Avyakt murli for Sunday 27 March 1988

>

27 - 03 - 88 om shanti avyakt baapdaadaamdhuban

sarvashreshtha sitaara - ‘saphalta ka sitaara'

sabhi bachchon ko khush karne vaale,gyaansoorya - gyaan chandrama baapdaada apne lucky aur lovely gyaan sitaaron prati bole

aaj gyaan - soorya,gyaan - chandrama apne alaukik taaraamandal ko dekh rahe hain। yeh alaukik vichitra taaraamandal hai jiski visheshta sirf baap aur brahman bachche hi jaante hain। har ek sitaara apni chamak se is vishwa ko roshni de rahe hain। baapdaada har ek sitaare ki visheshta dekh rahe hain। koi shreshtha bhaagyavaan lucky sitaare hain,koi baap ke sameep ke sitaare hain aur koi door ke sitaare hain। hai sabhi sitaare lekin visheshta bhinna - bhinna hone ke kaaran seva mein va sva - praapti mein alag - alag phal ki praapti anubhav karne vaale hain। koi sada hi sahaj sitaare hain, isliye sahaj praapti ka phal anubhav karne vaale hain। aur koi mehnat karne vaale sitaare hain, chaahe thodi mehnat ho,chaahe jyaada ho lekin bahut karke mehnat ke anubhav baad phal ki praapti ka anubhav karte hain। koi sada karma ke pahle adhikaar ka anubhav karte hain ki saphalta janma - siddha adhikaar hai, isliye ‘nishchay'aur ‘nashe'se karma karne ke kaaran karma ki saphalta sahaj anubhav karte hain। isko kaha jaata hai - saphalta ke sitaare।

sabse shreshtha saphalta ke sitaare hain। kyonki woh sada gyaan - soorya,gyaan - chandrama ke sameep hain, isliye shaktishaali bhi hain aur saphalta ke adhikaari bhi hain। koi shaktishaali hain lekin sada shaktishaali nahin hain, isliye sada ek jaisi chamak nahin hai। variety sitaaron ki rimjhim ati pyaari lagti hai। seva sabhi sitaare karte hain lekin sameep ke sitaare auron ko bhi soorya,chandrama ke sameep laane ke sevaadhaari bante hain। to har ek apne se poochho ki main kaun - sa sitaara hoon - lovely sitaare ho, lucky ho, sada shaktishaali ho,mehnat anubhav karne vaale ho va sada sahaj saphalta ke sitaare ho?gyaan - soorya baap sabhi sitaaron ko behad ki roshni va shakti dete hain lekin sameep aur door hone ke kaaran antar pad jaata hai। jitna sameep sambandh hai, utna roshni aur shakti vishesh hai। kyonki sameep sitaaron ka lakshya hi hai - samaan banna।

isliye baapdaada sabhi sitaaron ko sada yahi eeshaara dete hain ki lucky aur lovely - yeh to sabhi bane ho, ab aage apne ko yahi dekho ki sada sameep rahne vaale, sahaj saphalta anubhav karne vaale saphalta ke sitaare kahaan tak bane hain?abhi girne vaale taare to nahin ho va poonchh vaale taare bhi nahin ho। poonchh vaala taara usko kehte hain jo baar - baar svayan se va baap se va nimitta bani aatmaon se - ‘yeh kyon', ‘yeh kya', ‘yeh kaise' - poochhte hi rehte hain। baar - baar poochhne vaale hi poonchh vaale taare hain। aise to nahin ho na?saphalta ke sitaare jinke har karma mein saphalta samaai hui hai - aisa sitaara sada hi baap ke sameep arthaat saath hai। visheshtaayen suneen, abhi in visheshtaaon ko svayan mein dhaaran kar sada saphalta ke sitaare bano। samjha, kya banna hai? lucky aur lovely ke saath saphalta - yeh shreshthata sada anubhav karte raho। achha!

aaj sabhi se milna hai। baapdaada aaj vishesh milne ke liye hi aaye hain। sabhi ka yahi lakshya rehta hai ki milna hai। lekin bachchon hi lahar ko dekh karke baap ko sabhi bachchon ko khush karna hota hai kyonki bachchon ki khushi mein baap ki khushi hai। to aajkal ki lahar hai - alag milne ki। to saagar ko bhi vahi lahar mein aana padta hai। is season ki lahar yeh hai,isliye rath ko bhi vishesh sakaash de chala rahe hain।

achha! chaaron or ke alaukik taaraamandal ke alaukik sitaaron ko, sada vishwa ko roshni de andhakaar mitaane vaale chamakte hue sitaaron ko, sada baap ke sameep rahne vaale shreshtha saphalta ke sitaaron ko,anek aatmaon ke bhaagya ki rekha parivartan karne vaale bhaagyavaan sitaaron ko gyaan - soorya,gyaan - chandrama baapdaada ka vishesh yaadapyaar aur namaste।''

personal mulaakaat ke samay vardaan roop mein uchchaare hue anmol mahaavaakya

1. ‘sada har aatma ko sukh dene vaale sukhdaata baap ke bachche hain' - aisa anubhav karte ho? sabko sukh dene ki visheshta hai na। yeh bhi drama anusaar visheshta mili hui hai। yeh visheshta sabhi ki nahin hoti। jo sabko sukh deta hai, use sabki aasheervaad milti hai। isliye svayan ko bhi sada sukh mein anubhav karte hain। is visheshta se vartamaan bhi achha aur bhavishya bhi achha ban jaayega। kitna achha part hai jo sabka pyaar bhi milta, sabki aasheervaad bhi milti! isko kehte hain‘ek dena hajaar paana'। to seva se sukh dete ho,isliye sabka pyaar milta hai। yahi visheshta sada kaayam rakhna।

2. ‘sada apne ko sarvashaktivaan baap ki shaktishaali aatma hoon' - aisa anubhav karte ho? shaktishaali aatma sada svayan bhi santushta rehti hai aur doosron ko bhi santushta karti hai। aise shaktishaali ho?santushtata hi mahaanta hai। shaktishaali aatma arthaat santushtata ke khazaane se bharpoor aatma। isi smriti se sada aage badhte chalo। yahi khazaana sarva ko bharpoor karne vaala hai।

3. ‘baap ne saare vishwa mein se humein chunkar apna bana liya' - yeh khushi rehti hai na। itne anek aatmaon mein se mujh ek aatma ko baap ne chuna - yeh smriti kitna khushi dilaati hai! to sada isi khushi se aage badhte chalo। baap ne mujhe apna banaaya kyonki main hi kalpa pahle vaali bhaagyavaan aatma thi, ab bhi hoon aur phir bhi banoongi - aisi bhaagyavaan aatma hoon। is smriti se sada aage badhte chalo।

4. ‘sada nishchinta ban seva karne ka bal aage badhaata rehta hai'। isne kiya ya hamne kiya - is sankalp se nishchinta rahne se nishchint seva hoti hai aur uska bal sada aage badhaata hai। to nishchint sevaadhaari ho na? ginti karne vaali seva nahin। isko kehte hain - nishchint seva। to jo nishchint ho seva karte hain,unko nishchit hi aage badhne mein sahaj anubhooti hoti hai। yahi visheshta vardaan roop mein aage badhaati rahegi।

5. seva bhi anek aatmaon ko baap ke snehi banaane ka saadhan bani hui hai। dekhne mein bhal karmana seva hai lekin karmana seva mukh ki seva se bhi jyaada phal de rahi hai। karmana dvaara kiski mansa ko parivartan karne vaali seva hai, to us seva ka phal ‘vishesh khushi'ki praapti hoti hai। karmana seva bhal dekhne mein sthool aati hai lekin sookshm vrittiyon ko parivartan karne vaali hoti hai। to aisi seva ke ham nimitta hain - isi khushi se aage badhte chalo। bhaashan karne vaale bhaashan karte hain lekin karmana seva bhi bhaashan karne vaalon ki seva se bhi jyaada hai kyonki isko pratyakshaphal anubhav hota hai।

6. ‘sada punya ka khaata jama karne vaali shreshtha aatma hoon' -aise anubhav hota hain? yeh seva - naam seva ka hai,lekin punya ka khaata jama karne ka saadhan hai। to punya ke khaate sada bharpoor hain aur aage bhi bharpoor rahenge। jitni seva karte ho, utna punya ka khaata badhta jaata hai। to punya ka khaata avinaashi ban gaya। yeh punya anek janma bharpoor karne vaala hai। to punya aatma ho aur sada hi punyaatma ban auron ko bhi punya ka raasta bataane vaale। yeh punya ka khaata anek janma saath rahega, anek janma maalaamaal rahenge - isi khushi mein sada aage badhte chalo।

7. ‘sada ek baap ki yaad mein rahne vaali,ekras sthiti ka anubhav karne vaali shreshtha aatma hoon' -aise anubhav karte ho? jahaan ek baap yaad hai,vahaan ekras sthiti svatah sahaj anubhav hogi। to ekras sthiti shreshtha sthiti hai। ekras sthiti ka anubhav karne vaali shreshtha aatma hoon - yeh smriti sada hi aage badhaati rahegi। isi sthiti dvaara anek shaktiyon ki anubhooti hoti rahegi।