Avyakt murli for Thursday 13 February 2003

>

13-02-03 om shanti avyakt baapdaadaamdhuban

“vartamaan samay apna merciful aur daata swaroop pratyaksha karo”

aaj vardaata baap apne gyaan daata, shakti daata, gun daata, parmaatma sandesh vaahak bachchon ko dekh rahe hain। har ek bachcha master daata ban aatmaon ko baap ke sameep laane ke liye dil se prayatna kar rahe hain। vishwa mein anek prakaar ki aatmaayen hain, kin aatmaon ko gyaan amrit chaahiye, anya aatmaon ko shakti chaahiye,gun chaahiye,aap bachchon ke paas sarva akhanda khazaane hain। har ek aatma ki kaamna poorn karne vaale ho। din-pratidin samay samaapti ka sameep aane ke kaaran ab aatmaayen koi naya sahaara dhoondh rahi hain। to aap aatmaayen naya sahaara dene ke nimitta bani hui ho। baapdaada bachchon ke umang-utsaah ko dekh khush hai। ek taraph aavashyakta hai aur doosre taraph umang-utsaah hai। aavashyakta ke samay ek boond ka bhi mahattva hota hai। to is samay aapki di hui anchali ka, sandesh ka bhi mahattva hai।

vartamaan samay aap sabhi bachchon ka merciful aur daata swaroop pratyaksha hone ka samay hai। aap brahman aatmaon ke anaadi swaroop mein bhi daataapan ke sanskaar bhare hue hain isliye kalpa vriksha ke chitra mein aap vriksha ke jad mein dikhaaye hue hain kyonki jad dvaara hi saare vriksha ko sab kuchh pahunchta hai। aapka aadi swaroop devta roop, uska arth hi hai dev ta arthaat dene vaala। aapka madhya ka swaroop poojya chitra hain to madhya samay mein bhi poojya roop mein aap vardaan dene vaale, duaayen dene vaale, aasheervaad dene vaale daata roop ho। to aap aatmaon ka vishesh swaroop hi daataapan ka hai। to abhi bhi parmaatma sandesh vaahak ban vishwa mein baap ki pratyakshata ka sandesh phaila rahe hain। to har ek brahman bachcha check karo ki anaadi, aadi daataapan ke sanskaar har ek ke jeevan mein sada emerge roop mein rehte hain?daataapan ke sanskaar vaali aatmaon ki nishaani hai - woh kabhi bhi yeh sankalp-maatra bhi nahin karte ki koi de to deven, koi kare to karen,nahin। nirantar khule bhandaar hain। to baapdaada chaaron or ke bachchon ke daataapan ke sanskaar dekh rahe the। kya dekha hoga? nambarvaar to hai hi na! kabhi bhi yeh sankalp nahin karo - yeh ho to main bhi yeh karoon। daataapan ke sanskaar vaale ko sarva taraph se sahayog svatah praapta hota hai। na sirf aatmaon dvaara lekin prakriti bhi samay pramaan sahayogi ban jaati hai। yeh sookshm hisaab hai ki jo sada daata banta hai, us punya ka phal samay par sahayog,samay par saphalta us aatma ko sahaj praapta hota hai। isliye sada daataapan ke sanskaar emerge roop mein rakho। punya ka khaata ek ka 10 guna phal deta hai। to saare din mein note karo – sankalp dvaara, vaani dvaara, sambandh-samparka dvaara punya aatma ban punya ka khaata kitna jama kiya? mansa seva bhi punya ka khaata jama karti hai। vaani dvaara kisi kamzor aatma ko khushi mein laana, pareshaan ko shaan ki smriti mein laana, dilshikasta aatma ko apni vaani dvaara umang-utsaah mein laana, sambandh-samparka se aatma ko apne shreshtha sang ka rang anubhav karaana,is vidhi se punya ka khaata jama kar sakte ho। is janma mein itna punya jama karte ho jo aadhaakalpa punya ka phal khaate ho aur aadhaakalpa aapke jad chitra paapi aatmaon ko vaayumandal dvaara paapon se mukta karte hain। patit-paavni ban jaate ho। to baapdaada har ek bachche ka jama hua punya ka khaata dekhte rehte hain।

baapdaada vartamaan samay ka bachchon ka seva ka umang-utsaah dekh khush ho rahe hain। majority bachchon mein seva ka umang achha hai। sabhi apne-apne taraph se seva ka plan practical mein la rahe hain। iske liye baapdaada dil se mubaarak de rahe hain। achha kar rahe hain aur achha karte rahenge। sabse achhi baat yeh hai - sabhi ka sankalp aur samay busy ho gaya hai। har ek ko yeh lakshya hai ki chaaron or ki seva se abhi ulhanen ko poora zaroor karna hai। daadi kehti hai 9 laakh chaahiye, agar3-4 jagah par laakh-laakh aayenge, to kya hoga! 6 laakh to hain,baaki 3laakh chaahiye na। to itne sab jo sandesh de rahe ho desh mein ya videsh mein bhi baapdaada ne suna umang achha hai। bana rahe hain na - vahaan bhi bahut achhe programme bana rahe hain। har ek sthaan ki vidhi apni hoti hai lekin seva ka umang sabhi mein hai। to9 laakh kya, 3 laakh badhaane hain woh kya badi baat hai। badi baat hai?pahla number gujraat ne beeda uthaaya hai,achha kiya hai। gujraat ke kitne centre hain? (200centre hain, 1000upsevaakendra/paathshaalaayen hain), ek ek centre se agar10-10 bhi aa jaaen to kitne ho jaayenge? aise dilli hai, baambe hain,madraas hai। madraas ki to flying udne vaali hai। kalkatta hai,haidraabaad hai,foreign hai।3 laakh kya badi baat hai! hai badi baat? teachers bataao badi baat hai? to 9laakh ho jaayenge na! ismen haath nahin hila rahe ho! paandav haath hila rahe hain। braahmanon ke dridh sankalp mein bahut shakti hai। agar brahman dridh sankalp karen to kya nahin ho sakta! sab ho jaayega sirf yog ko jvaala roop banaao। yog jvaala roop ban jaayega to jvaala ke peechhe aatmaayen svatah hi aa jaayengi kyonki jvaala (light) milne se unhon ko raasta dikhaai dega। abhi yog to laga rahe hain lekin yog jvaala roop hona hai। seva ka umang-utsaah achha badh raha hai lekin yog mein jvaala roop abhi underline karni hai। aapki drishti mein aisi jhalak aa jaae jo drishti se koi na koi anubhooti ka anubhav karen।

baapdaada ko, foreign vaalon ne yeh jo seva ki thi - kaal aaph time vaalon ki, uski vidhi achhi lagi ki chhote se sangathan ko sameep laaya। aise har zone,har centre alag-alag seva to kar rahe ho lekin koi sarva vargo ka sangathan banaao। baapdaada ne kaha tha ki bikhri hui seva bahut hai,lekin bikhri hui seva se kuchh sameep aane vaali yogya aatmaon ka sangathan chuno aur samay prati samay us sangathan ko sameep laate raho aur unhon ko seva ka umang badhaao। baapdaada dekhte hain ki aisi aatmaayen hain lekin abhi woh powerful paalna, sangathit roop mein nahin mil rahi hai। alag-alag yathaashakti paalna mil rahi hai, sangathan mein ek do ko dekhkar bhi umang aata hai। yeh,ye kar sakta hai, main bhi kar sakta hoon,main bhi karoonga, to umang aata hai। baapdaada abhi seva ka pratyaksha sangathit roop dekhne chaahte hain। mehnat achhi kar rahe ho, har ek apne varga ki,area ki,zone ki, centre ki kar rahe ho,baapdaada khush hote hain। ab kuchh saamne laao। pravritti vaalon ka bhi umang baapdaada ke paas pahunchta hai aur double foreigners ka bhi double kaarya mein rehte seva mein svayan ke purooshaartha mein umang achha hai, yeh dekh karke bhi baapdaada khush hai।

brahman aatmaayen vartamaan vaayumandal ko dekh videsh mein darte to nahin hain? kal kya hoga, kal kya hoga… yeh to nahin sochte hain? kal achha hoga। achha hai aur achha hi hona hai। jitni duniya mein halchal hogi utni hi aap braahmanon ki stage achal hogi। aise hai?double videshi halchal hai ya achal hai? achal hai? halchal mein to nahin hain na! jo achal hain woh haath uthaao। achal hain?kal kuchh ho jaaye to? to bhi achal hain na! kya hoga, kuchh nahin hoga। aap braahmanon ke oopar parmaatma chhatrachhaaya hai। jaise waterproof kitna bhi water ho lekin waterproof dvaara waterproof ho jaate hain। aise hi kitni bhi halchal ho lekin brahman aatmaayen parmaatma chhatrachhaaya ke andar sada proof hain। bephikar baadshaah ho na! ki thoda-thoda phikar hai, kya hoga? nahin। bephikar। svaraajya adhikaari ban,bephikar baadshaah ban, achal- adol seat par set raho। seat se neeche nahin utro। upset hona arthaat seat par set nahin hai to upset hain। seat par set jo hai woh svapna mein bhi upset nahin ho sakta।

maataayen kya samajhti ho?seat par set hona, baithna aata hai? halchal to nahin hoti na! baapdaada combined hai,jab sarvashaktivaan aapke combined hai to aapko kya dar hai! akele samjhenge to halchal mein aayenge। combined rahenge to kitni bhi halchal ho lekin aap achal rahenge। theek hai maataayen? theek hai na, combined hain na! akele to nahin? baap ki jimmevaari hai, agar aap seat par set ho to baap ki jimmevaari hai, upset ho to aapki jimmevaari hai।

aatmaon ko sandesh dvaara anchali dete rahenge to daata swaroop mein sthit rahenge,to daataapan ke punya ka phal shakti milti rahegi। chalte phirte apne ko aatma karaavanhaar hai aur yeh karmendriyaan karanhaar karmachaari hain,yeh aatma ki smriti ka anubhav sada emerge roop mein ho, aise nahin ki main to hoon hi aatma। nahin,smriti mein emerge ho। merge roop mein rehta hai lekin emerge roop mein rahne se woh nasha, khushi aur controlling power rehti hai। maja bhi aata hai,kyon! saakshi ho karke karma karaate ho। to baar-baar check karo ki karaavanhaar hokar karma kara rahi hoon? jaise raaja apne karmachaariyon ko order mein rakhte hain, order se karaate hain,aise aatma karaavanhaar swaroop ki smriti rahe to sarva karmendriyaan order mein rahengi। maaya ke order mein nahin rahengi,aapke order mein rahengi। nahin to maaya dekhti hai ki karaavanhaar aatma albeli ho gai hai to maaya order karne lagti hai। kabhi sankalp shakti, kabhi mukh ki shakti maaya ke order mein chal padti hai। iseelie sada har karmendriyon ko apne order mein chalaao। aise nahin kahenge - chaahte to nahin the, lekin ho gaya। jo chaahte hain vahi hoga। abhi se raajya adhikaari banne ke sanskaar bharenge tab hi vahaan bhi raajya chalaayenge। svaraajya adhikaari ki seat se kabhi bhi neeche nahin aao। agar karmendriyaan order par rahengi to har shakti bhi aapke order mein rahegi। jis shakti ki jis samay aavashyakta hai us samay ji haajir ho jaayegi। aise nahin kaam poora ho jaae aur aap order karo sahanshakti aao, kaam poora ho jaaye phir aave। har shakti aapke order par ji haajir hogi kyonki yeh har shakti parmaatma den hai। to parmaatma den aapki cheez ho gai। to apni cheez ko jaise bhi use karo, jab bhi use karo,aise yeh sarva shaktiyaan aapke order par rahengi, sarva karmendriyaan aapke order par rahengi, isko kaha jaata hai svaraajya adhikaari, master sarvashaktivaan। aise hai paandav?master sarva shaktivaan bhi hain aur svaraajya adhikaari bhi hain। aise nahin kehna ki mukh se nikal gaya,kisne order diya jo nikal gaya! dekhne nahin chaahte the, dekh liya। karne nahin chaahte the,kar liya। yeh kiske order par hota hai?isko adhikaari kahenge ya adheen kahenge?to adhikaari bano, adheen nahin। achha।

sabhi pahunch gaye hain,yeh sangathan bhi kitna pyaara lagta hai। baap ko bhi bachchon ka sangathan achha lagta hai। apne parivaar ko dekhne ka chance to milta hai। kisko kah to sakte hain ki hamne apne bade parivaar ko dekha hai। madhuban mein sab salvation mil rahi hai na! paani mila? paani mil raha hai na! khaana, sona,milna,sab mil raha hai। baapdaada kehte hain jaise abhi madhuban mein sab bahut-bahut khush ho, aise hi sada khush-aabaad rehna। roohe gulaab hain। dekho,chaaron or dekho sabhi roohe gulaab khile hue gulaab hain। murjhaaye hue nahin hain, khile hue gulaab hain। to sada aise hi khushanseeb aur khushnumah chehre mein rehna। koi aapke chehre ko dekhe to aapse poochhe – kya mila hai aapko,bade khush ho! har ek ka chehra baap ka parichay de। jaise chitra parichay dete hain aise aapka chehra baap ka parichay de ki baap mila hai। achha।

sab theek hain? videsh vaale bhi pahunch gaye hain। achha lagta hai na yahaan? (mohini behen-Newyork) chalo halchal sunne se to bach gai। achha kiya hai, sabhi ikatthe pahunch gaye hain, bahut achha kiya hai। achha - double foreigners,double nasha hai na! kaho itna nasha hai jo dil kehta hai ki agar hain to ham double videshi hain। double nasha hai, svaraajya adhikaari so vishwa adhikaari। double nasha hai na! baapdaada ko bhi achha lagta hai। agar kisi bhi group mein double videshi nahin hote hain to achha nahin lagta hai। vishwa ka pita hai na to vishwa ke chaahiye na! sab chaahiye। maataayen nahin hon to bhi raunak nahin। paandav nahin ho to bhi raunak kam ho jaati hai। dekho jis centre par koi paandav naheenho sirf maataayen hon to achha lagega! aur sirf paandav hon, shaktiyaan nahin ho, to bhi sevaakendra ka shringaar nahin lagta hai। donon chaahiye। bachche bhi chaahiye। bachche kehte hain, hamaara naam kyon nahin liya। bachchon ki bhi raunak hai।

mahaaraashtra-aandhra pradesh ke seva ka tarna hai - achha hai yeh bhi najdeek aane ka chance hai। nahin to group mein jab aate ho to special daadiyaan nahin milti hain। seva mein aate ho to special daadiyaan bhi milti hain na! achha। mahaaraashtra utho। mahaaraashtra ki bhujaayen bahut hain,isi kaaran jaise naam hai mahaaraashtra to sankhya bhi maha hai। baapdaada ne samaachaar suna hai ki mahaaraashtra bhi chance le raha hai। achha - itne hi centres ke, yeh 3laakh jo poore karne hain, mahaaraashtra bhi kar raha hai,gujraat bhi kar raha hai, panjaab bhi kar raha hai… to 3 laakh to poore ho hi jaayenge। aur bhi kar rahe hain। 3 laakh to koi badi baat nahin hai। 3 laakh poore karenge? panjaab,karenge?gujraat bhi karega। aur bhi kar rahe hain। jab doosri season ho to baapdaada ko khushkhabri mile ki 9 laakh brahman ho gaye। theek hai,ho jaayenge?abhi to 9laakh hai, 9karod tak jaana hai। achha - dekho satayug mein shuru-shuru mein 9 laakh honge, treta tak badhenge ya badhenge hi nahin! to taiyaar to karne hain na! bahut achha, mahaaraashtra sada mahaan sthiti mein sthit rahne vaale maha raashtra। achha।

bhopaal - bhopaal mein bhi vriddhi ho rahi hai na! to 3 laakh mein bhopaal kitna add karega? (50hajaar bhopaal laayega) mubaarak ho, bahut achha। kya badi baat hai, vishwa kalyaankaari hai to 50hajaar ka kyon nahin kalyaan karenge! ho jaayega। bahut achha chance liya, isliye chancellor ban gaye। maataayen bhi hain, paandav bhi hain, bahut achha। chance lene mein sada aage badhna chaahiye। har baat ka chance lene mein, ulte kaam mein nahin,sulte kaam mein। yeh bhopaal bhi achha aadi se nimitta bane hain। baapdaada har zone ko mubaarak dete hain। to mubaarak ho aur sada vriddhi ko paate rahenge। achha।

transport wing -transport vaale to sabhi ko plen se bhi ooncha udaayenge na। plen to yahaan tak chalta hai,aap to paramdham tak uda lenge। teenon lokon ka sair karaane vaale transport hai। achha hai yeh jo varga banaaye hain usmein bhi har ek varga apne varga ko jaagrat karne ke umang-utsaah mein achhe rehte hain। race bhi karte hain। paandavon ne baapdaada ko ek drishya dikhaaya,kaun sa?yahaan shaantivan ka drishya dekha। har ek varga ke table lage hue hain aur har varga vaale ek do se race karte hain, ham bhi aage, ham bhi aage। baapdaada ne khaas T.vi. mein dekha, table sajaakar rakhte hain। achha hai,umang utsaah achha hai lekin rees nahin karna, race zaroor karna। transport bhi achha umang-utsaah mein hai। koi naveenta ke plan nikaale honge। achha hai, baapdaada khush hai।

engineer-scientist wing - science aur engineer,aap logon ne to bahut plan banaaye honge। aisa plan banaao jo jaldi se jaldi jaise aajkal science bahut fast ja rahi hai to aap bhi aisa seva ka plan banaao jo jaldi se jaldi sthaapna ki building taiyaar ho jaae,tab to vinaash hoga na। sthaapna ke kaarya ki building jaldi se jaldi taiyaar ho jaae। engineers bhi kar sakte hain to science vaale bhi kar sakte hain। abhi teevragti ka koi plan banaao। drishti di aur drishti se srishti badal jaae, aise hona hai। last mein aapke ek second ki drishti kamaal karegi। mehnat nahin karni padegi। aisi koi nai invention nikaalo। achha hai। varga ki seva to ho rahi hai। achha।

gujraat ne achha jump lagaaya - (gujraat mein 23 February ko1 laakh ki sabha ikatthi kar vishaal programme kar rahe hain)gujraat ki teachers aur paandav utho। kam aaye hain,taiyaari kar rahe hain। achha hai, abhi gujraat ko sab follow karenge। ek do ko dekhkar umang aata rahega। achha baith jaao,bahut achhi himmat rakhi hai। himmat rakhne ki baapdaada in advance gujraat ko mubaarak de rahe hain।

achha - abhi ek second mein niraakaari aatma ban niraakaar baap ki yaad mein lavleen ho jaao। (drill)

chaaron or ke sarva svaraajya adhikaari, sada saaksheepan ki seat par set rahne vaali achal adol aatmaayen, sada daataapan ki smriti se sarva ko gyaan,shakti,gun dene vaale merciful aatmaon ko,sada apne chehre se baap ka chitra dikhaane vaale shreshtha aatmaon ko,sada khushanseeb,khushnumah rahne vaale roohe gulaab,roohaani gulaab bachchon ko baapdaada ka yaadapyaar aur namaste।

daadiyon se - (seva ke saath sab taraph 108 ghante yog ke bhi achhe programme chal rahe hain) is yog jvaala se hi vinaash jvaala force mein aayegi। abhi dekho banaate hain programme,phir soch mein pad jaate hain। yog se vikarma vinaash honge,paap karma ka bojh bhasma hoga,seva se punya ka khaata jama hoga। to punya ka khaata jama kar rahe hain lekin pichhle jo kuchh sanskaar ka bojh hai, woh bhasma yog jvaala se hoga। saadhaaran yog se nahin। abhi kya hai,yog to lagaate hain lekin paap bhasma hone ka jvaala roop nahin hai isliye thoda time khatma hota hai phir nikal aata hai। isliye raavan ko dekho, maarte hain, jalaate hain phir yahaan bhi paani mein daal dete hain। bilkul bhasma ho jaae, pichhle sanskaar, kamzor sanskaar bilkul bhasma ho jaaen, bhasma nahin hue hain। marte hain lekin bhasma nahin hote hain,marne ke baad phir jinda ho jaate hain। sanskaar parivartan se sansaar parivartan hoga। abhi sanskaaron ki leela chal rahi hai। sanskaar beech-beech mein emerge hote hain na! naamnishaan khatma ho jaae,sanskaar parivartan - yeh hai vishesh underline ki baat। sanskaar parivartan nahin hain to vyartha sankalp bhi hain। vyartha samay bhi hai, vyartha nuksaan bhi hai। hona to hai hi। (samay karega ya svayan ka purooshaartha) donon milkar karenge, samay bhi svayan ka purooshaartha karaayega। sanskaar milan ki mahaaraas gaai hui hai। jo yaadgaar mein hai mahaaraas, woh sanskaar milan ki mahaaraas hai। abhi raas hoti hai, mahaaraas nahin hui hai। (mahaaraas kyon nahin hoti hain?)underline nahin hai, dridhta nahin hai। albelaapan bhinna-bhinna prakaar ka hai। achha। aap sab to theekaavyakta hi hain na!

daadi ji se - theek checking ho gai। (sab O.ke. hai),theek to rehna hi hai। phir bhi bahut achhe chal rahe hain, chalte rahenge। sabhi ki duaayen chala rahi hain। aap logon ko shareer ki aayu ke hisaab se dekh to sab khush hote hain,itna kar rahe hain, itna chal rahe hain aur chalna hi hai। yeh bhi nishchit hai ki chalna hi hai। achha।

om shanti।