Avyakt murli for Tuesday 24 April 1984

>

24-04-84om shanti avyakt baapdaadaamdhuban

vartamaan brahman janma - heere tulya

shreshtha svamaan mein sthit karne vaale, raajya bhaagya adhikaari bachchon prati baapdaada bole:-

aaj baapdaada apne sarva shreshtha bachchon ko dekh rahe hain। vishwa ki tamoguni apvitra aatmaon ke antar mein kitni shreshtha aatmaayen hain! duniya mein sarva aatmaayen pukaarne vaali hain, bhatakne vaali, apraapta aatmaayen hain। kitni bhi vinaashi sarva praaptiyaan ho phir bhi koi na koi apraapti zaroor hogi। aap brahman bachchon ko sarva praaptiyon ke daata ke bachchon ko apraapta koi vastu nahin। sada praapti swaroop ho। alpakaal ke sukh ke saadhan alpakaal ke vaibhav, alpakaal ka raajya adhikaar na hote hue bhi bin kaudi baadshaah ho। bephikar baadshaah ho। maayaajeet,prakritijeet svaraajya adhikaari ho। sada eeshvareey paalna mein palne vaale khushi ke jhoole mein,ateendriy sukh ke jhoole mein jhoolne vaale ho। vinaashi sampatti ke bajaae avinaashi sampattivaan ho। ratna jadit taaj nahin lekin parmaatma baap ke sir ke taaj ho। ratan jadit shringaar nahin lekin gyaan ratnon, gunon roopi ratnon ke shringaar se sada shringaare hue ho। kitna bhi bada vinaashi sarva shreshtha heera ho, moolyavaan ho lekin ek gyaan ke ratna,gun ke ratna ke aage unki kya value hain?in ratnon ke aage woh patthar ke samaan hain। kyonki vinaashi hain। nau lakhe haar ke aage bhi aap svayan baap ke gale ka haar ban gaye ho। prabhu ke gale ke haar ke aage nau laakh kaho va nau padma kaho va anginat padma ke moolya ka haar kuchh bhi nahin hai। 36prakaar ka bhojan bhi is brahma bhojan ke aage kuchh nahin hai। kyonki direct baapdaada ko bhog lagaakar is bhojan ko parmaatma prasaad bana dete ho। prasaad ki value aaj antim janma mein bhi bhakta aatmaon ke paas kitni hain?aap saadhaaran bhojan nahin khaate। prabhu prasaad kha rahe ho। jo ek-ek daana padmon se bhi shreshtha hai। aisi sarva shreshtha aatmaayen ho। aisa roohaani shreshtha nasha rehta hai? chalte-chalte apni shreshthata ko bhool to nahin jaate ho? apne ko saadhaaran to nahin samajhte ho?sirf sunne vaale ya sunaane vaale to nahin! svamaan vaale bane ho?sunne-sunaane vaale to anekaanek hain। svamaan vaale koton mein koi hain। aap kaun ho? anekon mein ho va koton mein koi vaalon mein ho?praapti ke samay par albela banna - unhon ko baapdaada kaun-si samajh vaale bachche kahen? paaye hue bhaagya ko,mile hue bhaagya ko anubhav nahin kiya arthaat abhi mahaan bhaagyavaan nahin bane to kab banenge? is shreshtha praapti ke sangamayug par har kadam yeh slogan sada yaad rakho ki ‘‘abhi nahin to kabhi nahin’’ samjha। achha!

abhi gujraat zone aaya hai। gujraat ki kya visheshta hai? gujraat ki yeh visheshta hai - chhota bada khushi mein zaroor naachte hain। apna chhota-pan,mota-pan sabhi bhool jaate hain। raas ke lagan mein magan ho jaate। saari-saari raat bhi magan rehte hain। to jaise raas ki lagan mein magan rehte, aise sada gyaan ki khushi ki raas mein bhi magan rehte ho na! is avinaashi lagan mein magan rahne ke bhi number one abhyaasi ho na! vistaar bhi achha hai। is baari mukhya sthaan (madhuban) ke sameep ke saathi donon zone aaye hain। ek taraph hai gujraat, doosre taraph hai raajasthaan। donon sameep hain na! saare kaarya ka sambandh raajasthaan aur gujraat se hai। to drama anusaar donon sthaanon ko sahayogi banne ka golden chance mila hua hai। donon har kaarya mein sameep aur sahayogi bane hue hain। sangamayug ke svaraajya ki raajgaddi to raajasthaan mein hain na! kitne raaje taiyaar kiye hain?raajasthaan ke raaje gaaye hue hain। to raaje taiyaar ho gaye hain ya ho rahe hain? raajasthaan mein raajaaon ki savaariyaan nikalti hain। to raajasthaan vaalon ko aisa poori savaari taiyaar kar laani chaahiye। tab to sab pushpon ki varsha karenge na! bahut thaath se savaari nikalti hai। to kitne raajaaon ki savaari aayegi? kam se kam jahaan sevaakendra hai vahaan ka ek-ek raaja aave to kitne raaje ho jaayenge। 25 sthaanon ke 25 raaje aaven to savaari sundar ho jaayegi na! drama anusaar raajasthaan mein hi seva ki gaddi bani hai। to raajasthaan ka bhi vishesh part hai। raajasthaan se hi vishesh seva ke ghode bhi nikle hain na। drama mein part hai sirf inko repeat karna hai।

karnaatak ka bhi vistaar bahut ho gaya hai। ab karnaatak vaalon ko vistaar se saar nikaalna pade। jab makkhan nikaalte hain to pahle to vistaar hota hai phir usse makkhan ‘saar’nikalta hai। to karnaatak ko bhi vistaar se ab makkhan nikaalna hai। saar swaroop banna aur banaana hai। achha-

achha, apne shreshtha svamaan mein sthit rahne vaale, sarva praaptiyon ke bhandaar, sada sangamayugi shreshtha svaraajya aur mahaan bhaagya ke adhikaari aatmaon ko, sada roohaani nashe aur khushi swaroop aatmaon ko baapdaada ka yaadapyaar aur namaste।’’

party se

sabhi apne svaraajya adhikaari shreshtha aatmaayen samajhte ho? svaraajya ka adhikaar mil gaya? aisi adhikaari aatmaayen shaktishaali hongi na! raajya ko - ‘satta’kaha jaata hai। satta arthaat shakti। aajkal ki government ko bhi kehte hain - raajya satta vaali party hai। to raajya ki satta arthaat shakti hai। to svaraajya kitni badi shakti hai? aisi shakti praapta hui hai? sabhi kamendriyaan aapki shakti pramaan kaarya kar rahi hain?raaja sada apni raajya sabha ko, raajya darbaar ko bulaakar poochhte hain ki - kaise raajya chal raha hai? to aap svaraajya adhikaari raajaaon ki kaarobaar theek chal rahi hai? ya kahaan neeche-oopar hota hai? kabhi koi raajya kaarobaari dhokha to nahin dete hain! kabhi aankh dhokha de,kabhi kaan dhokha de, kabhi haath, kabhi paanv dhokha de! aise dhokha to nahin khaate ho! agar raajya satta theek hai to har sankalp, har second mein padmon ki kamaai hai। agar raajya satta theek nahin hai to har second mein padmon ki ganvaai hoti hai। praapti bhi ek ki padmaguna hai to aur phir agar ganvaate hain to ek ka padmaguna ganvaate ho। jitna milta hai - utna jaata bhi hai। hisaab hai। to saare din ki raajya kaarobaar ko dekho। aankh roopi mantri ne theek kaam kiya? kaan roopi mantri ne theek kaam kiya?sabki department theek rahi ya nahin? yeh check karte ho ya thak kar so jaate ho? vaise karma karne se pahle hi check kar phir karma karna hai। pahle sochna phir karna। pahle karna peechhe sochna,yeh nahin। total result nikaalna alag baat hai lekin gyaani aatma pahle sochegi phir karegi। to sochasmajh kar har karma karte ho?pahle sochne vaale ho ya peechhe sochne vaale ho? agar gyaani peechhe soche usko gyaani nahin kahenge। isliye sada svaraajya adhikaari aatmaayen hain aur isi svaraajya ke adhikaar se vishwa ke raajya adhikaari banna hi hai। banenge ya nahin - yeh question nahin। svaraajya hai to vishwa raajya hai hi। to svaraajya mein gadbad to nahin hai na?dvaapar se to gadbad shaalaaon mein chakkar lagaate rahe। ab gadbad shaala se nikal aaye, abhi phir kabhi bhi kisi bhi prakaar ki gadbad shaala mein paanv nahin rakhna। yeh aisi gadbad shaala hai ek baar paanv rakha to bhool bhulaiya ka khel hai! phir nikalna mushkil ho jaata। isliye sada ek raasta। ek mein gadbad nahin hoti। ek raaste par chalne vaale sada khush - sada santushta।

Bangalore haaeekorta ke justice se avyakt baapdaada ki mulaakaat

kis sthaan par aur kya anubhav kar rahe ho? anubhav sabse badi athaarti hai। sabse pahla anubhav hai - aatma-abhimaani banne ka। ab aatma-abhimaani ka anubhav ho jaata hai to parmaatma-pyaar,parmaatma-praapti ka bhi anubhav svatah ho jaata hai। jitna anubhav utna shaktishaali। janma-janmaantar ke duhkhon se chhudaane ki judgement dene vaale ho na! ya ek hi janma ke duhkhon se chhudaane vaale judge ho? woh to hue haaeekorta ya supreemkorta ka judge। yeh hai sprichual judge। is judge banne mein padhaai ki va samay ki aavashyakta nahin hai। do akshar hi padhne hain - ‘aatma aur paramatma’। bas। iske anubhvi ban gaye to sprichual judge ban gaye। jaise baap janma-janma ke duhkhon se chhudaane vaale hain - isliye baap ko sukh ka daata kehte hain,to jaisa baap vaise bachche। double judge banne se anek aatmaon ke kalyaan nimitta ban jaayenge। aayenge ek case ke liye aur janmajanma ke case jeet kar jaayenge। bahut khush honge। to baap ki aagya hai- ‘sprichual judge bano’। achha - omshaanti।