Avyakt murli for Saturday 9 December 1989

>

09-12-89 om shanti avyakt baapdaadaamdhuban

yogayukta,yuktiyukta banne ki yukti

avyakt baapdaada apne bachchon prati bole

aaj baapdaada apne sarva bachchon mein se vishesh do prakaar ke bachche dekh rahe hain। ek hain sada yogayukta aur har karma mein yuktiyukta। doosre yogi hain lekin sada yogayukta nahin hain aur sada har karma mein svatah yuktiyukta nahin। mansa va bol, karma - teenon mein se kabhi kismen,kabhi kismen yuktiyukta nahin। vaise braahmanjeevan arthaat svatah yogayukta aur sada yuktiyukta। brahman-jeevan ki alaukikta va visheshta va nyaara aur pyaaraapan yahi hai - ‘‘yogayukta''aur ‘‘yuktiyukta''। lekin koi bachche is visheshta mein sahaj aur natural chal rahe hain aur koi attention bhi rakhte hain, phir bhi sada donon baaton ka anubhav nahin kar sakte। iska kaaran kya? knowledge to sabhi ko hai aur lakshya bhi sabhi ka ek yahi hai। phir bhi koi lakshya ke aadhaar se in donon lakshya arthaat yogayukta aur yuktiyukta sthiti ki anubhooti ke sameep hain aur koi kabhi fast purooshaartha se sameep aate lekin kabhi sameep aur kabhi chalte-chalte koi na koi kaaranvash rook jaate hain। isliye sada lakshan ke sameep anubhooti nahin karte। sarva brahman aatmaon mein se is shreshtha lakshya tak number one sameep kaun? brahma baap। kya vidhi apnaai jo is siddhi ko praapta kiya?sada yogayukta rahne ki saral vidhi hai - sada apne ko ‘‘saarthi''aur ‘‘saakshi''samajh chalna।

aap sabhi shreshtha aatmaaen is rath ke saarthi ho। rath ko chalaane vaali aatma saarthi ho। yeh smriti svatah hi is rath athva deh se nyaara bana deti hai, kisi bhi prakaar ke dehbhaan se nyaara bana deti hai। dehbhaan nahin to sahaj yogayukta ban jaate aur har karma mein yogayukta, yuktiyukta svatah hi ho jaate hain। svayan ko saarthi samajhne se sarva karmendriyaan apne kantrol mein rehti hain arthaat sarva karmendriyon ko sada lakshya aur lakshan ki manjal ke sameep laane ki kantroling power aa jaati hai। svayan ‘‘saarthi'' kisi bhi karmendriy ke vash nahin ho sakta। kyonki maaya jab kisi ke oopar bhi vaar karti hai to maaya ke vaar karne ki vidhi yahi hoti hai ki koi-na-koi sthool karmendriyon athva sookshm shaktiyaan - ‘‘man-buddhi-sanskaar''ke parvash bana deti hai। aap saarthi aatmaon ko jo mahaamantra, vasheekran mantra baap se aapko mila hua hai usko parivartan kar vasheekran ke bajaay vasheebhoot bana deti hai। aur ek baat mein bhi vasheebhoot hue to sabhi bhoot pravesh ho jaate hain। kyonki in bhooton ki bhi aapas mein bahut unity hai। ek bhoot aaya arthaat sabhi ko aahvaan karega। phir kya hota hai?yeh bhoot saarthi se svaartha bana dete hain। aur aap kya karte ho? jab saartheepan ki smriti mein aate ho to bhooton ko bhagaane ki yuddha karte ho। yuddha ki sthiti ko yogayukta-sthiti nahin kahenge। isliye yogayukta va yuktiyukta manjal ke sameep jaane ki bajaay rook jaate ho aur pahla number sthiti se doosre number mein aa jaate ho। saarthi aarthaat vash hone vaale nahin lekin vash kar chalaane vaale। to aap sab kaun ho? saarthi ho na!

saarthi arthaat aatma-abhimaani। kyonki aatma hi saarthi hai। brahma baap ne is vidhi se number one ki siddhi praapta ki। isliye baap bhi is ka saarthi bana। saarthi banne ka yaadgaar baap ne karke dikhaaya। follow father karo। saarthi ban sada saarthi-jeevan mein ati nyaari aur pyaari sthiti ka anubhav karaaya। kyonki deh ko adheen kar baap pravesh hote arthaat saarthi bante hain, deh ke adheen nahin bante। isliye nyaara aur pyaara hai। aise hi aap sabhi brahman aatmaaen bhi baap samaan saarthi ki sthiti mein raho। chalte-phirte yeh check karo ki main saarthi arthaat sarva ko chalaane vaali nyaari aur pyaari sthiti mein sthit hoon। beech-beech mein yeh check karo। aise nahin ki saara din beet jaae phir raat ko check karo। saara din beet gaya to beeta hua samay sada ke liye kamaai se gaya। isliye ganva karke hosh mein nahin aana। yeh svatah natural sanskaar banaao। kaun-sa? checking ka। jaise kisi ke koi puraane sanskaar is braahmanjeevan mein abhi bhi aage badhne mein vighna roop ban jaate hain to kehte ho na ki na chaahte bhi sanskaaron ke vash ho jaate hain। jo nahin karna chaahte ho woh kar lete ho। jab ulte sanskaar na chaahte koi bhi karma kara lete hain to yeh natural checking ka shuddh sanskaar apna nahin sakte ho?bina mehnat ke checking ke shuddh sanskaar svatah hi kaarya karaate rahenge। yeh nahin kahenge ki bhool jaate hain ya bahut busy rehte hain। ashuddha athva vyartha sanskaar hain। kai bachchon mein ashuddha sanskaar nahin to vyartha sanskaar bhi hain। yeh ashuddha, vyartha sanskaar bhulaate bhi nahin bhool sakte ho aur yahi kehte ho ki mera bhaav nahin tha lekin mera yeh puraana svabhaav hai va sanskaar hai। to ashuddha nahin bhoolta phir shuddh sanskaar kaise bhool jaata hai?to saarthi-pan ki sthiti svatah hi sva-unnati ke shuddh sanskaar emerge karti hai aur natural samay pramaan sahaj checking hoti rahegi। ashuddha aadat se majboor ho jaate ho aur is aadat se majboot ho jaayenge। to suna sada yogayukta-yuktiyukta rahne ki vidhi kya hui? ‘saarthi ban chalna'। saarthi svatah hi saakshi ho kuchh bhi karenge,dekhenge,sunenge। saakshi ban dekhne, sochne,karne sab mein sab-kuchh karte bhi nirlep rahenge arthaat maaya ke lep se nyaare rahenge। to paath pakka kiya na। brahma baap ko follow karne vaale ho na। brahma baap se bahut pyaar hai na। pyaar ki nishaani hai ‘‘samaan banna''arthaat follow karna।

sabhi teachers ka baap se kitna pyaar hai! baap sada teachers ko apne seva ke sameep saathi samajhte hain। to pahle follow teachers karengi na! ismen sada yahi lakshya rakho ki ‘‘pahle main''। eershya mein pahle main nahin,woh nukshaan karti hai। shabd vahi hai ‘‘pahle main'' lekin ek hai eershyaavash pahle main। to isse pahle ke bajaay kahaan last pahunch jaata, first se last aa jaata aur follow father mein ‘‘pahle main'' kaha aur kiya to first ke saath mein aap bhi first ho jaayenge। brahma first hain na! to sada yeh lakshya rakho ki teachers arthaat follow father aur number one follow father। jaise brahma number one bana to follow karne vaale bhi number one ka lakshya rakho। teachers sabhi aise pakki hain na, himmat hai follow karne ki? kyonki teachers arthaat nimitta banne vaali, anek aatmaon ke nimitta ho। to nimitta banne vaalon ke oopar kitni jimmevaari hai! jaise brahma baap nimitta rahe na। to brahma baap ko dekhkar ke kitne brahman taiyaar huye! aise hi teachers koi bhi kaarya karti ho - chaahe khaana bana rahi ho, chaahe saphaai kar rahi ho lekin har karma karte yeh smriti rahe ki main nimitta hoon - anek aatmaon ke prati, ‘‘jo''aur ‘‘jaisa''main karoongi - mujh nimitta aatma ko dekh aur bhi karenge। isliye baapdaada sadaiv kehte hain ek taraph hai bhaashan karna aur doosre taraph hai bartan maanjana। donon hi kaam mein yogayukta,yuktiyukta। kaam kaisa bhi ho lekin sthiti sada hi yogayukta aur yuktiyukta ho। aise nahin bhaashan kar rahe hain tab to yogayukta rahen aur bartan maanjana arthaat saadhaaran kaam kar rahe hain to sthiti bhi saadhaaran ho jaae। har samay follow father। suna!

aage baithti ho na to baithne mein aage kitna achha lagta hai। aur sada aage badhne mein kitna achha lagega! jab bhi koi aisa kada sanskaar peechhe karne ki koshish kare to yeh scene yaad karna। jab aage baithna achha lagta to aage badhne mein kyon peechhe rahe? madhuban mein pahunch jaana aur apne ko himmat umang mein laana। kyonki peechhe rahne vaale to bahut aayenge peechhe, aap log bhi peechhe rah jaayenge to phir peechhe vaalon ko aage karna padega। isliye sada yahi smriti rakho ki ham aage rahne vaale hain। peechhe rehna arthaat praja banna। praja to nahin banna hai na! praja-yogi to nahin, raajayogi ho na! to follow father। achha!

foreigners kya karenge?follow father karenge na! kahaan tak pahunchenge?sabhi phrant mein aayenge। jo bhi aaye hain,follow father kar fast aur first aana। yeh nahin socho ki first to ek hi aayega lekin first-grade to bahut honge na। first number to brahma aayega lekin first-grade mein to saathi rahenge। isliye first mein aana। ek first nahin hoga,first-grade vaale bahut honge। isliye yeh nahin socho - pahla number to final ho gaya,isliye second hi aayenge, second-grade mein nahin jaana। jo ote so avval arjun। avval number maana arjun। sabko first mein aane ka chance hai, sab aa sakte hain। first-grade behad hai, kam nahin hai। to sabhi first mein aayenge na,pakka hai?achha!

sada brahma baap ko follow karne vaale, sada svatah yogayukta-yuktiyukta rahne vaale, sada saarthi ban karmendriyon ko shreshtha maarga par chalaane vaale,sada manjal ke sameep rahne vaale, aise sarvashreshtha aatmaon ko baapdaada ka yaadapyaar aur namaste।

Indore zone group:- baapdaada ki shreshtha mat ne shreshtha gati ko praapta kara liya - aisa anubhav karte ho na! jaisi mati vaisi gati hoti hai। to baap ki shreshtha mat hai to gati bhi shreshtha hogi na! kehte hain ki jaisi ant mate vaisi gate … yeh kyon gaaya hua hai? kyonki baap chakra ke ant mein hi aakar shreshtha mat deta hai। to ant samay par shreshtha mat lete ho aur anek janma sadgati ko praapta karte ho। is samay behad ki ‘‘ant mate so gate'' shreshtha ho jaati hai। to is samay ka hi yaadgaar bhakti mein chala aata hai। ek janma ki shreshtha mat se kitne janma tak shreshtha gati praapta karte ho! sab yaadgaar is sangamayug ke hi hain। yaadgaar kyon bane? kyonki is samay yaad mein rahkar karma karte ho। har karma ka yaadgaar ban gaya। aap amritvele vidhipoorvak uthte ho। to dekho, aapke yaadgaar chitron mein bhi vidhipoorvak uthaate hain, kitna pyaar se uthaate hain। hain jad chitra lekin kitne dil se, sneh se uthaate hain! uthaate bhi hain to khilaate, sulaate bhi hain kyonki aap is samay sab yaad ke vidhipoorvak karte ho। khaana bhi vidhipoorvak khaate ho। bhog lagaakar khaate ho na ya jaise hain vaise hi kha lete ho?aise to nahin - kisi ko khaana dena hai, isliye jaldi-jaldi mein bhog nahin lagaaya। agar kisko dena bhi hai,koi majboori hai - to bhi pahle alag hissa zaroor nikaalo। aise nahin - kisi ko khilaakar peechhe bhog lagaao। vidhipoorvak khaane se siddhi praapta hoti hai,khushi hoti hai, nirantar yaad sahaj rehti hai।

to amritvele se lekar raat tak jo bhi karma karo, yaad ke vidhipoorvak karo। tab har karma ki siddhi milegi। siddhi arthaat pratyakshaphal praapta hota rahega। sabse bade te-badi siddhi hai - pratyakshaphal ke roop mein ateendriy sukh ki anubhooti hona। sada sukh ki lahron mein,khushi ki lahron mein lahraate rahenge। pahle pratyakshaphal milta hai, phir bhavishya phal milta hai। is samay ka pratyakshaphal anek bhavishya janmon ke phal se shreshtha hai। agar abhi pratyakshaphal nahin khaaya to saare kalpa mein kabhi bhi pratyakshaphal nahin milega। abhi-abhi kiya,abhi-abhi mila - isko kehte hain - pratyakshaphal। satayug mein bhi jo phal milega woh is janma ka milega, doosre janma ka nahin। lekin yahaan jo milta hai woh pratyakshaphal arthaat abhi-abhi ka phal hai। to pratyakshaphal se vanchit nahin rehna, sada phal khaate rehna। yeh pratyakshaphal achha lagta hai na! aisa bhaagya kabhi socha tha?bhagwan dvaara phal milega - yeh to svapna mein bhi nahin tha! to jo baat khyaal-khvaab mein nahin ho aur vo ho jaae to kitni khushi hoti hai! aajkal ki alpakaal ki lottery aati hai,to bhi kitni khushi hoti hai! aur yeh pratyakshaphal so bhavishya phal ho jaata hai। to nasha rehta hai na, kabhi kam kabhi jyaada to nahin? sada ekras sthiti mein udte chalo। second mein udna seekh gaye ho na ya jyaada samay lagta hai? sankalp kiya aur pahunche - itni fast gati hai?achha!

indaur zone vaale sabhi santushta ho na,maataayen sada santushta ho?kabhi parivaar mein bhi laukik dvaara asantushta nahin hoti? kabhi tang hoti ho? kabhi chanchal bachchon se tang hoti ho? tang kabhi nahin hona,jitna aap tang honge utna woh jyaada tang karenge। isliye trustee bankar,sevaadhaari bankar seva karo। mera-pan aata hai to tang hote ho। mera bachcha aur aise karta hai! to jahaan mera-pan hota hai vahaan tang hote aur jahaan tera-tera aaya to tairne lagte। to tairne vaale ho! sada tera maana svamaan mein rehna। mera-mera kehna maana abhimaan aana,tera-tera maanna maana svamaan mein rehna। to sada svamaan mein rahne vaale arthaat tera maanne vaale - yahi yaad rakhna। achha!

double foreigners bhi sikeeldhe hain। thode hain। kitni khushi rehti hai,uska varnan kar sakte ho? behad ka baap hai to praapti bhi behad ki hai,isliye had ki ginti kar nahin sakte। baapdaada to double videshi bachchon ko teevra purushaarthi ki raphtaar se dekh khush hote hain। bhaaratvaasi to bhaarat ki baaton ko jaante hain। lekin yeh log na jaante bhi itne sameep teevra purushaarthi bane, to kamaal ki na! to double lucky ho gaye। aur bhaaratvaasiyon ko kya nasha hai ki ham hi har kalpa mein avinaashi bhaaratvaasi banenge। yeh nasha hai na - avinaashi khanda bhaarat hai। harek ka apna-apna nasha hai। sabhi ko bhaarat mein hi aana padega na aur aap baithe hi bhaarat mein ho। achha! sabhi ko yaad।