?

pavitrata ki shakti itni mahaan hai jo apni pavitra mansa arthaat shuddh vritti dvaara prakriti ko bhi parivartan kar lete। mansa pavitrata ki shakti ka pratyaksha pramaan hai - prakriti ka bhi parivartan। sva parivartan se prakriti ka parivartan। prakriti ke pahle vyakti। to vyakti parivartan aur prakriti parivartan - itna prabhaav hai mansa pavitrata ki shakti ka। aaj mansa pavitrata ko spashta sunaaya - phir vaacha aur karmana arthaat sambandh aur samparka mein sampoorn pavitrata ki paribhaasha kya hai woh aage sunaayenge। agar pavitrata ki percentage mein16 kala se 14kala ho gaye to kya banna padega?jab 16 kala ki pavitrata arthaat sampoornata nahin to sampoorn sukh-shanti ke saadhnon ki bhi praapti kaise hogi! yug badalne se mahima hi badal jaati hai। usko satopradhaan,usko sato kehte hain। jaise sooryavanshi arthaat sampoorn stage hai। 16 kala arthaat full stage hai vaise har dhaarna mein sampanna arthaat full stage praapta karna‘sooryavanshi'ki nishaani hai। to ismen bhi full banna pade। kabhi sukh ki shayya par kabhi uljhan ki shayya par isko sampanna to nahin kahenge na! kabhi bindi ka tilak lagaate,kabhi kyon,kya ka tilak lagaate। tilak ka arth hi hai - ‘smriti'। sada teen bindiyon ka tilak lagaao। teen bindiyon ka tilak hi sampanna swaroop hai। yeh lagaane nahin aata! lagaate ho lekin attention roopi haath hil jaata hai। apne par bhi hansi aati hai na! lakshya powerful hai to lakshan sampoorn sahaj ho jaate hain। mehnat se bhi chhoot jaayenge। kamjor hone ke kaaran mehnat jyaada karni padti hai। shakti swaroop bano to mehnat samaapta। achha –

sada saphalta hamaara janma siddha adhikaar hai, yeh adhikaar praapta ki hui aatmaayen,sada sampoorn pavitrata dvaara svayan aur sarva ko sukh-shanti ki anubhooti karaane vaali, anubhooti karne aur karaane ke yantra dvaara sada pavitra bano - is mantra ko jeevan mein laane vaale, aise sampoorn pavitrata, sukh-shanti ke anubhvon mein sthit rahne vaale, baap samaan pharishta swaroop aatmaon ko baapdaada ka yaad pyaar aur namaste।''

party ke saath

1. sada roohaaniyat ki khushbu phailaane vaale sachche-sachche roohaani gulaab:- sabhi bachche- sada roohaani nashe mein rahne vaale sachche roohaani gulaab ho na?jaise roohe gulaab ka naam bahut mashhoor hai vaise aap sabhi aatmaayen roohaani gulaab ho। roohaani gulaab arthaat chaaron or roohaaniyat ki khushbu phailaane vaale। aise apne ko roohaani gulaab samajhte ho? sada rooh ko dekhte aur roohon ke maalik ke saath rooh-roohaan karte yahi roohaani gulaab ki visheshta hai। sada shareer ko dekhte rooh arthaat aatma ko dekhne ka paath pakka hai na! isi rooh ko dekhne ke abhyaasi roohaani gulaab ho gaye। baap ke bageeche ke vishesh pushpa ho kyonki sabse number one roohaani gulaab ho। sada ek ki yaad mein rahne vaale arthaat ek number mein aana hai, yahi sada lakshya rakho।

(deedi ji- dilli mele ki opaaning par jaane ki chhutti le raheen hain)

sabhi ko udaane ke liye ja rahi ho na! yaad mein, sneh mein, sahayog mein, sabmen udaane ke liye ja rahi ho। yeh bhi drama mein by-plots rakhe hue hain। to achha hai abhi-abhi jaana,abhi-abhi aana। aatma hi plen ban gai। jaise plen mein aana, jaana mushkil nahin vaise aatma hi udta panchhi ho gai hai। isliye aane-jaane mein sahaj hota hai। yeh bhi drama mein hero part hai, thode samay mein bhaasna adhik dene ka। to yeh hero part bajaane ke liye ja rahi ho। achha -sabhi ko yaad dena aur sada saphalta swaroop ka shubh sankalp rakhte aage badhte chalo - yahi smriti swaroop banaakar aana। phir bhi dilli hai। dilli ko to pavitra sthaan banaana hi hai। aavaaj phir bhi dilli se hi niklega। sabke mike dilli se hi pahunchege। jab government se aavaaj niklega tab samaapti ho jaayegi। to bhaarat ke netaayen bhi jaagenge। uski taiyaari ke liye ja rahi ho na! achha-