Avyakt murli for Saturday 18 January 2020

> 18-1-20 om shanti “dincharya'' madhuban

praaneshvar avyakt baapdaada ke ati snehi, sada parmaatma lav mein lavleen rahne vaali, saakaar va avyakt paalna ki anubhvi aatmaayen, nimitta teachers bahinen tatha sarva brahman kul bhooshan bhaai bahinen,

eeshvareey sneh sampanna madhur yaad sveekaar karna ji।

ham sabke ati priy “pitaashri brahma baba'' ka smriti so samarthi divas sabhi brahma vatsa bahut sneh aur shraddha ke saath har varsha manaate hain। baba ko avyakt hue 51 varsha poore ho rahe hain। ham sabko alaukik janma dene vaali badi maa tatha avyakt roop se shivbaaba ke saath combined hokar itni shreshtha oonchi paalna dene vaale avyakt brahma baap ka yeh smriti divas unke anek charitron ko saakaar kar deta hai। kaise 84 varshon ki yeh sangamayug ki alaukik yaatra nirvighna roop se aage badhte apne oonche lakshya ke sameep pahunch chuki hai, yeh to aap ham sabhi anubhav kar rahe hain। unki chhatrachhaaya mein hajaaron brahma vatsa maaya aur prakriti par jeet praapta kar apni sampoornata ki manzil ke sameep pahunch rahe hain। sangamayugi teevra purushaarthi aatmaayen apne tan-man-dhan ke sahayog se, advance party ki aatmaayen apni divya dhaarna sampanna jeevan dvaara parmaatma pratyakshata ka nagaada bajaane ki taiyaari mein hai। abhi woh din bhi sameep dikhaai de rahe hang jab chaaron or “yahi hai, yahi hai, yahi hai” ka aavaaj goonjega। jayjaykaar ke naare lagenge aur sarva aatmaayen kuchh na kuchh anchali le, apne muktidhaam ghar mein jaayengi। phir hamaari nai satayugi duniya aayegi। bolo, yeh drishya aankhon ke saamne aa rahe hain na! meetha baba pichhle do varshon se saakshi ban bachchon ki har activity par nazar rakhte, aakaari aur niraakaari roop se madadgaar ban vishwa kalyaan ki seva karva rahe hain।

madhuban paandav bhavan mein har varsha ki bhaanti is smriti divas par bhi vishesh chaaron dhaamon ka shrringaar kalkatta ke bhaai bahinon ne bahut sundar variety phoolon se kiya hai। amritvele se hi sabhi bhaai bahinen usi sneh mein samaate hue vishesh sabhi sthaanon par avyakt milan manaate avyakt vatan ki sair karte rahe। phir pyaare baba ko bhog sveekaar karaaya gaya। uske baad teenon sthaanon par sabhi ne yog-tapasya ki। shaantivan mein to saakaar brahma baba ki paalna liye hue nirvair bhaai, ameerchanda bhaai ne baba ke ang-sang ke anubhav sunaaye। vishesh dophar ke samay sab jagah meethe baba ko bhog lagaaya gaya, phir sabhi sthaanon par brahma bhojan hua। shaam ke samay sabhi ne vishesh brahma baap ke sneh mein samaate hue diamond hall mein video dvaara avyakt mahaavaakya sune jo aapke paas bhej rahe hain। abhi gujraat tatha anya desh-videsh ke sthaanon se lagbhag 20 hajaar bhaai-bahnen baba ke ghar mein pahunche hain, seva ka tarna gujraat zone ka hai। daadi jaanki ji roz shaam ke samay vishesh yog karvaate apne vardaani mahaavaakyon se sabko refresh karti hain। ham sabki ati snehi daadi guljaar abhi tak mumbai gaamdevi sevaakendra par hain। sabhi ke shubh sankalpon ke vibration daadi tak pahunchte rehte hain। ummeend hai thandi ke baad daadi ji apne madhuban ghar mein aa jaayengi। sabhi bhaai bahinon ki shubh bhaavnaayen, baapdaada ke paas pahunch rahi hain। baba zaroor bachchon ki aash poori karenge। achha - sabhi ko bahut-bahut yaad… om shanti।

18-01-2020 om shanti avyakt mahaavaakya - video dvaara 18-1-07 madhuban

“ab svayan ko mukta kar master muktidaata ban sabko mukti dilaane ke nimitta bano”

aaj sneh ke saagar baapdaada chaaron or ke snehi bachchon ko dekh rahe hain। do prakaar ke bachche dekh-dekh harshit ho rahe hain। ek hain lavleen bachche aur doosre hain lovely bachche, donon ke sneh ki lahren baap ke paas amritvele ke bhi pahle se pahunch rahi hain। har ek bachche ke dil se automatic geet baj raha hai – “mere baba”। baapdaada ke dil se bhi yahi geet bajta –“mere bachche, laadle bachche, baapdaada ke bhi sirtaaj bachche”।

aaj smriti divas ke kaaran sabke man mein sneh ki lahar jyaada hai। anek bachchon ki sneh ke motiyon ki maalaayen baapdaada ke gale mein piro rahi hain। baap bhi apne snehi baanhon ki maala bachchon ko pahna rahe hain। behad ke baapdaada ki behad ki baanhon mein sama gaye hain। aaj sab vishesh sneh ke vimaan mein pahunch gaye hain aur door-door se bhi man ke vimaan mein avyakt roop se, pharishton ke roop se pahunch gaye hain। sabhi bachchon ko baapdaada aaj smriti divas so samartha divas ki padmaapdam yaad de rahe hain। yeh divas kitni smritiyaan dilaata hai aur har smriti second mein samartha bana deti hai। smritiyon ki list second mein smriti mein aa jaati hai na। smriti saamne aate samarthi ka nasha chadh jaata hai। pahli-pahli smriti yaad hai na! jab baap ke bane to baap ne kya smriti dilaai? aap kalpa pahle vaali bhaagyavaan aatma ho। yaad karo is pahli smriti se kya parivartan aa gaya? aatma-abhimaani banne se parmaatma baap ke sneh ka nasha chadh gaya। kyon nasha chadha? dil se pahla sneh ka shabd kaun sa nikla? “mera meetha baba” aur is ek golden shabd nikalne se nasha kya chadha? saari parmaatma praaptiyaan mera baba kahne se, jaanne se, maanne se aapki apni praaptiyaan ho gai। anubhav hai na! mera baba kahne se kitni praaptiyaan aapki ho gai! jahaan praaptiyaan hoti hain vahaan yaad karni nahin padti lekin svatah hi aati hai, sahaj hi aati hai kyonki meri ho gai na! baap ka khajaana mera khajaana ho gaya, to meraapan yaad kiya nahin jaata hai, yaad rehta hi hai। mera bhulaana mushkil hota hai, yaad karna mushkil nahin hota। jaise anubhav hai mera shareer, to bhoolta hai? bhulaana padta hai, kyon? mera hai na! to jahaan meraapan aata hai vahaan sahaj yaad ho jaati hai। to smriti ne samartha aatma bana diya - ek shabd “mera baba” ne। bhaagya vidhaata akhut khajaane ke daata ko mera bana liya। aisi kamaal karne vaale bachche ho na! parmaatma paalna ke adhikaari ban gaye, jo parmaatma paalna saare kalpa mein ek baar milti hai, aatmaayen aur dev aatmaon ki paalna to milti hai lekin parmaatma paalna sirf ek janma ke liye milti hai।

to aaj ke smriti so samarthi divas par parmaatma paalna ka nasha aur khushi sahaj yaad rahi na! kyonki aaj ka vaayumandal sahaj yaad ka tha। to aaj ke din sahajyogi rahe ki aaj ke din bhi yaad ke liye yuddha karni padi? kyonki aaj ka din sneh ka din kahenge na, to sneh mehnat ko mita deta hai। sneh sab baaten sahaj kar deta hai। to sabhi aaj ke din vishesh sahajyogi rahe ya mushkil aai? jisko aaj ke din mushkil aai ho woh haath uthaao। kisko bhi nahin aai? sab sahajyogi rahe। achha jo sahajyogi rahe woh haath uthaao। (sabhi ne uthaaya) achha - sahajyogi rahe? aaj maaya ko chhutti de di thi। aaj maaya nahin aai? aaj maaya ko vidaai de di? achha aaj to vidaai de di, uski mubaarak ho, agar aise hi sneh mein samaaye raho to maaya ko to vidaai sada ke liye ho jaayegi।

baapdaada is varsha ko nyaara varsha, sarva ka pyaara varsha, mehnat se mukta varsha, samasya se mukta varsha manaane chaahte hain। aap sabhi ko pasanda hai? pasanda hai? mukta varsha manaayenge? kyonki muktidhaam mein jaana hai, anek duhkhi ashaanta aatmaon ko muktidaata baap se saathi ban mukti dilaana hai। to master muktidaata jab svayan mukta banenge tab to mukti varsha manaayenge na! kyonki aap brahman aatmaayen svayan mukta ban anekon ko mukti dilaane ke nimitta ho। ek bhaasha jo mukti dilaane ke bajaae bandhan mein baandhati hai, samasya ke adheen banaati hai, woh hai aisa nahin, vaisa। vaisa nahin aisa। jab samasya aati hai to yahi kehte hain baba aisa nahin tha, vaisa tha na। aisa nahin hota, aisa hota na। yeh hai bahaane baaji karne ka khel।

baapdaada ne sabka file dekha, to file mein kya dekha? majority ka file pratigya karne ke paper se bhara hua hai। pratigya karne ke time bahut dil se karte hain, sochte bhi hain lekin abhi tak dekha ki file bada hota jaata hai lekin final nahin hua hai। dridh pratigya ke liye kaha hua hai - jaan chali jaae lekin pratigya na jaae। to baapdaada ne aaj sabke file dekhe। bahut pratigyaayen achhi-achhi ki hai। man se bhi ki hai aur likh karke bhi ki hai। to is varsha kya karenge? file ko badhaayenge ya pratigya ko final karenge? kya karenge? pahli line vaale bataao, paandav sunaao, teachers sunaao। is varsha jo baapdaada ke paas file bada hota jaata hai, usko final karenge ya is varsha bhi file mein kaagaj add karenge? kya karenge? bolo paandav, final karenge? jo samajhte hain - jhukna pade, badalna pade, sahan karna bhi pade, sunna bhi pade, lekin badalna hi hai, woh haath uthaao। dekho T.vi. mein sabka photo nikaalo। sabhi ka photo nikaalna, do teen chaar T.vi. hain, sab taraph ke photo nikaalo। yeh record rakhna, baap ko yeh photo nikaal ke dena। kahaan hai T.vi. vaale? baapdaada bhi file ka phaayda to uthaave। mubaarak ho, mubaarak ho, apne aapke liye hi taali bajaao।

dekho jaise ek taraph science doosre taraph bhrashtaachaari, teesre taraph paapaachaari, sab apne-apne kaarya mein aur vriddhi karte ja rahe hain। bahut naye-naye plan banaate jaate hain। to aap to world creator ke bachche ho, to aap is varsha aisi naveenta ke saadhan apnaao jo pratigya dridh ho jaae kyonki sabhi pratyakshata chaahte hain। kitna kharcha kar rahe hain, jagah-jagah par bade-bade programme kar rahe hain। har ek varga mehnat achhi kar rahe hain lekin abhi is varsha yeh addition karo ki jo bhi seva karo, maano mukh ki seva karte ho, to sirf mukh ki seva nahin, mansa vaacha aur sneh sahayog roopi karma ek hi samay mein teen sevaayen ikatthi hon। alag-alag nahin hon। ek seva mein dekha jaata hai ki jo baapdaada result dekhne chaahte hain woh nahin hoti। jo aap bhi chaahte ho ki pratyakshata ho jaae। abhi tak pahle se yeh result bahut achhi hai - sab achha-achha, bahut achha kahke jaate hain। lekin achha banna arthaat pratyakshata hona। to ab addition karo ki ek hi samay par mansa-vaacha, karmana mein snehi sahayogi banna, har ek saathi chaahe brahman saathi hain, chaahe baahar vaale seva ke nimitta jo bante hain, woh saathi hon lekin sahayog aur sneh dena - yeh hai karmana seva mein number lena। yeh bhaasha nahin kehna, yeh aisa kiya na, tabhi aisa karna pada। sneh ke bajaae thoda-thoda kehna pada, baba shabd nahin bolta। yeh karna hi padta hai, kehna hi padta hai, dekhna hi padta hai… yeh nahin। itne varsho mein dekh liya, baapdaada ne chhutti de di। aisa nahin vaisa karte rahe, lekin abhi kab tak? baapdaada se sabhi roohrihaan mein majority kehte hain baba aakhir bhi parda kab kholenge? kab tak chalega? to baapdaada aapko kehte hain ki yeh puraani bhaasha, puraani chaal, albelepan ki, kaduvepan ki kab tak? baapdaada ka bhi question hai kab tak? aap uttar do to baapdaada bhi uttar dega kab tak vinaash hoga kyonki baapdaada vinaash ka parda to abhi bhi isi second mein khol sakta hai lekin pahle raajya karne vaale to taiyaar hon। to ab se taiyaari karenge tab samaapti sameep laayenge। kisi bhi kamjori ki baat mein kaaran nahin bataao, nivaaran karo, yeh kaaran tha na। baapdaada saare din mein bachchon ka khel to dekhte hain na, bachchon se pyaar hai na, to baar-baar khel dekhte rehte hain। baapdaada ki T.vi. bahut badi hai। ek samay par world dikhaai de sakti hai, chaaron or ke bachche dikhaai de sakte hain। chaahe America ho, chaahe gudgaanv ho, sab dikhaai dete hain। to baapdaada khel bahut dekhte hain। taalne ki bhaasha bahut achhi hai, yeh kaaran tha na, baba meri galti nahin hai, isne aisa kiya na। usne to kiya lekin aapne samaadhaan kiya? kaaran ko kaaran hi banne diya ya kaaran ko nivaaran mein badli kiya? to sabhi poochhte hain na ki baba aapki kya aasha hai? to baapdaada aasha suna rahe hain। baapdaada ki ek hi aasha hai - nivaaran dikhaai deve, kaaran khatma ho jaae। samasya samaapta ho jaae, samaadhaan hota rahe। ho sakta hai? ho sakta hai? pahli line - ho sakta hai? kaandh to hilaao। peechhe vaale ho sakta hai? (sabhi ne haath uthaaya) achha। to kal agar T.vi. kholenge, T.vi mein dekhege to zaroor na। to kal T.vi. dekhenge to chaahe foreign chaahe india, chaahe chhote gaanv, chaahe bahut badi state, kahaan bhi kaaran dikhaai nahin dega? pakka? ismen haan nahin kar rahe hain? hoga? haath uthaao। haath bahut achha uthaate ho, baapdaada khush ho jaata। kamaal hai haath uthaane ki। khush karna to aata hai bachchon ko kyonki baapdaada dekhte hain socho - jo aap koton mein koi, koi mein koi nimitta bane ho, abhi in bachchon ke sivaae aur kaun karega? aapko hi to karna hai na! to baapdaada ki aap bachchon mein ummeeden hain। aur jo aayenge na, woh to aapki avastha dekh karke hi theek ho jaayenge, unhon ko mehnat nahin karni padegi। aap ban jaao bas kyonki aap sabhi ne janma lete hi baap se vaayda kiya hai - saath rahenge, saathi banenge aur saath chalenge aur brahma baap ke saath raajya mein aayenge। yeh vaayda kiya hai na? jab saath rahenge, saath chalenge to saath mein seva ke saathi bhi to ho na!

aaj ke din ka aur samaachaar sunaayen। aaj ke din advance party bhi baapdaada ke paas emerge hoti hai। to advance party bhi aapko yaad kar rahi hai ki kab baap ke saath muktidhaam ka darvaaja kholenge! aaj saari advance party baapdaada ko yahi kah rahi thi ki hamko taareekh bataao। to kya javaab den? bataao kya javaab den? javaab dene mein kaun hoshiyaar hai? baapdaada to yahi uttar dete hain ki jalda se jalda ho hi jaayega। lekin ismen aap bachchon ka baap ko sahayog chaahiye। sabhi saath chalenge na! saath chalne vaale hain ya ruk-rook kar chalne vaale hain? saath mein chalne vaale hain na! saath mein chalna pasanda hai na? to samaan banna padega। agar saath mein chalna hai to samaan to banna hi padega na! kahaavat kya hai? haath mein haath ho, saath mein saath ho। to haath mein haath arthaat samaan। to bolo daadiyaan bolo, taiyaari ho jaayegi? daadiyaan bolo। daadiyaan haath uthaao। daadaayen haath uthaao। to bataao daadiyaan, daadaayen kya taareekh hai koi? (abhi nahin to kabhi nahin) abhi nahin to kabhi nahin ka arth kya hua? abhi taiyaar hain na! javaab to achha diya। daadiyaan? poora hona hi hai। har ek chhote bade ismen apne ko jimmevaar samjhen। ismen chhota nahin hona hai। 7 din ka bachcha bhi jimmevaar hai kyonki saath chalna hai na। akela baap jaane chaahe to chala jaae lekin baap ja nahin sakta। saath chalna hai। vaayda hai baap ka bhi aur aap bachchon ka bhi। vaayda to nibhaana hai na! nibhaana hai na? yeh madhuban vaale baithe hain na!

madhuban mein jo bhi charge ke heads hain, chaarjez to bahut hain na, shaantivan, gyaan sarovar, paandav bhavan sab jagah hain। to jo charge vaale hain unke naamon ki list baapdaada ko dena, unse hisaab lenge। aur jo sabhi teachers incharge hain, centre incharge hain ya zone incharge hain, unhon ka ek din sangathan karenge, hisaab-kitaab to poochhenge na! kyonki baapdaada ke paas bahut duhkh aur ashaanti ke aavaaj aate hain। pareshaani ke aavaaj aate hain। aap logon ke paas nahin sunne aate? aapke bhi to bhakta honge na! to bhakton ki pukaar aap ishta devon ko nahin aati? teachers ko bhakton ki aavaaj sunaai deti hai? achha।

seva ka tarna gujraat ka hai:- gujraat dar par hai na। gujraat mein baapdaada ne dekha hai ki majority ek to geeta paathshaalaayen bahut hain aur geeta paathshaalaayen chalaane vaale hands bhi bahut hain। abhi gujraat kya karegi? sevaadhaari bhi bahut hain, seva bhi bahut hai, abhi nai seva kya karenge? jo kisne nahin ki ho, aisa koi plan banaaya hai? jo kisne nahin ki ho, woh gujraat karke dikhaave। to gujraat kya karega? mansa seva mein number one hoke dikhaao। sabhi ke liye hai। lekin gujraat ka tarna hai to gujraat ko kah rahe hain lekin abhi svayan ki mansa powerful hone se mansa seva ki result saamne aayegi। jaise vaacha ki pahle nahin thi, abhi vaacha seva ki result saamne aa rahi hai। mehnat to achhi ki hai। baapdaada nimitta mehnat ki mubaarak bhi dete hain lekin samay fast hai, abhi bhi samay bahut fast ja raha hai। achha। mubaarak ho। gujraat jaise sthaan ke hisaab se najdeek hai vaise baap ke dil mein bhi najdeek hai। achhe achhe hain, shuru se dekho to paandav ya shaktiyaan achhe-achhe nikle hain। abhi aise speaker taiyaar karo। aap sakaash do aur woh bhaashan karen। achha, bahut achha। padamguna mubaarak hai।

double videshi:- baapdaada ne pahle bhi kaha to jab double videshi aate hain to madhuban ka shrringaar ho jaata hai। double videshiyon se sabhi ka pyaar bahut hai। jab bhi aapke group ko dekhte hain na to sabhi khush ho jaate hain kyonki aap bhi koton mein koi, koi mein koi nikle ho aur aajkal videsh seva ki achhi news hai। aaj abhi sunaaya na ki ek samay par ek seva nahin karo, teenon hi sevaayen ikatthi-ikatthi hon to uska prabhaav jaldi hoga। apne chehre se, apni chalan se bhi seva kar sakte hain। chalte-phirte museum ho। jaise museum mein va pradarshani mein bhinna-bhinna chitra hote hain na vaise aapke nayan, aapka mastak, aapke muskaraate hue honth, yeh bhinna-bhinna jo saadhan hain, usse seva kar sakte hain। achhe hain, baapdaada ko himmat vaale bhi lagte hain sirf abhi thoda sa realisation sookshm chaahiye। realise karte ho lekin thoda sa sookshm roop se realisation karke number one ban jaao। win karo aur one bano, second number nahin, one। theek hai na! one hai na, tu to nahin na! one number hain? kaandh hilaao। achha hai, videshiyon ka group madhuban mein aata rahe, yeh baapdaada ko bahut achha lagta hai। madhuban saj jaata hai। achha।

baapdaada ke paas phoolon ke shrringaar vaale group ki yaadapyaar bhi aai hai, (kalkatta ke bhaai bahinen), woh sangathan utho, kahaan hai। dekho sabhi ko phoolon ka shrangaar achha laga na। (smriti divas nimitta baapdaada ke sabhi yaadgaar sthaanon ko khoob sundar phool maalaaon se sajaaya hai) phoolon ka shrringaar to common baat hai, log bhi karte hain lekin aapke shrringaar aur logon ke shrringaar mein farka hai - aapne snehi swaroop ban shrringaar kiya hai, woh duty samajhke karte hain aur aapne sneh se kiya hai to jahaan sneh hota hai, woh phoolon ki sugandha aur shrringaar aur sundar ho jaata hai।

jo aane vaale aapke bhaai-behen hain woh bhi dekh karke khush ho jaate hain, vaah! kamaal hai, kamaal hai। to aap sabhi ne jis sneh se sajaaya hai, to baapdaada usse jyaada padamguna aapko sneh de raha hai, mubaarak ho। achha।

chaaron or ke patra, yaad patra email, phone, chaaron or ke bahut-bahut aaye hain। yahaan madhuban mein bhi aaye hain to vatan mein bhi pahunche hain। aaj ke din jo bandhan vaali maataayen hain, unhon ki bhi bahut sneh bhari man ki yaaden baapdaada ke paas pahunch gai hain। baapdaada aise snehi bachchon ko bahut yaad bhi karte aur duaayen bhi dete hain।

aajkal baapdaada dekh rahe hain sab bahut khushi-khushi se door baithe bhi najdeek mein anubhav kar rahe hain। lekin madhuban mein sammukh aana, apni jholi bharna, itne bade parivaar se milna, yeh parivaar kam nahin hai, kisi bhi reeti se dekh liya lekin sammukh parivaar ko dekh kitni khushi hoti hai kyonki 5 hajaar varsha ke baad mile hain। to woh anubhav apna hai lekin madhuban nivaasi banna, yeh golden chance bahut sahayog deta hai। anubhav bhi karte hain sabhi। lekin baapdaada khush hai ki sabhi ko murli se pyaar hai aur murli se pyaar arthaat murleedhar se pyaar। koi kahe murleedhar se to pyaar hai lekin murli kabhi-kabhi sun lete hain, baapdaada kehte hain baapdaada uska pyaar, pyaar nahin samajhte hain। pyaar nibhaana alag hai, pyaar karna alag hai। jisko murli se pyaar hai woh hai pyaar nibhaane vaale aur murli se pyaar nahin to pyaar karne vaalon ki list mein hai, nibhaane vaale nahin। madhuban mein murli baaje, madhuban ka gaayan hai। madhuban ki dharni ka hi mahatva hai। achha।

to chaaron or ke snehi bachchon ko lovely aur lavleen donon bachchon ko, sada baap ke shreemat pramaan har kadam mein padam jama karne vaale knowledgeful powerful bachchon ko, sada snehi bhi aur svamaandhaari bhi, sammaandhaari bhi, aise sada baap ki shreemat ko paalan karne vaale vijayi bachchon ko, sada baap ke har kadam par kadam uthaane vaale sahajyogi bachchon ko baapdaada ka lekin aaj vatan mein jo aapke advance party vaale bachche hain, unhonne bhi ek ek ne yahi kaha hai ki hamaare taraph se bhi sabhi ko, chaaron or ke bachchon ko hamaari yaadapyaar dena aur hamaara sandesh dena ki ham aapka intajaar kar rahe hain। aap jaldi se jaldi intajaam karo, vishesh aap sabki pyaari maa, deedi, bhaau vishvakishor aur jo bhi saathi gaye hain unhonne sabhi ne aap sabko yaadapyaar diya hai। aur saath-saath meethi maa aapki usne yahi kaha hai ki aap bhi vijayi ban dukh darda door kar jaldi jaldi muktidhaam ka get kholne ke liye baap ke saathi ban jaao। brahma baap ne bhi jinhonne saakaar mein baap ko nahin dekha hai, to brahma baap bhi vishesh aap sabhi ko bahut dil se yaadapyaar de rahe hain to yaadapyaar aur namaste।

daadi jaanki:- teen baari om shanti। wonderful baba, wonderful baba ke bachche, baba drishti kitni achhi deta hai aur ham drishti se kaun si srishti mein chale jaate hain। sookshm vatan, mool vatan। donon vatan bahut achhe hain। sookshm vatan mein baba aa jaata hai, phir mool vatan mein kheench leta hai। to ham baba ke bachche hain na। bachche kehte hain baba, baba kehta bachche। hamaare dil se baba aise nikalta hai, dil kahe baba aapka shukriya। aap bahut achhe ho, ham bhi achhe hain। samay anusaar yahaan saamne haajir hona, baba aa jaata hai। ham mehnat nahin karte hain par muhabbat hai। main kaun hoon, mera kaun hai! har ek ka apna part hai।

kalkatta vaale sada hi phoolon se sajaate hain। har ek ka apna part hai, sabke part ko dekh ham khush hote hain। khush raha aur khush karna yeh hamaara pharja kehta hai। khush raho, khushi baanto। yeh milan ki rasam bhi bahut pyaari lagti hai। om shanti।