Avyakt murli for Monday 18 January 1993

>

18-01-93 om shanti avyakt baapdaadaamdhuban

pratyakshata ka aadhaar - dridh pratigya

parmaatma-gale ka haar banne vaale vijayi-ratnon prati sada samartha baapdaada bole -

aaj samartha baap apne samartha bachchon se milan mana rahe hain। samartha baap ne har ek bachche ko sarva samarthiyon ka khazaana arthaat sarva shaktiyon ka khazaana brahman janma hote hi janmasiddha adhikaar ke roop mein de diya aur har ek brahman aatma apne is adhikaar ko praapta kar svayan sampanna ban auron ko bhi sampanna bana rahi hai। yeh sarva samarthiyon ka khazaana baapdaada ne har ek bachche ko ati sahaj aur second mein diya। kaise diya? second mein smriti dilaai। to smriti hi sarva samarthiyon ki chaabi ban gai। smriti aai-’mera baba’aur baap ne kaha-’mere bachche’। yahi ‘roohaani smriti’-sarva khazaanon ki chaabi second mein di। mera maana aur sarva janmasiddha adhikaar praapta hua! to sahaj mila na। abhi har brahman aatma nishchay aur nashe se kehti hai ki-baap ka khazaana so mera khazaana। baap ke khazaane ko apna bana diya।

aaj ke din ko bhi vishesh smriti-divas kehte ho। yeh smriti-divas bachchon ko sarva samarthi dene ka divas hai। vaise to brahman janma ka divas hi samarthiyaan praapta karne ka din hai lekin aaj ke smriti-divas ka vishesh mahatva hai। woh kya mahatva hai?aaj ke smriti-divas par vishesh brahma baap ne apne aapko avyakt banaae vyakta saakaar roop mein vishesh bachchon ko vishwa ke aage pratyaksha karne ki vishesh will-power will ki। jaise aadi mein apne ko,sarva sambandh aur sampatti ko seva arth shaktiyon ke aage will kiya,aise aaj ke smriti divas par brahma baap ne saakaar duniya mein saakaar roop dvaara vishwa-seva ke nimitta shakti sena ko apna saakaar roop ka part bajaane ki sarva will-powers bachchon ko will ki। svayan avyakt gupta roopdhaari bane aur bachchon ko vyakta roop mein vishwa-kalyaan ke prati nimitta banaaya arthaat saakaar roop mein seva ke will-powers ki will ki। isliye is din ko smriti-divas va samarthi-divas kehte hain।

baapdaada dekh rahe hain ki usi smriti ke aadhaar par desh-videsh mein chaaron or bachche nimitta ban seva mein sada aage badhte rehte hain aur badhte hi rahenge kyonki vishesh trimoorti vardaan bachchon ke saath hain। shivbaaba ka to hai hi lekin saath mein bhaagyavidhaata brahma baap ka bhi vardaan hai, saath mein jagat amba sarasvati maa ka bhi madhur vaani ka vardaan hai। isliye trimoorti vardaanon se sahaj saphalta ka adhikaar anubhav kar rahe ho। aage chal aur bhi sahaj saadhan aur shreshtha saphalta ke anubhav hone hi hain। baapdaada ko pratyaksha karne ka umang-utsaah chaaron or hai ki jaldi se jaldi pratyakshata ho jaae। sabhi yahi chaahte hain na! kab ho jaaye?kal ho jaaye taaki yahaan hi baithe-baithe pratyakshata ke nagaade suno?hua hi pada hai। sirf kya karna hai?kar bhi rahe ho aur karna bhi hai। sampoorn pratyakshata ka nagaada bajaane ke liye sirf ek baat karni hai। pratyakshata ka aadhaar aap bachche hain aur bachchon mein vishesh ek baat ki underline karni hai। pratyakshata aur pratigya-donon ka balance sarva aatmaon ko baapdaada dvaara blessing praapta hone ka aadhaar hai। pratigya to roz karte ho,phir pratyakshata mein deri kyon? abhi-abhi ho jaani chaahiye na।

baapdaada ne dekha-pratigya dil se, pyaar se karte bhi ho lekin ek hota hai ‘pratigya’,doosra hota hai ‘dridh pratigya’। dridh pratigya ki nishaani kya hai? jaan chali jaaye lekin pratigya nahin ja sakti। jab jaan ki baazi ki baat aa gai, to chhoti-chhoti samasyaayen va samay prati samay ke kitne bhi vikraal roopdhaari circumstance (Circumstance;haalaat) hon…-to jaan ki baazi ke aage yeh kya hain! to dridh pratigya isko kaha jaata hai jo kaisi bhi paristhitiyaan hon lekin par-sthiti, sva-sthiti ko hila nahin sakti। kabhi bhi kisi bhi haalat mein haar nahin kha sakte lekin gale ka haar banenge,vijayi ratna banenge, parmaatma-gale ka shrringaar banenge। isko kaha jaata hai dridh sankalp arthaat dridh pratigya। to ‘dridhta’shabd ko underline karna hai। pratigya karna arthaat pratyaksha saboot dena। lekin kabhi-kabhi kai bachche pratigya bhi karte lekin saath mein ek khel bhi bahut achha karte hain। jab koi samasya va circumstance hota jo pratigya ko kamjor banaane ka kaaran hota,us kaaran ko nivaaran karne ke bajaae bahaane-baazi ka khel bahut karte hain। ismen bahut hoshiyaar hain।

bahaanebaaji ki nishaani kya hoti?kahenge-aise nahin tha, aise tha; aisa nahin hota to vaisa nahin hota; isne aise kiya, circumstance hi aisa tha, baat hi aisi thi। to ‘aisa’ aur ‘vaisa’-yeh bhaasha bahaanebaazi ki hai aur dridh pratigya ki bhaasha hai-’aisa’ho va ‘vaisa’ho lekin mujhe ‘baap jaisa’ banna hai। mujhe banna hai। doosron ko mere ko nahin banaana hai, mujhe banna hai। doosre aise karen to main achha rahoon,doosra sahayog de to main sampanna va sampoorn banoon-nahin। is lene ke bajaae master daata ban sahayog, sneh,sahaanubhooti dena hi lena hai। yaad rakhna-brahman jeevan ka arth hi hai-’dena hi lena hai’, ‘dene mein hi lena hai’। isliye dridh pratigya ka aadhaar hai-sva ko dekhna, sva ko badalna, svamaan mein rehna। svamaan hai hi master daataapan ka। is avyakt varsha mein kya karenge? madhuban mein pratigya karke jaayenge aur vahaan ja ke bahaanebaazi ka khel karenge?

pratigya dridh hone ke bajaae kamjor hone ka va pratigya mein loose hone ka ek hi mool kaaran hai। jaise kitni bhi badi machinery ho lekin ek chhota-sa screw (Screw;pench) bhi loose (dheela) ho jaata to saari masheen ko bekaar kar deta hai। aisi pratigya ko poora karne ke liye plan bahut achhe-achhe banaate ho, purooshaartha bhi bahut karte rehte ho lekin purooshaartha va plan ko kamjor karne ka screw ek hi hai-’albelaapan’। woh bhinna-bhinna roop mein aata hai aur sada naye-naye roop mein aata hai,puraane roop mein nahin aata। to is ‘albelepan’ke loose screw ko tight (Tight;kasna) karo। yeh to hota hi hai-nahin। hona hi hai। chalta hi hai, hota hi hai-yeh hai albelaapan। ho jaayega-dekh lena,vishvaas karo; daadi-deedi mere oopar aitbaar karo-ho jaayega। nahin। baap jaisa banna hi hai, abhi-abhi banna hai। teesri baat-pratigya ko dridh se kamjor banaane ka aadhaar pahle bhi hansi ki baat sunaai thi ki kai bachchon ki najdeek ki najar kamjor hai aur door ki nazar bahut-bahut tez hai। najdeek ki nazar hai-sva ko dekhna, sva ko badalna aur door ki nazar hai-doosron ko dekhna, usmein bhi kamjoriyon ko dekhna, visheshta ko nahin। isliye umang-utsaah mein antar pad jaata hai। bade-bade bhi aise karte hain,ham to hain hi chhote। to door ki kamjori dekhne ki nazar dhokha de deti hai, is kaaran pratigya ko practical mein la nahin sakte। samjha,kaaran kya hai? to abhi screw tight karna aayega va nahin? ‘samajh’ka screw-driver (Screw Driver; penchakas) to hai na, yantra to hai na।

is varsha samajhna, chaahna aur karna-teenon ko samaan banaao। teenon ko samaan karna arthaat baap samaan banna। agar baapdaada kahenge ki sabhi likhkar do to second mein likhenge! chitki par likhna koi badi baat nahin। mastak par dridh sankalp ki syaahi se likh do। likhna aata hai na। mastak par likhna aata hai ya sirf chitki par likhna aata hai?sabhi ne likha?pakka?kachcha to nahin jo do din mein mit jaaye? karna hi hai, jaan chali jaaye lekin pratigya nahin jaaye-aisa dridh sankalp hi‘baap samaan’sahaj banaayega। nahin to kabhi mehnat, kabhi muhabbat-isi khel mein chalte rahenge। aaj ke din desh-videsh ke sabhi bachche tan se vahaan hain lekin man se madhuban mein hain। isliye sabhi bachchon ke smriti-divas ke alaukik anubhav mein baapdaada ne dekha-achhe-achhe anubhav kiye hain, seva bhi ki hai। alaukik anubhvon ki aur seva ki har ek bachche ko mubaarak de rahe hain। sabke shuddh sankalp,meethi-meethi roohrihaan aur prem ke motiyon ki maalaayen baapdaada ke paas pahunch gai hain। return mein baapdaada bhi sneh ki maala sabhi bachchon ke gale mein daal rahe hain। har ek bachcha apne-apne naam se vishesh yaad,pyaar sveekaar karna। baapdaada ke paas roohaani wireless-set itna powerful hai jo ek hi samay par anek bachchon ke dil ka aavaaz pahunch jaata hai। na sirf aavaaj pahunchta lekin sabhi ki snehi moorta bhi emerge ho jaati hai। isliye sabhi ko sammukh dekh vishesh yaad, pyaar de rahe hain। achha!

sarva samartha aatmaon ko,sarva dridh pratigya aur pratyakshata ka balance rakhne vaali shreshtha aatmaon ko,sada samajhna,chaahna aur karna-teenon ko samaan banaane vaale baap samaan bachchon ko, sada samasyaaon ko haar khilaane vaale, parmaatma-gale ka haar banne vaale vijayi ratnon ko samartha baapdaada ka yaad, pyaar aur namaste।

daadiyon se mulaakaat

sabhi donon hi will ke paatra ho-aadi ki will bhi aur saakaar swaroop ke ant ki will bhi। will-power aa gai na! will-power ki will will-power dvaara sada hi sva ke purooshaartha se extra kaarya karaati hai। ye himmat ke pratyakshaphal mein padmaguna madad ke paatra bane। kai sochte hain-ye aatmaayen hi nimitta kyon baneen?to iska rahasya hai ki vishesh samay par vishesh himmat rakhne ka pratyakshaphal sada ka phal ban gaya। isliye gaaya hua hai-ek kadam himmat ka aur padma kadam baap ki madad ke। isliye sada sab baaton ko paar karne ki will-power will ke roop mein praapta hui। aise hai na! aap sabhi bhi saathi ho। achha saath nibha rahi ho। nibhaane vaalon ko baap bhi apna har samay sahayog ka vaayda nibhaate hain। to ye saara group nibhaane vaalon ka hai। (sabha se poochhte hue) aap sabhi bhi nibhaane vaale ho na। ya sirf preet karne vaale ho? karne vaale anek hote hain aur nibhaane vaale koi-koi hote hain। to aap sabhi kismen ho?koton mein koi ho, koi mein bhi koi ho! dekho, duniya mein hangaama ho raha hai aur aap kya kar rahe ho? mauj mana rahe ho। va moonjhe hue ho-kya karna hai, kya hona hai? aap kehte ho ki sab achha hona hai। to kitna antar hai! duniya mein har samay question-mark hai ki kya hoga? aur aapke paas kya hai? fullstop। jo hua so achha aur jo hona hai vo hamaare liye achha hai। duniya ke liye akaale mrityu hai aur aapke liye mauj hai। dar lagta hai?thoda-thoda khoon dekhkar ke dar lagega? aapke saamne 7-8 ko goli lag jaaye to darenge? neend mein dikhaai to nahin denge na! shakti sena arthaat nirbhay। na maaya se bhay hai,na prakriti ki halchal se bhay hai। aise nirbhay ho ya thoda-thoda kamjori hai? achha!

avyakt baapdaada ki personal mulaakaat

group nan.1

sarva shaktiyaan order mein hon to maayaajeet ban jaayenge

sabhi apne ko sada maayaajeet, prakritijeet anubhav karte ho?maayaajeet ban rahe hain ya abhi banna hai?jitna-jitna sarva shaktiyon ko apne order par rakhenge aur samay par kaarya mein lagaayenge to sahaj maayaajeet ho jaayenge। agar sarva shaktiyaan apne control mein nahin hain to kahaan na kahaan haar khaani padegi।

master sarvashaktivaan arthaat controlling power ho। jis samay, jis shakti ko aahvaan karen vo haajir ho jaae, sahayogi bane। aise order mein hain?sarva shaktiyaan order mein hain ya aage-peechhe hoti hain? order karo abhi aur aaye ghante ke baad-to usko master sarva-shaktivaan kahenge? jab aap sabhi ka title hai master sarva shaktivaan, to jaisa title hai vaisa hi karma hona chaahiye na। hai master aur shakti samay par kaam mein nahin aaye-to kamjor kahenge ya master kahenge? to sada check karo aur phir change (parivartan) karo-kaunsi 2 shakti samay par kaarya mein lag sakti hai aur kaunsi shakti samay par dhokha deti hai? agar sarva shaktiyaan apne order par nahin chal sakteen to kya vishwa-raajya adhikaari banenge? vishwa-raajya adhikaari vahi ban sakta hai jismen controlling power, ruling power ho। pahle sva par raajya,phir vishwa par raajya। svaraajya adhikaari jab chaahen,jaise chaahen vaise control kar sakte hain।

is varsha mein kya naveenta karenge? jo kehte hain vo karke dikhaayenge। kehna aur karna-donon samaan hon। jaise-kehte hain master sarva-shaktivaan aur karne mein kabhi vijayi hain,kabhi kam hain। to kahne aur karne mein pharka ho gaya na! to abhi is pharka ko samaapta karo। jo kehte ho vo practical jeevan mein svayan bhi anubhav karo aur doosre bhi anubhav karen। doosre bhi samjhen ki yeh aatmaayen kuchh nyaari hain। chaahe hajaaron log hon lekin hajaaron mein bhi aap nyaare dikhaai do, saadhaaran nahin। kyonki brahman arthaat alaukik। yeh alaukik janma hai na। to brahman jeevan arthaat alaukik jeevan,saadhaaran jeevan nahin। aise anubhav karte ho? log samajhte hain ki yeh nyaare hain?ya samajhte hain-jaise ham hain vaise yeh?

nyaare banne ki nishaani hai-jitna nyaare banenge utna sarva ke pyaare banenge। jaise-baap sabse nyaara hai aur sabka pyaara hai। to nyaara-pan pyaara bana deta hai। to aise nyaare aur aatmaon ke pyaare kahaan tak bane hain-yeh check karo। laukik jeevan mein bhi alaukikta ka anubhav karaao। nyaare banne ki yukti to aati hai na। jitna apne deh ke bhaan se nyaare hote jaayenge utna pyaare lagenge। deh-bhaan se nyaara। to alaukik ho gaya na! to sadaiv apne ko dekho ki-’’deh-bhaan se nyaare rehte hain? baar-baar deh ke bhaan mein to nahin aate hain?’’ deh-bhaan mein aana arthaat laukik jeevan। beech-beech mein practice karo-deh mein pravesh hokar karma kiya aur abhi-abhi nyaare ho jaayen। to nyaari avastha mein sthit rahne se karma bhi achha hoga aur baap ke va sarva ke pyaare bhi banenge। double phaayda hai na। parmaatma-pyaar ka adhikaari banna-ye kitna bada phaayda hai! kabhi socha tha ki aise adhikaari banenge?svapna mein bhi nahin socha hoga lekin aise adhikaari ban gaye। to sada yeh smriti mein laao ki parmaatma-pyaar ke paatra aatmaayen hain! duniya to dhoondhati rehti hai aur aap paatra ban gaye। to sada ‘‘vaah mera shreshtha bhaagya!’’-yeh geet gaate raho,udte raho। udti kala sarva ka bhala। aap udte ho to sabhi ka bhala ho jaata hai, vishwa ka kalyaan ho jaata hai। achha! sabhi khush rehte ho?sada hi khush rehna aur doosron ko bhi khush karna। koi kaisa bhi ho lekin khush rehna hai aur khush karna hai। achha!

group nan.2

vishwa kalyaankaari ban seva par raho to seva ka phal aur bal milta rahega

apne saare kalpa ke shreshtha bhaagya ko jaante ho?aadha kalpa raajya adhikaari bante ho aur aadha kalpa poojya adhikaari bante ho। lekin saare kalpa ka bhaagya banaane ka samay kaunsa hai? ab hai na! to bhaagya banaane ka samay kitna hai aur bhaagya praapta karne ka samay kitna hai-yeh smriti mein rehta hai va merge rehta hai? kyonki jitna samay emerge rahega utna samay khushi rahegi aur merge hoga to khushi nahin rahegi। paandavon ko kaam-kaaj mein jaane se yaad rehta hai ya kaam karne ke samay kaam ka hi nasha rehta hai ki main phalaana hoon?chaahe klarka ho, chaahe businessman ho,chaahe kuchh bhi ho-vo yaad rehta hai ya yeh yaad rehta hai ki main kalpa-kalpa ka bhaagyavaan hoon?kyonki aapka asli occupation hai-vishwa-kalyaankaari। yeh yaad rehta hai va had ka kaam yaad rehta hai?maataaon ko khaana banaate samay kya yaad rehta hai? vishwa-kalyaankaari hoon-yeh yaad rehta hai ya khaana banaane vaali hoon-yeh yaad rehta hai?

kuchh bhi karo lekin apna occupation nahin bhoolo। jaise aapke yaadgaaron mein bhi dikhaaya hai ki paandavon ne gupta vesh mein naukri ki। lekin nasha kya tha? vijay ka। to aap bhi government servant bante ho na,naukri karte ho। lekin nasha rahe-vishwa-kalyaankaari hoon। to is smriti se svatah hi samartha rahenge aur sada seva-bhaav hone ke kaaran seva ka phal aur bal milta rahega। phal bhi mil jaaye aur bal bhi mil jaae-to double phaayda hai na! aise nahin ki kapda dhulaai kar rahe hain to kapde dhone vaale hain। jab vishwa-kalyaankaari ka sankalp rakhenge tab aapki yeh bhaavna anek aatmaon ko phal degi। gaaya hua hai na ki bhaavna ka phal milta hai। to aapki bhaavna aatmaon ko phal degi-shanti,shakti degi। yeh phal milega। aisi seva karte ho?ya samay nahin milta hai? apni pravritti bahut badi hai?nibhaana padta hai! behad mein rahne se had ke bhaan se sahaj nikalte jaayenge। grihastheepan ka bhaan hai had aur trasteepan ka bhaan hai behad। thoda-thoda grihasthi, thoda-thoda trustee-nahin। agar grihasthi ka bojh hoga to kabhi udti kala ka anubhav nahin kar sakte। nimitta bhaav bojh ko khatma kar deta hai। meri jimmevaari hai, mere ko hi sambhaalna hai,mere ko hi sochna hai…-to bojh hota hai। jimmevaari baap ki hai aur baap ne trustee arthaat nimitta banaaya hai! mera hai to bojh aapka hai,tera hai to baap ka hai! ismen kai chaalaaki bhi karte hain-kahenge tera lekin banaayenge mera! kabhi bhi kisi bhi kaarya mein agar bojh mahsoos hota hai to yeh nishaani hai ki tere ke bajaae mera kehte hain। to yeh galti kabhi nahin karna। achha!

group nan.3

brahman ka arth hai - asambhav ko sambhav karne vaale

sada ek bal ek bharosa-yeh anubhav karte rehte ho? jitna ek baap mein bharosa arthaat nishchay hai to bal bhi milta hai। kyonki ek baap par nishchay rakhne se buddhi ekaagra ho jaati hai, bhatakne se chhoot jaate hain। ekaagrata ki shakti se jo bhi kaarya karte ho usmein sahaj saphalta milti hai। jahaan ekaagrata hoti hai vahaan nirnay bahut sahaj hota hai। jahaan halchal hogi to nirnay yathaartha nahin hota hai। to ‘ek bal, ek bharosa’ arthaat har kaarya mein sahaj saphalta ka anubhav karna। kitna bhi mushkil kaarya ho lekin ‘ek bal, ek bharose’ vaale ko har kaarya ek khel lagta hai। kaam nahin lagta hai, khel lagta hai। to khel karne mein khushi hoti hai na! chaahe kitni bhi mehnat karne ka khel ho lekin khel arthaat khushi। dekho,malla-yuddha karte hain to usmein bhi kitni mehnat karni padti! lekin khel samajh ke karte hain to khush hote hain,mehnat nahin lagti। khushi-khushi se kaarya sahaj saphal bhi ho jaata hai। agar koi kaarya bhi karte hain, khush nahin,chinta va phikra mein hain to mushkil lagega na! ‘ek bal, ek bharosa’-iski nishaani hai ki khush rahenge,mehnat nahin lagegi। ‘ek bharosa, ek bal’ dvaara kitna bhi asambhav kaam hoga to vo sambhav dikhaai dega।

brahman jeevan mein koi bhi-chaahe sthool kaam, chaahe aatmik purooshaartha ka,lekin koi bhi asambhav nahin ho sakta। brahman ka arth hi hai-asambhav ko bhi sambhav karne vaale। braahmanon ki dictionary mein ‘asambhav’shabd hai nahin, mushkil shabd hai nahin,mehnat shabd hai nahin। aise brahman ho na। ya kabhi-kabhi asambhav lagta hai?yeh bahut mushkil hai,yeh badalta nahin, gaali hi deta rehta hai, yeh kaam hota hi nahin,pata nahin mera kya bhaagya hai-aise nahin samajhte ho na। ya koi kaam mushkil lagta hai? jab baap ka saath chhod dete ho,akele karte ho to bojh bhi lagega, mehnat bhi lagegi, mushkil aur asambhav bhi lagega aur baap ko saath rakha to pahaad bhi raai ban jaayegi। isko kaha jaata hai-ek bal, ek bharose mein rahne vaale। ‘ek bal, ek bharose’ mein jo rehta vo kabhi bhi sankalp-maatra bhi nahin soch sakta ki kya hoga, kaise hoga? kyonki agar question-mark hai to buddhi theek nirnay nahin karegi। clear nahin hai! agar koi bhi kaam karte question aata hai-’’pata nahin kya hoga?’’ kaise hoga? to isko kaha jaata hai yuddha ki sthiti। to brahman ho ya kshatriy?kyonki abhi tak samay anusaar agar yuddha ke sanskaar hain to sooryavanshi mein pahunchenge ya chandravanshi mein? chandravanshi mein to nahin jaana hai na! yog mein bhi baithte ho to kuchh samay yog lagta hai aur kuchh samay yuddha karte rehte ho! usi samay agar shareer chhoot jaae to kahaan jaayenge? ‘ant mati so gati’kya hogi? isliye sada vijayeepan ke sanskaar dhaaran karo। jab sarvashaktivaan baap saath hai,to jahaan bhagwan hai vahaan yuddha hai ya vijay hai? to aise vijayi ratna bano। isko kehte hain ek bal ek bharosa। achha!

group nan.4

attention aur checking roopi pahredaar theek hain to khazaana safe rahega

sada apne ko baap ke sarva khazaanon ke maalik hain-aisa anubhav karte ho?maalik ban gaye ho ya ban rahe ho? jab sabhi baalak so maalik ban gaye,to baap ne sabhi ko ek jaisa khazaana diya hai। ya kisko kam diya,kisko jyaada? ek jaisa diya hai! jab mila ek jaisa hai, phir nambarvaar kyon? khazaana sabko ek jaisa mila, phir bhi koi bharpoor,koi kam। iska kaaran hai ki khazaane ko sambhaalna nahin aata hai। koi bachche khazaane ko badhaate hain aur koi bachche ganvaate hain। badhaane ka tareeka hai-baantana। jitna baantenge utna badhega। jo nahin baantate unka badhta nahin। avinaashi khazaana hai, is khazaane ko jitna badhaana chaahen utna badha sakte ho। sabhi khazaanon ko sambhaalna arthaat baar-baar khazaanon ko check karna। jaise khazaane ko sambhaalne ke liye koi na koi pahre vaala rakha jaata hai। to is khazaane ko sada safe rakhne ke liye ‘attention’aur ‘checking’-yeh pahre vaale hon। to jo attention aur checking karna jaanta hai uska khazaana kabhi koi le ja nahin sakta,koi kho nahin sakta। to pahre vaale hoshiyaar hain ya albelepan ki neend mein so jaate hain?pahredaar bhi jab so jaate hain to khazaana ganva dete hain। isliye ‘attention’ aur ‘checking’-donon theek hon to kabhi khazaane ko koi chhu nahin sakta! to anginat, akhut, akhanda khazaana jama hai na! khazaanon ko dekh sada harshit rehte ho? kabhi bhi kisi bhi paristhiti mein duhkh ki lahar to nahin aati hai?

svapna mein bhi duhkh ki lahar na ho। jab duhkh ki lahar aati hai tab khushi kam hoti hai। us samay baap ko sukh ke saagar ke swaroop se yaad karo। jab baap sukh ka saagar hai to bachchon mein duhkh ki lahar kaise aa sakti! aap aatmaon ka anaadi, aadi swaroop bhi sukh-swaroop hai। jab paramdham mein hain to bhi sukh-swaroop hain aur jab aadi devta bane to bhi sukh-swaroop the! to apne anaadi aur aadi swaroop ko smriti mein rakho to kabhi bhi duhkh ki lahar nahin aayegi। achha! paandavon ko kabhi duhkh ki lahar aati hai?kabhi krodh karte ho? krodh karna arthaat duhkh dena, duhkh lena। jisko kabhi krodh nahin aata hai vo haath uthaao! ghar vaalon ka bhi certificate chaahiye। kabhi koi gaali de,insult kare-tab bhi krodh na aaye। sabhi ka photo nikal raha hai। nahin aata hai to bahut achha। lekin aage chalkar kisi bhi paristhiti mein bhi maaya ko aane nahin dena। agar abhi tak safe hain to mubaarak, lekin aage bhi avinaashi rehna। achha! maataaon ko moh aata hai? paandavon mein hota hai ‘rob’ jo krodh ka hi ansh hai aur maataaon mein hota hai ‘moh’!to is varsha kya karenge?krodh bilkul hi nahin aaye। aise to nahin kahenge-karna hi padta hai,nahin to kaam nahin chalta? aajkal ke samay ke pramaan bhi krodh se kaam bigadta hai aur aatmik-pyaar se, shanti se bigda hua kaarya bhi theek ho jaata hai। isliye yeh bhi ek bahut bada vikaar hai। to krodh-jeet banna brahman jeevan ke liye ati aavashyak hai। maataaon ko mohjeet banna hai। kai baar moh ke kaaran krodh bhi aa jaata hoga! sab ne kya lakshya rakha hai? baap samaan banna hai। to baap mein krodh va moh hai kya? to samaan banna pade na! kaisi bhi paristhiti aa jaaye lekin maayaajeet banna arthaat brahman jeevan ka sukh lena। to aur underline karke is varsha mein samaapta karo। achha!

group nan.5

raajayogi woh jo apni karmendriyon ko order mein chalaaye

sabhi ek second mein ashareeri sthiti ka anubhav kar sakte ho? ya time lagega? aap raajayogi ho,raajayogi ka arth kya hai?raaja ho na। to shareer aapka kya hai? karmachaari hai na! to second mein ashareeri kyon nahin ho sakte? order karo-abhi shareer-bhaan mein nahin aana hai;to nahin maanega shareer?raajayogi arthaat master sarvashaktivaan। master sarvashaktivaan karmabandhan ko bhi nahin tod sakte to master sarvashaktivaan kaise kahla sakte?kehte to yahi ho na ki ham master sarvashaktivaan hain। to isi abhyaas ko badhaate chalo। raajayogi arthaat raaja ban in karmendriyon ko apne order mein chalaane vaale। kyonki agar aisa abhyaas nahin hoga to last time ‘paas with honour’ kaise banenge! dhakke se paas hona hai ya ‘paas with honour’ banna hai? jaise shareer mein aana sahaj hai, second bhi nahin lagta hai! kyonki bahut samay ka abhyaas hai। aise shareer se pare hone ka bhi abhyaas chaahiye aur bahut samay ka abhyaas chaahiye। lakshya shreshtha hai to lakshya ke pramaan purooshaartha bhi shreshtha karna hai।

saare din mein yeh baar-baar practice karo-abhi-abhi shareer mein hain,abhi-abhi shareer se nyaare ashareeri hain! last so fast aur first aane ke liye fast purooshaartha karna pade। sabse jyaada khushi kisko rehti hai? kis baat ki khushi hai? sadaiv apne praapta hue bhaagya ki list saamne rakho। kitne bhaagya mile hain? itne bhaagya mile hain jo aapke bhaagya ki mahima abhi kalpa ke ant mein bhi bhakta log kar rahe hain। jab bhi koi keertan sunte ho to kya lagta hai?kiski mahima hai? double foreigners ka keertan hota hai? sangam par bhaagyavaan bane ho aur sangam par hi ab tak apna bhaagya varnan karte hue sun bhi rahe ho। chaitanya roop mein apna hi jad chitra dekh harshit hote ho? achha!

group nan.6

alaukik jeevan banaane ke liye sab baaton mein ‘‘kam kharcha baala nasheen’’bano

(madhuban-nivaasiyon se mulaakaat)madhuban ki mahima chaaron or prasiddha hai hi। madhuban ki mahima arthaat madhuban-nivaasiyon ki mahima। madhuban ki mahima jyaada hai ya madhuban-nivaasiyon ki jyaada hai?madhuban kise kaha jaata hai?kya in bhavnon ko madhuban kaha jaata hai? madhuban-nivaasiyon se madhuban hai। jo madhuban ki mahima vo hi madhuban-nivaasiyon ki mahima hai। sadaiv yahi smriti mein rakho ki madhuban ki mahima so hamaari mahima! mahima uski gaai jaati hai jo mahaan hota hai। saadhaaran ki mahima nahin hoti hai। mahaanta ki mahima hoti hai। to madhuban nivaasi mahaan ho gaye na! ki kabhi saadhaaran bhi ban jaate hain?madhuban nivaasi arthaat sarva-shreshtha,mahaan। alaukikta hi mahaanta hai। laukikta ko mahaanta nahin kahenge। to madhuban nivaasi arthaat har karma, har bol, har sankalp-alaukik। madhuban nivaasi arthaat saadhaaranta se pare। unki drishti,unki vritti, unki smriti, kriti-sab alaukik arthaat mahaan। yeh hai madhuban nivaasiyon ki mahima। samjha? to madhuban mein deevaaron ki mahima nahin hai,aapki hai।

madhuban nivaasi har karma mein first aane vaale ho na। to avyakt varsha mein first kis baat mein aana hai? ‘baap samaan’banne mein,alaukikta mein first aana hai। to madhuban mein abhi se, saadhaaran chaal, saadhaaran bol ka jab naam-nishaan nahin rahega tab madhuban vaalon ko vishesh inaam milega। saara varsha har maas ki result niklegi। to har maas mein jara bhi saadhaaranta nahin ho, mahaanta ho। maha-nata hi to first hai na। saadhaaranta ko first nahin kahenge। to madhuban mein dekhenge-first prize kaun leta hai? to yeh inaam lenge na? dekhenge kaun inaam lete hain! kyonki madhuban nivaasiyon ko vishesh drama anusaar vardaanon ki praapti hai। jo madhuban nivaasi karenge vo chaaron or svatah aur sahaj hota hai। to madhuban ko is vardaan ki duaayen milengi। kyonki madhuban hai light-house, might-house। light-house ki light chaaron or phailti hai na। bulb ki light chaaron or nahin phailegi, light house ki chaaron or phailegi। light-house ban avyakt sthiti, avyakt chalan ki light chaaron or phailaao। pasanda hai na! anubhvi hain madhuban vaale। madhuban vaalon ko kya mushkil hai! jo chaahe woh kar sakte hain। kyonki saadhna ka vaayumandal bhi hai aur saadhan bhi hain। jitne madhuban mein saadhan hain utne sevaavendron par nahin hain। jaisa vaayumandal saadhna ka madhuban mein hai vaisa sevaakendra mein banaana padta hai,yahaan svatah hai।

purooshaartha harek ka individual (Individual; vyaktigat) hai। chaahe sankhya kitni bhi ho lekin purooshaartha harek ko ‘sva’ka karna hai। alaukikta laane ke liye ek slogan sada yaad rakhna, jo brahma baap ka sada pyaara raha! woh kaunsa slogan hai? ‘‘kam kharcha baala-nasheen’’-yeh slogan sada yaad rakho। kam kharche mein bhi baalaansheen karke dikhaao। aise nahin-kam kharcha karna hai to kami dikhaai de। kam kharcha ho lekin usse jo praapti ho woh bahut shaandaar ho। kam kharche mein shaandaar result ho-isko kehte hain ‘‘kam kharcha baala nasheen’’। to alaukik jeevan banaane ke liye sab mein ‘‘kam kharcha baala nasheen’’ banna hai-bol mein bhi,karma mein bhi। kam kharcha arthaat energy-sankalp jyaada kharcha nahin। kam kharcha mein kaam jyaada। aise nahin-kaam hi kam kar do। kam samay ho lekin kaam jyaada ho,kam bol hon lekin us kam bol mein spashteekran jyaada ho, sankalp kam hon lekin shaktishaali hon-isko kaha jaata hai ‘kam kharcha baala-nasheen’। sarva khazaane kam kharcha mein baala-nasheen karke dikhaao। madhuban-nivaasi to bharpoor hain। sunaaya tha na-madhuban ka bhandaara bhi bharpoor to bhandaari bhi bharpoor hai। to madhuban-nivaasiyon ke bhi sarva shaktiyon ke khazaane se bhandaare bharpoor hain। achha!

(baba, advance party ka is samay kya roll hai?) jo aap logon ka roll hai vahi un logon ka roll hai। aap shubh bhaavna se seva kar rahe ho na। ladaai-jhagde ke beech jaakar ke to nahin kar rahe ho। to vo bhi apne vibration se sab karte rehte hain।

conference ke liye sandesh

conference ke pahle itna shanti ka vibration do,jo aane vaale aa saken। abhi to iski aavashyakta hai। aur yog lagaao। yeh bhi braahmanon ke liye golden chance ho jaata hai! jab bhi koi aisi baat hoti hai to kya kehte hain? yog lagaao, akhanda yog karo। to duniya ki ashaanti aur braahmanon ka golden chance। to yeh bhi beech-beech mein chance milta hai buddhi ko aur ekaagra karne ka। (karphyu ke samay class mein nahin aa sakte hain) lekin student maana study zaroor karenge। ghar mein to kar sakte hain na। teacher ka kaam hi hai-apni yog-shakti se apne area mein karphyu khatma karaana। yeh scene bhi dekhne se nirbhayta ka anubhav badhta jaata hai। achha!