Avyakt murli for Thursday 16 November 1995

>

16-11-95 om shanti avyakt baapdaadaamdhuban

‘‘baapdaada ki chaahna - diamond jubilee varsha ko lagaav mukta varsha ke roop mein manaao’’

aaj baapdaada sada dil se baap ki yaad mein rahne vaale apne snehi, sahayogi bachchon se milne aaye hain। jitna bachchon ka sneh hai utna baap ka bhi sneh bachchon se hai। baap sabhi bachchon ko ek jaisa ati sneh dete hain। lekin bachche apne-apne shakti anusaar sneh ko dhaaran karte hain। iseelie baap ko bhi kehna padta hai nambarvaar yaad-pyaar। lekin baap sabhi bachchon ko number one dil ka pyaar amritvele se lekar dete hain। isliye amritvela vishesh bachchon ke liye hi rakha hua hai। kyonki amritvela saare din ka aadi samay hai। to jo bachche aadi samay par baap ka sneh dil mein dhaaran kar lete hain to dil mein parmaatma sneh samaaya hua hone ke kaaran aur koi sneh aakarshit nahin karta hai। agar apne sthiti anusaar poora dil bhar karke dil mein sneh nahin dhaaran karte, thoda bhi khaali hai,adhoora liya hai to dil mein jagah hone ke kaaran maaya bhinna-bhinna roop se anek sneh, chaahe vyakti, chaahe vaibhav-donon roop mein un snehon mein aakarshit kar leti hai।

kai bachche baapdaada se kehte hain ki hamaare paas abhi tak bhi maaya kyon aati hai? jab master sarvashaktimaan ban gaye to maaya ke aane ka question hi nahin hai। lekin kaaran hai ki aadi kaal amritvele apne dil mein parmaatma sneh sampoorn roop se dhaaran nahin karte। agar koi bhi cheez adhoori bhari hui hai, kahaan bhi khaali hai to halchal to hogi na! baithte bhi ho, uthte bhi ho, lakshya bhi hai aur kehte bhi ho ki ek baap, doosra na koi… yeh dil se kehte ho ya mukh se? to phir dil mein aur aakarshan ka kaaran kya hai?zarur kahaan aur vyakti ya vaibhav ki taraph sneh jaata hai tab vo aakarshit karti hai। dil mein sampoorn parmaatma pyaar poora bhara hua nahin hota hai। aap socho-agar ek haath mein aapko koi heera deve aur doosre haath mein mitti ka gola deve to aapki aakarshan kahaan jaayegi?heere mein jaayegi, mitti mein nahin! mitti se bhi khelna to achha hota hai na! to vyartha sankalp ye bhi kya hai?heera hai ya mitti hai? to mitti se khelte to ho na! aadat padi hui hai iseelie! vyakti bhi kya hai? mitti hai na! mitti-mitti mein mil jaati hai। dekhne mein aapko bahut sundar aata hai, chaahe soorat se, chaahe koi visheshta se, chaahe koi gun se,to kehte hain ki aur mujhe koi lagaav nahin hai, sneh nahin hai lekin inka ye gun bahut achha hai। to gun ka prabhaav thoda pad jaata hai ya kehte hain ki ismen seva ki visheshta bahut hai to seva ki visheshta ke kaaran thoda sa sneh hai, shabd nahin kahenge lekin agar vishesh kisi bhi vyakti ke taraph ya vaibhav ke taraph baar-baar sankalp bhi jaata hai-ye hota to bahut achha… ye bhi aakarshan hai। vyakti ke seva ki visheshta ka daata kaun? vo vyakti ya baap deta hai?kaun deta hai?to vyakti bahut achha hai,achha hai vo theek hai lekin jab koi bhi visheshta ko dekhte hain, gunon ko dekhte hain, seva ko dekhte hain to daata ko nahin bhoolo। woh vyakti bhi levta hai, daata nahin hai। bina baap ka bane us vyakti mein ye seva ka gun ya visheshta aa sakti hai? ya woh visheshta agyaan se hi le aata hai? eeshvareey seva ki visheshta agyaan mein nahin ho sakti। agar agyaan mein bhi koi visheshta ya gun hai bhi lekin gyaan mein aane ke baad us gun va visheshta mein gyaan nahin bhara to vo visheshta va gun gyaan maarga ke baad itni seva nahin kar sakta। natural gun mein bhi gyaan bharna hi padega। to gyaan bharne vaala kaun? baap। to kiski den hui, daata kaun? to aapko levta achha lagta hai ya daata achha lagta hai? to levta ke peechhe kyon bhaagte ho?

baap ke aage ya daadiyon ke aage bahut meetha-meetha bolte hain, kahenge daadi mera kuchh lagaav nahin, bilkul nahin, sirf seva ke kaaran thoda sa hai। thoda sa kahkar apne ko chhuda lete hain। lekin ye lagaav chaahe gun ka ho, chaahe seva ka ho lekin lagaav aaj nahin to kal kahaan le jaayega? koi ko to lagaav puraani duniya tak bhi le jaata hai lekin majority puraani duniya tak nahin jaate hain, thode jaate hain। majority ko lagaav purooshaartha mein albelepan ki taraph le jaata hai। phir sochte hain ki ye to thoda-bahut hota hi hai phir baap ko bhi samjhaane lagte hain-kehte hain baba aap to saakaar mein ho nahin,brahma baba bhi avyakt ho gaya aur aap to ho hi bindi,jyoti। abhi ham to saakaar mein hain,itna mota-taaja shareer hai aur shareer se sab karna hai, chalna hai, to ham hain saakaar aur aap aakaar aur niraakaar ho,abhi saakaar mein koi to chaahiye na! achha bahut nahin, ek to chaahiye na! ek bhi nahin chaahiye? dekhna baapdaada to kehte hain ek chaahiye। nahin chaahiye? (ek baba chaahiye) baap to hai hi lekin kai baar man mein kai baaten aa jaati hai aur man bhaari ho jaata hai,jab tak man ko halka nahin karte hain to yog bhi nahin lagta। phir kya karen?baap ka bhi question hai ki aise time par kya karen?man bhaari hai aur yog lagta nahin hai to kya karen? ulti nahin kare, andar hi machalta rahe?doctors log kya kehte hain?agar pet bhaari ho jaaye to ulti karke nikaalni chaahiye ya andar hi rakhni chaahiye? doctors kya kehte hain?ulti karni chaahiye na? to doctor bhi kehte hain ulti karni chaahiye। achha।

ye to hua tan ka doctor aur aap sabhi man ke doctor ho। to tan vaale ne apna javaab diya, abhi man ke doctor bataao-agar man mein koi uljhan ho to kahaan ulti karen? baba ke saamne ulti karenge! (baba ke kamre mein jaakar karen) kamre mein ultiyaan karke aaven! socho! baap ke aage ulti karenge? nahin to kahaan kare?koi sthaan to bataao na?baapdaada to bachchon ka taraph leta hai ki us samay to koi chaahiye zarur। (baba ko sunaayen) agar baap sunta hi nahin, to kya karen? kai bachchon ki kamplent hai na ki hamne to baba ko sunaaya, baba ne suna hi nahin, javaab hi nahin diya। phir kya karen?vaastav mein agar dil mein parmaatma pyaar, parmaatma shaktiyaan, parmaatma gyaan full hai,zara bhi khaali nahin hai to kabhi bhi kisi bhi taraph lagaav ya sneh ja nahin sakta।

kai kehte hain lagaav nahin hai lekin sirf achha lagta hai to isko kaun-si line kahenge?lagaav nahin hai, achha lagta hai to ye kya hai? itni chhutti den ki achha bhale lage,lagaav nahin hai, unse baithna, unse baat karna, unse seva karaana vo achha lagta hai,to ye chhutti den?jo samajhte hain thodi-thodi deni chaahiye,abhi sampoorn to bane nahin hain,purooshaartha kar rahe hain,thodi chhutti honi chaahiye! woh haath uthaayen। abhi haath to uthaayenge nahin, kyonki sharma aayegi na! lekin agar aap samajhte ho ki thodi si chhutti honi chaahiye to daadi ko private chitki likhkar de dena। aise nahin kehna ki daadi paanch minute baat karna hai, ismen to phir time chaahiye। chitki mein likh do to baapdaada unka achha sangathan karenge। aur hi achha ho jaayega na! achha, abhi sab na kar rahe hain aur sabhi ka video nikal raha hai। yadi na karke phir karenge to vo cassette bhejenge ki aapne na kiya tha phir kyon kiya? bhejni padegi ya safe rahenge?pakka ya thoda-thoda kachcha, thoda-thoda pakka!

us din bhi sunaaya ki ye season diamond jubilee ka aarambha karne vaali hai to is season mein aap logon ne to conference ka,bhaashnon ka,melon ka bahut programme banaaya hai lekin baapdaada vishesh is diamond jubilee mein ek programme banaana chaahte hain, taiyaar ho?

baapdaada chaahte hain ki diamond jubilee mein jis bachche ko dekhen-chaahe do varsha ka hai,chaahe saath varsha ka hai,chaahe do maas ka hai, chaahe teacher hai, chaahe student hai,chaahe samarpan hai, chaahe pravritti mein hai lekin diamond jubilee ke varsha mein, ye jo baap ke saath aap sabne bhi paan ka beeda uthaaya hai ki pavitrata dvaara ham prakriti ko bhi paavan karenge। to ye sankalp hai ya baap ko karna hai? baap ke saathi hain? thoda sa haath aise rakh dete hain, chaturaai karte hain। aise nahin karna। to baapdaada chaahte hain ki saare vishwa mein har ek bachcha lagaav mukta bane - chaahe saadhnon se, chaahe vyakti se। saadhnon se bhi lagaav nahin। use karna aur cheez hai aur lagaav alag cheez hai। to baapdaada lagaav-mukta varsha manaane chaahte hain। ye function karna chaahte hain। to is function mein aap log saathi banenge? phir ye to nahin kahenge ki yeh kaaran ho gaya! koi bhi kaaran ho, chaahe himaalay ka pahaad bhi gir jaaye, lekin aap us himaalay ke pahaad se bhi kinaare nikal aao। itni himmat hai? pahle teachers bolo। student khush hote hain ki hamaari teachers ko baapdaada kehta hai। aur teachers to sahayog ke liye sada saathi hain hi na। kyonki aage chalkar aajkal ki duniya mein ye sabhi jo bhi apne ko dharma aatma,mahaan aatma kahlaate hain unhon ki bhi pavitrata ke foundation hilenge। aur aise time par aadi mein jab brahma baap nimitta bane to gaali kis baat ke kaaran khaai? pavitrata ke kaaran na। nahin to koi bade aayu vaale ki bhi himmat nahin thi jo brahma baap ke past life mein bhi koi anguli uthaae। aisi personality thi। lekin pavitrata ke kaaran gaali khaani padi। aur is parmaatma gyaan ki naveenta hi pavitrata hai। falak se kehte hain na ki aag-kaapoos ikaththa rehte bhi aag nahin lag sakti। challenge hai na! jo yugal hain vo haath uthaao। to aap sabhi yuglon ki ye challenge hai ya thodi-thodi aag lagegi phir bujha denge? world ko challenge hai na! saare vishwa ko aap log bhaashnon mein kehte ho ki pavitrata ke bina yogi tu aatma, gyaani tu aatma ban hi nahin sakte। ye aap sabki challenge hai na?jo yugal samajhte hain ki meri ye challenge hai vo haath uthaao।achha hai - ek hi group mein saathi to bahut hain। to diamond jubilee mein kya karenge?lagaav mukta। krodhmukta ka kiya na। thoda-thoda krodh to baapdaada ne bhi kaiyon mein dekha, lekin is baari thoda ka chhod diya। phir bhi chaahe desh, chaahe videsh mein jinhonne attention rakha aur sampoorn roop se krodh mukta jeevan ka practical mein anubhav kiya, karke dikhaaya, un sabko baapdaada padmaguna se bhi jyaada mubaarak dete hain। kyonki is samay chaahe videsh vaale,chaahe desh vaale, sabke buddhi roopi telephone yahaan madhuban mein lage hue hain। abhi sabka connection madhuban mein hai। to sabhi ne yeh anubhav to kiya hi hoga ki jinhon ne achhi tarah se dridh sankalp kiya - unhon ko baapdaada ki taraph se vishesh extra madad bhi mili hai। to aise nahin samajhna ki ek saal to krodh ko khatma kiya, abhi to free hain। nahin। agar sampoorn lagaav mukta anubhav karenge to krodh mukta automatically ho jaayenge। kyon?krodh bhi kyon hota hai?jis baat ko,jis cheez ko aap chaahte ho aur vo poorn nahin hota hai ya praapta nahin hota hai to krodh aata hai na! krodh ka kaaran - aapke jo sankalp hain vo chaahe ulte hon,chaahe sulte hon lekin poorn nahin honge - to krodh aayega। maano aap chaahte ho ki conference hoti hai, function hote hain to usmein hamaara bhi part hona chaahiye। aakhir bhi ham logon ko kab chance milega? aapki ichchha hai aur aap ishaara bhi karte hain lekin aapko chance nahin milta hai to us samay chidchidaapan aata hai ki nahin aata hai? chalo,maha krodh nahin bhi karo,lekin jisne na ki unke prati vyartha sankalp bhi chalenge na?to woh pavitrata to nahin hui। offer karna, vichaar dena iske liye chhutti hai lekin vichaar ke peechhe us vichaar ko ichchha ke roop mein badli nahin karo। jab sankalp ichchha ke roop mein badalta hai tab chidchidaapan bhi aata hai, mukh se bhi krodh hota hai va haath paanv bhi chalta hai। haath paanv chalaana-woh hua mahaakrodh। lekin nisvaartha hokar vichaar do,svaartha rakhkar nahin ki mainne kaha to hona hi chaahiye-ye nahin socho। offer bhale karo, ye wrong nahin hai। lekin kyon-kya mein nahin jaao। nahin to eershya, ghrina - ye ek-ek saathi aata hai। isliye agar pavitrata ka niyam pakka kiya, lagaav mukta ho gaye to yeh bhi lagaav nahin rakhenge ki hona hi chaahiye। hona hi chaahiye, nahin। offer kiya theek,aapki nisvaartha offer jaldi pahunchegi। svaartha ya eershya ke vash offer aur krodh paida karegi। to teachers kya karengi? 100 percent lagaav mukta। bolo haan ya na? foreigners bolo, haan ji।

baapdaada ko to apne T.vi. mein bahut nai-nai baaten dikhaai deti hain। abhi 60 varsha poore ho rahe hain to ab tak jo baaten nahin hui thi vo naye-naye khel bhi bahut dikhaai dete hain। is season mein ek-ek karke varnan karenge। lekin yaad rakhna agar kisi ke prati bhi svapna maatra bhi lagaav ho,svaartha ho to svapna mein bhi samaapta kar dena। kai kehte hain ki ham karma mein nahin aate lekin svapna aate hain। lekin agar koi vyartha va vikaari svapna, lagaav ka svapna aata hai to avashya sone ke samay aap albelepan mein soye। kai kehte hain ki saare din mein mera koi sankalp to chala hi nahin, kuchh hua hi nahin phir bhi svapna aa gaya। to check karo-sone samay baapdaada ko saare din ka potaamel dekar,khaali buddhi ho karke neend ki?aise nahin ki thake hue aaye aur bistar par gaye aur gaye -ye albelaapan hai। chaahe vikarma nahin kiya aur sankalp bhi nahin kiya lekin ye albelepan ki saza hai। kyonki baap ka pharmaan hai ki sote samay sada apne buddhi ko clear karo,chaahe achha,chaahe bura,sab baap ke havaale karo aur apne buddhi ko khaali karo। de diya baap ko aur baap ke saath so jaao, akele nahin। akele sote ho na tabhi svapna aate hain। agar baap ke saath soo to kabhi aise svapna bhi nahin aa sakte। lekin pharmaan ko nahin maante ho to pharmaan ke badle armaan milta hai। subah ko uthkar ke dil mein armaan hota hai na ki meri pavitrata svapna mein khatma ho gai। ye kitna armaan hai! kaaran hai albelaapan। to albele nahin bano। jaise aaya vaise yahaan vahaan ki baaten karte-karte so jaao, kyonki samaachaar to bahut hote hain aur dilchashpa samaachaar to vyartha hi hote hain। kai kehte hain-aur to time milta hi nahin, jab saath mein ek kamre mein jaate hain to len-den karte hain। lekin kabhi bhi vyartha baaton ka varnan karte-karte sona nahin, ye albelaapan hai। ye pharmaan ko ullanghan karna hai। agar aur time nahin hai aur zaroori baat hai to sone vaale kamre mein nahin,lekin kamre ke baahar do second mein ek-do ko sunaao,sote-sote nahin sunaao। kai bachchon ki to aadat hai, baapdaada to sabhi ko dekhte hain na ki sote kaise hain?ek second mein baapdaada saare vishwa ka chakkar lagaate hain, aur T.vi. se dekhte hain ki so kaise rahe hain, baat kaise kar rahe hain … sab baapdaada dekhte hain। baapdaada ko to ek second lagta hai, jyaada time nahin lagta। har ek centre, har ek pravritti vaale sabka chakkar lagaate hain। aise nahin sirf centre ka, aapke gharon ka bhi T.vi. mein aata hai। to jab aadi arthaat amritvela aur ant arthaat sone ka samay achha hoga to madhya svatah hi theek hoga। samjha? aur baaten karte-karte kai to baarah saadhe baarah bhi baja dete hain। masta hote hain,unko time ka pata hi nahin। aur phir amritvele uthkar baithte hain to aadha samay nidraalok mein aur aadha samay yog mein। kyonki jo albele hokar soye to amritvela bhi to albela hoga na! aise nahin samajhna ki hamko to koi dekhta hi nahin hai। baapdaada dekhta hai। yeh nidra bhi bahut shanti va sukh deti hai, iseelie mix ho jaata hai। agar poochhenge to kahenge-nahin,main bahut shanti ka anubhav kar raha tha। dekho, neend ko bhi aaraam kaha jaata hai। agar koi beemaar bhi hota hai to doctor log kehte hain - aaraam karo। aaraam kya karo?neend karo time par। to nidra bhi aaraam dene vaali hai। fresh to karti hai na। to neend se fresh hokar uthte hain na to kehte hain aaj (yog mein) bahut fresh ho gaye। achha!

sabhi door-door se aaye hain। jo is group mein pahli baari aaye hain vo haath uthaao। jo chhote bachche hote hain na vo badon se aur hi pyaare hote hain। lekin jo naye-naye aaye ho vo make up karna। jo badon ne 10 saal mein kiya vo aap 10 din mein karna। aur kar sakte ho kyonki baapdaada samajhte hain ki jab naye naye aate hain na to umang-utsaah bahut hota hai aur jitne puraane hote hain to… samajh gaye puraane! isliye kahne ki jaroorat kya hai! sabhi naye,chaahe kumaariyaan hain,chaahe kumaar hain, chaahe pravritti vaale hain, pravritti vaalon ko to in sabhi mahaatmaaon ko charnon mein jhukaana hai। sab aapke gun gaayenge ki ye pravritti mein rehte bhi nirvighna pavitrata ke bal se aage badh rahe hain। ek din aayega jo aap sabke aage ye mahaatmaayen jhukenge। lekin apna vaayda yaad rakhna-lagaav mukta rehna। achha।

teachers se

teachers to har baat ke nimitta hai। ho na nimitta-ye baat pakki hai na! teachers ka arth hi hai nimitta। to abhi bhi is varsha - lagaav mukta banne mein teachers number one nimitta banen। theek hai! pakka! taali bajaao। baapdaada bhi aap teachers ke prati vishesh taali bajaata hai। achha।

kumaariyaan

kumaariyaan haath uthaao। kumaariyaan kya karengi?kumaariyon ko apne jeevan ka svayan, svayan ka mitra ban nirbandhan banaane mein number one jaana chaahiye। in kumaariyon ki list ikatthi karo phir dekhenge ki sachmuch kitni nirbandhan banti hain? kumaarayaan agar samajhti ho ki ham nirbandhan hokar seva mein nimitta banengi to haath uthaao। inhon ki training rakhenge। abhi to gyaan sarovar mein bhi rakhte hain। to kumaariyaan kya banengi?nirbandhan। na man ka bandhan,na sambandh ka bandhan। double bandhan se mukta। achha।

kumaar

kumaar haath uthaao। kumaar to bahut hain। to kumaar kya visheshta dikhaayenge?kumaar aise apne ko taiyaar karo-chaahe apne-apne sthaan par ho lekin jahaan bhi ho vahaan apne ko aisa taiyaar karo jo aapka 400-500ka group bana karke government ke in bade logon se milaayen ki dekho ki ye itne youth vishwa ki seva ke liye ya bhaarat ki seva ke liye destruction ka kaam na kar,construction ka kaam kar rahe hain। to aisa group banaao। to kitne time mein apne ko taiyaar karenge?kyonki government youth ko aage rakhna chaahti hai lekin unko aise youth milte nahin hain aur baap ke paas to hain na! to almighty government is halchal vaali government ke aage ek practical misaal dikha sakti hai। lekin kachche nahin hone chaahiye। aisa nahin, aap kaho ham to bahut achhe chalte hain aur aapke saathi jo hain vo report karen ki nahin,ye to aise hi kehta hai। aise nahin। pavitrata ke liye bigadte hain vo baat alag hai lekin divyagunon ki dhaarna mein aapka prabhaav ghar vaalon ke oopar padna chaahiye। samjha?to jo samajhte hain ham diamond jubilee tak taiyaar ho jaayenge vo haath uthaao। abhi thode kam ho gaye। achha,teachers report dena is diamond jubilee ke beech mein,and mein nahin। government ko youth dikhaayen। abhi to 8maas hain। to aath maas theek hai।

adharkumaar-kumaariyaan

adharkumaar-kumaariyaan kya karenge?vaise pravritti vaalon ko ek naya saboot dena chaahiye। jo ghar mein hain, aapki family hai, kiske chaar bachche honge, kiske aath honge, kiske do honge, jo bhi hain lekin har pravritti vaale apne bachchon ko aise moolya sikhaakar taiyaar karen jo bachchon ka aisa dhaarna vaala group sample ho,jo college-school ke padhe hain,unke aage un bachchon ko dikhaayen। pravritti vaalon ko apne bachchon ke group ko taiyaar karna chaahiye। jo kisi se bhi report poochhen chaahe uske teachers se poochhen, chaahe uske mohalle ke doston se poochhe, sab uski report achhi deven। aise nahin - aap kaho bahut achhe hain aur teacher kahe ki ye to padhte hi nahin hain। aise nahin। to pravritti vaalon ko aise bachche taiyaar karne chaahiye। gyaan mein aate hain, achhe bhi hain lekin unhon ko thoda aur attention dilaakar aisa group taiyaar karo। to education ka certificate vo bachche ho jaayenge। nahin to education vaale kehte hain na aap certificate nahin dete ho। to aap kaho certificate dekho ye chaitanya hai। aap kaagaj ka certificate dete ho, ham aapko chaitanya ka certificate dikhaate hain। samjha? aise hi diamond jubilee nahin manaani hai। diamond jubilee mein kuchh naveenta dikhaani hai। jo government ki aankh khule ki ye kya hai! kisi kaarya mein vo na kar nahin sake। aur hi offer karen,jaise yahaan jab mahaamandaleshvar aaye the to unhon ne kya offer ki?ki hamaare aashram brahmaakumaar aur brahmaakumaariyaan chalaayen। aise maangani ki thi na! to sabhi department offer karen ki hamaare department mein aap log hi kar sakte hain। aisa practical swaroop karna - ye hai diamond jubilee। lekin pahla vaayda yaad hai? kya banna hai? (lagaav mukta) tabhi ye sabhi ho sakta hai। abhi bhi bachche ko maarte rahenge to bachcha kaise achha hoga। aur aapas mein kamzor hote rahenge to mahaatma kaise charnon mein aayenge। jitna-jitna pavitrata ke pillar ko pakka karenge utna-utna ye pavitrata ka pillar light house ka kaam karega। achha।

double videshi

double videshiyon mein baapdaada ko usmein bhi vishesh brahma baap ko double pyaar hai। kyon double pyaar hai bataao?samajhte ho double pyaar hai?kyon double pyaar hai? ( laukik-alaukik double kaam karte hain) achha javaab diya। lekin aur bhi hai, brahma baba ko double videshiyon se vishesh pyaar isliye hai ki brahma baap har kaarya mein quick ekzaampal svayan bhi rahe aur bachchon ko bhi banaaya to double videshi aate hi course kiya, thoda-sa pakke hue aur centre khol dete hain। aise karte ho na?inhon ki to bahut training hoti hai, lekin double videshi seva mein quick ekzaampal hain। to brahma baba ko aise bachchon ka bahut samay se aavhaan tha ki aise bachche niklen। to double videshi seva mein jyaada time nahin lagaate। jaldi lag jaate hain। kitna bhi busy hote hue bhi seva ka shauk achha rehta hai। abhi bhi ye museum banaane ke liye aaye hain। (gyaan sarovar mein 5 double videshi bhaai-bahinen museum bana rahe hain) dekho double videshiyon ki visheshta hai tab to videsh se khaas aap logon ko bulaaya hai। visheshta to hai na! ye poora group achha hai। dekho,vishesh aatmaayen ho gaye na, vishesh kaarya ke liye aapko bulaaya gaya to vishesh aatmaayen ho gaye। vaise baapdaada ko to achhe lagte hi ho। shiv baba ko bhi achhe lagte ho lekin brahman parivaar ko bhi achhe lagte ho। aap logon ko dekhte hain na to yahaan bhaarat vaalon ko bhi nasha rehta hai ki dekho hamaara sirf bhaarat mein nahin, vishwa mein hai। to sabhi ke sikeeldhe ho। achha।

museum banaane vaale group ko baapdaada ne sammukh bulaaya

ye bhi draamaanusaar vishesh vardaata ka vardaan milta hai। koi bhi art hai to art vardaan samajhkar kaarya mein lagaao। ye baap ka vardaan draamaanusaar vishesh nimitta bana hai to usse kaarya sahaj aur saphal hua hi pada hai। aise hai na? to vishesh vardaani aatmaayen hain,usko usi visheshta se kaarya mein lagaate raho। baap ka vardaan hai - yeh sada smriti mein rahe। to aapke sirf haath kaam nahin karenge lekin baap ki shakti aapke haathon ke saath kaam karegi। bahut achha hai। achha।

ahamdaabaad - mahaadev nagar,sevaakendra ke udghaatan ke avsar par jin 19kumaariyon ka samarpan samaaroh manaaya gaya, ve sab baapdaada se milne madhuban mein aai hain,unhein baapdaada ne sammukh bulaaya:- dekho,kumaariyon ki vaise bhi mahima hai। bhakti maarga mein aap sabhi ne kumaariyon ke charan bhi dhoye honge। pooja bhi ki hogi aur abhi yahi kumaariyaan aap sabhi ko parmaatma milan aur parmaatma varse ke adhikaari bana rahi hain। sabhi kumaariyaan pakki ho? photo to nikla hua hai। koi kachcha to nahin? koi puraani duniya mein to nahin chale jaayenge। pakke hain! achha।

chaaron or ke dil mein samaaye hue baapdaada ke sikeeldhe shreshtha aatmaon ko,sada baap ke har ek pharmaan maanne se, svayan ka aur auron ka bhi armaan samarpit karaane vaale, sada pavitrata ke pillar ko mazboot banaane vaale aur pavitrata ki light,light house ban phailaane vaale vishesh aatmaon ko,sada svayan ko lagaavmukta banaane vaale baap ke sameep aane vaale,rahne vaale sabhi bachchon ko baapdaada ka yaad-pyaar aur namaste।

videsh mein rahne vaale chaaron or ke bachchon ko baapdaada ka vishesh yaad-pyaar kyonki vo yaadapyaar ke patra sada hi bhejte rehte hain। jinhon ne patra bheja hai unhon ko bhi vishesh yaad aur jinhon ne dil se yaad pyaar bheja hai unhon ko bhi vishesh yaadapyaar।