Avyakt murli for Wednesday 7 March 1984

>

07-03-84om shanti avyakt baapdaadaamdhuban

karmaateet, vaanaaprasthi aatmaayen hi teevragti ki seva ke nimitta

vaanaprasthi, karmaateet sthiti mein sthit karne vaale, sada karmaateet shivbaaba bole:-

‘‘madhuban vardaan bhoomi,samartha bhoomi,shreshtha sang ki bhoomi,sahaj parivartan bhoomi,sarva praaptiyon ke anubhav karaane vaali bhoomi hai। aisi bhoomi par aakar sabhi svayan ko sampanna arthaat sab baaton se bharpoor anubhav karte ho? koi apraapti to nahin hai? jo sarva khazaane mile hain unhon ko sadaakaal ke liye dhaaran kiya hai?aise samajhte ho ki yahaan se seva sthaan par jaakar mahaadaani ban yahi shaktiyaan, sarva praaptiyaan sarva ko dene ke nimitta banenge?sada ke liye svayan ko vighna vinaashak,samaadhaan swaroop anubhav kiya hai? sva ki samasya to agal rahi lekin anya aatmaon ke samasyaaon ka bhi samaadhaan swaroop।

samay ke pramaan ab brahman aatmaayen samasyaaon ke vash ho jaaen isse abhi paar ho gaye। samasyaaon ke vash hona yeh baal avastha hai। ab brahman aatmaon ki baal avastha ka samay samaapta ho chuka। yuva avastha mein maayaajeet banne ki vidhi se mahaaveer bane, seva mein chakravarti bane। anek aatmaon ke vardaani mahaadaani bane,anek prakaar ke anubhav kar mahaarthi bane। ab karmaateet,vaanaprastha sthiti mein jaane ka samay pahunch gaya hai। karmaateet vaanaprastha sthiti dvaara hi vishwa ki sarva aatmaon ko aadhaakalpa ke liye karma bandhanon se mukta karaae mukti mein bhejenge। mukta aatmaayen hi second mein mukti ka varsa baap se dila sakti hain। majority aatmaayen mukti ki bheekh maangane ke liye aap karmaateet vaanaprastha mahaadaani vardaani bachchon ke paas aayengi। jaise abhi aapke jad chitron ke aage, koi mandiron mein jaakar praarthana kar sukh shanti maangate hain। koi teertha sthaanon par jaakar maangate hain। koi ghar baithe maangate hain। jiski jahaan tak shakti hoti vahaan tak pahunchte hain,lekin yathaashakti yathaaphal ki praapti karte hain। koi door baithe bhi dil se karte hain aur koi moorti ke saamne teertha sthaan va mandiron mein jaakar bhi dikhaave maatra karte hain। svaartha vash karte hain। un sab hisaab anusaar jaisa karma, jaisi bhaavna vaise phal milta hai। aise ab samay pramaan aap chaitanya mahaadaani vardaani moortiyon ke aage praarthana karenge। koi seva sthaan roopi mandiron mein pahunchenge। koi mahaan teertha madhuban tak pahunchenge। aur koi ghar baithe saakshaatkaar karte divya buddhi dvaara pratyakshata ka anubhav karenge। sammukh na aate bhi sneh aur dridh sankalp se praarthana karenge। mansa mein aap chaitanya pharishton ka aahvaan kar mukti se varse ki anchali maangenge। thode samay mein sarva aatmaon ko varsa dilaane ka kaarya teevragti se karna hoga। jaise vinaash ke saadhan refine hone ke kaaran teevragti se samaapti ke nimitta banenge aise aap vardaani mahaadaani aatmaayen apne karmaateet pharishte swaroop ke sampoorn shaktishaali swaroop dvaara sarva ki praarthana ka respond mukti ka varsa dilaayengi। teevragti ke is kaarya ke liye master sarva shakti- vaan,shaktiyon ke bhandaar, gyaan ke bhandaar, yaad swaroop taiyaar ho? vinaash ki machinery aur vardaan ki machinery donon teevragti ke saath-saath chalengi।

bahutkaal se arthaat ab se bhi ever ready। teevragti vaale karmaateet, samaadhaan swaroop sada rahne ka abhyaas nahin karenge to teevragti ke samay dene vaale banne ke bajaae dekhne vaale banna pade। teevra purushaarthi bahut kaal vaale teevragti ki seva ke nimitta ban sakenge। yeh hai vaanaprastha arthaat sarva bandhanmukta,nyaare aur baap ke saath-saath teevragti ke seva ki pyaari avastha। to ab dene vaale banne ka samay hai na ki ab bhi svayan prati, samasyaaon prati lene vaale banne ka samay hai! sva ki samasyaaon mein umang hona ab woh samay gaya। samasya bhi ek apni kamzori ki rachna hai। koi dvaara va koi circumstance dvaara aai hui samasya vaastav mein apni kamzori ka hi kaaran hai। jahaan kamzori hai vahaan vyakti dvaara va circumstance dvaara samasya vaar karti hai। agar kamzori nahin to samasya ka vaar nahin। aai hui samasya, samasya ke bajaae samaadhaan roop mein anubhvi banaayegi। yeh apni kamzori ke utpanna hue Mickey mouse hain। abhi to sab hans rahe hain aur jis samay aati hai us samay kya karte hain? khud bhi Mickey mouse ban jaate hain। isse khelo, na ki ghabraao। lekin yeh bhi bachpan ka khel hain। na rachna karo na samay ganvaao। isse pare sthiti mein vaanaprasthi ban jaao। samjha!

samay kya kehta? baap kya kehta? ab bhi khilaunon se khelna achha lagta hai kya? jaise kaliyug ki maanav rachna bhi kya ban gai hai?murli mein sunte ho na। bichchhu-tindan ho gaye hain। to yeh kamzor samasyaaon ki rachna bhi bichchhu-tindan ke samaan svayan ko kaatte hain। shaktiheen bana dete hain। isliye sabhi madhuban se sampanna ban yeh dridh sankalp karke jaana ki ab se svayan ki samasya ko samaapta kiya hi lekin aur kis ke liye bhi samasya swaroop nahin banenge। sva prati, sarva ke prati sada samaadhaan swaroop rahenge। samjha!

itna kharcha karke mehnat karke aate ho to mehnat ka phal is dridh sankalp dvaara sahaj sada milta rahega। jaise mukhya baat pavitrata ke liye dridh sankalp kiya hai na ki mar jaayenge, sahan karenge lekin is vrat ko kaayam rakhenge। svapna mein va sankalp mein bhi agar jara bhi halchal hoti hai to paap samajhte ho na। aise samasya banna ya samasya ke vash ho jaana yeh bhi paap ka khaata hai। paap ki paribhaasha hai,pahchaan hai,jahaan paap hoga vahaan baap yaad nahin hoga,saath nahin hoga। paap aur baap, din aur raat jaise hain। to jab samasya aati hai us samay baap yaad aata hai?kinaara ho jaata hai na?phir jab pareshaan hote ho tab baap yaad aata hai। aur woh bhi bhakta ke roop mein yaad karte। adhikaari ke roop mein nahin। shakti de do,sahaara de do। paar laga do। adhikaari ke roop mein,saathi ke roop mein, samaan baan ke roop mein yaad nahin karte ho। to samjha ab kya karna hai? samaapti samaaroh manaana hai na। samasyaaon ka samaapti samaaroh manaayenge na! ya sirf dance karenge?achhe-achhe drama karte ho na! abhi yeh function karna kyonki abhi seva mein samay bahut chaahiye। vahaan pukaar rahe hain aur yahaan hil rahe hain,yeh to achha nahin hai na! woh vardaani mahaadaani kah yaad kar rahe hain aur aap mood aaph mein ro rahe hain to phal kaise denge! unke paas bhi aapke garam aansu pahunch jaayenge। woh bhi ghabraate rahenge। abhi yaad rakho ki ham brahma baap ke saath-ishta dev poojya aatmaayen hain। achha –

sada bahut kaal ke teevra purushaarthi, teevragti ki seva ke ever ready bachchon ko, sada vishwa-parivartan so samasya parivartak, samaadhaan swaroop bachchon ko, sada merciful ban bhakta aatmaon aur brahman aatmaon ke snehi aur sahayogi rahne vaali shreshtha aatmaayen, sada samasyaaon se pare rahne vaale,karmaateet vaanaprastha sthiti mein rahne vaale sampanna swaroop bachchon ko baapdaada ka yaadapyaar aur namaste।’’

New York party se -sabhi apne ko baap ki vishesh aatmaayen anubhav karte ho? sada yahi khushi rehti hai ki jaise baap sada shreshtha hai vaise ham bachche bhi baap samaan shreshtha hain?isi smriti se sada har karma svatah hi shreshtha ho jaayega। jaisa sankalp hoga vaise karma honge। to sada smriti dvaara shreshtha sthiti mein sthit rahne vaali vishesh aatmaayen ho। sada apne is shreshtha janma ki khushiyaan manaate raho। aisa shreshtha janma jo bhagwan ke bachche ban jaayen - aisa saare kalpa mein nahin hota। paanch hajaar varsha ke andar sirf is samay yeh alaukik janma hota hai। satayug mein bhi aatmaon ke parivaar mein aayenge lekin ab parmaatma santaan ho। to isi visheshta ko sada yaad rakho। sada - main brahman oonche te oonche dharma,karma aur parivaar ka hoon। isi smriti dvaara har kadam mein aage badhte chalo। purooshaartha ki gati sada tej ho। udti kala sada hi maayaajeet aur nirbandhan bana degi। jab baap ko apna bana diya to aur raha hi kya। ek rah gaya tha। ek mein hi sab samaaya hua hai। ek ki yaad mein, ekras sthiti mein sthit hone se shanti, shakti aur sukh ki anubhooti hoti rahegi। jahaan ek hai vahaan ek number hai। to sabhi number one ho na। ek ko yaad karna sahaj hai ya bahuton ko? baap sirf yahi abhyaas karaate hain aur kuchh nahin। das cheezen uthaana sahaj hai ya ek cheez uthaana sahaj hai? to buddhi dvaara ek ki yaad dhaaran karna bahut sahaj hai। lakshya sabka bahut achha hai। lakshya achha hai to lakshan achhe hote hi jaayenge। achha! om shanti।