Avyakt murli for Wednesday 27 April 1983

>

27-04-83 om shanti avyakt baapdaada madhuban

drishti tatha vritti parivartan ke liye yuktiyaan

kumaaron ki bhatti mein praan avyakt baapdaada ke madhur mahaavaakya:-

aaj baapdaada sarva purooshaarthiyon ka sangathan dekh rahe hain। isi purushaarthi shabd mein saara gyaan samaaya hua hai। purushaarthi arthaat puroosh arthaat rathi। kiska rathi hai? kiska puroosh hai? is prakriti ka maalik arthaat rath ka rathi। ek hi shabd ke arth swaroop mein sthit ho jaao to kya hoga! sarva kamzoriyon se sahaj paar ho jaayenge। puroosh prakriti ke adhikaari hain na ki adheen hai। rathi rath ko chalaane vaala hai na ki rath ke adheen ho chalne vaala। adhikaari sada sarvashaktivaan baap ki sarvashaktiyon ke adhikaari arthaat varse ke adhikaari va hakdaar hai। sarvashaktiyaan baap ki property hain aur property ka adhikaari harek bachcha hai। yeh sarva shaktiyon ka raajya bhaagya baapdaada sabhi ko janma-siddha adhikaar ke roop mein dete hain। janmate hi yeh svaraajya sarva shaktiyon ka,adhikaari swaroop ke smriti ka tilak, aur baap ke sneh mein samaaye hue swaroop ke roop mein diltakhta,sabhi ko janma lete hi diya hai। janmate hi vishwa kalyaan ke seva ka taaj har bachche ko diya hai। to janma ke adhikaar ka takhta, tilak,taaj aur raajya sabko praapta hai na?aise chaaron hi praaptiyon ki praapti swaroop aatmaayen kamzor ho sakti hain? kya yeh chaar praaptiyaan sambhaal nahin sakte hain? kabhi tilak mit jaata,kabhi takhta chhoot jaata, kabhi taaj ke badle bojh utha lete। vyartha kakhpan ki tokri utha lete। naam svaraajya hai lekin svayan hi raaja ke badle adheen praja ban jaate। aisa khel kyon karte ho?agar aisa hi khel karte rahenge to sada ke raajya bhaagya ke adhikaar ke sanskaar avinaashi kab banenge! agar isi khel mein chalte rahe to praapti kya hogi! jo apne aadi sanskaar avinaashi nahin bana sakte woh aadikaal ke raajya adhikaari kaise banenge। agar bahutkaal ke yoddhepan ke hi sanskaar rahe arthaat yuddha karte-karte samay bitaaya, aaj jeet kal haar। abhi- abhi jeet abhi-abhi haar। sada ke vijayeepan ke sanskaar nahin to isko kshatriy kaha jaayega ya brahman? brahman so devta bante hain। kshatriy to phir kshatriy hi jaakar banega। devta ki nishaani aur kshatriy ki nishaani mein dekho antar hai? yaadgaar chitron mein unko kamaan dikhaaya hai, unko murli dikhaai hai। murli vaale arthaat master murleedhar ban vikaaron roopi saamp ko vishaile banne ke bajaae vish samaapta kar, shaiya bana di। kahaan vish vaala saamp aur kahaan shaiya! itna parivartan kisse kiya?murli se। aise parivartan karne vaale ko hi ‘vijayi brahman’kaha jaata hai। to apne se poochho - mai kaun?

sabhi ne apni-apni kamzoriyon ko sachchaai se spashta kiya hai। us sachchaai ki marks to mil jaayengi lekin baapdaada dekh rahe the ki abhi tak jabki apne sanskaaron ko parivartan karne ki shakti nahin aai hai, vishwa parivartak kab banenge! abhi drishta ho,drishti dvaara dekhne vaale drishta,drishti kyon vichlit karte? divya netra se dekhte ho va is chamdi ke netron se dekhte ho? divya netra se sada svatah hi divya swaroop hi dikhaai dega। chamde ki aankhen chamde ko dekhti। chamdi ko dekhna, chamdi ka sochna yeh kiska kaam hai! pharishton ka?braahmanon ka? svaraajya adhikaariyon ka? to brahman ho ya kaun ho? naam bolen kya?

sadaiv harek naari shareerdhaari aatma ko shakti roop, jagat maata ka roop,devi ka roop dekhna yeh hai - divya netra se dekhna। kumaari hai, maata hai, behen hai, sevaadhaari nimitta shikshak hai, lekin hai kaun? shakti roop! behen-bhaai ke sambandh mein bhi kabhi-kabhi vritti aur drishti chanchal ho jaati hai। isliye sada shakti roop hain। shiv shaakti hain। shakti ke aage agar koi aasuri vritti se aate to unka kya haal hota hai,woh to jaante ho na। hamaari teacher nahin - shiv shakti hai। eeshvareey behen hai isse bhi oopar shiv shakti roop dekho। maataayen va bahnen bhi sada apne shiv shakti swaroop mein sthit rahen। mera vishesh bhaai, vishesh student nahin। woh shiv shakti hai aur aap mahaaveer ho। lanka ko jalaane vaale, pahle svayan ke andar raavan vansh ko jalaana hai। mahaaveer ki visheshta kya dikhaate hain? woh sada dil mein kya dikhaata hai? woh sada dil mein kya dikhaata hai? - ‘ek raam doosra na koi’। chitra dekha hai na। to har bhaai mahaaveer hai, har behen shakti hai। mahaaveer bhi raam ka hai, shakti bhi shiv ki hai। kisi bhi dehdhaari ko dekh sada mastak ke taraph aatma ko dekho। baat aatma se karni hai va shareer se? kaarya vyavhaar mein aatma kaarya karta hai va shareer? sada har second shareer mein aatma ko dekho। najar hi mastak mani par jaani chaahiye। to kya hoga?aatma aatma ko dekhte svatah hi aatma-abhimaani ban jaayenge। hai to yeh pahla paath na! pahla paath hi pakka nahin karenge,alpha ko pakka nahin karenge to be baadshaahi kaise milegi?sirf ek baat ki sada saavdhaani rakho। jo bhi karna hai,shreshtha karma va shreshtha banna hai। to har baat mein dridh sankalp vaale bano। kuchh bhi sahan karna pade,saamna karna pade lekin shreshtha karma va shreshtha parivartan karna hi hai। ismen purushaarthi shabd ko albele roop mein use nahin karo। purushaarthi hain,chal rahe hain,kar rahe hain,karna to hai,yeh albelepan ki bhaasha hai। usi ghadi purushaarthi shabd ko albele roop mein use nahin karo। purushaarthi hai, chal rahe hain, kar rahe hain, karna to hai, yeh albelepan ki bhaasha hai। usi ghadi purushaarthi shabd ke arth swaroop mein sthit ho jaao। puroosh hoon, prakriti dhokha de nahin sakti। yeh sab prakaar ki kamzoriyaan albelepan ki nishaaniyaan hain। mahaaveer to pahaad ko bhi second mein hatheli par rakh udne vaala hai। arthaat pahaad ko bhi paani ke samaan halka banaane vaala hai। chhoti-chhoti paristhitiyaan kya baat hain! phir to aise mahaaveer ko kahenge cheeti se ghabraane vaale। kya karen, ho jaata hai। yeh mahaaveer ke bol hain? samajhdaar yeh nahin kahenge ki kya karen, chor aa jaata hai। samajhdaar baar-baar dhokha nahin khaate। albele baar-baar dhokha khaate hain। safety ke saadhan hote hue agar kaarya mein nahin lagaate to usko kya kahenge?jaanta hoon ki nahin hona chaahiye lekin ho raha hai, isko kaun si samajhdaari kahenge!

dridh sankalp vaale bano। parivartan karna hi hai, kal bhi nahin, aaj। aaj bhi nahin abhi। isko kaha jaata hai ‘mahaaveer’। raam ke aagyaakaari। aaj to milne ka din tha phir bhi bachchon ne mehnat ki hai to mehnat ka phal respond dena pada। lekan in kamzoriyon ko saath le jaana hai? di hui cheez phir vaapis to nahin leni hai na! jabardasti aa jaave to bhi aane nahin dena। dushman ko aane diya jaata hai kya?attention,checking yeh double lock, yaad aur seva yeh doosra double laak sabke paas hai na। to sada yeh double laak laga rahe। donon taraph laak lagaana। samjha! ek taraph nahin lagaana। khaatiri to sthool sookshm bahut hui hai। double khaatiri hui hai na। jaise deedi daadi va nimitta bani hui aatmaon ne dil se khaatiri ki hai to uske return mein sab deedi daadi ko khaatiri dekar jaana ki ham abhi se sada ke vijayi rahenge। sirf mukh se nahin bolna,man se bolna। phir ek maas ke baad in photo vaalon ko dekhenge ki kya kar rahe hain। kisse bhi chhipaao lekin baap se to chhipa nahin sakenge। achha –

sada dridh sakanlpa dvaara socha aur kiya, donon ko samaan banaane vaale, sada divya netra dvaara aatmik roop ko dekhne vaale,jahaan dekhen vahaan aatma hi aatma dekhen,aise arth swaroop purushaarthi aatmaon ko baapdaada ka yaadapyaar aur namaste।’’