Avyakt murli for Wednesday 13 February 1991

>

13-02-91 om shanti avyakt baapdaadaamdhuban

vishwa parivartan mein teevrata laane ka saadhan ekaagrata ki shakti evan ekras sthiti

kalyaankaari shiv baba apne kalyaankaari bachchon prati boleh -

aaj doordeshi baap apne doordeshi aur deshi bachchon ko milan mubaarak dene aaye hain। aap sabhi bhi doordesh se aaye hain। baap bhi door desh se aaye hain। bachche baap ko mubaarak dene aaye hain aur baap bachchon ko padma guna mubaarak dete hain। manaana arthaat samaan banaana। duniya mein sirf manaate hain lekin baap manaate arthaat banaate hain। sabhi bachche,chaahe saakaar roop mein sammukh ho, chaahe aakaar roop mein sammukh hain, sab bachche vishwa ke kone kone mein baap ki heere tulya jayanti mana rahe hain। baapdaada aakaari roop mein sammukh bachchon ko bhi heere tulya jayanti ki heere tulya padmaapadma mubaarak de rahe hain। is mahaan avatrit hone ki jayanti ko aap sabhi bachche manaate svayan bhi heere tulya ban gaye ho। isko kaha jaata hai manaana arthaat banaana। har ek bachche ke mastak par padmaapadma bhaagyavaan banne ka sitaara chamak raha hai। to manaate manaate sada ke liye bhaagyavaan ban gaye। aisi alaukik jayanti saare kalpa mein koi bhi nahin manaate hain। chaahe mahaan aatmaon ki bhi jayanti manaate hain, lekin woh mahaan aatmaaen manaane vaalon ko mahaan banaate nahin hain। is sangam par hi aap bachche parmaatma jayanti manaate mahaan ban jaate ho। shreshtha te shreshtha aatmaaen ban jaate ho। aise heere tulya jeevan banaate jo janma janmaantar heere aur ratnon se khelte rehte। aaj ka yaadgaar divas sirf baap ka nahin hai lekin bachchon ka bhi birth de hai,kyonki jab baap avatrit hote hain to baap ke saath brahma daada bhi parivaartit aatma avatrit hote hain। baap aur daada donon ka saath-saath avatran hota hai। sivaae braahmanon ke baapdaada sthaapna ka yagya rach nahin sakte, isliye baapdaada aur brahman bachche saath-saath avatrit hote hain। to kiska janma din kahenge - aapka ya baap ka? aapka bhi hai na! to aap baap ko mubaarak dete aur baap aapko mubaarak dete।

shiv jayanti arthaat parmaatma jayanti ko mahaashivraatri kyon kehte hain? sirf shiv raatri nahin kehte lekin mahaashivraatri kehte hain kyonki is avatrit divas par shiv baap brahma daada aur braahmanon ne mahaan sankalp ka vrat liya ki vishwa ko pavitrata ke vrat se mahaan shreshtha banaayenge। vishesh aadi dev brahma apne nimitta brahman aadi bachchon ke saath is mahaan vrat lene ke nimitta bane,to mahaan banaane ke vrat lene ka divya divas hai। isliye maha shivraatri kaha jaata hai। aur aap brahman bachchon ne yeh mahaan vrat liya iske yaadgaar swaroop mein aaj tak bhi bhakta log vrat rakhte hain। yeh mahaan jayanti pratigya lene ki jayanti hai। ek taraph pratyaksha hone ki jayanti hai, doosri taraph pratigya lene ki jayanti hai। aadi samay mein aap sabhi jo bhi nimitta bane,aadi dev ke saath aadi ratna nikle unhon ki pratigya ka pratyaksha phal aap sabhi pratyaksha hue। dekho kahaan kahaan konon mein chale gaye the। kitne kone mein chale gaye lekin baap ne mitti mein chhipe hue apne heere-tulya bachchon ko dhoondh liya na। abhi to vishwa ke kone-kone mein aap holiest aur highest heere chamak rahe ho। to yeh parmaatma jayanti ke vrat aur pratigya ka phal hai। aap sabhi ab bhi chaaron or shiv baap ke jhande ke aage pratigya lete ho na। to yeh aadi rasam ki vidhi ab tak aap bhi karte rehte ho। yeh parmaatma jayanti jisko shiv raatri bhi kehte hain। raatri arthaat andhakaar। andhakaar mein jo vyakti va vastu jaisi hoti hai vaisi dikhaai nahin deti hai। hote hue bhi dikhaai nahin deti। jab baap avatrit hote hain to aap bhi jo aap hain, jo hain, jaise hain, na apne aapko dekh sakte the, na baap ko dekh va jaan sakte the। main aatma hoon yeh hote hue bhi gyaan va anubhav ke netra dvaara dekh nahin sakte the। netra hote hue bhi andhakaar mein the। netra yathaartha kaarya nahin karte the। spashta dikhaai nahin deta। to aap bhi andhakaar mein the na। apne ko hi nahin dekh sakte the। isliye baap pahle is andhakaar ko mitaate hain। to shivraatri arthaat andhakaar ko mitaae yathaartha ka prakaash prajjavlit hona। isliye shivraatri kahkar manaate hain। bhakti maarga ki vidhiyaan bhi aapki yathaartha vidhiyon ka yaadgaar hai। ek taraph bhakton ki vidhi aur doosre taraph hai bachchon ki sampoorn vidhi। donon hi dekh baap harshit hote hain। aap log bhi harshit hote ho na ki hamaare bhakta follow karne mein kitne hoshiyaar hain। last janma tak bhi apni bhakti ki vidhiyaan nibhaate aate hain। yeh sab hai baap aur aap bindu roop ki kamaal। shiv baba ke saath saaligraam bhi saath-saath pooje jaate hain। aap sabhi bindu swaroop ke mahatva ko jaante ho। isliye aaj tak bhakton mein shiv arthaat bindu swaroop ka mahatva hai। woh sirf bindu roop ko jaante hain, yathaartha nahin jaante hain, apne roop se jaante hain। lekin aap baap ko sirf bindu roop se nahin lekin bindu ke saath jo sarva khazaanon ka sindhu hai, to bindu ke saath sindhu roop ko bhi jaante ho। donon roop se jaana hai na? sindhu swaroop ko jaante aap bhi master sindhu ban gaye। aapmen kitne khazaanen bhare hue hain - hisaab laga sakte ho! anginat, athaah aur avinaashi khazaanen hain। sabhi master sindhu bane ho na ki ab banna hai?

tapasya varsha mein kya karenge? tapasya arthaat jo bhi sankalp karenge woh dridhta se। tapasya arthaat ekaagrata aur dridhta। yogi jeevan mein to abhi bhi ho। aap sab yogi jeevan vaale ho na?ki 8ghanta, 6ghanta ya kuchh ghante yog lagaane vaale ho?yogi jeevan to hai hi, phir khaas tapasya varsha kyon rakha hai? baapdaada sabhi bachchon ko yogi jeevan vaale yogi aatmaon ke roop mein dekhte hain aur ho bhi yogi jeevan mein। aur jeevan to samaapta ho gai। bhatki hui bhogi jeevan se thakkar niraash hokar soch samajhkar yogi bane ho। soch samajhkar bane ho ya kiske kahne se ban gaye ho। anubhav karke bane ho ya sirf anubhav sunkar ban gaye ho? anubhvi ban karke yogi bane ho ya sirf suna aur dekha to achha lag gaya? sirf dekh karke sauda kiya hai ya sunkar sauda kiya hai? kahaan kiske dhokhe mein to nahin aaye ho? achhi tarah se dekh liya hai? abhi bhi dekh lo। koi jaadu to nahin lag gaya hai? teenon aankhe khol kar sauda kiya hai?kyonki buddhi bhi aankh hai। yeh do aankhe aur buddhi ki aankh, teenon khol kar sauda kiya hai। sabhi pakke hain?

sabhi bachche meethi-meethi roohrihaan karte hain। kehte hain - baba hai to aapke hi,aur kahaan to jaayenge hi nahin। aur gyaani-yogi jeevan bhi bahut achhi lagti hai lekin thoda-thoda kisi na kisi baat mein sahan karna padta hai। us samay man aur buddhi halchal mein aa jaati hai yeh kab tak hoga,kaise hoga…?beech-beech mein jo halchal hoti hai - chaahe apne se, chaahe seva se, chaahe saathiyon se - yeh halchal nirantar mein antar le aati hai। to sahan shakti ki percentage thodi kam ho jaati hai। hain pakke, lekin pakke ko bhi kabhi kabhi ye baaten hila deti hain। to tapasya varsha arthaat sarva gunon mein, sarva shaktiyon mein,sarva sambandhon mein, sarva svabhaav-sanskaar mein 100 paas hona। abhi paas ho lekin full paas nahin। ek hai paas,doosra hai full paas aur teesra hai paas with honour। to tapasya varsha mein agar paas with honour thode bane to full paas to sab ban sakte hain। aur full paas hone ke liye sabse sahaj saadhan hai jo bhi koi paper aate hain aur is tapasya varsha mein bhi paper aayenge। aise nahin ki nahin,aayenge lekin paper samajhkar paas karo। baat ko baat nahin samjho,paper samjho। paper ke question ke vistaar mein nahin jaate - yeh kyon aaya, kaise aaya,kisne kiya?paas hone ka soch kar paper ko paar karte hain। to paper samajhkar paas karo। yeh kya ho gaya, aisa hota hai kya,ya apni kamjori mein bhi yeh nahin socho ki yeh to hota hi hai। apne liye sochte ho - yeh to hota hi hai, itna to hoga hi aur doosron ke liye sochte ho yeh kyon kiya, kya kiya। in sab baaton ko paper samajhkar full paas hone ka lakshya rakh karke paas karo। paas hona hai,paas karna hai aur baap ke paas rehna hai to full paas ho jaayenge। samjha।

abhi majority result mein dekha jaata hai kai baaton mein to achhi tarah se paas ho gaye hain। sirf apne puraane svabhaav aur sanskaar, jo kabhi-kabhi naye jeevan mein emerge ho jaate hain। apne va doosron ke svabhaav-sanskaar bhi takkar khaate hain। apna kamjor sanskaar doosre ke sanskaar se takkar khaata hai। yeh kamjori abhi vishesh lakshya ko pahunchne mein vighna daalti hai। full paas ke bajaae paas mark dila deti hai। na apne svabhaav-sanskaar ko sankalp va karma mein laao,na doosron ke svabhaav va sanskaar se takkar khaao। donon mein sahan shakti aur samaane ki shakti ki aavashyakta hai। yeh full paas ke sameep laane nahin deti aur yahi kaaran hai jo kahaan albelaapan, kahaan aalasya aa jaata hai। tapasya varsha mein man-buddhi ko ekaagra karna arthaat ek hi sankalp mein rehna hai ki mujhe full paas hona hi hai। agar man-buddhi jara bhi vichlit ho to dridhta se phir se usko ekaagra karo। karna hi hai,hona hi hai। yeh sab jo bhi kamjoriyaan hain unko tapasya ki yog agni mein bhasma karo। yog agni prajjavlit ho gai hai? lagan ki agni mein abhi bhi rehte ho lekin kabhi kabhi agni thodi si percentage mein kam ho jaati hai। bujhti nahin hai, kam hoti hai। tej aag mein jo bhi cheej daalo to ya to parivartan ya bhasma hogi। parivartan aur bhasma karne, donon mein tej aag chaahiye। yog agni hai। lagan ki agni bhi jagi hui hai lekin sada hi tej rahe। kabhi tej, kabhi kam nahin। jaise yahaan sthool agni mein bhi agar koi cheej achhi banaane chaahte ho aur time par banaane chaahte ho to agni ko usi roop mein rakhenge jo cheej samay par aur achhi reeti taiyaar ho jaae। agar beech mein aag bujh jaaye to samay par cheej taiyaar ho sakegi? bhal taiyaar hogi parantu samay par nahin। to aapki yog agni bhi beech-beech mein dheeli ho jaati hai to sampanna banenge lekin last mein banenge। last mein sampanna banne vaale ko fast aur first raajya bhaagya ka adhikaar nahin mil sakta। aap sabhi ka lakshya first janma mein raajya bhaagya karne ka hai ya doosre-teesre janma mein aayenge। pahle janma mein aana hai na?

tapasya varsha arthaat fast purooshaartha kar first janma mein first number aatmaon ke saath raajya mein aana। ghar mein saath chalna hai na? phir raajya mein bhi brahma baap ke saath aana hai। to samjha tapasya varsha kyon rakha hai?ekaagrata ki shakti ko badhaao। abhi bhi na chaahte bhi vyartha chal jaata hai। vyartha ka taraph koi-koi samay shuddh-shreshtha sankalp se bhaari ho jaata hai। tapasya arthaat vyartha sankalp ki samaapti। kyonki yeh samaapti hi sampoornata ko laayegi। samaapti ke bina sampoornata nahin aayegi। to aaj ke din se tapasya varsha aarambha kar rahe ho। umang-utsaah ke liye baapdaada mubaarak dete hain। chaaron hi subject mein full paas hone ki marks leni hai। aise nahin samajhna ki meri teen subject to theek hai, sirf ek mein kami hai। full paas ho jaayenge?nahin, phir bhi paas ki list mein aayenge। full paas arthaat chaaron subject mein full marks ho। sada har aatma ke prati kalyaan ki bhaavna, chaahe woh aapki sthiti ko hilaane ki bhi koshish kare lekin akalyaan karne vaale ke oopar bhi kalyaan ki bhaavna, kalyaan ki drishti, kalyaan ki vritti, kalyaanmay kriti। isko kaha jaata hai - kalyaankaari aatma। shiv ka arth bhi kalyaankaari hai na? to shiv jayanti arthaat kalyaankaari bhaavna। kalyaan karne vaale ke oopar kalyaan karna yeh to agyaani bhi karte hain। achhe ke saath achha chalna yeh to sabhi jaante hain। lekin akalyaan ke vritti vaale ko apne kalyaan ki vritti se parivartan karo ya kshama karo। parivartan na bhi kar sakte, kshama to kar sakte ho na! master kshama ke saagar to ho na! to aapki kshama us aatma ke liye shiksha ho jaayegi। aajkal shiksha dene se koi samajhta,koi nahin samajhta। yeh karo to yeh shiksha ho jaayegi। kshama arthaat shubh bhaavna ki duvaaen dena,sahayog dena। shiksha dene ka samay abhi chala gaya। abhi sneh do,sammaan do,kshama karo। shubh bhaavna rakho,shubh kaamna rakho - yahi shiksha ki vidhi hai। woh vidhi ab puraani ho gai। to nai vidhi aati hai na? tapasya varsha mein is nai vidhi se sarva ko aur sameep laao। sunaaya tha na ki daane kuchh taiyaar ho bhi gaye hain lekin maala abhi taiyaar nahin hai। dhaaga bhi hai, daane bhi hai lekin daana daane ke sameep nahin hai isliye maala taiyaar nahin hai। apni reeti se daana taiyaar hai lekin sangathan mein, sameepta mein taiyaar nahin hai। to tapasya varsha mein baap samaan to banna hi hai lekin daana daane ke sameep bhi aana hai। samjha। baaki yogi the,yogi hai,sada yogi jeevan mein hi rehna hai। drama ke har scene ko pyaara dekhte hue chalo। har scene pyaari hai। duniya ke liye jo apyaari scene hai, woh aapke liye pyaari hai। jo bhi hota hai usmein koi raaz bhara hua hota hai। raaz ko jaanne se kabhi kisi baat mein,kisi drishya mein naaraaz nahin honge। raaz ko jaanne vaale naaraaz nahin hote। raaz ko na jaanne vaale naaraaz hote hain।

double videshi bhi is baari shiv jayanti manaane time par pahunch gaye hain। dridh nishchay rakha ki jaana hi hai to pahunch gaye na?jaaye na jaaye - yeh sochne vaale rah gaye। abhi to yeh kuchh bhi nahin hai, abhi to hona hai। abhi prakriti ne full force ki halchal shuru nahin ki hai। karti hai lekin phir aap logon ko dekhkar thoda thandi ho jaati hai। woh bhi dar jaati hai ki mere maalik taiyaar nahin hain। kiski daasi banen? nirbhay ho na? darne vaale to nahin ho na? log darte hain marne se aur aap to hai hi mare hue। puraani duniya se mare hue ho na? nai duniya mein jeete ho, puraani duniya se mare hue ho, to mare hue ko marne se kya dar lagega? aur trustee ho na?agar koi bhi meraapan hoga to maaya billi myaaoon myaaoon karegi। main aaoon, main aaoon…। aap to ho hi trustee। shareer bhi mera nahin। logon ko marne ka phikar hota hai ya cheejon ka ya parivaar ka phikra hota hai। aap to ho hi trustee। nyaare ho na,ki thoda-thoda lagaav hai? body kaansesnes hai to thoda-thoda lagaav hai। isliye tapasya arthaat jvaala swaroop, nirbhay। achha।

donon murabbi daadiyaan sun rahi hain, dekh rahi hain। kuchh naveenta dekhni chaahiye na। baapdaada ne pahle bhi sunaaya ki ek hai vaani ki seva, doosri hai pharishta moorta aur shaktishaali snehmayi drishti ki seva। kuchh samay inhon ko yeh seva ka part mila hua hai। aadi se vaani aur karma ki seva to karti hi rahi hai। is vidhi ki seva ka yeh bhi drama mein hai, ant mein yahi seva rah jaayegi। yeh part thode samay ke liye inhon ko mila hai। phir bhi murabbi bachche hain na। inhon ke hisaab-kitaab chuktu hone mein bhi seva hai। nimitta hisaab hai lekin raaz seva ka hai। behad ke khel mein yeh bhi ek wonderful khel hai। donon ka part bhi naveenta hai। yeh jaldi-jaldi hisaab-kitaab chuktu kar sampannata aur sampoornata ke sameep ja rahi hain। akele nahin jaayenge - yeh koi nahin socho। har ek ko chuktu to karna hi hai lekin koi sirf chuktu karta hai, koi chuktu karte bhi seva karte hain। saare vijayi ban gaye na? sabki duvaaon ki dava bhi sooli se kaanta kar deti hai। hisaab-kitaab ke prabhaav mein nahin aai। donon theek ho gaye hain। sirf parhej mein hai। rest bhi parhej hai। jaise khaane mein parhej hoti hai। yeh phir chalne phirne bolne ki parhej hai। sneh kya nahin kar sakta hai! kahaavat hai - sneh patthar ko paani kar sakta hai, to yeh beemaari nahin badal sakta hai? badal to gai na! heart ki beemaari badal gai। patthar se paani to ho gaya na! to yeh aap sabka pyaar hai। baaki ab sirf paani rah gaya, patthar khatma ho gaya। rest mein rahne se donon ke chehre chamak gaye hain। parivaar ka pyaar bhi bahut madad deta hai। achha।

chaaron or ke sarva vishwa kalyaan ki shreshtha bhaavna rakhne vaale,chaaron or ke aise dridh sankalp karne vaale, tapasya dvaara svayan ko, vishwa ko parivartan karne vaale, ekaagrata ki shakti se ekras teevra sthiti mein rahne vaale,aise tapasvi aatmaon ko snehi aatmaon ko,sada baap ke saath rahne vaali aatmaon ko,sada bhinna-bhinna vidhi se seva mein saathi rahne vaale bachchon ko maha-parmaatma jayanti ki mubaarak aur yaadapyaar sveekaar ho aur saath-saath namaste।

(daadi ji,daadi jaanki ji tatha mukhya bhaai-bahinon ke saath baapdaada ne stage par khade hokar jhanda phahraaya tatha sarva ko mubaarak di। 55 mombatti jalaai tatha tapasya varsha ke shubhaarambha mein14 maas tapasya ke prateek 14mombatti aur do baapdaada ke smriti ki mombatti jalaate baapdaada ne cake kaati)

chaaron or ke sarva ati snehi sahayogi aur seva ke saathiyon ko nirantar utsaah mein rahne ki is shiv jayanti ke utsav ki mubaarak ho,mubaarak ho…। sada sarva khazaanon se jholi bharpoor rahne ki mubaarak ho।