Avyakt murli for Sunday 22 November 1987

>

22-11-87om shanti avyakt baapdaadaamdhuban

madad ke saagar se padamguna madad lene ki vidhi

nirbal ko balvaan banaane vaale, madad ke saagar baapdaada apne himmatvaan bachchon prati bole

aaj baapdaada apne chaaron or ke himmatvaan bachchon ko dekh rahe hain। aadi se ab tak har ek brahman aatma himmat ke aadhaar se baapdaada ki madad ke paatra bani hai aur ‘himmate bachche madad de baap' ke vardaan pramaan purooshaartha mein nambarvaar aage badhte rahe hain। bachchon ki ek kadam ki himmat aur baap ki padma kadmon ki madad har ek bachche ko praapta hoti hai। kyonki yeh baapdaada ka vaayda kaho,varsa kaho sab bachchon ke prati hai aur isi shreshtha sahaj praapti ke kaaran hi 63 janmon ki nirbal aatmaayen balvaan ban aage badhti ja rahi hai। brahman janma lete hi pahli himmat kaunsi dhaaran ki? pahli himmat - jo asambhav ko sambhav karke dikhaaya, pavitrata ke visheshta ki dhaarna ki। himmat se dridh sankalp kiya ki humein pavitra banna hi hai aur baap ne padmaguna madad di ki aap aatmaayen anaadi-aadi pavitra thi, anek baar pavitra bani hain aur banti rahengi। nai baat nahin hai। anek baar ki shreshtha sthiti ko phir se sirf repeat kar rahe ho। ab bhi aap pavitra aatmaon ke bhakta aapke jad chitron ke aage pavitrata ki shakti maangate rehte hain, aapke pavitrata ke geet gaate rehte hain। saath-saath aapke pavitrata ki nishaani har ek poojya aatma ke oopar light ka taaj hai। aise smriti dvaara samartha banaaya arthaat baap ki madad se aap nirbal se balvaan ban gaye। itne balvaan bane jo vishwa ko challenge karne ke nimitta bane ho ki ham vishwa ko paavan bana kar hi dikhaayenge! nirbal se itne balvaan bano jo dvaapar ke naameegraami rishi-muni mahaan aatmaayen jis baat ko khandit karte rahe hain ki pravritti mein rehte pavitra rehna asambhav hai aur svayan aajkal ke samay pramaan apne liye bhi kathin samajhte hain, aur aap unhon ke aage natural roop mein varnan karte ho ki yeh to aatma ka anaadi, aadi niji swaroop hai, ismen mushkil kya hai? isko kehte hain - himmate bachche madad de baap। asambhav,sahaj anubhav hua aur ho raha hai। jitna hi woh asambhav kehte hain, utna hi aap ati sahaj kehte ho। to baap ne knowledge ke shakti ki madad aur yaad dvaara aatma ke paavan sthiti ke anubhooti ki shakti ki madad se parivartan kar liya। yeh hai pahle kadam ki himmat par baap ki padmaguna madad।

aise hi maayaajeet banne ke liye chaahe kitne bhi bhinna-bhinna roop se maaya vaar karne ke liye aadi se ab tak aati rehti hai, kabhi royal roop se aati, kabhi prakhyaat roop mein aati, kabhi gupta roop mein aati aur kabhi aartiphishal eeshvareey roop mein aati। 63 janma maaya ke saathi ban karke rahe ho। aise pakke saathiyon ko chhodna bhi mushkil hota hai। isliye bhinna-bhinna roop se woh bhi vaar karne se majboor hai aur aap yahaan majboot hain। itna vaar hote bhi jo himmat vaale bachche hain aur baap ki padmaguna madad ke paatra bachche hain, madad ke kaaran maaya ke vaar ko challenge karte ki aapka kaam hai aana aur hamaara kaam hai vijay praapta karna। vaar ko khel samajhte ho,maaya ke sher roop ko cheenti samajhte ho kyonki jaante ho ki yeh maaya ka raajya ab samaapta hai aur ham anek baar ke vijayi aatmaon ki vijay 100% nishchit hai। isliye yahi ‘nishchit' ka nasha, baap ki padmaguna madad ka adhikaar praapta karaata hai। to jahaan himmate bachche madad de sarvashaktivaan baap hai, vahaan asambhav ko sambhav karna va maaya ko, vishwa ko challenge karna koi badi baat nahin hai। aise samajhte ho na?

baapdaada yeh result dekh rahe the ki aadi se ab tak harek bachcha himmat ke aadhaar par madad ke paatra ban kahaan tak sahaj purooshaarthi ban aage badhe hain, kahaan tak pahunche hain। to kya dekha?baap ki madad arthaat daata ki den,vardaata ke vardaan to saagar ke samaan hain। lekin saagar se lene vaale koi bachche saagar samaan bharpoor ban auron ko bhi bana rahe hain aur koi bachche madad ke vidhi ko na jaan madad lene ke bajaaye apni hi mehnat mein kabhi teevragti,kabhi dilshikasta ke khel mein neeche-oopar hote rehte hain। aur koi bachche kabhi madad,kabhi mehnat। bahut samay madad bhi hai lekin kahaan-kahaan albelepan ke kaaran madad ke vidhi ko apne samay par bhool jaate hain aur himmat rakhne ke bajaae albelaai ke kaaran abhimaan mein aa jaate hain ki ham to sada paatra hain hi, baap humein madad na karenge to kisko karenge, baap baandha hua hai। is abhimaan ke kaaran himmat dvaara madad ki vidhi ko bhool jaate hain। albelepan ka abhimaan aur svayan par attention dene ka abhimaan madad se vanchit kar deta hai। samajhte hain ab to bahut yog laga liya, gyaani tu aatma bhi ban gaye, yogi tu aatma bhi ban gaye, sevaadhaari bhi bahut naameegraami ban gaye, centres incharge bhi ban gaye, seva ki raajdhaani bhi ban gai, prakriti bhi seva yogya ban gai, aaraam se jeevan bita rahe hain। yeh hai attention rakhne mein albelaapan। isliye jahaan jeena hai vahaan tak padhaai aur sampoorn banne ka attention, behad ke vairaag vritti ka attention dena hai - ise bhool jaate hain। brahma baap ko dekha, antim sampoorn karmaateet sthiti tak svayan par, seva par, behad ki vairaag vritti par, student life ki reeti se attention dekar nimitta ban kar dikhaaya। isliye aadi se ant tak himmat mein rahe, himmat dilaane ke nimitta bane। to baap ke number one madad ke paatra ban number one praapti ko praapta hue। bhavishya nishchit hote bhi albele nahin rahe। sada apne teevra purooshaartha ke anubhav bachchon ke aage ant tak sunaate rahe। madad ke saagar mein aise sama gaye jo ab bhi baap samaan har bachche ko avyakt roop se bhi madadgaar hain। isko kehte hain - ek kadam ki himmat aur padmaguna madad ke paatra banna।

to baapdaada dekh rah the ki kai bachche madad ke paatra hote bhi madad se vanchit kyon rah jaate? iska kaaran sunaaya ki himmat ke vidhi ko bhoolne kaaran, abhimaan arthaat albelaapan aur sva ke oopar attention ki kami ke kaaran। vidhi nahin to vardaan se vanchit rah jaate। saagar ke bachche hote hue bhi chhote-chhote taalaab ban jaate। jaise taalaab ka paani khada hua hota hai, aise purooshaartha ve beech mein khade ho jaate hain। isliye kabhi mehnat, kabhi mauj mein rehte। aaj dekho to badi mauj mein hain aur kal chhote se rode (patthar) ke kaaran usko hataane ki mehnat mein laga hua hai। pahaad bhi nahin, chhota-sa patthar hai। hai mahaaveer paandav sena lekin chhota-sa kankad-patthar bhi pahaad ban jaata। usi mehnat mein lag jaate hain। phir bahut hansaate hain। agar koi unhon ko kehte hain ki yeh to bahut chhota kankad hai, to hansi ki baat kya kehte? aapko kya pata, aapke aage aaye to pata pade। baap ko bhi kehte - aap to ho hi niraakaar,aapko bhi kya pata। brahma baba ko bhi kehte - aapko to baap ki lift hai,aapko kya pata। bahut achhi-achhi baaten karte hain। lekin iska kaaran hai chhoti-si bhool। himmate bachche madde khuda - is raaz ko bhool jaate hain। yeh ek drama ki guhya karmon ki gati hai। himmate bachche madad de khuda, agar yeh vidhi vidhaan mein nahin hoti to sabhi vishwa ke pahle raaja ban jaate। ek hi samay par sabhi takhta par baithenge kya? nambarvaar banne ka vidhaan is vidhi ke kaaran hi banta hai। nahin to,sabhi baap ko ulhana deven ki brahma ko hi kyon pahla number banaaya,humein bhi to bana sakte? isliye yeh eeshvareey vidhaan drama anusaar bana hua hai। nimitta maatra yeh vidhaan noondha hua hai ki ek kadam himmat ka aur padma kadam madad ka। madad ka saagar hote hue bhi yeh vidhaan ki vidhi drama anusaar noondhi hui hai। to jitna chaahe himmat rakho aur madad lo। ismen kabhi nahin rakhte। chaahe ek varsha ka bachcha ho,chaahe 50varsha ka bachcha ho, chaahe surrender ho,chaahe pravritti vaale ho - adhikaar samaan hai। lekin vidhi se praapti hai। to eeshvareey vidhaan ko samjha na?

himmat to bahut achhi rakhi hai। yahaan tak pahunchne ki bhi himmat rakhte ho tab to pahunchte ho na। baap ke bane ho to bhi himmat rakhi hain, tab bane ho। sada himmat ki vidhi se madad ke paatra ban chalna aur kabhi-kabhi vidhi se siddhi praapta karna - ismen antar ho jaata hai। sada har kadam mein himmat se madad ke paatra ban number one banne ke lakshya ko praapta karo। number one ek brahma banega lekin first division mein sankhya hai। isliye number one kehte hain। samjha?first division mein to aa sakte ho na?isko kehte hain number one mein aana। kabhi albelepan ki leela bachchon ki sunaayenge। bahut achhi leela karte hain। baapdaada to sada bachchon ki leela dekhte rehte hain। kabhi teevra purooshaartha ki leela bhi dekhte, kabhi albelepan ki leela bhi dekhte hain। achha।

karnaatak vaalon ki visheshta kya hai? har ek zone ki apni-apni visheshta hai। karnaatak vaalon ki apni bahut achhi bhaasha hai - bhaavna ki bhaasha mein hoshiyaar hain। aise to hindi kam samajhte hain lekin karnaatak ki visheshta hai bhaavna ki bhaasha mein number one। isliye bhaavna ka phal sada milta। aur kuchh nahin bolenge lekin sada ‘baba-baba'bolte rahenge। yeh bhaavna ki shreshtha bhaasha jaante hain। bhaavna ki dharti hai na। achha।

chaaron or ke himmat vaale bachchon ko, sada baap ki madad praapta karne vaale paatra aatmaon ko,sada vidhaan ko jaan vidhi se siddhi praapta karne vaali shreshtha aatmaon ko, sada brahma baap samaan ant tak padhaai aur purooshaartha ki vidhi mein chalne vaale shreshtha,mahaan baap samaan bachchon ko baapdaada ka yaadapyaar aur namaste।

party se avyakt baapdaada ki mulaakaat

(1) apne ko double light pharishta anubhav karte ho?double light sthiti pharishtepan ki sthiti hai। pharishta arthaat light। jab baap ke ban gaye to saara bojh baap ko de diya na?jab bojh halka ho gaya to pharishte ho gaye। baap aaye hi hain bojh samaapta karne ke liye। to jab baap bojh samaapta karne vaale hain to aap sabne bojh samaapta kiya hai na? koi chhoti-si gathri chhipaakar to nahin rakhi hai?sab kuchh de diya ya thoda-thoda samay ke liye rakha hai?thode-thode puraane sanskaar hain ya woh bhi khatma ho gaye? puraana svabhaav ya puraana sanskaar, yeh bhi to khazaana hai na। yeh bhi de diya hai?agar thoda bhi raha hua hoga to oopar se neeche le aayega,pharishta ban udti kala ka anubhav karne nahin dega। kabhi oonche to kabhi neeche aa jaayenge। isliye baapdaada kehte hain sab de do। yeh raavan ki property hai na। raavan ki property apne paas rakhenge to duhkh hi paayenge। pharishta arthaat jara bhi raavan ki property na ho, puraana svabhaav ya sanskaar aata hain na?kehte ho na - chaahte to nahin the lekin ho gaya, kar liya ya ho jaata hai। to isse siddha hai ki chhoti-si puraani gathri apne paas rakh li hai। kichad- patti ki gathri hai। to sada ke liye pharishta banna - yahi brahman jeevan hai। past khatma ho gaya। puraane khaate bhasma kar diye। abhi nai baaten, naye khaate hain। agar thoda bhi puraana karja raha hoga to sada hi maaya ka merge lagta rahega kyonki karz ko merge kaha jaata hai। isliye saara hi khaata samaapta karo। naya jeevan mil gaya to puraana sab samaapta।

(2) sada ‘vaah-vaah' ke geet gaane vaale ho na? ‘haay-haay'ke geet samaapta ho gaye aur ‘vaah-vaah'ke geet sada man se gaate rehte। jo bhi shreshtha karma karte to man se kya nikalta? vaah mera shreshtha karma! ya vaah shreshtha karma sikhlaane vaale! ya vaah shreshtha samay,shreshtha karma karaane vaale! to sada ‘vaah-vaah!' ke geet gaane vaali aatmaayen ho na? kabhi galti se bhi ‘haay' to nahin nikalta?haay, yeh kya ho gaya - nahin। koi duhkh ka najaara dekh karke bhi ‘haay' shabd nahin nikalna chaahiye। kal ‘haay-haay' ke geet gaate the aur aaj ‘vaah-vaah'ke geet gaate ho। itna antar ho gaya! yeh kiski shakti hai? baap ki ya drama ki? (baap ki) baap bhi to drama ke kaaran aaya na। to drama bhi shaktishaali hua। agar drama mein part nahin hota to baap bhi kya karta। baap bhi shaktishaali hai aur drama bhi shaktishaali hai। to donon ke geet gaate raho - vaah drama vaah! jo svapna mein bhi na tha, woh saakaar ho gaya। ghar baithe sab mil gaya। ghar baithe itna bhaagya mil jaae - isko kehte hain diamond lottery।

(3) sangamayugi svaraajya adhikaari aatmaayen bane ho? har karmendriy ke oopar apna raajya hai? koi karmendriy dhokha to nahin deti hai? kabhi sankalp mein bhi haar to nahin hoti hai? kabhi vyartha sankalp chalte hain? ‘‘svaraajya adhikaari aatmaayen hain'' - is nashe aur nishchay se sada shaktishaali ban maayaajeet so jagatjeet ban jaate hain। svaraajya adhikaari aatmaayen sahajyogi,nirantar yogi ban sakte hain। svaraajya adhikaari ke nashe aur nishchay se aage badhte chalo। maataayen nashtomoha ho ya moh hai? paandavon ko kabhi krodh ka ansh maatra josh aata hai?kabhi koi thoda neeche-oopar kare to krodh aayega? thoda seva ka chance kam mile, doosre ko jyaada mile to behen par thoda-sa josh aayega ki yeh kya karti hai? dekhna,paper aayega। kyonki thoda bhi deh abhimaan aaya to usmein josh ya krodh sahaj aa jaata hai। isliye sada svaraajya adhikaari arthaat sada hi niraahankaari,sada hi nirmeen ban sevaadhaari banne vaale। moh ka bandhan bhi khatma। achha।