Avyakt murli for Monday 15 October 2007

>

15-10-07 om shanti avyakt baapdaada madhuban

"sangamayug ki jeevanmukta sthiti ka anubhav karne ke liye sab bojh va bandhan baap ko dekar double light bano"

aaj vishwa rachta baapdaada apni pahli rachna ati lovely aur lucky bachchon se milan mela mana raha hai। kai bachche sammukh hain, naynon se dekh rahe hain aur chaaron or ke kai bachche dil mein samaaye hue hain। baapdaada har bachche ke mastak mein teen bhaagya ke teen sitaare chamakte hue dekh rahe hain। ek bhaagya hai - baapdaada ki shreshtha paalna ka, doosra hai shikshak dvaara padhaai ka, teesra hai satguru dvaara sarva vardaanon ka chamakta hua sitaara। to aap sab bhi apne mastak par chamakte hue sitaare anubhav kar rahe ho na! sarva sambandh baapdaada se hai phir bhi jeevan mein yeh teen sambandh aavashyak hain aur aap sabhi sikeeldhe laadle bachchon ko sahaj hi praapta hain। praapta hain na! nasha hai na! dil mein geet gaate rehte hain na - vaah! baba vaah! vaah! shikshak vaah! vaah! satguru vaah! duniya vaale to laukik guru jisko mahaan aatma kehte hain, us dvaara bhi ek vardaan paane ke liye kitna prayatna karte hain aur aapko baap ne janmate hi sahaj vardaanon se sampanna kar diya। itna shreshtha bhaagya kya svapna mein bhi socha tha ki bhagwan baap itna hamaare oopar balihaar jaayega! bhakta log bhagwan ke geet gaate hain aur bhagwan baap kiske geet gaate? aap lucky bachchon ka।

abhi bhi aap sabhi bhinna-bhinna deshon se kis vimaan mein aaye ho?sthool vimaanon mein ki parmaatma pyaar ke vimaan mein sab taraph se pahunch gaye hain! parmaatma vimaan kitna sahaj le aata hai,koi takleeph nahin। to sabhi parmaatma pyaar ke vimaan mein pahunch gaye ho iski mubaarak ho, mubaarak ho,mubaarak ho। baapdaada ek ek bachche ko dekh chaahe pahle baar aaye hain, chaahe bahutkaal se aa rahe hain। lekin baapdaada ek-ek bachche ki visheshta ko jaante hain। baapdaada ka koi bhi bachcha chaahe chhota hai,chaahe bada hai,chaahe mahaaveer hai, chaahe purooshaarthi hai, lekin har ek bachcha sikeeldha hai,kyon? aapne to baap ko dhoondha mila nahin, lekin baapdaada ne aap har bachche ko bahut pyaar,sik, sneh se kone-kone se dhoondha hai। to pyaare hain tab to dhoondha। kyonki baap jaante hain mera koi ek bhi bachcha aisa nahin hai jismen koi bhi visheshta nahin ho। koi visheshta ne hi laaya hai। kam se kam gupta roop mein aaye hue baap ko pahchaan to liya। mera baba kaha, sab kehte ho na mera baba! koi hai jo kehta hai nahin tera baba, koi hai? sab kehte hain mera baba। to vishesh hai na। itne bade bade saainsadaan,bade bade vi.aai.pi. pahchaan nahin sake, lekin aap sabne to pahchaan liya na। apna bana liya na। to baap ne bhi apna bana liya। isi khushi mein palte hue ud rahe ho na! ud rahe ho,chal nahin rahe ho, ud rahe ho kyonki chalne vaale baap ke saath apne ghar mein ja nahin sakenge। kyonki baap to udne vaale hain, to chalne vaale kaise saath pahunchenge! isliye baap sabhi bachchon ko kya vardaan dete hain? pharishta swaroop bhav। pharishta udta hai, chalta nahin hai, udta hai। to aap sabhi bhi udti kala vaale ho na! ho?haath uthaao jo udti kala vaale hain, ki kabhi chalti kala,kabhi udti kala? nahin?sada udne vaale, double light ho na! kyon? socho,baap ne aap sabhi se guarantee li hai ki jo bhi kisi bhi prakaar ka bojh agar man mein, buddhi mein hai to baap ko de do, baap lene hi aaye hain। to baap ko bojh diya hai ya thoda-thoda sambhaal ke rakha hai? jab lene vaala le raha hai, to bojh dene mein bhi sochne ki baat hai kya?ki 63 janma ki aadat hai bojh sambhaalne ki,to kai bachche kabhi kabhi kehte hain chaahte nahin hain, lekin aadat se majboor hain। abhi to majboor nahin ho na! majboor ho ki majboot ho?majboor kabhi nahin banna। majboot hain। shaktiyaan majboot ho ya majboor?majboot hain na? aage baithi hui kya hain? majboot hain na! bojh rakhna achha lagta hai kya?dil lag gai hai, bojh se dil lag gai hai?chhodo, chhodo to chhooto। chhodte nahin hain to chhootte nahin hain। chhodne ka saadhan hai - dridh sankalp। kai bachche kehte hain dridh sankalp to karte hain, lekin,lekin… kaaran kya hai?dridh sankalp karte ho lekin kiye hue dridh sankalp ko revise nahin karte ho। baar-baar man se revise karo aur realise karo,bojh kya aur double light ka anubhav kya! realisation ka course abhi thoda aur underline karo। kehna aur sochna yeh karte ho, lekin dil se realise karo - bojh kya hai aur double light kya hota hai?antar saamne rakho kyonki baapdaada abhi samay ki sameepta pramaan har ek bachche mein kya dekhne chaahte hain? jo kehte hain woh karke dikhaana hai। jo sochte ho woh swaroop mein laana hai kyonki baap ka varsa hai,janma siddha adhikaar hai mukti aur jeevanmukti। sabhi ko nimantran bhi yahi dete ho na to aakar mukti jeevanmukti ka varsa praapta karo। to apne se poochho kya muktidhaam mein mukti ka anubhav karna hai va satayug mein jeevanmukti ka anubhav karna hai va ab sangamayug mein mukti, jeevanmukti ka sanskaar banaana hai? kyonki aap kehte ho ki ham abhi apne eeshvareey sanskaar se daivi sansaar banaane vaale hain। apne sanskaar se naya sansaar bana rahe hain। to ab sangam par hi mukti jeevanmukti ke sanskaar emerge chaahiye na! to check karo sarva bandhanon se man aur buddhi mukta hue hain? kyonki brahman jeevan mein kai baaton se jo past life ke bandhan hain, usse mukta hue ho। lekin sarva bandhanon se mukta hain ya koi koi bandhan abhi bhi apne bandhan mein baandhata hai? is brahman jeevan mein mukti jeevanmukti ka anubhav karna hi brahman jeevan ki shreshthata hai kyonki satayug mein jeevanmukta,jeevanbandh donon ka gyaan hi nahin hoga। abhi anubhav kar sakte ho,jeevanbandh kya hai, jeevanmukta kya hai, kyonki aap sabka vaayda hai, sabka vaayda hai, anek baar vaayda kiya hai, kya karte ho vaayda,yaad hai?kisi se bhi poochhte hain aapke is brahman jeevan ka lakshya kya hai? kya javaab dete ho?baap samaan banna hai। pakka hai na?baap samaan banna hai na?ki thoda thoda banna hai?samaan banna hai na! banna hai samaan? ki thoda bhi ban gaye to chalega! chalega? usko samaan to nahin kahenge na। to baap mukta hai,ya bandhan hai?agar kisi bhi prakaar ka chaahe deh ka,chaahe koi deh ke sambandh, maata pita bandhu sakha nahin, deh ke saath jo karmendriyon ka sambandh hai,us koi bhi karmendriyon ke sambandh ka bandhan hai, aadat ka bandhan hai,svabhaav ka bandhan hai, puraane sanskaar ka bandhan hai, to baap samaan kaise hue? aur roj vaayda karte ho baap samaan banna hi hai। haath uthvaate hain to sabhi kya kehte hain? lakshmi naaraayan banna hai। baapdaada ko khushi hoti hai,vaayda bahut achhe achhe karte hain lekin vaayde ka phaayda nahin uthaate hain। vaayda aur phaayda ka balance nahin jaante। vaaydon ka file baapdaada ke paas bahut bahut bahut bada hai, sabhi ka file hai। aise hi phaayde ka bhi file ho,balance ho,to kitna achha lagega। yeh centres ki teachers baithi hai na। yeh bhi centre nivaasi baithe hain na? to samaan banne vaale hue na। centre nivaasi nimitta bane hue bachche to samaan chaahiye na! hain? hain bhi lekin kabhi-kabhi thoda natkhat ho jaate hain?

baapdaada to sabhi bachchon ka saare din ka haal aur chaal donon dekhte rehte hain। aapki daadi bhi vatan mein thi na,to daadi bhi dekhti thi to kya kehti thi?pata hai,kehti thi baba aisa bhi hai kya?aisa hota hai,aise karte hain, aap dekhte rehte hain? suna,aapki daadi ne kya dekha। abhi baapdaada yahi dekhne chaahte hain ki ek-ek bachcha mukti jeevanmukti ke varse ka adhikaari bane,kyonki varsa abhi milta hai। satayug mein to natural life hogi, abhi ke abhyaas ki natural life,lekin varse ka adhikaar abhi sangam par hai। iseelie baapdaada yahi chaahte hain ki har ek svayan check kare agar koi bhi bandhan kheenchata hai, to kaaran socho। kaaran socho aur kaaran ke saath nivaaran bhi socho। nivaaran baapdaada ne anek baar bhinna-bhinna roop se de diye hain। sarvashaktiyon ka vardaan diya hai, sarvagunon ka khazaana diya hai, khazaane ko use karne se khazaana badhta hai। khazaana hai,sabke paas hai,baapdaada ne dekha hai। har ek ke stock ko bhi dekhta hai। buddhi hai stock room। to baapdaada ne sabka dekha hai। hai, stock mein hai lekin khazaane ko samay par use nahin karte hain। sirf point ke roop se sochte hain, haan yeh nahin karna hai, yeh karna hai, point ke roop se use karte hain, sochte hain lekin point banke point ko use nahin karte hain। iseelie point rah jaati hai, point banke use karo to nivaaran ho jaae। bolte bhi hain, yeh nahin karna hai,phir bhoolte bhi ho। bolne ke saath bhoolte bhi ho। itna sahaj vidhi sunaai hai, sirf hai hi sangamayug mein bindi ki kamaal, bas bindi use karo aur koi maatra ki aavashyakta nahin। teen bindi ko use karo। aatma bindi,baap bindi aur drama bindi hai। teen bindi use karte raho to baap samaan banna koi mushkil nahin। lagaane chaahte ho bindi lekin lagaane ke samay haath hil jaata,to question mark ho jaata ya aashcharya ki rekha ban jaati hai। vahaan haath hilta, yahaan buddhi hilti hai। nahin to teen bindi ko smriti mein rakhna kya mushkil hai?hai mushkil hai?

baapdaada ne to doosri bhi sahaj yukti bataai hai, woh kya? dua do aur dua lo। achha, yog shaktishaali nahin lagta, dhaarnaayen thodi kam hoti hain, bhaashan karne ki himmat nahin hoti hai, lekin dua do aur dua lo, ek hi baat karo aur sab chhodo, ek baat karo, dua leni hai dua deni hai। kuchh bhi ho jaae, koi kuchh bhi de lekin mujhe dua deni hai,leni hai। ek baat to pakki karo, ismen sab aa jaayega। agar dua denge aur dua lenge to kya ismen shaktiyaan aur gun nahin aayenge? automatically aa jaayenge na! ek hi lakshya rakho, karke dekho, ek din abhyaas karke dekho, phir saat din karke dekho, chalo aur baaten buddhi mein nahin aati,ek to aayegi। kuchh bhi ho jaae lekin dua deni aur leni hai। yeh to kar sakte hain ya nahin? kar sakte hain? achha,to jab bhi jaao na to yeh trial karna। ismen sab yogayukta aapehi ho jaayenge। kyonki vesta karma karenge nahin to yogayukta ho hi gaye na। lekin lakshya rakho dua dena hai, dua leni hai। koi kuchh bhi deve,baddua bhi milegi, krodh ki baaten bhi aayengi kyonki vaayda karenge na, to maaya bhi sun rahi hain, ki yeh vaayda karenge, woh bhi apna kaam to karegi na। maayaajeet ban jaayenge phir nahin karengi,abhi to maayaajeet ban rahe hain na,to woh apna kaam karegi lekin mujhe dua deni hai aur dua leni hai। ho sakta hai?ho sakta hai?haath uthaao jo kehte hain ho sakta hai। achha, shaktiyaan haath uthaao। haan,ho sakta hai! to sab taraph ki teachers aai hain na। sab taraph ki teachers aai hai na। to jab aap apne desh mein jaao to pahle pahle sabhi ko ek saptaah yeh homework karna hai aur result bhejni hai, kitne jane class ke member kitne hain, kitne O.ke. hain aur kitne thode kachche aur kitne pakke hain, to O.ke. ke beech mein line lagaana bas aise samaachaar dena। itne jane O.ke.,itne janon mein O.ke. mein lakeer lagi hai। ismen dekho double foreigners aaye hain to double kaam karenge na। ek saptaah ki result bhejna phir baapdaada dekhenge, sahaj hai na, mushkil to nahin hai। maaya aayegi,aap kahenge baba mere ko pahle to kabhi nahin aata tha,abhi aa gaya,yeh hoga, lekin dridh nishchay vaale ki nishchit vijay hai। dridhta ka phal hai saphalta। saphalta na hone ka kaaran hai dridhta ki kami। to dridhta ki saphalta praapta karni hi hai।

double foreigners number one ho jaana। double hai na, double foreigners hain na, to kamaal dikhaana। videsh ke kitne aaye hain? (90 deshon se 300 centres ke aaye hain) to90 kamaal karenge na? 90 desh ke double foreigners hain,aur 10India ke add ho jaayenge to 100 ho jaayenge। to karenge? jo bhi aaye hain,kuchh bhi ho,karke hi dikhaana hai। hai itne dridh ki sochte hain dekhenge, koshish karenge… koi hai aisa, jo samajhte hain koshish karenge,koshish vaale haath uthaao। koi nahin। to mubaarak ho, taali bajaao। daadiyaan kahaan hain? pakka hai। achha hai। kyonki double foreigners ka vaise nature, sanskaar bhi gaaye hue hain ki jo sochte hain karna hai,woh karke hi chhodte hain, yeh double foreigners ki nature gaai hui hai, abhi is nature ko is kaarya mein lagaana। theek hai na! karke hi dikhaana hai, kuchh bhi ho jaae। sahanshakti ka vardaan vishesh leke jaana। lekin baapdaada ne samay prati samay bachchon ki ek scene dekhi hai,bachchon ki scene baap dekhta rehta hai na to kya dekha! ki bachchon ne sahan bahut achha kiya, baapdaada vaah! vaah! kar rahe the bahut achha bahut achha dekh rahe the na,lekin baad mein kya kiya,sahan kar liya,paas ho gaye lekin peechhe samaane ki shakti kam hone ke kaaran, sama nahin sake na,to jahaan tahaan varnan karte rahe, samaane ki shakti nahin thi, sahan karne ki shakti thi, part achha bajaaya lekin samaane ki shakti kam hone ke kaaran phir varnan karne lage aisa hua,aisa hua to ganva diya na। to aise nahin karna। baapdaada bahut drishya dekhte hain bachchon ke, pahle taali bajaate hain phir chup ho jaate hain,to aise nahin karna। sahanshakti, samaane ki shakti, sarvashaktiyon ka ek do se connection hai,iseelie baap ko sarvashaktivaan kaha hai, shaktivaan nahin kaha hai,aapka bhi title master sarvashaktivaan hai, shaktivaan hai kya? sarvashaktivaan hai na? to sarvashaktiyon ka ek do se connection hai iseelie yeh attention rakhna। achha।

baapdaada khush hai, double foreigners ne apne apne sthaanon mein vriddhi ki hai। practical mein merciful merciful ka part achha baja rahe hain। baapdaada ke paas samaachaar to aate rehte hain। baapdaada ne abhi bhi suna afreeka aur Russia donon hi taraph jo bhi rahe hue sthaan hain, usmein sandesh achha de rahe hain aur bhaarat mein har ek varga vaale achhe himmat aur umang se apne apne varga ke taraph se merciful ban aatmaon ko sandesh dene ka, parichay dene ka aur sambandh jodne ka kaarya achhe umang utsaah se kar rahe hain। iski bhi baapdaada mubaarak de rahe hain। haan taali bajaao bhale।

jaise iski taali bajaai na abhi 6 maas baapdaada dete hain kyonki abhi season to shuru honi hi hai, to 6maas, jyaada time de rahe hain। jaise seva umang-utsaah se kar rahe hain aise svayan ko bhi sva ke prati seva,sva seva aur vishwa seva,sva seva arthaat check karna aur apne ko baap samaan banaana। koi bhi kami, kamzori baap ko de do na, kyon rakhi hai, baap ko achha nahin lagta hai। kyon kamzori rakhte ho? de do। dene ke time chhote bachche ban jaao। jaise chhota bachcha koi bhi cheez sambhaal nahin sakta, koi bhi cheez pasanda nahin aati hai to kya karta hai? mummy paapa yeh aap le lo। aise hi koi bhi prakaar ka bojh, bandhan jo achha nahin lagta, kyonki baapdaada dekhta hai, ek taraph yeh soch rahe hain hai to achha nahin,theek to nahin hai lekin kya karoon, kaise karoon, to yeh to achha nahin hai। ek taraph achha nahin hai kah rahe hain, doosre taraph sambhaal ke rakh rahe hain,to isko kya kahen! achha kahen?achha to nahin hai na। to aapko kya banna hai? achhe te achha na। achha bhi nahin,achhe te achha। to jo bhi koi aisi baat ho, baba haajira hajoor hai, usko de do, aur agar vaapas aave to amaanat samajhke phir de do। amaanat mein khyaanat nahin ki jaati hai। kyonki aapne to de di, to baap ki cheez ho gai, baap ki cheez ya doosre ki cheez aapke paas galti se aa jaae, aap almaari mein rakh denge? rakh denge? nikaalenge na। kaise bhi karke, nikaalenge,rakhenge nahin। sambhaalenge to nahin na। to de do। baap lene ke liye aaya hai। aur to kuchh aapke paas hai nahin jo do। lekin yeh to de sakte ho na। ak ke phool hain, woh de do। sambhaalna achha lagta hai kya? to 6 maas jaise abhi umang se kar rahe hain seva, Russia ka bhi samaachaar suna, aur afreeka ka bhi samaachaar suna,auron ka bhi samaachaar sunte rehte hain, kar rahe hain।

abhi sva seva ke prati khaas samay de rahe hain। abhi dekh to liya, baapdaada ne kitne samay se do shabd baar-baar revise karaaye hain, woh do shabd kaun se hain?achaanak aur ever ready। yaad hai na! yaad hai?aapki bahut achhi daadi chandramni,achaanak gai thi,yaad hai?tabhi se, kitna time ho gaya, (10 saal) aur uske baad kitne achaanak ke hue hain? aapki daadi kaise gai?achaanak gai na। achha daadi se pyaar hai, to yeh achaanak ka paath daadi ko yaad karke yaad karo। jaise daadi apne lakshya ko poora karke gai, aise nahin gai। usko certificate mila, karmaateet,karmendriyon ne bhi apni aakarshan mein nahin baandha,saakshi hoke karmendriyaan sheetal hoti rahi,hoti rahi। aakarshan ne nahin kheencha,na karmendriyon ne kheencha, na kisi aatma ke moh ne kheencha,nirmohi,nashtomoha,nahin to kai log jaate jaate yaad mein bol padte hain, phalaana,phalaana,phalaana… lekin daadi nashtomoha smriti swaroop mein gai,karmendriyaan jeet banke gai। koi karmendriy ne apne taraph duhkh ki lahar mein nahin kheencha। to daadi kehte ho,yaad aati hai na, aani hi chaahiye kyonki number one thi na। to one number ne win to kiya na। lekin jab bhi daadi ki yaad aave to sirf chitra nahin dekhna lekin yeh yaad karo ki main bhi ever ready hoon। mujhe bhi achaanak ka paath yaad hai?abhi-abhi main bhi achaanak chali jaaoon, to nashtomoha,prakritijeet hoon? yahi daadi ki saugaat sab apne paas rakho। samjha।

achha - chaaron or ke aaye hue patra sandesh email sab baapdaada ke paas pahunch gaye hain। sabne apne pyaar ki nishaani, khud nahin aa sake to patra dvaara email dvaara bhej di hai। baapdaada ne ek-ek dil ke pyaar ke patra sandesh saugaat sveekaar ki aur har ek ko baapdaada apne naynon mein emerge kar, pyaar ka respond yaadapyaar ke roop mein de rahe hai। achha hai yeh parmaatma pyaar bahut purooshaartha mein sahayog deta hai। to har ek bachcha pyaara hai, pyaare rahenge aur pyaar ke jhoole mein jhoolte hue baapdaada ke saath apne ghar chalenge। woh bhi time aa jaayega। jo sab saath chalenge,saath chalne vaale ho na। peechhe peechhe nahin aana, maja nahin aayega। maja hai haath mein haath, saath mein saath, haath hai shreemat, shreemat buddhi mein hogi, aatma paramatma ka saath hoga aur ghar chalenge। chalne vaale ho na sabhi, rah nahin jaana। abhi bhi saath hai,chaahe kisi bhi kone mein ho, lekin baap saath hai,saath rahenge,saath chalenge aur phir brahma baap ke saath raajya karenge। pakka vaayda hai na। beech mein nahin rah jaana। koi kastam ki cheez hogi to rook jaayegi। raavan ki cheez hui na kastam। koi bhi raavan ka sanskaar, svabhaav woh dharmaraaj puri kastam mein phansa degi। aur baap ke saath chale jaayenge,aur koi agar hoga to kastam mein rookna padega, achha lagega। nahin lagega na? baap ko bhi achha nahin lagega। jab vaayda hai saath ka, to sada saath rehna। peechhe vaale vaayda hai na pakka, peechhe vaale haath uthaao,pakka vaayda hai! achha, theek hai। jo bhi aaye hain, jahaan se bhi aaye hain,ek to saath nahin chhodna,har samay baap aur aap, kitna maja aayega। baap aur aap, maja hai na। teachers maja hai na ismen। ki kabhi kabhi alag-alag bhi ho jaaen,achha hai,baba ka saath chhod denge! nahin chhodna,pakka? ek second bhi nahin। isi ko hi sachcha pyaar kaha jaata hai। theek hai na? pakka,pakka,pakka hai! yeh photo nikal raha hai aapka, vatan mein nikal raha hai। is camera mein to aayega nahin, vatan mein nikal raha hai, bahut achha।

achha,chaaron or ke sabhi baapdaada ke dil pasanda bachche, dilaaraam hai na, to dilaaraam ke dil pasanda bachche, pyaar ke anubhvon mein sada lahraane vaale bachche, ek baap doosra na koi, svapna mein bhi doosra na koi, aise baapdaada ke ati pyaare aur ati dehbhaan se nyaare, sikeeldhe,padamguna bhaagyashaali bachchon ko dil ka yaadapyaar aur padam-padamguna duaayen hon,saath mein baalak so maalik bachchon ko baapdaada ka namaste।

aphreeka ke 28 deshon se jo pahli baar aaye hain woh khade hue:-bahut achha,bhale padhaare। aphreeka ke nimitta bane hue kahaan hai! dekho, aap kitne bhaagyavaan hain,svayan baap ne aap bachchon ko yaad kiya aur koi na koi dvaara sandesh bhijvaaya। to apne bhaagya ko dekh karke khush ho rahe ho na! sabhi aapko dekhke khush ho rahe ho, kyonki brahman parivaar mein vriddhi ho gai na। parivaar mein koi bhi badhta hai to khushi hoti hai na। to sab dekho khush ho rahe hain aap sabko dekh karke। doosre deshon se jo pahli baar aaye hain woh utho:- mubaarak ho, mubaarak ho,mubaarak ho।

daadiyon se:- sikeeldhi daadiyaan hain na। daadiyaan hain ya saathi hain, lekin sikeeldhi hain। (daadi jaanki se) baitho। abhi to seat par set ho na। baapdaada ne nimitta banaaya hai। is bachchi ko (guljaar daadi ko) bhi nimitta banaaya hai, donon teenon milkar bahut achhi reeti se sva purooshaartha aur vishwa seva mein aur vidhi se siddhi praapta karaane ke nimitta banengi। woh to riddhi sidhi vaale hain alpakaal ke,aapki hai vidhi se siddhi। vidhi se siddhi ke bajaae unhonne ridhi siddhi kar di hai। baapdaada ne daadi jaanki ke sir par haath rakha) theek hai na। sabhi milkar karenge, sabhi mil karke sangathan ko umang-utsaah mein laayenge। yeh to nimitta pahla number,doosra number,teesra number de dete hain lekin hain sabhi seva ke saathi। ek do ko umang dilaate aage badhenge aur jo daadi ka sankalp raha hai,baap ko pratyaksha karne ka, daadi ne bhi button to haath mein liya hai lekin dabaayenge to aap na। aap hi dabaayenge na। to sabhi milke, jo bhi nimitta bane hue hain,sabhi milke ek do mein raay karke, kyonki sangathan ki shakti bahut jaldi sahaj kaarya kar leti hai। haan ji,haan ji karte vishwa ko apne charnon mein haan ji karaana hai। to sangathan to achha hai। har ek ki visheshta hai, aur visheshta ko aap log aapas mein varnan bhi karte ho। class karte ho na visheshtaaon ka। bas vishesh hain, visheshtaayen dekhni hain, visheshtaayen deni hain। vishesh kaarya karne ke liye visheshta dekho,visheshta ka ek do mein sahayog do। achha hai (daadi jaanki se) bhaari to nahin ho na। bhaari to nahin hoti na! (bhaari rahne ka akla hi nahin hai) akla nahin hai, yahi achha hai। yeh bachchi (guljaar daadi) bhi aapko saath deti hai,yeh sab saathi hain। (pardaadi bhi khushi mein naachti rehti hai) achha khush rehti hai, naachti rehti hai। (achhe geet gaati hai) daadi bhi geet gaati thi na। bachpan ke saathi hain na। (manohar daadi se) theek hai na। iski visheshta yeh hai jo saakaar baap ke samay sab taraph chakra lagaane mein number one thi। baapdaada kehta tha chakkar lagaao, chakkar lagaao to pahla number aap taiyaar hoti thi। abhi bhi pahla number class karaane mein pahla number, sangathan mein pahunchne mein, har kaarya mein pahla number। (abhi shant jyaada rehti hai) abhi bachpan ko yaad karo,beemaari ko nahin, bachpan yaad karo। (kidni mein ston ho gaya hai) aajkal yeh beemaariyaan to common hai, baithe baithe bhi ho jaata hai। sote,baithte ho jaata hai। na sona hai na baithna hai chakkar lagaana hai।

videsh ki mukhya badi bahinon se:-achha foreign group aaya hai। baapdaada ko khushi hoti hai ki nimitta foreign mein bhi India ki bahnen hi bani hain। India ne foreign mein raunak laai hai। lekin India ki samajhke nahin rehti ho, vishwa ki samajhke rehti ho tabhi seva ho saki hai agar India ka bhaan ho na to seva nahin ho sake, lekin yeh achha kiya hai ki foreign mein jaate vishwa seva ka lakshya rakha hai। behad mein gai, had mein nahin। iseelie baapdaada khush hai। aur unhon ko bhi saath lekar chalte ho na to woh bhi apne ko aage se aage samajhte hain। to sangathan bhi achha ek do mein len den bhi achhi karte ho, theek hai baapdaada ko pasanda hai। certificate achha hai। saari vishwa kitna yaad karti hai। aur yeh bhi achha hai lakshya jo rakha hai ek do ke taraph chakkar lagaane ka, yeh bahut achha kiya hai। jaise ek desh ki doosre desh mein,beech beech mein chakkar lagaate ho yeh refreshment bahut zaroori hai। chaahe chhoti behen ho lekin woh door se aake class karaayegi change hota hai na to sabko achha lagta hai। badi hote bhi chhoti class kabhi kabhi karaati hai to raunak aati hai। isliye yeh system achhi rakhi hai chakkar lagaane ki। to achha chal raha hai na। achha hai। (is baari aur koi naveenta aave) (jarmani mein book fair bahut achha raha) din pratidin anubhvi bhi hote jaate ho na,anubhav bhi kaam karta hai। to achha hai। achha chala rahe hain।