Avyakt murli for Sunday 18 April 1982

> 18-04-82 om shanti avyakt baapdaada madhuban

“oonch se oonch brahman kul ki laaj rakho”

brahman kul deepkon prati baapdaada bole:-

‘‘aaj baapdaada sarva snehi aur milan ki bhaavna vaali shreshtha aatmaon ko dekh rahe hain। bachchon ki milan bhaavna ka pratyakshaphal baapdaada ko bhi is samay dena hi hai। bhakti ki bhaavna ka phal direct sammukh milan ka nahin milta। lekin ek baar parichay arthaat gyaan ke aadhaar par baap aur bachche ka sambandh juta, to aise gyaan swaroop bachchon ko adhikaar ke aadhaar par shubh bhaavna,gyaan swaroop bhaavna,sambandh ke aadhaar par milan bhaavna ka phal sammukh baap ko dena hi padta hai। to aaj aise gyaanvaan milan ki bhaavna swaroop aatmaon se milne ke liye baapdaada bachchon ke beech aaye hue hain। kai brahman aatmaayen shakti swaroop ban, mahaaveer ban sada vijayi aatma banne mein va itni himmat rakhne mein svayan ko kamjor bhi samajhti hain lekin ek visheshta ke kaaran vishesh aatmaon ki list mein aa gai hain। kaun-si visheshta? sirf baap achha lagta hai, shreshtha jeevan achha lagta hai। brahman parivaar ka sangathan, nihsvaartha sneh - man ko aakarshit karta hai। bas yahi visheshta hai ki baba mila, parivaar mila,pavitra thikaana mila,jeevan ko shreshtha banaane ka sahaj sahaara mil gaya। isi aadhaar par milan ki bhaavna mein sneh ke sahaare mein chalte ja rahe hain। lekin phir bhi sambandh jodne ke kaaran sambandh ke aadhaar par svarga ka adhikaar varse mein pa hi lete hain - kyonki brahman so devta, isi vidhi ke pramaan devpad ki praapti ka adhikaar pa hi lete hain। satayug ko kaha hi jaata hai - devtaaon ka yug। chaahe raaja ho, chaahe praja ho lekin dharma devta hi hai -kyonki jab oonche te oonche baap ne bachcha banaaya to unche baap ke har bachche ko svarga ke varse ka adhikaar, devta banne ka adhikaar, janma siddha adhikaar mein praapta ho hi jaata hai। brahmaakumaar aur brahmaakumaari banna arthaat svarga ke varse ke adhikaar ki avinaashi stamp lag jaana। saare vishwa se aisa adhikaar paane vaali sarva aatmaon mein se koi aatmaayen hi nikalti hain। isliye brahmaakumaar-kumaari banna koi saadhaaran baat nahin samajhna। brahmaakumaar-kumaari banna hi visheshta hai aur isi visheshta ke kaaran vishesh aatmaon ki list mein aa jaate hain। isliye brahmaakumaar-kumaari banna arthaat brahman lok ke, brahman sansaar ke, brahman parivaar ke banna। brahmaakumaar-kumaari ban agar koi bhi saadhaaran chalan va puraani chaal chalte hain to sirf akela apne ko nuksaan nahin pahunchaate - kyonki akele brahmaakumaar-kumaari nahin ho lekin brahman kul ke bhaati ho। svayan ka nuksaan to karte hi hain lekin kul ko badnaam karne ka bojh bhi us aatma ke oopar chadhta hai। brahman lok ki laaj rakhna yeh bhi har brahman ka pharja hai। jaise laukik loklaaj ka kitna dhyaan rakhte hain। laukik loklaaj padmaapadmapti banne se bhi kahaan vanchit kar deti hai। svayan hi anubhav bhi karte ho aur kehte bhi ho ki chaahte to bahut hain lekin loklaaj ko nibhaana padta hai। aise kehte ho na? jo loklaaj anek janmon ki praapti se vanchit karne vaali hai, vartamaan heere jaisa janma kaudi samaan vyartha banaane vaali hai,yeh achhi tarah se jaante bhi ho phir bhi us loklaaj ko nibhaane mein achhi tarah dhyaan dete ho,samay dete ho,energy lagaate ho। to kya is brahman loklaaj ki koi visheshta nahin hai! us lok ki laaj ke peechhe apna dharma arthaat dhaarnaayen aur shreshtha karma yaad ka,donon hi dharma aur karma chhod dete ho। kabhi vritti ke parhej ki dhaarna arthaat dharma ko chhod dete hon, kabhi shuddh drishti ke dharma ko chhod dete ho। kabhi shuddh anna ke dharma ko chhod dete ho। phir apne aapko shreshtha siddha karne ke liye baaten bahut banaate ho। kya kehte - ki karna hi padta hai! thodi si kamzori sada ke liye dharma aur karma ko chhuda deti hai। jo dharma aur karma ko chhod deta hai usko laukik kul mein bhi kya samjha jaata hai? jaante ho na? yeh kisi saadhaaran kul ka dharma aur karma nahin hai। brahman kul oonche te oonchi choti vaala kul hai। to kis lok va kis kul ki laaj rakhni hai? aur kai achhi-achhi baaten sunaate hain - meri ichchha nahin thi lekin kisi ko khush karne ke liye kiya! kya agyaani aatmaayen kabhi sada khush rah sakti hain? aise abhi khush, abhi naaraazrahne vaali aatmaon ke kaaran apna shreshtha karma aur dharma chhod deten jo dharma ke nahin woh brahman duniya ke nahin। alpagya aatmaon ko khush kar liya lekin sarvagya baap ki aagya ka ullanghan kiya na! to paaya kya aur ganvaaya kya! jo lok ab khatma hua hi pada hai। chaaron or aag ki lakdiyaan bahut jor shor se ikatthi ho gai hain। lakdiyaan arthaat taiyaariyaan। jitna sochte hain in lakdiyon ko alag-alag kar aag ki taiyaari ko samaapta kar den utna hi lakdiyon ka dher ooncha hota jaata hai। jaise holika ko jalaate hain to badon ke saath chhote-chhote bachche bhi lakdiyaan ikatthi kar le aate hain। nahin to ghar se hi lakdi le aate। shauk hota hai। to aajkal bhi dekho chhote-chhote shahar bhi bade shauk se sahayogi ban rahe hain। to aise lok ki laaj ke liye apne avinaashi brahman so devta lok ki laaj bhool jaate ho! kamaal karte ho! yeh nibhaana hai ya ganvaana hai! isliye brahman lok ki bhi laaj smriti mein rakho। akele nahin ho,bade kul ke ho to shreshtha kul ki bhi laaj rakho।

kai bachche bade hoshiyaar hain। apne puraane lok ki laaj bhi rakhne chaahte aur brahman lok mein bhi shreshtha banna chaahte hain। baapdaada kehte laukik kul ki loklaaj bhal nibhaao uski mana nahin hai lekin dharma karma ko chhod karke loklaaj rakhna, yeh wrong hai। aur phir hoshiyaari kya karte hain?samajhte hain kisko kya pata? - baap to kehte hi hain - ki main jaani jaananhaar nahin hoon। nimitta aatmaon ko bhi kya pata? aise to chalta hai। aur chal karke madhuban mein pahunch bhi jaate hain। sevaakendron par bhi apne aapko chhipaakar seva mein naameegraami bhi ban jaate hain। jara sa sahayog dekar sahayog ke aadhaar par bahut achhe sevaadhaari ka title bhi khareed kar lete hain। lekin janma-janma ka shreshtha title sarvagun sampanna, 16 kala sampanna, sampoorn nirvikaari… yeh avinaashi title ganva dete hain। to yeh sahayog diya nahin lekin ‘‘andar ek,baahar doosra''is dhokhe dvaara bojh uthaaya। sahayogi aatma ke bajaae bojh uthaane vaale ban gaye। kitna bhi hoshiyaari se svayan ko chalaao lekin yeh hoshiyaari ka chalaana, chalaana nahin lekin chillaana hai। aise nahin samajhna yeh sevaakendra koi nimitta aatmaon ke sthaan hain। aatmaon ko to chala lete lekin paramatma ke aage ek ka laakh guna hisaab har aatma ke karma ke khaate mein jama ho hi jaata hai। us khaate ko chala nahin sakte। isliye baapdaada ko aise hoshiyaar bachchon par bhi taras padta hai। phir bhi ek baar baap kaha to baap bhi bachchon ke kalyaan ke liye sada shiksha dete hi rahenge। to aise hoshiyaar mat banna। sada brahman lok ki laaj rakhna।

baapdaada to karma aur phal donon se nyaare hain। is samay brahma braap bhi isi sthiti par hain। phir to hisaab kitaab mein aana hi hai lekin is samay baap samaan hain। isliye jo jaisa karenge apne liye hi karte ho। baap to daata hai। jab svayan hi karta aur svayan hi phal paata hai to kya karna chaahiye? baapdaada vatan mein bachchon ke variety khel dekh karke muskaraate hain। achha –

aise brahman kul ke deepak, sada sachchi lagan se snehi aur sahayogi banne vaale,sadaakaal ka shreshtha phal paane vaale, sada sachche baap ke sachche sneh mein alpakaal ki praaptiyon ko kurbaan karne vaale aise snehi aatmaon ko,shreshtha aatmaon ko baapdaada ka yaadapyaar aur namaste।''

party ke saath

1. karma bandhan se mukta sthiti ka anubhav karne ke liye karmayogi bano:- sada har karma karte, karma ke bandhanon se nyaare aur baap ke pyaare - aisi nyaari aur pyaari aatmaayen apne ko anubhav karte ho? karmayogi ban, karma karne vaale kabhi bhi karma ke bandhan mein nahin aate hain,ve sada bandhanmukta-yogayukta hote। karmayogi kabhi achhe va bure karma karne vaale vyakti ke prabhaav mein nahin aate। aisa nahin ki koi achha karma karne vaala connection mein aaye to uski khushi mein aa jaao aur koi achha karma na karne vaala sambandh mein aaye to gusse mein aa jaao - ya uske prati eershya va ghrina paida ho। yeh bhi karmabandhan hai। karmayogi ke aage koi kaisa bhi aa jaae - svayan sada nyaara aur pyaara rahega। knowledge dvaara jaanega, iska yeh part chal raha hai। ghrina vaale se svayan bhi ghrina kar le yeh hua karma ka bandhan। aisa karma ke bandhan mein aane vaala ekras nahin rah sakta। kabhi kisi ras mein hoga kabhi kisi ras mein। isliye achhe ko achha samajhkar saakshi hokar dekho aur bure ko merciful ban raham ki nigaah se parivartan karne ki shubh bhaavna se saakshi ho dekho। isko kaha jaata hai - ‘karmabandhan se nyaare'। kyonki gyaan ka arth hai samajh। to samajh kis baat ki? karma ke bandhanon se mukta hone ki samajh ko hi gyaan kaha jaata hai। gyaani kabhi bhi bandhanon ke vash nahin honge। sada nyaare। aise nahin kabhi nyaare ban jaao to kabhi thoda sa sek aa jaae। sada vikkarmaajeet banne ka lakshya rakho। karmabandhan jeet banna hai। yeh bahutkaal ka abhyaas bahutkaal ki praalabdha ke nimitta banaayega। aur abhi bhi bahut vichitra anubhav karenge। to sada ke nyaare aur sada ke pyaare bano। yahi baap samaan karmabandhan se mukta sthiti hai।

baapdaada puraani badi bahnon ko dekh bole:- is group ko kaun-sa group kahenge? pahle shuru mein to apne-apne naam rahe - abhi kaun-sa naam denge? sada baap ke sang rahne vaale, sada baap ke right hand। aisa group ho na! baapdaada bhi bhujaaon ke bina itni badi sthaapna ka kaarya kaise kar sakte! to iseelie sthaapna ke kaarya ki vishesh bhoojaayen ho। vishesh bhuja right hand ki hoti hai। baapdaada sadaiv aadi ratnon ko real gold kehte hain। sabhi aadi ratna vishwa ki stage par vishesh part baja rahe ho। baapdaada bhi har vishesh aatma ka - vishesh part dekh harshit hote hain। part to sabka variety hoga na! ek jaisa to nahin ho sakta lekin itna zaroor hai ki aadi ratnon ka vishesh drama anusaar vishesh part hai। harek ratna mein vishesh - visheshta hai jiske aadhaar par hi aage badh bhi rahe hain aur sada badhte rahenge। woh kaun-si visheshta hai - yeh to svayan bhi jaante ho aur doosre bhi jaante hain। lekin visheshta sampanna vishesh aatmaayen ho।

baapdaada aise aadi ratnon ko laakh-laakh badhaaeeyaan dete hain kyonki aadi se sahan kar sthaapna ke kaarya ko saakaar swaroop mein vriddhi ko praapta karaane ke nimitta bane ho। to jo sthaapna ke kaarya mein sahan kiya woh auron ne nahin kiya hai। aapke sahanshakti ke beej ne yeh phal paida kiye hain। to baapdaada aadi-madhya- ant ko dekhte hain - ki harek ne kya-kya sahan kiya hai aur kaise shakti roop dikhaaya hai। aur sahan bhi khel-khel mein kiya। sahan ke roop mein sahan nahin kiya, khel-khel mein sahan ka part bajaane ke nimitta ban apna vishesh hero part noondh liya। isliye aadi ratnon ka yeh nimitta banne ka part baapdaada ke saamne rehta hai। aur iske phalasvaroop aap sarva aatmaayen sada amar ho। samjha apna part?kitna bhi koi aage chala jaaye - lekin phir bhi… phir bhi kahenge। baapdaada ko puraani vastu ki value ka pata hai। samjha। achha –

prashn:- sangamayugi brahman bachchon ko kis karttavya mein sada tatpar rehna chaahiye?

uttar:-samartha banna hai aur doosron ko bhi samartha banaana hai, isi karttavya mein sada tatpar raho। kyonki vyartha to aadha kalpa kiya, ab samay hi hai samartha banne aur banaane ka। isliye vyartha sankalp, vyartha bol, vyartha karma sab samaapta,full stop। puraana chopda khatma। jama karne ka saadhan hi hai - sada samartha rehna। kyonki vyartha se samay,shaktiyaan aur gyaan ka nuksaan ho jaata hai।