Avyakt murli for Saturday 23 October 1999

> 23-10-99 om shanti avyakt baapdaadaamdhuban

samay ki pukaar- daata bano

aaj sarva shreshtha bhaagya vidhaata,sarva shaktiyon ke daata baapdaada chaaron or ke sarva bachchon ko dekh harshit ho rahe hain। chaahe madhuban mein sammukh mein hain, chaahe desh videsh mein yaad mein sun rahe hain, dekh rahe hain, jahaan bhi baithe hain lekin dil se sammukh hain। un sab bachchon ko dekh baapdaada harshit ho rahe hain। aap sabhi bhi harshit ho rahe ho na! bachche bhi harshit aur baapdaada bhi harshit। aur yahi dil ka sada ka sachcha harsha saari duniya ke duhkhon ko door karne vaala hai। yeh dil ka harsha aatmaon ko baap ka anubhav karaane vaala hai kyonki baap bhi sada sarva aatmaon ke prati sevaadhaari hai aur aap sab bachche baap ke saath seva-saathi hain। saathi hain na! baap ke saathi aur vishwa ke duhkhon ko parivartan kar sada khush rahne ka saadhan dene ki seva mein sada upasthit rehte ho। sada sevaadhaari ho। seva sirf chaar ghanta, chhah ghanta karne vaale nahin ho। har second seva ki stage par part bajaane vaale parmaatma-saathi ho। yaad nirantar hai,aise hi seva bhi nirantar hai। apne ko nirantar sevaadhaari anubhav karte ho?ya 8-10ghante ke sevaadhaari hain?yeh brahman janma hi yaad aur seva ke liye hai। aur kuchh karna hai kya?yahi hai na! har shvaans, har second yaad aur seva saath-saath hai ya seva ke ghante alag hain aur yaad ke ghante alag hain? nahin hai na! achha,balance hai?agar 100percent seva hai to 100percent hi yaad hai? donon ka balance hai?antar pad jaata hai na?karma yogi ka arth hi hai - karma aur yaad,seva aur yaad - donon ka balance samaan,samaan hona chaahiye। aise nahin koi samay yaad jyaada hai aur seva kam, ya seva jyaada hai yaad kam। jaise aatma aur shareer jab tak stage par hai to saath-saath hai na। alag ho sakte hain? aise yaad aur seva saath-saath rahe। yaad arthaat baap samaan, sva ke svamaan ki bhi yaad। jab baap ki yaad rehti hai to svatah hi svamaan ki bhi yaad rehti hai। agar svamaan mein nahin rehte to yaad bhi powerful nahin rehti।

svamaan arthaat baap samaan। sampoorn svamaan hai hi baap-samaan। aur aise yaad mein rahne vaale bachche sada hi daata honge,levta nahin। devta maana dene vaala। to aaj baapdaada sabhi bachchon ke daataapan ki stage check kar rahe the ki kahaan tak daata ke bachche daata bane hain? jaise baap kabhi bhi lene ka sankalp nahin kar sakta,dene ka karta hai। agar kehte bhi hain,sab kuchh puraana de do to bhi puraane ke badle naya deta hai। lena maana baap ka dena। to vartamaan samay baapdaada ko bachchon ki ek topic bahut achhi lagi। kaun si topic?videsh ki topic hai। kaun si? (kaal aaph time।)

to baapdaada dekh rahe the ki bachchon ke liye samay ki kya pukaar hai! aap dekhte ho vishwa ke liye,seva ke liye,baapdaada seva ke saathi to hain hi। lekin baapdaada dekhte hain ki bachchon ke liye abhi samay ki kya pukaar hai?aap bhi samajhte ho na ki samay ki kya pukaar hai? apne liye socho। seva prati to bhaashan kiye, kar rahe hain na! lekin apne liye, apne se hi poochho ki hamaare liye samay ki kya pukaar hai? vartamaan samay ki kya pukaar hai? to baapdaada dekh rahe the ki abhi ke samay anusaar har samay, har bachche ko `daataapan'ki smriti aur badhaani hai। chaahe sva-unnati ke prati daata-pan ka bhaav, chaahe sarva ke prati sneh emerge roop mein dikhaai de। koi kaisa bhi ho, kya bhi ho, mujhe dena hai। to daata sada hi behad ki vritti vaala hoga,had nahin aur daata sada sampanna, bharpoor hoga। daata sada hi kshama ka master saagar hoga। is kaaran jo had ke apne sanskaar ya doosron ke sanskaar woh emerge nahin honge, merge honge। mujhe dena hai। koi de, nahin de lekin mujhe daata banna hai। kisi bhi sanskaar ke vash parvash aatma ho,us aatma ko mujhe sahayog dena hai। to kisi ka bhi had ka sanskaar aapko prabhaavit nahin karega। koi maan de, koi nahin de, woh nahin de lekin mujhe dena hai। aise daataapan abhi emerge chaahiye। man mein bhaavna to hai lekin… lekin nahin aave। mujhe karna hi hai। koi aisi chalan va bol jo aapke kaam ka nahin hai, achha nahin lagta hai,use lo hi nahin। buri cheez li jaati hai kya? man mein dhaaran karna arthaat lena। dimaag tak bhi nahin। dimaag mein bhi baat aa gai na, woh bhi nahin। jab hai hi buri cheez,achhi hai nahin to dimaag aur dil mein lo nahin yaani dhaaran nahin karo। aur hi lene ke bajaae shubh bhaavna, shubh kaamna,daata ban do। lo nahin; kyonki abhi samay ke anusaar agar dil aur dimaag khaali nahin hoga to nirantar sevaadhaari nahin ban sakenge। dil ya dimaag jab kisi bhi baaton mein busy ho gaya to seva kya karenge?phir jaise laukik mein koi 8ghanta, koi10 ghanta work karte hain,aise yahaan bhi ho jaayega। 8 ghante ke sevaadhaari, 6 ghante ke sevaadhaari। nirantar sevaadhaari nahin ban sakenge। chaahe mansa seva karo, chaahe vaani se, chaahe karma arthaat sambandh, samparka se। har second daata arthaat sevaadhaari। dimaag ko khaali rakhne se baap ki seva ke saathi ban sakenge। dil ko sada saaph rakhne se nirantar baap ki seva ke saathi ban sakte hain। aap sabka vaayda kya hai?saath rahenge,saath chalenge। vaayda hai na?ya aap aage raho ham peechhe-peechhe aayenge? nahin na? saath ka vaayda hai na?to baap seva ke bina rehta hai? yaad ke bina bhi nahin rehta। jitna baap yaad mein rehta utna aap mehnat se rehte hain। rehte hain lekin mehnat se, attention se। aur baap ke liye hai hi kya? param aatma ke liye hain hi aatmaayen। nambarvaar aatmaayen to hain hi। sivaae bachchon ki yaad ke baap rah hi nahin sakta। baap bachchon ki yaad ke bina rah sakta hai?aap rah sakte ho? kabhi-kabhi natkhat ho jaate hain।

to kya suna?samay ki pukaar hai - daata bano। aavashyakta hai bahut। saare vishwa ke aatmaon ki pukaar hai - he hamaare ishta…ishta to ho na! kisi na kisi roop mein sarva aatmaon ke liye ishta ho। to abhi sabhi aatmaon ki pukaar hai - he ishta dev-deviyaan parivartan karo। yeh pukaar sunne mein aati hai? paandavon ko yeh pukaar sunne mein aati hai? sunkar phir kya karte ho? sunne mein aati hai to salvation dete ho ya sochte ho, haan karenge? pukaar sunne mein aati hai? to samay ki pukaar sunaate ho aur aatmaon ki pukaar sirf sunte ho? to ishta dev-deviyon abhi apne daata-pan ka roop emerge karo। dena hai। koi bhi aatma vanchit nahin rah jaae। nahin to ulhanon ki maalaayen padengi। ulhanen to denge na! to ulhanon ki maala pahanne vaale ishta ho ya phoolon ki maala pahanne vaale ishta ho?kaun se ishta ho? poojya ho na! aise nahin samajhna ki ham to peechhe aane vaale hain। jo bade-bade hain vahi daata banenge, ham kahaan banenge। lekin nahin,sabko daata banna hai। jo first time madhuban mein aane vaale hain woh haath uthaao।

jo first time aaye hain woh daata ban sakte hain ya doosre teesre saal mein daata banenge?ek saal vaale daata ban sakte hain? (haan ji) bahut achhe hoshiyaar hain। baapdaada himmat ke oopar sada khush hote hain। chaahe ek maas vaala bhi hai, yeh to ek saal ya 6 maas hua hoga lekin baapdaada jaante hain ki ek saal vaale hon ya ek maas vaale hon, ek maas mein bhi apne ko brahmaakumaar ya brahmaakumaari kahlaate hain na! to brahmaakumaar aur brahmaakumaari arthaat brahma baap ke varse ke adhikaari ban gaye। brahma ko baap maana tab to kumaar-kumaari bane na? to brahmaakumaar aur brahmaakumaari,baap brahma, shiv baap ke varse ke adhikaari bane na! ya ek maas vaalon ko varsa nahin milega? ek maas vaalon ko varsa milta hai? jab varsa mil gaya to dene ke liye daata to honge na! jo cheez milti hai woh dena to shuru karna hi chaahiye na।

agar baap samajhkar connection joda to ek din mein bhi varsa le sakta hai। aise nahin ki haan achha hai,koi shakti hai, samajh mein to aata hai…yeh nahin। varse ke adhikaari bachche hote hain। samajhne vaale, dekhne vaale nahin। agar ek din mein bhi dil se baap maana to varse ka adhikaari ban sakta hai। aap log to sabhi adhikaari hain na? aap log to brahmaakumaar-kumaariyaan hain na ya ban rahe hain? ban gaye hain ya banne aaye hain?koi aapko badal nahin sakta?brahmaakumaar-kumaari ke bajaae sirf kumaar-kumaari ban jaao, nahin ho sakta? brahmaakumaar aur kumaari banne mein phaayde kitne hain? ek janma ke bhi phaayde nahin, anek janmon ke phaayde। purooshaartha aadha janma, chauthaai janma ka aur praalabdha hai anek janmon ki। phaayda hi phaayda hai na!

baapdaada samay ke anusaar vartamaan samay vishesh ek baat attention mein dilaate hain kyonki baapdaada bachchon ki result to dekhte rehte hain na! to result mein dekha gaya,himmat bahut achhi hai। lakshya bhi bahut achha hai। lakshya anusaar abhi tak lakshya aur lakshan usmein antar hai। lakshya sabka number one hai,koi se bhi baapdaada poochhenge aapka lakshya 21janma ka raajya bhaagya lena hai,sooryavanshi banne ka hai va chandravanshi?to sab kismen haath uthaayenge? sooryavanshi mein na! koi hai jo chandravanshi banna chaahta hai?koi raam banne vaala hai?koi nahin। ek to ban jaao। koi to raam banna hi hai na। (ek ne haath uthaaya) achha hai, nahin to raam ki seat khaali rah jaayegi। to lakshya sabhi ka bahut achha hai,lakshya aur lakshan ki samaanta - us par attention dena zaroori hai। uska kaaran kya hai? jo aaj sunaaya kabhi kabhi levta ban jaate hain। yeh ho,yeh kare, yeh madad de, yeh badle to main badloon। yeh baat theek ho to main theek hoon। yeh levta banna hai। daataapan nahin hai। koi de ya na de, baap ne to sab kuchh de diya hai। kya baap ne kisko thoda diya hai kisko jyaada diya hai? ek hi course hai na! chaahe 60 saal vaale ho, chaahe ek maas vaale ho,course to ek hi hai ya 60saal vaale ka course alag hai ek maas vaalon ka alag hai? unhon ne bhi vahi course kiya aur abhi bhi vahi course hai। vahi gyaan hai, vahi pyaar hai, vahi sarva shaktiyaan hain। sab ek jaisa hai। usko16 shaktiyaan,usko 8shaktiyaan nahin hai। sabko ek jaisa varsa hai। to jab baap ne sabhi ko bharpoor kar diya to phir bharpoor aatma daata banti hai, lene vaali nahin। mujhe dena hai। koi de na de,lene ke ichchhuk nahin, dene ke ichchhuk। aur jitna denge,daata banenge utna khazaana badhta jaayega। maanon kisko aapne svamaan diya, to doosre ko dena arthaat apna svamaan badhaana। dena nahin hota hai lekin dena arthaat lena। lo nahin,do to lena ho hi jaayega। to samjha - samay ki pukaar kya hai? daata bano। ek akshar yaad rakhna। koi bhi baat ho jaae ``daata'' shabd sada yaad rakhna। ichchha-maatram-avidya। na sookshm lene ki ichchha, na sthool lene ki ichchha। daata ka arth hi hai ichchha-maatram- avidya। sampanna। koi apraapti anubhav nahin hogi jisko lene ki ichchha ho। sarva praapti sampanna। to lakshya kya hai? sampanna banne ka hai na?ya jitna mile utna achha? sampanna banna hi sampoorn banna hai। aaj videshiyon ko khaas chance mila hai। achha hai। pahla chance videshiyon ne liya hai, laadle ho gaye na। sabhi ko mana kiya hai aur videshiyon ko nimantran diya hai। baapdaada ko bhi yaad to sabhi bachche hain phir bhi double videshiyon ko dekh, unhon ki himmat dekh bahut khushi hoti hai। abhi vartamaan samay itni halchal mein nahin aate hain। abhi pharka aa gaya hai। shuru-shuru ke question jo hote the na - Indian culture hai, foreign culture hai… abhi samajh mein aa gaya। abhi brahman culture mein aa gaye। na Indian culture, na foreign culture, brahman culture mein aa gaye। Indian culture thoda khitkhit karta hai lekin brahman culture sahaj hai na! brahman culture hai hi svamaan mein raho aur sva-raajya adhikaari bano। yahi brahman culture hai। yeh to pasanda hai na?abhi question to nahin hai na,Indian culture kaise aaye, mushkil hai? sahaj ho gaya na? dekhna phir vahaan jaakar kaho thoda yeh mushkil hai! vahaan jaakar aise nahin likhna। sahaj kah to diya lekin yeh thoda mushkil hai! sahaj hai ya thoda-thoda mushkil hai?zara bhi mushkil nahin hai। bahut sahaj hai। abhi saare khel poore ho gaye hain isliye hansi aati hai। abhi pakke ho gaye hain। bachpan ke khel abhi samaapta ho gaye hain। abhi anubhvi ban gaye hain aur baapdaada dekhte hain ki jitne puraane pakke hote jaate hain na to jo naye-naye aate hain woh bhi pakke ho jaate hain। achha hai,ek-do ko achha aage badhaate rehte hain। mehnat achhi karte hain। abhi daadiyon ke paas kisse to nahin le jaate hain na। kisse-kahaaniyaan daadiyon ke paas le jaate hain? kam ho gaye hain! pharka hai na? (daadi jaanki se) to aap abhi beemaar nahin hona? kisse-kahaaniyon mein beemaar hote, woh to khatma ho gaye। achhe hain, sabmen achhe te achha vishesh gun hai - dil ki saphaai achhi hai। andar nahin rakhte, baahar nikaal lenge। jo baat hogi sachchi bol denge। aisa nahin, vaisa। aisa vaisa nahin karte, jo baat hai woh bol dete, yeh visheshta achhi hai। iseelie baap kehte hain sachchi aur saaph dil par baap raazi hota hai। haan to haan, na to na। aise nahin - dekhenge…! mazboori se nahin chalte। chalte hain to poora,na to na। achha।

baapdaada ne foreign ya India, desh-videsh donon ki meeting dekhi। bahut meeting ki hai na! baapdaada khush hote hain ki samay nikaal kar sabhi ne jo plan banaaye, mehnat achhi ki hai,aur sangathan bhi achha kiya hai। sangathan se jo bhi kaarya hota hai woh sahaj saphal hota hai। to double foreigners ne meeting mein sangathan ki shakti ka bahut achha pratyaksha swaroop dikhaaya। jo bhi plans banaaye hain, sabke himmat aur mehnat par baapdaada khush hai। aar.si.O. group,jo vishesh seva ke liye aaye hain, to sabhi jo bhi aar.si.O. vaale hain, (paanchon khandon ki seva ke nimitta mukhya bhaai-bahnen) sabhi ko baapdaada mubaarak dete hain। achhe-achhe plan banaaye hain। jahaan jaise chal sakta hai, jitna chal sakta hai utna chalaao, bade shahar aur chhote shahar mein pharka to hota hi hai। to jitni bhi himmat ho, utna jo samay diya hai mehnat ki hai, un sabko practical mein laana। sirf ek baat yaad rakhna ki seva aur sva-unnati ke balance mein antar nahin aave। plan practical karne ke baad yeh nahin kehna ki service mein busy ho gaye na isliye sva-unnati mein antar aa gaya - yeh nahin kehna। donon ka balance sada rakhna। kyon?doosron ki seva karo aur sva ki seva nahin to yeh achha nahin। donon ka balance rakhna hi saphalta hai। samjha। achha।

jo aar.si.O. ke aaye hain woh haath uthaao। intarneshnal service group bhi haath uthaao। achha। mubaarak ho। samay nikaalkar bhatthi mein bhi baithe,yeh achha hai। madhuban mein chance bhi achha hai। sab mil bhi jaate hain ek-do ko। sab taraph ka samaachaar bhi sabhi ko mil jaata hai। to baapdaada mubaarak de rahe hain। bahut achha kiya। achha, aur sabhi jo bhi jahaan se aaye hain, un sabhi ko bhi baapdaada sneh bhari mubaarak de rahe hain। aur samaachaar bhi mila ki sabhi ne, patra yaad-pyaar bahut bheje hain। to baapdaada to patra pahunchne ke pahle hi yaadapyaar de rahe hain। jab aap bachche likhte hain na,sankalp karte hain to jaise yahaan science ke saadhan hain na, usmein jaldi se pahunch jaata hai,patra peechhe pahunchta hai,sabse fast ee-mel pahunchta hai। to ee-mel dena shuru karte ho na,usse pahle baap ke paas pahunch jaata hai। yeh sab saadhan aap bachchon ki seva ke sahayog ke liye nikle hain। brahma baap jab samaachaar sunte hain - yeh ee-mel hai, ye yeh hai, to khush hote hain ki vaah bachche,vaah! itna sahaj saadhan brahma baap ko bhi saakaar mein nahin mila lekin bachchon ke paas hain। khush hote hain। sirf seva ka saadhan samajhkar use karna। seva ke liye saadhan hai kyonki vishwa-kalyaan karna hai to yeh bhi saadhan sahayog dete hain। saadhnon ke vash nahin hona। lekin saadhan ko seva mein use karna। yeh beech ka samay hai jismen saadhan mile hain। aadi mein bhi koi itne saadhan nahin the aur ant mein bhi nahin rahenge। yeh abhi ke liye hain। seva badhaane ke liye hain। lekin yeh saadhan hain, saadhna karne vaale aap ho। saadhan ke peechhe saadhna kam nahin ho। baaki baapdaada khush hote hain। bachchon ki scene bhi dekhte hain। phataaphat kaam kar rahe hain। baapdaada aapke office ka bhi chakkar lagaate hain। kaise kaam kar rahe hain। bahut busy rehte hain na! achhi tarah se office chalti hai na! jaise ek second mein saadhan use karte ho aise hi beech-beech mein kuchh samay saadhna ke liye bhi nikaalo। second bhi nikaalo। abhi saadhan par haath hai aur abhi abhi ek second saadhna, beech-beech mein abhyaas karo। jaise saadhnon mein jitni practice karte ho to automatic chalta rehta hai na। aise ek second mein saadhna ka bhi abhyaas ho। aise nahin time nahin mila, saara din bahut busy rahe। baapdaada yeh baat nahin maante hain। kya ek ghanta saadhan ko apnaaya,uske beech mein kya 5-6second nahin nikaal sakte?aisa koi busy hai jo 5minute bhi nahin nikaal sake, 5 second bhi nahin nikaal sake। aisa koi hai? nikaal sakte hain to nikaalo।

baapdaada jab sunte hain aaj bahut busy hain, bahut busy kah karke shakla bhi busy kar dete hain। baapdaada maante nahin hain। jo chaahe woh kar sakte ho। attention kam hai। jaise woh attention rakhte ho na - 10 minute mein yeh letar poora karna hai, iseelie busy hote ho na - time ke kaaran। aise hi socho10 minute mein yeh kaam karna hai, woh bhi to time-table banaate ho na। ismen ek do minute pahle se hi add kar do। 8 minute lagna hai, 6 minute nahin, 8minute lagna hai to 2 minute saadhna mein lagaao। yeh ho sakta hai?

(America ki gaayatri se poochhte hain)to abhi kabhi nahin kehna,bahut busy,bahut busy। baapdaada us samay chehra bhi dekhte hain,photo nikaalne vaala hota hai। kitna bhi busy ho, lekin pahle se hi saadhan ke saath saadhna ka samay add karo। hota kya hai - seva to bahut achhi karte ho, samay bhi lagaate ho,uski to mubaarak hai। lekin sva-unnati ya saadhna beech-beech mein na karne se thakaavat ka prabhaav padta hai। buddhi bhi thakti hai, haath paanv bhi thakta hai aur beech-beech mein agar saadhna ka samay nikaalo to jo thakaavat hai na, woh door ho jaae। khushi hoti hai na। khushi mein kabhi thakaavat nahin hoti hai। kaam mein lag jaate ho, baapdaada to kehte hain ki kaaphi samay action-conscious rehte ho। aise hota hai na?action-conscious ki marks to milti hain, vesta to nahin jaata hai lekin soul-conscious ki mark aur action conscious ki mark mein antar to hoga na। pharka hota hai na? to abhi balance rakho। link ko todo nahin, jodte raho kyonki majority double videshi kaam karne mein bhi double busy rehte hain। baapdaada jaante hain ki mehnat bahut karte hain lekin balance rakho। jitna samay nikaal sako, second nikaalo, minute nikaalo, nikaalo zaroor। ho sakta hai? paandav ho sakta hai?teachers ho sakta hai? aur jo office mein kaam karte hain,unka ho sakta hai? haan,to bahut achha karte hain। achha।

bhaarat vaalon ne bhi jo plans banaaye hain woh bhi achhe plans banaaye hain। donon ke apne-apne vaayumandal anusaar plan achhe hain।

jin bachchon ne yaadapyaar bheji hai, baapdaada un sabhi bachchon ko, jinhonne patra dvaara ya kisi bhi dvaara yaad pyaar bheja baapdaada ko sveekaar hua। aur baapdaada return mein sabhi bachchon ko`daataapan ka vardaan' de rahe hain। achha - ek second mein ud sakte ho? pankh powerful hai na?bas, baba kaha aur uda। (drill)

chaaron or ke sarva shreshtha baap samaan daataapan ki bhaavna rakhne vaale, shreshtha aatmaon ko,nirantar yaad aur seva mein tatpar rahne vaale, parmaatma-seva ke saathi bachchon ko, sada lakshya aur lakshan ko samaan banaane vaale,sada baap ke snehi aur samaan, sameep banne vaale, baapdaada ke naynon ke taare,sada vishwa-kalyaan ki bhaavna mein rahne vaale merciful,master kshama ke saagar bachchon ko door baithne vaale,madhuban mein neeche baithne vaale aur baapdaada ke saamne baithe hue sarva bachchon ko yaadapyaar aur namaste।

intarneshnal meeting group se mulaakaat

ek-ek ratna bahut-bahut valuable hai। baapdaada sada ek-ek ratna ke visheshtaaon ki maala japte hain। visheshtaayen hain tab vishesh aatmaayen gaai hui hain। sirf us visheshtaaon ko sada kaarya mein lagaate raho। baapdaada har ek ke visheshtaaon ki maala dohraate rehte hain aur yahi geet gaate - vaah mere vishesh ratna vaah! iseelie kaha na ki baapdaada sada bachchon ki yaad mein rehte hain। bachche, mahaan hain aur apni mahaanta se vishwa ko mahaan banaane vaale hain। kitni mahima hai? jaise bachche baap ki mahima karte hain vaise baap bhi har bachche ki mahima karte hain। roohaani nasha rehta hai na? sada apne ko nimitta, vishwa ki stage par hero part bajaane vaale hero actor samajhkar chalo। sabhi hero hain?baapdaada to har ek bachche se saare din mein anek baar milta rehta hai। milta hai na! har ek ka act dekh khush hote rehte hain। achha part bajaane vaale hain na! to baapdaada bhi sada bahut achha, bahut achha - yahi geet gaate rehte hain। bahut achhe hain na। achhe hain aur sada achhe rahenge। guarantee hain na, achhe rahne vaale hi hain। rahenge,yeh poochhne ka nahin hai। question hai kya? achhe rahenge, poochhen?nahin। rehna hai, rahenge। achha - bahut achha sangathan hai।

achha - omshaanti।