Avyakt murli for Friday 11 April 1986

>

11-04-86om shanti avyakt baapdaadaamdhuban

shreshtha takdeer ki tasveer banaane ki yukti

avyakt baapdaada bole

aaj takdeer banaane vaale baapdaada sabhi bachchon ki shreshtha takdeer ki tasveer dekh rahen hain। takdeervaan sabhi bane hain, lekin har ek ke takdeer ke tasveer ki jhalak apni-apni hai। jaise koi bhi tasveer banaane vaale tasveer banaate hain to koi tasveer hajaaron roopayon ke daam ki amoolya hoti hai, koi saadhaaran bhi hoti hai। yahaan baapdaada dvaara mile hue bhaagya ko,takdeer ko tasveer mein laana arthaat practical jeevan mein laana hai। ismen antar ho jaata hai। takdeer banaane vaale ne ek hi samay aur ek ne hi sabhi ko takdeer baanti। lekin takdeer ko tasveer mein laane vaali har aatma bhinna-bhinna hone ke kaaran jo tasveer banaai hai usmein nambarvaar dikhaai de rahe hain। koi bhi tasveer ki visheshta nayan aur muskaraahat hoti hai। in do visheshtaaon se hi tasveer ka moolya hota hai। to yahaan bhi takdeer ke tasveer ki yahi do visheshtaayen hain। nayan arthaat roohaani vishwa-kalyaani,raham dil,par-upkaari drishti। agar drishti mein yeh visheshtaayen hai to bhaagya ki tasveer shreshtha hai। mool baat hai drishti aur muskaraahat,chehre ki chamak। yeh hai sada santushta rahne ki - santushtata aur prasannata ki jhalak। isi visheshtaaon se sada chehre par roohaani chamak aati hai। roohaani muskaan anubhav hoti hai। yeh do visheshtaayen hi tasveer ka moolya badha deti hain। to aaj yahi dekh rahe the। takdeer ki tasveer to sabhi ne banaai hai। tasveer banaane ki kalam baap ne sabko di hai। woh kalam hai - shreshtha smriti, shreshtha karmon ka gyaan। shreshtha karma aur shreshtha sankalp arthaat smriti। is gyaan ki kalam dvaara har aatma apne takdeer ki tasveer bana rahi hai, aur bana bhi li hai। tasveer to ban gai hai। nain chain bhi ban gaye hain। ab last touching hai ‘sampoornata’ki। baap samaan banne ki। double videshi chitra banaane jyaada pasanda karte hain na। to baapdaada bhi aaj sabhi ki tasveer dekh rahen hain। harek apni tasveer dekh sakte hain na ki kahaan tak tasveer moolyavaan bani hai। sada apni is roohaani tasveer ko dekh ismen sampoornata laate raho। vishwa ki aatmaon se to shreshtha bhaagyavaan koton mein koi,koi mein bhi koi amoolya va shreshtha bhaagyavaan to ho hi। lekin ek hai shreshtha doosre hain shreshtha te shreshtha। to shreshtha bane hain va shreshtha te shreshtha bane hain! yeh check karna hai। samjha!

ab double videshi race karenge na! aage number lena hai va aage vaalon ko dekh khush hona hai! dekh-dekh khush hona bhi aavashyak hai, lekin svayan peechhe hokar nahin dekho, saath-saath hote doosron ko bhi dekh harshit ho chalo। svayan bhi aage badho aur peechhe vaalon ko bhi aage badhaao। isi ko hi kehte hain - ‘par-upkaari’। yeh par-upkaari banna iski visheshta hai - svaartha bhaav se sada mukta rehna। har paristhiti mein, har kaarya mein har sahayogi sangathan mein jitna nihsvaartha-pan hoga, utna hi ‘par-upkaari’hoga। svayan sada bharpoor anubhav karega। sada praapti swaroop ki sthiti mein hoga। tab par-upkaari ki last stage anubhav kar aur kara sakenge। jaise brahma baap ko dekha last samay ki sthiti mein ‘upraam aur par-upkaar’yeh visheshta sada dekhi। sva ke prati kuchh bhi sveekaar nahin kiya। na mahima sveekaar ki,na vastu sveekaar ki। na rahne ka sthaan sveekaar kiya। sthool aur sookshm - sada ‘pahle bachche’। isko kehte hain - ‘par-upkaari’। yahi sampannata ki sampoornata ki nishaani hai। samjha!

murliyaan to bahut suni। ab murleedhar ban sada naachte aur nachaate rehna hai। murli se - saanp ke vish ko bhi samaapta kar lete hain। to aisa murleedhar ho jo kisi ka kitna bhi kadva svabhaav sanskaar ho - usko bhi vash kar de arthaat usse mukta kar nacha de। harshit bana de। abhi yeh result dekhenge ki kaun-kaun aise yogya murleedhar bante hain। murli se bhi pyaar hai, murleedhar se bhi pyaar hai lekin pyaar ka saboot hai - jo murleedhar ki shubh aasha hai,har bachche prati woh practical mein dikhaana। pyaar ki nishaani hai - jo kaha woh karke dikhaana। aise master murleedhar ho na! banna hi hai,ab nahin banenge to kab banenge! karenge, yeh khyaal nahin karo। karna hi hai। har ek yahi sonche ki ham nahin karenge to kaun karega! hamko karna hi hai। banna hi hai। kalpa ki baaji jeetni hi hai। poore kalpa ki baat hai। to first division me aana hai, yeh dridhta dhaaran karni hai। koi nai baat kar rahe ho kya! kitna baar ki hui baat ko sirf lakeer ke oopar lakeer kheench rahe ho! drama ki lakeer kheenchi hui hai। nai lakeer bhi nahin laga rahe ho,jo socho ki pata nahin, seedhi hogi va nahin। kalpa-kalpa ki bani hui praalabdha ko sirf banaate ho। kyonki karmon ke phal ka hisaab hai। baaki nai baat kya hai! yeh to bahut puraani hai। hui padi hai। yeh hai atal nishchay। isko dridhta kehte hain। isko tapasvi moorta kehte hain। har sankalp mein dridhta maana - ‘tapasya’। achha!

baapdaada highest host bhi hai aur golden guest bhi hai। host bankar bhi milte hain, guest ban kar aate hain। lekin golden guest hai। chamkeela hai na। guest to bahut dekhe - lekin ‘golden guest’ nahin dekha। jaise chief guest ko bulaate ho to woh thanks dete hain। to brahma baap ne bhi host ban ishaare diye aur guest ban sabko mubaarak de rahen hain। jinhonne poori season mein seva ki un sabko ‘golden guest’ ke roop mein badhaai de rahe hain। sabse pahli mubaarak kisko?nimitta daadiyon ko। baapdaada, nirvighna seva ke samaapti ki mubaarak de rahe hain। madhuban nivaasiyon ko bhi nirvighna harshit ban mehmaan nivaaji karne ki vishesh mubaarak de rahe hain। bhagwan bhi mehmaan ban aaya to bachche bhi। jiske ghar mein bhagwan mehmaan bankar aave woh kitne bhaagyashaali hain! rath ko bhi mubaarak hain kyonki yeh part bajaana bhi koi kam baat nahin। itni shaktiyon ko,itna samay pravesh hone par dhaarna karna yeh bhi vishesh part hai। lekin yeh samaane ki shakti ka phal hai। aap sabko miaal raha hai। to samaane ki shakti ki visheshta se baapdaada ki shaktiyon ko ‘samaana’ yeh bhi vishesh part kaho va gun kaho। to sabhi sevaadhaariyon me yeh bhi seva ka part bajaane vaali nirvighna rahi। iske liye mubaarak ho, aur padmaapadma thanks। double videshiyon ko bhi double thanks। kyonki double videshiyon ne madhuban ki shobha kitni achhi kar di। brahman parivaar ke shrringaar double videshi ho। brahman parivaar mein desh vaalon ke saath videshi bhi hain। to purooshaartha ki bhi mubaarak aur parivaar ka shrringaar banne ki bhi mubaarak। madhuban aur parivaar ka shrringaar banne ki bhi mubaarak। madhuban parivaar ki vishesh saugaat ho। isliye double videshiyon ko double mubaarak de rahe hain। chaahe kahaan bhi hain। saamne to thode hai lekin chaaron or ke bhaaratvaasi bachchon ko aur double videshi bachchon ko badi dil se mubaarak de rahe hain। har ek ne bahut achha part bajaaya। ab sirf ek baat rahi hai - ‘samaan aur sampoornata ki’। daadiyaan bhi achhi mehnat karti। baapdaada, donon ka part saakaar mein baja raheen hain। isliye baapdaada dil se sneh ke saath mubaarak dete hain। sabne bahut achha part bajaaya। all-round sab sevaadhaari chaahe chhoti-si saadhaaran seva hai lekin woh bhi mahaan hai। har ek ne apna bhi jama kiya aur punya bhi kiya। sabhi desh-videsh ke bachchon ke pahunchne ki bhi visheshta, mubaarak yogya hai। sab mahaarthiyon ne milkar seva ka shreshtha sankalp practical mein laaya aur laate hi rahenge। seva mein jo nimitta hai unhon ko bhi takleeph nahi deni chaahiye। apne albelepan se kisko mehnat nahin karaani chaahiye। apni vastuon ko sambhaalna yeh bhi knowledge hai। yaad hai na brahma baap kya kehte the? roomaal khoya to kabhi khud ko bhi kho dega। har karma mein shreshtha aur saphal rehna isko kehte - ‘knowledgeful’। shareer ki bhi knowledge, aatma ki bhi knowledge। donon knowledge har karma mein chaahiye,shareer ke bimaari ki bhi knowledge chaahiye। mera shareer kis vidhi se theek chal sakta hai? aise nahin - aatma to shaktishaali hai, shareer kaisa bhi hai। shareer theek nahin hoga to yog bhi nahin lagega। phir shareer apni taraph kheenchata hai। isliye knowledgeful mein yeh sab knowledge aa jaati hai। achha -’’

kuchh kumaariyon ka samarpan samaaroh baapdaada ke saamne hua - baapdaada sabhi vishesh aatmaon ko bahut sundar sajaaye dekh rahe hain। divya gunon ka shrringaar kitna badhiya, sabhi ko shobhnik bana raha hai। light ka taaj kitna sundar chamak raha hai। baapdaada avinaashi shrringaari hui soorton ko dekh rahen hain। baapdaada ko bachchon ka yeh umang-utsaah ka sankalp dekh khushi hoti hai। baapdaada ne sabhi ko sada ke liye pasanda kar liya। aapne bhi pakka pasanda kar liya hai na! dridh sankalp ka hathiyaala bandh gaya। baapdaada ke paas harek ke dil ke sneh ka sankalp sabse jaldi pahunchta hai। abhi sankalp mein bhi yeh shreshtha bandhan dheela nahin hoga। itna pakka baandha hai na! kitne janmon ka vaayda kiya?yeh brahma baap ke saath sada sambandh mein aane ka pakka vaayda hai aur guarantee hai ki sada bhinna naam,roop, sambandh mein 21 janma tak to saath rahenge hi। to kitni khushi hai,hisaab kar sakti ho? iska hisaab nikaalne vaala koi nahin nikla hai। abhi aise hi sada saje sajaaye rehna,sada taajdhaari rehna aur sada khushi mein hansate-gaate roohaani mauj mein rehna। aaj sabhi ne dridh sankalp kiya na - ki kadam-kadam par rakhne vaale banenge। woh to sthool paanv ke oopar paanv rakhti hai lekin aap sabhi sankalp roopi kadam par kadam rakhne vaale! jo baap ka sankalp woh bachchon ka sankalp - aisa sankalp kiya?ek kadam bhi baap ke kadam ke sivaae yahaan vahaan ka na ho। har sankalp samartha karna arthaat baap ke samaan kadam ke peechhe kadam rakhna। achha!

videshi bhaai-bahnon se -jaise vimaan mein udte-udte aaye aise buddhi roopi vimaan bhi itna hi fast udta rehta hai na? kyonki woh vimaan circumstance ke kaaran nahin bhi mile lekin buddhi roopi vimaan sada saath hai aur sada shaktishaali hai to second mein jahaan chaahen vahaan pahuch jaaen। to is vimaan ke maalik ho na। sada yeh buddhi ka vimaan ever ready ho arthaat sada buddhi ki line clear ho। buddhi sada hi baap ke saath shaktishaali ho to jab chaahenge tab second mein pahunch jaayenge। jiska buddhi ka vimaan pahunchta hai uska woh bhi vimaan chalta hai। buddhi ka vimaan theek nahin to woh vimaan bhi nahin chalta। achha!

party se

1. sada apne ko raajayogi shreshtha aatmaayen anubhav karte ho?raajayogi arthaat sarva-karma-indriyon ke raaja। raaja ban karma-indriyon ko chalaane vaale,na ki karma-indriyon ke vash chalne vaale। jo karma-indriyon ke vash chalne vaale hain unko prajaayogi kahenge, raajayogi nahin। jab gyaan mil gaya ki yeh karma-indriyaan mere karmachaari hain, main maalik hoon, to maalik kabhi sevaadhaariyon ke vash nahin ho sakta। kitna bhi koi prayatna kare lekin raajayogi aatmaayen sada shreshtha rahengi। sada raajya karne ke sanskaar abhi raajayogi jeevan mein bharne hain। kuchh bhi ho jaae - yeh title apna sada yaad rakhna ki - ‘main raajayogi hoon’। sarvashaktivaan ka bal hai, bharosa hai to saphalta adhikaar roop mein mil jaata hai। adhikaar sahaj praapta hota hai, mushkil nahin hota। sarva shaktiyon ke aadhaar se har kaarya saphal hua hi pada hai। sada phakhur rahe ki main diltakhtansheen aatma hoon। yeh phakhur anek phikron se paar kar deta hai। phakhur nahin to phikar hi phikar hai। to sada phakhur mein rah vardaani ban vardaan baantate chalo। svayan sampanna ban auron ko sampanna banaana hai। auron ko banaana arthaat svarga ke seat ka certificate dete ho। kaagaj ka certificate nahin, adhikaar ka!

2. har kadam mein padmon ki kamaai jama karne vaale, akhut khazaane ke maalik ban gaye। aise khushi ka anubhav karte ho! kyonki aajkal ki duniya hai hi -‘dhokhebaaj’। dhokhebaaj duniya se kinaara kar liya। dhokhe vaali duniya se lagaav to nahin! seva arth connection dusri baat hai lekin man ka lagaav nahin hona chaahiye। to sada apne ko tuchchha nahin, saadhaaran nahin lekin shreshtha aatma hain, sada baap ke pyaare hain,is nashe mein raho। jaisa baap vaise bachcha - kadam par kadam rakhte arthaat follow karte chalo to baap samaan ban jaayenge। samaan banna arthaat sampanna banna। brahman jeevan ka yahi to kaarya hai।

3. sada apne ko baap ke roohaani bageeche ke roohaani gulaab samajhte ho! sabse khushbu vaala pushpa ‘gulaab’ hota hai। gulaab ka jal kitne kaaryon mein lagaate hain, ‘rang-roop’mein bhi gulaab sarva priy hai। to aap sabhi roohaani gulaab ho। aapki roohaani khushbu auron ko bhi svatah hi aakarshan karti hai। kahaan bhi koi khushbu ki cheez hoti hai to sabka attention svatah hi jaata hai to aap roohaani gulaabon ki khushbu vishwa ko aakarshit karne vaali hai, kyonki vishwa ko is roohaani khushbu ki aavashyakta hai। isliye sada smriti mein rahe ki -’main avinaashi bageeche ka avinaashi gulaab hoon।’kabhi murjhaane vaala nahin। sada khila hua। aise khile hue roohaani gulaab sada seva mein svatah hi nimitta ban jaate hain। yaad ki, shaktiyon ki, gunon ki yeh sab khushbu sabko dete raho। svayan baap ne aakar aap phoolon ko taiyaar kiya hai to kitne sikeeldhe ho!

4. sada apne ko double light anubhav karte ho? jo double light rehta hai woh sada udti kala ka anubhav karta hai। kyonki jo halka hota hai woh sada ooncha udta hai,bojh vaala neeche jaata hai। to double light aatmaayen arthaat sarva bojh se nyaare ban gaye। baap ka banne se 63janmon ka bojh samaapta ho gaya। sirf apne puraane sankalp va vyartha sankalp ka bojh na ho। kyonki koi bhi bojh hoga to oonchi sthiti mein udne nahin dega। to double light arthaat aatmik swaroop mein sthit hone se halka-pan svatah ho jaata hai। aise double light ko hi ‘pharishta’ kaha jaata hai। pharishta kabhi kisi bhi bandhan mein nahin bandhata। to koi bhi bandhan to nahin hai! man ka bhi bandhan nahin। jab baap se sarvashaktiyaan mil gai to sarva shaktiyon se nirbandhan banna sahaj hai। pharishta kabhi bhi is puraani duniya ke, puraani deh ke aakarshan mein nahin aata। kyonki hai hi double light। to sada oonchi sthiti mein rahne vaale। udti kala mein jaane vaale ‘pharishte’ hain, yahi smriti apne liye vardaan samajh,samartha bante rehna।

achha – omshaanti