Avyakt murli for Sunday 9 January 1983

>

09-01-83 om shanti avyakt baapdaada madhuban

vyartha ko chhod samartha sankalp chalaao

sarva khazaanon se bharpoor karne vaale, padmaapadma,bhaagyashaali banaane vaale shivbaaba bole –

aaj baapdaada sabhi sikeeldhe bachchon se milan manaane ke liye vishesh aaye hain। double videshi bachche milne manaane ke liye sada intajaar mein rehte hain। to aaj baapdaada double videshi bachchon se ek-ek ki visheshta ki rooh-roohaan karne aaye hain। ek-ek sthaan ki apni-apni visheshta hai। kahaan sankhya jyaada hai aur kahaan sankhya kam hote bhi amoolya ratna, vishesh ratna thode chune hue hote bhi apna bahut achha part baja rahe hain। aise bachchon ke umang-utsaah ko dekh, bachchon ki seva ko dekh baapdaada harshit hote hain। vishesh roop mein videsh ke chaaron hi konon mein baap ko pratyaksha karne ke plan practical karne mein achhi saphalta ko pa rahe hain। sarva dharmon ki aatmaon ko baap se milaane ka prayatna achha kar rahe hain। seva ki lagan achhi hai। apni bhatakti hui aatma ko thikaana milne ke anubhvi hone ke kaaran auron ke prati bhi raham aata hai। jo bhi door-door se aaye hain unhon ka ek hi umang hai ki jaana hai aur anya ko bhi le jaana hai। is dridh sankalp ne sabhi bachchon ko door hote bhi nazdeek ka anubhav karaaya hai। isliye sada apne ko baapdaada ke varse ke adhikaari aatma samajh chal rahe hain। kabhi bhi kisi vyartha sankalp ke aadhaar par apne ko halchal mein nahin laao। kalpa-kalpa ke paatra ho। achha - aaj to party se milna hai। pahla number milne ka chance America party ko mila hai। to America vaale sabhi milkar seva mein sabse number one kamaal bhi to dikhaayenge na। abhi baapdaada dekhenge ki conference mein sabse bade te bade vi.aai.pi. kaun le aate hain। number one vi.aai.Ps kahaan se aa raha hai? (America se) vaise to aap baap ke bachche vi.vi.vi.aai.pi. ho। aap sabse bada to koi bhi nahin hai lekin jo is duniya ke vi.aai.pi. hain un aatmaon ko bhi sandesh dene ka yeh chance hai। inhon ka bhaagya banaane ke liye yeh purooshaartha karna padta hai kyonki ve to apne ko is puraani duniya ke bade samajhte hain na। to chhote-chhote koi programme mein aana woh apna regard nahin samajhte। isliye bade programme mein badon ko bulaane ka chance hai। vaise to baapdaada bachchon se hi milte aur rooh-roohaan karte। vishesh aate bhi bachchon ke liye hi hain। phir aise-aise logon ka bhi ulhana na rah jaae ki humein hamaare yogya nimantran nahin mila, is ulhane ko poora karne ke liye yeh sab programme rache jaate hain। baapdaada ko to bachchon se preet hai aur bachchon ko baapdaada se preet hai। achha –

sabhi double videshi tan se aur man se santushta ho? thoda bhi kisko koi sankalp to nahin hai। koi tan ki va man ki problem hai? shareer beemaar ho lekin shareer ki beemaari se man disturb na ho। sadaiv khushi mein naachte raho to shareer bhi theek ho jaayega। man ki khushi se shareer ko bhi chalaao to dono exercise ho jaayegi। khushi hai ‘dua’aur exercise hai‘davaai’। to dua aur dava donon hone se sahaj ho jaayega। (ek bachche ne kaha raatri ko neend nahin aati hai।) sone ke pahle yog mein baitho to phir neend aa jaayegi। yog mein baithne samay baapdaada ke gunon ke geet gaao। to khushi se darda bhi bhool jaayega। khushi ke bina sirf yeh prayatna karte ho ki main aatma hoon,main aatma hoon, to is mehnat ke kaaran darda bhi feel hota hai। khushi mein raho to darda bhi bhool jaayega।

koi bhi baat mein kisko bhi koi question ho ya chhoti si baat mein kab confuse bhi jaldi ho jaate, to woh chhoti-chhoti baaten phauran spashta karke aage chalte chalo। jyaada sochne ke abhyaasi nahin bano। jo bhi soch aaye usko vahaan hi khatma karo। ek soch ke peechhe anek soch chalne se phir sthiti aur shareer donon par asar aata hai। isliye double videshi bachchon ko sochne ki baat par double attention dena chaahiye। kyonki akele rahkar sochne ke natural abhyaasi ho। to woh abhyaas jo pada hua hai,isliye yahaan bhi chhoti-chhoti baat par jyaada sochte। to sochne mein time vesta jaata aur khushi bhi gaayab ho jaati। aur shareer par bhi asar aata hai, uske kaaran phir soch chalta hai। isliye tan aur man donon ko sada khush rakhne ke liye - socho kam। agar sochna hi hai to gyaan ratnon ko socho। vyartha sankalp ki bhent mein samartha sankalp har baat ka hota hai। maanon apni sthiti va yog ke liye vyartha sankalp chalta hai ki mera part to itna dikhaai nahin deta, yog lagta nahin। ashareeri hote nahin। yeh hai - vyartha sankalp। unki bhent mein samartha sankalp karo - yaad to mera svadharma hai। bachche ka dharma hi hai baap ko yaad karna। kyon nahin hoga, zaroor hoga। main yogi nahin to aur kaun banega! main hi kalpa-kalpa ka sahajyogi hoon। to vyartha ke bajaae is prakaar ke samartha sankalp chalaao। mera shareer chal nahin sakta, yeh vyartha sankalp nahin chalaao। iske bajaae samartha sankalp yeh hai ki - isi antim janma mein baap ne hamko apna banaaya hai। kamaal hai, balihaari is antim shareer ki। jo is puraane shareer dvaara janma-janma ka varsa le liya। dilshikasta ke sankalp nahin karo। lekin khushi ke sankalp karo। vaah mera puraana shareer! jisne baap se milaane ke nimitta banaaya! vaah vaah kar chalaao। jaise ghode ko pyaar se, haath se chalaate hain to ghoda bahut achha chalta hai agar ghode ko baar-baar chaabuk lagaayenge to aur hi tang karega। yeh shareer bhi aapka hai। inko baar-baar aise nahin kaho ki yeh puraana, bekaar shareer hai। yeh kehna jaise chaabuk lagaate ho। khushi-khushi se iski balihaari gaate aage chalaate raho। phir yeh puraana shareer kab disturb nahin karega। bahut sahayog dega। (koi ne kaha- promise bhi karke jaate hain, phir bhi maaya aa jaati hai।)

maaya se ghabraate kyon ho? maaya aati hai aapko paath padhaane liye। ghabraao nahin। paath padh lo। kabhi sahansheelta ka paath kabhi ekras sthiti mein rahne ka paath padhaati। kabhi shant swaroop banne ka paath pakka karaane aati। to maaya ko us roop mein nahin dekho। maaya aa gai, ghabra jaate ho। lekin samjho ki maaya bhi hamaari sahayogi ban, baap se padha hua paath pakka karaane ke liye aai hai। maaya ko sahayogi ke roop mein samjho। dushman nahin। paath pakka karaane ke liye sahayogi hai to aapka attention saara us baat mein chala jaayega। phir ghabraahat kam hogi aur haar nahin khaayenge। paath pakka karke ‘angad’ ke samaan ban jaayenge। to maaya se ghabraao nahin। jaise chhote bachchon ko maa baap daraane ke liye kehte hain, havva aa jaayega। aap sabne bhi maaya ko havva bana diya hai। vaise maaya khud aap logon ke paas aane mein ghabraati hai। lekin aap svayan kamzor ho, maaya ka aahvaan karte ho। nahin to woh aayegi nahin। woh to vidaai ke liye thahri hui hai। woh bhi intajaar kar rahi hai ki hamaari last date kaun si hai?ab maaya ko vidaai denge ya ghabraayenge!

double videshiyon ki yeh ek visheshta hai - udte bhi bahut tej hain aur phir darte hain to chhoti si makkhi se bhi dar jaate hain। ek din bahut khushi mein naachte rahenge aur doosre din phir chehra badli ho jaayega। is nature ko badli karo। iska kaaran kya hai?

in sab kaarnon ka bhi foundation hai - sahanshakti ki kami। sahan karne ke sanskaar shuru se nahin hai, isliye jaldi ghabra jaate ho। sthaan ko badlenge ya jinse tang honge unko badal lenge। apne ko nahin badlenge। yeh jo sanskaar hai woh badalna hai। ‘‘mujhe apne ko badalna hai’’,sthaan ko va doosre ko nahin badalna hai lekin apne ko badalna hai। yeh jyaada smriti mein rakho, samjha! ab videshi se svadeshi sanskaar bana lo। ‘sahansheelta’ka avtaar ban jaao। jisko aap log kehte ho apne ko edjasta karna hai। kinaara nahin karna hai,chhodna nahin hai।

hans aur bagule ki baat alag hai। unhon ki aapas mein khit-khit hai। woh bhi jahaan tak ho sake uske prati shubh bhaavna se trial karna apna pharja hai। kai aise bhi misaal hue hain jo bilkul anti the lekin shubh bhaavna se nimitta banne vaale se bhi aage ja rahe hain। to shubh bhaavna se full force se trial karni chaahiye। agar phir bhi nahin hota hai to phir direction lekar kadam uthaana chaahiye kyonki kai baar aise kinaara kar dene se kahaan dis service bhi ho jaati hai। aur kai baar aisa bhi hota hai ki aane vaali brahman aatma ki kami hone ke kaaran anya aatmaayen bhi bhaagya lene se vanchit rah jaati hain। isliye pahle svayan trial karo phir agar samajhte ho yeh badi praabalma hai to nimitta bani aatmaon se verify karaao। phir woh bhi agar samajhti hai ki alag hona hi theek hai phir alag hue bhi to aapke oopar javaabdaari nahin rahi। aap direction par chale। phir aap nishchinta। kai baar aisa hota hai - josh mein chhod diya, lekin apni galti ke kaaran chhodne ke baad bhi woh aatma kheenchati rehti hai। buddhi jaati rehti hai yeh bhi bada vighna ban jaata hai। tan se alag ho gaye lekin man ka hisaab-kitaab hone ke kaaran kheenchata rehta isliye nimitta bani hui aatmaon se verify karaao। kyonki yeh karmon ki philaasphi hai। jabardasti todne se bhi man baar-baar jaata rehta hai। karma ki philaasphi ko gyaan swaroop hokar pahchaano aur phir verify karaao। phir karma-bandhan ko gyaan yukta hokar khatma karo।

baaki brahman aatmaon mein jab ham-shareek hone ke kaaran eershya utpanna hoti hai, eershya ke kaaran sanskaaron ka takkar hota hai lekin ismen vishesh baat yeh socho ki jo ham-shareek hain usko nimitta banaane vaala kaun? unko nahin dekho -phalaana is dyiti par aa gaya, phalaani teacher ho gai,number one serviceable ho gai। lekin yeh socho ki us aatma ko nimitta banaane vaala kaun?chaahe nimitta bani hui vishesh aatma dvaara hi unko dyiti milti hai lekin nimitta banne vaali teacher ko bhi nimitta kisne banaaya? ismen jab baap beech mein ho jaayega to maaya bhaag jaayegi। eershya bhaag jaayegi lekin jaise kahaavat hai na - ya hoga baap ya hoga paap। jab baap ko beech se nikaalte ho tab paap aata hai। eershya bhi paap karma hai na। agar samjho baap ne nimitta banaaya hai to baap jo kaarya karte usmein kalyaan hi hai। agar uski koi aisi baat achhi na bhi lagti hai, wrong bhi ho sakti hai,kyonki sab purushaarthi hain। agar wrong bhi hai to apni shubh bhaavna se oopar de dena chaahiye। eershya ke vash nahin। lekin baap ki seva so hamaari seva hai - is shubh bhaavna se, shreshtha jimmevaari se oopar baat de deni chaahiye। dene ke baad khud nishchinta ho jaao। phir yeh nahin socho ki yeh baat di phir kya hua?kuchh hua nahin। hua va nahin yeh jimmevaari badon ki ho jaati hai। aapne shubh bhaavna se di, aapka kaam hai apne ko khaali karna। agar dekhte ho badon ke khyaal mein baat nahin aai to bhal dubaara likho। lekin seva ki bhaavna se। agar nimitta bane hue kehte hain ki is baat ko chhod do to apna sankalp aur samay vyartha nahin ganvaao। eershya nahin karo। lekin kiska kaarya hai, kisne nimitta banaaya hai, usko yaad karo। kis visheshta ke kaaran unko vishesh banaaya gaya hai woh visheshta apne mein dhaaran karo to race ho jaayegi na ki rees। samjha।

upset kabhi nahin hona chaahiye। jisne kuchh kaha unse hi poochhna chaahiye ki aapne kis bhaav se kaha? - agar woh spashta nahin karte to nimitta bane hue se poochho ki ismen meri galti kya hai?agar oopar se verify ho gaya, aapki galti nahin hai to aap nishchinta ho jaao। ek baat sabhi ko samajhni chaahiye ki brahman aatmaon dvaara yahaan hi hisaab-kitaab chuktu hona hai। dharmaraajpuri se bachne ke liye brahman kahaan na kahaan nimitta ban jaate hain। to ghabraao nahin ki yeh brahman parivaar mein kya hota hai। braahmanon ka hisaab-kitaab braahmanon dvaara hi chuktu hona hai। to yeh chuktu ho raha hai isi khushi mein raho। hisaab-kitaab chuktu hua aur tarakki hi tarakki hui। abhi ek vaayda karo - ki chhoti-chhoti baat mein kanphyooj nahin honge,problem nahin banenge lekin problem ko hal karne vaale banenge। samjha।

America party se - aap sab baapdaada ke sir ke taaj, shreshtha aatmaayen ho na! shreshtha aatmaon ka har sankalp, har bol shreshtha hoga। kabhi kabhi nahin - sada। kyonki sada ka varsa pa rahe ho na! to jab sada ka varsa paane ke adhikaari ho to sthiti bhi sadaakaal ki। ‘sada’ shabd ko sada yaad rakhna। yahi vardaan sabhi bachche ko baapdaada dete hain। sada khush rahenge, sada udti kala mein rahenge,sada sarva khazaanon se sampanna rahenge। aise vardaan lene vaali aatmaayen sahajyogi svatah ho jaati hain। aaj khushi ka din hai! sabse adhik khushi kisko hai, baap ko hai ya bachchon ko hai? (bachchon ko hai) baapdaada ko yeh khushi hai ki aisa koi baap saare world mein nahin hoga jiska harek bachcha shreshtha ho। baapdaada ek-ek bachche ki agar visheshta ka varnan karen to kai varsha beet jaaen। harek bachche ki mahima ke bade-bade shaatra ban jaaen। vishesh aatma ho - aisa nishchay ho to sada maayaajeet svatah ho jaayenge।

maiksiko group se -jitna door hai utna dil se sameep ho? aisa anubhav karte ho na? sabhi ne apni seat baapdaada ka diltakhta reserve kar liya hai? baapdaada ek-ek ratna ki value ko jaante hain। ek-ek ratna sthaapna ke kaarya ko saphal karne ke nimitta hai। to apne ko itne amoolya ratna samajhte ho?kitni bhaagyavaan aatmaayen ho jo itni door se bhi baap ne dhoondh kar apna banaaya hai। aaj ki duniya mein jo bade-bade vidvaan, aachaarya hain, unhon se aap padmaguna adhik bhaagyavaan ho। bas isi khushi me raho ki - ‘‘jo jeevan mein paana tha woh pa liya’’।

nyoojeelainda -nyoojeelainda ko new land bana rahe ho na? svayan ko bhi naya banaaya to vishwa ko bhi naya banaayenge na। apna occupation yahi sunaate aur likhte ho na ki ham sabhi vishwa ka nav-nirmaan karne vaale hain। to jahaan rehte ho usko to naya banaayenge na। harek sthaan ki apni visheshta hai। nyoojeelainda ki visheshta kya hai? nyoojeelainda mein gaye hue bhaaratvaasiyon ne phir se bhaarat ke shreshtha bhaagya banaane vaale baap ko pahchaan liya hai। bhaarat mein rehte bhaaratvaasi bachchon ne nahin jaana lekin videsh mein rehte bhaarat ki mahima ko aur baap ko jaan liya। nyoojeelainda mein bhaarat ke bichhde hue bachche achhe-achhe nikle hain। teachers peechhe mili hain। lekin service ki sthaapna pahle ki। isliye himmat vaale bachche, umang ullaas vaale bachche vishesh hain। samjha।!

jarman aur hembarga - sabhi baapdaada ke amoolya ratna ho? kaun se ratna ho aur kahaan rehte ho? mastak mani ho? gale ka haar ho ya kangan ho? (teenon hain) to baapdaada ke vishesh shrringaar ho gaye na! sabhi ko yeh nasha hai na ki ham vishwa ke vishesh ke maalik ke baalak hain। isi nashe mein khushi mein sada naachte raho। baap ke haath mein haath hai, baap ke saath khushi mein saara samay naacho। baapdaada ki company aur baapdaada ke parivaar ke ho। abhi aur kahaan club aadi mein jaane ki aavashyakta nahin। sada chehre mein aisi khushi ki jhalak ho jo aapka cheerful chehra board ka kaam kare। ismen svatah advertise ho jaayegi। baapdaada ko bhi group ko dekh karke khushi ho rahi hai। jis bhi sthaan par rehte ho us sthaan se bahut chune hue ratna baapdaada ne jo nikaale hain woh ratna yahaan pahunch gaye। baapdaada ki election mein vishesh aatmaayen ho। is election mein minister aadi nahin bante lekin yahaan to vishwa mahaaraaja bante ho।