Avyakt murli for Wednesday 21 December 1983

>

21-12-83 om shanti avyakt baapdaada madhuban

turant daan mahaapunya ka rahasya

sarva samartha avyakt baapdaada apne shaktishaali samartha bachchon ke prati bole:-

aaj vidhaata, vardaata baap apne chaaron or ke ati snehi sevaadhaari bachchon ko dekh rahe the। chaaron or ke samartha bachche apne sneh ki visheshta dvaara door hote bhi sameep hain। sneh ke sambandh dvaara,buddhi ki spashtata aur svachchhata dvaara sameep ka, sanmukh ka anubhav kar rahe hain। teesre netra arthaat divyata ke dvaara unhon ke nayan buddhi roopi T.vi. mein door ke drishya spashta anubhav kar rahe hain। jaise is vinaashi duniya ke vinaashi saadhan T.vi. mein vishesh programmes ke samay sab switch on kar dete hain। aise bachche bhi vishesh samay par smriti ka switch on kar baithe hain। sabhi door-darshan dvaara door ke drishya ko sameep anubhav karne vaale bachchon ko baapdaada dekh-dekh harshit ho rahe hain। ek hi samay par double sabha ko dekh rahe hain।

aaj vishesh vatan mein brahma baap bachchon ko yaad kar rahe the। kyonki sabhi bachche jab se jo brahman jeevan mein chal rahe hain un braahmanon ki, samay pramaan manzil arthaat sampoornata ki sthiti tak kis gati se chal rahe hain, woh result dekh rahe the। chal to sab rahe hain lekin gati (speed) kya hai! to kya dekha! gati mein sadaiv ek raphtaar teevra ho arthaat sada teevragti ho, aise koi mein bhi koi dekhe। brahma baap ne gati ko dekh bachchon ki taraph se prashn kiya ki knowledgeful hote arthaat teenon kaalon ko jaante hue,purooshaartha aur parinaam ko jaante hue, vidhi aur siddhi ko jaante hue, phir bhi sadaakaal ki teevragti kyon nahin bana sakte! kya uttar diya hoga? kaaran ko bhi jaante ho, nivaaran ki vidhi ko bhi jaante ho phir bhi kaaran ko nivaaran mein badal nahin sakte।

baap ne muskaraate hue brahma baap se bola ki bahut bachchon ki ek aadat bahut puraani aur pakki hai - woh kaun si? kya karte! baap pratyaksha phal arthaat taaja phal khaane ko dete hain lekin aadat se majboor us taaje phal ko bhi sookha banaake sveekaar karte hain। kar lenge,ho jaayenge,hona to zaroor hai, banna to pahla number hi hai, aana to maala mein hi hai - aise sochte-sochte plan banaate-banaate,pratyaksha phal ko bhavishya ka phal bana dete hain। karenge,maana bhavishya phal। socha, kiya aur pratyaksha phal khaaya। cho sva ke prati chaahe seva ke prati, pratyaksha phal va seva ka taaja meva kam khaate hain। to shakti kisse aati hai? taaje phal se va sookhe se? kaeeyon ki aadat hoti hai - kha lenge - aise karte taaje ko sookha phal bana dete hain। aise hi yahaan bhi kehte - yeh hoga to phir karenge, yeh jyaada sochte hain। socha, direction mila aur kiya। yeh na karne se direction ko bhi taaje se sookha bana dete hain। phir sochte hain ki kiya to direction pramaan lekin result itni nahin nikli। kyon? samay pakadne se vela ke pramaan rekha badal jaati hai। koi bhi bhaagya ki rekha vela ke pramaan hi sunaate va banaate hain। is kaaran vela badalne se vaayumandal,vritti, vibration sab badal jaata hai। isliye gaaya hua hai - ‘turat daan mahaapunya’। direction mila aur usi vela mein usi umang se kiya। aisi seva ka taaja meva milta hai। jisko sveekaar karne arthaat praapta karne se shaktishaali aatma ban svatah hi teevragti mein chalte rehte। sabhi phal khaate ho lekin kaun sa phal khaate ho yeh check karo।

brahma baap sabhi bachchon ko taaje phal dvaara shaktishaali aatma banaae sada teevragti se chalne ka sankalp dete hain। sada brahma baap ke is sankalp ko smriti mein rakhte hue, har samay har karma ka shreshtha aur taaja phal khaate raho। to kabhi bhi kisi bhi prakaar ki kamzori va vyaadhi aa nahin sakti hai। brahma baap muskara rahe the। jaise vartamaan samay ke vinaashi doctors bhi kya raay dete hain! sab taaja khaao। jala karke, bhoon karke nahin khaao। roop badalkar nahin khaao। aise kehte hain na। to brahma baap bhi bachchon ko kah rahe the, jo bhi shreemat samay pramaan jis roop se milti hai usi samay par us roop se practical mein laao to sada hi brahma baap samaan ‘turat daani mahaapunya aatma’ ban number one mein aa jaayenge। brahma baap aur jagat-amba first raajya adhikaari, donon aatmaon ki visheshta kya dekhi? socha aur kiya। yeh nahin socha ki yeh karke peechhe yeh karenge। yahi visheshta thi। to follow mother karne vaale mahaapunya aatma,punya ka shreshtha phal kha rahe hain। aur sada shaktishaali hain। svapna mein bhi sankalp maatra bhi kamzori nahin। aise sada teevragti se chal rahe hain lekin koi mein bhi koi।

brahma baap ko, saakaar srishti ke rachayita hone ke kaaran, saakaar roop mein paalna ka part bajaane ke kaaran,saakar roop mein part bajaane vaale bachchon se vishesh sneh hai। jisse vishesh sneh hota hai uski kamzori so apni kamzori lagti hai। brahma baap ko bachchon ki is kamzori ka kaaran dekh, sneh aata hai ki abhi-abhi sada ke shaktishaali,sada ke teevra purushaarthi,sada udti kala vaale ban jaaen। baar-baar ki mehnat se chhoot jaaen।

suna brahma baap ki baaten। brahma baap ke naynon mein bachche hi samaaye hue hain। brahma ki vishesh bhaasha ka maaloom hai, kya bolte hain? baar-baar yahi kehte hain ‘‘mere bachche, mere bachche।’’ baap muskaraate hain। hain bhi brahma ke hi bachche isliye apne surname mein bhi brahmaakumaar-brahmaakumaari kehte ho na। shivkumaar-shivkumaari to nahin kehte ho। saath bhi brahma ko hi chalna hai। bhinna-bhinna naam roop se jyaada samay saath to brahma baap ka hi rehta hai na। brahma mukh vanshaavli ho। baap to saath hain hi। phir bhi saakaar mein brahma ka hi part hai। achha aur rooh-roohaan phir sunaayenge।

is group mein teen taraph ki vishesh nadiyaan aai hain। double videshi to abhi gupta ganga hai। kyonki tarna mein nahin hain। abhi dehli, karnaatak aur mahaaraashtra in teen nadiyon ka milan vishesh hai। baaki saath-saath choonge mein hain। jo tarna mein aaye hain woh to apna hak lenge hi lekin double videshi bhi bhaag-bhaag karke apna hak pahle lene pahunch gaye hain। to woh bhi pyaare honge na। double videshiyon ko bhi choonge mein maal mil raha hai। phir apne tarna mein milega। har taraph ke bachche baapdaada ko pyaare hain। kyonki har taraph ki apni-apni visheshta hai। dehli hai seva ka beej sthaan aur karnaatak tatha mahaaraashtra hai vriksha ka vistaar। jaise beej neeche hota hai aur vriksha ka vistaar jyaada hota hai to dehli beej roop bani। ant mein phir beej roop dharni par hi aavaaz hona hai। lekin abhi karnaatak, mahaaraashtra aur gujraat teenon ka vishesh vistaar hai। vistaar vriksha ki shobha hoti hai। karnaatak aur mahaaraashtra seva ke vistaar se brahman vriksha ki shobha hain। vriksha saj raha hai na। prashn bhi yeh do hi poochhte hain na। ek to kharche ki sankhya poochhte doosra braahmanon ki sankhya ka poochhte hain। to mahaaraashtra aur karnaatak donon hi sankhya ke hisaab se brahman parivaar ka shringaar hai। beej ki visheshta apni hai। beej nahin hota to vriksha bhi nahin nikalta। lekin beej abhi thoda gupta hai। vriksha ka vistaar jyaada hai। agar dehli mein bhi aap sab nahin jaate to seva ka foundation nahin hota। pahla nimantran seva ka liya ya mila। lekin dehli se hi shuru hua। isliye seva ka sthaan bhi vo hi bana aur raajya ka sthaan bhi vo hi banega। jahaan pahle braahmanon ke paanv pade। teertha sthaan bhi vahi bana aur raajasthaan bhi vahi banega। videsh ki bhi bahut mahima hai। videsh se bhi vishesh pratyakshata ke nagaade desh tak aayenge। videsh nahin hota to desh mein pratyakshata kaise hoti। isliye videsh ka bhi mahatva hai। videsh ki aavaaz ko sun bhaarat vaale jagenge। pratyakshata ka aavaaz nikalne ka sthaan to videsh hi hua na। to yeh hai videsh ka mahattva। videsh mein rahne vaale bhi hain to desh ke hi lekin nimitta maatra videsh mein rahne vaali shreshtha aatmaon ko umang utsaah mein dekh desh vaalon mein bhi umang utsaah aur jyaada hota hai। yeh bhi unhon ki gupta seva ka part hai। to sabhi ki visheshta apni hui na। achha –

sada turat daan mahaapunya aatmaaen, sochne aur karne mein sada teevra purushaarthi,har sankalp,har second seva ka meva khaane vaale, aise sada shaktishaali,follow father aur follow mother karne vaale, sada brahma baap ke sankalp ko saakaar mein laane vaale aise desh-videsh chaaron or ke samartha bachchon ko baapdaada ka yaad-pyaar aur namaste।