Avyakt murli for Friday 16 February 1996

>

16-02-96 om shanti avyakt baapdaadaamdhuban

‘‘diamond jubilee varsha mein vishesh attention dekar samay aur sankalp ke khazaane ko jama karo’’

aaj trimoorti rachta shiv baap bachchon ko teen badhaaiyaan de rahe hain। bachche baap ko badhaai dene aaye hain, to baap return mein teen badhaaiyaan de rahe hain। ek shiv jayanti ki, doosri diamond jubilee ki aur teesri vartamaan samay umang- utsaah se seva karne ki badhaai। to teen badhaaiyaan chaaron or ke bachchon ko baapdaada de rahe hain। baap ke paas sabke dilon ke umang-utsaah ke seva ke samaachaar pahunchte rehte hain। ye alaukik jayanti saare kalpa mein nahin hoti hai। kyonki saare kalpa mein chaahe dev aatma ho, chaahe mahaatma ho,chaahe saadhaaran aatmaayen ho lekin aatmaayen, aatma ki jayanti manaate hain। aur is sangam par aap shreshtha aatmaayen kiski jayanti manaane aaye ho?param aatma ki aur param aatma baap bachchon ki jayanti manaate hain। satayug-treta mein bhi param aatma aapki jayanti nahin manaayenge va aap paramatma ki jayanti nahin manaayenge। to kitne padma-padma-padma guna bhaagyavaan aatma ho। aise kabhi apne shreshtha bhaagya ko svapna mein bhi socha hoga? nahin socha?lekin aaj saakaar roop mein mana rahe hain। to khushi hai na! dekho chaahe desh vaale, chaahe videsh vaale,chaahe madhuban vaale,jo bhi is group mein baithe hain, kitna lucky hain! andar kya geet gaate ho?vaah mera bhaagya। aur baap bhi geet gaate hain vaah bachchon ka bhaagya। vishesh seva ka group baitha hai na, sab taraph ke vishesh hain na, to vishesh seva ka vishesh pratyakshaphal praapta karne vaali aatmaayen ho। to baap bhi aise shreshtha bachchon ko dekh harshit hote hain। bachche jyaada harshit hote hain ya baap hote hain? donon। ya baap jyaada hota hai? aap jyaada hote ho। achha।

aaj baapdaada chaaron or ke sevaadhaari diamond ki maala ko dekh rahe hain। aap sabhi maala mein ho na? baap ke gale mein diamond ban chamakne vaale maala ke daane ho ya aur koi hai? aap hi ho aur nahin?log kehte hain ki 108 ki maala lekin baapdaada ke gale mein aap sabhi diamonds ki kitni lambi maala hai? 108 to aap neeche baithe hue ho jaayenge। peechhe vaale bhi ho na? pahle peechhe vaale। dekho ye bhi tyaag ka pratyaksha phal hai ki baapdaada peechhe vaalon ko jyaada mubaarak dete hain। aur usse jyaada neeche vaalon ko।

baapdaada har ek bachche ki visheshta ko dekhte hain। chaahe sampoorn nahin bane hain,purooshaartha hain lekin aisa ek bhi baap ka bachcha nahin hai jismen koi visheshta nahin ho। sabmen visheshta hai। sabse pahli visheshta to koto mein koi ke list mein to hain na। aur visheshta ye hai ki bade-bade tapasvi mahaan aatmaayen, 16108 jagatguru,chaahe shaastravaadi hain, chaahe mahaamandaleshvar hain, lekin baap ko nahin jaana aur baap ke sabhi bachchon ne baap ko to jaan liya na। to baap ko jaanna yeh kitni badi visheshta hai। dil se ‘mera baba’ to kehte hain na। mera kah kar adhikaari to ban gaye na। to isko kya kahenge?jisne baap ko parakh liya,pahchaan liya,to pahchaanna ye bhi buddhi ki visheshta hai,parakhne ki shakti hai। to aap sabhi ke parakhne ki shakti shreshtha hai। achha-aaj vishesh manaane aaye ho na? aaj manaane ka din hai ya aaj bhi sunne ka din hai?sunna bhi hai?achha।

to shivraatri kehte hain lekin aapke liye abhi kya hai? aapke liye raatri nahin hai to kya hai?amritvela hai? aap to raatri se nikal gaye ya thodi-thodi raatri abhi hai? chhutti le gai? kisi bhi prakaar ka andhakaar aata hai ki khatma ho gaya? amritvela sada vardaan ka samay hai to aapko roz vardaan milta hai na?to aap kahenge baap aata raatri mein hai lekin hamaare liye amritvela golden morning, diamond morning ho gai। to aise vardaani swaroop apna dekhte ho? maaya vardaan bhula to nahin deti? aati hai maaya?kabhi-kabhi to aati hai? maaya to last ghadi tak aayegi। aise nahin jaayegi। lekin maaya ka kaam hai aana aur aapka kaam hai door se bhagaana। aa jaave phir bhagaao, ye nahin। ye time abhi samaapta hua। maaya aave aur aapko hilaave phir aap bhagaao, time to gaya na! lekin silence ke saadhnon se aap door se hi pahchaan sakte ho ki ye maaya hai। ismen bhi time vesta nahin karo aur maaya bhi dekhti hai na ki chalo aane to dete hain na, to aadat pad jaati hai aane ki। jaise koi pashu ko,jaanvar ko apne ghar mein aane ki aadat daal do phir tang hokar bhagaao bhi lekin aadat to pad jaati hai na! aur baap ne sunaaya tha ki vi bachche to maaya ko chaay-paani bhi pilaate hain। chaay-paani kaun si pilaate ho?pata hai na?kya karoon,kaise karoon,abhi to purooshaartha hoon, abhi to sampoorn nahin bane hain, aakhir ho jaayenge - ye sankalp chaay-paani hain। to vo dekhti hai chaay-paani to milti hai। kisi ko bhi agar chaay-paani pilaao to vo jaayega ki baith jaayega? to jab bhi koi paristhiti aati hai to kyon, kya,kaise, kabhi-kabhi to hota hi hai,abhi kaun paas hua hai, sabke paas hai - ye hai maaya ki khaatiri karna। kuchh namkeen, kuchh meetha bhi khila dete ho। aur phir kya karte ho? phir tang hokar kehte ho abhi baba aap hi bhagaao। aane aap dete ho aur bhagaaye baba, kyon?aane kyon dete ho? maaya baar-baar kyon aati hai? har samay, har karma karte, trikaaldarshi ki seat par set nahin hote ho। trikaaldarshi arthaat past, present aur future ko jaanne vaale। to kyon, kya nahin karna padega। trikaaldarshi hone ke kaaran pahle se hi jaan lenge ki ye baaten to aani hain, honi hain, chaahe svayan dvaara,chaahe auron dvaara, chaahe maaya dvaara,chaahe prakriti dvaara,sab prakaar se paristhitiyaan to aayengi, aani hi hain। lekin sva-sthiti shaktishaali hai to par-sthiti uske aage kuchh bhi nahin hai। par-sthiti badi ya sva-sthiti badi? ya kabhi sva-sthiti badi ho jaati,kabhi par-sthiti?to iska saadhan hai - ek to aadi-madhya-ant teenon kaal check karke, samajh kar phir kuchh bhi karo। sirf vartamaan nahin dekho। sirf vartamaan dekhte ho to kabhi paristhiti oonchi ho jaati aur kabhi sva-sthiti oonchi ho jaati। duniya mein bhi kehte hain pahle socho phir karo। nahin to jo soch kar nahin karte to peechhe sochna pashchaataap ka roop ho jaata hai। aise nahin karte,aise karte,to peechhe sochna arthaat pashchaataap ka roop aur pahle sochna ye gyaani tu aatma ka gun hai। dvaapar-kaliyug mein to anek prakaar ke pashchaataap hi karte rahe ho na? lekin ab sangam par pashchaataap karna arthaat gyaani tu aatma nahin hai। aisa apne ko banaao jo apne aapmen bhi,man mein ek second bhi pashchaataap nahin ho। to is diamond jubilee mein vishesh saare din mein ek samay aur doosra sankalp-in do khajaanon par attention rakhna। vaise khajaane to bahut hain lekin vishesh in do khajaanon ke oopar attention dena hai। har din sankalp shreshtha, shubh kitna jama kiya? kyonki poore kalpa ke liye jama karne ki bank abhi khulti hai। satayug mein ye bank jama ki banda ho jaayegi। ye bank bhi nahin hogi, doosri bank bhi nahin hogi। itna dhan aapke paas hoga jo kisi se bhi kuchh lene ki aavashyakta nahin hogi। bank mein kyon rakhte hain? ek to safety aur doosra byaaj milta hai। kai bahut hoshiyaar hote hain jo byaaj se hi chalte rehte hain। aur is samay to agar aise hoshiyaar hain to achhe hain, jama karte hain na। lekin byaaj kis taraph lagaate hain vo dekhna hai। to satayug mein na ye bank hogi,na roohaani khajaane jama karne ki bank hogi। donon bank nahin hogi। is samay ek ka padmaguna karke dene ki bank hai lekin ek jama karenge tab padma milega,aise nahin। hisaab hai। to diamond jubilee mein sachche diamond banna hi hai, ye to pakka hai na? ki kabhi sankalp aata hai ki pata nahin ban sakenge ya nahin?pata nahin,to nahin aata?kya bhi ho,tyaag karna pade, tapasya karni pade, nirmaan banna pade, kuchh bhi ho jaaye,banna zaroor hai। hai? bolo,haan ji ya na ji? (haan ji) dekhna, haan ji kehna to bahut sahaj hai। haan ji banna ismen attention dena padega। pahla-pahla tyaag ye ‘main’shabd hai। ye‘main’ shabd hai bahut puraana lekin aajkal ye bahut royal roop ka ho gaya hai। ye ‘main’shabd samaapta ho bhaasha mein bhi ‘baba-baba’shabd aa jaaye। kahne mein dekho saadhaaran baat hai, main yogya hoon na,to yogya hoon to salvation ya seva usi pramaan milni chaahiye। main yogya hoon, main karti hoon, to ye right hai? karte to ho na phir kyon nahin kahen karti to hoon! main wrong hoon,right hoon,kahne mein to aayega na main karti hoon! … aap nahin karti ho? karta baba hai! vo baap hai karaavanhaar lekin karanhaar to aap ho na। to ‘main’kehna wrong kyon hua? vaise jab ‘main’shabd bhi prayog karte ho to vaastav mein ‘main’shabd kisse lagta hai? aatma se ya shareer se?main kaun?aatma hai na,shareer to nahin hai? to agar dehi abhimaani ban, main aatma hoon-is smriti se ‘main’ shabd use karte hain to right hai। lekin ‘main’shabd body conscious ke roop mein agar use karte hain to wrong hai। saare din mein ye ‘main’ shabd bahut aata hai aur aana hi hai। to abhyaas karo-jab bhi ‘main’shabd kehte ho to main kaun?vaastav mein‘main’ hai hi aatma। shareer ko ‘mera’kehte hain। to ‘main’shabd agar aatma abhimaani bankar kahenge to aatma ko baap svatah yaad hai। kahne ki bhi jaroorat nahin padegi। hoon hi main aatma - ye abhyaas daal do। jaise ye ulta abhyaas pad gaya hai aur natural ho gaya hai ki jab ‘main’shabd bolte ho to apna naam-roop smriti mein aa jaata hai। main kaun hoon? main phalaani hoon। yeh natural ho gaya hai na? sochna nahin padta hai। to ye jo ulte bhaav se ‘main’ shabd use karte ho tabhi result mein mehnat jyaada aur praapti kam hoti। kai bachche kehte hain ham to bahut seva karte hain,bahut mehnat karte hain lekin praapti itni nahin hoti hai। uska kaaran kya? vardaan sabko ek hai, 60 saal vaalon ko bhi ek to ek maas vaale ko bhi ek hai। khajaane sabhi ko ek jaise hain। paalna sabko ek jaisi hai, dincharya,maryaada sabke liye ek jaisi hai। doosri-doosri to nahin hai na! aise to nahin,videsh ki maryaadaayen aur hain, india ki aur hain, aise to nahin? thoda-thoda pharka hai? nahin hai? to jab sab ek hai phir kisko saphalta milti hai, kisko kam milti hai - kyon? kaaran?baap madad kam deta hai kya?kisko jyaada deta ho, kisko kam, aise hai?nahin hai। phir kyon hota hai? matlab kya hua? apni galti hai। ya to body-conscious vaala main-pan aa jaata hai, ya kabhi-kabhi jo saathi hain unhon ki saphalta ko dekh eershya bhi aa jaati hai। us eershya ke kaaran jo dil se seva karni chaahiye, vo dimaag se karte hain lekin dil se nahin। aur phal milta hai dil se seva karne ka। kai baar bachche dimaag use karte hain lekin dil aur dimaag donon milaake nahin karte। dimaag mila hai usko kaarya mein lagaana achha hai lekin sirf dimaag nahin। jo dil se karte hain to dil se karne vaale ke dil mein baap ki yaad bhi sada rehti hai। sirf dimaag se karte hain to thoda time dimaag mein yaad rahega-haan, baba hi karaane vaala hai,haan baba hi karaane vaala hai lekin kuchh samay ke baad phir vo hi main-pan aa jaayega। isliye dimaag aur dil donon ka balance rakho।

to sunaaya diamond jubilee mein kya karna hai?vishesh bachat ka khaata jama karo। aise nahin,ki saara din mere se koi aisi baat nahin hui, kisko duhkh nahin diya, kisi se kuchh khitkhit nahin hui arthaat ganvaaya nahin। ye to achhi baat hai ganvaaya nahin lekin jama kiya? seva bhi ki to apne roohaaniyat se seva mein saphalta praapta ki?va saphalta jama ki? to seva mein samay lagaaya - ye to achhi baat ki na lekin seva kis vidhi se ki? kai kehte hain ham to saara din itne seva mein busy rehte hain jo apna hi nahin pata padta। busy rehte hain yeh bahut achha। lekin seva ka pratyakshaphal jama hua? ki sirf mehnat ki? seva mein samay 8ghanta lagaaya lekin 8 hi ghante seva ke jama hue? samay jama hua? ki aadha jama hua,aadha bhaagdaud mein,sochne mein gaya? shreshtha sankalp, shubh bhaavna, shubh kaamna ke sankalp jama hote hain। to saare din mein jama ka khaata note karo। jab jama ka khaata badhta jaayega to svatah hi diamond ban hi jaana hai। abhi bhi samay aur sankalp - na achhe mein, na bure mein hote hain। to bure mein nahin hua ye to bach gaye lekin achhe mein jama hua?samjha? samay ko, sankalp ko bachaao, jitna abhi bachat karenge, jama karenge to saara kalpa usi pramaan raajya bhi karenge aur poojya bhi banenge। chaahe dvaapar se aap saakaar roop mein to girti kala mein aate ho lekin aapka jama kiya hua khaata aapke jad chitron ki pooja karaata hai। to sab ye note karna to maaloom pad jaayega ki vyartha va saadhaaran samay kitna hota hai? saadhaaran sankalp kitne hote hain? lekin ek attention rakhna - agar maano aapka aaj ke din jama ka khaata bahut kam hua to kam dekh karke dilshikasta nahin hona। aur hi samjho ki abhi bhi hamko chance hai jama karne ka। apne ko umang-utsaah mein laao। apne aapse race karo,doosre se nahin। apne aapse race karo ki aaj agar 8ghante jama hue to kal 10ghante ho। dilshikasta nahin hona। kyonki abhi phir bhi jama karne ka samay hai। abhi tu let ka board nahin laga hai। final result ka time abhi announce nahin hua hai। jaise laukik mein paper ki date final ho jaati hai to achhe purooshaartha kya karte hain? dilshikasta hote hain ya purooshaartha mein aage badhte hain? to aap bhi dilshikasta nahin banna। aur hi umang-utsaah mein aakarke dridh sankalp karo ki mujhe apne jama ka khaata badhaana hi hai। samjha?dilshikasta to nahin honge?phir baap ko mehnat karni pade! phir bade-bade patra likhna shuru kar denge - baba kya ho gaya… aisa ho gaya… ! baba bachaao, bachaao - aise nahin kehna। dekho aapke jad chitron se jaakar maangani karte hain ki hamko bachaao। to aap bachaane vaale ho,bachaao-bachaao kahne vaale nahin।

double videshi samajhte hain ki hamaari bhi pooja hoti hai? ki bhaarat vaalon ki hoti hai? kiski hoti hai? aapki hoti hai? to sada apna raajya adhikaari swaroop aur poojya swaroop - main poojya aatma hoon, auron ko dene vaali daata hoon। levta nahin, devta hoon। baap ne to aapehi diya na ya aapne maanga tab diya? aapko to maangana bhi nahin aata tha। bhakti mein kya maangate the? ek bachcha de do,ek makaan de do ya imtahaan mein paas kara do। varse ke adhikaari nahin samajhte the aur baap ne to varse mein sab kuchh de diya। kya apne paas kuchh rakha hai?bina maange diya hai। ham vishwa ke raaja ban sakte hain-ye kabhi soch sakte the?sangamayugi brahman aatma ban sakte hain, ye bhi kahaan sochte the। to jama karo kyonki baapdaada ne dekha ki mehnat bahut karte hain। lekin jama ka khaata abhi jitna hona chaahiye utna nahin hai। to jab date announce ho jaayegi phir aap kaho ki hamko to pata hi nahin tha। pata hota to kar lete the। isliye is diamond jubilee mein yaad se, seva se, shubh bhaavna, shubh kaamna se khaata jama karo। samjha kya karna hai?jama karna hai। baapdaada ke paas to sabka pahunch hi jaata hai। ek maas ki result apne aap dekho। aise nahin ki yahaan patra likhkar bhejo। nahin, ye apne aap check karo aur check karke change karo। dilshikasta nahin bano, change karo। jab baap saath hai to baap ko use karo na! use kam karte ho,sirf kehte ho baba saath hai, baba saath hai। use karo। jab sarvashaktimaan saath hai to saphalta to aapke charnon mein daudni hai।

achha,shiv jayanti va shivraatri ke sambandh se aapka combined roop kaun-sa gaaya jaata hai? (shivshakti)। ye pakka hai?ya shakti alag hai, shiv alag hai? to shivshakti ka arth hi hai ki combined hain। alag nahin। phir alag kaise karte ho?alag ho sakta hai? to phir kaise hota hai?juda hua to hai phir alag kaise hota hai?juda hua alag nahin hota hai lekin sirf maaya face aisa kar deti hai,ghuma deti hai to kinaara ho jaata hai। to main shivshakti hoon - ye smriti aaj ke shiv jayanti ki yaadgaar hai। aur paandav kya hain? aap bhi shivshakti ho ya shiv paandav ho? kya ho? shakti to ho na? achha।

bachchon ne poochha tha ki bhavishya mein kya seva honi hai? to baap ne pahle bhi kaha hai ki abhi jahaan tak jyaada mein jyaada ho sake to bani-banaai stage par aap chief guest ho,is seva ko aur badhaao। iske liye jo bhi bade-bade esosieshansa hain ya company hain, sosaaiteez hain unmein vishesh nimitta aatmaon ko parichay de sameep laao to ek-ek ki alag-alag seva karne ki bajaay ek hi samay anek aatmaon ki seva ho jaayegi। is par aur aage attention de badhaao। doosri baat, ki abhi aap aise speaker taiyaar karo, bade mike jo hain vo alag cheez hain, vo to karne hi hain, lekin aise samparka vaalon ko knowledge se sameep laao jo aapke gyaan ki baaten, aap nahin kaho lekin vo siddha karke bataayen to ye baat is kaaran se yathaartha hai। abhi shanti aur prem, yahaan tak pahunche hain aur yahi speech karte hain ki yahaan prem mila,shanti anubhav hui va brahma baap ki kamaal hai,yahaan tak aaye hain lekin brahma baap mein param aatma ki kamaal hai, abhi vahaan tak pahunchaana hai। videsh ko baapdaada mubaarak dete hain ki himmat rakh aai.peez. ko nazdeek laaya hai aur din pratidin har varsha kuchh na kuchh aage badh rahe hain। lekin abhi aise koi chaahe 10-15ho, jyaada nahin ho, lekin position vaale ho, jiska prabhaav sunne vaalon par pad sake aise chaahe bhaarat mein,chaahe videsh mein, aise gyaan ke sameep laao jo vo parmaatma gyaan ko svayan samajh kar spashta kare। mehnat hai ismen। lekin baap ki, parmaatma gyaan ki pratyakshata agar diamond jubilee ke baad bhi nahin karenge to kab karenge! abhi sevaakendra62 deshon mein hain na, lekin har ek state mein bade mike ke pahle aise chhote-bade speaker taiyaar karo। bhaarat mein bhi har state mein aisa speaker group ya ek-do taiyaar karo। baap ki pratyakshata tab hogi jab doosre siddha karen। jaise abhi tak jo seva ki hai to auron ke anubhav se aapka parichay sunkar vriddhi hoti gai hai। jab se auron ne kehna shuru kiya hai ki vahaan to svarga hai, shanti hai,pyaar hai,to ek-do ka anubhav sunkar vriddhi jaldi hui hai। to yahaan tak to seva ki hai,uski mubaarak ho lekin aage kya karna hai?aisa sameep laao। alag mein gyaan ki mehnat karo, sangathan mein nahin hoga। lekin uske liye mehnat kar samparka vaalon ko seva mein lagaao। abhi dharni taiyaar ki hai। abhi dharni mein parmaatma gyaan ya parmaatma pahchaan ka beej daalne ka lakshya rakho। chaahe time lagega,lekin ye bhi lakshya rakha to ho gaya na? saphalta mili na? nahin to pahle sochte the ki videsh se yahaan kaise aayenge? bahut mushkil hai। lekin abhi 200-250 to aa jaate hain na? to ye dharni abhi taiyaar ki hai,hal chalaaya hai,achhi mehnat ki hai। abhi aisa group taiyaar karo। kam se kam chalo sarvavyaapi ki baat hai ya bahut kadi-kadi points hain, usko nahin bhi varnan karen lekin itna to samjhen ki ye parmaatma shakti hai। brahma ki alag nahin, brahma mein bhi parmaatma shakti ne kaarya kiya hai। to baap ki pahchaan to mile na। ye parmaatma kaarya hai, koi shakti hai - yahaan tak aaye hain lekin aakhir samaapti tab hogi jab parmaatma pahchaan mile। to jo ab tak kiya hai vo bahut achha kiya hai lekin abhi aur achhe se achha karna hai। baap jaante hain ki mehnat bahut karni padti hai lekin karni to hogi na! to aisa koi programme banaao,jo aise yogya samjho unka chhota-chhota group banaakar unhein sameep laao। chaahe ek-ek hokar karo, chaahe chhote group mein karo। jaisa vyakti vaisi seva karo। samjha kya karna hai?

achha।

chaaron or ke jayanti ki mubaarak dene vaale bachchon ko,sada baap ke saath-saath rahne vaale combined roopdhaari bachchon ko, sada umang-utsaah ke dvaara svayan ko aur auron ko aage badhaane vaale bachchon ko, chaaron or ke seva mein aage badhne vaale sachche sevaadhaari bachchon ko baapdaada ki padma-padma-padma guna mubaarak ho। yaad-pyaar ke saath baap bhi bachchon ki mubaarak, yaad-pyaar sveekaar kar rahe hain। dekh rahe hain ki sabhi taraph mubaarak-mubaarak ke dil ke geet baj rahe hain। to aise mubaarak lene aur mubaarak dene ke donon ke sangam ki vishesh yaad-pyaar aur namaste।

achha ek baat aaj bachchi ne khushkhabri sunaai ki is group mein aise bachche hain jo poora ek varsha krodh mukta rahe hain। to jab ceremony hogi tabhi aise krodhmukta bachchon ka sabhi mukhda bhi dekhna aur baap bhi dekhenge। vo stage par aayenge। jinhonne haath nahin uthaaya ho aur bane ho vo bhi aa sakte hain। lekin ek varsha krodh mukta bane hue ho। kya soch rahe ho? ham bhi hote to achha hota।

daadiyon se

aapke tyaag aur tapasya ka phal pratyaksha phal dikha raha hai। ye 14 varsha ki tapasya practical mein result ke roop mein dekh rahe ho। sabhi chaahe desh mein,chaahe videsh mein, is varsha ke aadi se umang-utsaah mein bahut aaye। kyon? visheshta kya hai? kyon umang-utsaah mein itne aaye? (diamond jubilee hai) diamond jubilee ki khushi bhi hai lekin saath-saath seva ki saphalta abhi pratyaksha roop mein dikhaai de rahi hai। is kaaran phal ko dekh karke, ek hota hai svaartha ka phal jo alpakaal ka hota hai aur doosra hai nisvaartha seva ka phal,to abhi jo mil raha hai vo nisvaartha seva jo itna samay ki hai uska phal sahaj praapta ho raha hai aur is diamond jubilee ke nashe mein, khushi mein aur bhi seva aage badh sakti hai। aap umang-utsaah se badhaate jaayenge to seva badh jaayegi। aap nimitta bani hui aatmaayen lakshya rakho to aapke lakshya ki kirnen sabhi ko milegi। hona hi hai,karna hi hai,aap logon ko to hai lekin auron ko bhi himmat aur umang dilaane mein lakshya aur dridh rakho। brahma baap aur shiv baap ki pahchaan bachchon ko milni to hai na? samjha? (saamne baithi hui teachers se) aap log sun rahe ho na? to aap bhujaaon ke bina kuchh nahin hota hai। ye hain plan karne vaale, sankalp dene vaale lekin sankalp ko saakaar karne vaale kaun? bolo na ham hain। kyon, bhuja samajh kar karenge to main-pan body conscious ka aayega hi nahin। videsh ke bhi aadi ratna baithe hain। lahar abhi achhi hai। lahar auron ko abhi dene ki aavashyakta nahin hai। lahar aa gai hai। abhi sirf unhon ko aur umang-utsaah dilaate chalo। nimitta aatmaayen achhi ho aur baapdaada ke sameep ho। sameep ho ya foreign mein ho?sameep hain na?baapdaada bhi khush hote hain vaah mere right hand। right hand hain na?right hand se hi kaam hota hai। to har sthaan par baap ke right hand hain। lekin jo aadi ratna nimitta ho unhon ko aur aage badhte badhaana hai। ek hi kaam hai bas। kahaan bhi dekho seva mein thodi si thakaavat feel karte hain ya mehnat feel karte hain to unhon ko koi na koi sahayog dekar umang-utsaah badhaao। ye aap logon ka kaam hai। samjha? jo teachers hain usmein bhi aap log vishesh nimitta ho। samajhte ho apne ko nimitta?bolo, jayanti bolo। thak to nahin gai na?achha hai sabhi teachers mein bhi abhi majority mein himmat aa gai hai। abhi nirvighna banne ki vidhi bhi samajh gaye hain। pahle ghabraate bahut the na, abhi ghabraate kam hain,himmat aai hai। kyonki ek taraph baap ka pyaar aur doosre taraph seva ka bal to donon ne abhi himmat badhaai hai।

achha-teachers haath uthaao। bas baapdaada sabhi ko yeh kehte hain ki sada khush raho, seva mein aabaad raho।

bachchon se milan manaane ke pashchaat baapdaada ne apne haston se jhanda phahraaya।

jab yeh jhanda lahraaya to bachchon ko kitni khushi ho rahi hai। aur jab vishwa mein sabhi ke aage jhanda lahrega to kitni khushiyaan hongi! kitni taaliyaan bajengi। jhanda sada ooncha rakhte hain kyon? oonche ka arth hai ki sabki nazar us taraph jaaye to jab pratyakshata ka jhanda lahrega to sabki nazar usi ek baap ke taraph hogi। aapke dilon mein to baap ka jhanda yaad ka hai hi lekin abhi doosron ke dilon mein ye pratyakshata ka jhanda lahraana hai। ye to kapde ka jhanda lahraaya lekin pratyakshata ka jhanda sabhi ko milkar lahraana hai aur laharna hi hai।

jaambiya ke bhootpoorva raashtrapti kaineth kaunda tatha unke saathiyon se avyakt baapdaada ki mulaakaat

bahut achhe time par yahaan pahunch gaye। seva ka chance bahut achha le sakte ho। abhi apne ko sirf jaambiya ke sevaadhaari samajhte ho va apne ko godly messenger samajhte ho?jaambiya mein godly messenger bhi bankar godly message denge na? dekho seva ke sanskaar to pahle se hain hi, abhi sirf seva mein spreechualiti add karni hai। aur aap jaante bhi ho ki aaj vishwa mein spreechualiti ke bina parivartan hona mushkil hai। to aap jaise aur raajneeti seva ke group banaate hain, bane hue hain,aise abhi aadhyaatmik moolya ka group banaao। jaise abhi raajneetik kaarya mein bhi aapke saathi hain,group hai,to aisa group banaao jo moral value ko aage badhaaye। aise ek-ek desh mein,chaahe chhote,chaahe bade koi na koi nimitta ban jaayenge to ye vibration phailta jaayega। kyonki aapmen pahle se hi do visheshtaayen hain aur un visheshtaaon se aap aur jaldi aage badh sakte ho। ek to shuru se dridh nishchay vaale ho, karna hi hai aur doosra seva ke liye agar kuchh sahan bhi karna padta to sahanshakti bhi hai। to jahaan dridhta aur sahanshakti hai vahaan jo chaahe vo kar sakte hain। achha hai।

morishiyas ke bhootpoorva shiksha evan vigyaan mantri bhraata parshuraam ji se:-

ye bhi lucky hai kyonki manan karte rehte ho। plan sochte rehte ho-aise nahin aise hai,aise nahin aise। to jo manan shakti vaale hote hain usko baap ki bhi madad milti hai। jo mushkil kaam hota hai na vo sahaj ho jaata hai। to abhi tak jo kiya hai vo bahut achha kiya hai aur aage bhi karna hi hai। sochenge, karenge… nahin। karna hi hai। jo ye sochte hain na - dekhenge, karenge to jo vighna aate hain usmein peechhe hat jaate hain। aur jo dridh sankalp rakhte hain ki karna hi hai vo paas ho jaate hain। chaahe kitni bhi oonchi deevaar aa jaae lekin paar ho jaate hain। deevaar chhoti ho jaati hai aur svayan shaktishaali bade ho jaate ho। isliye himmat aur baap ka saath ye nahin chhodna।

(retreat mein aaye hue anya guest ko dekhkar)itne sabhi milkar jo chaahe so kar sakte hain। apne shaktiyon ko aage kaarya mein lagaate jaao to badhti jaayengi। kyonki abhi spiritual power ka bhi pata pad gaya। abhi spiritual power ka anubhav ho gaya na? achha hai, group achha hai। ye aur group ko bhi laayenge। jiski bhaavna spreechualiti ke taraph hoti hai usko bhaavna ka phal avashya milta hai। abhi godly message dene mein bhi sahayogi banna hi hai। vidaai ke samay baapdaada ne videsh sevaaon ke silver jubilee ki mubaarak di tatha poore varsha jo krodh mukta rahe hain unhein stage par bulaaya:-

sabhi ne achhi tarah se manaaya?apne ko banaaya? manaana arthaat banna। to manaaya bhi aur apne ko banaaya bhi। aaj vishesh videsh ke seva sthaapan hone ki silver jubilee hai। to sabhi silver jubilee vaalon ko khaas london aur haangakaang aur nairobi, lusaaka…jahaan bhi seva ki aur jinhonne bhi seva ki un sabko bahut-bahut mubaarak! mubaarak!! mubaarak!!! to silver jubilee bhi mana lena। khaas double videshiyon ki silver jubilee hai। aap logon ki hai silver jubilee? (21varsha hue) to bhi mubaarak ho jo 21 varsha chale hain। haath uthaao jo 21 varsha ke hain।

krodh mukta rahne vaalon se

achha himmat ka kaam kiya hai lekin isko chhodna nahin। sada rahenge na?ki thoda dheela ho jaayega? dheela nahin hona hai aur mazboot hona hai।