Avyakt murli for Saturday 3 October 1992

>

03-10-92 om shanti avyakt baapdaadaamdhuban

brahman arthaat sada shreshtha bhaagya ke adhikaari

parmaatma-paalna mein palne vaale sarvashreshtha bachchon prati bhaagyavidhaata baapdaada bole -

aaj bhaagyavidhaata baapdaada apne sarva bachchon ka shreshtha bhaagya dekh harshit ho rahe hain। itna shreshtha bhaagya aur itna sahaj praapta ho-aisa bhaagya saare kalpa mein sivaae aap brahman aatmaon ke aur kisi ka bhi nahin hain। sirf aap brahman aatmaae is bhaagya ke adhi-kaari ho। yeh brahman janma mila hi hai kalpa pahle ke bhaagya anusaar। janma hi shreshtha bhaagya ke aadhaar par hai। kyonki brahman janma svayan bhagwan dvaara hota hai। anaadi baap aur aadi brahma dvaara yeh alaukik janma praapta hua hai। jo janma hi bhaagyavidhaata dvaara hua hai,woh janma kitna bhaagyavaan hua! apne is shreshtha bhaagya ko sada smriti mein rakh harshit rehte ho? sada smriti pratyaksha-swaroop mein ho, sada man mein emerge karo। sirf dimaag mein samaaya hua hai-aise nahin। lekin har chalan aur chehre mein smritisvaroop pratyaksha roop mein svayan ko anubhav ho aur doosron ko bhi dikhaai de ki inhon ki chalan mein, chehre mein shreshtha bhaagya ki lakeer spashta dikhaai deti hai। kitne prakaar ke bhaagya praapta hain,uski list sada mastak par spashta ho। sirf diary mein list nahin ho lekin mastak beech bhaagya ki lakeer chamakti hui dikhaai de।

pahla bhaagya-janma hi bhaagyavidhaata dvaara hua hai। doosri baat-aisa kisi bhi aatma va dharmaatma,mahaan aatma ka bhaagya nahin jo svayan bhagwan ek hi baap bhi ho, shikshak bhi ho aur satguru bhi ho। saare kalpa mein aisa koi hai?ek hi dvaara baap ke sambandh se varsa praapta hai, shikshak ke roop se shreshtha padhaai aur pad ki praapti hai,satguru ke roop mein mahaamantra aur vardaan ki praapti hai। varse mein sarva khazaanon ka adhikaar praapta kiya hai। sarva khazaane hain na। koi khazaane ki kami hai? teachers ko koi kami hai?makaan bada hona chaahiye,jigyaasu achhe-achhe hone chaahiye - yeh kami hai? nahin hai। jitni seva nirvighna badhti hai to seva ke saath seva ke saadhan sahaj aur svatah badhte hi hain।

baap dvaara varsa aur shreshtha paalna mil rahi hai। parmaatma paalna kitni oonchi baat hai! bhakti mein gaate hain paramatma paalanhaar hai। lekin aap bhaagyavaan aatmaae har kadam parmaatma paalna ke dvaara hi anubhav karte ho। parmaatma shreemat hi paalna hai। bina shreemat arthaat parmaatma-paalna ke ek kadam bhi nahin utha sakte। aisi paalna sirf abhi praapta hai, satayug mein bhi nahin milegi। woh dev aatmaon ki paalna hai aur abhi parmaatma paalna mein chal rahe ho। abhi pratyaksha anubhav se kah sakte ho ki hamaara paalanhaar svayan bhagwan hai। chaahe desh mein ho, chaahe videsh mein ho lekin har brahman aatma phalak se kahegi ki hamaara paalanhaar param aatma hai। itna nasha hai! ki kab merge ho jaata hai, kab emerge hota hai?janmate hi behad ke khazaanon se bharpoor ho avinaashi varse ka adhikaar le liya। saath-saath janmate hi trikaaldarshi sat shikshak ne teenon kaalon ki padhaai kitni sahaj vidhi se padhaai! kitni shreshtha padhaai hai aur padhaane vaala bhi kitna shreshtha hai! lekin padhaaya kinhon ko hai?jinhon mein duniya ki naaummeed hai unhon ko ummeedvaar banaaya। na sirf padhaaya lekin padhaai padhne ka lakshya hi hai oonch te oonch pad praapta karna। parmaatma-padhaai se jo shreshtha pad praapta kar rahe ho, aisa pad saare world ke oonche te oonche pad ke aage kitna shreshtha hai! anaadi srishti-chakra ke andar dvaapar se lekar abhi tak jo bhi vinaashi pad praapta hue hain, unhon mein sarvashreshtha pad pahle raajya-pad gaaya hua hai। lekin aapke raajya-pad ke aage woh raajya-pad kya hai? shreshtha hai? aajkal ka shreshtha te shreshtha pad president,prime-minister hai। bade te badi padhaai dvaara filosophar banenge, cheyarmen,director aadi ban jaayenge,bade te bade officer ban jaayenge। lekin yeh sab pad aapke aage kya hain! aapko ek janma mein janma-janma ke liye shreshtha pad praapta hone ki parmaatma-guarantee hai aur us ek janma ki padhaai dvaara ek janma bhi pad praapta karaane ki koi guarantee nahin। aap kitne bhaagyavaan ho jo pad bhi sarvashreshtha aur ek janma ki padhaai aur anek janma pad ki praapti! to bhaagya hai na! chehre se dikhaai deta hai? chalan se dikhaai deta hai? kyonki chaal se manushya ke haal ka pata lagta hai। aisi chaal hai jo aapke itne shreshtha bhaagya ka haal dikhaai deve?ya abhi saadhaaran lagte ho? kya hai? saadhaaranta mein mahaanta dikhaai de। jab aapke jad chitra abhi tak mahaanta ka anubhav karaate hain। ab bhi kaisi bhi aatma ko lakshmi-naaraayan va seeta-raam va deviyaan bana dete hain to saadhaaran vyakti mein bhi mahaanta ka anubhav kar sir jhukaate hain na। jaante bhi hain ki yeh vaastav mein naaraayan va raam aadi nahin hain,banaavti hain,phir bhi us samay mahaanta ko sir jhukaate hain, naman-poojan karte hain। lekin aap to svayan chaitanya dev-deviyon ki aatmaae ho। aap chaitanya aatmaon se kitni mahaanta ki anubhooti honi chaahiye! hoti hai? aapke shreshtha bhaagya ko man se namaskaar karen, haath va sir se nahin। lekin man se aapke bhaagya ka anubhav kar svayan bhi khushi mein naachen।

itni shreshtha padhaai ki praapti shreshtha bhaagya hai। log padhaai padhte hi hain is jeevan ke shareer nirvaah arth kamaai ke liye jisko source aaph income kaha jaata hai। aapki padhaai dvaara source aaph income kitna hai? maalaamaal ho na। aapki income ka hisaab kya hai?unka hisaab hoga laakhon mein, karodon mein। lekin aapka hisaab kya hai? aapki kitni income hai? kadam mein padma। to saare din mein kitne kadam uthaate ho aur kitne padma jama karte ho?itni kamaai aur kiski hai?kitna bada bhaagya hai aapka! to aise apni padhaai ke bhaagya ko emerge roop mein anubhav karo। kisi se poochhte hain to kehte hain-brahmaakumaar aur brahmaakumaari to hain, ban to gaye hain। lekin brahmaakumaar va brahmaakumaari arthaat shreshtha bhaagya ki lakeer mastak mein chamakti dikhaai de। aise nahin ki brahmaakumaar va brahmaakumaari to hain lekin mil jaayega,kuchh to ban hi jaayenge, chal to rahe hi hain,ban to gaye hi hain…। ban gaye hain ya bhaagya ko dekhkar ke ud rahe hain?ismen ban to gaye hain, ban hi rahe hain,chal hi rahe hain… ye bol kiske hain? shreshtha bhaagyavaan ke ye bol hain?brahmaakumaar aur brahmaakumaari arthaat mauj se mohabbat ki jeevan bitaane vaale। aise nahin ki kabhi majboori, kabhi mohabbat। jab koi samasya aati hai to kya kehte ho?chaahte nahin hain lekin majboor ho gaye hain। bhaagyavaan arthaat majboori khatma,mohabbat se chalne vaale। chaahte to hain lekin… - aisi bhaasha bhaagyavaan brahman aatmaon ki nahin hai। bhaagyavaan aatmaae mohabbat ke jhoole mein mauj mein udti hain। udti kala ki mauj mein rehti hain। majboori unke aage aa nahin sakti। samjha? apna shreshtha bhaagya merge nahin rakho, emerge karo।

teesri baat-satguru dvaara kya bhaagya praapta hua? pahle to mahaamantra mila। satguru ka mahaamantra kya mila? pavitra bano,yogi bano। janmate hi yeh mahaamantra satguru dvaara praapta hua aur yahi mahaamantra sarva praaptiyon ki chaabi sarva bachchon ko mili। ‘‘yogi jeevan, pavitra jeevan’’ hi sarva praaptiyon ka aadhaar hai। isliye yeh chaabi hai। agar pavitrata nahin, yogi jeevan nahin to adhikaari hote hue bhi adhikaar ki anubhooti nahin kar sakenge। isliye yeh mahaamantra sarva khazaanon ke anubhooti ki chaabi hai। aisi chaabi ka mahaamantra satguru dvaara sabhi ko shreshtha bhaagya mein mila hai aur saath-saath satguru dvaara vardaan praapta hue hain। vardaanon ki list to bahut lambi hai na! kitne vardaan mile hain? itne vardaanon ka bhaagya praapta hai jo vardaanon se hi saari brahman jeevan bita rahe ho aur bita sakte ho। kitne vardaan hain, list ka maaloom hai?to varsa bhi hai, padhaai bhi hai, mahaamantra ki chaabi aur vardaanon ki khaan bhi hai। to kitne bhaagyavaan ho! ya chhipa kar rakha hai, aage chal ant mein kholenge? bahutkaal se bhaagya ki anubhooti karne vaale ant mein bhi padmaapadma bhaagyavaan pratyaksha honge। ab nahin to ant mein bhi nahin। abhi hai to ant mein bhi hai। aise kabhi nahin sochna ki sampoorn to ant mein banna hai। sampoornata ki jeevan ka anubhav abhi se aarambha hoga tab ant mein pratyaksha roop mein aayenge। abhi svayan ko anubhav ho, auron ko anubhav ho,jo sameep samparka mein aaye hain unhon ko anubhav ho aur ant mein vishwa mein pratyaksha hoga। samjha?

baapdaada aaj sarva bachchon ke bhaagya ki shreshtha lakeer ko dekh rahe the। jitna baap ne bhaagya dekha utna hi bachche sada anubhav kam karte hain। bhaagya ki khaan sabhi ko praapta hai। lekin koi ko kaarya mein lagaana aata hai aur koi ko kaarya mein lagaana nahin aata hai। jitna laga sakte utna nahin lagaate hain। mila sabko ek jaisa hai lekin khazaane ko kaarya mein lagaakar baap ka khazaana so apna khazaana anubhav karna-ismen nambarvaar hain। baap ne nambarvaar nahin diya,diya sabko number one hai lekin kaarya mein lagaana-ismen apne aap number bana diye hain। samjha, number kyon bane hain?jitna use karenge, kaarya mein lagaayenge,utna badhta jaayega। merge karke rakh denge to badhega nahin aur svayan bhi anubhav nahin karenge to doosron ko bhi anubhav nahin kara sakenge। isliye chalan aur chehre mein laao। samjha, kya karna hai? jo bhi number aave achha hai। chalo, 108 nahin to 16000 mein hi mil jaaye, kuchh to banenge। lekin 16hajaar ki maala sada nahin japi jaati, kahaan-kahaan aur kabhi-kabhi japte hain। 108 ki maala to sada japte rehte hain। ab main kaun? - yeh svayan jaano। agar baap kahenge va aur koi kahenge ki aap to 16000 mein aayenge to kya kahenge?maanenge?question-mark shuru ho jaayenge। isliye apne aapko jaano-main kaun? achha!

chaaron or ke sarvashreshtha bhaagyavaan aatmaon ko,sarva janma se praapta parmaatma-janma adhikaari aatmaon ko, sarva baap dvaara shreshtha varsa aur parmaatma-paalna lene vaale, sat shikshak dvaara shreshtha padhaai ka shreshtha pad aur shreshtha kamaai karne vaale, satguru dvaara mahaamantra aur sarva vardaan praapta karne vaale-aise ati shreshtha padmaapadma,har kadam mein padma jama karne vaali shreshtha aatmaon ko baapdaada ka yaad, pyaar aur namaste।

avyakt baapdaada ki personal mulaakaat

group nan.1

yathaartha seva va yathaartha yaad ki nishaani hai-nirvighna rehna aur nirvighna banaana

sada apne shreshtha bhaagya ke geet svatah hi man mein bajte rehte hain?yeh anaadi avinaashi geet hai। isko bajaana nahin padta lekin svatah hi bajta hai। sada yeh geet bajna arthaat sada hi apne khushi ke khazaane ko anubhav karna। sada khush rehte ho? braahmanon ka kaam hi hai khush rehna aur khushi baantana। isi seva mein sada busy rehte ho? va kabhi bhool bhi jaate ho? jab maaya aati hai phir kya karte ho? jitna samay maaya rehti hai utna samay khushi ka geet banda ho jaata hai। baap ka sada saath hai to maaya aa nahin sakti। maaya aane ke pahle baap ka saath alag karke akela banaati hai, phir vaar karti hai। agar baap saath hai to maaya namaskaar karegi, vaar nahin karegi। to maaya ko jab achhi tarah se jaan gaye ho ki yeh dushman hai,to phir aane kyon dete ho?saath chhod dete ho na,isliye maaya ko aane ka darvaaja mil jaata hai। darvaaje ko double lock lagaao, ek lock nahin। aajkal ek lock nahin chalta। to double lock hai-yaad aur seva। seva bhi nisvaartha seva-yahi lock hai। agar nisvaartha seva nahin to woh lock dheela lock ho jaata hai, khul jaata hai। yaad bhi shaktishaali chaahiye। saadhaaran yaad hai to bhi lock nahin kahenge। to sada check karo-yaad to hai lekin saadhaaran yaad hai ya shaktishaali yaad hai? aise hi, seva karte ho lekin nisvaartha seva hai ya kuchh na kuchh svaartha bhara hai? seva karte hue bhi,yaad mein rehte hue bhi yadi maaya aati hai to zaroor seva athva yaad mein koi kami hai।

sada khushi ke geet gaane vaali shreshtha bhaagyavaan aatmaae hain-is smriti se aage badho। yathaartha yog va yathaartha seva-yeh nishaani hai nirvighna rehna aur nirvighna banaana। nirvighna ho ya kabhi-kabhi vighna aata hai?phir kabhi paas ho jaate ho,kabhi thoda fail ho jaate ho। koi bhi baat aati hai,usmein agar kisi bhi prakaar ki jara bhi feeling aati hai-yeh kyon,yeh kya… to feeling aana maana vighna। sadaiv yeh socho ki vyartha feeling se pare,feeling-proof aatma ban jaayen। to maayaajeet ban jaayenge। phir bhi, dekho-baap ke ban gaye, baap ka banna-yeh kitni khushi ki baat hai! kabhi svapna mein bhi nahin socha ki bhagwan ke itne sameep sambandh mein aayenge! lekin saakaar mein ban gaye! to kya yaad rakhenge? sada khushi ke geet gaane vaale। yeh khushi ke geet kabhi bhi samaapta nahin ho sakte hain।

teachers ka arth hi hai apne features se sabko pharishte ke features anubhav karaane vaali। aisi teachers ho?saadhaaran roop nahin dikhaai de,sada pharishta roop dikhaai de। kyonki teachers nimitta ho na। to jo nimitta bante hain vo jo svayan anubhav karte hain woh auron ko karaate hain। yeh bhi bhaagya hai jo nimitta bane ho। abhi isi bhaagya ko svayan anubhav mein badhaao aur doosron ko anubhav karaao। sabse vishesh baat anubhvi moorta bano।

group nan.2

‘‘mera baba’’ smriti mein laana arthaat sarva praaptiyon ke bhandaare bharpoor hona

sabse sahaj sada shaktishaali rahne ki vidhi kya hai jis vidhi se sahaj aur sada nirvighna bhi rah sakte hain aur udti kala ka bhi anubhav kar sakte hain?sabse sahaj vidhi hai-aur kuchh bhi bhool jaaye lekin ek baat kabhi nahin bhoole-’’mera baba।’’ ‘‘mera baba’’ dil se maanna-yahi sabse sahaj vidhi hai aage badhne ki। mera-mera maanne ka sanskaar to bahut samay ka hai hi। usi sanskaar ko sirf parivartan karna hai। ‘anek’mere ko ‘ek’ mera baba usmein samaana hai। ek ko yaad karna sahaj hai na aur ek mere mein sab-kuchh aa jaata hai। to sabse sahaj vidhi hai-’’mera baba’’। ‘mera’shabd aisa hai jo na chaahte bhi yaad aati hai। ‘mere’ ko yaad nahin karna padta lekin svatah yaad aati hai। bhoolne ki koshish karte bhi‘mera’nahin bhoolta। yog agar kamjor hota hai to bhi kaaran ‘mera’hai aur yog shaktishaali hota hai to uska bhi kaaran ‘mera’ hi hai। ‘‘mera baba’’-to yog shaktishaali ho jaata hai aur mera sambandh,mera padaartha-yeh ‘‘anek mera’’yaad aana arthaat yog kamjor hona। to kyon nahin sahaj vidhi se purooshaartha mein vriddhi karo।

vidhi se hi siddhi praapta hoti hai। riddhi-siddhi alpakaal ki hoti hai lekin vidhi se siddhi jo praapta hoti hai woh avinaashi hoti hai। to yahaan riddhi-siddhi ki baat nahin hai lekin vidhi se siddhi praapta karni hai। vidhi ko apnaana aata hai ya mushkil lagta hai? kam-jor banna arthaat mushkil anubhav hona। bina kamjori ke mushkil nahin hota hai। to kamjor ho kya? ya maaya kabhi-kabhi kamjor bana deti hai? agar‘‘mera baba’’ yaad aata hai, to baap sarvashaktivaan hai na, to jaisa baap vaise bachche। ‘‘mera baba’’ yaad aane se apna master sarvashaktivaan ka swaroop yaad aata hai। ‘‘mera baba’’ kahne se hi baap kaun hai, woh smriti mein aata hai। to master sarvashaktivaan banne se na kamjor banenge,na mushkil anubhav karenge। sada sahaj। jitna aage badhte jaayenge utna sahaj se sahaj anubhav karte jaayenge। ek hi baat ko sada smriti mein rakhna-’’mera baba’’। ‘‘mera baba’’smriti mein aana aur sarva praaptiyon ke bhandaar anubhav hona। to bhandaare bharpoor hain na। sab khazaane bharpoor hain? ya koi hain,koi nahin hain? aise nahin-sukh ka anubhav to hota hai lekin shanti ka nahin hota hai,shakti ka nahin hota। sarva khazaanon ke maalik ke baalak hain। baap ke khazaane so mere khazaane hain। to jitna bharpoor rahenge, utna jo bharpoor cheej hoti hai woh kabhi halchal mein nahin aati। thoda bhi khaali hota hai to halchal hoti hai। to sada bharpoor arthaat sada achal। halchal nahin। kabhi buddhi chanchal ho nahin sakti hai। kisi bhi vikaar ke vash hona arthaat buddhi chanchal hona। achal hain aur sada achal rahenge। achha!

group nan.3

yaad se sab kaarya svatah saphal hote hain, kahne va maangane ki aavashyakta nahin

sada aur sahaj yaad kaun aata hai? (baba) baba bhi kyon yaad aata hai? (pyaara hai) to jo pyaara hota hai use yaad kiya nahin jaata, uski yaad svatah aati hai। usse dil ka pyaar hai,sachcha pyaar hai, nisvaartha pyaar hai। to sabse pyaara kaun? baap। to baap ko bhulaana mushkil hai ya yaad karna mushkil hai?jab koi aisi paristhiti aati hai phir sthiti kaisi hoti hai? phir yaad karna padta hai ya yaad svatah aati hai,kya hota hai?paristhiti ka arth hi hai - par-sthiti। sva nahin hai,par hai। doosre dvaara aane vaali sthiti - usko kehte hain par-sthiti। to par-sthiti shaktishaali hoti hai ya sva-sthiti shaktishaali hoti hai? lekin us samay kya hota hai? us samay par-sthiti powerful ho jaati hai aur yaad karna padta hai। mera baba,pyaara baba-to pyaare ko kabhi bhool nahin sakte। aur nisvaartha pyaar sivaae baap ke kisi aatma se mil nahin sakta। aatma ko koi na koi apne prati svaartha rehta hai। lekin param aatma nisvaartha hai, kyon?kyonki param aatma daata hai, aatma lekar dene vaali hai। aatma svayan daata nahin hai lekin lekar de sakti hai aur param aatma svayan daata hai।

aap kaun ho? master daata ho na। vaastav mein dena arthaat badhna। jitna dete ho utna badhta hai। vinaashi khazaana dene se kam hota hai aur avinaashi khazaana dene se badhta hai-ek do,hajaar paao। to dena aata hai ki sirf lena aata hai?de kaun sakta hai? jo svayan bharpoor hai। agar svayan mein hi kami hai to de nahin sakta। to master daata arthaat sada bharpoor rahne vaale, sampanna rahne vaale। to sahaj yaad kya hui? ‘‘pyaara baba’’। matlab se yaad nahin karo। matlab se yaad karne mein mushkil hota hai, pyaar se yaad karna sahaj hota hai। matlab se yaad karna yaad nahin, phariyaad hoti hai। to phariyaad karte ho? aisa kar dena, aisa karo na, aisa hona chaahiye na…-aise kehte ho? yaad se sarva kaarya svatah hi saphal ho jaate hain,kahne ki aavashyakta nahin। saphalta janmasiddha adhikaar hai। adhikaar maangane se nahin milta,svatah milta hai। to adhikaari ho ya maangane vaale ho? adhikaari sada nashe mein rehte hain-mera adhikaar hai। maangana to banda ho gaya na। baap se bhi maangana nahin hai। yeh de do,thodi khushi de do, thodi shanti de do…-aise maangate ho? baap ka khazaana mera khazaana hai। jab mera khazaana hai to maangane ki kya darkaar hai। to adhikaari jeevan ka anubhav karne vaale ho na। anek janma bhikhaari bane,abhi adhikaari bane ho। sada isi adhikaar ke nashe mein raho। parmaatma-pyaar ke anubhvi aatmaae ho। to sada isi anubhav se sahajyogi ban udte chalo। adhikaari aatmaayen svapna mein bhi maang nahin sakteen। baalak so maalik ho। achha!

group nan.4

ekras sthiti banaane ke liye ek ki yaad mein raho, trustee bano

sada ekras sthiti mein sthit rahne ki sahaj vidhi kya hai? ek ki yaad ekras sthiti banaati hai। ek baba, doosra na koi। kyonki ek mein sab samaaye hue hain। jaise beej mein sab samaaya hua hota hai na। vriksha ki ek-ek cheej ko yaad karna mushkil hai lekin ek beej ko yaad karo to sab sahaj hai। to baap bhi beej hai। jismen sarva sambandhon ka,sarva praaptiyon ka saar samaaya hua hai। ek baap ko yaad karna arthaat saar-swaroop banna। to ek baap, doosra na koi। yeh ek ki yaad ekras sthiti banaati hai। aise anubhav karte ho? ya pravritti mein rehte ho to doosra-teesra to hota hai?mera bachcha,mera parivaar-yeh nahin rehta hai?phir ek baap to nahin hua na। ‘mera’parivaar hai ya ‘tera’parivaar hai?trustee bankar sambhaalte ho ya grihasthi bankar sambhaalte ho?trustee arthaat tera aur grihasthi arthaat mera। to aap kaun ho?mera-mera maante kya mila? mera ye, mera ye… mere-mere ke vistaar se mila kya? kuchh mila ya ganvaaya? jitna mera-mera kaha,utna hi mera koi nahin raha। to trustee jeevan kitni pyaari hai! sambha-late hue bhi koi bojh nahin, sada halke। dekho,grihasthi ban chalne se bojh uthaate-uthaate kya haal hua-tan bhi ganvaaya, man bhi ashaanta kiya aur sachcha dhan bhi ganva diya। tan ko rogi bana diya, man ko ashaanta bana liya aur dhan mein koi shakti nahin rahi। aaj ka ek hajaar pahle ke ek roopaye ke baraabar hai। to dhan ki taakat chali gai na। abhi jab bojh uthaane ka bhi anubhav kar liya aur halke rahne ka bhi anubhav kar liya,to anubhvi kabhi dhokha nahin khaata। kabhi bhi,kisi bhi baat mein agar maaya se dhokha khaate to dhokha khaane ki nishaani kya hai? duhkh ki lahar। jara bhi duhkh ki lahar sankalp mein bhi aati hai to zaroor kahaan dhokha khaaya hai। to check karo ki kis baat mein dhokha mila, kyon duhkh ki lahar aai? sukhdaata ke bachche ho। to sukhdaata ke bachche ko duhkh ki lahar aa sakti hai? svapna bhi badal gaye। sukh ke svapna aayen, khushi ke svapna aayen,seva ke svapna aayen,milan manaane ke svapna aayen। sanskaar bhi badal gaye to svapna bhi badal gaye। achha!

group nan.5

ever ready woh hai jo nashtomoha smritisvaroop hai

sada apne ko sarva praapti-swaroop shreshtha aatma anubhav karte ho?kyonki praapti-swaroop hi auron ko sarva praapti kara sakta hai। dene mein lena svatah hi samaaya hai। abhi apne behen-bhaaiyon ko bhikhaari dekh raham to aata hai na। jab parmaatma-praaptiyon ke adhikaari ban gaye to pa liya-sada dil mein yahi geet gaate ho? paana tha so pa liya। sampanna ban gaye। aise sampanna ban gaye ya vinaash tak banenge?agar samay sampanna va sampoorn banaaye to rachna powerful hui ya rachta? to samay par nahin banna hai, samay ko sameep laana hai। samay ka intazaar karne vaale nahin ho। jab pa liya to paane ki khushi mein rahne vaale sada hi ever ready rehte hain। kal bhi vinaash ho jaaye to taiyaar ho?ya thoda time chaahiye? ever ready,nashtomoha,smritisvaroop - ismen paas ho?ever ready ka arth hi hai-nashtomoha smritisvaroop। ya us samay yaad aayega ki pata nahin bachche kya kar rahe honge,kahaan honge,chhote-chhote potron ka kya hoga? yahin vinaash ho jaaye to yaad aayenge?pati ka bhi kalyaan ho jaaye, potre ka bhi kalyaan ho jaaye, unhon ko bhi yahaan le aayen-yaad aayega? business ka kya hoga,paise kahaan jaayenge? raaste toot jaayen phir kya karenge?dekhna,achaanak paper hoga।

sada nyaara aur pyaara rehna-yahi baap samaan banna hai। jahaan hain,jaise hain lekin nyaare hain। yeh nyaaraapan baap ke pyaar ka anubhav karaata hai। jara bhi apne mein ya aur kisi mein bhi lagaav nyaara banne nahin dega। nyaare aur pyaarepan ka abhyaas number aage badha-yega। iska sahaj purooshaartha hai nimitta bhaav। nimitta samajhne se nimitta banaane vaala yaad aata hai। mera parivaar hai,mera kaam hai। nahin, main nimitta hoon। nimitta samajhne se paper mein paas ho jaayenge। achha!

group nan6

double light banne ke liye baap ki baaten suno, baap ke shreshtha karma ko follow karo

sabhi saakaar mein va sthiti mein sameep rahne vaali aatmaayen ho na। aabu mein rahne vaale arthaat aabu ke baba jaisi sthiti mein rahne vaale। jaise aabu ki dharni se pyaar hai, tabhi to sameep rehna chaahte ho na। aise baap se bhi pyaar hai na। pyaar ki nishaani hai samaan banna। to sabhi pyaar ka return dene vaale, pyaar ki nishaani dikhaane vaale ho। doctors ko bahut achha chance mila hai। sabhi halke ho?rahne mein,aane mein, khaane mein-sabmen halke ho? ya thoda-thoda bhaari ho? jo dil se saath rehte hain, to saath ki khushi sab-kuchh bhula deti hai। khushi mein bhojan bhi na thanda lagta,na garam lagta,bahut pyaara lagta hai। jab bahut khushi ka mauka hota hai to thanda khaaya ya garam khaaya-yaad rehta hai? khushi se hi pet bhar jaata hai! to saath rahne vaale arthaat khushi se bharpoor rahne vaale। aise hain na! yeh bhi drama ki bahut shreshtha bhaavi bani hui thi jo aap sabko golden chance mila। yeh double videshi hain aur aap double sarvisebal ho। double seva karte ho ya sirf davaai dete ho? ek hi samay par double seva karne ke nimitta ho। double sevaadhaari,double sneh aur sahayog ke paatra bante hain। achha hai। sameep rahne ka-yeh bhi chance achha milta hai। sameep rahne vaalon se yeh poochhne ki aavashya-kata hai kya ki khush ho, theek ho? madhuban nivaasi banna arthaat sada khushi mein udna। to hospital ka kaam kaise chal raha hai? pankh lag gaye hain na। umang-utsaah ke pankhon se ud rahe hain।

double videshi aatmaon ki sada udti kala hai na? ya kabhi chadhti kala,kabhi chalti kala aur kabhi udti kala-kya kahenge? sada udti kala। kyonki samay udti kala se chal raha hai। agar aap udti kala se aage nahin badhenge to kya result hogi? to samay ke pahle taiyaar hone vaale ho na। samay ka intajaar nahin karna hai lekin samay aap shreshtha aatmaon ka aahvaan kar raha hai। double videshi naam hai aur chaal hai double light। bojh uthaane ka anubhav 63janma kiya। abhi double light rahne ke anubhav ka yeh ek brahman janma hai। to abhi sada double light raho। doctors bhi double light hain na। ya kuchh bojh hai? dekhne ka, sunne ka kuchh bojh hai?ya kabhi-kabhi thoda bojh ho jaata hai? isliye baapdaada kehte hain-jis baat mein koi ras nahin ho, koi sambandh nahin ho, to woh sunte hue nahin suno, dekhte hue nahin dekho। dekhte hue, sunte hue socho nahin। socho to kya socho? baap ki baaten। suno to baap ki baaten, dekho to baap ke shreshtha karma aur follow karne vaalon ke shreshtha karma। yahi vidhi hai sada double light rahne ki। doctors ka kaam hi hai-shareer mein aane vaali vyartha cheejon ko khatma karna। doctors ki visheshta hai-vyartha ko samaapta karna aur samartha banaana। roohaaniyat mein bhi yahi kaam hai aur sthool mein bhi yahi kaam hai। baaki, seva achhi kar rahe ho aur result achhi hai aur achhe te achhi honi hi hai। pyaar se seva kar rahe ho। pyaar ki davaai pahle dete ho, peechhe aur davaai dete ho na। to aadha kaam to pyaar hi kar leta hai। achha!

aabu nivaasi bhi lucky hain। samay par aana nahin padega,hain hi yahaan। sabhi doctors ko apni seva pasanda hai? ya thoda aur kahaan chakkar lagaane chaahte ho? bade shahron mein badi seva ho jaayegi-yeh nahin samajhte ho? khush ho? sab achhe hain। achha!