Avyakt murli for Friday 25 October 2002

>

25-10-02 om shanti avyakt baapdaadaamdhuban

“brahman jeevan ka aadhaar - purity ki royalty”

aaj sneh ka saagar apne snehi bachchon ko dekh rahe hain। chaaron or ke snehi bachche roohaani sookshm dori mein bandhe hue apne sweet hom mein pahunch gaye hain। jaise bachche sneh se khinchakar pahunch gaye hain vaise baap bhi bachchon ke sneh ki dor mein bandha hua bachchon ke sammukh pahunch gaye hain। baapdaada dekh rahe hain ki chaaron or ke bachche bhi door baithe bhi sneh mein samaaye hue hain। sammukh ke bachchon ko bhi dekh rahe hain aur door baithe hue bachchon ko bhi dekh dekh haarshit ho rahe hain। ye roohaani avinaashi sneh, parmaatma sneh, aatmik sneh saare kalpa mein abhi anubhav kar rahe ho।

baapdaada har ek bachche ki pavitrata ki royalty dekh rahe hain। brahman jeevan ki royalty hai hi purity। to har ek bachche ke sir par roohaani royalty ki nishaani purity ki light ka taaj dekh rahe hain। aap sabhi bhi apne purity ka taaj, roohaani royalty ka taaj dekh rahe ho? peechhe vaale bhi dekh rahe ho? kitni shobhnik taajdhaari sabha hai। hai na paandav? taaj chamak raha hai na! aisi sabha dekh rahe ho na! kumaariyaan,taajdhaari kumaariyaan ho na! baapdaada dekh rahe hain ki bachchon ki royal family kitni shreshtha hai! apne anaadi royalty ko yaad karo, jab aap aatmaayen paramdham mein bhi rehti ho to aatma roop mein bhi aapki roohaani royalty vishesh hai। sarva aatmaayen bhi light roop mein hain lekin aapki chamak sarva aatmaon mein shreshtha hai। yaad aa raha hai paramdham? anaadi kaal se aapki jhalak phalak nyaari hai। jaise aakaash mein dekha hoga sitaare sabhi chamakte hain, sab light hi hain lekin sarva sitaaron mein koi vishesh sitaaron ki chamak nyaari aur pyaari hoti hai। aise hi sarva aatmaon ke beech aap aatmaon ki chamak roohaani royalty, purity ki chamak nyaari hai। yaad aa raha hai na? phir aadikaal mein aao,aadikaal ko yaad karo to aadikaal mein bhi devta swaroop mein roohaani royalty ki personality kitni vishesh rahi? saare kalpa mein devtaai swaroop ki royalty aur kisi ki rahi hai? roohaani royalty, purity ki personality yaad hai na! paandavon ko bhi yaad hai? yaad aa gaya? phir madhyakaal mein aao to madhyakaal dvaapar se lekar aapke jo poojya chitra banaate hain, un chitron ki royalty aur pooja ki royalty dvaapar se abhi tak kisi chitra ki hai? chitra to bahuton ke hain lekin aise vidhi poorvak pooja aur kisi aatmaon ki hai?chaahe dharma pitaayen hain,chaahe netaayen hain,chaahe abhinetaayen hain, chitra to sabke bante lekin chitron ki royalty aur pooja ki royalty kisi ki dekhi hai?double foreigners ne apni pooja dekhi hai? aap logon ne dekhi hai ya sirf suna hai? aise vidhipoorvak pooja aur chitron ki chamak, roohaaniyat aur kiski bhi nahin hui hai,na hogi। kyon? purity ki royalty hai। purity ki personality hai। achha dekh liya apni pooja? nahin dekhi ho to dekh lena। abhi last mein sangamayug par aao to sangam par bhi saare vishwa ke andar purity ki royalty brahman jeevan ka aadhaar hai। purity nahin to prabhu pyaar ka anubhav bhi nahin। sarva parmaatma praaptiyon ka anubhav nahin। brahman jeevan ki personality purity hai aur purity hi roohaani royalty hai। to aadi anaadi,aadi madhya aur ant saare kalpa mein yeh roohaani royalty chalti rahi hai।

to apne aapko dekho - darpan to aap sabke paas hai na?darpan hai?dekh sakte ho?to dekho। hamaare andar purity ki royalty kitne percent mein hai? hamaare chehre se purity ki jhalak dikhaai deti hai? chalan mein purity ki phalak dikhaai deti hai? phalak arthaat nasha। chalan mein woh phalak arthaat roohaani nasha dikhaai deta hai?dekh liya apne ko? dekhne mein kitna samay lagta hai? second na? to sabhi ne dekha apne ko?

kumaariyaan - jhalak phalak hai?achha hai,sabhi utho, khade ho jaao। (kumaariyaan laal patta lagaakar baithi hain,jis par likha hai ekavrata) sundar lagta hai na। ekavrata ka arth hi hai purity ki royalty। to ekavrata ka paath pakka kar liya hai! vahaan jaakar kachcha nahin kar lena। aur kumaar group utho। kumaaron ka group bhi achha hai। kumaaron ne dil mein pratigya ka patta baandh liya hai, inhonne (kumaariyon ne) to baahar se bhi baandh liya hai। pratigya ka patta baandha hai ki sada arthaat nirantar purity ki personality mein rahne vaale kumaar hain। aise hain? bolo,ji haan। na ji ya haan ji?ya vahaan jaakar patra likhenge thoda-thoda dheela ho gaya! aise nahin karna। jab tak brahman jeevan mein jeena hai tab tak sampoorn pavitra rehna hi hai। aisa vaayda hai? pakka vaayda hai to haath hilaao। T.vi. mein aapke photo nikal rahe hain। jo dheela hoga na usko yeh chitra bhejenge। isliye dheela nahin hona, pakka rehna। haan pakke hain,paandav to pakke hote hain। pakke paandav, bahut achha।

purity ki vritti hai -shubh bhaavna,shubh kaamna। koi kaisa bhi ho lekin pavitra vritti arthaat shubh bhaavna, shubh kaamna aur pavitra drishti arthaat sada har ek ko aatmik roop mein dekhna va pharishta roop mein dekhna। to vritti, drishti aur teesra hai kriti arthaat karma mein, to karma mein bhi sada har aatma ko sukh dena aur sukh lena। yeh hai purity ki nishaani। vritti, drishti aur kriti teenon mein yeh dhaarna ho। koi kya bhi karta hai,duhkh bhi deta hai, insult bhi karta hai,lekin hamaara karttavya kya hai? kya duhkh dene vaale ko follow karna hai ya baapdaada ko follow karna hai?follow father hai na! to brahma baap ne duhkh diya va sukh diya? sukh diya na! to aap master brahma arthaat brahman aatmaon ko kya karna hai?koi duhkh deve to aap kya karenge?duhkh denge?nahin denge?bahut duhkh deve to? bahut gaali deve, bahut insult kare, to thoda to feel karenge ya nahin? kumaariyaan feel karengi?thoda। to follow father। yeh socho mera karttavya kya hai! uska karttavya dekh apna karttavya nahin bhoolo। woh gaali de raha hai, aap sahansheel devi,sahansheel dev ban jaao। aapki sahansheelta se gaali dene vaale bhi aapko gale lagaayenge। sahansheelta mein itni shakti hai, lekin thoda samay sahan karna padta hai। to sahansheelta ke dev va deviyaan ho na?ho? sada yahi smriti rakho – main sahansheel ka devta hoon, main sahansheelta ki devi hoon। to devta arthaat dene vaala daata, koi gaali deta hai, respect nahin karta hai to kichda hai na ki achhi cheez hai? to aap lete kyon ho?kichda liya jaata hai kya?koi aapko kichda deve to aap legen? nahin lenge na। to respect nahin karta, insult karta, gaali deta, aapko disturb karta, to yeh kya hai?achhi cheezen hain। phir aap lete kyon ho?thoda-thoda to le lete ho,peechhe sochte ho nahin lena tha। to abhi lena nahin। lena arthaat man mein dhaaran karna, feel karna। to apne anaadikaal, aadikaal,madhyakaal,sangam kaal,saare kalpa ke purity ki royalty,personality yaad karo। koi kya bhi kare aapki personality ko koi chheen nahin sakta। yeh roohaani nasha hai na? aur double foreigners ko to double nasha hai na! double nasha hai na? sab baat ka double nasha। purity ka bhi double nasha,sahansheel devi-devta banne ka bhi double nasha। hai na double? sirf amar rehna। amar bhav ka vardaan kabhi nahin bhoolna।

achha - jo pravritti vaale hain arthaat yugal,vaise single rehte hain, kahne mein yugal aata hai, woh utho। khade ho jaao। yugal to bahut hain, kumaar,kumaariyaan to thode hain। kumaaron se to yugal bahut hain। to yugal moorta baapdaada ne aap sabko pravritti mein rahne ke liye direction kyon diya hai?aapko yugal rahne ki chhutti kyon di hai? pravritti mein rahne ki chhutti kyon di hai, jaante ho? kyonki yugal roop mein rehte in mahaamandaleshvaron ko aapko paanv mein jhukaana hai। hai itni himmat? yeh log kehte hain ki saath rehte pavitra rehna mushkil hai aur aap kya kehte ho? mushkil hai ya sahaj hai? (bahut sahaj hai) pakka hai? ya kabhi easy, kabhi lazy? isliye baapdaada ne draamaanusaar aap sabko duniya ke aage, vishwa ke aage example banaaya hai। challenge karne ke liye। to pravritti mein rehte bhi nivritta, apvitrata se nivritta rah sakte ho? to challenge karne vaale ho na?sabhi challenge karne vaale ho,thoda-thoda darte to nahin ho, challenge to karen lekin pata nahin kya ho! to challenge karo vishwa ko kyonki nai baat yahi hai ki saath rehte bhi svapna maatra bhi apvitrata ka sankalp nahin aaye, yahi sangamayug ke brahman jeevan ki visheshta hai। to aise vishwa ke showcase mein aap example ho, sample kaho example kaho। aapko dekh karke sabmen taakat aayegi ham bhi ban sakte hain। theek hai na?shaktiyaan theek hai? pakke ho na? kachche pakke to nahin?pakke। baapdaada bhi aapko dekh karke khush hai। mubaarak ho। dekho kitne hain? bahut achhe।

baaki rahi teachers। teachers ke bina to gati nahin। teachers utho। achha - paandav bhi achhe-achhe hain। vaah! teachers ki visheshta hai ki har teacher ke feature se future dikhaai de। ya har ek teacher ke features se pharishta swaroop dikhaai de। aise teachers ho na! aap pharishton ko dekhkar aur bhi pharishte ban jaayen। dekho kitne teachers hain। foreign group mein teachers bahut hain। abhi to thode aaye hain। jo nahin aaye hain unko bhi baapdaada yaad kar rahe hain। achha hai,abhi teachers milkarke yeh plan banaao ki apne chalan aur chehre se baap ko pratyaksha kaise karen? duniya vaale kehte hain paramatma sarvavyaapi hai aur aap kehte ho nahin hai। lekin baapdaada kehte hain ki abhi samay pramaan har teacher mein baap pratyaksha dikhaai de to sarvavyaapi dikhaai dega na! jisko dekhe usmein baap hi dikhaai de। aatma, paramatma ke aage chhip jaaye aur paramatma hi dikhaai de। yeh ho sakta hai?achha iski date kya? date to fix honi chaahiye na? to date kaun si hai iski? kitna samay chaahiye? (ab se chaalu karenge) chaalu karenge, achhi himmat hai, kitna samay chaahiye? 2002 to chal raha hai abhi do hajaar kab tak?to teachers ko yahi attention rakhna hai kibas abhi baap ke andar main samaai hui dikhaai doon। mere dvaara baap dikhaai de। plan banaayenge na! double videshi meeting karne mein to hoshiyaar hain?abhi yeh meeting karna,is meeting ke bina jaana nahin - ki kaise ham ek ek se baap dikhaai de। abhi brahmaakumaariyaan dikhaai deti hain, brahmaakumaariyaan bahut achhi hain lekin inka baba kitna achha hai, woh dekhen। tabhi to vishwa parivartan hoga na! to double videshi is plan ko practical shuru karenge na! karenge?pakka। achha। to aapki daadi hai na, uski aasha poorn ho jaayegi। theek hai na? achha।

adharkumaar aur maataayen -jo single hain woh utho। aap bhi single nahin ho। aapka yugal to bahut powerful hai kyonki baapdaada sabhi bachchon ko kehte hain ki aap sabhi ``aap aur baap'' combined hain। to combined hain to single hue kya? laukik jeevan alag cheez hai, lekin brahman jeevan mein combined roop mein ho। aise combined ho jo koi bhi alag kar nahin sakta। aise combined ho na? ya akele ho? combined ho। sada baap har kaarya mein sahayogi hai, saathi hai। yeh nasha rehta hai na? kabhi apne ko akele to nahin samajhte?kabhi-kabhi samajhte ho? nahin। pahle baapdaada aap sabka saathi hai aur avinaashi saath nibhaane vaale hain। baba kaha aur baba haajir hai। kehte hain hajoor sada haajar hai। to mauj mein rehte ho na? udaas to nahin hote?hote hain?haan na nahin karte? udaas to nahin hain na? mauj mein rehte ho na! mauj hi mauj hai,ham baap ke,baap hamaare। baap aapki har seva mein sahayog dene vaale hain। isliye isi roohaani nashe mein sada rehna - ham combined hain। combined hain na? bahut achhe roohaani nashe vaale hain। nasha hai na? baapdaada ko ati priy se bhi priy hain।

chhote bachche bhi aaye hain - bachchon ne baapdaada ko special card bheje the, card bheje hain na?aap sabke card mil gaye hain। suna bachchon ne। achhe achhe card hain। (card sabhi ko dikhaaye gaye) bahut achhe card likhe hain। dekha bachchon ki kamaal, dekhi na! bachchon ki lagan achhi hai tab yahaan pahunchte hain। aur yahi baap se pyaar bachchon ko aage badhaata rahega। achha।

pahli baar bahut aaye hain - achha haath oopar karo। pahli baari aane vaalon ko pahla number jaana hai। last so fast hona hai। aise hai na! fast jaayenge na, pahla number lena hai। saara brahman parivaar aap sab pahli baari aane vaalon ko bahut-bahut-bahut mubaarak de rahe hain।

achha - baaki jo bhaarat vaale baithe hain,woh bhi utho। bhaarat vaale, bhaarat mahaan hai, to bhaaratvaasi bhi mahaan hain। bhaarat se baap ka pyaar hai tab to bhaarat mein aaya na। videsh mein nahin aaya, bhaarat mein hi aaya। lekin videsh,desh vaalon ko bhi jagaane ke nimitta banega। to bhaarat vaale to chance lene mein hoshiyaar hain। dekho double videshiyon ke tarna mein bhi kitne bhaarat vaale aaye hain। iseelie abhi bhaarat ke tarna mein vishesh double videshiyon ko nimantran hai। theek hai na! welcome। to double videshi to hoshiyaar hain,jaate hi pahle ticket ikatthi karne lag jaate hain। madhuban se bhi pyaar hai na! madhuban va bhaarat se pyaar hai kyon? kyonki asul mein aap sab bhaaratvaasi the, yeh to seva ke kaaran gaye ho। agar bhaaratvaasi nahin hote to bhaarat ki philosophy se bhi pyaar nahin hota। bhaarat ki culture se bhi pyaar nahin hota, isse siddha hai ki aap bhaarat vaale hi ho। sirf seva ke liye gaye ho, vishwa seva hai na। to vishwa seva ke kaaran alag-alag sthaan mein pahunche ho। bhaashaayen dekho kitni hain। to bhaarat se bhaashaayen seekhne jaayen ya seva karne jaayen, isliye aapko seva ke liye vahaan ka janma mila hai। aadi satayug mein bhi bhaarat mein the,beech mein bhi bhaarat ke hi the,abhi thode samay ke liye seva ke liye gaye hue ho। nasha hai na – ham bhaarat ke hain! beej aapka bhaarat hi hai। khushi hoti hai na,ham bhaarat ke hain। the, hain aur honge। har kalpa mein honge। achha।

pees aaph mind retreat ke guest bhi baithe hain - achha hai, aap sabhi guest nahin ho lekin host ho। bachche jo sabhi hain woh sab host hain, guest nahin hain। nishaani mein kehte hain guest lekin ho host। madhuban achha lagta hai na?abhi auron ko bhi nimantran dekar apne saathi banaana। hamesha aise hi samjho ki ham parmaatma sandesh dene vaale sandeshvaahak hain। achha hai। to sada baap ki yaad aur seva karte rehna। achha।

paandav bhavan mein bhi bahut baithe hain, gyaan sarovar,shaantivan sabhi jagah sun rahe hain -science ka phaayda to aap log le rahe hain। science aapke liye hi bani hai। jab se sthaapna ka part hua hai to thoda samay pahle hi yeh science ki invention teevragti par ja rahi hai। log chaahe phaayda leven, nuksaan leven। lekin aap to phaayda le rahe ho na। isliye baapdaada science ke saadhan dene vaalon ko bhi mubaarak dete hain। neeche bhi aaraam se sun rahe hain। videsh mein bhi koi-koi sun rahe hain, mohini behen (New York) aur chandru behen (senaphraansisko) bhi sun rahe hain। (Newyork ki mohini behen ne operation karaaya hai) chaahe beemaari aati hai,chaahe seva aati hai, donon ko apni shakti se paar karke vijayi ban jaate hain। yeh beemaari bhi ek paper hai। jaise aur paper paas karte ho aise yeh bhi ek paper paas ho jaata hai aur sahaj paas ho jaata hai।

to madhuban nivaasi jo bhi hain,baapdaada shaantivan, hospital,aabu nivaasi,gyaan sarovar nivaasi,sangam nivaasi, sabhi ko madhuban nivaasi kehte hain। achha hai,yeh bhi achha punya kamaaya jo auron ko chance diya, to chance dena bhi aapke punya ke khaate mein jama ho gaya। aaraam se baith kar sun rahe hain। to baapdaada jo bhi neeche sun rahe hain,pahle yaad unhon ko de rahe hain। unke saath-saath jo foreign mein sun rahe hain, jo door baithe sun rahe hain, chaahe bhaarat mein chaahe videsh mein, un sabko bhi pahle yaad de rahe hain। aur saath mein sabhi bachchon ne jinhonne bhi card bheje hain, patra bheje hain, woh sabke patra, card, dil ke samaachaar, seva ke samaachaar, himmat ke samaachaar sab baapdaada ke paas pahunch gaye hain aur baapdaada return mein ek-ek bachche ko naam sahit dil se bahut-bahut yaadapyaar de rahe hain। bahut pyaar se patra likhte hain। kitna kharcha karte hain। card kitna badhiya bhejte hain। lekin baapdaada kharcha ko nahin dekhte,unhon ke pyaar ko dekhte hain। pyaar ke aage koi badi cheez nahin hai। achha।

hospital ke sabhi trustee bhi aaye hain -achha hai,yeh hospital bhi vishwa mein aavaaj phailaane ka achha saadhan hai kyonki ismen double laabh mil jaata hai। ek shareer ka aur doosra aatma ko bhi laabh milta hai, double laabh hai iseelie baapdaada, jo bhi hospital mein trustee hain va sevaadhaari hain,sabhi ko vishesh seva ki mubaarak dete hain। yeh hospital,naam hospital hai lekin hai aatmaon ko baap se milaane ka saadhan। hospital ke naam se sahaj aa jaate hain। to sab achha chal raha hai na। jahaan bhi hospital hain, theek chal rahe hain। baambe ka achha chal raha hai? global hospital ka to naam prasiddha ho gaya hai। bahut achha hai। mubaarak ho।

videsh ke puraane-puraane bhaai-bahnon ko dekh kar -achha hai aadi ratna ho na। yeh chaarla bhi aadi hai। baapdaada ko khushi hoti hai ki aadi ratna,foreign seva ke aadi ratna bahut achhe sevaadhaari hain। athak bhi hain aur aage badhne vaale bhi hain। (25varsha vaale bahut baithe hain) achha - sabhi lamba haath uthaao। achha hai। amar bhav ke vardaani hain। janma se amar vardaan mila hai। amar rahe hain, amar rahenge। achha hai। sabka milan ho gaya ya koi rah gaya?

sindhi group rah gaya -sindhi to abhi brahman group ho gaya। abhi apne ko sindhi samajhte ho ya brahman?kya samajhte ho? lekin nasha hai ki jahaan se brahma baap nikla vahaan ke ham hain। yeh nasha bhi achha hai lekin abhi to brahman parivaar ke vishesh sevaadhaari aatmaayen ho। sevaadhaari ho na? baapdaada jaante hain ki seva ka shauk saare group ko hai। aur dheere-dheere sindhi group ko badha rahe hain,badhta rehta hai, badhta rahega। iseelie aap sabko double mubaarak hai, ek sindhi hone ki aur doosra brahman jeevan ki। achha hai sabhi pakke hain। baapdaada dekh karke khush hain। achha।

dekho,double videshi kitne sevaadhaari ho,aapke kaaran sabko yaadapyaar mil raha hai। baapdaada ko bhi double videshiyon se jyaada to nahin kahenge lekin special pyaar hai। kyon pyaar hai? kyonki double videshi aatmaayen joseva ke nimitta ban gaye hain,woh vishwa ke kone-kone mein baap ka sandesh pahunchaane ke nimitta bane hue hain। nahin to videsh ki aatmaayen chaaron or ki pyaasi rah jaati। abhi baap ko ulhana to nahin milega na ki bhaarat mein aaye, videsh mein kyon nahin sandesh diya। to baap ka ulhana poora karne ke nimitta bane ho। aur janak ko to umang bahut hai, koi desh rah nahin jaave। achha hai। baap ka ulhana to poora karenge na! lekin aap (daadi jaanki) saathiyon ko thakaati bahut ho। thakaati hai na! jayanti,thakaati nahin hai? lekin is thakaavat mein bhi mauj samaai hui hoti hai। pahle lagta hai ki yeh baar-baar kya hai, lekin jab bhaashan karke duaayen le aate hain na to chehra badal jaata hai। achha hai, donon daadiyon mein umang-utsaah badhaane ki visheshta hai। yeh shant karke baith nahin sakte। seva abhi rahi hui to hai na? agar naksha leke dekho chaahe bhaarat mein, chaahe videsh mein, agar nakshe mein ek-ek sthaan par right lagaate jaao to dikhaai denge ki abhi bhi rahe hue hain। isliye baapdaada khush bhi hote hain aur kehte bhi hain jyaada nahin thakaao। aap sab seva mein khush ho na! abhi yeh kumaariyaan bhi to teacher banengi na। jo teacher hain woh to hain hi lekin jo teacher nahin hain woh teacher banke koi na koi centre sambhaalengi na। hands banengi na! double videshi bachchon ko donon kaam karne ka abhyaas to hai hi। job bhi karte hain centre bhi sambhaalte hain,iseelie baapdaada double mubaarak bhi dete hain। achha -

chaaron or ke ati snehi, ati sameep sada aadikaal se ab tak royalty ke adhikaari, sada apne chehre aur chalan se purity ki jhalak dikhaane vaale, sada svayan ko seva aur yaad mein teevra purooshaartha dvaara number one banne vaale, sada baap ke samaan sarva shakti,sarva gun sampanna swaroop mein rahne vaale, aise sarva taraph ke har ek bachche ko baapdaada ka yaadapyaar aur namaste।

daadi ji se - (tabiyat theek hai) hai hi theek, aur sada theek rehna hi hai। sabhi ki duaayen mil gai hain na। duaayen sabse badi davaai hai। yeh duaaon ki davaai theek kar rahi hai,baaki to nimitta hai। (aapki bhi davaai roj lete hain) woh bhi duaayen hain। sabka daadiyon se bahut pyaar hai na। kitna pyaar hai? baap ka to hai hi। lekin saakaar roop mein to aap log ho na। nimitta to hain na!

videsh ki mukhya teachers bahnon se - sabhi ne seva ke plan achhe-achhe banaaye hain na kyonki seva samaapta ho tab aapka raajya aaye। to seva ka saadhan bhi aavashyak hai। lekin mansa bhi ho, vaacha bhi ho, saath-saath ho। seva aur sva-unnati donon hi saath hon। aisi seva saphalta ko sameep laati hai। to seva ke nimitta to ho hi aur sabhi apne-apne sthaan par seva to achhi kar hi rahe ho। baaki abhi jo kaam diya hai,uska plan banaao। uske liye kya-kya svayan mein va seva mein vriddhi chaahiye,addition chaahiye woh plan banaao। baaki baapdaada sevaadhaariyon ko dekh karke khush to hote hi hain। sabhi achhe sevaakendra unnati ko pa rahe hain na! unnati hai na?achha hai। achha ho raha hai na। ho raha hai aur hota rahega। abhi sirf jo alag-alag bikhre hue hain, unke sangathan karke unhon ko pakka karo। practical saboot sabke aage dikhaao। chaahe koi bhi seva kar rahe ho, bhinna-bhinna plan banaate ho, kar bhi rahe ho, achhe chal bhi rahe hain,abhi un sabhi ka group ek saamne laao। jo seva ka saboot saare brahman parivaar ke saamne aa jaae। theek hai na! baaki sabhi achhe ho, achhe te achhe ho।

achha। om shanti।