Avyakt murli for Wednesday 30 November 2005

>

30-11-05om shanti avyakt baapdaadaamdhuban

"samay ki sameepta pramaan svayan ko had ke bandhanon se mukta kar sampanna aur samaan bano"

aaj chaaron or ke sampoorn samaan bachchon ko dekh rahe hain। samaan bachche hi baap ke dil mein samaaye hue hain। samaan bachchon ki visheshta hai woh sada nirvighna,nirvikalp,nimaarkan aur nirmal honge। aisi aatmaayen sada svatantra hoti hain, kisi bhi prakaar ke had ke bandhan mein bandhaaymaan nahin hoti। to apne aap se poochho aisi behad ki svatantra aatma bane hain! sabse pahli svatantrata hai dehbhaan se svatantra। jab chaahe tab deh ka aadhaar le, jab chaahe deh se nyaare ho jaae। deh ki aakarshan mein nahin aaye। doosri baat - svatantra aatma koi bhi puraane svabhaav aur sanskaar ke bandhan mein nahin hogi। puraane svabhaav aur sanskaar se mukta hogi। saath-saath kisi bhi dehdhaari aatma ke sambandh-samparka mein aakarshit nahin hogi। sambandh-samparka mein aate nyaare aur pyaare honge। to apne ko check karo - koi bhi chhoti si karmendriyaan bandhan mein to nahin baandhati?apna svamaan yaad karo - master sarvashaktivaan,trikaaldarshi,trinetri,svadarshan chakradhaari, usi svamaan ke aadhaar par kya sarvashaktivaan ke bachche ko koi karmendriy aakarshit kar sakti? kyonki samay ki sameepta ko dekhte apne ko dekho - second mein sarva bandhanon se mukta ho sakte ho? koi bhi aisa bandhan raha hua to nahin hai? kyonki last paper mein number one hone ka pratyaksha pramaan hai, second mein jahaan, jaise man-buddhi ko lagaane chaaho vahaan second mein lag jaaye। halchal mein nahin aaye। jaise sthool shareer dvaara jahaan jaane chaahte ho,ja sakte ho na। aise buddhi dvaara jis sthiti mein sthit hone chaaho usmein sthit ho sakte ho?jaise science dvaara light house, might house hota hai,to second mein switch on karne se light house chaaron or light dene lagta hai, might dene lagte hain। aise aap smriti ke sankalp ka switch on karne se light house,might house hoke aatmaon ko light, might de sakte ho?ek second ka order ho ashareeri ban jaao,ban jaayenge na। ki yuddha karni padegi?yeh abhyaas bahutkaal ka hi ant mein sahayogi banega। agar bahutkaal ka abhyaas nahin hoga to us samay ashareeri banna, mehnat karni padegi। isliye baapdaada yahi ishaara dete hain - ki is abhyaas ko saare din mein karma karte hue bhi abhyaas karo। iske liye man ke controlling power ki aavashyakta hai। agar man control mein aa gaya to koi bhi karmendriy vasheebhoot nahin kar sakti। abhi sarva aatmaon ko aapke dvaara shakti ka vardaan chaahiye। aatmaon ki aap master sarvashaktivaan aatmaon ke prati yahi shubh ichchha hai ki bina mehnat ke vardaan dvaara,drishti dvaara, vibration dvaara humein mukta karo। abhi mehnat karke sab thak gaye hain। aap sab to mehnat se mukta ho gaye ho na! ki abhi bhi mehnat karni padti hai?sunaaya tha - mehnat se mukta hone ka sahaj saadhan hai dil se baap ke ati snehi ban jaana। aap brahman aatmaon ka janma ka vaayda hai, yaad hai vaayda? jab baap ne apna banaaya, brahman jeevan di to brahman jeevan ka aap sabka vaayda kya hai? ek baap doosra na koi। yaad hai vaayda? yaad hai? kaandh hilaao। achha haath hila rahe hain। yaad hai pakka ya kabhi-kabhi bhool jaata hai? dekho63 janma to bhoolne vaale bane, ab yeh ek janma smriti swaroop bane ho। to baap bachchon se poochh rahe hain bachpan ka vaayda yaad hai?kitna sahaj karke diya hai - ek baap mein sansaar hai। ek baap se sarva sambandh hain। ek baap se sarva praaptiyaan hain। ek hi padhaane vaala bhi hai aur paalna karne vaala bhi hai। sabmen ek hai। chaahe parivaar bhi hai,eeshvareey parivaar lekin parivaar bhi ek baap ka hai। alag-alag baap ka parivaar nahin hai। ek hi parivaar hai। parivaar mein bhi ek do mein aatmik sneh hai, sneh nahin aatmik sneh। baapdaada yaad dila rahe hain, janma ke vaayde। aur kya vaayda kiya? sabhi ne bade umang-utsaah se baap ke aage dil se kaha,sabkuchh aapka hai। tan-man-dhan sab aapka hai। to di hui cheez baap ki amaanat ke roop mein baap ne kaarya mein lagaane ke liye diya hai,aapne baap ko de di, de di hai na? ya vaapas thoda-thoda le lete ho? vaapas lete ho to amaanat mein khyaanat ho jaati hai। koi-koi bachche kehte hain, roohrihaan karte hain na to kehte hain mera man pareshaan rehta hai, mera man aaya kahaan se? jab mera tere ko arpan kiya,to mera man aaya kahaan se?aap sabhi to bin kaudi baadshaah ho gaye,abhi aapka kuchh nahin raha,bin kaudi ho gaye lekin baadshaah ho gaye। kyon?baap ka khazaana woh aapka khazaana ho gaye, to baadshaah ho gaye na। parmaatma khazaana woh bachchon ka khazaana। to baapdaada vaayde yaad dila rahe hain। tere mein mera nahin karo। baap kehte hain - jab baap ne aap sabko parmaatma khazaanon se maalaamaal kar diya, jimmevaari baap ne le li,kin shabdon mein? aap mujhe yaad karo to sarvapraapti ke adhikaari ho hi। sirf yaad karo। aur aapne kaha ham aapke,aap hamaare। yeh vaayda hai na! to baap kehte hain khazaanon ko sada sva prati aur sarva aatmaon ke prati kaarya mein lagaao। jitna kaarya mein lagaayenge utna hi khazaana badhta jaayega। sarvashaktiyon ka khazaana, sarva shaktiyaan kaarya mein lagaao। sirf buddhi mein knowledge nahin rakho main sarvashaktivaan hoon, lekin sarva shaktiyon ko samay pramaan kaarya mein lagaao aur seva mein lagaao।

baapdaada ne majority bachchon ke potaamel mein dekha hai do shaktiyaan agar sada yaad rahen aur kaarya mein samay par lagaao to sada hi nirvighna raho। vighna ki taakat nahin hai aapke aage aane ki। yeh baap ki guarantee hai। vaise to sarvashaktiyaan chaahiye lekin majority dekha gaya ki sahanshakti aur realisation ki shakti,realise karte bhi ho lekin usko practical mein swaroop mein laane mein attention kam hai। isliye jis samay realise karte ho us samay chalan aur chehra badal jaata hai। bahut achhe umang-utsaah mein aate ho। haan realise kiya lekin phir kya ho jaata hai? anubhvi to sabhi hain na ! phir kya ho jaata hai? usko har samay swaroop mein laana, uski kami ho jaati hai। kyonki yahaan swaroop banna hai। sirf buddhi se jaanna alag cheez hai, lekin usko swaroop mein laana, iski aavashyakta hai। kabhi-kabhi baapdaada ko koi-koi bachchon par raham bhi aata hai, baap samajhte hain bachche se mehnat nahin hoti hai to bachche ke bajaae baap hi kar le। lekin drama ka raaz hai jo karega woh paayega। isliye baapdaada sahayog zaroor deta hai lekin karna phir bhi bachche ko hi padta hai।

baapdaada ne dekha hai bachche sankalp bahut achhe-achhe karte hain। amritvele baapdaada ke paas achhe-achhe sankalpon ki bahut-bahut maalaayen aati hain। yeh karenge,yeh karenge,yeh karenge…,baapdaada bhi khush ho jaate hain, vaah! bachche vaah! phir karne mein kamzor kyon ban jaate hain? iska kaaran dekha gaya - brahman parivaar mein sangathan ka vaayumandal। kahaan-kahaan vaayumandal kamzor bhi hota hai,uska asar jaldi pad jaata hai। phir unhon ki bhaasha bataayen kya hoti hai? bhaasha badi meethi hoti hai, bhaasha hoti hai yeh to chalta hai, yeh to hota hai… aise samay par kya sankalp karo! yeh hota hai, yeh chalta hai, yeh albelaapan laata hai lekin us samay is bhaasha ko parivartan karo ki baap ka pharmaan kya hai?baap ki pasandi kya hai? baap kis baat ko pasanda karta hai?baap ne yeh kaha hai? kiya hai? agar baap yaad aa gaya to albelaapan samaapta ho, umang-utsaah aa jaayega। albelaapan bhi kai prakaar ka aata hai। aap log aapas mein class karna,list nikaalna, ek hai saadhaaran albelaapan,ek hai royal albelaapan। to albelaapan dridhta nahin laata hai aur dridhta saphalta ka saadhan hai। isliye sankalp tak rah jaata hai lekin swaroop mein nahin aata। to aaj kya suna? vaayde yaad karaaye hain na! vaayde itne achhe achhe karte,baapdaada itna khush ho jaate vaayde sunke। lekin jitne vaayde karte ho na utna phaayda nahin uthaate। to baapdaada yahi chaahte hain, poochhte hain na baap kya chaahte hain hamse? to baapdaada yahi chaahte hain ki samay se pahle sab ever ready ban jaao। samay aapka master nahin bane। samay ke master aap ho isliye yahi baapdaada chaahta hai ki samay ke pahle sampanna ban vishwa ki stage par baap ke saath-saath aap bachche bhi pratyaksha ho। achha।

jo naye naye bachche aaye hain milne ke liye, woh haath uthaao। bada haath uthaao, lamba। achha - baapdaada nay naye bachchon ko dekh khush hote hain ki bhaagyavaan bachche apna bhaagya lene ke liye pahunch gaye hain। isliye mubaarak ho, mubaarak ho। abhi jo bhi naye bachche aaye hain unmein se dekhenge kamaal kaun karke dikhaata hai? bhale aaye peechhe hain lekin aage jaake dikhaao। baapdaada ke paas to sab result pahunchti hai। achha।

seva ka tarna dilli-aagra ka hai:- achha dilli vaale utho, haath hilaao। bahut achha kiya hai, chance liya hai। teachers bhi bahut aai hain। achha hai। teachers ko dekhkar baapdaada khush hote hain। kyon?baap ki gaddi ke adhikaari bane ho। baapdaada teachers ko sada bhaai kehte hain। baap samaan sevaadhaari bane aur pravritti mein rahne vaale jo bhi aaye hain,kumaariyaan bhi aai hain, kumaar bhi aaye hain। abhi dehli mein koi naveenta karke dikhaao। mega programme bhi ho gaye, conference bhi bahut hui,vargon ke programme bhi bahut hue hain,abhi naveenta kya karni hai?koi naya plan banaaya hai dilli vaalon ne? banaaya hai? bana rahe hain? baapdaada ke paas vargon ki seva ki report aati hai lekin har ek varga ne jo itna varsha seva ki hai,usmein fast teevra purooshaarthi group kitna nikla har varga ka,woh nahin laaya hai। guldasta nahin laaya hai abhi। chalo badi maala ko chhodo,guldasta to laao। har ek varga ke koi aise example chaahiye jo mike bhi ho aur might bhi ho sirf mike nahin, might bhi ho mike bhi ho। jiska anubhav sunkar auron mein bhi umang aa jaae। baapdaada har varga ka chaahta hai। jo group world mein seva ke yogya ban jaaye। achha hai, dilli vaale dilli ko raajdhaani banaana hai, to pahle to dilli mein aisa vaayumandal paida karo। dilli ka aavaaj to chaaron or sahaj hi phailta hai, yeh to baat hai hi। achha kiya hai,chance liya hai। aadha class to dilli dikhaai de raha hai। abhi naveenta, doosre baari koi naveenta leke hi aana, sirf dilli ko hi nahin kah rahe hain, koi bhi zone koi naya plan banaake aaye usko baapdaada extra sneh shakti ka vardaan denge। jo kar rahe hain woh to kar rahe hain,naya koi plan ho। yeh yaatra nikaalna, form bharaana, yeh bahut ho chuka। abhi koi naya plan banaao। kaanrensaph bhi bahut ho gai,programme bhi bahut ho gaye। socho। dilli ko number one hona chaahiye kyonki dilli mein sabki najar hai। aur dekho draamaanusaar seva ka aadi sthaan dilli raha। chaahe jamuna kinaara hi tha lekin aarambha to hua na। jamuna kinaare par raajya karna hai,to jamuna kinaare par hi seva aarambha ki। abhi ismen bhi number one lo। hain, achhe achhe hain, naya plan banaane vaale hain, baapdaada dekhte hain, hai। dekh rahe hain। to mubaarak ho dilli vaalon ko, lekin naya plan lagaayenge to padamguna mubaarak denge।

950 youth aaye hain:-achha, bada group aaya hai। baapdaada ne samaachaar to suna। yaatra ka plan bana rahe hain। lekin baapdaada yeh chaahte hain ki jo bhi sab zone hain, jahaan tahaan zone hain,aur saare brahman parivaar ke youth kitne hain, aur kya-kya unhon mein parivartan aaya hai, woh practical naam, sthaan aur parivartan,uska practical likhit ho jo government ko diya jaae। government to khud youth ko bulaayegi lekin pahle chaaron or ke youth ke naam sthaan aur parivartan short mein, lamba chauda nahin, parivartan ka book, naam sthaan ka book ho, jo unhon ko dikhaaya jaae। phir woh youth ko aapehi nimantran denge। to aisa plan banaao। abhi kitne aaye hain? (950) to thode hain na! hajaaron ke kareeb youth honge। unka ek book banaao achha, parivartan sahit kyonki log sirf yeh nahin dekhte parivartan kya hua aur usmein paripakva hain?yeh result chaahiye। kyonki government youth ke peechhe kharcha bhi bahut kar rahi hai। parivartan ki koi kamaal dikhaao। achha hai, phir bhi baapdaada ne dekha hai ki youth varga kuchh na kuchh kaarya karta rehta hai। attention hai seva ka। isliye parivartan karke dikhaao। training ki hai na! yeh sab training mein aaye hain na! to training ko practical mein result mein dikhaana phir saara parivaar aapko mubaarak dega। achha।

double videshi:-achha hai double videshi sva par aur seva par attention achha de rahe hain। lekin sirf ismen ek maatra lagaani hai। underline karni hai, jo parivartan ka sankalp lete ho aur achha umang-utsaah,himmat se lete ho, sirf isko underline karte jaao, karna hi hai। badalna hi hai। badalkar vishwa ko badalna hai। yeh dridhta ki underline baar-baar karte jaao। baaki baapdaada khush hai, vriddhi bhi kar rahe hain aur seva aur sva ke oopar attention bhi hai। lekin poora tension nahin gaya hai,attention hai thoda beech-beech mein tension bhi hai, woh samaapta karna hi hai। baaki himmat achhi hai। himmat ki mubaarak hai, sabhi jo bhi baithe hain baap sahit aapke himmat ki mubaarak de rahe hain। taali bajaao। achha। aap to yahaan baithe ho lekin baapdaada ko door baithe bahut bachchon ka yaadapyaar mila hai, aur baapdaada ek-ek bachche ko naynon mein samaate hue bahut-bahut dil ki duaayen de rahe hain। chaahe bhaarat se, chaahe videsh se, bahut bachchon ki yaad aa rahi hai, patra aate hain, email aate hain, sab baba ke paas pahunch gaye hain। achha।

baapdaada ek second mein ashareeri bhav ki drill dekhne chaahte hain,agar ant mein paas hona hai to yeh drill bahut aavashyak hai। isliye abhi itne bade sangathan mein baithe ek second mein dehbhaan se pare sthiti mein sthit ho jaao। koi aakarshan aakarshit nahin kare। (drill)achha।

chaaron or ke teevra purooshaarthi bachchon ko,sada sva-parivartan aur vishwa parivartan ki seva mein tatpar rahnevaale vishesh aatmaon ko,sada brahma baap samaan karmayogi, karma ki, karmendriyon ki aakarshan se mukta aatmaon ko,sada dridhta ko har sankalp,har bol,har karma mein swaroop mein laane vaale baap ke sameep aur samaan bachchon ko baapdaada ka dil ki duaayen aur dil ka yaadapyaar sveekaar ho aur namaste।

daadi ji se:-tandaroosta ho gai। abhi beemaari gai। beemaariyaan mahaarthiyon se vidaai lene ke liye aati hain। andar hi andar kamaarkateet banne ka rehearsal kar rahi hai। (daadi jaanki kah rahi hain daadi bephikar baadshaah hai) aap phikar vaali hain kya? aap bhi bephikar। donon hi part achha baja rahi hain। dekho, sabse bade te bada jimmevaari ka taaj pahanne vaali nimitta to bani na। yeh sab saathi hain,poonchh nahin hain। aap logon ko dekhke umang-utsaah aata hai na। (abhi kya naya karna hai? baba hi kuchh prerna de) baapdaada ne sunaaya ki har varga ka guldasta jo mike bhi ho aur might bhi ho। sirf mike aur samparka vaala nahin, sambandh mein bhi najdeek ho, aisa guldasta nikaalo। phir woh group nimitta banega seva karne ke। woh mike banega aur aap might banengi। unke jigar se nikle baba, tabhi prabhaav padega। unhon ko sambandh mein najdeek laao। kabhi-kabhi hota hai na, to nasha thoda kam ho jaata hai। sambandh samparka mein jahaan bhi aaven vahaan sambandh aur samparka rahe to theek ho jaayenge। achha।

(mohini behen ke ghutne ka operation bahut achha ho gaya hai, aapko bahut-bahut dil se yaad di hai)usko kehna ki baapdaada ne bhi aapki himmat par bahut-bahut dil se duaayen aur yaadapyaar di hai। sabka pyaar bhi hai। achha।