Avyakt murli for Thursday 1 April 1982

> 01-04-82 om shanti avyakt baapdaada madhuban

“bhaagya ka aadhaar - ‘‘tyaag''”

sarva ke bhaagya vidhaata shiv baba takdeervaan bachchon prati bole:-

‘‘aaj bhaagya vidhaata baapdaada apne sarva bachchon ke tyaag aur bhaagya donon ko dekh rahe hain। tyaag kya kiya hai aur bhaagya kya paaya hai - yeh to jaante hi ho ki ek guna tyaag uske return mein padamguna bhaagya milta hai। tyaag ki guhya paribhaasha jaante hue bhi jo bachche thoda bhi tyaag karte hain to bhaagya ki lakeer spashta aur bahut badi ho jaati hai। tyaag ki bhi bhinna-bhinna stage hain। vaise to brahmaakumaar va brahmaakumaari bane to yeh bhi tyaag ka bhaagya - brahman jeevan mili। is hisaab se jaise brahman sabhi kahlaate ho vaise tyaag karne vaali aatma bhi sab ho gaye। lekin tyaag mein bhi number hain। isliye bhaagya paane mein bhi number hain। brahmaakumaar va brahmaakumaari to sab kahlaate ho lekin brahmaakumaar-kumaariyon mein se hi koi maala ka number one daana bana, koi last daana bana - lekin hain donon hi brahmaakumaar-kumaari। shoodra jeevan sabne tyaag di phir bhi number one aur last ka antar kyon?chaahe pravritti mein rah trustee ban chal rahe ho, chaahe pravritti se nivritta ho sevaadhaari ban sada sevaakendra par rahe hue ho lekin donon hi prakaar ki brahman aatmaayen chaahe trustee,chaahe sevaadhaari, donon hi naam ek hi brahmaakumaarkumaari kahlaate ho। surname donon ka ek hi hai lekin donon ka tyaag ke aadhaar par bhaagya bana hua hai। aise nahin kah sakte ki sevaadhaari ban sevaakendra par rehna yahi shreshtha tyaag va bhaagya hai। trustee aatmaayen bhi tyaag vritti dvaara maala mein achha number le sakti hain। lekin sachche aur saaph dil vaala trustee ho। bhaagya praapta karne ka donon ko adhikaar hai। lekin shreshtha bhaagya ki lakeer kheenchane ka aadhaar hai -’’shreshtha sankalp aur shreshtha karma।'' chaahe trustee aatma ho, chaahe sevaadhaari aatma ho, donon isi aadhaar dvaara number le sakte hain। donon ko full athaarti hai -bhaagya banaane ki। jo banaane chaahen, jitna banaana chaahen bana sakte hain। sangamayug par vardaata dvaara drama anusaar samay ko vardaan mila hua hai। jo chaahe woh shreshtha bhaagyavaan ban sakta hai। brahmaakumaar-kumaari banna arthaat janma se bhaagya le hi aate ho। janmate hi bhaagya ka sitaara sarva ke mastak par chamakta hua hai। yeh to ‘janma-siddha'adhikaar ho gaya। brahman maana hi - ‘bhaagyavaan'। lekin praapta hue janma siddha adhikaar ko va chamakte hue bhaagya ke sitaare ko kahaan tak aage badhaate, kitna shreshtha banaate jaate hain woh harek ke purooshaartha par hai। mile hue bhaagya ke adhikaar ko jeevan mein dhaaran kar karma mein laana arthaat mili hui baap ki property ko kamaai dvaara badhaate rehna va kha ke khatma kar dena, woh harek ke oopar hai। janmate hi baapdaada sabko ek jaisa shreshtha ‘bhaagyavaan-bhav'ka vardaan kaho va bhaagya ki property kaho, ek jaisi hi dete hain। sab bachchon ko ek jaisa hi title dete hain- ‘sikeeldhe bachche, laadle bachche', koi ko sikeeldhe - koi ko na sikeeldhe nahin kehte hain। lekin property ko sambhaalna aur badhaana ismen number ban jaate hain। aise nahin ki sevaadhaariyon ko 10 padam dete aur trustee ko 2 padam dete hain। sabko padmaapadmapti kehte hain। lekin bhaagya roopi khajaane ko sambhaalna arthaat sva mein dhaaran karna aur bhaagya ke khajaane ko badhaana arthaat man-vaani-karma dvaara seva mein lagaana। ismen number ban jaate hain। sevaadhaari bhi sab ho, dhaarna moorta bhi sab ho, parantu dhaarna swaroop mein nambarvaar ho। koi sarvagun sampanna bane hain, koi gun sampanna bane hain। koi sada dhaarna swaroop hain, koi kabhi dhaarna swaroop, kabhi dagmag swaroop। ek gun ko dhaaran karenge to doosra samay par karttavya mein la nahin sakenge। jaise ek hi samay par sahanshakti bhi chaahiye aur saath-saath samaane ki shakti bhi chaahiye। agar ek shakti va ek sahansheelta ke gun ko dhaaran kar lenge aur samaane ki shakti va gun ko saath-saath use nahin kar sakenge aur kahenge ki itna sahan to kiya na? yeh koi kam kiya kya! yeh bhi mujhe maaloom hai,mainne kitna sahan kiya, lekin sahan karne ke baad agar samaaya nahin, samaane ki shakti ko use nahin kiya to kya hoga? yahaan-vahaan varnan hoga isne yeh kiya,mainne yeh kiya, to sahan kiya, yeh kamaal zaroor ki lekin kamaal ka varnan kar kamaal ko dhamaal mein change kar liya। kyonki varnan karne se ek to deh abhimaan aur doosra parchintan donon hi swaroop karma mein aa jaate hain। isi prakaar se ek gun ko dhaaran kiya doosre ko nahin kiya to jo dhaarna swaroop hona chaahiye woh nahin ban paate। is kaaran mile hue khajaane ko sada dhaaran nahin kar sakte arthaat sambhaal nahin sakte। sambhaala nahin arthaat ganva diya na! koi sambhaalta hai koi ganva deta hai। number to honge hi na! aise seva mein lagaana arthaat bhaagya ki property ko badhaana। ismen bhi seva to sabhi karte hi ho lekin sachche dil se,lagan se seva karna, sevaadhaari ban karke seva karna ismen bhi antar ho jaata hai। koi sachche dil se seva karte hain aur koi dimaag ke aadhaar par seva karte hain। antar to hoga na!

dimaag tej hai, points bahut hain, uske aadhaar par seva karna aur sachche dil se seva karna, ismen raat-din ka antar hai। dil se seva karne vaala dilaaraam ka banaayega। aur dimaag dvaara seva karne vaala sirf bolna aur bulvaana sikhaayega। woh manan karta, woh varnan karta। ek hai sevaadhaari ban seva karne vaale aur doosre hain naamdhaari banne ke liye seva karne vaale। pharka ho gaya na। sachche sevaadhaari jin aatmaon ki seva karenge unhon ko praapti ke pratyakshaphal ka anubhav karaayenge। naamdhaari banne vaale sevaadhaari usi samay naamaachaar ko paayenge - bahut achha sunaaya, bahut achha bola,lekin praapti ke phal ki anubhooti nahin kara sakenge। to antar ho gaya na! aise ek hai lagan se seva karna, ek hai dayooti ke pramaan seva karna। lagan vaale har aatma ki lagan lagaane ke bina rah nahin sakenge। dayooti vaala apna kaam poora kar lega, saptaah course kara lega, yog shivir bhi kara lega, dhaarna shivir bhi kara lega,murli sunaane tak bhi pahuncha lega,lekin aatma ki lagan lag jaae iski jimmevaari apni nahin samjhenge। course ke oopar course kara lenge lekin aatma mein force nahin bhar sakenge। aur sochenge mainne bahut mehnat kar li। lekin yeh niyam hai ki seva ki lagan vaala hi lagan laga sakta hai। to antar samjha?yeh hai mili hui property ko badhaana। is kaaran jitna sambhaalte hain,jitna badhaate hain utna number aage le lete hain। bhaagyavidhaata ne bhaagya sabko ek jaisa baanta lekin koi kamaane vaale koi ganvaane vaale ban jaate। koi khaake khatma karne vaale ban jaate। isliye do prakaar ki maala ban gai hai। aur maala mein bhi number ban gaye hain। samjha number kyon bane? to baapdaada tyaag ke bhaagya ko dekh rahe the। tyaag ki bhi leela aparmaapaar hai। woh phir sunaayenge। achha –

aise shreshtha takdeervaan, sada shreshtha sankalp aur shreshtha karma dvaara bhaagya ki lakeer badhaate rahne vaale, sada sachche sevaadhaari, sada sarva gunon,sarva shaktiyon ko jeevan mein lagaane vaale, har aatma ko pratyakshaphal arthaat praapti swaroop banaane vaale,aise shreshtha tyaagi aur shreshtha bhaagi,sada baap dvaara mile hue adhikaar ko,khajaane ko sambhaalne aur badhaane vaale,aise dhaarna swaroop sada sevaadhaari bachchon ko baapdaada ka yaadapyaar aur namaste।''

party ke saath

1-brahman so pharishta aur pharishta so devta - yeh lakshya sada smriti mein rakho:- sabhi apne ko brahman so pharishta samajhte ho? abhi brahman hain aur brahman se pharishta banne vaale hain phir pharishta so devta banenge -woh yaad rehta hai?pharishta banna arthaat saakaar shareerdhaari hote hue light roop mein rehna arthaat sada buddhi dvaara oopar ki stage par rehna। pharishte ke paanv dharni par nahin rehte। oopar kaise rahenge? buddhi dvaara। buddhi roopi paanv sada oonchi stage par। aise pharishte ban rahe ho ya ban gaye ho? brahman to ho hi - agar brahman na hote to yahaan aane ki chhutti bhi nahin milti। lekin braahmanon ne pharishtepan ki stage kahaan tak apnaai hai?pharishton ko jyoti ki kaaya dikhaate hain। prakaash ki kaaya vaale। jitna apne ko prakaash swaroop aatma samjhenge - prakaashmay to chalte phirte anubhav karenge jaise prakaash ki kaaya vaale pharishte bankar chal rahe hain। pharishta arthaat apni deh ke bhaan ka bhi rishta nahin,dehbhaan se rishta tootna arthaat pharishta। deh se nahin,deh ke bhaan se। deh se rishta khatma hoga tab to chale jaayenge lekin dehbhaan ka rishta khatma ho। to yeh jeevan bahut pyaari lagegi। phir koi maaya bhi aakarshan nahin karegi। achha - om shanti।