Avyakt murli for Monday 9 December 1985

>

09-12-85om shanti avyakt baapdaadaamdhuban

baalak so maalik

avyakt baapdaada bole

aaj baapdaada apni shakti sena ko dekh rahe hain ki yeh roohaani shakti sena manjeet jagatjeet hain? manjeet arthaat man ke vyartha sankalp, vikalpa jeet hai। aise jeete hue bachche vishwa ke raajya adhikaari bante hain। isliye ‘man jeete jagatjeet’gaaya hua hai। jitna is samay sankalp-shakti arthaat man ko sva ke adhikaar mein rakhte ho utna hi vishwa ke raajya ke adhikaari bante ho। abhi is samay eeshvareey baalak ho aur abhi ke baalak hi vishwa ke maalik banenge। bina baalak banne ke maalik nahin ban sakte। jo bhi had ke maalikpan ka had ka nasha hai use samaapta kar had ke maalikpan se baalakpan mein aana hai tab hi ‘baalak so maalik’ banenge। isliye bhakti maarga mein bhi kitna koi bhi desh ka bada maalik ho, dhan ka maalik ho,parivaar ka maalik ho lekin baap ke aage sab ‘‘baalak tere’’ kah kar hi praarthana karte hain। main phalaana maalik hoon aise kabhi nahin kahenge। tum brahman bachche bhi baalak bante ho tab hi abhi bhi bephkar baadshaah bante ho aur bhavishya mein vishwa ke maalik ya baadshaah bante ho। ‘‘baalak so maalik hoon’’yeh smriti sada nir-anhakaari,niraakaari sthiti ka anubhav karaati hai। baalak banna arthaat had ke jeevan ka parivartan hona। jab brahman bane to brahman-pan ki jeevan ka pahla sahaj te sahaj paath kaun-sa padha?bachchon ne kaha - ‘baba’aur baap ne kaha - ‘bachcha’arthaat baalak। is ek shabd ka paath knowledgeful bana deta hai। baalak ya bachcha yeh ek shabd padh liya to saare is vishwa ki to kya lekin teenon lokon ka knowledge padh liya। aaj ki duniya mein kitne bhi bade knowledgeful hon lekin teenon lokon ki knowledge nahin jaan sakte। is baat mein aap ‘ek shabd padhe’hue ke aage kitna bada knowledgeful bhi - anjaan hai। aise master knowledgeful kitna sahaj bane ho। ‘baba aur bachche’ is ek shabd mein sab kuchh samaaya hua hai। jaise beej mein saara jhaad samaaya hua hai to baalak athva bachcha banna arthaat sada ke liye maaya se bachna। maaya se bache raho arthaat ‘ham bachche hain’ -sada is smriti mein raho। sada yahi smriti rakho, ‘‘bachcha bana arthaat bach gaya’’। yeh paath mushkil hai kya? sahaj hai na। phir bhoolte kyon ho? kai bachche aise sochte hain ki bhoolne chaahte nahin hai lekin bhool jaata hai। kyon bhool jaata?to kehte bahut samay ke sanskaar hain va puraane sanskaar hain। lekin jab marjeeva bane to marne ke samay kya karte hain?agni sanskaar karte ho na। to puraane ka sanskaar kiya tab naya janma liya। jab sanskaar kar liya phir puraane sanskaar kahaan se aaye। jaise shareer ka sanskaar karte ho to naam-roop samaapta ho jaata hai। agar naam bhi lenge to kahenge phalaana tha। hai, nahin kahenge। to shareer ke sanskaar hone ke baad shareer samaapta ho gaya। brahman jeevan mein kiska sanskaar karte ho? shareer to vahi hai। lekin puraane sanskaaron,puraani smritiyon ka,svabhaav ka sanskaar karte ho tab marjeeva kahlaate ho। jab sanskaar kar liya to puraane sanskaar kahaan se aaye। agar sanskaar kiya hua manushya phir se aapke saamne aa jaave to usko kya kahenge? bhoot kahenge na। to yeh bhi puraane sanskaar, kiye hue sanskaar agar jaagrit ho jaate to kya kahenge?yeh bhi maaya ke bhoot kahenge na। bhooton ko bhagaaya jaata hai na। varnan bhi nahin kiya jaata hai। yeh puraane sanskaar kah karke apne ko dhokha dete hain। agar aapko puraani baaten achhi lagti hain to vaastavik puraane te puraane aadikaal ke sanskaaron ko yaad karo। yeh to madhyakaal ke sanskaar the। yeh puraane te puraane nahin hain। madhya ko beech kehte hain to madhyakaal arthaat beech ko yaad karna arthaat beech bhanvar mein pareshaan hona hai। isliye kabhi bhi aisi kamzori ki baaten nahin socho। sada yahi do shabd yaad rakho - baalak so maalik। baalak pan hi maalikpan svatah hi smriti mein laata hai। baalak banna nahin aata?

baalak bano arthaat sabhi bojh se halke bano। kabhi tera kabhi mera, yahi mushkil bana deta hai। jab koi mushkil anubhav karte ho tab to kehte ho - tera kaam tum jaano। aur jab sahaj hota hai to ‘mera’ kehte ho। mera-pan samaapta hona arthaat baalak so maalik banna। baap to kehte hain beggar bano। yeh shareer roopi ghar bhi tera nahin। yeh loan mila hua hai। sirf eeshvareey seva ke liye baba ne loan de karke ‘trustee’banaaya hai। yeh eeshvareey amaanat hai। aapne to sab kuchh tera kah karke baap ko de diya। yeh vaayda kiya na va bhool gaye ho? vaayda kiya hai ya aadha tera aadha mera। agar tera kaha hua mera samajh kaarya mein lagaate ho to kya hoga। usse sukh milega? saphalta milegi? isliye amaanat samajh tera samajh chalte to baalak so maalik ban ke khushi mein, nashe mein svatah hi rahenge samjha! ek yeh paath sada pakka rakho। paath pakka kiya na ya apne-apne sthaanon par jaakar phir bhool jaayenge, abhool bano। achha-

sada roohaani nashe mein rahne vaale baalak so maalik bachchon ko sada baalakpan arthaat bephkar baadshaahpan ki smriti mein rahne vaale, sada mili hui amaanat ko trustee ban seva mein lagaane vaale bachchon ko, sada naye umang naye utsaah mein rahne vaale bachchon ko baapdaada ka yaadapyaar aur namaste।

party se avyakt baapdaada ki mulaakaat - kumaariyon se - yeh lashkar kya karega? lashkar va sena sada vijay praapta karti hai। sena vijay ke liye hoti hai। dushman se ladne ke liye sena rakhte hain। to maaya dushman par vijay paana yahi aap sabka karttavya hai। sada apne is karttavya ko jaan jaldi se jaldi aage badhte jaao। kyonki samay tej raphtaar se aage ja raha hai। samay ki raphtaar tej ho aur apni kamzor ho to samay par pahunch nahin sakenge। isliye raphtaar ko tej karo। jo dheele hote hain woh svayan hi shikaar ho jaate hain। shaktishaali sada vijayi hote hain। to aaj sab vijayi ho?

sada yahi lakshya rakho ki serviceable ban seva mein sada aage badhte rehna। kyonki kumaariyon ko koi bhi bandhan nahin hain। jitna seva karne chaahen kar sakti hain। sada apne ko baap ki hoon aur baap ke liye hoon aisa samajhkar aage badhte chalo। jo seva mein nimitta bante hain unhein khushi aur shakti ki praapti svatah hoti hai। seva ka bhaagya koton mein koi ko hi milta hai। kumaariyaan sada poojya aatmaayen hain। apne poojya swaroop ko smriti mein rakhte hue har karma karo। aur har karma ke pahle check karo ki yeh kaarya poojya aatma ke pramaan hai? agar nahin hai to parivartan kar lo। poojya aatmaayen kabhi saadhaaran nahin hoti, mahaan hoti hain। 100braahmanon se uttam kumaariyaan ho।100, ek-ek kumaari ko taiyaar karne hain। unki seva karni hai। kumaariyon ne kya kamaal ka plan socha hai?kisi bhi aatma ka kalyaan ho isse badi baat aur kya hai? apni mauj mein rahne vaali ho na। kabhi gyaan ke mauj mein, kabhi yaad ki mauj mein। kabhi prem ki mauj mein। maujen hi maujen hain। sangamayug hai hi maujon ka yug। achha- kumaariyon ke oopar baapdaada ki sada hi najar rehti hai। kumaariyaan svayan ko kya banaati hain yeh unke oopar hai lekin baapdaada to sabhi ko vishwa ka maalik banaane aaye hain। sada vishwa ke maalikpan ki khushi aur nasha rahe। sada athak seva mein aage badhte raho। achha-