Avyakt murli for Wednesday 16 January 1985

>

16-01-85 om shanti avyakt baapdaadaamdhuban

bhaagyavaan yug mein bhagwan dvaara varse aur vardaanon ki praapti

vardaata, bhaagyavidhaata baap apne bhaagyavaan bachchon prati bole

aaj srishti vriksha ke beejroop baap apne vriksha ke foundation bachchon ko dekh rahe hain। jis foundation dvaara saare vriksha kaavistaar hota hai। vistaar karne vaale saar swaroop vishesh aatmaon ko dekh rahe hain arthaat vriksha ke aadhaar moorta aatmaon ko dekh rahe hain। direct beejroop dvaara praapta ki hui sarva shaktiyon ko dhaaran karne vaali vishesh aatmaon ko dekh rahe hain। saare vishwa ki sarva aatmaon mein se sirf thodi-si aatmaon ko yeh vishesh part mila hua hai। kitni thodi aatmaayen hain jinhon ko beej ke saath sambandh dvaara shreshtha praapti ka part mila hua hai।

aaj baapdaada aise shreshtha bhaagyavaan bachchon ke bhaagya ko dekh rahe hain। sirf bachchon ko yeh do shabd yaad rahen ‘‘bhagwan aur bhaagya’’। bhaagya apne karmon ke hisaab se sabhi ko milta hai। dvaapar se ab tak aap aatmaon ko bhi karma aur bhaagya is hisaab kitaab mein aana padta hai lekin vartamaan bhaagyavaan yug mein bhagwan bhaagya deta hai। bhaagya ke shreshtha lakeer kheenchane ki vidhi ‘‘shreshtha karma roopi kalam’’aap bachchon ko de dete hain, jisse jitni shreshtha spashta, janma janmaantar ke bhaagya ki lakeer kheenchane chaaho utni kheench sakte ho। aur koi samay ko yeh vardaan nahin hai। isi samay ko yeh vardaan hai jo chaaho jitna chaaho utna pa sakte ho। kyon? bhagwan bhaagya ka bhandaara bachchon ke liye pharaakhdili se,bina mehnat ke de raha hai। khula bhandaar hai, taala chaabi nahin hai। aur itna bharpoor,akhut hai jo jitne chaahen,jitna chaahen le sakte hain। behad ka bharpoor bhandaara hai। baapdaada sabhi bachchon ko roj yahi smriti dilaate rehte hain ki jitna lene chaaho utna le lo। yathaashakti nahin, lo badi dil se lo। lekin khule bhandaar se, bharpoor bhandaar se lo। agar koi yathaashakti lete hain to baap kya kahenge? baap bhi saakshi ho dekh-dekh harshaate rehte ki kaise bhole-bhaale bachche thode mein hi khush ho jaate hain। kyon? 63janma bhaktapan ke sanskaar hone ke kaaran abhi bhi sampanna praapti ke bajaae thode ko hi bahut samajh usi mein raaji ho jaate hain।

is samay avinaashi baap dvaara sarva praapti ka samay hai, yeh bhool jaate hain। baapdaada phir bhi bachchon ko smriti dilaate, samartha bano। ab bhi toolate nahin hua hai। let aaye ho lekin toolate ka samay abhi nahin hai। isliye abhi bhi donon roop se baap roop se varsa, satguru ke roop se vardaan milne ka samay hai। to vardaan aur varse ke roop mein sahaj shreshtha bhaagya bana lo। phir yeh nahin sochna pade ki bhaagya vidhaata ne bhaagya baanta lekin mainne itna hi liya। sarvashaktivaan baap ke bachche yathaashakti nahin ho sakte।। abhi vardaan hai jo chaaho woh baap ke khajaane se adhikaar ke roop se le sakte ho! kamzor ho to bhi baap ki madad se, himmate bachche madde baap, vartamaan aur bhavishya shreshtha bana sakte ho। baaki thoda samay hai - baap ke sahayog aur baap ke bhaagya ke khule bhandaar milne ka। abhi sneh ke kaaran baap ke roop mein har samay har paristhiti mein saathi hai lekin is thode samay ke baad saathi ke bajaae saakshi ho dekhne ka part chalega। chaahe sarvashakti sampanna bano,chaahe yathaashakti bano - donon ko saakshi ho dekhenge। isliye is shreshtha samay mein baapdaada dvaara varsa,vardaan,sahayog,saath is bhaagya ki jo praapti ho rahi hai usko praapta kar lo। praapti mein kabhi bhi albele nahin banna। abhi itne varsha pade hain, srishti parivartan ke samay aur praapti ke samay donon ko milaao mat। is albele pan ke sankalp se sochte nahin rah jaana। sada brahman jeevan mein sarva praapti ka,bahutkaal ki praapti ka yahi bol yaad rakho‘‘ab nahin to kab nahin।’’

isliye kaha ki sirf do shabd bhi yaad rakho - ‘bhagwan aur bhaagya’। to sada padmaapdam bhaagyavvaan rahenge। baapdaada aapas mein bhi roohroohaan karte hain ki aise puraani aadat se majboor kyon ho jaate hain?baap majboot banaate, phir bhi bachche majboor ho jaate hain। himmat ki taange bhi dete hain, pankh bhi dete hain,saath-saath bhi udaate phir bhi neeche oopar neeche oopar kyon hote hain। maujon ke yug mein bhi moonjhate rehte hain। isko kehte hain - puraani aadat se majboor! majboot ho ya majboor ho? baap double light banaate, sab bojh svayan uthaane ke liye saath dete phir bhi bojh uthaane ki aadat, bojh utha lete hain। phir kaun-sa geet gaate hain,jaante ho?kya, kyon,kaise yeh ‘‘ke ke’’ ka geet gaate hain। doosra bhi geet gaate hain ‘‘ge ge’’ ka। yeh to bhakti ke geet hain। adhikaareepan ka geet hai ‘‘pa liya’’। to kaunsa geet gaate ho? saare din mein check karo ki aaj ka geet kaun-sa tha?baapdaada ka bachchon se sneh hai isliye sneh ke kaaran sada yahi sochte ki har bachcha sada sampanna ho। samartha ho। sada padmaapadma bhaagyavaan ho। samjha। achha –

sada samay pramaan varse aur vardaan ke adhikaari, sada bhaagya ke khule bhandaar se sampoorn bhaagya banaane vaale, yathaashakti ko sarva shakti sampanna se parivartan karne vaale, shreshtha karmon ki kalam dvaara sampanna takdeer ki lakeer kheenchane vaale, samay ke mahatva ko jaan sarva praapti swaroop shreshtha aatmaon ko baapdaada ka sampanna banaane ka yaadapyaar aur namaste।

party se avyakt baapdaada ki mulaakaat - 1. sada apna alaukik janma, alaukik jeevan, alaukik baap, alaukik varsa yaad rehta hai? jaise baap alaukik hai to varsa bhi alaukik hai। laukik baap had ka varsa deta,alaukik baap behad ka varsa deta। to sada alaukik baap aur varse ki smriti rahe। kabhi laukik jeevan ke smriti mein to nahin chale jaate?marjeeva ban gaye na। jaise shareer se marne vaale kabhi bhi pichhle janma ko yaad nahin karte,aise alaukik jeevan vaale, janma vaale,laukak janma ko yaad nahin kar sakte। abhi to yug hi badal gaya। duniya kaliyugi hai,aap sangamayugi ho, sab badal gaya। kabhi kaliyug mein to nahin chale jaate। yeh bhi baardar hai। baardar cross kiya aur dushman ke havaale ho gaye। to baardar cross to nahin karte?sada sangamayugi alaukik jeevan vaali shreshtha aatma hai, isi smriti mein raho। abhi kya karenge? bade se bada business man bano। aisa business man jo ek kadam se padmon ki kamaai jama karnevaale। sada behad ke baap ke hain,to behad ki seva mein, behad ke umang-utsaah se aage badhte raho।

2. sada double light sthiti ka anubhav karte ho?double light sthiti ki nishaani hai - sada udti kala। udti kala vaale sada vijayi? udti kala vaale sada nishchay buddhi, nishchinta। udti kala kya hai? udti kala arthaat oonche se oonchi sthiti। udte hain to ooncha jaate hain na?oonche te oonchi sthiti mein rahne vaali oonchi aatmaaye samajh aage badhte chalo। udti kala vaale arthaat buddhi roopi paanv dharni par nahin। dharni arthaat deh-bhaan se oopar। jo deh-bhaan ki dharni se oopar rehte woh sada pharishte hain। jiska dharni se koi rishta nahin। deh-bhaan ko bhi jaan liya, dehi-abhimaani sthiti ko bhi jaan liya। jab donon ke antar ko jaan gaye to deh-abhimaan mein aa nahin sakte। jo achha lagta hai vahi kiya jaata hai na। to sada yahi smriti se sada udte rahenge। udti kala mein chale gaye to neeche ki dharni aakarshit nahin karti, aise pharishta ban gaye to deh roopi dharni aakarshit nahin kar sakti।

3. sada sahayogi, karmayogi,svatah yogi,nirantar yogi - aisi sthiti ka anubhav karte ho? jahaan sahaj hai vahaan nirantar hai। sahaj nahin to nirantar nahin। to nirantar yogi ho ya antar pad jaata hai? yogi arthaat sada yaad mein magan rahne vaale। jab sarva sambandh baap se ho gaye to jahaan sarva sambandh hain vahaan yaad svatah hogi aur sarva sambandh hain to ek ki hi yaad hogi। hai hi ek to sada yaad rahegi na। to sada sarva sambandh se ek baap doosra na koi। sarva sambandh se ek baap… yahi sahaj vidhi hai,nirantar yogi banne ki। jab doosra sambandh hi nahin to yaad kahaan jaayegi। sarva sambandhon se sahajyogi aatmaayen yeh sada smriti rakho। sada baap samaan har kadam mein sneh aur shakti donon ka balance rakhne se saphalta svatah hi saamne aati hai। saphalta janma-siddha adhikaar hai। busy rahne ke liye kaam to karna hi hai lekin ek hai mehnat ka kaam,doosra hai khel ke samaan। jab baap dvaara shaktiyon ka vardaan mila hai to jahaan shakti hai vahaan sab sahaj hai। sirf parivaar aur baap ka balance ho to svatah hi blessing praapta ho jaati hai। jahaan blessing hai vahaan udti kala hai। na chaahte hue bhi sahaj saphalta hai।

4. sada baap aur varsa donon ki smriti rehti hai? baap kaun aur varsa kya mila hai yeh smriti svatah samartha bana deti hai। aisa avinaashi varsa jo ek janma mein anek janmon ki praalabdha banaane vaala hai,aisa varsa kabhi mila hai?abhi mila hai,saare kalpa mein nahin। to sada baap aur varsa isi smriti se aage badhte chalo। varse ko yaad karne se sada khushi rahegi aur baap ko yaad karne se sada shaktishaali rahenge। shaktishaali aatma sada maayaajeet rahegi aur khushi hai to jeevan hai। agar khushi nahin to jeevan kya? jeevan hote bhi na ke baraabar hai। jeete hue bhi mrityu ke samaan hai। jitna varsa yaad rahega utni khushi। sada khushi rehti hai?aisa varsa koto mein koi ko milta hai aur humein mila hai। yeh smriti kabhi bhi bhoolna nahin। jitni yaad utni praapti। sada yaad aur sada praapti ki khushi।

kumaaron se - kumaar jeevan shaktishaali jeevan hai। to brahmaakumaar arthaat roohaani shaktishaali। jismaani shaktishaali nahin, roohaani shaktishaali। kumaar jeevan mein jo chaahe woh kar sakte ho। to aap sab kumaaron ne apne is kumaar jeevan mein apna vartamaan aur bhavishya bana liya, kya banaaya? roohaani banaaya। eeshvareey jeevan vaale brahmaakumaar bane to kitne shreshtha jeevan vaale ho gaye। aisi shreshtha jeevan ban gai jo sada ke liye dukh se aur dhokhe se, bhatakne se kinaara ho gaya। nahin to jismaani shakti vaale kumaar bhatakte rehte hain। ladna, jhagadna dukh dena, dhokha dena…yahi karte hain na। to kitni baaton se bach gaye। jaise svayan bache ho vaise auron ko bhi bachaane ka umang aata hai। sada hamjinsa ko bachaane vaale। jo shaktiyaan mili hain woh auron ko bhi do। akhut shaktiyaan mili hai na। to sabko shaktishaali banaao। nimitta samajhkar seva karo। main sevaadhaari hoon,nahin। baba karaata hai, main nimitta samajhkar seva karo। main sevaadhaari hoon nahin। baba karaata hai, main nimitta hoon। main pan vaale nahin। jismen maimpan nahin hai woh sachche sevaadhaari hain।

yuglon se - sada svaraajya adhikaari aatmaayen ho? sva ka raajya arthaat sada adhikaari। adhikaari kabhi adheen nahin ho sakte। adheen hain to adhikaar nahin। jaise raat hai to din nahin। din hai to raat nahin। aise adhikaari aatmaayen kisi bhi karmaindriyon ke, vyakti ke, vaibhav ke adheen nahin ho sakte। aise adhikaari ho?jab master sarvashviÌtavaan ban gaye to kya hue? adhikaari! to sada svaraajya adhikaari aatmaayen hain is samartha smriti se sada sahaj vijayi bante rahenge। svapna mein bhi haar ka sankalp maatra na ho। isko kaha jaata hai - sada ke vijayi। maaya bhaag gai ki bhaga rahe ho? itna bhagaaya hai jo vaapas na aaye। kisko vaapas nahin laana hota hai to usko bahut-bahut door chhodkar aate hain। to itna door bhagaaya hai। achha –

Mauritius party se -sabhi lucky sitaare ho na? kitna bhaagya praapta kar liya! is jaisa bada bhaagya koi ka ho nahin sakta। kyonki bhaagya vidhaata baap hi aapka ban gaya। uske bachche ban gaye। jab bhaagya vidhaata apna ban gaya to isse shreshtha bhaagya kya hoga! to aise shreshtha bhaagyavaan chamakte hue sitaare ho। aur sabko bhaagyavaan banaane vaale ho। kyonki jisko koi achhi cheez milti hai woh doosron ko dene ke sivaae rah nahin sakte। jaise yaad ke bina nahin rah sakte vaise seva ke bina bhi nahin rah sakte। ek-ek bachcha anekon ka deep jalaae deepmaala karne vaala hai। deepmaala raajtilak ki nishaani hai। to deepmaala karne vaalon ko raajya tilak mil jaata hai। seva karna arthaat raajya tilakdhaari banna। seva ke umang utsaah mein rahne vaale doosron ko bhi umang-utsaah ke pankh de sakte hain। achha – om shanti।