Avyakt murli for Wednesday 31 December 1997

>

31-12-97 om shanti avyakt baapdaadaamdhuban

is naye varsha ko mukti varsha manaao, saphal karo – saphalta lo

aaj baapdaada apne nav jeevan ki shreshtha aatmaon ko,nav yug rachta aatmaon ko naye varsha ki mubaarak de rahe hain। duniya ke liye naya varsha aarambha ho raha hai, aap bachchon ke man mein nav yug yaad aa raha hai। jaise naya varsha kal aane vaala hai, aise nav yug bhi kal aane vaala hai। aise smriti aati hai ki hamaara naya yug aaya ki aaya? jaise aaj naye varsha ke liye manushya aatmaon ke dil mein khushi hai, alpakaal ka utsaah hai,aise aap aatmaon ko nav yug aane ki sadaakaal ki khushi hai। aise lagta hai ki bas aaj aur kal ki baat hai। aaj puraana yug hai,kal naya yug saamne khada hai। draamaanusaar aaj aur kal ki baat hai, aise spashta smriti anubhav hoti hai? ya sirf naya varsha manaane aaye ho? naya varsha nav yug ki yaad dilaata hai। yeh umang-utsaah dil mein rehta hai ki kal ham kya honge? apni nai shareer roopi dress saamne aati hai? yaad hai aapka naya shareer naye yug mein kaisa sundar tha? kaisa yug tha,kaise raajya tha, kaise prakriti daasi thi, satopradhaan thi! us raajya adhikaari sthiti ki smriti spashta hai? dikhaai de rahi hai, woh nai duniya kitni sundar hai? ek second mein apne raajya adhikaar ka anubhav kar sakte ho ya kar rahe ho? bas ek second mein nav yug mein chale jaao। jaana aata hai?kitne vaar yeh raajya adhikaar praapta kiya hai, yaad hai?anubhav karo apna raajya kitna pyaara hai! nyaara bhi hai to pyaara bhi hai। to second mein bas hamaara raajya aur hamaara vishwa raajya adhikaari swaroop smriti mein aa jaae। ve log naye varsha mein ek do ko alpakaal ki gift dete hain aur baap gift dete hain nav yug ke,vishwa raajya ke adhikaar ki। yeh avinaashi gift is samay baap dvaara aap sabke liye atal bhaavi ban jaati hai। jis bhaavi ko koi taal nahin sakta। achal hai, akhanda hai। to aisi gift mil gai hai na? to yeh gift sambhaal kar rakhna, koi daaku yeh gift le nahin jaaye। sabke paas double lock hai na? aajkal single lock nahin chalta, double lock chaahiye। gaadrej ka lock nahin, god ka lock chaahiye। to god ne aisa lock diya hai jo koi bhi tod nahin sakta।agar albele ho jaayenge to daaku aayega। daaku bhi hoshiyaar hote hain, unhon ko pata pad jaata hai ki inka lock aaj dheela hai, isliye albele nahin hona।

to is naye varsha mein sva ke prati aur seva ke prati koi naya plan banaaya hai?conference karni hai, dialogue karna hai, woh to hai hi। naya plan kya banaaya hai? baapdaada is naye varsha mein, desh va videsh mein variety varga ki vishesh aatmaon ka ek guldasta dekhne chaahte hain। vargon ki seva to bahut ki hai na,abhi har varga ka aisa ek-ek ratna taiyaar karo, ek bhi varga miss nahin ho, kyon?abhi jab samay sameep aa raha hai to koi bhi varga vaale ulhana nahin den ki hamaara varga rah gaya। ek-ek varga mein vishesh ek-ek quality ka ho jo mike ka kaam kar sake,kyonki jaise samay sameep aa raha hai to sarva varga vaale,sarva dharma vaale sabke mukh se ek aavaaz nikle ki baap aa gaya, kyonki is sangamayug mein hi sabhi dharma sthaapak aatmaon va sarva varga ki aatmaon mein beej padna hai। woh itni power apne mein le jaayenge jo phir apne- apne samay par varga va dharma ke inventor banenge। to sab beej aapko taiyaar karne hain,jo samay par apne-apne department ke nimitta banenge kyonki beej baap hai aur aap brahman aatmaayen tana ho, sarva aatmaayen beej aur tana dvaara hi nikalte hain। to aisa guldasta baap ke saamne laao,videsh vaale bhi aur desh vaale bhi। ek-ek sample laao,sample se anya anekon svatah hi bante hain। lekin ek-ek powerful mike banen, aise beej kaho,dharma ya varga kaho va variety phoolon ka guldasta kaho taiyaar hona chaahiye। ek bhi miss nahin ho tab kaha jaayega vishwa kalyaankaari va sarva aatmaon ke nimitta uddhaar karne vaali aatmaayen। ek shaakha bhi kam nahin, sarva shaakhaayen chaahiye। chaahe aapke nav yug mein kai varga nahin honge lekin un aatmaon mein bhi dvaapar mein ya kaliyug mein jo inventor nimitta hain,unhon ko shakti aap dvaara hi milni hai। jaise sabhi dharma pitaayen aapke aage baap ka jhanda, pratyakshata ka jhanda lahraane mein sahayogi banenge,vaise hi sarva varga vaale bhi pratyakshata ka jhanda lahraane mein sahayogi banenge, tab kahenge sarva ke sahayog se sukhmay duniya ki sthaapna। sahayogi ban rahe hain lekin unmein se ab vishesh aatma ko sahayog mein aage badhaao, nimitta banaao। nimitta banaane ka beej daalo। samjha kya karna hai?videsh mein bhi abhi aai.pi. ya vi.aai.pi. ke connection to sahaj ho gaye hain na। mushkil nahin hai na? mushkil hai ya sahaj hai?to aap sabhi jab doosre new year mein phir aayenge to agle new year ki saugaat baapdaada aisa guldasta dekhne chaahte hain। ek saal hai, kam nahin hai। desh vaale bhi karenge, videsh vaale bhi karenge ? (haan ji) avashya karenge। kaho hua hi pada hai। sirf nimitta banna hai। double videshi bolo?sab videshi taali bajaao। achha-dekhenge pahle kaun taiyaar karta hai - desh ya videsh?aur kitna bada guldasta taiyaar karte hain? theek hai na? chaaron or sun rahe hain। desh vaale bhi sun rahe hain, videsh vaale bhi sun rahe hain। abhi umang aa raha hai, unhon ke man mein plan ban raha hai - yeh karenge,yeh karenge। achha – yeh to hua vishwa seva।

sva ke liye kya karenge? woh bhi to plan banenga na? kyonki agar sva kalyaan ka shreshtha plan nahin banaayenge to vishwa seva mein sakaash nahin mil sakegi। isliye baapdaada sabke dilon ke umang-utsaah ko jaante hue yahi kahenge ki har ek utsav mein bachchon ne chaahe golden jubilee vaale,chaahe diamond jubilee vaale,chaahe silver jubilee vaale,chaahe aur bhi jo jubliyaan honi hain, sabhi ne dil se, umang-utsaah se apne man mein yeh baap se vaayda kiya hai ki ham baap samaan bankar hi dikhaayenge। sabhi ne yeh vaayda kiya hai na? double foreigners ne vaayda kiya hai? (sabhi ne haath hilaaya) achha, mubaarak ho। vaayda to bahut meetha, bahut achha,bahut pyaara, bahut shaktishaali kiya hai। abhi sirf nibhaate rehna। vaayda karne vaale us samay bahut umang-utsaah se karte hain,himmat bhi bahut achhi rakhte hain phir kya hota? kabhi maaya choohe ke roop mein aa jaati,kabhi billi ke roop mein aa jaati, billi kya karti hai?myaaoon-myaaoon karti hai na। to bachche kya karte hain? main main main, to yeh billi ki myaaoon-myaaoon nahin karna। chooha kya karta hai? chooha besmajh hokar jo aata hai woh kha leta hai, kaat leta hai। to maaya bhi bachchon ke khazaanon ko kaatkar kha leti hai। kabhi sher aa jaata hai,sher kya karta hai? nirbhay vaalon ko bhay paida kar deta hai। sarvashaktivaan bachchon ko dilshikasta bana deta hai। aise nahin karna,aane nahin dena, double lock lagaakar hi rakhna। is varsha kisi ko bhi aane nahin dena।

yeh varsha sarva baaton se mukta varsha manaao। mukti varsha। jab yeh mukti varsha manaayenge tab muktidhaam mein jaayenge। iske liye kya karenge? bahut chhoti si baat hai,badi baat nahin hai। baapdaada sirf chhota sa slogan de rahe hain ''saphal karo saphalta lo ''। samjha! saphal karo, saphalta lo। kya saphal karna hai? jo bhi aapke paas hai, apni jo property hai na - samay, sankalp,shvaans va tan-man- dhan saphal karo, vyartha na ganvaao, na aaivel ke liye sambhaal kar rakho। sankalp ko bhi saphal karo। ek-ek sankalp - yeh aapki property hai। jaise dhan sthool property hai, vaise sookshm property hai samay, shvaans,sankalp। ek sankalp bhi vyartha nahin jaaye,saphal ho। chaahe mansa seva dvaara,chaahe vaacha dvaara, chaahe karma dvaara - check karo, saphal kitna kiya?jama kitna kiya? aur baapdaada is varsha yeh vishesh vardaan de rahe hain - saphal karo aur padamguna saphalta ka anubhav karo। yeh pratyaksha phal sahaj praapta kar sakte ho,sirf sachchi dil se। sachchi dil par bholaanaath baap bahut sahaj raazi ho jaata hai,isliye saphal karo। gyaan dhan,shaktiyon ka dhan, gunon ka dhan har samay saphal karo। saphal karna aata hai va kinaare karna va sambhaalne bahut aata hai?kinaare nahin karo, lagaao। jab kehte ho ki achaanak sab hona hai, ever ready banna hai। to jo bhi hai usko saphal karo। baapdaada ko nahin chaahiye,apne liye jama karo। baapdaada to daata hai lekin saphal karna arthaat jama karna kyonki baapdaada ne samay pramaan jama ka khaata dekha, har ek bachche ke jama ka khaata baapdaada ke paas hai। to jama ke khaate mein kya dekha? kai bachche samajhte va kehte bahut hain ki hamaara yeh bhi jama hai, yeh bhi jama hai, baahar se jama ka khaata bahut varnan karte hain lekin baap ke jama ke khaate mein jo jitna kehte hain,samajhte hain usse bahut kam jama hai। kyon?vahi pahla paath ''main aur mera-pan’’। mainne kiya, meri yeh seva hai,mera yeh kaarya hai। to jama karte samay,woh samajhte hain ki jama kar rahe hain lekin woh automatic jama ke khaate se nikal, vyartha ke khaate mein jama ho jaata hai। yeh automatic sookshm machinery hai। baba ne karaaya, baba ki seva hai,meri seva nahin hai। mainne kiya,nahin। varnan nahin karo, mainne yeh kiya, main yeh karti hoon,main yeh karta hoon…yeh main-main nahin। baba, baba bolo to padamguna jama hoga। aur main mera bolenge to transfer hokar vyartha ke khaate mein jama ho jaayega। yeh automatic machinery bahut fast hai, aap logon ko pata bhi nahin padta hai। iski checking bhi bahut sachche dil se, main-pan se nyaare hokar karne vaale kar sakte hain। jab aap aadi ratna aadi mein sthaapna mein nikle, seva mein nikle to kya bhaav rehta tha?kya bol nikalta tha? main-pan tha?baba-baba kaha tabhi vaaris baba ke bane,jo aaj seva ke aadi banen,yeh baba-baba kahne ka saboot hai।

abhi baapdaada ke paas vaaris quality bahut kam aati hain, kyon?baba aur main-pan mix hai। isliye is varsha mein baapdaada khuli dil se vardaan de rahe hain - jitna jama karne chaaho utna kar lo,kar lo, kar lo। saphal karo saphalta moorta bano। achha।

abhi kaun sa utsav manaaya? silver jubilee। silver jubilee vaale haath uthaao। jinhon ki ceremony manaai woh haath uthaao। double ceremony manaai hai। bhaarat ki bhi to videsh ki bhi। achha hai yeh ceremony manaana arthaat apne aapko pakki pratigya ki stamp lagaana। ceremony manaai, baapdaada ko bhi drishya achha lagta hai। saath-saath jo sankalp karte ho, usko aisi almighty government ki stamp lagaao jo sada avinaashi, atal rahe। manaana arthaat vaayda nibhaana। to aisi pakki stamp lagaai?ya kachchi stamp lagaai hai? pakki lagaai? yeh silver jubilee vaale kumaar,haath to achha hila rahe hain, pakki manaai hai? achha hai। yeh drishya bhool nahin jaana। kabhi bhi kuchh bhi kamjori aaye to apne utsav ka photo saamne laana। har ek ka photo nikaalte hain na। sabko milta hai? to aise photo nahin nikalta hai, matlab se nikalta hai। photo iseelie nikalta hai ki jab aisa koi samay aave to photo saamne rakhna,aise nahin almaari mein banda rakh do jo samay par bhi yaad nahin aave। yeh sabse badi saugaat hai,yeh smriti dilaane ki nishaani hai।

to yeh jo sindhi group aaya hai woh haath uthaao। achha - aapne utsav manaaya?photo nikla?abhi kya karenge? sambhaalkar rakhenge na? is group ka head kaun hai? (naari bhaai aur govinda bhaai) head to powerful hai। abhi is group ko bahut-bahut-bahut pakka rakhna,sambhaalna। utsav manaaya hai sada utsaah mein rahne ke liye। yeh gyaan,yog ka utsaah kam nahin ho। sada badhta rahe। shaktiyon mein jimmevaar kaun hai? (trimoorti hai) sabhi ki unity bahut hai। amar rehna। amar bhav। achhe hain। dekho, baapdaada sindhi group ko kyon aage rakhta? vaise to sabhi hain na?sabhi ek do se aage aur pyaare hain lekin khaas sindhi group ko aage kyon rakhta? is sindhi group ko charity begins at hom…, jahaan se sthaapna hui,us kul ko jagaana hai। isliye baapdaada aap sabhi ko vishesh yaad bhi karta,nimitta bhi banaaya hai to nimitta ban apne laukik kul sindhiyon ko jagaao,rah nahin jaaven। phir bhi brahma baap ka sthaapna ka kaarya sindha mein hua hai। to jahaan sthaapna hui woh aatmaayen vanchit nahin rah jaayen। baapdaada ko bhi un aatmaon par taras padta hai। brahma ka to charity begins at hom hai na। isliye brahma baap ne aap bachchon ko nimitta banaaya hai। samjha jimmevaari,hai ya nahin?yeh hoshiyaar hai।

dekho jab sthaapna hui to pahla parivaar brahma baap ka aur saath mein aapka (naari bhaai ka) parivaar nimitta bana। pata hai na?to abhi aap kya karenge? (uttar bahut achha deta hai) baapdaada kehte hain aapke mukh mein gulaabjaamun। gulaab nahin। sirf gulaab kya karenge, gulaabjaamun khaayenge na। aise nahin ek ko kah rahe hain, sabhi ko nimitta banna hai aur doosra hai saavitri ka parivaar। aap logon ko pata hai, aapka parivaar seva mein pahle nimitta bana hai। vishesh seva ko aage badhaaya hai to abhi kya karna hai? follow laukik maa baap। to follow karna hai? abhi baapdaada dekhenge donon parivaar kya kamaal karke dikhaate hain। achha hai,nimitta bane ho, jaise maa baap nimitta banen, bade nimitta banen,aise follow karo। theek hai na। dekho special baapdaada aapse mil raha hai। to luck hai na। achha।

abhi kumaar kya karenge? (kumaar5 hajaar aaye hain) bahut achha। kumaar koi nai kamaal karke dikhaao, aisi kamaal dikhaao jo asambhav ko sambhav karke dikhaao। kumaaron ko baapdaada vishwa ki stage par example banaakar khada karne chaahte hain। aise kumaar hero part bajaayenge? pakka ya haath uthaane tak? dekho hero part bajaane vaale bedaag heera hona chaahiye। double hero। bedaag heera bhi aur hero paartadhaari bhi। aise hain?

double foreigners kya kamaal karenge? double foreigners aisi kamaal karke dikhaao jo aisi aatmaon ko sandesh do jo bhaarat ke liye mike banen, kyonki bhaarat ke mike ka bhi prabhaav hai lekin foreign ke mike ka prabhaav double padega। to double foreigners ko aise mike taiyaar karne hain। karenge?agle varsha mike aana chaahiye। aise nahin sirf bhaashan karke chale jaayen, nahin। sambandh mein sameep hon। bhale gyaan, yog mein niymit nahin banen lekin maanen ki sachmuch yeh eeshvareey kaarya hai aur jeevan banaani aisi chaahiye lekin mere mein himmat kam hai। usmein bhi koi harja nahin,auron ke nimitta mike bante-bante svayan ban hi jaayega। vaise seedha student nahin banenge lekin seva ke bal se doosron ke nimitta bante,uske prabhaav se ban jaayenge। to suna double foreigners ne? abhi dekhenge kaun sa desh nimitta banta hai। jo bhi desh nimitta bane,phir usko award denge।

double videshi vahaan bhi sun rahe hain, unhon ki bhi dil mein aa raha hai, dhoondh rahe hain kisko nimitta banaayen। achha। foreign ke youth group haath uthaao। (20deshon se 170 youth ne retreat mein bhaag liya hai) achha kiya। abhi videsh ke youth aisi seva karke apna group taiyaar karo, to phir jab mahaatmaaon ka sammelan hoga na, usmein aap sabhi youth group ko nimantran denge। to aap youth ke aage yeh mahaatmaayen jo hain woh sir jhukaaven, samjha। to aisa group taiyaar karo।

(youth group ke master, jaapaan ke li bhaai se)achha group taiyaar kiya hai। abhi aisa taiyaar karo jo bhaarat ke mahaatmaayen brahmacharya mein rehna asambhav va mushkil samajhte hain,unhon ko yeh youth apne anubhav se sunaaven ki mushkil nahin hai, sahaj hai aur ham sahaj yogi, sahaj brahmachaari bane hain। to aise pakke brahmachaari yogi aatmaayen inhon ka prabhaav, unhon par bhi padega। yeh bhi pratyakshata ka ek nimitta drishya banega। government ko bhi dikhaayenge ki yeh youth dekho, apni mansa dvaara bhi vishwa kalyaan ke nimitta hain। theek hai na? abhi pakka group chaahiye। aise nahin government aur sanyaasiyon ke aage rakhen aur kuchh samay ke baad phir fail ho jaayen। nahin। pakke hon। aisa pakka group baapdaada ko bataana jo guarantee kare ki ham achal,adol, avinaashi brahman aatmaayen hain। kuchh bhi ho jaae hile nahin। to aisa group baapdaada ke saamne laana। theek hai na? achhi himmat vaale hain। jahaan himmat hai vahaan baap ki madad hai hi hai। achha। mubaarak ho।

bhaarat ke youth bhi aise taiyaar hon। aise pakke youth taiyaar karo। aaj pakke kal kachche nahin। (sabhi ne vaayde likhkar diye hain) baapdaada likhten to bahut dekh chuke hain। (sabhi hansane lage) hansate hain। vaayde ke patra baapdaada ke paas sabhi ke bahut jama hain। to bhaarat ke youth bataao jo aaj vaayda kiya hai, woh file mein rahega ya final rahega?kya hoga?final hoga ya file mein rahega?jo pakke hain woh haath uthaao। inhon ka video nikaalo। yeh video aap logon ko bheja jaayega। final vaayda karne vaale example banenge। baaki file to baapdaada ke paas bahut-bahut hain। samjha। file mein nahin rakhna,final bankar dikhaana। achha।

achha - (dilli vaalon ne mela sambhaala hai) sabhi ko achhi seva ki lottery mili hai। to dilli vaalon ne seva ki lottery le li aur har samay ke liye seva ki noondh,noondh li। seva pasanda hai?dilli vaale jo seva mein aaye hain woh utho। aagra vaale utho। achha hai, sahayogi banna arthaat sameep aana। vishesh aatmaon ke sameep aane ka chance milta hai aur saath-saath seva ka bal samay par kaarya mein aata hai। to jama bhi karte ho aur shreshtha aatmaon ke sameep bhi aate ho। anek brahman aatmaon ke samparka mein aate, to najdeek aane ka yeh saadhan achha hai। sabhi ko chance diya hai,achha kiya। dilli vaalon ko pasanda hai na! achha।

(ratan bhaai london tatha anya do bhaaeeyon se)-eeshvareey seva ka koi bhi kaarya hota hai,uska lakshya aatmaon ko baap ke sameep sambandh mein laana hai। unhon ka kisi bhi prakaar se jama karaane ka saadhan hai। to sabhi isi lakshya se seva ke nimitta ho na?yahi lakshya hai na? to baapdaada dekhenge kitni aatmaon ka bhavishya banaane ke nimitta bane hain। group le aayenge na? achha guldasta le aana। foundation ka guldasta le aana। pasanda hai? jo kaarya hota hai usmein seva samaai hui hai। sirf nimitta banna hota hai। to achha kiya hai। abhi baapdaada ke aage guldasta le aana। theek hai na? achha umang hai। himmat vaale ko baap ki madad milti hi hai। to kaarya ki mubaarak ho aur in advance guldaste laane ki bhi mubaarak। achha।

sabhi ki mubaarak sun-sunkar sab khush ho rahe hain to aap sabhi ko kitni mubaarak mili? arab kharab se bhi jyaada mubaarak hai। achha।

sarva nav yug ke vishwa adhikaari, nav jeevan dvaara vishwa parivartak aatmaon ko,sada saphal karne se saphaltaamoorta banne vaali aatmaon ko,sada apne kiye hue vaaydon ko saakaar swaroop dene vaale achal,akhanda swaroop aatmaon ko,sada utsav mein rah auron ko bhi utsav dvaara utsaah dilaane vaale aatmaon ko,baapdaada ka naye varsha aur naye yug ke sthaapna ki mubaarak ho, mubaarak ho,mubaarak ho। saath-saath himmat rakh sarva bachche aage badhne vaale himmate bachche aur madde baap aise sarva bachchon ko baapdaada ka yaadapyaar aur namaste।

(raatri12 baje ke baad baapdaada ne sabhi bachchon ko punah naye varsha ki badhaai di)

sarva vishwa ke kone-kone mein,vishwa ke chaaron or vishesh nav jeevan mein rahne vaale sabhi ko naye varsha ke saath-saath nav yug ki bhi mubaarak ho, mubaarak ho, mubaarak ho। brahman bachchon ke liye to har din, har second naya hai। to abhi puraane varsha ki vidaai hai aur naye varsha ko badhaai ho। aise sada har second jo bhi sankalp karo,karma karo har karma, sankalp badhaai vaale ho। jo bhi samparka mein aaye woh sada badhaai ho,badhaai ho, yahi geet gaate rahen। is naye varsha mein sabhi ko jo bhi mile va jo bhi saath mein rehte hain, unhon ko sada khushi ki, dilkhush mithaai khilaate rehna aur sada khushi mein man se naachte rehna aur seva mein sabhi ko khushi ka khazaana bhar-bharkar baantate rehna। to aise naye jeevan, naye umang- utsaah ki chaaron or ke bachchon ko naye varsha ke saath-saath mubaarak ho, mubaarak ho। goodnight aur good morning।

achha। om shanti।