Avyakt murli for Thursday 12 November 1992

>

12-11-92 om shanti avyakt baapdaadaamdhuban

bhavishya vishwa-raajya ka aadhaar-sangamayug ka svaraajya

vishwa-rachta baapdaada apne svaraajya adhikaari bachchon prati bole -

aaj vishwa-rachta baapdaada apne sarva svaraajya adhikaari bachchon ko dekh rahe hain। is vartamaan sangamayug ke svaraajya adhikaari aur bhavishya mein vishwa-raajya adhikaari bante ho। kyonki svaraajya se hi vishwa ke raajya ka adhikaar praapta karte ho। is samay ke svaraajya ki praapti ka anubhav bhavishya vishwa ke raajya se bhi ati shreshtha anubhav hai! saare drama ke andar raajya-adhikaari raajya karte aate hain। sabse shreshtha pahla hai svaraajya,jiske aadhaar se aap svaraajya adhikaari aatmaae anek janma satayug-treta tak vishwa-raajya adhikaari bante ho। to pahla hai svaraajya,phir aadha kalpa hai vishwa-raajya adhikaar aur dvaapar se lekar ke, raajya to hota hi hai lekin vishwa-raajya nahin, state ke raajaayen bante hain। saare vishwa par ek raajya, woh sirf satayug mein hi hota hai। to teen prakaar ke raajya sunaaye। raajya arthaat sarva adhikaar ki praapti। satayug-treta ki raajneeti,dvaapar ki raajneeti aur sangamayug ki svaraajya neeti-teenon ko achhi reeti se jaante ho।

sangamayug ki raajneeti arthaat har ek brahman aatma sva ka raajya adhikaari banta hai। har ek raajayogi hai। sabhi raajayogi ho। ya prajaayogi ho? raajayogi ho na। to raajayogi arthaat raaja banne vaale yogi। svaraajya adhikaari aatmaon ki vishesh neeti hai-jaise raaja apne seva ke saathiyon ko,praja ko jaisa, jo order karte hain, us order se, usi neeti pramaan saathi va praja kaarya karte hain। aise aap svaraajya adhikaari aatmaae apni yog ki shakti dvaara har karmendriy ko jaisa order karti ho, vaise har karmendriy aapke order ke andar chalti hai। na sirf yeh sthool shareer ki sarva karmendriyaan lekin man, buddhi,sanskaar bhi aap raajya-adhikaari aatma ke direction pramaan chalte hain। jab chaaho,jaise chaaho-vaise man arthaat sankalp shakti ko vahaan sthit kar sakte ho। arthaat man,buddhi, sanskaar ke bhi raajya-adhikaari। sanskaaron ke vash nahin lekin sanskaar ko apne vash mein kar shreshtha neeti se kaarya mein lagaate ho,shreshtha sanskaar pramaan sambandh-samparka mein aate ho। to svaraajya ki neeti hai-man,buddhi,sanskaar aur sarva karme-ndriyon ke oopar sva arthaat aatma ka adhikaar। agar koi karmendriyaan-kabhi aankh dhokha deti,kabhi bol dhokha deta, vaani arthaat mukh dhokha deta, sanskaar apne control mein nahin rehte-to usko svaraajya adhikaari nahin kahenge, usko kahenge-svaraajya adhikaar ke purushaarthi। adhikaari nahin lekin purushaarthi। vaastav mein raajya-adhikaari aatma ko svapna mein bhi koi karmendriy va man, buddhi,sanskaar dhokha nahin de sakte। kyonki adhikaari hain,adhikaari kabhi adheen nahin ho sakta। adheen hain to adhikaari banne ke purushaarthi hain। to apne se poochho-purushaarthi ho ya adhikaari ho? adhikaari ban gaye ya ban rahe hain? to svaraajya ka roohaani nasha kya anubhav karaata hai? kya ban jaate ho?bephikra baadshaah, begampur ke baadshaah!

sabse bade te bada baadshaah hai bephikra baadshaah aur sabse bade te bada raajya hai begampur ka raajya। begampur ke raajya adhikaari ke aage yeh vishwa ka raajya bhi kuchh nahin hai। yeh begampur ke raajya ka adhikaar ati shreshtha aur sukhmay hai। hai hi be-gam। to begampur ka anubhav hai na। ya kabhi-kabhi neeche aa jaate ho? sada roohaani nashe mein be॰gampur ke baadshaah hain-is adhikaar mein raho। neeche nahin aao। dekho,aajkal ke raajya mein bhi agar koi kursi par hai to uska adhikaar hai aur kal kursi se utar aata to uska adhikaar rehta hai? saadhaaran ban jaata hai। to aap bhi svaraajya ke nashe mein rehte ho, akaal takhtansheen rehte ho। sabhi ke paas takhta hai na। to takhta ko chhodte kyon ho? sada takhtansheen raho,roohaani nashe mein raho। akaaltakhta-woh amritsar vaala akaal-takhta nahin,yeh akaaltakhta। yeh akaaltakhta sabhi ke paas hai। to akaal takhtansheen svaraajya adhikaari kisne banaaya?baap ne har brahman bachche ko takhtansheen raaja bana diya hai।

saare srishti-chakra ke andar aisa koi baap hoga jiske anek sab raaja bachche hon! lakshmi-naaraayan bhi aisa nahin ban sakte। yeh parmaatma-baap hi kehte hain ki mere sabhi bachche, raaja bachche hain। vaise duniya mein kah dete hain-yeh raaja bachcha hai। lekin bane kuchh bhi-servant bane ya kuchh bhi bane। lekin kahne mein aata hai raaja beta। lekin is samay aap practical mein raajayogi arthaat raaje bachche bante ho। to baap ko bhi nasha hai aur bachchon ko bhi nasha hai। to svaraajya ki neeti kya rahi? sva par raajya, har karmendriy ke oopar adhikaar ho। aise nahin ki dekhne to nahin chaahte the lekin dekh liya। aankhen khuli theen na,isliye dekhne mein aa gaya। kaan ko darvaaja nahin hai, isliye kaan mein baat pad gai। lekin do kaan hain। agar aisi baat sun bhi li to nikaalne ka bhi raasta hai। isliye is bhaarat mein hi vishesh yeh chitra baapu ki yaad mein bana hua hai-bura na dekho, bura na suno, bura na bolo। yeh teen dikhaate hain, aap chaar dikhaate ho। bura socho bhi nahin। kyonki pahle sochna hota,phir bolna hota, phir dekhna hota hai। to isliye kantro-ling power, ruling power rakho। raaja arthaat ruling power। raaja ho aur ruling power ho hi nahin,to kaun raaja maanega। to svaraajya arthaat ruling power, controlling power।

baapdaada ne pahle bhi sunaaya hai ki kai bachche parakhne mein bahut hoshiyaar hote hain। koi bhi galti hoti hai,jo neeti pramaan nahin hai, to samajhte hain ki yeh nahin karna chaahiye, yeh satya nahin hai,yathaartha nahin hai, aythaartha hai, vyartha hai। lekin samajhte hue phir bhi karte rehte ya kar lete। to isko kya kahenge? kaunsi power ki kami hai? controlling power nahin। jaise-aajkal kaar chalaate hain, dekh bhi rahe hain ki accident hone ki sambhaavna hai,brake lagaane ki koshish karte hain, lekin brake lage hi nahin to zaroor accident hoga na। brake hai lekin powerful nahin hai aur yahaan ke bajaae vahaan lag gai, to bhi kya hoga? itna samay to parvash hoga na। chaahte hue bhi kar nahin paate। brake laga nahin sakte ya brake powerful na hone ke kaaran theek lag nahin sakti। to yeh check karo। jab oonchi pahaadi par chadhte hain to kya likha hua hota hai? brake check karo। kyonki brake safety ka saadhan hai। to controlling power ka va brake lagaane ka arth yeh nahin ki lagaao yahaan aur brake lage vahaan। koi vyartha ko control karne chaahte hain, samajhte hain-yeh wrong hai। to usi samay wrong ko right mein parivartan hona chaahiye। isko kaha jaata hai controlling power। aise nahin ki soch bhi rahe hain lekin aadha ghanta vyartha chala jaaye, peechhe control mein aaye। bahut purooshaartha karke aadhe ghante ke baad parivartan hua to usko controlling power nahin, ruling power nahin kaha jaata। yeh hua thoda-thoda adheen aur thoda-thoda adhikaari-mix। to usko raajya-adhikaari kahenge ya purushaarthi kahenge? to ab purushaarthi nahin, raajya-adhikaari bano। yeh svaraajya adhikaar ka shreshtha maza hai।

svaraajya adhikaari arthaat sada mauj hi mauj mein rehna। mauj mein rahne vaala kabhi kisi baat mein moonjhata nahin hai। agar moonjhate hain to mauj nahin hai। to sangamayug par mauj hi mauj hai na। ya kabhi-kabhi mauj hai? shaktiyon ko, paandavon ko mauj hai na। to samjha, svaraajya ki neeti kya hai aur vishwa-raajya ki neeti kya hai? chaahe praja hai, chaahe royal family hai lekin praja, praja nahin, praja bhi ek parivaar hai। parivaar ki neeti-yeh hai satayug-treta ki raajneeti। raaja kahlaate hain lekin raaja hote bhi parmapriy pita ka swaroop hai। parivaar ki vidhi se raajneeti chalti hai। chaahe raajya kaarobaar bhinna-bhinna haathon mein hogi lekin parivaar ke sneh ki vidhi se kaarobaar hogi। aise nahin ki raaja ke paas bahut dhan-daulat ho aur praja mein koi ko khaane-peene ke liye bhi nahin ho। dvaapar-kaliyug ki raajneeti mein law and order chalta hai। lekin vishwa-raajya,dev-raajya ke samay yahi neeti chalti hai,law nahin lekin sneh aur sambandh ki neeti chalti hai। koi bhi aatma ‘duhkh’ shabd ko bhi nahin jaanti। chaahe raaja ho, chaahe praja ho lekin duhkh-ashaanti ka naam-nishaan nahin। duhkh kya cheej hoti hai-uska agyaan hai, gyaan hi nahin hai। jaise is samay svaraajya ke samay bhi aapko baapdaada kis neeti se chalaate hain? sneh aur shreemat। shreemat par chalte rehte to koi bhi sakhta order karne ki aavashyakta nahin hai। agar neeti ko bhoolte hain to svayan,svayan ko kaliyugi neeti mein chalaate hain। to vishwa ke raajya ki neeti bhi bahut pyaari hai। kyonki anekta nahin hai, ek raajya hai aur akhut khazaana hai! praja bhi itni sampanna hogi-aajkal ke jo bade-bade padmapti hain,unhon se bhi jyaada! apraapti ka naam-nishaan nahin। lekin iska aadhaar kya? svaraajya।

is samay sampanna bante ho, isliye parmaatma-sampatti ki sampannata satayug-treta ke anek janma praapta hoti hai। isliye kaha-number one raajya hai svaraajya, phir hai vishwa-raajya aur teesra hai dvaapar-kaliyug ka alag-alag state ka raajya। is raajya ko to achhi tarah jaante hi ho,varnan karne ki aavashyakta nahin। to sada kis nashe mein rehna hai? svaraajya hamaara janmasiddha adhikaar hai! kis janma ka?brahman janma ka। brahma baap ne janmate hi svaraajya ka tilak har brahman aatma ko lagaaya। til-kadhaari ho na। tilak hai smriti ka। tilak bhi hai,takhta bhi hai aur taaj bhi hai। taajdhaari ho na। kaunsa taaj hai? vishwa-kalyaan ka taaj। vishwa-kalyaankaari ho na। purity ka taaj aur vishwa-kalyaan ka taaj-double taaj hai। purity ka taaj hai-light ka taaj aur vishwa-kalyaan ka taaj hai-seva ka taaj।

vishwa-sevaadhaari ho na। aise nahin ki state ke sevaadhaari samjho-ham gujraat ke hain,ham raajasthaan ke hain, ham dilli ke sevaadhaari hain। nahin। vishwa-sevaadhaari। kahaan bhi rehte hain lekin vritti aur drishti behad ki। agar vishwa-sevaadhaari nahin banenge to na svaraajya,na vishwa-raajya,phir dvaapar-kaliyug mein state ka raaja banna padega। lekin vishwa-raajya adhikaari ke liye sada apna taaj,tilak aur takhta-sada is par sthit raho। shareer se takhta par nahin baithna hai lekin buddhi dvaara smriti ki sthiti se sthit rehna hai। sthiti mein sthit hona-yahi takhta par baithna hai,jo sadaiv baith sakte hain। shareer se to kitne ghante baithenge?thak jaayenge na। lekin buddhi dvaara sthiti mein sthit rehna-yeh hai takhtansheen hona। yeh to sahaj hai na। to svaraajya ke nashe mein nirantar sthit raho। samjha, kya karna hai? purushaarthi nahin lekin adhikaari banna।

sabhi ne milan manaaya na। sabhi bhaag-bhaag kar aate hain parmaatma-milan ka mela manaane ke liye। to milan ke mele mein aaye ho na। yeh mela lagta hai ya bheed lagti hai?aaraam hai na। aaraam se rehna,khaana, chalna-sab aaraam se hai na। phir bhi bahut lucky ho। un melon ke maaphik mitti mein to nahin rahe hue ho। phir bhi bistara aur khatiya to mili hui hai na। vahaan mele mein to nahaao to bhi mitti, raho to bhi mitti aur khaao to bhi mitti saath mein aayegi। yahaan bachche aate hain apne ghar mein। nashe se aate ho। baap bhi khush aur bachche bhi khush। haal mein peechhe baithne vaale sabse aage ho। kyonki baapdaada ki pahli nazar last tak jaati hai। achha!

sarva svaraajya-adhikaari bephikra baadshaah bachchon ko, sarva vishwa-raajya adhikaari anek janma sampoorn sampanna rahne vaali aatmaon ko, sada tilak, taaj aur takhtansheen adhikaari bachchon ko, sada behad ki seva ke umang-utsaah mein rahne vaale vishesh bachchon ko, desh-videsh ke sarva sammukh anubhav karne vaale bachchon ko baapdaada ka padmaguna yaad,pyaar। saath-saath sarva ke sneh ke patron ka bhi respond de rahe hain। videsh aur desh-donon apne-apne vidhi pramaan sva ke purooshaartha mein siddhi ko praapta kar rahe hain aur seva mein bhi sada aage badhne ke utsaah mein lage hue hain। isliye har ek kisi bhi kone mein rahne vaale hon lekin unhon ki yaad,seva-samaachaar,pyaar ke patra, sthiti ke umang-utsaah ka samaachaar-sab praapta hua aur baapdaada sabhi bachchon ko bahut-bahut-bahut naam sahit, har ek ki visheshta sahit yaad, pyaar de rahe hain aur sada isi yaad,pyaar ki paalna se pal rahe ho, ud rahe ho aur udte-udte manzil par pahunchna hi hai va yeh kahen ki pahunche hue hi ho। to yaad,pyaar aur namaste।

raajasthaan ke raajyapaal do.em.channa reddeeji se mulaakaat

sangamayug ke svaraajya-adhikaari ho na। svaraajya mila na। achha, apne eeshvareey parivaar ka sneh practical mein dekha। yeh eeshvareey parivaar ke pyaar ka adhikaar kis visheshta se praapta kiya? (baba ke aasheervaad se)। lekin aapki bhi ek visheshta hai,jis visheshta ke kaaran sameep aa sake। (bhakti) bhakti bhi hai,aur shakti bhi hai। aadi se ab tak jeevan mein aage badhne ka aadhaar jo hai, vo hai aapki himmat। gaaya hua hai-’’himmate bachche madde baap’’। to har kshetra mein himmat ne aapko sahaara diya hai, isliye himmat ke kaaran bephikra hokar aage badhe ho। to isi visheshta ko sada saath rakhna। sada amritvele jab aankh khule to apne ko teen bindiyon ka tilak lagaana - (1)main aatma bindu hoon, (2)baap bhi bindu hai aur (3)jo drama mein ho gaya,beet chuka uska fullstop lagaana। to yeh teen bindiyon ka tilak sada hi raajya-tilak ka adhikaari banaayega। abhi svaraajya phir vishwa ka raajya। bhakti ka phal to milta hai na। bhakti ka phal hai sahaj milan। (yugal se) bachchi bhi achhi mauj mein rehti hai। mauj hi mauj hai na। (aapka aasheervaad chaahiye) saara din sirf ek shabd yaad rakho,vo hai-’’mera baba’’। to ‘mera’ kahne se adhikaar ho jaayega। to aasheervaad ka adhikaar svatah hi praapta hoga। yeh to sahaj hai na। koi bhi kaarya karo lekin yeh yaad rakho ki ‘mera baba’ aur baba ka yeh kaarya kar rahi hoon। trustee hokar kaarya karo। to trustee ko kabhi koi bojh nahin hota hai। na bojh hoga,na bhoolenge। phir bhi bhakti mein yaad to kiya hai na। yaad ka return hai-mauj mein rehna। (krishna ki bhakta hai) to krishna ke raajya mein chalna hai na। to abhi chalengi? ye sab aapko lekar hi jaayenge,koi chhodkar nahin jaayenge। phir bhi donon ke achhe vichaar hain। achha!

avyakt baapdaada ki personal mulaakaat

group nan.1

sva-sthiti ko aisa shaktishaali banaao jo paristhiti kabhi neeche-oopar na kar sake

sada apne bhaagya ke chamakte hue sitaare ko dekhte rehte ho?bhaagya ka sitaara kitna shreshtha chamak raha hai! sada apne bhaagya ke geet gaate rehte ho? kya geet hai? vaah mera shreshtha bhaagya! yeh geet sada bajta rehta hai? automatic hai ya mehnat karni padti hai?automatic hai na। kyonki bhaagyavidhaata baap apna ban gaya। to jab bhaagyavidhaata ke bachche ban gaye, to isse bada bhaagya aur kya hoga! bas yahi smriti sada rahe ki bhaagyavidhaata ke bachche hain। duniya vaale to apne bhaagya ka vardaan lene ke liye yahaan-vahaan bhatakte rehte hain aur aap sabhi ko ghar baithe bhaagya ka khazaana mil gaya। mehnat karne se chhoot gaye na। to mehnat bhi nahin aur praapti bhi jyaada। isko hi bhaagya kaha jaata hai-jo bina mehnat ke praapta ho jaaye। ek janma mein 21 janma ki praapti karna-yeh kitna shreshtha hua! aur praapti bhi avinaashi aur akhanda hai, koi khandit nahin kar sakta। maaya bhi surrender ho jaati hai, isliye akhanda rehta hai। koi ladaai karke vijay praapta karna chaahe to kar sakega? kiski taakat nahin hai। aisa atal-akhanda bhaagya pa liya! sthiti bhi abhi aisi atal banaao। kaisi bhi paristhiti aaye lekin apni sthiti ko neeche-oopar nahin karo। avinaashi baap hai, avinaashi praaptiyaan hain। to sthiti bhi kya rahni chaahiye?avinaashi chaahiye na। sabhi nirvighna ho?ki thoda-thoda vighna aata hai?vighna-vinaashak gaaye hue ho na। kaisa bhi vighna aaye, yaad rakho-main vighna-vinaashak aatma hoon। apna yeh title sada yaad hai?jab master sarvashaktivaan hain, to master sarvashaktivaan ke aage kitna bhi bada kuchh bhi nahin hai। jab kuchh hai hi nahin to uska prabhaav kya padega?

group nan.2

sada khush rahne ke liye ‘anek’mere ko ‘ek’ mere mein parivartan karo

sabhi sada khush rehte ho?sada khush rahne ka sahaj purooshaartha kaun sa hai? (yaad) yaad mein bhi kya yaad rakhna sahaj hai? meraapan sahaj kar deta hai। meraapan hota hai to mera sahaj yaad aata hai। to mere ke adhikaar se yaad karna-ye hai sahaj vidhi। agar khushi kam hoti hai to uska kaaran hi hai ki mere ke adhikaar se baap ko yaad nahin kiya। kyonki yaad mein jo vighna daalta hai vo hai hi mera-pan। mera shareer, mera sambandh-yahi meraapan vighna daalta hai। isliye is ‘anek mere-mere’ ko ‘ek mera baba’ mein badal do। yahi sahaj vidhi hai। kyonki jeevan mein sabse bade te badi praapti hai hi khushi। agar khushi nahin to brahman jeevan nahin। brahman jeevan ka shvaans hai khushi। isliye sada khush raho। baap mila arthaat sabkuchh mila। khushi gaayab tab hoti hai jab koi apraapti hoti hai। to brahman arthaat sabkuchh mila। praapti ki nishaani hai khushi। khush rahne vaale bhi ho aur khushi baantane vaale bhi। baantega kaun?jiske paas stock hoga। apne liye to stock hai lekin doosre ke liye itna hi stock jama ho। to sadaiv apna stock check karo ki itna bharpoor hai? aise to nahin ki andar hi andar se stock maaya khatma kar le aur aap samajhte rahen ki abhi stock hai! jab koi paristhiti aati hai to kehte hain ki pata nahin meri khushi kahaan chali gai? kyon chali gai? andar hi andar stock khatma ho gaya। to sadaiv hi apna stock check karo ki bharpoor hai? kyonki maaya ko bhi brahman aatmaae priy lagti hain। vo bhi apna banaane ka purooshaartha nahin chhodti। isliye har samay khabardaar, hoshiyaar!

group nan.3

brahma baap ke sanskaaron ko apna sanskaar banaana hi follow father karna hai

sada apne ko vishwa-parivartak anubhav karte ho?vishwa-parivartan karne ki vidhi kya hai? sva-parivartan se vishwa-parivartan। bahut-kaal ke sva-parivartan ke aadhaar se hi bahutkaal ka raajya-adhikaar milega। sva-parivartan bahutkaal ka chaahiye। agar ant mein sva-parivartan hoga to vishwa-parivartan ke nimitta bhi ant mein banenge, phir raajya bhi ant mein milega। to ant mein raajya lena hai ki shuru se lena hai? achha,lena shuru se hai aur karna ant mein hai?agar lena bahutkaal ka hai to sva-parivartan bhi bahutkaal ka chaahiye। kyonki sanskaar banta hai na। to bahutkaal ka sanskaar na chaahte hue bhi apni taraph kheenchata hai। jaise abhi bhi kehte ho ki mera yeh puraana sanskaar hai na,iseelie na chaahte bhi ho jaata hai। to woh kheenchata hai na। to yeh bhi bahut samay ka pakka puru-shaartha nahin hoga, kachcha hoga, to kachcha purooshaartha bhi apni taraph kheenchoga aur result kya hogi? full paas nahin ho sakenge na। is-liye abhi se sva-parivartan ke sanskaar banaao। natural sanskaar ban jaaye। jo natural sanskaar hote hain unke liye mehnat nahin karni padti।

sva-parivartan ka vishesh sanskaar kya hai? jo brahma baap ke sanskaar vo bachchon ke sanskaar। to brahma baap ne apna sanskaar kya banaaya, jo saakaar shareer ke ant mein bhi yaad dilaaya?niraakaari,nirvikaari,niraahankaari-ye hain brahma baap ke arthaat braahmanon ke sanskaar। to ye sanskaar natural hon। niraakaar to ho hi na, ye to niji swaroop hai na। aur kitne baar nirvikaari bane ho! anek baar bane ho na। brahman jeevan ki visheshta hi hai nirhankaari। to ye brahma ke sanskaar apne mein dekho ki sachmuch ye sanskaar bane hain? aise nahin-ye brahma ke sanskaar hain,ye mere sanskaar hain। follow father hai na। poora follow karna hai na। to sada ye shreshtha sanskaar saamne rakho। saare din mein jo bhi karma karte ho, to har karma ke samay check karo ki teenon hi sanskaar emerge roop mein hain? to bahut samay ke sanskaar sahaj ban jaayenge। yahi lakshya hai na! poora banna hai to jaldi-jaldi bano na। samay aane par nahin banna hai, samay ke pahle apne ko sampanna banaana hai। samay rachna hai aur aap master rachayita hain। rachta shaktishaali hota hai ya rachna? to abhi poora hi sva-parivartan karo। braahmanon ki dictionary mein kab-kab nahin hai। ab। to aise pakke brahman ho na।

group nan.4

saphalta ka aadhaar hai - divyata

baapdaada dvaara har bachche ko divya buddhi ka vardaan mila hai। yeh divya buddhi ka vardaan sabhi ne apne jeevan mein kaarya mein lagaaya hai?kyonki vardaan ka laabh tab hota hai jab vardaan ko kaarya mein lagaayen। to divya buddhi ka vardaan mila sabko hai lekin use kitna karte ho? koi bhi cheej use karne se, kaarya mein lagaane se badhti bhi hai aur usko sukh ki,khushi ki anubhooti bhi hoti hai। to divya buddhi ko kaarya mein kahaan tak lagaate hain, uski nishaani kya hogi? saphalta hogi। har kaarya divya-alaukik anubhav hoga,saadhaaran nahin। kyonki kaarya mein divyata hi saphalta ka aadhaar hai। to divya buddhi ki nishaani hai-har karma mein divyata। to aise anubhav karte ho? ya kabhi saadhaaran karma bhi ho jaate hain?

divya buddhi praapta karne vaali aatmaayen sada adivya ko bhi divya bana deti hain। jaise gaaya jaata hai ki paaras agar lohe ko lagta hai to woh bhi paaras ban jaata hai। to divya buddhi arthaat paaras buddhi। aise bane ho? kyonki buddhi har baat ko grahan karti hai। divya buddhi divyata ko hi grahan karegi। aise parivartan kar sakte ho। adivya ko divya bana sakte ho। ya adivyata ka prabhaav pad jaayega? koi adivya baat ho jaaye, adivya kaarya ho jaaye-uska prabhaav aapke oopar padega? divya buddhi ke vardaan se parivartan-shakti adivya ko bhi divya ke roop mein badal degi। adivya vaataavran ya adivya chalan,bol divya buddhi ke oopar asar nahin karenge। aisi sthiti vaale ko hi divya buddhi vardaani moorta kaha jaayega। jaise-water-proof hota hai, aag-proof hota hai। science ke saadhan water-proof bana dete hain, aag-proof bana sakte hain। to silence ki shakti parivartan nahin kar sakti hai, proof nahin bana sakte hain? knowledge rakhna aur cheej hai-yeh divya hai, yeh adivya hai। lekin prabhaav mein aana aur cheej hai। divyata ki shakti shreshtha hai ya adivyata ki shakti shreshtha hai? to divyata ka prabhaav adivyata par padna chaahiye na। to abhi divya buddhi ke vardaan ko kaarya mein lagaao। lagaana to aata hai ya kabhi bhool jaate ho? aadha kalpa bhoolne vaale bane lekin abhi abhool banna hai।

divya buddhi aisa shreshtha yantra hai jo is yantra dvaara vyakti to kya, prakriti ko bhi divya bana sakte ho। vyakti ko divya banaane se prakriti ke oopar svatah hi prabhaav padta jaayega। pahle apne mein dekho ki sada divya buddhi emerge roop mein hai?itni taakat hai jo prakriti ko bhi parivartan kar do। yeh parmaatma-vardaan hai। koi mahaatma ya dharmaatma ka vardaan nahin hai। to jaise baap sarvashaktivaan hai, to vardaan bhi sarvashaktivaan hai na। to jab bhi koi kaarya karte ho, pahle check karo ki divya buddhi ke vardaan dvaara kaarya kar rahe hain ya saadhaaran buddhi se kaarya kar rahe hain? aapki divyata ka prabhaav vishwa ko divya bana deta hai। yahi aapka occupation hai na। engineer hoon, doctor hoon, klarka hoon, phalaana hoon…-yeh occupation to shareer nirvaah ke arth hai। lekin vaastavik occupation hai-vishwa ko parivartan karna। aise samajh kar kaarya karte ho?

agar vardaan ko kaarya mein lagaate ho to vardaan ki praapti sada sahaj anubhav karaayegi। vardaan mein mehnat nahin karni padti। to yeh divya buddhi vardaan hai। 63 janma mehnat bahut kar li। abhi mehnat nahin, sahaj। brahman jeevan mein bhi agar mehnat karni padti, yuddha karni padti-to mauj kab manaayenge?satayug mein to pata hi nahin hoga ki mauj bhi mana rahe hain। vahaan kantraasta nahin hoga। abhi to kantraasta hai-mehnat kya hai, mauj kya hai? to mauj abhi hai,satayug mein common baat hogi। achha!

group nan.5

parivartan shakti dvaara vyartha ko samartha banaana hi holi hans banna hai

sada apne ko holi hans samajhte ho?holi hans ka kartavya kya hai? vyartha aur samartha ko parakhna। vo to kankad aur ratna ko alag karta lekin aap holi hans samartha ko dhaaran karte ho,vyartha ko samaapta karte ho। to samartha aur vyartha, isko parakhna aur parivartan karna-yeh hai holi hans ka kartavya। saare din mein vyartha sankalp, vyartha bol, vyartha karma aur vyartha sambandh-samparka jo bhi hota hai,us vyartha ko samaapta karna-yeh hai holi hans। koi kitna bhi vyartha bole lekin aap vyartha ko samartha mein parivartan kar do। vyartha ko apni buddhi mein sveekaar nahin karo। agar ek bhi vyartha sankalp, vyartha bol, vyartha karma sveekaar kiya to ek vyartha anek vyartha ko janma dega। ek vyartha bol bhi sparsha ho gaya to woh anek vyartha ka anubhav karaayega, jisko aap log kehte ho-feeling aa gai। ek vyartha sankalp ki feeling aai to woh feeling ko badhaayegi। iseelie vyartha ki paidaais bahut fast hoti hai-chaahe karma ho, chaahe kya bhi ho। ek vyartha bol bolenge to use siddha karne ke liye kitne vyartha bol bolne padenge! jaise log kehte hain na-ek jhooth ko siddha karne ke liye kitne jhooth bolne padte hain!

to vyartha ka khaata samaapta ho jaaye aur sada samartha ka khaata jama hota rahe। vo vyartha aapko de lekin aap parivartan kar samartha dhaaran karo। itni teevra parivartan-shakti chaahiye। jaise-aaj ki science vyartha ko kaarya mein laga kar achha bana deti hai,kai vesta cheejon ko best mein parivartan kar lete hain। aapki rachna itna fast parivartan kar sakti hai। jaise-dekho,khaad hoti hai na, to khaad buri cheej hai lekin paida kya karti hai?khaad gandi hai lekin jab phool paida hota hai to khushbu vaala hota hai। ya badbu vaala hota hai? to khaad mein parivartan karne ki shakti hai na। svayan kaisi bhi hai lekin paida kya karti hai?phal, phool,sabjiyaan…। to aapki rachna mein kitni shakti hai! to aap mein usse jyaada shakti hai na। vo gaali de aur aap usko phool banaakar dhaaran karo। vo gussa kare aur aap usko shanti ka sheetal jal do। yeh parivartan-shakti chaahiye। holi hans ka yahi kartavya hai। aisi jeevan bani hai? ya kahenge-kya karen, bola hi kharaab na,kiya hi bahut kharaab baat,hai hi bahut kharaab? lekin kharaab ko hi to achha banaana hai। achhe ko to achha nahin banaana hai। achhe aaye the ya kharaab aaye the? to baap ne achha banaaya na। ya kaha ki ye bahut kharaab hain,inko achha kaise banaaoon?socha? bana diya na। to baap ne aap sabhi ko bure se achha banaaya aur aap buri baat ko achha nahin bana sakte?bure ka prabhaav aapke oopar pad jaata hai। vaayumandal hi kharaab tha na। yeh holi hans ka lakshan nahin hai।

kaisa bhi vaataavran ho,kaisi bhi vritti ho, kaisi bhi vaani ho, kaisi bhi drishti ho-lekin holi hans sabko holi bana dete hain। sada yeh power rahe aur sada aise teevragti ke parivartan karne ki vidhi aa jaaye to kya ban jaayenge? pharishta। pharishta kiske prabhaav mein nahin aata। apna kaarya kiya aur vo chala। pharishta kabhi kisi vighna ke vash nahin hota-na vighna ke, na vyakti ke। to holi hans arthaat pharishta। seva ki aur nyaara। to aisi sthiti sada hai? aise holi hans bane ho ya ban rahe ho? kab tak banenge? koi time ki had bhi hai ya nahin?agle saal bhi yahi kahenge ki-haan, ban rahe hain? knowledgeful ban gaye ho na। to jab knowledge hai ki mujh holi hans ka kartavya kya hai,to knowledge ki shakti se parivartan nahin kar sakte ho? doosre saal bhi yeh nahin kehna ki ban rahe hain।

teevra purushaarthi ka lakshya hi hota hai-’ab’aur dheele purushaarthi ka lakshya hota hai-’kab’। to teevra purushaarthi ho na। baapdaada to sadaiv har aatma mein shreshtha bhaavna rakhte hain ki karne vaale hi hain। isliye is shreshtha bhaavna ko practical mein laana hoga-ab karna hi hai, hona hi hai। agar sankalp mein lakshya hai ki hona hi hai,karna hi hai-to yeh sankalp saphalta avashya praapta karaata hai। kyonki dridhta saphalta ki chaabi hai। to sada saphalta saath rakhna।

group nan.6

saadhaaranta mein mahaanta ka anubhav karaana hi seva ka sahaj saadhan hai

sabse saahookaar se saahookaar kaun hai? jo samajhte hain ki saare chakra ke andar saahookaar se saahookaar ham aatma hain, vo haath uthaao। kismen saahookaar ho?kitne prakaar ke dhan mile hain? vo list yaad rehti hai? bahut khazaane mile hain! ek din mein kitni kamaai karte ho,maaloom hai?padmon ki kamaai karte ho। rehte gaanv mein ho aur padmon ki kamaai kar rahe ho! dekho,yahi paramatma pita ki kamaal hai jo dekhne mein saadhaaran lekin hain sabse saahookaar mein saahookaar! to akhbaar mein nikaalenge-yahaan sabse saahookaar mein saahookaar baithe hain। to phir sab aapke peechhe aayenge। aajkal aatankavaadi saahookaaron ke peechhe padte hain na। phir aapke peechhe pad jaayenge to kya karenge?unhon ko bhi saahookaar bana denge na। hain dekho kitne saadhaaran roop mein, koi aapko dekhkar samjhenge ki ye saare vishwa mein saahookaar hain ya padmon ki kamaai karne vaale hain? lekin saadhaaranta mein mahaanta samaai hui hai। jitne hi saadhaaran ho utne hi andar mahaan ho! to yeh nasha rehta hai-baap ne kya se kya bana diya aur kya-kya de diya! donon hi baaten yaad rehti hain na। to akhbaar mein nikaalenge na-richest in di world (Richest In The World; vishwa mein sabse adhik dhanvaan)।

aur dekho,khazaana bhi aisa hai jisko na chor loot sakta hai, na aag jala sakti hai, na paani doobo sakta hai। aisa khazaana baap ne de diya। avinaashi khazaana hai na। avinaashi khazaana koi vinaash kar nahin sakta। aur kitna sahaj mil gaya! jitna khazaana hai uske antar mein mehnat ki hai kuchh? tyaag kiya ya bhaagya mila? tyaag bhi kiya to buraai ka kiya na। buraai chhodna bhi koi chhodna hua kya? duniya kehti hai-tyaag kiya aur aap kehte ho-bhaagya mila hai। saahookaar ko saahookaar banaana badi baat nahin hui na। gareeb ko saahookaar banaana-yeh hai kamaal। jo aajkal ke vinaashi dhan ke saahookaar hain unko baap saahookaar nahin banaata। unka bhaagya hi nahin hai। bhaagya hai hi gareebon ka। kabhi aapka naam aaya hai ‘hu is hu’ (Who Is Who;naameegraami vyaktiyon ki list) mein?auron ka aata hai na। aur baap ki dictionary mein, ‘hu is hu’ mein aapka naam hai। bhagwan ka book hi nyaara hai। to itni khushi hai? dharti aur aakaash ko maap lo, usse bhi jyaada khushi hai na। beanta hai na। aakaash aur dharti to had ho jaayegi na। aapki usse bhi behad hai। behad ke maalik ban gaye ho na। jab baap bhi behad ka baap hai, to praapti bhi behad ki kara-yega na। to kya yaad rehta hai? behad ka baap mila,behad ka raajya-bhaagya mila, behad ka khazaana mila। hai nasha?har karma mein yeh roohaani nasha anubhav hona chaahiye-svayan ko bhi aur auron ko bhi। chaahe ve samjhen, nahin samjhen, itna to kahenge na ki ye khushi-mauj mein rehte hain। yeh to anubhav kara sakte ho na। jaise-madhuban mein aate to anjaan bhi hain, lekin kya anubhav karte hain? yahaan ka vaataavran aur yahaan ki aatmaae khush rahne vaali hain,vaayumandal mein khushi hai-yeh to anubhav karte hain na। to aise aap sabke sambandh-samparka mein anubhav karen ki ye alaukik aatmaae hain,bharpoor aatmaae hain। aisa anubhav karte hain। chaahe deh-abhimaan ke kaaran kahen nahin, lekin andar to jaante hain na। kyonki agar baahar se aapko kahen, to khud ko bhi banna pade na। iseelie kahenge nahin lekin andar mein mahsoos zaroor hoga। to aise shreshtha ho na। isliye gaayan hai ki agar ateendriy sukh poochhna ho to…। aapse poochhen?

dekho,bhagwan ki pasandagi kya hai? jisko koi pasanda nahin karte usko baap pasanda karte hain! baap ki nazar kiske oopar gai? aap logon ke oopar। itne naameegraami logon par nazar nahin gai। kehte hain na-tumhaari gat-mat tum hi jaano, aur koi nahin jaanta। to nasha hai ki paramatma ne hamko pasanda kiya hai। double videshi double nashe mein rehte hain। bhaaratvaasiyon ko to bhaarat mein hi aakar chuna। lekin double videshiyon ko kahaan se chuna?itna door se baap ne hamko chuna। to double nasha hai na। jaise aatma aur shareer saath-saath hain aur sada saath hain, aise yeh nasha aatma ke sada saath hai। to aise nashe mein rahne vaali shreshtha te shreshtha aatmaae! sada khushi mein naachne vaale। koi praapti hoti hai to khushi mein naachte hain। aapko to har kadam mein praapti hi praapti hai। itni praapti hai jo dil kehta hai ki apraapta nahin koi vastu parmaatma-khazaane mein। is samay ka yahi geet hai-braahmanon ke khazaanon mein sarva praaptiyaan hain। achha!