Avyakt murli for Monday 31 December 2001

>

31-12-2001 om shanti avyakt baapdaadaamdhuban

"is naye varsha mein saphalta bhav ke vardaan dvaara baap aur svayan ki pratyakshata ko sameep laao"

aaj nav yug ka rachta apne master nav yug rachta bachchon se nav varsha manaane ke liye aaye hain। nav varsha manaana,yeh to vishwa mein sabhi manaate hain। lekin aap sabhi nav yug bana rahe ho। nav yug ki khushi har bachche ke andar hai। jaante ho ki nav yug abhi aaya ki aaya। duniya vaalon ka nav varsha ek din manaane ka hai aur aap sabka nav yug poora hi sangamayug manaane ka hai। nav varsha mein khushi manaate, ek-do ko gift dete hain। woh gift bhi kya hai!thode samay ke liye woh gift hai। nav yug rachta baap aap sab bachchon ke liye kaun-si gift laate hain? golden gift, jis golden gift arthaat golden yug mein sab svatah hi gold ho jaata hai, naya ho jaata hai। thode samay ke baad naya varsha shuru hoga lekin sab naya nahin ho jaayega। aapke nav yug mein prakriti bhi nai ban jaayegi। aatma bhi naye vastra(shareer) dhaaran karegi। har vastu nai arthaat satopradhaan golden ej vaali hogi। to naye varsha ko manaate aapke man mein, buddhi mein naya yug hi yaad aa raha hai। nav yug yaad hai na,ki aaj ke din naya varsha yaad hai?

baapdaada pahle mubaarak dete hain nav yug ki phir saath mein mubaarak dete hain naye varsha ki, kyonki aap sab nav varsha manaane ke liye aaye ho na!manaao, khoob manaao। avinaashi gift jo baapdaada dvaara mili hai,uski avinaashi mubaarak manaao। sada hi ek-do ko shubh bhaavna ki mubaarak do। yahi sachchi mubaarak hai। mubaarak jab dete ho to svayan bhi khush hote ho aur doosre bhi khush hote hain। to sachche dil ki mubaarak hai - ek-do ke prati dil se shubh bhaavna, shubh kaamna ki mubaarak। shubh bhaavna aisi shreshtha mubaarak hai jo koi bhi aatma ki kaisi bhi bhaavna ho, achhi bhaavna va achha bhaav na bhi ho, lekin aapki shubh bhaavna unka bhaav bhi badal sakti hai, svabhaav bhi badal sakti hai। vaise svabhaav shabd ka arth hi hai– sva (su)arthaat shubh bhaav। har samay har aatma ko yahi avinaashi mubaarak dete chalo। koi aapko kuchh bhi de lekin aap sabko shubh bhaavna do। avinaashi aatma ke avinaashi aatmik sthiti mein sthit hone se aatma parivartit ho hi jaayegi। to is naye varsha mein kya visheshta karenge?svayan mein bhi,sarva mein bhi aur seva mein bhi। jab naya varsha naam hai to koi naveenta karenge na! to kya naveenta karenge? har ek ne apna naveenta ka plan banaaya hai ya abhi sirf naya varsha mana lenge?milan manaaya,naya varsha manaaya,naveenta ka kya plan banaaya?

baapdaada har ek bachche ko is varsha ke liye vishesh yahi ishaara dete hain ki samay pramaan abhi sab bachchon ko chaahe yahaan saakaar mein sammukh baithe hain,chaahe desh,videsh mein vigyaan ke saadhan dvaara sun rahe hain,dekh rahe hain,baapdaada bhi sabhi ko dekh rahe hain। sabhi bade aaraam se,maje se dekh rahe hain। to sarva vishwa ke, baapdaada ke ati pyaare ati meethe bachchon ko baapdaada yahi ishaara dete hain ki ‘‘abhi apne is brahman jeevan mein amritvele se lekar raat tak bachat ka khaata badhaao,jama ka khaata badhaao।’’ har ek apne kaarya ke pramaan apna plan banaave, jo bhi brahman jeevan mein khazaane mile hain, us har ek khazaane ki bachat va jama ka khaata badhaao kyonki baapdaada ne aaj varsha ke ant tak chaaron or ke bachchon ki result dekhi। kya dekha,jaan to gaye ho। teachers bhi jaan gai hain। double foreigners bhi jaan gaye hain। mahaarthi bhi jaan gaye hain। jama ka khaata jitna hona chaahiye utna…kya kahen?aap khud hi bolo,kyonki baapdaada jaante hain ki sarva khazaane jama karne ka samay sirf ab sangam hai। is chhote se yug mein jitna jama kiya usi pramaan saara kalpa praalabdha praapta karte rahenge। jo aap sabka slogan hai na - kaun-sa slogan hai?ab nahin to…peechhe kya hai? ‘‘ab nahin to kab nahin’’। yeh slogan dimaag mein to bahut yaad hai। lekin dil mein, yaad mein bhoolta bhi hai to yaad bhi rehta hai। sabse bade se bada khazaana is brahman jeevan ki shreshthata ka aadhaar hai -sankalp ka khazaana,samay ka khazaana,shaktiyon ka khazaana, gyaan ka khazaana, baaki sthool dhan ka khazaana to common hai। to baapdaada ne dekha jitna aap har ek brahman shreshtha sankalp ke khazaane dvaara svayan ko va seva ko shreshtha bana sakte ho,usmein abhi aur underline lagaani padegi।

aap braahmanon ke ek shreshtha sankalp mein, shubh sankalp mein itni shakti hai jo aatmaon ko bahut sahayog de sakte ho। sankalp shakti ka mahattva abhi aur jitna chaaho utna badha sakte ho। jab science ka saadhan rocket,door baithe jahaan chaahe, jab chaahe,jis sthaan par pahunchaane chaahe,ek second mein pahuncha sakte hain। aapke shubh shreshtha sankalp ke aage yeh rocket kya hai! refine vidhi se kaarya mein lagaake dekho,aapke vidhi ki siddhi bahut shreshtha hai। lekin abhi antarmukhta ki bhatthi mein baitho। to is naye varsha mein apne aap sarva khazaanon ki bachat ki scheme banaao। jama ka khaata badhaao। saare din mein svayan hi apne prati antarmukhta ki bhatthi ke liye samay fix karo। aapehi aap kar sakte ho,doosra nahin kar sakta hai।

baapdaada pratyakshata varsha ke pahle is varsha ko ‘‘saphalta bhav ka varsha’’ kehte hain। saphalta ka aadhaar har khazaane ko saphal karna। saphal karo, saphalta praapta karo। saphalta pratyakshata ko svatah hi pratyaksha karegi। vaacha ki seva bahut achhi ki lekin ab saphalta ke vardaan dvaara baap ki, svayan ki pratyakshata ko sameep laao। har ek braahmanon ki jeevan mein sarva khazaanon ki sampannata ka aatmaon ko anubhav ho। aajkal ki aatmaayen aapke anubhvi moorta dvaara anubhooti karne chaahti hain। sunne kam chaahti hain, anubhooti zyaada chaahti hain। ‘‘anubhooti ka aadhaar hai - khazaanon ka jama khaata।’’abhi saare din mein beech-beech mein yeh apna chart check karo, sarva khazaane jama kitne kiye? jama ka khaata nikaalo,potaamel nikaalo।

ek minute mein kitne sankalp chalte hain?sankalp ki fast gati hai na। kitne saphal hue, kitne vyartha hue?kitne samartha rahe, kitne saadhaaran rahe?check karne ki masheen to aapke paas hai na ya nahin hai?sabke paas checking masheen hai? teachers ke paas hai? aapke centres par jaise computer hai,ee-mel hai vaise yeh checking masheen hai? double foreigners ke paas hai? chalti hai ya banda padi hai?paandavon ke paas checking masheen hai? sabke paas hai, koi ke paas nahin ho to apleekeshan daalo। jaise kahaan office kholte ho to pahle hi sochte ho ki office banaane ke pahle, aajkal ke jamaane mein computer chaahiye, ee-mel chaahiye,type masheen chaahiye,kaapi nikaalne vaali masheen chaahiye। chaahiye na? to brahman jeevan mein, aapke dil ke office mein yeh sab masheen hain ya nahin hain?

baapdaada ne pahle bhi sunaaya ki baapdaada ke paas prakriti bhi aati hai kahne ke liye ki main ever ready hoon, samay bhi braahmanon ko baar-baar dekhta rehta hai ki brahman taiyaar hain? baar-baar braahmanon ka chakkar lagaata hai। to baapdaada poochhte hain, haath to bahut achhe uthaate ho, baapdaada bhi khush ho jaate hain। ab aise ever ready bano jo har sankalp,har second,har shvaas jo beete woh vaah,vaah ho। why nahin ho, vaah,vaah ho। abhi koi samay vaah-vaah hota hai,koi samay vaah ke bajaae why ho jaata hai। koi samay bindi lagaate hain, koi samay question mark aur aashcharya ki maatra lag jaati hai। aap sabka man bhi kahe vaah!aur jiske bhi sambandh-samparka mein aate ho, chaahe braahmanon ke,chaahe seva karne vaalon ke vaah!vaah! shabd nikle। achha।

is season ke last tarna mein kitne maas hain, (teen maas)। to teen maas ke baad baapdaada har ek bachche ke bachat ka account check karega। theek hai? jo samajhte hain teen maas mein check karaane ke liye taiyaar ho jaayenge,woh ek haath uthaao। taiyaar ho jaayenge?kitne percent mein taiyaar honge?umang achha himmat aur mehnat mein aapko mubaarak ho hai। koi nahin utha rahe hain, soch rahe hain kya? teen maas mein account check hoga। aap apna account check karna,phir baapdaada check karega। baapdaada ko to deri nahin lagti। yahaan to account mein kitna maatha lagaana padta hai। lagaana padta hai na? thak jaate hain। baapdaada ko maaloom padta hai,ho jaayegi maalish। madhuban vaale account rakhne mein to hoshiyaar hain na? sab vaah,vaah ho jaayega। koi baat nahin।

baapdaada teachers ko dekhkar bahut khush hota hai। (sabhi ne taali bajaai) taaliyaan to bahut achhi bajaai। vaise to aap sab teacher ho na,ya yeh teachers hi teacher hain। jab course karaate ho va message dete ho to kya bante ho? teacher bante ho na? baapdaada is varsha mein ek naveenta dekhne chaahte hain, sunaayen। karenge? paandav karenge? pakka?pakka karenge?kuchh bhi ho jaae karna padega। taiyaar hain? sabhi paandav taiyaar hain? youth bhi taiyaar hain? baapdaada sunaaye karenge?maataayen karengi? (sabhi ne kaha haan ji) achha hai,baapdaada bachchon ki himmat par mubaarak de rahe hain। abhi suno ek baat,do haath ki taali nahin bajaao, ek haath ki taali bajaao। ghamsaan ho jaata hai na?

to aaj great-great grand faadar brahma baap ki ek shubh aasha rahi,brahma baap bole ki mere great great grand sons ko vishesh ek baat kahni hai,woh kya?ki sada har bachche ke chehre par,sada ek to roohaaniyat ki muskaraahat ho,suna! achhi tarah se kaan khol ke sunna। aur doosra- mukh mein sada madhurta ho। ek shabd bhi madhurta ke bina nahin ho। chehre par roohaaniyat ho, mukh mein madhurta ho aur man-buddhi mein sada shubh bhaavna, merciful ki bhaavna,daataapan ki bhaavna ho। har kadam mein follow father ho। to yeh kar sakte ho?teachers yeh kar sakte ho? youth kar sakte ho? (gyaan sarovar mein deshvidesh ke youth ki retreat chal rahi hai) baapdaada ke paas youth group ki result bahut achhi aai hai। padamguna mubaarak ho। achha result hai। anubhav bhi achhe kiye hain, baapdaada khush hue। baapdaada ne anubhav bhi sune। suni sunaai nahin,direct baapdaada ne aapke anubhav sune, lekin abhi in anubhvon ko amar bhav ke vardaan se avinaashi rakhna। kuchh bhi ho jaae lekin apne roohaani anubhvon ko sada aage badhaate rehna। kam nahin karna। teen maas ke baad madhuban mein aao, nahin aao। teen maas ke baad foreign se to aayenge nahin lekin apna account rakhna aur baapdaada ke paas bhejna, baapdaada right karega। ya jo hoga woh percentage denge। theek hai?haan, ek haath ki taali bajaao। achha।

aaj mubaarak ka din hai to aur khushkhabri baapdaada ne suni,dekhi bhi। chhote-chhote bachche taajdhaari banke baithe hain। aapko to taaj milega,inhon ko abhi mil gaya hai। khade ho jaao। dekho,taajdhaari group dekho। bachche sada dil ke sachche। sachchi dil vaale ho na! achha hai bachchon ki result bhi baapdaada ne achhi dekhi। mubaarak ho। achha।

double foreigners - inhon ke patra aur chitkiyaan bhi dekhi। umang ki chitkiyaan hain। lekin ek baat baapdaada ne dekhi, jo chitkiyon mein koi-koi mein hain। koi ne to bahut achhe umang-utsaah se parivartan bhi likha hai,umang bhi likha hai lekin koi-koi ne thoda-sa apna albelaapan dikhaaya hai। albele kabhi nahin banna। alert। ek baapdaada ko albelaapan nahin achha lagta aur doosra dilshikasta hona nahin achha lagta। kuchh bhi ho jaae dil badi rakho। dilshikasta chhoti dil hoti hai। dilkhush badi dil hoti hai। to dilshikasta nahin banna, albela nahin banna। umang-utsaah mein sada udte rehna। baapdaada ko double videshiyon mein arab-kharab jitni ummeeden hain। double foreigners aisa jalva dikhaayenge jo India ki aatmaayen chakit ho jaayengi। aana hai, woh bhi din aana hai, jaldi aana hai। aana hai na? woh din aane vaala hai na?aayega woh din? (jaldi-jaldi aayega) haan ji to bolo। baapdaada in advance mubaarak ki thaaliyaan bharkar de rahe hain। itni himmat baapdaada double foreigners mein dekh rahe hain,aise hai na?foreign mein jo karma, jo bol,jo vritti,jo vidhi ham karenge,humein dekh sarva karenge bahut ummeeden hain। achha hai। youth bhi achhe hain,pravritti vaale bhi bahut hain,kumaariyaan bhi bahut hain, kamaal hi kamaal hai। theek hai? yeh sindhi parivaar bolo,kya kamaal karenge?nimitta maatra sindhi hain lekin hain brahman। kya karenge,bolo? (baba ka naam roshan karenge)kab karenge? (is varsha mein)aapke mukh mein gulaabjaamun। himmat vaale hain। (aapka vardaan saath mein hai) vardaata hi saath mein hai to vardaan kya badi baat hai। achha।

jo bhi is kalpa mein pahli baar aaye hain,woh utho। jo pahli baar aaye hain,un bachchon ko baapdaada kehte hain ki aaye peechhe hain lekin jaana aage hai, itna aage badho jo sab aapko dekh karke khush hoven aur sabke mukh se yahi shabd nikle- kamaal hai,kamaal hai, kamaal hai। aisi himmta hai? pahli baar aane vaalon mein himmat hai na!naya varsha manaane aaye ho, to naye varsha mein koi kamaal karenge na! phir bhi baapdaada ko sabhi bachche ati pyaare hain। phir bhi bahut akla ka kaam kiya hai,tu let ke pahle aa gaye ho। abhi phir bhi is haal mein baithne ki seat to mili hai na! rahne ka palang ya pat to mila hai na!aur jab tu let ka board lag jaayega to queue mein khada karna padega। iseelie phir bhi achhe samay par baapdaada ko pahchaan liya,yeh akla ka kaam kiya। achha।

jo puraane paandav hain, woh utho। paandavon ki mahima bhi kam nahin hai। baapdaada ka title hai paandav pati। to paandavon ki mahima hai na,paandav pati aur vijayi paandav gaaye hue hain। shaktiyaan vardaani gaai hui hain lekin vijayi paandav gaaye hue hain। to har ek paandav ke mastak par kaun-sa tilak laga hua hai? vijay ka। aap apne mastak mein vijay ka tilak dekhte ho ki bhool jaate ho? sada apne mastak mein vijayi paandav,vijay ka tilak chamakta hua dekho। vijay har paandav ka janma siddha adhikaar hai। adhikaari hain na? to baapdaada paandavon ko vijayi ratna ke roop mein mubaarak de rahe hain। bahut achhe hain, bahut hain। paandav kam nahin hain।

achha puraani maataayen jo pahle aati rahi hain, woh utho। maataaon ki visheshta kya hai? maataaon ke charnon mein yeh sab bade-bade martabe vaale aap sabke charnon mein jhukenge। yeh maata guru jo gaaya hua hai, woh sachcha part aap maataayen bajaayengi। jaise abhi koi bhi bada din hota hai na!to bhaarat maata ki jay gaate hain na! aage chalkar aap maataaon ki jay-jay gaayenge। itna oonch martaba baapdaada ne maataaon ko diya hai। to maataayen jay-jaykaar ka aavaaj sunengi। maata guru ka jo gaayan hai woh pratyaksha roop mein dikhaayengi। aisi maataayen ho na! soi hui aatmaon ko jagaayengi। maataaon ka bahut achha part hai। jinhonne aapki ninda ki hai woh aapka keertan gaayenge kyonki baap ki ban gai hain na!oonche te oonche bhagvan ki saathi ban gai ho। yeh roohaani nasha hai na? to aisi maataaon ko baapdaada bhi namaste kehte hain। achha।

kumaariyon se - kumaariyaan haath hilaao। kumaariyaan bhi bahut hain। abhi saadhaaran kumaariyaan to nahin ho। abhi aap sabhi su-kumaariyaan ban gai hain, shreshtha kumaariyaan ban gai hain। kumaariyon ke liye baapdaada ko ek dil mein umang hai, sunaayen!kumaariyaan sunengi?kumaariyon ke liye gaayan hai - 21peedhi taarne vaali hain, to baapdaada kehte hain, is varsha mein har ek kumaari 21 chhodo lekin ek-ek kumaari ek-ek vaaris quality nikaale, ho sakta hai। hai himmat?kitni kumaariyaan hongi? (lagbhag1000) to is varsha mein hajaar vaaris to paida ho jaayenge।(haan ji) in advance mubaarak ho। abhi vaarison ki maala banaayenge। mix maal to aata rehta hai। abhi vaarison ki maala banaayenge। theek hai? pahle yeh training daadiyon se lena ki vaaris kisko kaha jaata hai? vaaris quality ki qualification kaun-si hai?samjha! to is varsha mein ek-ek, ek vaaris nikaale, phir baapdaada vaarison ki maala banaayenge। is varsha mein koi naveenta karenge na! to vaaris paida karenge। dilli bhi karega, to sab karenge। karna hi hai? aur kya karna hai? yahi to karna jinhonne aapki ninda ki hai woh aapke keertan gaayenge hai। abhi dekhenge jo bhi vaaris taiyaar kare woh madhuban mein apna samaachaar likhna,daadi vaaris aa gaya। theek hai kumaariyaan?haan ji to kaho।

madhuban nivaasiyon se - madhuban vaalon ki seva ka chamatkaar sabhi ko madhuban mein kheenchata hai। kisi se bhi poochho to yahi sabke mukh se nikalta hai, madhuban to madhuban hai। seva mein number one,aise hai?number one hain ya nambarvaar hain? number one hain। baapdaada madhuban nivaasiyon ko sada number one drishti se dekhte hain। nambarvaar nahin,number one। hai na number one!daadi ke paas koi complain nahin। sab complete ho rahe hain isliye complain nahin hai। achhe hain, phir bhi athak to hain। madhuban ke sevaadhaari sab maangate hain। mahaamandaleshvar bhi kahkar jaate hain madhuban ke sevaadhaari hamko bhejo। to number one to hue na! achhe hain। pakke bhi hain,achhe bhi hain। aise hai na! aise to nahin baapdaada aise hi kah raha hai। baapdaada ko to achhe lagte hain। baaki kabhi-kabhi jyaada kaam ho jaata hai, baapdaada dekhte hain kabhi-kabhi jyaada bojh bhi pad jaata hai। lekin phir bhi amar hain। amar bhav ka vardaan mila hua hai। theek hai na!amar hain?achha। mubaarak ho, mubaarak ho, mubaarak ho।

achha -teachers utho। baapdaada sada teachers ko isi nazar se dekhte hain ki har teacher ke features mein baapdaada ke features dikhaai den। face mein brahma baap ke features aur bhrakuti mein jyotibindu ke feature, kisi bhi teacher ko dekho to sabke mukh se yahi nikle ki yeh to baap samaan hain। yeh to brahma baba jaise lagte hain, yeh to shiv baap jaise lagte hain। hain bhi aur hone hi hain। to teachers aadhaar moorta hain। jaise baap ke liye kehte hain- brahma baap ka sada yahi slogan raha ‘‘jo karma main karoonga woh sab karenge’’। aise har ek teacher ko yahi slogan sada yaad rehta hai ki ‘‘jo karma,jo bol,jo vritti, jo vidhi ham karenge,humein dekh sarva karenge।’’ baapdaada ne brahma baap ki gaddi aap teachers ko baithne ke liye di hai। murli sunaane ke liye nimitta teachers hain,baap ki gaddi mili hui hai। drama ne aap teachers ko bahut-bahut ooncha martaba diya hai।

baapdaada bhi sada teachers ko isi vishesh mahattva se dekhte hain। mahaan ho, mahattva vaale ho। hai na aise? kabhi student se certificate leven? baapdaada to dekhte rehte hain। (baba teachers ko pakdo)yeh to prem mein pakdi hui hain tab to teachers bani hain। abhi kaan daadi pakdegi, baap to pyaar mein pakdenge। phir bhi himmat rakhkar nimitta to bani hain na! (daadi kah rahi hain teachers bahut achhi hain) bahut achhi ho, mubaarak ho। achhe to hain hi। agar teachers nahin hote to itne centres kaise khulte। mubaarak ho aap sabko। baapdaada to bahut-bahut shreshtha nazar se dekhte hain। teachers bhi bahut aai hain। achhi hain -himmat aur mehnat mein mubaarak ho।

baaki hospital vaale rah gaye। hospital vaalon ne apne naye saal ka umang-utsaah achha likha hai aur baapdaada ko sada nishchay rehta hai aur nishchint rehte hain ki hospital anek aatmaon ko brahman jeevan mein laayegi। braahmanon ki seva bhi kar rahi hai aur brahman bhi banaayegi। bade-bade vi.aai.pi. hospital ka naam sun prabhaavit honge। abhi aayenge aapke paas। chart achha likha hai aur pratigya bhi achhi ki hai। baapdaada khush hai। sabne bahut achhi roochi se kiya hai। achha। aap sabka pratigya patra padhkar baapdaada khush hue, isliye mubaarak ho।

abhi jo science ke saadhnon se dekh rahe hain woh bhi khush ho rahe hain ki baapdaada ne hamaara naam nahin liya। baapdaada kehte hain jo bhi jahaan dekh rahe hain,sun rahe hain,aap bhi uth jaao। sunkar khush ho rahe hain, muskara rahe hain। baapdaada ko sabhi bachchon ka umang-utsaah aur dil ka pyaar bahut shreshtha lagta hai। dekho dil ka pyaar hai to samay pramaan pahunch jaate hain। bade utsaah se sunte bhi rehte hain, dekhte bhi rehte hain,koi dekhta hai,koi nahin bhi dekhta, lekin sunte bahut hain। to baapdaada nav yug ki, naye varsha ki ek-ek bachche ko naam sahit, visheshta sahit mubaarak de rahe hain। woh bhi haath utha rahe hain,hila rahe hain। achha।

sabhi bachchon ke card aur patra, naye varsha ki mubaarken bahut-bahut aai hain। baapdaada kehte hain bachche aapke card ke pahle aapki heart pahunch jaati hai|baapdaada sabki dil ko dekh khush hote hain। chalo kharcha to hota hai, haan kal ke baad yeh card sab yaadgaar roop mein rah jaayenge। lekin baapdaada is baat par khush hote hain,kharche ko nahin dekhte hain, baapdaada dekhte hain ki bachchon ke dil ka kya aavaaj nikalta hai। kya dil ka pyaar haathon se card mein aata hai। isliye card bahut achha ek-do se achhe se achhe banaaye hain। aap log dekhna yahaan card rakhe hain na! achha।

jurist se - jo jyoorista meeting mein aaye hain woh utho। baapdaada ki ek point jo rahi hui hai,pata hai। kaun-si point rahi hui hai? (geeta ke bhagwan ki)to iska plan kab banaayenge?kitaab likha woh to achha kiya,lekin koi group taiyaar karo jo kahe ki haan yeh jo bolte hain, woh theek hai। koi ek group to chhota taiyaar karo na। is varsha mein laayenge na kyonki jo kisne nahin kiya hai,woh karke dikhaana hai। yeh patra yahaan bharva karke aave ki haan geeta ka bhagwan jo aapne bataaya woh bilkul sahi hai, koi aise authority vaalon ka aave। baaki aam janta ke liye geeta ka bhagwan koi bhi ho, krishna ho ya niraakaar ho। koi aise authority vaale bolen,siddha karen,ki haan aapki yeh baat bahut aavashyak hai, aisa group banaao। bana sakte hain koi badi baat nahin hai। dhaarmik sanstha, jo aapka dhaarmik varga hai aur jo justice hain, vakeel hain,aise dharma kshetra vaalon ka group banaao jo vishesh nimitta ho। abhi mahaatmaayen bhi to bahut aaye the na। achha-achha to kahke gaye। abhi aisi baat unhon se likhvaao। donon hi varga mil karke karo, ho jaayega,koi badi baat nahin hai। aise to sabhi varga vaale ek-do ke sahayogi to hain hi, jiska bhi sahayog chaahiye woh mil sakta hai। lekin kuchh karke dikhaao। isi se hi pratyakshata hogi। logon ko nai baat chaahiye na। theek hai na! karke dikhaayenge। hona hi hai। jab kalpa pahle hua hai to ab bhi repeat to hona hi hai। bhale aaye। mubaarak ho। achha hai - jab se yeh alag-alag varga bane hain to seva mein vriddhi to hui hai aur har ek ko umang aata hai, ham kuchh karke dikhaayen, karke dikhaayen। lekin vaaris nahin nikaale hain। har ek varga ko vaaris nikaalne chaahiye। abhi mix to aate hi rehte hain, abhi last mein vaaris ki maala banaao। jaise aadi mein thode se nimitta vaaris bane, aise ant mein bhi aise vaaris quality nimitta banegi। achha।

mahaaraashtra ke sevaadhaari - vaise to sabko mubaarak mil gai hai phir bhi jinhonne seva ka bade se bada punya jama kiya hai unko seva ke punya ki mubaarak ho। yeh punya kam nahin hai। yeh bhi ek jeevan mein sahaj jama ka khaata badh jaata hai kyonki braahmanon ki prasannata,santushtata punya ka khaata badhaati hai। to yeh bhi chance bahut achha,har zone lete rehte hain, yeh achha hai। achha lagta hai na! punya bhi jama hota hai,najdeek bhi aana hota hai, to mubaarak ho mahaaraashtra ko। achha।

vishwa ke chaaron or ke sarva saphalta moorta bachchon ko,sarva saphal karne vaale teevra purushaarthi bachchon ko, sada apne account ko check karne vaale checker aur bhavishya maker aise shreshtha aatmaon ko,sada apne har kadam mein baap ko pratyaksha karne vaale great-great grand father ke sarva grand sons ko baap aur daada ka bahut-bahut-bahut-bahut yaad-pyaar, mubaarak aur namaste।

dilli tatha soneepat ke bhavan nirmaan prati baapdaada ke ishaare

sabhi brahman parivaar ke samaachaar,patron dvaara samaachaar to sab sunte rehte hain। to aajkal sabke sankalp mein,sahayog mein kya yaad rehta hai?ki hamaari raajdhaani mein, aap sabki raajdhaani kaun-si hai? madhuban hai ghar aur raajya kahaan karna hai?dilli mein karna hai, madhuban mein nahin। madhuban mein krishna ka mahal banega ya dilli mein banega? madhuban mein nahin banega?to raajdhaani yaad rehti hai, sabhi ko raajdhaani yaad hai? to sabhi ke sahayog se abhi raajdhaani mein vishesh sevaasthaan ban raha hai, aap sabne beej daala hai? sabhi ne daala hai? kyonki beej daalenge tabhi phal khaayenge na। bina beej daalne ke phal kaise khaayenge। to sabhi ne beej daala hai aur bhi daalte rahenge kyonki is beej se anek prakaar ke pratyakshata ke phal niklenge। isliye sabko apne-apne taraph se saphalta varsha mein sab saphal karna hi hai। sarva khazaane saphal karna hai। uske saath beej bhi daalna hai,daalte rehte hain,daalte rahenge। theek hai na! daalte rahenge na! haath uthaao ki samajhte hain poora ho gaya?jab tak seva hai to seva mein beej daalte jaao aur phir phal bhi aap sabko khaana hai। jab pratyakshata ka phal niklega na to aap sab khaayenge,sirf dilli vaale nahin sab khaayenge। baapdaada se pyaar hai na! to seva se bhi pyaar hai। to seva ka phal bhi bahut pyaara hai। maanesar ki dharni ke sevaadhaari kaun-kaun aaye hain,woh utho। achha hai, kaam theek chal raha hai? theek chal raha hai aur theek chalta rahega। baap ke sevaasthaanon ko baap ka vardaan mila hua hi hai। hona hi hai। sarva ke sahayog se seva saphal honi hi hai। theek hai na! achha hai। jaise umang-utsaah se behad ki vritti se sthaan bana hai, aise hi behad ki vritti,drishti aur seva se saphalta bhi behad ki milni hai। sab behad hona hai। to behad mein to aap sabhi ho na!aise kabhi nahin samajhna yeh dilli ka hai, hamaara hai kyonki pratyakshata ka beej aap sabka hai। nimitta dilli hai lekin phal aap sabko khaana hai,mil ke khaayenge। isliye baapdaada ko bhi khushi hai ki behad ke umang-utsaah se behad ki seva badh rahi hai, badhti jaayegi। achha। soneepat ka bhi taiyaar hona hai। woh bhi dilli hai na, chaahe koi bhi hai, hai to dilli hi।(london mein bhi diamond house ban raha hai) dekho,videsh to har samay jump deta hai। videsh jump nahin deve, yeh ho hi nahin sakta। yeh diamond house bana to vahaan bhi zaroor hona hi chaahiye। (minni madhuban ban raha hai)chhote se bada,white house jitna bhi mil jaayega।

baapdaada ne bachchon se milan manaane ke pashchaat naye varsha ki mubaarak di

chaaron or ke saphalta ke sitaaron ko puraane varsha ki vidaai aur naye varsha ki badhaai ke sangam samay ki, sangam samay vidaai bhi hai, badhaai bhi hai। to sada saphal hai aur saphal rahenge। kabhi bhi asphalta ka naam nishaan nahin rahega। baapdaada ke ati sikeeldhe,ati pyaare,ati meethe,naynon ke noor ho। sab number one banna hi hai,is dridh sankalp se har kadam baap samaan uthaate rehna,padam guna,arab-kharab guna mubaarak ho, mubaarak ho,mubaarak ho।

2002, 1January, 31 December raatri 12 baje ke baad daadi ji ne sabhi se good morning ki।

aaj naye saal aur puraane saal ke sangam par baba ne to vaayda karaaya ham sabhi vaayde ko nibhaayenge aur sabko bahut-bahut pyaar se happy new year,happy new year। good morning।

vidaai ke samay baapdaada ne sabhi bachchon se good morning,diamond morning ki।

baapdaada ke bahut-bahut amoolya daaymandas ko, diamond morning, diamond morning, diamond morning।

om shanti