Avyakt murli for Wednesday 8 January 1986

>

08-01-86om shanti avyakt baapdaadaamdhuban

dharti ke ‘holi’sitaare

gyaan soorya baba gyaan sitaaron prati bole

aaj gyaan soorya baap apne anek prakaar ke visheshtaaon se sampanna vishesh sitaaron ko dekh rahen hain। har ek sitaare ki visheshta vishwa ko parivartan karne ki roshni dene vaala hai। aajkal sitaaron ki khoj vishwa mein vishesh karte hain। kyonki sitaaron ka prabhaav prithvi par padta hai। science vaale aakaash ke sitaaron ki khoj karte, baapdaada apne holi stars ki visheshtaaon ko dekh rahen hain। jab aakaash ke sitaare itni door se apna prabhaav achha va bura daal sakte hain to aap holi stars is vishwa ko parivartan karne ka, pavitrata-sukh-shaantimay sansaar banaane ka prabhaav kitna sahaj daal sakte ho! aap dharti ke sitaare,woh aakaash ke sitaare। dharti ke sitaare is vishwa ko halchal se bajaae sukhi sansaar, svarna sansaar banaane vaale ho। is samay prakriti aur vyakti donon hi halchal machaane ke nimitta hain lekin aap purooshottam aatmaayen vishwa ko sukh ki saans, shanti ki saans dene ke nimitta ho। aap dharti ke sitaare sarva aatmaon ki sarva aashaayen poorn karne vaale praapti swaroop sitaare sarva ki na ummeedon ko ummeedon mein badalne vaale shreshtha ummeedon ke sitaare ho। to apne shreshtha prabhaav ko check karo ki mujh shanti ke sitaare, holi sitaare ki, sukh swaroop sitaare ki, sada saphalta ke sitaare ki,sarva aashaayen poorn karne vaale sitaare ki, santushtata ke prabhaavshaali sitaare ki prabhaav daalne ki chamak aur jhalak kitni hai? kahaan tak prabhaav daal rahe hain! prabhaav ki speed kitni hai? jaise un sitaaron ki speed chaik karte hain, vaise apne prabhaav ki speed svayan check karo। kyonki vishwa mein is samay aavashyakta aap holi sitaaron ki hai। to baapdaada sabhi variety sitaaron ko dekh rahe the।

yeh roohaani sitaaron ka sangathan kitna shreshtha hai aur kitna sukhdaai hai। aise apne ko chamakta hua sitaara samajhte ho? jaise un sitaaron ko dekhne ke liye kitne ichchhuk hain। ab samay aisa aa raha hai jo aap holi sitaaron ko dekhne ke liye sabhi ichchhuk honge। dhoondhenge aap sitaaron ko ki yeh shanti ka prabhaav,sukh ka prabhaav, achal banaane ka prabhaav kahaan se aa raha hai। yeh bhi research karenge। abhi to prakriti ki khoj taraph lage hue hain, jab prakriti ki khoj se thak jaavenge to yeh roohaani research karne ka sankalp aayega। uske pahle aap holi sitaare svayan ko sampanna bana lo। kisi na kisi gun ki,chaahe shanti ki, chaahe shakti ki visheshta apne mein bharne ki vishesh teevragti ki taiyaari karo। aap bhi research karo। sabhi gun to hain hi lekin phir bhi kam se kam ek gun ki visheshta se svayan ko vishesh usmein sampanna banaao। jaise doctors hote hain। general beemaariyon ki knowledge to rakhte hi hain lekin saath-saath kisi mein vishesh knowledge hoti hai। us visheshta ke kaaran naameegraami ho jaate hain। to sarvagun sampanna banna hi hai। phir bhi ek visheshta ko vishesh roop se anubhav mein laate seva mein laate aage badhte chalo। jaise bhakti mein bhi har ek devi ki mahima mein, har ek ki visheshta alag-alag gaai jaati hai। aur poojan bhi usi visheshta pramaan hota hai jaise sarasvati ko vishesh vidya ki devi kah karke maante hain aur poojte hain। hai shakti swaroop lekin visheshta vidya ki devi kah karke poojte hain। lakshmi ko dhan devi kah karke poojte hain। aise apne mein sarvagun,sarvashaktiyaan hote bhi ek visheshta mein vishesh research kar svayan ko prabhaavshaali banaao। is varsha mein har gun ki,har shakti ki research karo। har gun ki maheenta mein jaao। maheenta se uski mahaanta ka anubhav kar sakenge। yaad ki stages ka,purooshaartha ki stages ka maheenta se research karo। guhyata mein jaao। deep anubhootiyaan karo। anubhav ke saagar ke tale me jaao। sirf oopar-oopar ki lahron mein lahraane ke anubhvi banna yahi sampoorn anubhav nahin hai। aur antarmukhi ban guhya anubhvon ke ratnon se buddhi ko bharpoor banaao। kyonki pratyakshata ka samay sameep aa raha hai। sampanna bano, sampoorn bano to sarva aatmaon ke aage se agyaan ka parda hat jaae। aapke sampoornata ki roshni se yeh parda svatah hi khul jaayega। isliye research karo। search light bano। tab hi kahenge golden jubilee manaai।

golden jubilee ki visheshta, har ek dvaara sabhi ko yahi anubhav ho, drishti se bhi sunahri shaktiyon ki anubhooti ho। jaise light ki kirnen aatmaon ko golden banaane ki shakti de rahi hain। to har sankalp, har karma gold ho। gold banaane ke nimitta ho। yeh golden jubilee ka varsha apne ko paarasnaath ke bachche ‘master paarasnaath’ samjho। kaisi bhi lohe samaan aatma ho lekin paaras ke sang se loha bhi paaras ban jaae। yeh loha hai, yeh nahin sochna। main paaras hoon yeh samajhna। paaras ka kaam hi hai lohe ko bhi paaras banaana। yahi lakshya aur yahi lakshan sada smriti mein rakhna। tab holi sitaaron ka prabhaav vishwa ki najron mein aayega। abhi to bichaare ghabra rahe hain,phalaana sitaara aa raha hai। phir khush honge ki ‘holi’sitaare aa rahe hain। chaaron or vishwa mein holi sitaaron ki rimjhim anubhav hogi। sabke mukh se yahi aavaaj niklega ki lucky sitaare,saphalta ke sitaare aa gaye! sukh-shanti ke sitaare aa gaye! abhi to doorbeeniyaan lekar dekhte hain na। phir teesre netra,divya netra se dekhenge। lekin yeh varsha taiyaari ka hai। achhi tarah se taiyaari karna। achha - programme mein kya karenge! baapdaada ne bhi vatan mein drishya emerge kiya,drishya kya tha?

conference ki stage par to speakers hi bithaate ho na। conference stage arthaat speakers ki stage। yeh rooprekha banaate ho na। topic par bhaashan to sada hi karte ho- aur achhe karte ho lekin is golden jubilee mein bhaashan ka samay kam ho aur prabhaav jyaada ho। usi samay mein bhinna-bhinna speakers apna prabhaavshaali bhaashan kar sakte, uski woh rooprekha kya ho। ek din vishesh aadha ghanta ke liye yeh programme rakho aur jaise baahar vaale ya vishesh bhaashan vaale bhaashan karte hain woh bhala chale lekin aadha ghanta ke liye ek din stage ke bhi aage bhinna bhinna aayu vaale arthaat ek chhota-sa bachcha, ek kumaari, ek pavitra yugal ho। ek pravriti mein rahne vaale yugal ho। ek bujurga ho। woh bhinna-bhinna chandrama ki tarah stage par baithe hue hon। aur stage ki light tej nahin ho। saadhaaran ho। aur ek-ek, teen-teen minute mein apna vishesh golden versions sunaave ki is shreshtha jeevan banne ka golden varshan kya mila jisse jeevan bana li। chhota-sa kumaar arthaat bachcha ya bachchi sunaave,bachchon ke liye kya golden versions mile। kumaari jeevan ke liye golden varshan kya mila? baal brahmachaari yuglon ko golden varshan kya mila। aur pravriti mein rahne vaale trustee aatmaon ko golden varshan kya mila? bujurga ko golden varshan kya mila? woh teen-teen minute bole। lekin last mein golden varshan slogan ke roop mein saari sabha ko dohraayen। aur jiska tarna ho bolne ka uske oopar vishesh light ho। to svatah hi sabka attention uski taraph jaayega। silence ka prabhaav ho। jaise koi drama karte ho, aise hi scene ho। bhaashan ho lekin drishya ke roop mein ho। aur thoda bole। 3 minute se jyaada nahin bole। pahle se hi taiyaari ho। to ek din yeh aadha ghanta ka vishesh programme chale aur doosre din phir isi roop rekha se bhinna bhinna varga ka ho। jaise koi doctor ho, koi business man ho, officer ho…aise bhinna-bhinna varga vaale teen-teen minute mein bolen ki officer ki duty bajaate bhi kaun-si mukhya golden dhaarna se kaarya mein saphal rehte hain। woh saphalta ki mukhya point golden versions ke roop mein sunaave। honge bhaashan hi lekin roop rekha thodi bhinna prakaar ki hone se yeh eeshvareey gyaan kitna vishaal hai aur har varga ke liye visheshta kya hai, woh teen-teen minute mein anubhav, anubhav ke reeti se nahin sunaana hai lekin anek anubhav kar leven। vaataavran aisa silence ka ho jo sunne vaalon ko bhi bolne ki halchal ki himmat na ho। har ek brahman yeh lakshya rakhe ki jitna samay programme chalta hai utna samay jaise traffic brake ka record bajta hai to sabhi ek hi silence ka vaayumandal banaate hai - aise is baari is haal mein aadi se ant tak harek brahman ko lakshya ho ki mujhe vaayumandal ko powerful banaane ke liye mukh ke bhaashan nahin lekin shanti ka bhaashan karna hai। main bhi ek speaker hoon, bandha hua hoon। shanti ki bhaasha bhi kam nahin hai। yeh braahmanon ka vaataavran auron ko bhi usi anubhooti mein laata hai। jahaan tak ho sake aur kaarobaar samaapta kar sabha ke samay sab braahmanon ko vaayumandal banaane ka sahayog dena hi hai। agar kisi ki aisi duty bhi hai to woh aage nahin baithne chaahiye। aage halchal nahin honi chaahiye। samjho teen ghante ki bhatti hai। tab bhaashan achhe nahin kahenge lekin kahenge bhaasna achhi aai। bhaashan ke saath bhaasna bhi to aave na! jo bhi brahman aata hai woh yeh samajhkar aave ki hamko bhatti mein aana hai। conference dekhne nahin aana hai lekin sahayogi ban aana hai। to isi prakaar vaayumandal aisa shaktishaali banaao jo kaisi bhi halchal vaali aatmaayen thode samay ki bhi shanti aur shakti ki anubhooti karke jaaven। aise lage yeh teen hajaar nahin hai lekin pharishton ki sabha hai। cultural programme ke samay bhal hansana-bahalna lekin conference ke samay shaktishaali vaataavran ho। to doosre aane vaale bhi usi prakaar se bolenge। jaisa vaayumandal hota hai vaise doosre bolne vaale bhi usi vaayumandal mein aa jaate hain। to thode samay mein bahut khazaana dene ka programme banaao। short aur sweet। agar apne brahman dheere se bolenge to doosre baahar vaale bhi dheere se bolenge। achha - abhi kya karenge? apne ko vishesh sitaara pratyaksha karenge na। to yeh golden jubilee ka varsha vishesh apne ko sampanna aur sampoorn banaane ka varsha manaao। na halchal mein aao na halchal mein laao। halchal machaane vaali to prakriti hi bahut hai। yeh prakriti apna kaam kar rahi hai। aap apna kaam karo। achha –

sada holi sitaare ban vishwa ko sukh-shaantimay banaane vaale, master paarasnaath ban paaras duniya banaane vaale,sarva ko paaras banaane vaale, sada anubhvon ke saagar ke tale mein anubhvon ke ratan svayan mein jama karne vaale, searchlight ban agyaan ka parda hataane vaale - aise baap ko pratyaksha karne vaale vishesh sitaaron ko baapdaada ka yaadapyaar aur namaste।’’

teachers se- nai duniya banaane ka theka uthaaya hai na! to sada nai duniya banaane ke liye umang, naya utsaah sada rehta hai ki vishesh mauke par umang aata hai,kabhi-kabhi ke umang utsaah se nai duniya nahin sthaapan hoti। sada umang utsaah vaale hi nai duniya banaane ke nimitta bante hain। jitna nai dunaya ke najdeek aate jaayenge utna hi nai duniya ki vishesh vastuon ka vistaar hota rahega। nai duniya mein aane vaale bhi aap ho to banaane vaale bhi aap ho। to banaane mein shaktiyaan bhi lagti hai,samay bhi lagta hai lekin jo shaktishaali aatmaayen hain woh sada vighnon ko samaapta kar aage badhte rehte hai। to aise nai duniya ke foundation ho। agar foundation kachcha hoga to building ka kya hoga! to nai duniya banaane ki duty vaale jo hain unhon ko mehnat kar foundation pakka banaana hai। aisa pakka banaao jo 21janma tak building sada chalti rahe। to apni 21janmon ki building taiyaar ki hai na! achha –

2. baap ke diltakhtansheen aatmaayen hain,aisa anubhav karte ho? is samay diltakhtansheen hain phir honge vishwa ke raajya ke takhtansheen। diltakhtansheen vahi bante jinke dil mein ek baap ki yaad samaai rehti hai। jaise baap ki dil mein sada bachche samaaye hue hain aise bachchon ki dil mein baap ki yaad samaai ho। agar jara bhi kisi aur ki yaad aayi to baap ki yaad nahin rookti। diltakhtansheen arthaat baap ki yaad sada aur svatah rahe। baap ke sivaae aur hai hi kya! to takhtansheen hain - isi nashe aur khushi mein raho। achha –

(vidaai ke samay- 6baje guroovaar)

chaaron or ke snehi sahayogi bachchon par sada vrikshapti ki, brahaspati ki dasha to hai hi। aur isi brahaspati ki dasha se shreshtha banaane ki seva mein aage badhte ja rahe hain। seva aur yaad donon mein vishesh saphalta ko praapta kar rahe ho aur karte rahenge। bachchon ke liye sangamayug hi brahaspati ki vela hai। har ghadi sangamayug ki brahaspati arthaat bhaagyavaan hai। isliye bhaagyavaan ho,bhagwan ke ho,bhaagya banaane vaale ho। bhaagyavaan duniya ke adhikaari ho। aise sada bhaagyavaan bachchon ko yaadapyaar aur good morning!